Read S'gaw Karen လံာ်လူၤကၣ် 18 Bible Online

လံာ်လူၤကၣ် 18 - S'gaw Karen bible

လံာ်လူၤကၣ် 18

¹တၢ်န့ၣ်ဝံၤအလီၢ်ခံယ့ၣ်ၡူးစံးဘၣ်တဲဘၣ်အဝဲသ့ၣ်လၢတၢ်ကတိၤဒိ တထံၣ်အံၤ, ဒ်သိးအကသိၣ်လိအဝဲသ့ၣ်လၢအကဃ့ဘါထုကဖၣ် တၢ်ထီဘိ, ဒီးအသးသုတဟးဂီၤနီတစုတဂ့ၤန့ၣ်လီၤ.

²“လၢဝ့ၢ်တဖျၢၣ်အပူၤန့ၣ်, ပှၤစံၣ်ညီၣ်ကွီၢ်အိၣ်ဝဲဒၣ်တဂၤလၢအတအိၣ်ဒီးတၢ်ပျံၤယွၤမ့ၢ် ဂ့ၤ, တၢ်ယူးယီၣ်ပာ်ကဲပှၤကညီမ့ၢ်ဂ့ၤန့ၣ်ဘၣ်လီၤ.

³ဒီးလၢဝ့ၢ်တဖျၢၣ်ဃီအပူၤန့ၣ်, ပှၤမုၣ်ကမဲအိၣ်ဝဲဒၣ်တဂၤလၢအဟဲထီဘိဆူအအိၣ်ဒီးဃ့ ကညးအီၤဒ်သိးအကစံၣ်ညီၣ်တီန့ၢ်တၢ်လၢအဂီၢ်ဒီးစံးဝဲ, ‘မၤစၢၤယၤလၢယဒုၣ်ယဒါအတၢ်ထီဒါယၤအပူၤတက့ၢ်.’

⁴ပှၤစံၣ်ညီၣ်ကွီၢ်ဂ့ၢ်လိာ်မုၣ်ကမဲတဂၤအံၤအတၢ်ဃ့ဖးယံာ်ညါလီၤ. ဘၣ်ဆၣ်ဒီးလၢခံကတၢၢ်န့ၣ်အဝဲဒၣ်စံးလီၤက့ၤအသး, ‘ယမ့ၢ်တပျံၤယွၤ, ဒီးယူးယီၣ်ပာ်ကဲပှၤကညီသနာ်က့,

⁵မ့ၢ်လၢမုၣ်ကမဲတဂၤအံၤမၤတံာ်တာ်ယၤထဲထဲအံၤအဃိယကကွၢ် သုးကျဲၤဒ်သိးအဝဲဒၣ်ကဒိးန့ၢ်ဘၣ်အခွဲးအယာ်တဖၣ်လီၤ. မ့တမ့ၢ်ဘၣ်ဒီး အဝဲဒၣ်ကဟဲဒံးဆူယအိၣ်ထီဘိ, ဒီးလၢခံကတၢၢ်န့ၣ် ကဟ့ၣ်ယၤတၢ်ဘှံးသူၣ်တီၤသးအဒိၣ်အမုၢ်လီၤ.’ ”

⁶ဒီးကစၢ်စံးကဒီးဝဲ, “ဒိကနၣ်တၢ်လၢပှၤစံၣ်ညီၣ်ကွီၢ်တတီတလိၤတဂၤန့ၣ်စံးဝဲတက့ၢ်.

⁷ခဲကနံၣ်အံၤမ့ၢ်ယွၤတစံၣ်ညီၣ်တီန့ၢ်တၢ်လၢအပှၤဂီၢ်မုၢ်ဒၣ်ဝဲလၢ အကိးဃ့တၢ်မၤစၢၤလၢအအိၣ်မုၢ်ဆါဒီးမုၢ်နၤန့ၣ်, အဂီၢ်ဘၣ်ဧါ. မ့ၢ်အဝဲဒၣ်ကဝံခိၣ်ဒိၣ်ခံဃၢလၢအကမၤစၢၤအဝဲသ့ၣ်အဂီၢ်န့ၣ်ဧါ.

⁸ယစံးဘၣ်တဲဘၣ်သု, အဝဲဒၣ်ကစံၣ်ညီၣ်တီန့ၢ်တၢ်လၢအဝဲသ့ၣ်အဂီၢ်, ဒီးကမၤဝဲချ့ချ့ကလဲာ်လီၤ. ဘၣ်ဆၣ်ဒီးဖဲပှၤကညီဖိခွါဟဲဝဲန့ၣ်, မ့ၢ်အဝဲကထံၣ်ပှၤအိၣ်ဒီးတၢ်စူၢ်တၢ်နာ်လၢဟီၣ်ခိၣ်ချၢန့ၣ်ဧါ.”

⁹ပှၤလၢအနာ်န့ၢ်လီၤအသးလၢအဂ့ၤဝဲဝါဝဲ, ဒီးကွၢ်တလီၤပှၤကိးဂၤဒဲးန့ၣ်, ယ့ၣ်ၡူးစံးဘၣ်တဲဘၣ်စ့ၢ်ကီးအဝဲသ့ၣ်လၢတၢ်ကတိၤဒိအဝဲအံၤလီၤ.

¹⁰“ပှၤခံဂၤလဲၤထီၣ်ဆူတၢ်လုၢ်ဟံၣ်ဒ်သိးအကဃ့ဘါထုကဖၣ်တၢ်လီၤ. တဂၤန့ၣ်မ့ၢ်ဝဲပှၤဖၤရံၤၡဲ ဒီးအဂၤတဂၤမ့ၢ်ဝဲပှၤဃ့သွဲလီၤ.

¹¹ပှၤဖၤရံၤၡဲအိၣ်ဆၢထၢၣ်ဝဲတပူၤဒၣ်ဒီးဃ့ဘါထုကဖၣ်တၢ်ဒီးစံး, ‘ယစံးဘျုးနၤလီၤကစၢ်ယွၤဧၢ, လၢယတမ့ၢ်ပှၤဂုာ်ဆူၣ်ပျိဆူၣ်တၢ်, ပှၤမၤတၢ်အၢတၢ်သီ, ပှၤအဲၣ်ဘၢတၢ်ဒ်ပှၤဂၤအသိးဘၣ်အဃိန့ၣ်လီၤ. ယစံးဘျုးနၤလၢယတလီၤဂာ်ဒီးပှၤဃ့သွဲတဂၤန့ၣ်အဃိလီၤ.

¹²ယဒုၣ်တၢ်အီၣ်တၢ်အီတနွံခံဘျီ, ကိးနွံဒဲး, ဒီးလၢယတၢ်ဟဲနုာ်ခဲလၢာ်န့ၣ်, ယဟ့ၣ်နၤအပူတဆံတပူလီၤ.’

¹³မ့မ့ၢ်ပှၤဃ့သွဲတဂၤန့ၣ်, အိၣ်ဆၢထၢၣ်ဝဲလၢတၢ်လီၢ်အယံၤ, ဒီးတကျ့ထီၣ်ဒၣ်လဲာ်အမဲာ်ဆူမူခိၣ်ဘၣ်. မ့မ့ၢ်, အဝဲဒၣ်ဒဲလီၤအသးနါပှၢ်ဒီးစံးဝဲ, ‘ကစၢ်ယွၤဧၢ, သူၣ်ကညီၤသးကညီၤလၢ်ယၤ, ပှၤတၢ်ဒဲးဘးဖိတဂၤအံၤတက့ၢ်.’ ”

¹⁴ယ့ၣ်ၡူးစံးဝဲ, “ယစံးဘၣ်တဲဘၣ်သု, ပှၤဃ့သွဲတဂၤအံၤ, ဒီးတမ့ၢ်ပှၤဖၤရံၤၡဲတဂၤဘၣ်န့ၣ်, တီဝဲလိၤဝဲလၢကစၢ်ယွၤအမဲာ်ညါဖဲအဝဲဒၣ်က့ၤဆူဟံၣ်န့ၣ်လီၤ. အဂ့ၢ်ဒ်အံၤ, ကယဲၢ်ပှၤလၢအပာ်ထီၣ်ထီအသးတဂၤလၢ်လၢ်န့ၣ်, ကဘၣ်တၢ်ဆီၣ်လီၤအီၤဒီးကယဲၢ်ပှၤလၢအဆီၣ်လီၤအသးတဂၤ လၢ်လၢ်န့ၣ်, ကဘၣ်တၢ်ပာ်ထီၣ်ထီအီၤလီၤ.”

¹⁵ပှၤတနီၤဟဲစိာ်အဖိဆံးတဖၣ်ဆူယ့ၣ်ၡူးအအိၣ်ဒ်သိး အဝဲဒၣ်ကပာ်ထီၣ်အစုလၢအဝဲသ့ၣ်အလိၤအဂီၢ်န့ၣ်လီၤ. ဘၣ်ဆၣ်ဒီးအပျဲၢ်အဘီၣ်တဖၣ်ထံၣ်အဝဲသ့ၣ်ဒီးဒူအလိၤလီၤ.

¹⁶ဘၣ်ဆၣ်ယ့ၣ်ၡူးကိးဃီၤဖိသၣ်တဖၣ်ဆူအအိၣ်ဒီးစံးဝဲ, “ပျဲဖိသၣ်တဖၣ်ဟဲဆူယအိၣ်တက့ၢ်. ဒီးတဘၣ်တြီအဝဲသ့ၣ်တဂ့ၤ. အဂ့ၢ်ဒ်အံၤ, ကစၢ်ယွၤအဘီအမုၢ်မ့ၢ်ပှၤဒ်န့ၣ်အသိးတဖၣ်အတၢ်လီၤ.

¹⁷သ့ၣ်နီၣ်ထီၣ်တၢ်အံၤတက့ၢ်. ပှၤတဂၤလၢ်လၢ်လၢအတတူၢ်လိာ်ကစၢ်ယွၤအဘီအမုၢ်ဒ်ဖိသၣ် တဂၤအသိးန့ၣ်, တလဲၤနုာ်ဘၣ်ဝဲလၢအပူၤနီတစုဘၣ်.”

¹⁸ပှၤယူဒၤဖိအခိၣ်အနၢ်တဂၤသံကွၢ်ယ့ၣ်ၡူး, “သရၣ်လၢအဂ့ၤတဂၤဧၢ, ဒ်သိးယကဒိးန့ၢ်ဘၣ်တၢ်မူအထူအယိာ်အဂီၢ်န့ၣ်, ယကဘၣ်မၤယဲဒ်လဲၣ်.”

¹⁹ယ့ၣ်ၡူးသံကွၢ်အီၤ, “ဘၣ်မနုၤအဃိနကိးယၤလၢပှၤအဂ့ၤလဲၣ်. ပှၤအဂ့ၤတအိၣ်နီတဂၤဘၣ်, အိၣ်ထဲကစၢ်ယွၤတဂၤဧိၤလီၤ.

²⁰နသ့ၣ်ညါတၢ်သိၣ်တၢ်သီတဖၣ်ကစီဒီလီၤ. ‘တဘၣ်အဲၣ်ဘၢတၢ်တဂ့ၤ, တဘၣ်မၤသံတၢ်တဂ့ၤ, တဘၣ်ဟုၣ်တၢ်တဂ့ၤ, တဘၣ်ကတိၤကဘျံးကဘျၣ်တၢ်တဂ့ၤ, ယူးယီၣ်ပာ်ကဲနမိၢ်ဒီးနပၢ်တက့ၢ်.’ ”

²¹ပှၤတဂၤန့ၣ်စံးဆၢဝဲ, “တၢ်သ့ၣ်တဖၣ်အံၤခဲလၢာ်န့ၣ်, ယတိၢ်န့ၢ်ဒီးစူၢ်ယဲလၢယသးစၢ်လံၤလံၤလီၤ.”

²²ဖဲယ့ၣ်ၡူးနၢ်ဟူတၢ်ကတိၤအဝဲအံၤန့ၣ်, အဝဲဒၣ်စံးဘၣ်အီၤ, “တၢ်လၢအလိၣ်ဒီးနၤအိၣ်ဒံးဝဲတမံၤလီၤ. ဆါကွံာ်တၢ်လၢအအိၣ်ဒီးနၤခဲလၢာ်, ဒီးဟ့ၣ်နီၤလီၤပှၤဖှီၣ်ဖိယာ်ဖိတက့ၢ်. ဒီးနကအိၣ်ဒီးတၢ်ထူးတၢ်တီၤလၢမူခိၣ်လီၤ. အန့ၣ်ဝံၤအလီၢ်ခံ, ဟဲဒီးကဲထီၣ်ယပျဲၢ်ယဘီၣ်တက့ၢ်.”

²³ဘၣ်ဆၣ်, ဖဲပှၤတဂၤန့ၣ်နၢ်ဟူယ့ၣ်ၡူးအတၢ်ကတိၤတထံၣ်န့ၣ်ဒီး, အဝဲဒၣ်အသးအုးဒိၣ်ဒိၣ်ကလဲာ်, အဂ့ၢ်မ့ၢ်လၢအဝဲဒၣ်ထူးတီၤဒိၣ်မး အဃိန့ၣ်လီၤ.

²⁴ယ့ၣ်ၡူးထံၣ်ဘၣ်လၢအဝဲဒၣ်အသးအုးဒီးစံးဝဲ, “ပှၤထူးပှၤတီၤတဖၣ်ကနုာ်လီၤဆူကစၢ်ယွၤအဘီအမုၢ်အပူၤ အဂီၢ်န့ၣ်, ကီဆံးဒိၣ်လဲၣ်.

²⁵ပှၤထူးပှၤတီၤတဂၤကနုာ်လီၤဆူကစၢ်ယွၤအဘီအမုၢ်အပူၤန့ၣ်, ကီဒိၣ်န့ၢ်ဒံးကီၤလၤအူးတဒုကဝၣ်ဖျိထးအမဲၢ်ခံတက့ၢ်လီၤ.”

²⁶ပှၤဂီၢ်မုၢ်လၢအနၢ်ဟူအဝဲအတၢ်ကတိၤတဖၣ်သံကွၢ်အီၤ, “မ့မ့ၢ်ဒ်န့ၣ်ဒီးမတၤဒိးန့ၢ်တၢ်အုၣ်က့ၤခီၣ်က့ၤကသ့ဝဲတဂၤလဲၣ်.”

²⁷ယ့ၣ်ၡူးစံးဆၢဝဲ, “တၢ်လၢပှၤကညီမၤတသ့န့ၣ်, ကစၢ်ယွၤမၤဝဲသ့လီၤ.”

²⁸တုၤနုၤတစုစီၤပ့းတရူးစံးဝဲ, “ကွၢ်တက့ၢ်, ပဝဲသ့ၣ်တဖၣ်အံၤပပာ်တ့ၢ်ပဟံၣ်ပဃီဒ်သိး ပကကဲထီၣ်နပျဲၢ်နဘီၣ်အဂီၢ်လီၤ.”

²⁹“မ့ၢ်လီၤ” ယ့ၣ်ၡူးစံးဘၣ်အဝဲသ့ၣ်, “ယစံးဘၣ်တဲဘၣ်သုသပှၢ်ကတၢၢ်, ပှၤတဂၤလၢ်လၢ်လၢ အပာ်တ့ၢ်အဟံၣ်အဃီ, မ့တမ့ၢ်အမါ, မ့တမ့ၢ်အဒီပုၢ်ဝဲၢ်တဖၣ်, မ့တမ့ၢ်အမိၢ်အပၢ်တဖၣ်, မ့တမ့ၢ်အဖိအလံၤတဖၣ်လၢ ယွၤအဘီအမုၢ်အဃိန့ၣ်,

³⁰ကဒိးန့ၢ်ဘၣ်တၢ်အါန့ၢ်အလီၢ်အစးတဖၣ်အစးလၢစိၤအခဲအံၤ, ဒီးတၢ်မူအထူအယိာ်လၢစိၤလၢအကဟဲန့ၣ်လီၤ.”

³¹ယ့ၣ်ၡူးကိးန့ၢ်ထဲတၢ်မၢဖိတဆံခံဂၤကစုဒု, ဒီးစံးဘၣ်အဝဲသ့ၣ်, “ဒိကနၣ်တက့ၢ်. ပကလဲၤပဝဲဆူ ဝ့ၢ်ယရူၤၡလ့ၣ်ဖဲကယဲၢ်တၢ်တမံၤလၢ်လၢ်လၢဝံတဖၣ်ကွဲးဝဲလၢပှၤ ကညီဖိခွါအဂ့ၢ်န့ၣ်, ကလၢထီၣ်ပှဲၤထီၣ်ဝဲန့ၣ်လီၤ.

³²အဝဲဒၣ်ကဘၣ်တၢ်ဟ့ၣ်လီၤကွံာ်အီၤဆူပှၤကလုာ်ဂၤတဖၣ်အစုပူၤ, လၢအကဒုၣ်ဒွဲၣ်နံၤဘၣ်ဖၣ်လဲအီၤဒီးထူးပှဲာ်အီၤအဂီၢ်န့ၣ်လီၤ.

³³အဝဲသ့ၣ်ကတီၢ်အီၤဖျ့အီၤဒီးမၤသံအီၤ, ဘၣ်ဆၣ်ဒီး ဖဲသၢသီတသီန့ၣ်, အဝဲဒၣ်ကဂဲၤဆၢထၢၣ်သမူထီၣ်က့ၤလီၤ.”

³⁴ဘၣ်ဆၣ်အပျဲၢ်အဘီၣ်တဖၣ်တနၢ်ပၢၢ်တၢ်ကတိၤသ့ၣ်တဖၣ်အံၤနီ တဘီဘၣ်. တၢ်ကတိၤတဖၣ်အခီပညီအိၣ်လီၤသဒၢအသးလၢအဝဲသ့ၣ် အမဲာ်ညါ, ဒီးယ့ၣ်ၡူးစံးကတိၤတၢ်ဘၣ်ဃးမနုၤအဂ့ၢ်န့ၣ်, အဝဲသ့ၣ်တသ့ၣ်ညါဝဲဘၣ်.

³⁵ယ့ၣ်ၡူးဟဲဘူးထီၣ်လၢဝ့ၢ်ယရံၤဃိ, ဒီးပှၤမဲာ်ဘျီၣ်တဂၤဆ့ၣ်နီၤလၢကျဲကပၤဒီးဃ့အီၣ်တၢ်လီၤ.

³⁶ဖဲအဝဲနၢ်ဟူပှၤဂီၢ်မုၢ်တဖၣ်လဲၤခီဂာ်တၢ်အသီၣ်န့ၣ်သံကွၢ်ဝဲ, “တၢ်သီၣ်အဝဲအံၤမ့ၢ်တၢ်မနုၤလဲၣ်.”

³⁷အဝဲသ့ၣ်စံးဘၣ်အီၤ, “ပှၤနစၤရ့းဖိယ့ၣ်ၡူးဟဲခီဂာ်ဖဲအံၤလီၤ.”

³⁸အဝဲဒၣ်ကိးထီၣ်ဝဲ, “စီၤဒၤဝံးအဖိခွါယ့ၣ်ၡူးဧၢ, သူၣ်ကညီၤသးကညီၤယၤတက့ၢ်.”

³⁹ပှၤအိၣ်လၢတၢ်မဲာ်ညါတဖၣ်ဒူအလိၤ, ဒီးမၢအဝဲဒၣ်အိၣ်ဘှီၣ်ကလာ်လီၤ. ဘၣ်ဆၣ်ဒီးအဝဲဒၣ်ကိးပသူထီၣ်ဒိၣ်န့ၢ်အလီၢ်, “စီၤဒၤဝံးအဖိခွါဧၢ, သူၣ်ကညီၤသးကညီၤယၤတက့ၢ်.”

⁴⁰လၢတၢ်န့ၣ်အဃိ, ယ့ၣ်ၡူးအိၣ်ကတီၢ်ဒီးမၢပှၤဟဲဆှၢပှၤမဲာ်ဘျီၣ် တဂၤန့ၣ်ဆူအအိၣ်လီၤ. ဖဲအဝဲဒၣ်ဟဲဘူးထီၣ်န့ၣ်ယ့ၣ်ၡူးသံကွၢ်အီၤ,

⁴¹“နအဲၣ်ဒိးလၢယကမၤတၢ်မနုၤတမံၤလၢနဂီၢ်လဲၣ်.” “ကစၢ်ဧၢ,” အဝဲဒၣ်စံးဆၢဝဲ, “ယအဲၣ်ဒိးထံၣ်ထီၣ်က့ၤတၢ်လီၤ.”

⁴²တုၤနုၤတစုယ့ၣ်ၡူးစံးဘၣ်အီၤ, “ထံၣ်ထီၣ်က့ၤတၢ်တက့ၢ်. နတၢ်နာ်မၤဘျါက့ၤလံနၤလံ.”

⁴³တဘျီဃီဖဲန့ၣ်အဝဲဒၣ်ထံၣ်ထီၣ်က့ၤတၢ်, ဒီးအဝဲဒၣ်ပိာ်ထီၣ်ယ့ၣ်ၡူးအခံ, အိၣ်ဒီးတၢ်စံးဘျုးစံးဖှိၣ်ယွၤလီၤ. ဖဲပှၤဂီၢ်မုၢ်ထံၣ်တၢ်အံၤဒီး, စံးထီၣ်ပတြၢၤယွၤခဲလၢာ်လီၤ.