Read S'gaw Karen လံာ်လူၤကၣ် 23 Bible Online

လံာ်လူၤကၣ် 23 - S'gaw Karen bible

လံာ်လူၤကၣ် 23

¹ပှၤဒီဖုညါဂဲၤထၢၣ်, ဒီးဆှၢယ့ၣ်ၡူးဆူစီၤပံၤလးအမဲာ်ညါ

²ဖဲအဝဲသ့ၣ်ပာ်တၢ်ကမၣ်လၢအဝဲဒၣ်အလိၤဒီးစံး, “ပဖီၣ်န့ၢ်ပှၤတဂၤအံၤလၢအဆှၢကမၣ်ပပှၤကလုာ်, တြီအဝဲသ့ၣ်လၢအသုတဟ့ၣ်တၢ်ခိတၢ်သွဲဆူစီၤပၤဖးဒိၣ် အအိၣ်တဂ့ၤ, ဒီးစံးလီၤအသးလၢအနီၢ်ကစၢ်ဒၣ်ဝဲမ့ၢ်ခရံာ်, စီၤပၤတဂၤန့ၣ်လီၤ.”

³စီၤပံၤလးသံကွၢ်အီၤ, “နမ့ၢ်နဲပှၤယူဒၤဖိအစီၤပၤတဂၤန့ၣ်ဧါ.” ယ့ၣ်ၡူးစံးဆၢဝဲ, “နစံးတ့ၢ်လံနဲလံ.”

⁴တုၤနုၤတစု, စီၤပံၤလးစံးဘၣ်ပှၤလုၢ်တၢ်အခိၣ်အဒိၣ် တဖၣ်ဒီးပှၤဂီၢ်မုၢ်တဖၣ်, “ယတထံၣ်န့ၢ်တၢ်ဂ့ၢ်လၢ ယကစံၣ်ညီၣ်ပှၤတဂၤအံၤနီတမံၤဘၣ်.”

⁵ဘၣ်ဆၣ်ဒီး, အဝဲသ့ၣ်စံးကဒီးဝဲဆူၣ်န့ၢ်အလီၢ်, “အဝဲဒၣ်မၤတၢထီၣ်တၢလီၤတၢ်လၢပှၤဂီၢ်မုၢ်တဖၣ်အကျါ လၢကီၢ်ယူဒၤဒီကီၢ်ညါခီဖျိအတၢ်သိၣ်လီၤသီလီၤတဖၣ်လီၤ. အဝဲဒၣ်စးထီၣ်မၤဝဲလၢကီၢ်ကၤလံၤလါ, ဒီးခဲအံၤဟဲတုၤဝဲဖဲအံၤလံ.”

⁶ဖဲစီၤပံၤလးနၢ်ဟူတၢ်အဝဲအံၤန့ၣ်အဝဲဒၣ်သံကွၢ်ဝဲ, “ပှၤတဂၤအံၤမ့ၢ်ပှၤကၤလံၤလါဖိတဂၤဧါ.”

⁷ဖဲအဝဲဒၣ်သ့ၣ်ညါဘၣ်လၢယ့ၣ်ၡူးဟဲလၢတၢ်လီၢ်လၢအဘၣ် တၢ်ပၢအီၤလၢစီၤဟ့ၤရိာ်န့ၣ်, ဆှၢဝဲဆူစီၤဟ့ၤရိာ်လၢအအိၣ်စ့ၢ်ကီးဝဲဖဲ ဝ့ၢ်ယရူၤၡလ့ၣ်ဖဲဆၢကတီၢ်အဝဲန့ၣ်, န့ၣ်လီၤ.

⁸စီၤဟ့ၤရိာ်အသးခုဒိၣ်မး ဖဲအထံၣ်ဘၣ်ယ့ၣ်ၡူးန့ၣ်လီၤ. အဂ့ၢ်ဒ်အံၤ အဝဲနၢ်ဟူဘၣ်တ့ၢ်ဝဲယ့ၣ်ၡူးအဂ့ၢ်ဒီးဆၢမုၢ်လၢ်ထံၣ်ဘၣ်တ့ၢ် အီၤအိၣ်လံဖးယံာ်လံန့ၣ်လီၤ. အဝဲဒၣ်မုၢ်လၢ်လၢအကထံၣ်ဘၣ်ယ့ၣ်ၡူးမၤတၢ်လီၤလး တမံၤမံၤလီၤ.

⁹လၢတၢ်န့ၣ်အဃိ, စီၤဟ့ၤရိာ်သံကွၢ်ယ့ၣ်ၡူးတၢ်သံကွၢ်အါထံၣ်, ဘၣ်ဆၣ်ယ့ၣ်ၡူးတစံးဆၢဝဲနီတဘီဘၣ်.

¹⁰ပှၤလုၢ်တၢ်အခိၣ်အဒိၣ်တဖၣ်ဒီးပှၤသ့တၢ်ဘူၣ်တၢ်ဘါအတၢ် သိၣ်တၢ်သီတဖၣ်ဟဲထီၣ်ဆူတၢ်မဲာ်ညါဒီးပာ်တၢ်ကမၣ်ထီဒါ ယ့ၣ်ၡူးဆူၣ်ဆူၣ်ကလဲာ်လီၤ.

¹¹စီၤဟ့ၤရိာ်ဒီးအသုးဖိတဖၣ်နံၤဘၣ်ဖၣ်လဲယ့ၣ်ၡူး, ဒီးမၤအီၤတရီတပါလီၤ. အဝဲသ့ၣ်ဒုးကူဒုးသိးထီၣ်အီၤဆ့ကၤဖး ထီလၢအဂ့ၤ, ဒီးဆှၢက့ၤအီၤဆူစီၤပံၤလးအအိၣ်လီၤ.

¹²တနံၤဃီအဝဲန့ၣ်, စီၤဟ့ၤရိာ်ဒီးစီၤပံၤလးကဲထီၣ်ပှၤဒီတံၤဒီသကိး လီၤ. တချုးဒံးလၢဆၢကတီၢ်အဝဲအံၤန့ၣ်, အဝဲသ့ၣ်မ့ၢ်တ့ၢ်ပှၤဒီဒုၣ်ဒါ တဖၣ်လီၤ.

¹³စီၤပံၤလးကိးဖှိၣ်ပှၤလုၢ်တၢ်အခိၣ်အဒိၣ်တဖၣ်, ပှၤခိၣ်ပှၤနၢ်တဖၣ်, ဒီးပှၤဂီၢ်မုၢ်တဖၣ်,

¹⁴ဒီးစံးဘၣ်အဝဲသ့ၣ်, “သုဟဲဆှၢပှၤတဂၤအံၤဆူယအိၣ်, ဒီးစံးလၢအဝဲဒၣ်ဆှၢကမၣ်ပှၤဂီၢ်မုၢ်တဖၣ်လီၤ. ခဲကနံၣ်အံၤ, ယသမံသမိးလံအီၤဖဲအံၤလၢသုမဲာ်ညါ, ဒီးယတထံၣ်တ့ၢ်ယဲ တၢ်ကမၣ်လၢသုပာ်လၢအလိၤတဖၣ်နီတမံၤဘၣ်.

¹⁵စီၤဟ့ၤရိာ်စ့ၢ်ကီးတထံၣ်အတၢ်ကမၣ်ဘၣ်. အဂ့ၢ်ဒ်အံၤအဝဲဒၣ်ဆှၢလီၤက့ၤအီၤဆူပအိၣ်လီၤ. တၢ်လၢပှၤတဂၤအံၤမၤတ့ၢ်ဝဲလၢအကြၢးဒီးတၢ်သံန့ၣ်, တအိၣ်နီတမံၤဘၣ်.

¹⁶လၢတၢ်န့ၣ်အဃိ, ယကပျဲပှၤတီၢ်အီၤဖျ့အီၤ, ဝံၤဒီးပျဲလီၤကွံာ်အီၤလီၤ.

¹⁷(ဖဲဘူၣ်လဲၤကပာ်အဆၢကတီၢ်တဘျီဘၣ်တဘျီန့ၣ်, စီၤပံၤလးဘၣ်ပျၢ်ထူၣ်ဖျဲးကွံာ်ပှၤဃိာ်ဖိတဂၤလၢအဝဲသ့ၣ် အဂီၢ်လီၤ.)

¹⁸ပှၤဂီၢ်မုၢ်ဒီဖုညါကိးထီၣ်ဝဲ, “မၤသံအီၤတက့ၢ်. ပျၢ်ဖျဲးကွံာ်စီၤဘၤရးဘါလၢပဂီၢ်တက့ၢ်.”

¹⁹(စီၤဘၤရးဘါဘၣ်တၢ်ဒၢနုာ်တ့ၢ်အီၤလၢဃိာ်ပူၤ, မ့ၢ်လၢတၢ်တၢထီၣ်တၢလီၤတဘျီလၢအမၤတ့ၢ်အသးလၢဝ့ၢ်ပူၤ, ဒီးမ့ၢ်လၢအမၤသံတၢ်အဃိန့ၣ်လီၤ.)

²⁰စီၤပံၤလးသးအိၣ်ပျၢ်ထူၣ်ဖျဲးကွံာ်ယ့ၣ်ၡူးလီၤ. လၢတၢ်န့ၣ်အဃိ, အဝဲဒၣ်ကိးကတိၤဃီၤကဒီးဆူပှၤဂီၢ်မုၢ်တဖၣ်အအိၣ်လီၤ.

²¹ဘၣ်ဆၣ်ဒီးအဝဲသ့ၣ်ကိးပသူဆၢက့ၤဝဲ, “ပျၤထီအီၤလၢထူၣ်စုညါအလိၤတက့ၢ်. ပျၤထီအီၤလၢထူၣ်စုညါအလိၤတက့ၢ်.”

²²စီၤပံၤလးစံးဘၣ်ကဒီးအဝဲသ့ၣ်သၢဘျီတဘျီ, “မ့ၢ်အဝဲမၤကမၣ်ဘၣ်ထံကီၢ်အတၢ်သိၣ်တၢ်သီမနုၤတမံၤလဲၣ်. ယတထံၣ်န့ၢ်တၢ်ကမၣ်လၢအဝဲဒၣ်မၤတ့ၢ်ဝဲလၢအကြၢး ဒီးတၢ်သံန့ၣ်နီတမံၤဘၣ်. ယကမၢပှၤတီၢ်အီၤဖျ့အီၤ, ဝံၤဒီးပျဲလီၤကွံာ်အီၤလီၤ.”

²³ဘၣ်ဆၣ်ဒီးအဝဲသ့ၣ်ကိးပသူထီၣ်ဒံးဝဲလၢအကလုၢ်အဒိၣ်ကတၢၢ်, လၢယ့ၣ်ၡူးကဘၣ်တၢ်ပျၤထီအီၤလၢထူၣ်စုညါအလိၤအဂီၢ်န့ၣ်လီၤ. ဒီးလၢခံကတၢၢ်န့ၣ်အဝဲသ့ၣ်အကလုၢ်မၤနၢၤတၢ်ခဲလၢာ်လီၤ.

²⁴လၢတၢ်န့ၣ်အဃိ, စီၤပံၤလးစံၣ်ညီၣ်ယ့ၣ်ၡူးဒ်အဝဲသ့ၣ်ဃ့ဝဲအသိးန့ၣ်လီၤ.

²⁵အဝဲဒၣ်ပျဲလီၤကွံာ်ပှၤတဂၤလၢအဝဲသ့ၣ်အဲၣ်ဒိးဝဲ, ပှၤတဂၤလၢအဘၣ်တၢ်ဒၢနုာ်တ့ၢ်အီၤလၢဃိာ်ပူၤလၢ အမၤတၢထီၣ်တၢလီၤတၢ်ဒီးမၤသံတၢ်အဃိ, ဒီးဟ့ၣ်လီၤယ့ၣ်ၡူးဆူအဝဲသ့ၣ်အစုပူၤ, ဒ်သိးအကမၤအီၤဖဲအသးဒၣ်ဝဲန့ၣ်လီၤ.

²⁶ဖဲအဝဲသ့ၣ်ဆှၢယ့ၣ်ၡူးဒီးလဲၤတၢ်အဖၢမုၢ်န့ၣ်, ဘၣ်သဂၢၢ်ဒီးပှၤတဂၤလၢအမံၤမ့ၢ်စီၤၡံမိၣ်ဘၣ်ဃးဒီးကီၢ်ကူၤရ့ၤန့, လၢအဟဲလၢခိဒီးဟဲနုာ်လီၤဆူဝ့ၢ်ပူၤန့ၣ်လီၤ. အဝဲသ့ၣ်ဖီၣ်အီၤ, ပာ်ထီၣ်ထူၣ်စုညါလၢအလိၤဒီးမၢအစိာ်ဝဲဒီးလဲၤတၢ်လၢ ယ့ၣ်ၡူးအလီၢ်ခံန့ၣ်လီၤ.

²⁷ပှၤဂီၢ်မုၢ်ဖးဒိၣ်ပိာ်ထီၣ်အခံ, ဒီးလၢအကျါန့ၣ်အိၣ်ဒီးပိာ်မုၣ်တဖၣ်လၢ အဒဲလီၤအသးနါပှၢ်ဒီးဟီၣ်ဝဲယၢၤဝဲလၢအဝဲဒၣ်အဃိန့ၣ်လီၤ.

²⁸ယ့ၣ်ၡူးဃၣ်ဃီၤအသးဆူအဝဲသ့ၣ်အအိၣ်ဒီးစံးဝဲ, “ယရူၤၡလ့ၣ်အဖိမုၣ်သ့ၣ်ဧၢ, ဟီၣ်လၢယဃိတဂ့ၤ. မ့မ့ၢ်ဟီၣ်လၢသုဃိဒၣ်သုဝဲဒီးလၢသုဖိသုလံၤတဖၣ် အဃိန့ၣ်တက့ၢ်.

²⁹အဂ့ၢ်ဒ်အံၤ, မုၢ်နံၤမုၢ်သီတဖၣ်ကဟဲဝဲဖဲပှၤကစံး, ‘ပိာ်မုၣ်လၢအဖိတအိၣ်နီတစု, လၢအတဒၢထီၣ်နီတစု, ဒီးတဒုးအီၣ်နုၢ်ဘၣ်ဖိသၣ်နီတစုတဖၣ်န့ၣ်, ဘၣ်ဆိၣ်ဂ့ၤဆံးဒိၣ်လဲၣ်’ န့ၣ်လီၤ.

³⁰အဝဲန့ၣ်ကမ့ၢ်ဆၢကတီၢ်ဖဲပှၤကစံးဘၣ်ကစၢၢ်ကလိတဖၣ်, ‘လီၤတဲာ်လၢပလိၤတက့ၢ်.’ ဒီးတၢ်လူၢ်တဖၣ်, ‘ပာ်ခူသူၣ်ပှၤတက့ၢ်’ န့ၣ်လီၤ.

³¹အဂ့ၢ်ဒ်အံၤ, တၢ်မ့ၢ်မၤအသးလၢသ့ၣ်သံကစဲာ်အခါဒ်အံၤဒီး ဖဲသ့ၣ်ဃ့ထီအခါတၢ်ကမၤသးဒ်လဲၣ်.”

³²အဝဲသ့ၣ်မိၤဃုာ်ပှၤအဂၤခံဂၤလၢအမ့ၢ်ပှၤမၤကမၣ်ထံကီၢ် အတၢ်သိၣ်တၢ်သီခံဂၤလၢာ်, ဒ်သိးအကဘၣ်တၢ်မၤသံဃုာ်ဒီးယ့ၣ်ၡူးန့ၣ်လီၤ.

³³ဖဲအဝဲသ့ၣ်တုၤတၢ်လီၢ်တတီၤလၢအဘၣ်တၢ်ကိးအီၤလၢ, “ကီၤလၤကီၤသါ” လၢအခီပညီမ့ၢ်, “တၢ်ခိၣ်ဃံ” န့ၣ်, အဝဲသ့ၣ်ပျၤထီ ယ့ၣ်ၡူးလၢထူၣ်စုညါအလိၤဖဲန့ၣ်, ဒီးပှၤအၢပှၤသီခံဂၤစ့ၢ်ကီး, တဂၤလၢအစုထွဲ, ဒီးတဂၤလၢအစုစ့ၣ်န့ၣ်လီၤ.

³⁴ယ့ၣ်ၡူးစံးဝဲ, “ပၢ်ဧၢ, ပျၢ်အဝဲသ့ၣ်အတၢ်ကမၣ်တက့ၢ်. အဝဲသ့ၣ်မၤတၢ်မနုၤလဲၣ်န့ၣ်တသ့ၣ်ညါဝဲဘၣ်.” အဝဲသ့ၣ်နီၤဖးလီၤအဝဲဒၣ်အကူအသိးလၢအသကိးဒၣ်ဝဲ အကျါခီဖျိအဖီၣ်တၢ်ဖးလီၤ.

³⁵ပှၤဂီၢ်မုၢ်တဖၣ်အိၣ်ဆၢထၢၣ်ဝဲဖဲန့ၣ်ဒီးကွၢ်ကီတၢ်, ဖဲပှၤယူဒၤအခိၣ်အနၢ်တဖၣ်ကတိၤနံၤဘၣ်ဖၣ်လဲအီၤဒီးစံး, “အဝဲဒၣ်အုၣ်က့ၤခီၣ်က့ၤပှၤဂၤတဖၣ်လီၤ. အဝဲမ့မ့ၢ်ခရံာ်လၢကစၢ်ယွၤဃုထၢတ့ၢ်အီၤတဂၤဒီး, မ်အအုၣ်က့ၤခီၣ်က့ၤအသးဒၣ်ဝဲတက့ၢ်.”

³⁶ပှၤသုးဖိတဖၣ်စ့ၢ်ကီးနံၤဘၣ်ဖၣ်လဲအီၤလီၤ. အဝဲသ့ၣ်လဲၤဃီၤဆူအအိၣ် ဒီးဒုးအီအီၤစပံးထံလၢအပှ့ၤဘၣ်တကလုာ်

³⁷ဒီးစံးဝဲ, “နမ့မ့ၢ်ပှၤယူဒၤဖိတဖၣ်အစီၤပၤန့ၣ်, အုၣ်က့ၤခီၣ်က့ၤလီၤနသးဒၣ်နဲတက့ၢ်.”

³⁸လၢအဝဲဒၣ်အခိၣ်ထးန့ၣ်, တၢ်ကတိၤ ‘အဝဲအံၤမ့ၢ်ပှၤယူဒၤဖိတဖၣ် အစီၤပၤ’ ဘၣ်တၢ်ကွဲးလီၤအီၤလီၤ.

³⁹ပှၤအၢဖိလၢအဘၣ်တၢ်ပျၤထီအီၤဖဲအဝဲအကပၤအကျါ တဂၤကတိၤဒုၣ်ဒွဲၣ်အီၤဒီးစံး, “နတမ့ၢ်ခရံာ်ဘၣ်ဧါ. အုၣ်က့ၤခီၣ်က့ၤလီၤနသးဒၣ်နဲဒီးပှၤတက့ၢ်.”

⁴⁰ဘၣ်ဆၣ်ဒီးပှၤအၢဖိအဂၤတဂၤဒူအလိၤဒီးစံးဝဲ, “နတပျံၤကစၢ်ယွၤဘၣ်ဧါ. နအိၣ်လၢတၢ်စံၣ်ညီၣ်တမံၤဃီအဖီလာ်လီၤ.

⁴¹ဘၣ်ဆၣ်ဒီး, ပဝဲပတၢ်တူၢ်ဘၣ်တၢ်န့ၣ်, မ့ၢ်ဒၣ်တၢ်လၢအကြၢးဝဲဘၣ်ဝဲဒီးပှၤလီၤ. အဂ့ၢ်ဒ်အံၤ, ပဒိးန့ၢ်ဘၣ်တၢ်စံၣ်ညီၣ်လၢတၢ်လၢပမၤတ့ၢ်ပဝဲတဖၣ် အဃိလီၤ. မ့မ့ၢ်အဝဲဒၣ်န့ၣ်တမၤကမၣ်တ့ၢ်တၢ်နီတမံၤဘၣ်.”

⁴²ဒီးအဝဲဒၣ်စံးဘၣ်ယ့ၣ်ၡူး, “ယ့ၣ်ၡူးဧၢ, ဖဲနဟဲနဲဒ်စီၤပၤအသိးန့ၣ်သ့ၣ်နီၣ်ထီၣ်ယၤတက့ၢ်.”

⁴³ယ့ၣ်ၡူးစံးဘၣ်အီၤ, “ယစံးဘၣ်တဲဘၣ်နၤတီတီလိၤလိၤလၢနၤမုၢ်မဆါတနံၤအံၤ, နကအိၣ်ဒီးယၤလၢပၤရဒံစူးအပူၤလီၤ.”

⁴⁴ဖဲမုၢ်ဆါခီတဆံခံနၣ်ရံၣ်ဃၣ်ဃၣ်န့ၣ်, မုၢ်ဆိကတီၢ်ကွံာ်အတၢ်ကပီၤဒီး တၢ်ခံးမးလၢကီၢ်ဒီဘ့ၣ်ညါတုၤလၢဟါခီလီၤသၢနၣ်ရံၣ်,

⁴⁵ဒီးတၢ်လုၢ်ဟံၣ်အယၣ်ဘျးတဒၢတဘ့ၣ်န့ၣ်, ယာ်ကွံာ်ဝဲဒၣ်ခံခီလီၤ.

⁴⁶ယ့ၣ်ၡူးကိးထီၣ်လၢအကလုၢ်ဖးဒိၣ်, “ပၢ်ဧၢ, ယဟ့ၣ်လီၤယသးလၢနစုပူၤလီၤ.” အဝဲဒၣ်စံးတၢ်ဒ်န့ၣ်ဝံၤဒီးအသးဟးထီၣ်ကွံာ်လီၤ.

⁴⁷ပှၤသုးဖိတကယၤအခိၣ်ထံၣ်တၢ်လၢအမၤတ့ၢ်အသးတဖၣ် စံးထီၣ်ပတြၢၤယွၤဒီးစံးဝဲ, “သပှၢ်ကတၢၢ် ပှၤတဂၤအံၤမ့ၢ်ပှၤဂ့ၤပှၤဝါလီၤ.”

⁴⁸ဖဲပှၤဂီၢ်မုၢ်, လၢအပာ်ဖှိၣ်ထီၣ်အသးဖဲန့ၣ်ဒ်သိးအကကွၢ်တၢ်မၤအသး တဖၣ်, ထံၣ်ဘၣ်တၢ်လၢအမၤတ့ၢ်အသးန့ၣ်, အဝဲသ့ၣ်ကိးဂၤဒဲးဒဲလီၤအသးနါပှၢ်, လၢတၢ်သူၣ်အုးသးအုးအပူၤဒီးက့ၤက့ၤဝဲဆူဟံၣ်လီၤ.

⁴⁹ပှၤကိးဂၤဒဲးလၢအသ့ၣ်ညါယ့ၣ်ၡူးဃုာ်ဒီးပိာ်မုၣ်တဖၣ်လၢ အဟဲပိာ်ယ့ၣ်ၡူးအခံလၢကီၢ်ကၤလံၤလါန့ၣ်, အိၣ်ဆၢထၢၣ်လၢအယံၤဒ်သိးအကထံၣ်ဘၣ်တၢ်မၤ အသးတဖၣ်အံၤန့ၣ်လီၤ.

⁵⁰ပှၤအိၣ်ဝဲဒၣ်တဂၤလၢအမံၤမ့ၢ်စီၤယိၤသးလၢဝ့ၢ်အရံၤမၤသဲ ဘၣ်ဃးဒီးကီၢ်ယူဒၤန့ၣ်လီၤ. အဝဲဒၣ်မ့ၢ်ပှၤအဂ့ၤအဝါဒီးအတီ အလိၤတဂၤ, လၢအအိၣ်ခိးကွၢ်လၢ်ယွၤအဘီအမုၢ်အတၢ်ဟဲန့ၣ်လီၤ. အဝဲမ့ၢ်ကီၣ်ကးအကရၢဖိတဂၤသနာ်က့, တဘၣ်သူၣ်ဘၣ်သးလၢအဝဲသ့ၣ်အတၢ်အၢၣ်လီၤစံၣ်ညီၣ် ဒီးအတၢ်ဖံးတၢ်မၤတဖၣ်ဘၣ်လီၤ.

⁵¹

⁵²အဝဲဒၣ်လဲၤဆူစီၤပံၤလးအအိၣ်, ဒီးဃ့အီၤလၢယ့ၣ်ၡူးအစိၣ်လီၤ.

⁵³အန့ၣ်ဝံၤဒီး, အဝဲဒၣ်စိာ်လီၤယ့ၣ်ၡူးအစိၣ်, ဘိၣ်ဘံဃာ်အီၤလၢတၢ်ကံးယာ်အဝါတဘ့ၣ်, ဒီးပာ်လီၤအီၤလၢပှၤသွၣ်ခိၣ်အပူၤလၢအဘၣ်တၢ် ပျၤန့ၢ်အီၤလၢလၢၢ်လိၤဒီးတဘၣ်တၢ်သူဒံးအီၤနီတဘျီဘၣ်န့ၣ်လီၤ.

⁵⁴မ့ၢ်ဝဲဒၣ်မုၢ်ယဲၢ်နံၤ, ဒီးမုၢ်အိၣ်ဘှံးနံၤကတုၤဃီၤဘူးထီၣ်ဝဲလံန့ၣ်လီၤ.

⁵⁵ပိာ်မုၣ်လၢအဟဲပိာ်ယ့ၣ်ၡူးအခံလၢကီၢ်ကၤလံၤလါတဖၣ်လဲၤ ဃုာ်ဒီးစီၤယိၤသးဒီးထံၣ်ဘၣ်ပှၤသွၣ်ခိၣ်အပူၤ, ဒီးယ့ၣ်ၡူးအစိၣ်ဘၣ်တၢ်ပာ်လီၤအီၤလၢအပူၤဒ်လဲၣ်န့ၣ်လီၤ.

⁵⁶အန့ၣ်ဝံၤအလီၢ်ခံ, အဝဲသ့ၣ်က့ၤက့ၤဆူဟံၣ်ဒီးအိၣ်ကတဲာ်ကတီၤပာ်တၢ်နၢမူဒီးမူရၣ် လၢအကဖှူအစိၣ်အဂီၢ်န့ၣ်လီၤ. ဖဲမုၢ်အိၣ်ဘှံးနံၤန့ၣ်, အဝဲသ့ၣ်အိၣ်ဘှံးဝဲဒ်တၢ်သိၣ်တၢ်သီအိၣ်ဝဲအသိးန့ၣ်လီၤ.