Read S'gaw Karen လံာ်လူၤကၣ် 2 Bible Online

လံာ်လူၤကၣ် 2 - S'gaw Karen bible

လံာ်လူၤကၣ် 2

¹ဖဲအဆၢကတီၢ်အဝဲန့ၣ်, စီၤပၤဖးဒိၣ်အီၤကူစတူးဟ့ၣ်လီၤ အကလုၢ်လၢတၢ်ကဂံၢ်ထံဖိကီၢ်ဖိလၢအအိၣ်ဝဲဆိးဝဲ သကုၤရိမ့ၤအဘီအမုၢ်အပူၤတဖၣ်ခဲလၢာ်ခီဖျိတၢ်ဆဲးလီၤ အမံၤန့ၣ်လီၤ.

²ဖဲတၢ်ဆဲးလီၤမံၤအဆိကတၢၢ်တဘျီအံၤအဆၢကတီၢ်န့ၣ်, စီၤကူၤရ့နံမ့ၢ်ဝဲစူၤရံအပဒိၣ်ဖးဒိၣ်လီၤ.

³ဖဲန့ၣ်, ပှၤကိးဂၤဒဲးလဲၤဝဲတဂၤဆူအဝ့ၢ်ဒၣ်ဝဲ, တဂၤဆူအဝ့ၢ်ဒၣ်ဝဲ, ဒ်သိးအမံၤကဘၣ်တၢ်ဆဲးလီၤအီၤန့ၣ်လီၤ.

⁴စီၤယိၤသးဟးထီၣ်ဝဲဖဲဝ့ၢ်နစၤရ့းလၢကီၢ်ကၤလံၤလါ, ဒီးလဲၤဝဲဆူဝ့ၢ်ဘ့ၤသလ့ဃ့ၣ်လၢကီၢ်ယူဒၤ, ဝ့ၢ်လၢအမ့ၢ်ဝဲစီၤပၤဒၤဝံးအိၣ်ဖျဲၣ်ထီၣ်အလီၢ်လီၤ. စီၤယိၤသးလဲၤဝဲဖဲန့ၣ်, မ့ၢ်လၢအဝဲမ့ၢ်စီၤဒၤဝံးအစၢၤအသွဲၣ်တဂၤအဃိန့ၣ်လီၤ.

⁵အဝဲဒၣ်လဲၤဒီးနီၢ်မၤရံလၢအဘၣ်အဲၣ်တီဒီးအီၤတဂၤ, ဒ်သိးအဝဲသ့ၣ်အမံၤကဘၣ်တၢ်ဆဲးလီၤအီၤအဂီၢ်လီၤ. နီၢ်မၤရံအိၣ်ဒီးအဟုးအသး,

⁶ဒီးဖဲအဝဲသ့ၣ်အိၣ်လၢဝ့ၢ်ဘ့ၤသလ့ဃ့ၣ်အဖၢမုၢ်န့ၣ်, အဆၢကတီၢ်တုၤဃီၤလၢအဝဲဒၣ်ကဆံးစၢ်ထီၣ်အဖိလီၤ.

⁷အဝဲဒၣ်ဆံးစၢ်ထီၣ်အဖိခွါဝဲၢ်ကိတဂၤ, ဒီးဘိၣ်ဘံဃာ်အီၤလၢတၢ်ကံးယာ်ဒီး ပုာ်မံလီၤအီၤလၢကျီၢ်အီၣ်ဆၣ်အကျိးအပူၤလီၤ. အဂ့ၢ်ဒ်အံၤ, ဖဲပှၤသမှံၤအဘျီၣ်ပူၤန့ၣ်ဒၢးတအိၣ် ကလီလၢအဝဲသ့ၣ်အဂီၢ်နီတဖျၢၣ်ဘၣ်.

⁸ဖဲကီၢ်အဝဲန့ၣ်အပူၤန့ၣ်, ပှၤကွၢ်သိအိၣ်ဝဲဒၣ်တနီၤလၢ အကွၢ်အသိလၢမုၢ်နၤခီဖဲပျီပူၤန့ၣ်လီၤ.

⁹ယွၤအကလူးတဂၤအိၣ်ဖျါထီၣ်လၢအဝဲသ့ၣ်အမဲာ်ညါ, ဒီးကစၢ်အလၤကပီၤကပီၤထီၣ်ဝးတရံးအဝဲသ့ၣ်လီၤ. အဝဲသ့ၣ်ပျံၤတၢ်ဖုးတၢ်ဒိၣ်မး,

¹⁰ဘၣ်ဆၣ်ဒီးကလူးန့ၣ်စံးဘၣ်အီၤ, “ပျံၤတၢ်တဂ့ၤ. ယဟဲဖဲအံၤ, အိၣ်ဒီးတၢ်ကစီၣ်အမုာ်လၢသုဂီၢ်, လၢအကဟဲစိာ်တၢ်သးခုအဒိၣ်အအါလၢပှၤကိးကလုာ်ဒဲး အဂီၢ်လီၤ.

¹¹တနံၤအံၤ, လၢစီၤဒၤဝံးအဝ့ၢ်ပူၤန့ၣ်, ပှၤအုၣ်က့ၤခီၣ်က့ၤတၢ်အကစၢ်တဂၤ အိၣ်ဖျဲၣ်ထီၣ်ဝဲလၢသုဂီၢ်လၢအမ့ၢ်ခရံာ်ကစၢ်န့ၣ်လီၤ.

¹²ဒီးတၢ်လၢအကဟ့ၣ်သုတၢ်အုၣ်အသးလၢအဂ့ၢ်န့ၣ်မ့ၢ်အအံၤလီၤ. သုကထံၣ်န့ၢ်ဖိသၣ်တဂၤဘၣ်တၢ်ဘိၣ်ဘံဃာ်အီၤလၢတၢ်ကံး ယာ်ဒီးအိၣ်မံလီၤလၢကျီၢ်အီၣ်ဆၣ်အကျိးပူၤလီၤ.”

¹³သတူၢ်ကလာ်, မူခိၣ်ကလူးအသုးမုၢ်ဖးဒိၣ်တဖုဟဲအိၣ်ဖျါထီၣ်ဝဲလၢ ကလူးတဂၤန့ၣ်အသိး, ဒီးသးဝံၣ်စံးထီၣ်ပတြၢၤကစၢ်ယွၤဒီးစံး,

¹⁴“တၢ်လၤကပီၤမ်အဘၣ်ကစၢ်ယွၤလၢ တၢ်လီၢ်အထီကတၢၢ်, လၢမူခိၣ်န့ၣ်တက့ၢ်. ဒီးမ်တၢ်ဃူတၢ်ဖိးအိၣ်ထီၣ်လၢဟီၣ်ခိၣ်ချၢ လၢပှၤလၢအဝဲဒၣ်ဘၣ်အသးတဖၣ် အသိးအကျါတက့ၢ်.”

¹⁵ဖဲမူခိၣ်ကလူးတဖၣ်ဟးထီၣ်ကွံာ်လၢအဝဲသ့ၣ်အအိၣ် ဒီးက့ၤထီၣ်ကဒါက့ၤဆူမူခိၣ်န့ၣ်, ပှၤကွၢ်သိတဖၣ်စံးလိာ်အသးတဂၤဒီးတဂၤ, “မ်ပကလဲၤသကိးဆူဝ့ၢ်ဘ့ၤသလ့ဃ့ၣ် ဒီးကွၢ်တၢ်တမံၤအံၤလၢအမၤအသးလၢ ကစၢ်ဒုးသ့ၣ်ညါတ့ၢ်ပှၤလၢအဂ့ၢ်န့ၣ်တက့ၢ်.”

¹⁶လၢတၢ်န့ၣ်အဃိ, အဝဲသ့ၣ်တဖၣ်ဟးထီၣ်ဝဲလၢအချ့ ဒီးထံၣ်ဘၣ်နီၢ်မၤရံဒီးစီၤယိၤသး, ဒီးထံၣ်ဖိသၣ်အိၣ်မံလီၤလၢကျီၢ်အီၣ်ဆၣ်အကျိးပူၤန့ၣ်လီၤ.

¹⁷ဖဲပှၤကွၢ်သိတဖၣ်ထံၣ်ဘၣ်အီၤန့ၣ်, အဝဲသ့ၣ်ဒုးဟူထီၣ်သါလီၤတၢ်ဂ့ၢ် လၢကလူးစံးဘၣ်တဲဘၣ်တ့ၢ်အဝဲသ့ၣ်ဘၣ်ဃးဒီးဖိသၣ်တဂၤန့ၣ်လီၤ.

¹⁸ကယဲၢ်ပှၤလၢအနၢ်ဟူဘၣ်တၢ်ဂ့ၢ်တမံၤန့ၣ်, ကမၢကမၣ်ဝဲလၢတၢ်လၢပှၤကွၢ်သိတဖၣ်စံးကတိၤဝဲလၢအဂ့ၢ် အဃိန့ၣ်လီၤ.

¹⁹နီၢ်မၤရံတိၢ်နီၣ်ဃာ်တၢ်ဂ့ၢ်တၢ်ကျိၤသ့ၣ်တဖၣ်အံၤခဲလၢာ် ဒီးဆိကမိၣ်ဝဲလၢအဂ့ၢ်လီၤ.

²⁰ပှၤကွၢ်သိတဖၣ်က့ၤကဒါက့ၤဝဲ, အိၣ်ဒီးတၢ်သးဝံၣ်စံးထီၣ်ပတြၢၤ ကစၢ်ယွၤလၢတၢ်လၢအဝဲသ့ၣ်တဖၣ်အနၢ်ဟူဘၣ်တ့ၢ်ဝဲ ဒီးထံၣ်ဘၣ်တ့ၢ်ဝဲခဲလၢာ်အဃိလီၤ. တၢ်မၤအသးန့ၣ်, မ့ၢ်ဝဲဒ်ကလူးတဂၤန့ၣ်စံးဘၣ်တဲဘၣ်တ့ၢ်အဝဲသ့ၣ်အသိးန့ၣ်လီၤ.

²¹တနွံဝံၤအလီၢ်ခံ, ဖဲတၢ်ဆၢကတီၢ်တုၤဃီၤလၢဖိသၣ်ကဘၣ်တၢ်ကူး တရံးအီၤန့ၣ်, အဝဲဘၣ်တၢ်ယုၢ်န့ၢ်အမံၤလၢယ့ၣ်ၡူး, ဒ်ကလူးယုၢ်န့ၢ်တ့ၢ်အီၤအသိးတချုးလၢအဝဲဒၣ်ဘၣ်တၢ်ဒၢထီၣ် အီၤဒံးဘၣ်န့ၣ်လီၤ.

²²တၢ်ဆၢကတီၢ်တုၤဃီၤဝဲဒၣ်လၢစီၤယိၤသးဒီးနီၢ်မၤရံကအိၣ်ဒီး တၢ်မၤကဆှီထီၣ်အသးအလုၢ်အလၢ်ဒ်စီၤမိၤၡ့အတၢ်သိၣ် တၢ်သီမၤလိာ်ဝဲအသိးန့ၣ်လီၤ. လၢတၢ်န့ၣ်အဃိ, အဝဲသ့ၣ်လဲၤစိာ်ဖိသၣ်န့ၣ်ဆူဝ့ၢ်ယရူၤရှလ့ၣ် ဒ်သိးအကပာ်ဖျါထီၣ်အီၤလၢကစၢ်အမဲာ်ညါအဂီၢ်,

²³ဒ်တၢ်ကွဲးအသးလၢကစၢ်ယွၤအတၢ်သိၣ်တၢ်သီအပူၤအိၣ်ဝဲအသိး, “ကယဲၢ်ဖိဝဲၢ်ကိပိာ်ခွါတဂၤလၢ်လၢ်ကဘၣ်တၢ်ပာ်စီဆှံအီၤလၢ ကစၢ်ယွၤအမဲာ်ညါ,” န့ၣ်လီၤ.

²⁴အဝဲသ့ၣ်လဲၤစ့ၢ်ကီးဒ်သိးအကလုၢ်ထီၣ်ပာ်ထီၣ်ထိၣ်လွံၢ်ဘုၣ်ခံဘ့ၣ် မ့တမ့ၢ်ထိၣ်ကးက့ၣ်ဖိခံဘ့ၣ်, ဒ်ကစၢ်ယွၤအတၢ်သိၣ်တၢ်သီစံးပာ်ဝဲအသိးန့ၣ်လီၤ.

²⁵ဖဲဆၢကတီၢ်အဝဲန့ၣ်, ပှၤအိၣ်ဝဲဒၣ်တဂၤလၢအမံၤမ့ၢ်စီၤစူၤမ့းအိၣ်, လၢအအိၣ်ဆိးဝဲဒၣ်ဖဲဝ့ၢ်ယရူၤရှလ့ၣ်န့ၣ်လီၤ. အဝဲဒၣ်မ့ၢ်ပှၤဂ့ၤပှၤဝါ, ပှၤပျံၤကစၢ်ယွၤအဲၣ်ကစၢ်ယွၤတဂၤ, ဒီးအိၣ်ခိးကွၢ်လၢ်အံၣ်စရ့လးကဘၣ်တၢ်အုၣ်က့ၤခီၣ်က့ၤအီၤလီၤ. သးစီဆှံအိၣ်ဒီးအီၤ,

²⁶ဒီးဒုးနဲၣ်အီၤလၢ, တချုးအဝဲဒၣ်ထံၣ်ဘၣ်ခရံာ်လၢ ကစၢ်စံးပာ်တ့ၢ်လၢအဂ့ၢ်တဂၤဒံးဘၣ်န့ၣ်ဒီး, အဝဲတသံဒံးဘၣ်န့ၣ်လီၤ.

²⁷ယွၤအသးဆှၢအီၤသတးဒီး, စီၤစူၤမ့းအိၣ်လဲၤနုာ်လီၤဆူတၢ်လုၢ်ဟံၣ် အပူၤလီၤ. ဖဲဖိသၣ်ယ့ၣ်ၡူးအမိၢ်အပၢ်ဟဲစိာ်နုာ်ဖိသၣ်လၢတၢ်လုၢ်ဟံၣ် အပူၤ, ဒ်သိးအကမၤန့ၢ်တၢ်လၢအဂီၢ်ဒ်တၢ်သိၣ်တၢ်သီအိၣ်ဝဲအသိးန့ၣ်,

²⁸စီၤစူၤမ့းအိၣ်စိာ်ထီၣ်ဖိသၣ်လၢအစုလိၤဒီးစံးထီၣ်ပတြၢၤကစၢ်ယွၤ ဒ်အံၤလီၤ.

²⁹“ခဲကနံၣ်အံၤ, ကစၢ်ဧၢ, နမၤလၢထီၣ်ပှဲၤထီၣ်လံ နတၢ်အၢၣ်လီၤအီလီၤသတးဒီး, ပျၢ်ကွံာ်နခ့နပှၤမုာ်မုာ်တက့ၢ်.

³⁰လၢယမဲာ်ချံဒၣ်ယဲန့ၣ်, ယထံၣ်ဘၣ်လံနတၢ်အုၣ်က့ၤခီၣ်က့ၤ,

³¹လၢနကတဲာ်ကတီၤပာ်တ့ၢ်နဲလၢ ပှၤကိးကလုာ်ဒဲးအမဲာ်ညါ,

³²တၢ်ကပီၤတဖျၢၣ်လၢအကလီၣ်ဖျါထီၣ် နတၢ်ဘၣ်နသးဆူပှၤကလုာ်ဂၤတဖၣ်, ဒီးဟဲစိာ်တၢ်လၤကပီၤဆူ နပှၤဂီၢ်မုၢ်အံၣ်စရ့လးအအိၣ်န့ၣ်လီၤ.”

³³ဖိသၣ်အပၢ်ဒီးအမိၢ်ကမၢကမၣ်ဝဲလၢတၢ်လၢ စီၤစူၤမ့းအိၣ်စံးကတိၤဝဲလၢအဂ့ၢ်အဃိလီၤ.

³⁴စီၤစူၤမ့းအိၣ်ဆိၣ်ဂ့ၤအဝဲသ့ၣ်ဒီးစံးဘၣ်ဖိသၣ်အမိၢ်, နီၢ်မၤရံ, “ဖိသၣ်အဝဲအံၤဘၣ်တၢ်ဃုထၢတ့ၢ်အီၤလၢကစၢ်ယွၤ လၢတၢ်မၤဟးဂီၤဒီးတၢ်အုၣ်က့ၤခီၣ်က့ၤပှၤအါဒံအါဂၤလၢ အံၣ်စရ့လးအပူၤအဂီၢ်န့ၣ်လီၤ. အဝဲဒၣ်ကမ့ၢ်တၢ်ပနီၣ်တခါလၢ ကစၢ်ယွၤအအိၣ်လၢပှၤအါဒံအါဂၤကကတိၤထီဒါဝဲ,

³⁵သတးဒီးကလီၣ်ဖျါထီၣ်အဝဲသ့ၣ်အတၢ်ဆိကမိၣ်ခူသူၣ်တဖၣ်လီၤ. ဒီးဒ်နးလၢအကနၣ်အ့ၣ်တဘ့ၣ်အသိးန့ၣ်တၢ်သးအုးကဆဲးဖျိ နသးဒၣ်နဲန့ၣ်လီၤ.”

³⁶ဝံမုၣ်လၢအသးပှၢ်သဃဲးအိၣ်ဝဲဖဲန့ၣ်တဂၤလီၤ. အဝဲဒၣ်မ့ၢ်မုၣ်ကမဲလၢအမံၤမ့ၢ်နီၢ်အၣ်နၤ, ဒီးမ့ၢ်ဝဲစီၤဖနူၤအ့လး, လၢအဘၣ်ဃးဒီးစီၤအၤၡူၢ်အဒူၣ်တဂၤန့ၣ်အဖိမုၣ်လီၤ. အဝဲဒၣ်ထီၣ်ပှၢ်ဝံၤအလီၢ်ခံအိၣ်ဘၣ်ဒီးအဝၤထဲနွံနံၣ်,

³⁷ဒီးခဲကနံၣ်အံၤအဝဲဒၣ်အသးအိၣ်ဝဲဃိးဆံလွံၢ်နံၣ်လီၤ. အဝဲတဟးဖးဒီးတၢ်လုၢ်ဟံၣ်နီတစုဘၣ်. အဝဲဘူၣ်ယွၤဘါယွၤ, အိၣ်ဒီးတၢ်ဒုၣ်တၢ်အီၣ်တၢ်အီဒီးတၢ်ဃ့ဘါထုကဖၣ်တၢ်လၢ မုၢ်ဆါဆဲးလၢမုၢ်နၤလီၤ.

³⁸ဖဲအနၣ်ရံၣ်တကတီၢ်ဃီအဝဲန့ၣ်, အဝဲဒၣ်ဟဲတုၤဒီးစံးထီၣ်ပတြၢၤယွၤ, ဒီးကတိၤတၢ်ဘၣ်ဃးဖိသၣ်တဂၤန့ၣ်အဂ့ၢ် လၢပှၤကိးဂၤဒဲးလၢအအိၣ်ခိးကစၢ်ယွၤ အကဒုးထူၣ်ဖျဲးထီၣ်ကွံာ်ဝ့ၢ်ယရူၤၡလ့ၣ်န့ၣ်လီၤ.

³⁹ဖဲစီၤယိၤသးဒီးနီၢ်မၤရံမၤဝံၤတၢ်ခဲလၢာ်, ဒ်ကစၢ်အတၢ်သိၣ်တၢ်သီမၤလိာ်ဝဲအသိးလံန့ၣ်, အဝဲသ့ၣ်က့ၤကဒါက့ၤဆူအလီၢ်အိၣ်လီၢ်ဆိး, ဝ့ၢ်နစၤရ့းအိၣ်လၢကီၢ်ကၤလံၤလါအပူၤန့ၣ်လီၤ.

⁴⁰ဖိသၣ်န့ၣ်ဒိၣ်ထီၣ်ဒီးအဂံၢ်အဘါဆူၣ်ထီၣ်ဝဲလီၤ. အဝဲဒၣ်လၢပှဲၤဒီးတၢ်ကူၣ်ဘၣ်ဖးသ့ဒီးကစၢ်ယွၤ အတၢ်ဆိၣ်ဂ့ၤဆိၣ်ဝါလီၤဘၣ်လၢအလိၤလီၤ.

⁴¹ယ့ၣ်ၡူးအမိၢ်အပၢ်တဖၣ်လဲၤဆူဝ့ၢ်ယရူၤၡလ့ၣ်ကိးနံၣ်ဒဲးဖဲ ဘူၣ်လဲၤကပာ်အဆၢကတီၢ်န့ၣ်လီၤ.

⁴²ဖဲယ့ၣ်ၡူးအသးအိၣ်တဆံခံနံၣ်န့ၣ်, အဝဲသ့ၣ်လဲၤဆူဘူၣ်လဲၤကပာ်ဒ်အညီနုၢ်အသိးလီၤ.

⁴³ဖဲဘူၣ်လဲၤကပာ်ဝံၤဝဲန့ၣ်, အဝဲသ့ၣ်က့ၤဝဲ, ဘၣ်ဆၣ်ဖိသၣ်ယ့ၣ်ၡူးအိၣ်တ့ၢ်ဝဲဖဲဝ့ၢ်ယရူၤရှလ့ၣ်လီၤ. တၢ်အံၤန့ၣ်, အမိၢ်အပၢ်တသ့ၣ်ညါဘၣ်.

⁴⁴အဝဲသ့ၣ်ဆိကမိၣ်လၢအဝဲဒၣ်အိၣ်လၢပှၤလဲၤဘူၣ်လဲၤကပာ် တဖၣ်အသိးအကျါအဃိ, အဝဲသ့ၣ်လဲၤတၢ်ဒီနံၤဝံၤအလီၢ် ခံစးထီၣ်ကွၢ်ဃုအီၤလၢအဘူးအတံၢ်တဖၣ်ဒီးအတံၤသကိး တဖၣ်အသိးအကျါလီၤ.

⁴⁵အဝဲသ့ၣ်တထံၣ်အီၤဘၣ်အဃိ, က့ၤကဒါက့ၤဝဲဒၣ်ဆူဝ့ၢ်ယရူၤရှလ့ၣ်ဒီးကွၢ်ဃုအီၤလီၤ.

⁴⁶ဖဲသၢသီတသီန့ၣ်အဝဲသ့ၣ်ထံၣ်အီၤလၢတၢ်လုၢ်ဟံၣ်အပူၤ, ဆ့ၣ်နီၤလၢယူဒၤအသရၣ်သမါတဖၣ်အသိးအကျါ, ဒိကနၣ်အဝဲသ့ၣ်အတၢ်စံးတၢ်ကတိၤ, ဒီးသံကွၢ်တၢ်သံကွၢ်တဖၣ်လီၤ.

⁴⁷ကယဲၢ်ပှၤလၢအနၢ်ဟူဘၣ်အဝဲအတၢ်စံးတၢ်ကတိၤတဖၣ်န့ၣ်, ကမၢကမၣ်ဝဲလၢအတၢ်စံးဆၢလၢအပှဲၤဒီးတၢ်ကူၣ်ဘၣ်ကူၣ်သ့, တၢ်သ့ၣ်ညါနၢ်ပၢၢ်တဖၣ်အဃိလီၤ.

⁴⁸အဝဲဒၣ်အမိၢ်အပၢ်တဖၣ်ကမၢကမၣ်ဝဲဖဲအထံၣ်ဘၣ်အီၤဒီး အမိၢ်စံးဘၣ်အီၤ, “ဖိခွါဧၢ, နမၤပှၤဒ်သိးအံၤဘၣ်မနုၤအဃိလဲၣ်. နပၢ်ဒီးယၤပလူၤဃုတ့ၢ်နၤလၢတၢ်သူၣ်ကိၢ်သးဂီၤအပူၤလီၤ.”

⁴⁹အဝဲဒၣ်စံးဆၢအဝဲသ့ၣ်, “ဘၣ်မနုၤအဃိသုဘၣ်လူၤဃုယၤလဲၣ်. မ့ၢ်သုတသ့ၣ်ညါလၢယကဘၣ်အိၣ်လၢယပၢ်အဟံၣ်ပူၤဘၣ်ဧါ.”

⁵⁰ဘၣ်ဆၣ်ဒီးအဝဲသ့ၣ်တနၢ်ပၢၢ်တၢ်စံးဆၢတထံၣ်န့ၣ်အခီပညီဘၣ်.

⁵¹မၤသးဒ်န့ၣ်ဒီးယ့ၣ်ၡူးက့ၤကဒါက့ၤဒီးအဝဲသ့ၣ်ဆူဝ့ၢ်နစၤရ့းဒီးဖဲန့ၣ် အဝဲဒၣ်စူၢ်အဝဲသ့ၣ်အကလုၢ်လီၤ. တၢ်ဂ့ၢ်တၢ်ကျိၤသ့ၣ်တဖၣ်အံၤခဲလၢာ် န့ၣ်အဝဲဒၣ်အမိၢ်တိၢ်နီၣ်ဃာ်ဝဲလၢအသးကံၢ်ပူၤလီၤ.

⁵²ဒီးယ့ၣ်ၡူးဒိၣ်ထီၣ်လၢနီၢ်ခိဒီးလၢတၢ်ကူၣ်ဘၣ်ကူၣ်သ့ခံမံၤလၢာ်, ဒီးလၢတၢ်ဘၣ်ကစၢ်ယွၤအသးဒီးပှၤကညီအသးအပူၤန့ၣ်လီၤ.