Read S'gaw Karen လံာ်လူၤကၣ် 16 Bible Online

လံာ်လူၤကၣ် 16 - S'gaw Karen bible

လံာ်လူၤကၣ် 16

¹ယ့ၣ်ၡူးစံးဘၣ်အပျဲၢ်အဘီၣ်တဖၣ်, “ပှၤထူးပှၤတီၤအိၣ်ဝဲဒၣ်တဂၤလၢ အအိၣ်ဒီးပှၤအံးထွဲကွၢ်ထွဲအတၢ်ဖိတၢ်လံၤတဂၤလီၤ. အဝဲဘၣ်တၢ်တဲဘၣ်အီၤလၢအပှၤကွၢ်ထွဲတၢ်ဖိတၢ်လံၤတဂၤအံၤ မၤလၢာ်ဂီၤကလီအကျိၣ်အစ့လီၤ.

²ပှၤထူးပှၤတီၤကိးဃီၤအပှၤကွၢ်ထွဲတၢ်စုလီၢ်ခီၣ်ခိၣ်အဝဲန့ၣ်ဒီးစံးဘၣ်အီၤ, ‘နဂ့ၢ်နကျိၤလၢယနၢ်ဟူဘၣ်အီၤတမံၤအံၤမ့ၢ်တၢ်ဒ်လဲၣ်. ဟ့ၣ်ထီၣ်တၢ်ပာ်ဖျါအလၢအပှဲၤဘၣ်ဃးဒီးနတၢ်ကွၢ်ထွဲပၢဆှၢ ယတၢ်စုလီၢ်ခီၣ်ခိၣ်တက့ၢ်. အဂ့ၢ်ဒ်အံၤ, နကဲယပှၤကွၢ်ထွဲတၢ်စုလီၢ်ခီၣ်ခိၣ်တသ့လၢၤဘၣ်.’

³တုၤနုၤတစု, ပှၤကွၢ်ထွဲတၢ်ဖိတၢ်လံၤဆိကမိၣ်ဝဲလၢအသးပူၤ, ‘ယကစၢ်ကထုးထီၣ်ကွံာ်ယၤလၢယတၢ်မၤအလီၢ်လီၤ. မ့ၢ်ယကမၤ ဘၣ်ဒ်လဲၣ်. ယကခူၣ်တၢ်ပူၤအဂီၢ်ယဂံၢ်ယဘါတလၢတပှဲၤဘၣ်. ဒီးယကဃ့အီၣ်ယဆၣ်အဂီၢ်ယမဲာ်ဆှးလီၤ.

⁴ခဲကနံၣ်အံၤ, ယကဘၣ်မၤဒ်လဲၣ်န့ၣ်ယသ့ၣ်ညါလီၤ. ယမ့ၢ်မၤဒ်န့ၣ်ဒီး, ဖဲယတၢ်မၤတအိၣ်လၢၤအဆၢကတီၢ်န့ၣ်, ယကအိၣ်ဒီးတံၤသကိးတဖၣ်လၢ အကတူၢ်လိာ်ခီၣ်ဆၢယၤလၢအဝဲသ့ၣ်အဟံၣ်ပူၤဃီပူၤလီၤ.’

⁵လၢတၢ်န့ၣ်အဃိ, အဝဲဒၣ်ကိးဃီၤပှၤတဖၣ်လၢအိၣ်ဒီးအကမၢ် လၢအကဘၣ်လိးတူာ်က့ၤအကစၢ်လီၤ. အဝဲဒၣ်စံးဘၣ်ပှၤအဆိ ကတၢၢ်တဂၤ, ‘နဒ့ၣ်ကမၢ်လၢနကဘၣ်လိးက့ၤယကစၢ်န့ၣ်အိၣ်ဆံး အါလဲၣ်.’

⁶အဝဲဒၣ်စံးဆၢအီၤ, ‘သ့ၣ်စၤယံးသိအဒၢတကယၤလီၤ.’ ပှၤပၢၤတၢ်စုလီၢ်ခီၣ်ခိၣ်စံးအီၤ, ‘နစရီအိၣ်လၢအံၤ, ဆ့ၣ်နီၤဒီးကွဲးလီၤယဲၢ်ဆံတက့ၢ်.’

⁷အဝဲဒၣ်စံးဘၣ်ကဒီးပှၤအဂၤတဂၤ, ‘နဲဒၣ်တခီလဲၣ်. နဒ့ၣ်ကမၢ်လၢနကဘၣ်လိးက့ၤအိၣ်ဝဲဆံးအါလဲၣ်.’ အဝဲဒၣ်စံးဆၢအီၤ, ‘ဘုကၠူၣ်အကိၢ်တကယၤလီၤ.’ ပှၤပၢၤတၢ်စုလီၢ်ခီၣ်ခိၣ်စံးဘၣ်အီၤ, ‘နစရီအိၣ်လၢအံၤ, ဆ့ၣ်နီၤဒီးကွဲးလီၤဃိးဆံတက့ၢ်.’

⁸ပှၤပၢၤတၢ်စုလီၢ်ခီၣ်ခိၣ်တဂၤအံၤအကစၢ်စံးထီၣ်ပတြၢၤအီၤလၢ အမၤတၢ်လၢအလၢပှဲၤဒီးတၢ်ကူၣ်ဘၣ်ဖးသ့ဒ်အံၤအသိးအဃိန့ၣ်လီၤ. အဂ့ၢ်ဒ်အံၤ, ဖဲလၢအဘၣ်ဃးဒီးတၢ်ကွၢ်ထွဲသုးကျဲၤတၢ်လၢ အတၢ်ဂ့ၢ်တၢ်ကျိၤတဖၣ်အဂ့ၢ်န့ၣ်ပှၤလၢဟီၣ်ခိၣ်တစိၤအံၤတဖၣ် ကူၣ်ဘၣ်ဖးသ့ဒိၣ်န့ၢ်ပှၤဘၣ်ဃးဒီးတၢ်ကပီၤတဖၣ်, တက့ၢ်လီၤ.”

⁹ဒီးယ့ၣ်ၡူးကတိၤတၢ်ဒီးစံးဝဲ, “ဒီးလၢတၢ်န့ၣ်အဃိယစံးဘၣ်တဲဘၣ်သု, ဒ်သိးသုကမၤန့ၢ်တံၤသကိးအဂီၢ်, သူဟီၣ်ခိၣ်အတၢ်ထူးတၢ်တီၤ, ဒီးတုၤအလၢာ်ကွံာ်ဒီး သုကဘၣ်တၢ်တူၢ်လိာ်ခီၣ်ဆၢသုလၢဟံၣ်အထူအယိာ်န့ၣ်တက့ၢ်.

¹⁰ပှၤတဂၤလၢ်လၢ်လၢအတီဝဲလၢတၢ်ဂ့ၢ်အဆံးဖိတဖၣ်အပူၤန့ၣ်, ကတီစ့ၢ်ကီးဝဲလၢတၢ်ဂ့ၢ်အဒိၣ်တဖၣ်အပူၤလီၤ. ပှၤတဂၤလၢ်လၢ်လၢ အတတီလၢတၢ်ဂ့ၢ်အဆံးဖိတဖၣ်အပူၤန့ၣ်ကတတီစ့ၢ်ကီးဝဲလၢတၢ်ဂ့ၢ် အဒိၣ်တဖၣ်အပူၤလီၤ.

¹¹မ့မ့ၢ်ဒ်န့ၣ်ဒီး, လၢတၢ်ကွၢ်ထွဲပၢဆှၢဟီၣ်ခိၣ်အတၢ်ထူးတၢ်တီၤအပူၤ န့ၣ်သုမ့ၢ်တတီတ့ၢ်သုဝဲဒီး, တၢ်နာ်န့ၢ်သုလၢတၢ်ထူးတၢ်တီၤနီၢ်နီၢ် အဂီၢ်န့ၣ်, ကသ့ဝဲလၢကျဲဒ်လဲၣ်.

¹²ဒီးသုမ့ၢ်တတီတ့ၢ်သုဝဲဘၣ်ဃးဒီးတၢ်လၢအမ့ၢ်ပှၤတဂၤဒၣ်အတၢ်န့ၣ်, မ့ၢ်မတၤကဟ့ၣ်သုတၢ်လၢအမ့ၢ်သုတၢ်န့ၣ်လဲၣ်.

¹³‘တၢ်ခ့တၢ်ပှၤတဂၤမၤကစၢ်ခံဂၤအတၢ်မၤတသ့ဘၣ်. အဝဲဒၣ်ကသးဟ့အဝဲတဂၤ, ဒီးအဲၣ်အဂၤတဂၤလီၤ. အဝဲဒၣ်ကတီဒီးအဝဲတဂၤဒီးတပာ်ကဲဘၣ်အဂၤတဂၤလီၤ. သုမၤကစၢ်ယွၤအတၢ်မၤဒီးကျိၣ်စ့အတၢ်မၤခံမံၤလၢာ်တသ့ဘၣ်.”

¹⁴ပှၤဖၤရံၤၡဲတဖၣ်နၢ်ဟူဘၣ်တၢ်သ့ၣ်တဖၣ်အံၤခဲလၢာ်, ဒီးအဝဲသ့ၣ်နံၤဘၣ်ဖၣ်လဲယ့ၣ်ၡူး, အဂ့ၢ်မ့ၢ်လၢအဝဲသ့ၣ်အဲၣ်ကျိၣ်စ့အဃိလီၤ.

¹⁵ယ့ၣ်ၡူးစံးဘၣ်အဝဲသ့ၣ်, “သုမ့ၢ်ပှၤတဖၣ်လၢအမၤဖျါအသးဒ် အတီဝဲလိၤဝဲ, လၢပှၤကညီအမဲာ်ညါ, ဘၣ်ဆၣ်ဒီးကစၢ်ယွၤသ့ၣ်ညါသုသူၣ်သုသးလီၤ. အဂ့ၢ်ဒ်အံၤ, တၢ်လၢပှၤကညီဆိကမိၣ်လၢ အအိၣ်ဒီးအလုၢ်အပှ့ၤဖးဒိၣ်န့ၣ်, လၢကစၢ်ယွၤအမဲာ်ညါ မ့ၢ်တၢ်လၢအလီၤသးဘၣ်အၢန့ၣ်လီၤ.

¹⁶စီၤမိၤၡ့အတၢ်သိၣ်တၢ်သီဒီးဝံအတၢ်ကွဲးတဖၣ်အိၣ်ဝဲဒၣ်တုၤလၢ ပှၤဘျၢတၢ်စီၤယိၤဟၣ်အဆၢကတီၢ်လီၤ. စးထီၣ်ဖဲန့ၣ် တၢ်သးခု အကစီၣ်ဘၣ်ဃးဒီးကစၢ်ယွၤအဘီအမုၢ်ဘၣ်တၢ်စံၣ်တဲၤတဲလီၤအီၤ, ဒီးပှၤကိးဂၤဒဲးဂုာ်လဲၤနုာ်ဝဲဆူကစၢ်ယွၤအဘီအမုၢ်အပူၤလီၤ.

¹⁷ဘၣ်ဆၣ်ဒီးမူခိၣ်ဒီးဟီၣ်ခိၣ်န့ၣ် လီၤမၢ်ကွံာ်ဝဲညီန့ၢ်ဒံးလံာ်တၢ်သိၣ်တၢ်သီအလံာ်မဲာ်ဖျၢၣ်အဆံးကတၢၢ် တဖျၢၣ်ကလီၤမၢ်ကွံာ်ဝဲတက့ၢ်လီၤ.

¹⁸ပိာ်ခွါတဂၤလၢ်လၢ်လၢအပာ်မၢ်ကွံာ်အမါဒီးန့ၢ်အမါလၢပိာ်မုၣ် အဂၤတဂၤန့ၣ်, မ့ၢ်အအဲၣ်ဘၢတၢ်, ဒီးပိာ်ခွါတဂၤလၢအန့ၢ်အမါလၢပိာ်မုၣ်တဂၤလၢအဘၣ်တၢ်ပာ်မၢ်ကွံာ်အီၤန့ၣ်, မ့ၢ်အမၤကမၣ်ပှၤဂၤအမါလီၤ.

¹⁹“တဘျီန့ၣ်, ပှၤထူးပှၤတီၤအိၣ်ဝဲတဂၤလၢအကူအသိးတၢ်ကူတၢ်ကၤအပှ့ၤဒိၣ်ကတၢၢ် တဖၣ်ဒီးမုာ်လၤဝဲလၢတၢ်အီၣ်အမူးဖးဒိၣ်အပူၤကိးနံၤဒဲးလီၤ.

²⁰ပှၤဖှီၣ်ဖိယာ်ဖိအိၣ်စ့ၢ်ကီးဝဲတဂၤလၢအမံၤမ့ၢ်စီၤလါစရူး, လၢအအိၣ်ပှဲၤဒီးအပူၤလီၢ်ပူၤကျဲ, ဒီးဘၣ်တၢ်ဟဲစိာ်ညီနုၢ်အီၤဆူ ပှၤထူးပှၤတီၤတဂၤန့ၣ်အတြဲၤခီၣ်ထံး,

²¹အိၣ်ဒီးတၢ်ဆၢမုၢ်လၢ်လၢအကအီၣ်ဘၣ်တၢ်အီၣ်လၢအလီၤဆှု လၢပှၤထူးပှၤတီၤတဂၤအံၤအစီၢ်နီၤခိၣ်န့ၣ်လီၤ. ထွံၣ်တဖၣ်ဒၣ်လဲာ်ဟဲဒီးလ့ၣ်အဝဲဒၣ်အပူၤလီၢ်ပူၤကျဲတဖၣ်လီၤ.

²²ပှၤဖှီၣ်ဖိယာ်ဖိတဂၤအံၤသံဝဲ, ဒီးဘၣ်တၢ်စိာ်ထီၣ်အီၤလၢကလူး တဖၣ်ဆူ စီၤအၤဘြၤဟၣ်အကပၤ, ဖဲတၢ်အီၣ်အမူးလၢမူခိၣ်န့ၣ်လီၤ. ပှၤထူးပှၤတီၤစ့ၢ်ကီးသံဝဲ, ဒီးဘၣ်တၢ်ခူၣ်လီၤအီၤလီၤ.

²³လၢပျုၤပူၤဖဲအဝဲဒၣ်ဘၣ်တူၢ်တၢ်နးမးန့ၣ်, အဝဲကွၢ်ထီၣ်တၢ်ဒီးထံၣ်စီၤအၤဘြၤဟၣ်လၢအယံၤ, အိၣ်ဒီးစီၤလါစရူးလၢအကပၤလီၤ.

²⁴လၢတၢ်န့ၣ်အဃိအဝဲဒၣ်ကိးထီၣ်ဝဲ, ‘ပၢ်စီၤအၤဘြၤဟၣ်ဧၢ, သူၣ်ကညီၤသးကညီၤယၤ ဒီးမၢစီၤလါစရူးဘျၢလီၤအစုမုၢ် အစိးနါလၢထံကျါဒီးဟဲမၤခုၣ်လီၤယပျ့ၤန့ၣ်တက့ၢ်. အဂ့ၢ်ဒ်အံၤ, ယအိၣ်လၢတၢ်ဘၣ်တူၢ်တၢ်နးမးအပူၤ, လၢမ့ၣ်အူတခါအံၤအပူၤလီၤ.’

²⁵ဘၣ်ဆၣ်ဒီးစီၤအၤဘြၤဟၣ်စံးဝဲ, ‘ယဖိခွါဧၢ, သ့ၣ်နီၣ်ထီၣ်တက့ၢ်. လၢနတၢ်အိၣ်မူအဆၢကတီၢ်န့ၣ်, နဘၣ်တၢ်ဟ့ၣ်နၤလၢကယဲၢ်တၢ် အဂ့ၤတဖၣ်, မ့မ့ၢ်စီၤလါစရူးတခီဒိးန့ၢ်ဘၣ်ကယဲၢ်မ့ၢ်တၢ်အအၢ တဖၣ်လီၤ. ဘၣ်ဆၣ်ဒီးခဲကနံၣ်အံၤ, အဝဲအနီၢ်ကစၢ်ဒၣ်ဝဲအိၣ်မုာ်အိၣ်ပၢၤဖဲတၢ်လီၢ်တပူၤအံၤ, မ့မ့ၢ်နၤတခီနအိၣ်လၢတၢ်ဘၣ်တူၢ်တၢ်အပူၤလီၤ.

²⁶လၢန့ၣ်အမဲာ်ညါ, တၢ်ပူၤဖးယိာ်အိၣ်ဝဲဒၣ်လၢပဘၢၣ်စၢၤတပူၤ, သတးဒီးပှၤအိၣ်ဖဲအံၤတဖၣ်မ့ၢ်အဲၣ်ဒိးလဲၤခီဂာ်ဆူသုအိၣ် န့ၣ်လဲၤဝဲတသ့ဘၣ်. ဒီးပှၤအိၣ်လၢသုအိၣ်ဖဲန့ၣ်တဖၣ်ဟဲခီဃီၤဆူပအိၣ် တသ့စ့ၢ်ကီးဘၣ်န့ၣ်လီၤ.’

²⁷ပှၤထူးပှၤတီၤစံးဝဲ, ‘မ့မ့ၢ်ဒ်န့ၣ်ဒီး, ပၢ်ဧၢ, ယဃ့ကညးနၤ, ဆှၢလီၤစီၤလါစရူးဆူယပၢ်အဟံၣ်

²⁸ဖဲယဒီပုၢ်ဝဲၢ်ပိာ်ခွါအိၣ်ဝဲယဲၢ်ဂၤန့ၣ်တက့ၢ်. ပျဲအဝဲဒၣ်လဲၤဒီးဟ့ၣ်ပလီၢ်အဝဲသ့ၣ်, ဒ်သိးအဝဲသ့ၣ်အသုတဟဲဘၣ်စ့ၢ်ကီးဖဲတၢ်ဘၣ်တူၢ်တၢ်အလီၢ်တတီၤ အံၤတဂ့ၤန့ၣ်တက့ၢ်.’

²⁹စီၤအၤဘြၣ်ဟၣ်စံးဝဲ, ‘နဒီပုၢ်ဝဲၢ်ပိာ်ခွါတဖၣ်အိၣ်ဒီးစီၤမိၤၡ့ ဒီးဝံအတၢ်ကွဲးတဖၣ်လၢအကဟ့ၣ်ပလီၢ်အဝဲသ့ၣ်အဂီၢ်လီၤ. မ်နဒီပုၢ်ဝဲၢ်ပိာ်ခွါတဖၣ်ဒိကနၣ်အဝဲသ့ၣ်အတၢ်ကတိၤတက့ၢ်.’

³⁰ပှၤထူးပှၤတီၤစံးဆၢဝဲ, ‘ပၢ်အၤဘြၤဟၣ်ဧၢ, တၢ်န့ၣ်တလၢတပှဲၤဒံးဘၣ်. မ့ၢ်ပှၤတဂၤဂၤမ့ၢ်ဂဲၤဆၢထၢၣ်က့ၤလၢတၢ်သံဒီး လဲၤဆူအဝဲသ့ၣ်အအိၣ်န့ၣ်, အဝဲသ့ၣ်ကဃၣ်ကွံာ်အသးလၢအတၢ်ဒဲးဘးတဖၣ်လီၤ.’

³¹ဘၣ်ဆၣ်ဒီးစီၤအၤဘြၤဟၣ်စံးဝဲ, ‘အဝဲသ့ၣ်မ့ၢ်တစူၢ်စီၤမိၤၡ့ဒီးဝံတဖၣ်အတၢ်ကွဲးန့ၣ်, ပှၤတဂၤမ့ၢ်ဂဲၤဆၢထၢၣ်က့ၤလၢတၢ်သံသနာ်က့, တမ့ၢ်အဝဲသ့ၣ်ကစူၢ်ကနာ်တၢ်ဘၣ်.’ ”