Read S'gaw Karen လံာ်လူၤကၣ် 19 Bible Online

လံာ်လူၤကၣ် 19 - S'gaw Karen bible

လံာ်လူၤကၣ် 19

¹ယ့ၣ်ၡူးလဲၤနုာ်လီၤဝဲဆူဝ့ၢ်ယရံၤဃိဒီးလဲၤခီဂာ်ဝဲဒၣ်လီၤ.

²ဖဲန့ၣ်ပှၤဃ့သွဲအခိၣ်အိၣ်ဝဲတဂၤ, အမံၤမ့ၢ်စီၤစးဃဲ, လၢအထူးတီၤန့ၣ်လီၤ.

³အဝဲဒၣ်ဂုာ်ကျဲးစၢးဒ်သိးအကထံၣ်ဘၣ်လၢယ့ၣ်ၡူးမ့ၢ်မတၤတဂၤလဲၣ် န့ၣ်လီၤ. ဘၣ်ဆၣ်အဝဲမ့ၢ်ပှၤလၢအနီၢ်ဖုၣ်တဂၤဒီးပှၤဂီၢ်မုၢ်အိၣ်အါအဃိ, ထံၣ်ယ့ၣ်ၡူးတသ့ဘၣ်.

⁴လၢတၢ်န့ၣ်အဃိ, အဝဲဒၣ်ဃ့ၢ်ဆိလၢပှၤဂီၢ်မုၢ်အမဲာ်ညါဒီးလဲၤထီၣ်ဝဲလၢ သိးဝံာ်ဒၢတထူၣ်အခံ, ဒ်သိးအကထံၣ်ဘၣ်ယ့ၣ်ၡူးလၢအကဟဲဝဲဖဲကျဲအဝဲန့ၣ်န့ၣ်လီၤ.

⁵ဖဲယ့ၣ်ၡူးဟဲတုၤလၢတၢ်လီၢ်အဝဲန့ၣ်, အဝဲဒၣ်ကွၢ်ထီၣ်တၢ်ဒီးစံးဘၣ်စီၤစးဃဲ, “စီၤစးဃဲဧၢ, ဟဲက့ၤလီၤချ့ချ့တက့ၢ်. အဂ့ၢ်ဒ်အံၤ, တနံၤအံၤယကဘၣ်လဲၤအိၣ်လၢနဟံၣ်လီၤ.”

⁶စီၤစးဃဲစံၣ်လီၤဝဲလၢအချ့ ဒီးတူၢ်လိာ်ခီၣ်ဆၢအီၤလၢတၢ်သးခုဖးဒိၣ် အပူၤလီၤ.

⁷ပှၤဂီၢ်မုၢ်လၢအထံၣ်ဘၣ်တၢ်မၤအသးတမံၤအံၤခဲလၢာ်ကဒူး ကဒ့ၣ်တၢ်ဒီးစံးဝဲ, “ပှၤတဂၤအံၤလဲၤကဲလံပှၤသမှံၤလၢ ပှၤတၢ်ဒဲးဘးဖိတဂၤအဟံၣ်လံ.”

⁸စီၤစးဃဲဂဲၤဆၢထၢၣ်ဒီးစံးဘၣ်ကစၢ်, “ကနၣ်တက့ၢ်, ကစၢ်ဧၢ, ယတၢ်စုလီၢ်ခီၣ်ခိၣ်လၢအအိၣ်ဒီးယၤတဝာ်န့ၣ်ယကဟ့ၣ်လီၤ ယဲဆူပှၤဖှီၣ်ဖိယာ်ဖိအအိၣ်လီၤ. ဒီးယမ့ၢ်အီၣ်ကဘျံးအီၣ်ကဘျၣ်ပှၤတဂၤဂၤအတၢ်ဖိတၢ်လံၤန့ၣ်, ယကဟ့ၣ်ကဒါက့ၤအီၤလွံၢ်စးလီၤ.”

⁹ယ့ၣ်ၡူးစံးဘၣ်အီၤ, “မုၢ်တနံၤညါအံၤ, တၢ်အုၣ်က့ၤခီၣ်က့ၤ ဟဲတုၤလံလၢဟံၣ်တဖျၢၣ်အံၤလံ. အဂ့ၢ်ဒ်အံၤပှၤတဂၤအံၤစ့ၢ်ကီးမ့ၢ် ဝဲစီၤအၤဘြၤဟၣ်အစၢၤအသွဲၣ်လီၤ.

¹⁰အဂ့ၢ်ဒ်အံၤ, ပှၤကညီဖိခွါဟဲဒ်သိးအကဃုန့ၢ်ဒီးအုၣ်က့ၤခီၣ်က့ၤ ပှၤလီၤမၢ်တဖၣ်လီၤ.”

¹¹ဖဲပှၤဂီၢ်မုၢ်တဖၣ်ဒိကနၣ်တၢ်ကတိၤအဝဲအံၤန့ၣ်, ယ့ၣ်ၡူးကတိၤတၢ်, ဒီးစံးဘၣ်တဲဘၣ်အဝဲသ့ၣ်လၢတၢ်ကတိၤဒိတထံၣ်လီၤ. ဖဲဆၢ ကတီၢ်အဝဲအံၤန့ၣ်, အဝဲဒၣ်လဲၤဘူးအကတုၤဝ့ၢ်ယရူၤၡလ့ၣ်, ဒီးအဝဲသ့ၣ်ဆိကမိၣ်ဝဲလၢ ကစၢ်ယွၤအဘီအမုၢ်ကအိၣ်ဖျါထီၣ်ဝဲတကီၢ်ခါန့ၣ်လီၤ.

¹²လၢတၢ်န့ၣ်အဃိအဝဲဒၣ်စံးဝဲ, “ပဒိၣ်အိၣ်ဝဲတဂၤလၢအလဲၤဆူကီၢ်အယံၤတဘ့ၣ်, ဒ်သိးအကဘၣ်တၢ်ဒုးကဲထီၣ်အီၤလၢစီၤပၤ, ဝံၤဒီးကဟဲက့ၤဆူဟံၣ်န့ၣ်လီၤ.

¹³တချုးဒံးလၢအဝဲဒၣ်ဟးထီၣ်န့ၣ်, အဝဲဒၣ်ကိးအခ့အပှၤအဂၤတဆံ, ဒီးဟ့ၣ်အီၤလၢထူဘ့ၣ်ဘၣ်တဂၤတဘ့ၣ်ဒီးစံးဘၣ်အဝဲသ့ၣ်, ‘ဖဲယတအိၣ်အဆၢကတီၢ်န့ၣ်, လဲၤကူၣ်လဲၤကၤကွၢ်တၢ်လၢတၢ်အဝဲအံၤ, ဒီးသုကဒိးန့ၢ်တၢ်ဆံးအါလဲၣ်န့ၣ်မၤကွၢ်တက့ၢ်.’

¹⁴တၢ်မၤအသးလၢ, အဝဲဒၣ်အထံဖိကီၢ်ဖိတဖၣ်သးဟ့အီၤ, သတးဒီးအဝဲသ့ၣ်ဆှၢလီၤပှၤစိာ်တၢ်ကစီၣ်တဖၣ်ဒ်သိးအကစံးဝဲ, ‘ပတအဲၣ်ဒိးလၢပှၤတဂၤအံၤကကဲပစီၤပၤဘၣ်’ န့ၣ်လီၤ.

¹⁵ပဒိၣ်တဂၤအံၤဘၣ်တၢ်ဒုးကဲထီၣ်အီၤလၢစီၤပၤ, ဒီးအဝဲဒၣ်ဟဲက့ၤလီၤ. တဘျီဃီ, အဝဲဒၣ်ဟ့ၣ်လီၤအကလုၢ်လၢအခ့အပှၤလၢအဝဲဟ့ၣ်တ့ၢ်ဝဲထူဘ့ၣ်ဘၣ် တဖၣ်, ဒ်သိးအကဟဲပာ်ဖျါထီၣ်အသးလၢအမဲာ်ညါ, ဒီးအဝဲသ့ၣ်မၤန့ၢ်တၢ်ဆံးအါဆံးအါန့ၣ်, အဝဲဒၣ်ကသ့ၣ်ညါဘၣ်ဝဲအဂီၢ်လီၤ.

¹⁶ပှၤအဆိကတၢၢ်တဂၤဟဲဒီးစံးဝဲ, ‘ကစၢ်ဧၢ, ယဒိးန့ၢ်ဘၣ်အါထီၣ်ထူအဘ့ၣ်တဆံခီဖျိယသူထူ တဘ့ၣ်လၢနဟ့ၣ်ယၤန့ၣ်လီၤ.’

¹⁷‘နမၤတၢ်ဂ့ၤမးလီၤ,’ အဝဲဒၣ်စံးဘၣ်အီၤ, ‘နမ့ၢ်တၢ်ခ့တၢ်ပှၤလၢအဂ့ၤတဂၤလီၤ. မ့ၢ်လၢနသးတီနဲလၢတၢ်ဂ့ၢ်အဆံးတဖၣ်အပူၤအဃိ, ယကဟ့ၣ်နၤတၢ်စိတၢ်ကမီၤလၢနကပၢဝ့ၢ်အဖျၢၣ်တဆံန့ၣ်လီၤ.’

¹⁸တၢ်ခ့တၢ်ပှၤခံဂၤတဂၤဟဲဝဲဒီးစံး, ‘ကစၢ်ဧၢ, ယဒိးန့ၢ်ဘၣ်အါထီၣ်ထူယဲၢ်ဘ့ၣ်ခီဖျိယသူထူတဘ့ၣ်လၢ နဟ့ၣ်ယၤန့ၣ်လီၤ.’

¹⁹အဝဲဒၣ်စံးဘၣ်တၢ်ခ့တၢ်ပှၤတဂၤအံၤ, ‘နကပၢဘၣ်ဝ့ၢ်ယဲၢ်ဖျၢၣ်လီၤ.’

²⁰တၢ်ခ့တၢ်ပှၤအဂၤတဂၤဟဲဝဲဒီးစံး, ‘ကစၢ်ဧၢ, နထူဘ့ၣ်ဘၣ်အိၣ်လၢအံၤလီၤ. ယပာ်ခူသူၣ်တ့ၢ်အီၤလၢတၢ်ကံးယာ်ထွါစုတဘ့ၣ်အပူၤလီၤ.

²¹ယပျံၤနၤ, မ့ၢ်လၢနမ့ၢ်ပှၤအကီတဂၤအဃိလီၤ. နဟံးန့ၢ်တၢ်လၢအတမ့ၢ်နတၢ်ဘၣ်, ဒီးတၢ်လၢနတဖှံလီၤသူၣ်လီၤန့ၣ်, နကူးနဲလီၤ.’

²²အဝဲဒၣ်စံးဘၣ်အီၤ, ‘ကုၢ်လၢအအၢတဂၤဧၢ, ယကသူက့ၤနတၢ်ကတိၤဒၣ်နဲလၢယကစံၣ်ညီၣ်နၤအဂီၢ်လီၤ. နသ့ၣ်ညါနဲလၢယမ့ၢ်ပှၤအကီတဂၤ, ယဟံးန့ၢ်တၢ်လၢအတမ့ၢ်ယတၢ်, ဒီးယကူးတၢ်လၢယတဖှံယဲန့ၣ်ဘၣ်လီၤ.

²³မ်ဒ်န့ၣ်ဒီး, ဘၣ်မနုၤအဃိနတဒၢနုာ်ယထူဘ့ၣ်ဘၣ်လၢစ့တၢးအပူၤလဲၣ်. နမ့ၢ်မၤဒ်န့ၣ်ဒီး, ဖဲယဟဲက့ၤတုၤန့ၣ်, ယကဒိးန့ၢ်ဘၣ်က့ၤအီၤဃုာ်ဒီးအအ့ၣ်ထီၣ်န့ၣ်လီၤ.’

²⁴တုၤနုၤတစုအဝဲဒၣ်စံးဘၣ်ပှၤလၢအအိၣ်ဆၢထၢၣ်ဖဲန့ၣ်တဖၣ်, ‘ဟံးန့ၢ်ကွံာ်ထူတဘ့ၣ်လၢအဝဲဒၣ်အအိၣ်ဒီးဟ့ၣ်လီၤအီၤဆူ တၢ်ခ့တၢ်ပှၤလၢအအိၣ်ဒီးထူအဘ့ၣ်တဆံန့ၣ်တက့ၢ်.’

²⁵အဝဲသ့ၣ်စံးဘၣ်အီၤ, ‘ကစၢ်ဧၢ, အဝဲဒၣ်အထူအိၣ်ပာ်စၢၤလံအဘ့ၣ် တဆံလံ.’

²⁶အဝဲဒၣ်စံးဆၢဝဲ, ‘ယစံးဘၣ်တဲဘၣ်သု, ပှၤလၢအတၢ်အိၣ်ဝဲတဂၤလၢ်လၢ်န့ၣ်, တၢ်ကဟ့ၣ်အါထီၣ်အီၤလီၤ. မ့မ့ၢ်ပှၤတဂၤလၢအတၢ်တအိၣ်န့ၣ်, တၢ်တစဲးဖိလၢအအိၣ်ဒီးအီၤဒၣ်လဲာ်, ကဘၣ်တၢ်ဟံးထီၣ်ကွံာ်လၢအအိၣ်လီၤ.

²⁷မ့မ့ၢ်, ယဒုၣ်ယဒါတဖၣ်အံၤလၢအတအဲၣ်ဒိးယကဲအစီၤပၤန့ၣ်, ဆှၢအဝဲသ့ၣ်တဖၣ်ဆူအံၤ, ဒီးမၤသံအီၤလၢယမဲာ်ညါတက့ၢ်.’ ”

²⁸ယ့ၣ်ၡူးစံးကတိၤတၢ်အံၤဝံၤဒီးလဲၤဆိဝဲဆူဝ့ၢ်ယရူၤၡလ့ၣ်လၢအဝဲသ့ၣ် အမဲာ်ညါလီၤ.

²⁹ဖဲအဝဲဒၣ်ဟဲဘူးထီၣ်လၢသဝီဘ့ၤသဖးက့ဒီးသဝီဘ့ၤသနံဖဲ ကစၢၢ်သ့ၣ်စၤယံးန့ၣ်, ဆှၢလီၤဆိအပျဲၢ်အဘီၣ်ခံဂၤလၢအမဲာ်ညါလီၤ.

³⁰အဝဲဒၣ်မၤလိာ်အဝဲသ့ၣ်ဒ်အံၤ, “လဲၤဆူသဝီအိၣ်လၢသုမဲာ်ညါတဖျၢၣ်န့ၣ်တက့ၢ်. ဖဲသုလဲၤနုာ်လီၤန့ၣ်, သုကထံၣ်န့ၢ်ကသ့ၣ်ယီၤဖိတဒုအိၣ်စၢဃာ်အသး, လၢအတဘၣ်တၢ်ဒိးဒံးအီၤနီတဘျီဒံးဘၣ်န့ၣ်လီၤ. ဃ့ၣ်လီၤကွံာ်အပျံၤ, ဒီးဟဲစိာ်အီၤဆူအံၤတက့ၢ်.

³¹ပှၤတဂၤဂၤမ့ၢ်သံကွၢ်သု, ‘ဘၣ်မနုၤအဃိသုဃ့ၣ်လီၤကွံာ်အပျံၤလဲၣ်’ န့ၣ်, စံးဘၣ်အီၤ, ‘ကစၢ်လိၣ်ဘၣ်အီၤလီၤ’ န့ၣ်တက့ၢ်.”

³²အဝဲသ့ၣ်လဲၤဝဲဒီးထံၣ်န့ၢ်တၢ်ကိးမံၤဒဲး, ဒ်ယ့ၣ်ၡူးစံးဘၣ်တ့ၢ်အဝဲသ့ၣ်အသိးန့ၣ်လီၤ.

³³ဖဲအဝဲသ့ၣ်ဃ့ၣ်လီၤကွံာ်ကသ့ၣ်ယီၤဖိအပျံၤန့ၣ်, အကစၢ်တဖၣ်စံးဘၣ်အဝဲသ့ၣ်, “ဘၣ်မနုၤအဃိသုဃ့ၣ်လီၤကွံာ်အီၤလဲၣ်.”

³⁴“ကစၢ်လိၣ်ဘၣ်အီၤလီၤ.” အဝဲသ့ၣ်စံးဆၢဝဲ, ဝံၤဒီး

³⁵က့ၤမိၤကသ့ၣ်ယီၤဖိဆူယ့ၣ်ၡူးအအိၣ်လီၤ. အန့ၣ်ဝံၤဒီးအဝဲသ့ၣ်ဒါလီၤအဆ့ကၤဖီခိၣ်တဖၣ်လၢအပျိၢ်လိၤ, ဒီးပာ်ထီၣ်ယ့ၣ်ၡူးလၢအလိၤန့ၣ်လီၤ.

³⁶ဖဲအဝဲဒၣ်ဒိးကသ့ၣ်ယီၤဖိဒီးလဲၤတၢ်အဖၢမုၢ်န့ၣ်, အဝဲသ့ၣ်ဒါလီၤအဆ့ကၤဖီခိၣ်တဖၣ်လၢကျဲအလိၤလီၤ.

³⁷ဖဲအဝဲဒၣ်ဟဲဘူးထီၣ်ဒီးဝ့ၢ်ယရူၤၡလ့ၣ်ဖဲတၢ်လီၢ်တတီၤလၢ ကျဲလဲၤလီၤလၢကစၢၢ်သ့ၣ်စၤယံးအဒီခိၣ်န့ၣ်, အပျဲၢ်အဘီၣ်ဂီၢ်မုၢ်ဂီၢ်ပၤ စံးဘျုးကစၢ်ယွၤဒီးစံးထီၣ်ပတြၢၤအီၤလၢအကလုၢ်ဖးဒိၣ်မ့ၢ်လၢတၢ် အဒိၣ်အမုၢ်လၢအဝဲသ့ၣ်ထံၣ်ဘၣ်တ့ၢ်ဝဲခဲလၢာ်တဖၣ်အဃိန့ၣ်လီၤ.

³⁸“မ်ကစၢ်ယွၤဆိၣ်ဂ့ၤစီၤပၤလၢအဟဲလၢကစၢ်အမံၤတဂၤန့ၣ်တက့ၢ်. မ်တၢ်ဃူတၢ်ဖိးအိၣ်ဝဲလၢမူခိၣ်, ဒီးတၢ်လၤကပီၤဘၣ်ကစၢ်ယွၤတက့ၢ်.”

³⁹တုၤနုၤတစုပှၤဖၤရံၤၡဲတနီၤလၢပှၤဂီၢ်မုၢ်အကျါစံးဘၣ်ယ့ၣ်ၡူး, “သရၣ်ဧၢ, ခါလီၤနကလုၢ်ဒ်သိးနပျဲၢ်နဘီၣ်တဖၣ်ကအိၣ်ဘှီၣ်ကလာ်တက့ၢ်.”

⁴⁰ယ့ၣ်ၡူးစံးဆၢဝဲ, “အဝဲသ့ၣ်မ့ၢ်အိၣ်ဘှီၣ်ကလာ်န့ၣ်, ယစံးဘၣ်သု, လၢၢ်တဖၣ်ကကိးပသူထီၣ်ဝဲလီၤ.”

⁴¹အဝဲဒၣ်ဟဲဘူးထီၣ်ဒီးဝ့ၢ်ယရူၤၡလ့ၣ်, ဒီးဖဲအထံၣ်ဘၣ်ဝ့ၢ်န့ၣ်, ဟီၣ်ဝဲလၢအဃိဒီး

⁴²စံးဝဲ, “နမ့ၢ်သ့ၣ်ညါနဲမုၢ်မဆါတနံၤအံၤလၢ, တၢ်လိၣ်ဘၣ်မနုၤတဖၣ်လိၣ်ဝဲလၢတၢ်ဃူတၢ်ဖိးအဂီၢ်လဲၣ်န့ၣ်ဒီး, ကဂ့ၤမးလီၤ. မ့မ့ၢ်ခဲကနံၣ်အံၤ, နထံၣ်နဲတသ့ဘၣ်.

⁴³မုၢ်နံၤမုၢ်သီတဖၣ်ကဟဲတုၤအိၣ်နၤဖဲနဒုၣ်နဒါတဖၣ်ကကဝီၤဃာ်နၤ, မၤတံာ်တၢၤနကျဲဒီးသုးအသးဘူးထီၣ်ဆူနအိၣ်ကိးကပၤဒဲးလီၤ.

⁴⁴အဝဲသ့ၣ်ကမၤဟးဂီၤကွံာ်နၤလၢာ်လၢာ်ဆ့ဆ့ဃုာ်ဒီးပှၤဂီၢ်မုၢ်အိၣ်ဝဲလၢ နခိၣ်ဒူအပူၤတဖၣ်လီၤ. အဝဲသ့ၣ်တပာ်လီၤတဲာ်တ့ၢ်လၢၢ်လၢအလီၢ်နီ တဖျၢၣ်ဘၣ်. အဂ့ၢ်မ့ၢ်လၢနတပာ်သူၣ်ပာ်သးတၢ်ဆၢကတီၢ်ဖဲ ယွၤဟဲတ့ၢ်ဝဲဒ်သိးအကအုၣ်က့ၤခီၣ်က့ၤနၤဘၣ်အဃိန့ၣ်လီၤ.

⁴⁵ယ့ၣ်ၡူးလဲၤနုာ်လီၤဆူတၢ်လုၢ်ဟံၣ်အပူၤဒီးနီၣ်ထီၣ်ကွံာ်ပှၤကူၣ်တၢ် ကၤတၢ်ဖိတဖၣ်,

⁴⁶ဒီးစံးဘၣ်အဝဲသ့ၣ်, “တၢ်ကွဲးအသးစီဆှံပာ်ဖျါလၢကစၢ်ယွၤစံးဝဲ, ‘ယဟံၣ်ကဘၣ်တၢ်ကိးအီၤလၢတၢ်ထုကဖၣ်အဟံၣ်လီၤ.’ ဘၣ်ဆၣ်ဒီးသုဒုးကဲထီၣ်အီၤလၢတၢ်ဟုၣ်တၢ်ဘျၣ်တဖၣ်အတၢ်အိၣ် ခူသူၣ်အလီၢ်အကျဲလံ.”

⁴⁷ယ့ၣ်ၡူးသိၣ်လီၤသီလီၤတၢ်လၢတၢ်လုၢ်ဟံၣ်အပူၤကိးနံၤဒဲးလီၤ. ပှၤလုၢ်တၢ်အခိၣ်အဒိၣ်တဖၣ်, ပှၤသ့တၢ်ဘူၣ်တၢ်ဘါအတၢ်သိၣ် တၢ်သီတဖၣ်, ဒီးပှၤဂီၢ်မုၢ်အခိၣ်အနၢ်တဖၣ်သးအိၣ်မၤသံအီၤလီၤ.

⁴⁸ဘၣ်ဆၣ်ဒီးအဝဲသ့ၣ်ကဘၣ်မၤဝဲလၢကျဲဒ်လဲၣ်န့ၣ်တသ့ၣ်ညါဝဲဘၣ်. အဂ့ၢ်မ့ၢ်လၢပှၤဂီၢ်မုၢ်ဒိကနၣ်ဒံးအတၢ်စံးတၢ်ကတိၤ, ဒီးတအဲၣ်ဒိးလၢအတၢ်ကတိၤလဲၤပူၤကွံာ်အဝဲသ့ၣ်နီ တထံၣ်ဘၣ်အဃိလီၤ.