Read S'gaw Karen လံာ်လူၤကၣ် 3 Bible Online

လံာ်လူၤကၣ် 3 - S'gaw Karen bible

လံာ်လူၤကၣ် 3

¹အဆၢကတီၢ်မ့ၢ်ဝဲဖဲစီၤပၤဖးဒိၣ်တံၤဘ့းရံပၢတၢ်ပှဲၤထီၣ် တဆံယဲၢ်နံၣ်တနံၣ်, ဖဲစီၤပီၣ်တံၤပံၤလးမ့ၢ်ကီၢ်ယူဒၤအပဒိၣ်ဖးဒိၣ်, စီၤဟ့ၤရိာ်မ့ၢ်ကီၢ်ကၤလံၤလါအပဒိၣ်, ဒီးအဒီပုၢ်ဝဲၢ်စီၤဖံလံးပူးမ့ၢ်ကီၢ်ယတူၢ် ဒီးကီၢ်တြဃိၤန့တံၤအပဒိၣ်, စီၤလူၤစၤနံမ့ၢ်ကီၢ်အဘ့ၤလ့ၣ်အပဒိၣ်,

²ဒီးစီၤအၣ်နၣ်ဒီးစီၤကၤယါဖၤမ့ၢ်ပှၤလုၢ်တၢ်အခိၣ်အဒိၣ်ကတၢၢ်တဖၣ်လီၤ. ဖဲအဆၢကတီၢ်အဝဲန့ၣ်, ကစၢ်ယွၤအကလုၢ်တုၤအိၣ်စီၤစဃၤရံအဖိခွါ စီၤယိၤဟၣ်ဖဲပှၢ်မုၢ်ကနၢန့ၣ်လီၤ.

³လၢတၢ်န့ၣ်အဃိစီၤယိၤဟၣ်လဲၤဝဲသကုၤတၢ်လီၢ်တၢ်ကျဲဒီကဝီၤ လၢအအိၣ်ဝဲဒၣ်ဖဲထံကျိယၢ်ဒ့ၣ်အဃၢၤဒီးစံၣ်တဲၤတဲလီၤတၢ်ဒ် အံၤ, “ဃၣ်ကွံာ်သုသးလၢသုတၢ်ဒဲးဘးတဖၣ်ဒီးဒိးဘျၢသုသး တက့ၢ်. ဒီးကစၢ်ယွၤကပျၢ်ကွံာ်သုတၢ်ဒဲးဘးတဖၣ်န့ၣ်လီၤ.”

⁴ဒ်တၢ်ကွဲးပာ်အသးဖဲလံာ်ဝံယၡါယၤအပူၤအသိး, “ပှၤတဂၤကိးသတြီလၢပှၢ်မုၢ်ကနၢအပူၤ, ‘အိၣ်ကတဲာ်ကတီၤပာ်ကျဲမုၢ်ဒိၣ်လၢကစၢ်အဂီၢ်, မၤန့ၢ်ကျဲဖိအဘျၢတဘိလၢ အဝဲဒၣ်ကလဲၤတၢ်အဂီၢ်တက့ၢ်.

⁵ကယဲၢ်ကစၢၢ်ကဆူးကဘၣ်တၢ်မၤပှဲၤထီၣ်အီၤ, ကယဲၢ်တၢ်လူၢ်တၢ်တြီၤဒီးကစၢၢ်ခိၣ်ကလိခံတဖၣ် ကဘၣ်တၢ်မၤပၢၤအီၤ, ကယဲၢ်ကျဲအက့ၣ်အကူတဖၣ်ကဘၣ်တၢ်မၤဘျၢအီၤ, ဒီးကျဲဖိလၢအထီၣ်ကူလီၤယၢၣ်တဖၣ် ကဘၣ်တၢ်မၤဃူထီၣ်အီၤလီၤ.

⁶ပှၤဟီၣ်ခိၣ်ဖိကိးဂၤဒဲး ကထံၣ်ဘၣ် ကစၢ်ယွၤအတၢ်အုၣ်က့ၤခီၣ်က့ၤလီၤ.’ ”

⁷ပှၤဂီၢ်မုၢ်ဂီၢ်ပၤဟဲဆူစီၤယိၤဟၣ်အအိၣ်, ဒ်သိးအကဘၣ်တၢ်ဘျၢအီၤလၢထံလီၤ. အဝဲဒၣ်စံးဘၣ်အဝဲသ့ၣ် “ဂုၢ်ဘီၣ်အီးသ့ၣ်ဧၢ, မ့ၢ်မတၤစံးဘၣ်တဲဘၣ်သုလၢသုပူၤဖျဲးဒီး တၢ်စံၣ်ညီၣ်လၢကစၢ်ယွၤသါကဆှၢလီၤဝဲန့ၣ်သ့ဝဲတဂၤလဲၣ်.

⁸မၤတၢ်သ့ၣ်တဖၣ်လၢအကဒုးနဲၣ်ဖျါထီၣ်လၢသုဃၣ်ကွံာ်လံ သုသးလၢတၢ်ဒဲးဘးတဖၣ်န့ၣ်တက့ၢ်. ဒီးတဘၣ်စံးလိာ်သုသး ကဒဲကဒဲလၢစီၤအၤဘြၤဟၣ်မ့ၢ်သုပၢ်ဖးဒိၣ်လၢသုဟဲလီၤစၢၤ လၢအီၤတဂၤန့ၣ်တဂ့ၤ. ယစံးဘၣ်သုလၢကစၢ်ယွၤဟံးန့ၢ်လၢၢ် တဖၣ်အံၤဒီးဒုးကဲထီၣ်ဝဲစၢၤသွဲၣ်တဖၣ်လၢစီၤအၤဘြၤဟၣ် အဂီၢ်န့ၣ်သ့ဝဲလီၤ.

⁹ကွါအိၣ်ကတဲာ်ကတီၤပာ်လံအသးလၢတၢ်ကကူာ်လီၤကွံာ်သ့ၣ် တဖၣ်တုၤလၢအဂံၢ်ခီၣ်ထံးလီၤ. သ့ၣ်တထူၣ်လၢ်လၢ်လၢအတသၣ်ထီၣ်တၤသၣ်အဂ့ၤန့ၣ်, ကဘၣ်တၢ်ကူာ်လီၤဒီးတ့ၢ်လီၤကွံာ်အီၤဆူမ့ၣ်အူအပူၤလီၤ.”

¹⁰ပှၤဂီၢ်မုၢ်တဖၣ်သံကွၢ်အီၤ, “မ့မ့ၢ်ဒ်န့ၣ်ဒီး, ပကဘၣ်မၤဒ်လဲၣ်.”

¹¹အဝဲစံးဆၢဝဲ, “ပှၤတဂၤလၢ်လၢ်လၢအဆ့ကၤအိၣ်ခံဘ့ၣ်န့ၣ်, ကဘၣ်ဟ့ၣ်ဝဲတဘ့ၣ်ဆူပှၤလၢအတၢ်တအိၣ်နီတဘ့ၣ်, ဒီးပှၤတဂၤလၢ်လၢ်လၢအအိၣ်ဒီးတၢ်အီၣ်တၢ်အီန့ၣ်, ကဘၣ်နီၤလီၤဝဲလီၤ.”

¹²ပှၤဃ့သွဲတနီၤဟဲဝဲဒ်သိးအကဘၣ်တၢ်ဘျၢအီၤလၢထံ, ဒီးအဝဲသ့ၣ်သံကွၢ်အီၤ, “သရၣ်ဧၢ, ပကဘၣ်မၤဒ်လဲၣ်.”

¹³အဝဲဒၣ်စံးဘၣ်အဝဲသ့ၣ်, “တဘၣ်ထၢတၢ်အခိအသွဲအါန့ၢ် တၢ်သိၣ်တၢ်သီဟ့ၣ်စိဟ့ၣ်ကမီၤသုတဂ့ၤ.”

¹⁴ပှၤသုးဖိတနီၤသံကွၢ်စ့ၢ်ကီးအီၤ, “ပဝဲတခီလဲၣ် ပကဘၣ်မၤဒ်လဲၣ်.” အဝဲဒၣ်စံးဘၣ်အဝဲသ့ၣ်, “တဘၣ်ဟံးန့ၢ်ဆူၣ်ကျိၣ်စ့လၢပှၤအိၣ်မ့ၢ်ဂ့ၤ, မ့တမ့ၢ်, ပာ်တၢ်ကမၣ်ကဘျံးကဘျၣ်လၢပှၤတဂၤဂၤအလိၤမ့ၢ်ဂ့ၤ, နီတဂၤတဂ့ၤ. သူၣ်မံသးမံဒီးသုဘူးသုလဲတက့ၢ်.”

¹⁵ပှၤဂီၢ်မုၢ်အတၢ်မုၢ်လၢ်အါထီၣ်, ဒီးဆိကမိၣ်ဝဲလၢဘၣ်တဘၣ်စီၤယိၤဟၣ်ကမ့ၢ်ခရံာ်သ့ၣ်သ့ၣ်လီၤ.

¹⁶လၢတၢ်န့ၣ်အဃိ, စီၤယိၤဟၣ်စံးဘၣ်အဝဲသ့ၣ်ကိးဂၤဒဲး, “ယဲဒၣ်အံၤ, ယဘျၢသုလၢထံလီၤ. မ့မ့ၢ်ပှၤဟဲဝဲတဂၤလၢအဒိၣ်န့ၢ်ဒံးယၤစၢၢ်တလၢၢ်လီၤ. ယတကြၢးတဘၣ်ဒၣ်လဲာ်လၢယကဃ့ၣ်လီၤန့ၢ်အဝဲဒၣ် အခီၣ်ဖံးပျံၤအဂီၢ်န့ၣ်ဘၣ်. အဝဲဒၣ်ကဘျၢသုလၢသးစီဆှံဒီးလၢမ့ၣ်အူန့ၣ်လီၤ.

¹⁷အဝဲဒၣ်လီၤဂာ်ဒီးပှၤတဂၤလၢအဟံးဃာ်အကီၢ်လဲၢ်လၢအစုပူၤ ဒ်သိးအကပညၢကဆှီထီၣ်အဘုတဖၣ်, ဒီးကဂၢ်ဖှိၣ်အဘုကၠူၣ်တဖၣ်ဆူအဘုဖီအပူၤ, မ့မ့ၢ်လီၢ်ဧိၤဒံးဧိၤဒီးဖ့တဖၣ် ကဆူးကဲၤထီၣ်ကွံာ်ဝဲလၢမ့ၣ်အူလၢအလီၤပံာ်တသ့အပူၤန့ၣ်လီၤ.”

¹⁸စီၤယိၤဟၣ်စံၣ်တဲၤတဲလီၤတၢ်သးခုကစီၣ်လၢကျဲအါဘိဒီး သဆၣ်ထီၣ်ပှၤဂီၢ်မုၢ်အခံလီၤ.

¹⁹ဘၣ်ဆၣ်အဝဲဒၣ်သိၣ်ဃီၣ်ဒီးပာ်တၢ်ကမၣ်လၢပဒိၣ်ဖးဒိၣ် စီၤဟ့ၤရိာ်အလိၤမ့ၢ်လၢအဝဲဒၣ်ဟံးန့ၢ်အဒီပုၢ်ဝဲၢ်အမါ, နီၢ်ဟ့ၤရိၤဒံ, ဒီးလၢတၢ်အၢတၢ်သီအဂၤအါမံၤအါကလုာ်လၢအမၤ တ့ၢ်ဝဲတဖၣ်အဃိလီၤ.

²⁰အန့ၣ်ဝံၤအလီၢ်ခံ, စီၤဟ့ၤရိာ်မၤတၢ်တမံၤလၢအအၢအသီဒိၣ် ဒၣ်တၢ်တက့ၢ်ခီဖျိအဒၢနုာ်စီၤယိၤဟၣ်လၢဃိာ်အပူၤန့ၣ်လီၤ.

²¹ပှၤဂီၢ်မုၢ်ခဲလၢာ်ဘၣ်တၢ်ဘျၢအီၤလၢထံဝံၤအလီၢ်ခံန့ၣ်, ယ့ၣ်ၡူးစ့ၢ်ကီးဘၣ်တၢ်ဘျၢအီၤလၢထံန့ၣ်လီၤ. ဖဲအဝဲဒၣ်ဃ့ဘါထုကဖၣ်တၢ်အဖၢမုၢ်န့ၣ်, မူခိၣ်အိးထီၣ်အသး,

²²ဒီးသးစီဆှံဟဲလီၤလၢအလိၤအိၣ်ဒီးနီၢ်ခိအက့ၢ်အဂီၤဒ်ထိၣ်လွံၢ် တဘ့ၣ်အသိးန့ၣ်လီၤ. ဒီးတၢ်ကလုၢ်သီၣ်လီၤလၢမူခိၣ်ဒီးစံးဝဲ, “နဲဒၣ်အံၤနမ့ၢ်ယဖိခွါဒၣ်ယဲလၢယအဲၣ်အီၤတဂၤလီၤ. ယဘၣ်သူၣ်ဘၣ်သးနၤဒိၣ်မးလီၤ.”

²³ဖဲယ့ၣ်ၡူးစးထီၣ်အတၢ်ဖံးတၢ်မၤန့ၣ်, အဝဲအသးအိၣ်သၢဆံဃၣ်ဃၣ်လီၤ. ပှၤအတၢ်ဆိကမိၣ်အိၣ်ဝဲဒၣ်လၢအမ့ၢ် စီၤယိၤသးလၢအဘၣ်တၢ်ထီၣ်ဖိအီၤလၢစီၤဟ့ၤလံတဂၤန့ၣ်အဖိခွါလီၤ.

²⁴စီၤဟ့ၤလံအပၢ်မ့ၢ်ဝဲစီၤမးသး, စီၤမးသးအပၢ်မ့ၢ်ဝဲစီၤလ့ၤဝံ, စီၤလ့ၤဝံအပၢ်မ့ၢ်ဝဲစီၤမ့းလဃံ, စီၤမ့းလဃံအပၢ်မ့ၢ်ဝဲစီၤယၣ်နါ, စီၤယၣ်နါအပၢ်မ့ၢ်ဝဲစီၤယိၤသး,

²⁵စီၤယိၤသးအပၢ်မ့ၢ်ဝဲစီၤမးတၤသံ, စီၤမးတၤသံအပၢ်မ့ၢ်ဝဲစီၤအမိၣ်, စီၤအမိၣ်အပၢ်မ့ၢ်ဝဲစီၤနအူၣ်, စီၤနအူၣ်အပၢ်မ့ၢ်ဝဲစီၤအ့းစလံ, စီၤအ့းစလံအပၢ်မ့ၢ်ဝဲစီၤနၤကဲ,

²⁶စီၤနၤကဲအပၢ်မ့ၢ်ဝဲစီၤမအါသး, စီၤမအါသးအပၢ်မ့ၢ်ဝဲစီၤမးတၤသံ, စီၤမးတၤသံအပၢ်မ့ၢ်ဝဲစီၤစ့းမ့းအံ, စီၤစ့းမ့းအံအပၢ်မ့ၢ်ဝဲစီၤယိၤသး, စီၤယိၤသးအပၢ်မ့ၢ်ဝဲစီၤယူဒၤ,

²⁷စီၤယူဒၤအပၢ်မ့ၢ်ဝဲစီၤယိၤအၣ်နၣ်, စီၤယိၤအၣ်နၣ်အပၢ်မ့ၢ်ဝဲစီၤရ့ၤစါ, စီၤရ့ၤစါအပၢ်မ့ၢ်ဝဲစီၤစရူဘၤဘ့းလး, စီၤစရူဘၤဘ့းလးအပၢ်မ့ၢ်ဝဲစီၤၡၤလတံၤအ့လး, စီၤၡၤလတံၤအ့လးအပၢ်မ့ၢ်ဝဲစီၤန့ၤရံ,

²⁸စီၤန့ၤရံအပၢ်မ့ၢ်ဝဲစီၤမ့းလဃံ, စီၤမ့းလဃံအပၢ်မ့ၢ်ဝဲစီၤအးဒံး, စီၤအးဒံးအပၢ်မ့ၢ်ဝဲစီၤကိၣ်စၣ်, စီၤကိၣ်စၣ်အပၢ်မ့ၢ်ဝဲစီၤအ့းလမိၤဒၣ်, စီၤအ့းလမိၤဒၣ်အပၢ်မ့ၢ်ဝဲစီၤအ့ၢ်,

²⁹စီၤအ့ၢ်အပၢ်မ့ၢ်ဝဲစီၤယိၤၡူ, စီၤယိၤၡူအပၢ်မ့ၢ်ဝဲစီၤအလံၤဧ့စ့ၢ်, စီၤအလံၤဧ့စ့ၢ်အပၢ်မ့ၢ်ဝဲစီၤယိၤရံၣ်, စီၤယိၤရံၣ်အပၢ်မ့ၢ်ဝဲစီၤမးသး, စီၤမးသးအပၢ်မ့ၢ်ဝဲစီၤလ့ၤဝံ,

³⁰စီၤလ့ၤဝံအပၢ်မ့ၢ်ဝဲစီၤစူၤမ့းအိၣ်, စီၤစူၤမ့းအိၣ်အပၢ်မ့ၢ်ဝဲစီၤယူဒၤ, စီၤယူဒၤအပၢ်မ့ၢ်ဝဲစီၤယိၤသး, စီၤယိၤသးအပၢ်မ့ၢ်ဝဲစီၤယိၤနာ်, စီၤယိၤနာ်အပၢ်မ့ၢ်ဝဲစီၤအ့းလယါကံၣ်, စီၤအ့းလယါကံၣ်အပၢ်မ့ၢ်ဝဲစီၤမ့းလ့း,

³¹စီၤမ့းလ့းအပၢ်မ့ၢ်ဝဲစီၤမအံနၣ်, စီၤမအံနၣ်အပၢ်မ့ၢ်ဝဲစီၤမးတၤသါ, စီၤမးတၤသါအပၢ်မ့ၢ်ဝဲစီၤနၤသၣ်, စီၤနၤသၣ်အပၢ်မ့ၢ်ဝဲစီၤဒၤဝံး,

³²စီၤဒၤဝံးအပၢ်မ့ၢ်ဝဲစီၤယံးၡဲ, စီၤယံးၡဲအပၢ်မ့ၢ်ဝဲစီၤဧိၤဘ့း, စီၤဧိၤဘ့းအပၢ်မ့ၢ်ဝဲစီၤဘိၤဧး, စီၤဘိၤဧးအပၢ်မ့ၢ်ဝဲစီၤစၤလမိၣ်, စီၤစၤလမိၣ်အပၢ်မ့ၢ်ဝဲစီၤနးၡိၣ်,

³³စီၤနးၡိၣ်အပၢ်မ့ၢ်ဝဲစီၤဧးမံၤနဒး, စီၤဧးမံၤနဒးအပၢ်မ့ၢ်ဝဲစီၤရၣ်, စီၤရၣ်အပၢ်မ့ၢ်ဝဲစီၤဃ့ၤစရိၣ်, စီၤဃ့ၤစရိၣ်အပၢ်မ့ၢ်ဝဲစီၤပ့းရ့း, စီၤပ့းရ့းအပၢ်မ့ၢ်ဝဲစီၤယူဒၤ,

³⁴စီၤယူဒၤအပၢ်မ့ၢ်ဝဲစီၤယၤကိာ်, စီၤယၤကိာ်အပၢ်မ့ၢ်ဝဲစီၤအံၤစဲး, စီၤအံၤစဲးအပၢ်မ့ၢ်ဝဲစီၤအၤဘြၤဟၣ်, စီၤအၤဘြၤဟၣ်အပၢ်မ့ၢ်ဝဲစီၤတ့ရၤ, စီၤတ့ရၤအပၢ်မ့ၢ်ဝဲစီၤနၤဃိၢ်,

³⁵စီၤနၤဃိၢ်အပၢ်မ့ၢ်ဝဲစီၤစၤရူာ်, စီၤစၤရူာ်အပၢ်မ့ၢ်ဝဲစီၤရူၤ, စီၤရူၤအပၢ်မ့ၢ်ဝဲစီၤပ့ၤလ့း, စီၤပ့ၤလ့းအပၢ်မ့ၢ်ဝဲစီၤဧၤဘ့ၢ်, စီၤဧၤဘ့ၢ်အပၢ်မ့ၢ်ဝဲစီၤစ့ၤလါ,

³⁶စီၤစ့ၤလါအပၢ်မ့ၢ်ဝဲစီၤက့ၤနၣ်, စီၤက့ၤနၣ်အပၢ်မ့ၢ်ဝဲစီၤအၢ်ဖးၡး, စီၤအၢ်ဖးၡးအပၢ်မ့ၢ်ဝဲစီၤၡ့ၣ်, စီၤၡ့ၣ်အပၢ်မ့ၢ်ဝဲစီၤနိအၤ, စီၤနိအၤအပၢ်မ့ၢ်ဝဲစီၤလ့ၤမ့း,

³⁷စီၤလ့ၤမ့းအပၢ်မ့ၢ်ဝဲစီၤမသူၤၡလၤ, စီၤမသူၤၡလၤအပၢ်မ့ၢ်ဝဲစီၤဃနိာ်, စီၤဃနိာ်အပၢ်မ့ၢ်ဝဲစီၤယၤရ့း, စီၤယၤရ့းအပၢ်မ့ၢ်ဝဲစီၤမဟၤလ့လး, စီၤမဟၤလ့လးအပၢ်မ့ၢ်ဝဲစီၤက့ၤနၣ်,

³⁸စီၤက့ၤနၣ်အပၢ်မ့ၢ်ဝဲစီၤအနိၣ်, စီၤအနိၣ်အပၢ်မ့ၢ်ဝဲစီၤၡ့သး, စီၤၡ့သးအပၢ်မ့ၢ်ဝဲစီၤအၤဒၣ်လၢအမ့ၢ်ဝဲကစၢ်ယွၤအဖိခွါန့ၣ်လီၤ.