Read S'gaw Karen လံာ်လူၤကၣ် 4 Bible Online

လံာ်လူၤကၣ် 4 - S'gaw Karen bible

လံာ်လူၤကၣ် 4

¹ယ့ၣ်ၡူးလၢပှဲၤဝဲဒီးသးစီဆှံဖဲအဝဲဒၣ်ဟဲက့ၤလၢထံကျိယၢ်ဒ့ၣ်, ဒီးဘၣ်တၢ်ဆှၢအီၤလၢယွၤအသးန့ၣ်ဆူပှၢ်မုၢ်ကနၢ,

²ဖဲအဝဲဒၣ်ဘၣ်တၢ်လ့ပစီအီၤလၢမုၣ်ကီၤလံၢ်လၢအသီလွံၢ်ဆံ အတီၢ်ပူၤန့ၣ်လီၤ. ဖဲအဆၢကတီၢ်ဝဲန့ၣ်ဒီကတီၢ်ညါန့ၣ်, အဝဲတအီၣ်တၢ်နီတမံၤဘၣ်. သတးဒီးလၢခံကတၢၢ်န့ၣ်တၢ်သၣ်ဝံၤအသးလီၤ.

³မုၣ်ကီၤလံၢ်စံးဘၣ်အီၤ, “နမ့မ့ၢ်ကစၢ်ယွၤအဖိခွါန့ၣ်, ဟ့ၣ်လီၤနကလုၢ်ဒ်သိးလၢၢ်တဖျၢၣ်အံၤကကဲထီၣ်ကိၣ်တက့ၢ်.”

⁴ယ့ၣ်ၡူးစံးဆၢတၢ်ဒီးစံးဝဲ, “တၢ်ကွဲးအသးစံးဝဲ, ‘ပှၤကညီမူဝဲထဲလၢကိၣ်တမံၤဧိၤတသ့ဘၣ်.’ ”

⁵တုၤနုၤတစုမုၣ်ကီၤလံၢ်ဆှၢထီၣ်အီၤဆူတၢ်လီၢ်ထီၣ်ထီတတီၤ, ဒီးလၢတဖျးမဲာ်အတီၢ်ပူၤဒုးနဲၣ်အီၤဟီၣ်ခိၣ်အဘီအမုၢ်ခဲလၢာ်ခဲဆ့လီၤ.

⁶မုၣ်ကီၤလံၢ်စံးဘၣ်အီၤ, “ယကဟ့ၣ်နၤတၢ်စိတၢ်ကမီၤအဝဲ အံၤခဲလၢာ်, ဒီးတၢ်ထူးတၢ်တီၤအဝဲအံၤခဲလၢာ်လီၤ. အဝဲအံၤဘၣ်တၢ်ဟ့ၣ်လီၤတ့ၢ်အီၤလၢယစုပူၤခဲလၢာ်, ဒီးယဟ့ၣ်လီၤအီၤဆူပှၤတဂၤဂ့ၤတဂၤဂ့ၤလၢယဃုထၢယဲန့ၣ်သ့ဝဲလီၤ.

⁷နမ့ၢ်ဘူၣ်ထီၣ်ဘါထီၣ်ယၤဒီး, တၢ်အံၤခဲလၢာ်ကမ့ၢ်နတၢ်လီၤ.”

⁸ယ့ၣ်ၡူးစံးဆၢဝဲ, “တၢ်ကွဲးအသးစံးဒ်အံၤ, ‘ဘူၣ်ထီၣ်ဘါထီၣ်ထဲယွၤနကစၢ်ယွၤဒီး မၤထဲအဝဲဒၣ်တဂၤဧိၤအတၢ်မၤတက့ၢ်.’ ”

⁹အန့ၣ်ဝံၤအလီၢ်ခံ, မုၣ်ကီၤလံၢ်ဆှၢအီၤဆူယရူၤၡလ့ၣ်, ဒီးပာ်ထီၣ်အီၤလၢတၢ်လုၢ်ဟံၣ်အတၢ်လီၢ် အထီကတၢၢ်တတီၤဒီးစံးဘၣ်အီၤ, “နမ့မ့ၢ်ကစၢ်ယွၤအဖိခွါန့ၣ်, တ့ၢ်လီၤနသးလၢတၢ်လီၢ်တတီၤအံၤတက့ၢ်.

¹⁰အဂ့ၢ်ဒ်အံၤ, တၢ်ကွဲးအသးစံးဝဲ, ‘ကစၢ်ယွၤကခါလီၤအကလုၢ်ဆူအကလူးတဖၣ်အအိၣ် ဒ်သိးအကအံးထွဲကွၢ်ထွဲနၤဂ့ၤဂ့ၤလီၤ.’

¹¹စံးစ့ၢ်ကီးဝဲဒ်အံၤ, ‘အဝဲသ့ၣ်ကစိာ်ထီၣ်နၤလၢအစုဒ်သိး နခီၣ်တဖၣ်ဒၣ်လဲာ်အသုတဘၣ်ဒိလၢလၢၢ်တဂ့ၤအဂီၢ်လီၤ.’ ”

¹²ယ့ၣ်ၡူးစံးဆၢအီၤ, “တၢ်ကွဲးအသးစံးဝဲ, ‘တဘၣ်လ့ပစီယွၤနကစၢ်ယွၤန့ၣ်တဂ့ၤ.’ ”

¹³ဖဲမုၣ်ကီၤလံၢ်လ့ပစီယ့ၣ်ၡူးလၢကျဲကိးဘိဒဲးဝံၤဝဲန့ၣ်, အဝဲဒၣ်ဟးဖးဒီးအီၤတစိၢ်တလီၢ်လီၤ.

¹⁴တၢ်န့ၣ်ဝံၤအလီၢ်ခံ, ယ့ၣ်ၡူးဟဲက့ၤကဒါက့ၤဆူကီၢ်ကၤလံၤလါ, ဒီးသးစီဆှံအစိကမီၤအိၣ်ဒီးအီၤလီၤ. တၢ်ကစီၣ်ဘၣ်ဃးအဝဲဒၣ်အဂ့ၢ်အကျိၤဟူထီၣ်သါလီၤဝဲလၢ တၢ်လီၢ်အကဝီၤဖဲန့ၣ်ကိးတီၤဒဲးလီၤ.

¹⁵အဝဲဒၣ်သိၣ်လီၤသီလီၤတၢ်လၢအဝဲသ့ၣ်အဘူၣ်ဘျီၣ်လၢ အမ့ၢ်တၢ်ဘါလီၢ်အပူၤ, ဒီးဘၣ်တၢ်စံးထီၣ်ပတြၢၤ အီၤလၢပှၤကိးဒံကိးဂၤဒဲးလီၤ.

¹⁶အန့ၣ်ဝံၤအလီၢ်ခံ, ယ့ၣ်ၡူးလဲၤဆူနစၤရ့း, တၢ်လီၢ်ဖဲအဝဲဒၣ်ဘၣ်တၢ်ကွၢ်ဒုးဒိၣ်ထီၣ်အီၤ, ဒီးဖဲမုၢ်အိၣ်ဘှံးနံၤန့ၣ် အဝဲဒၣ်လဲၤဝဲဒ်အညီနုၢ်အသိးဆူဘူၣ်ဘျီၣ်လၢအမ့ၢ်တၢ်ဘါလီၢ်န့ၣ်လီၤ. အဝဲဒၣ်ဂဲၤဆၢထၢၣ်ဒ်သိးအကဖးတၢ်ကွဲးအသးစီဆှံတဖၣ်,

¹⁷ဒီးတၢ်ဟ့ၣ်လီၤအီၤလၢလံာ်ဝံယၡါယၤန့ၣ်လီၤ. အဝဲဒၣ်သလၣ်ထီၣ်လံာ်ထူတထူန့ၣ်, ဒီးထံၣ်န့ၢ်တၢ်ကွဲးအသးတတီၤလၢအစံးဝဲဒၣ်,

¹⁸“ကစၢ်အသးအိၣ်ဝဲလၢယလိၤလီၤ. အဂ့ၢ်ဒ်အံၤ, အဝဲဒၣ်ဃုထၢလံယၤ ဒ်သိး ယကစံၣ်တဲၤတဲလီၤတၢ်သးခုအကစီၣ်လၢ ပှၤဖှီၣ်ဖိယာ်ဖိန့ၣ်လီၤ. အဝဲဒၣ်ဆှၢလီၤယၤဒ်သိးယကဒုးဟူထီၣ်သါလီၤ တၢ်ထူၣ်ဖျဲးလၢပှၤဘၣ်တၢ်ဖီၣ်န့ၢ်အီၤတဖၣ်အဂီၢ်, ဒီးတၢ်ဒုးထံၣ်ထီၣ်က့ၤတၢ်လၢ ပှၤမဲာ်တထံၣ်တၢ်တဖၣ်အဂီၢ်, ဒ်သိးယကဒုးထူၣ်ဖျဲးထီၣ်ကွံာ်ပှၤလၢ အဘၣ်တၢ်မၤနၢၤမၤဃၣ်အီၤတဖၣ်,

¹⁹ဒီးဒ်သိးယကဘိးဘၣ်သ့ၣ်ညါဘၣ်ဃးနံၣ်တနံၣ် ဖဲကစၢ်ကအုၣ်က့ၤခီၣ်က့ၤအပှၤဂီၢ်မုၢ်န့ၣ်လီၤ.”

²⁰ယ့ၣ်ၡူးထူထီၣ်က့ၤလံာ်ထူတထူန့ၣ်, ဟ့ၣ်က့ၤဝဲဆူပှၤတဂၤလၢအကွၢ်ထွဲဘူၣ်ဘျီၣ်လၢအမ့ၢ် တၢ်ဘါလီၢ်အစုပူၤဒီးဆ့ၣ်နီၤဝဲလီၤ. ပှၤအိၣ်လၢဘူၣ်ဘျီၣ်လၢအမ့ၢ်တၢ်ဘါလီၢ်အပူၤတဖၣ် ကွၢ်စူၣ်အီၤကိးဂၤဒဲးလီၤ.

²¹အဝဲဒၣ်စးထီၣ်ကတိၤတၢ်ဒီးအဝဲသ့ၣ်ဒီးစံးဝဲ, “တၢ်ကွဲးအသးတတီၤအံၤလၢထီၣ်ပှဲၤထီၣ်လံဝဲတနံၤအံၤ, ဖဲသုနၢ်ဟူတၢ်ဖးဖျါထီၣ်အီၤအဆၢကတီၢ်န့ၣ်လီၤ.”

²²အဝဲသ့ၣ်ကိးဒံကိးဂၤဒဲးဘၣ်သူၣ်ဘၣ်သးလၢယ့ၣ်ၡူး, ဒီးကမၢကမၣ်ဝဲလၢတၢ်ကတိၤအသ့အဘၣ်လၢ အဝဲဒၣ်စံးကတိၤတ့ၢ်ဝဲတဖၣ်အဃိန့ၣ်လီၤ. အဝဲသ့ၣ်စံးဝဲ, “အဝဲဒၣ်တမ့ၢ်စီၤယိၤသးအဖိခွါဘၣ်ဧါ.”

²³အဝဲဒၣ်စံးဘၣ်အဝဲသ့ၣ်, “ယနာ်သပှၢ်ကတၢၢ်လၢ သုကတဲယၤလၢတၢ်ကတိၤဒိတထံၣ်အံၤလီၤ. ‘ကသံၣ်သရၣ်ဧၢ, မၤဘျါလီၤက့ၤနသးဒၣ်နဲတက့ၢ်.’ သုကစံးဘၣ်စ့ၢ်ကီးယၤ, ‘တၢ်တမံၤဃီလၢပဘၣ်တၢ်စံးဘၣ်တဲဘၣ်ပှၤလၢအမၤ အသးဖဲကပ့းရနီၣ်တဖၣ်န့ၣ်, မၤအီၤဖဲအံၤလၢနလီၢ်အိၣ်လီၢ်ဆိး နဝ့ၢ်ဒၣ်နဲအပူၤတက့ၢ်’ န့ၣ်လီၤ.”

²⁴ယ့ၣ်ၡူးစံးကဒီးဝဲ, “ယစံးဘၣ်သုဒ်အံၤလီၤ. ဝံတဂၤန့ၣ်တဘၣ်တၢ်တူၢ်လိာ်အီၤဖဲအလီၢ်အိၣ်လီၢ်ဆိး အဝ့ၢ်ဒၣ်ဝဲအပူၤနီတစုဘၣ်.

²⁵ဒိကနၣ်ယတၢ်ကတိၤတက့ၢ်. လၢဝံအ့ၤလံယၤအစိၤအဆၢ ကတီၢ်, ဖဲမူခိၣ်တစူၤလၢသၢနံၣ်ဃုလါအတီၢ်ပူၤ, ဒီးတၢ်သၣ်ဝံၤလီၤဒိနးမးအိၣ်ထီၣ်ဝဲဒၣ်သကုၤကီၢ်အံၣ်စရ့လး အပူၤန့ၣ်, မုၣ်ကမဲအိၣ်ဝဲအါဒံအါဂၤလၢထံကီၢ်အပူၤလီၤ.

²⁶ဘၣ်ဆၣ်ဒီးဝံအ့ၤလံယၤတဘၣ်တၢ်ဆှၢလီၤအီၤဆူ ပှၤလၢကီၢ်အံၣ်စရ့လးအပူၤနီတဂၤအအိၣ်ဘၣ်. မ့မ့ၢ်အဝဲဘၣ်တၢ်ဆှၢလီၤဒၣ်အီၤဆူမုၣ်ကမဲအိၣ်ဖဲ ဝ့ၢ်စၤရဖၤသးဘၣ်ဃးဒီးကီၢ်စံဒိၣ်တဂၤအအိၣ်လီၤ.

²⁷ဒီးဖဲဝံအလံၤၡါအဆၢကတီၢ်န့ၣ်, ပှၤလၢအတူၢ်ဘၣ်တၢ်ဆါလိၤ တဂ့ၤအိၣ်ဝဲအါဒံအါဂၤလၢကီၢ်အံၣ်စရ့လးအပူၤ, ဘၣ်ဆၣ်အဝဲသ့ၣ်တဘၣ်တၢ်မၤဘျါက့ၤအီၤနီတဂၤဘၣ်. တၢ်မၤဘျါက့ၤဒၣ်ထဲပှၤစူၤရံဖိစီၤနဧၤမၣ်တဂၤဧိၤလီၤ.”

²⁸ဖဲပှၤအိၣ်လၢဘူၣ်ဘျီၣ်လၢအမ့ၢ်တၢ်ဘါလီၢ်အပူၤတဖၣ် နၢ်ဟူဘၣ်တၢ်ကတိၤအဝဲအံၤန့ၣ်, အဝဲသ့ၣ်လၢပှဲၤဒီးတၢ်သူၣ်ဒိၣ်သးဖျိးလီၤ.

²⁹အဝဲသ့ၣ်ဂဲၤဆၢထၢၣ်, တွံၢ်ထီၣ်ကွံာ်ယ့ၣ်ၡူးဆူဝ့ၢ်အချၢ, ဒီးဆှၢအီၤဆူတၢ်လူၢ်ဖဲအဝဲသ့ၣ်အဝ့ၢ်အိၣ်သူၣ်ထီၣ်အသးလၢ အလိၤန့ၣ်အဒီခိၣ်လီၤ. အဝဲသ့ၣ်ပာ်လီၤအသးလၢအကတ့ၢ်လီၤဆှိခိၣ်အီၤလၢလ့အလိၤ,

³⁰ဘၣ်ဆၣ်ဒီးအဝဲဒၣ်ဟးထီၣ်ကွံာ်လၢပှၤဂီၢ်မုၢ်အကဆူးဒီး လဲၤလၢအကျဲဒၣ်ဝဲလီၤ.

³¹တၢ်န့ၣ်ဝံၤအလီၢ်ခံ, ယ့ၣ်ၡူးလဲၤဝဲဆူကပ့းရနီၣ်, ဝ့ၢ်တဖျၢၣ်လၢအအိၣ်ဝဲဖဲကီၢ်ကၤလံၤလါ, ဒီးဖဲန့ၣ်အဝဲဒၣ်သိၣ်လီၤသီလီၤပှၤဂီၢ်မုၢ်တဖၣ်ဖဲ မုၢ်အိၣ်ဘှံးအနံၤလီၤ.

³²အဝဲသ့ၣ်ကမၢကမၣ်ဝဲကိးဒံကိးဂၤဒဲးလၢအတၢ်သိၣ်လီၤသီလီၤ အဃိ, အဂ့ၢ်ဒ်အံၤ, အဝဲဒၣ်စံးကတိၤတၢ်အိၣ်ဒီးတၢ်စိတၢ်ကမီၤလီၤ.

³³လၢဘူၣ်ဘျီၣ်လၢအမ့ၢ်တၢ်ဘါလီၢ်အပူၤန့ၣ်, ပှၤအိၣ်ဝဲဒၣ်တဂၤလၢ အအိၣ်ဒီးတၢ်နါအအၢအသီတဒုအသးလၢအပူၤန့ၣ်လီၤ. အဝဲဒၣ်ကိးပသူထီၣ်လၢအကလုၢ်ဖးဒိၣ်ဒီးစံး,

³⁴“အၣ်လါ, နအဲၣ်ဒိးမၤပှၤဒ်လဲၣ်. ပှၤနစၤရ့းဖိယ့ၣ်ၡူးဧၢ. နဟဲဖဲအံၤဒ်သိးနကမၤဟးဂီၤကွံာ်ပှၤဧါ. နမ့ၢ်မတၤလဲၣ်န့ၣ်ယသ့ၣ်ညါယဲလီၤ. နမ့ၢ်ယွၤအပှၤစိာ်တၢ်ကစီၣ်အစီအဆှံတဂၤလီၤ.”

³⁵ယ့ၣ်ၡူးခါလီၤအကလုၢ်ဒီးစံးဘၣ်တၢ်နါန့ၣ်, “အိၣ်ဘှီၣ်ကလာ်ဒီးဟးထီၣ်ကွံာ်လၢပှၤတဂၤန့ၣ်အပူၤတက့ၢ်.” တၢ်နါကွံာ်လီၤပှၤတဂၤန့ၣ်လၢအဝဲသ့ၣ်တဖၣ်အမဲာ်ညါ ဒီးဟးထီၣ်ကွံာ်လၢအဝဲဒၣ်အပူၤ, တအိၣ်ဒီးတၢ်မၤဘၣ်ဒိဘၣ်ထံးအီၤနီတမံၤဘၣ်.

³⁶ပှၤဂီၢ်မုၢ်တဖၣ်ကမၢကမၣ်ဝဲကိးဒံကိးဂၤဒဲးဒီးစံးလိာ်အသးတဂၤဒီးတဂၤ, “တၢ်စံးတၢ်ကတိၤတဖၣ်အံၤမ့ၢ်တၢ်ကတိၤဒ်လဲၣ်တကလုာ်လဲၣ်. ပှၤတဂၤအံၤခါလီၤအကလုၢ်အိၣ်ဒီးအသူးအသ့ၣ်ဒီးအစိအကမီၤလၢ တၢ်နါအအၢအသီတဖၣ်အဖီခိၣ်, ဒီးအဝဲသ့ၣ်ဟးထီၣ်ကွံာ်ဝဲလီၤမးလဲၣ်.”

³⁷ဒီးယ့ၣ်ၡူးအဂ့ၢ်အကျိၤတမံၤအံၤဟူထီၣ်သါလီၤဝဲသကုၤကီၢ်အတၢ်ပၢ တတီၤန့ၣ်အပူၤလီၤ.

³⁸ယ့ၣ်ၡူးဟးထီၣ်ကွံာ်ဖဲဘူၣ်ဘျီၣ်လၢအမ့ၢ်တၢ်ဘါလီၢ်ဒီးလဲၤဝဲဒၣ်ဆူ စီၤၡံမိၣ်အဟံၣ်လီၤ. စီၤၡံမိၣ်အမံၤပှၢ်ပိာ်မုၣ်ဆိးက့ဝဲဒီးအလိၤကိၢ်ဒိၣ်နီၢ် မး, ဒီးအဝဲသ့ၣ်ကတိၤတၢ်ဒီးယ့ၣ်ၡူးလၢအဝဲဒၣ်အဂ့ၢ်လီၤ.

³⁹အဝဲဒၣ်လဲၤဝဲဒီးဆၢထၢၣ်ဝဲဖဲပိာ်မုၣ်န့ၣ်အလီၢ်မံကပၤ ဒီးခါလီၤအကလုၢ်ဒ်သိးတၢ်ကိၢ်ကလီၤအဂီၢ်, ဒီးတၢ်ကိၢ်န့ၣ်လီၤဝဲတကီၢ်ခါလီၤ. ဒီးအဝဲဒၣ်ဂဲၤဆၢထၢၣ်တဘျီဃီ ဒီးဒုးအီၣ်ဒုးအီအဝဲသ့ၣ်လီၤ.

⁴⁰ဖဲမုၢ်လီၤနုာ်ဝံၤအလီၢ်ခံန့ၣ်, ကယဲၢ်ပှၤအိၣ်ဒီးတံၤသကိးလၢအအိၣ်ဒီး တၢ်ဆူးတၢ်ဆါအကလုာ်ကလုာ်တဖၣ်ဟဲဆှၢပှၤဆါတဖၣ်န့ၣ်ဆူ ယ့ၣ်ၡူးအအိၣ်, ဒီးအဝဲဒၣ်ပာ်ထီၣ်အစုခံခီလၢ အဝဲသ့ၣ်တဂၤဘၣ်တဂၤအလိၤ, ဒီးမၤဘျါအဝဲသ့ၣ်ကိးဂၤဒဲးလီၤ.

⁴¹တၢ်နါဟးထီၣ်ကွံာ်စ့ၢ်ကီးလၢပှၤအါဒံအါဂၤအလိၤ, အိၣ်ဒီးတၢ်ကိးပသူထီၣ်, “နမ့ၢ်ကစၢ်ယွၤအဖိခွါလီၤ.” ယ့ၣ်ၡူးဒူတၢ်နါတဖၣ်အလိၤဒီးတပျဲအဝဲသ့ၣ်ကတိၤတၢ်ဘၣ်. အဂ့ၢ်မ့ၢ်လၢအဝဲသ့ၣ်သ့ၣ်ညါလၢအဝဲဒၣ်မ့ၢ်ခရံာ်အဃိလီၤ.

⁴²ဖဲမုၢ်ဆ့ၣ်ထီၣ်န့ၣ်, ယ့ၣ်ၡူးဟးထီၣ်လၢဝ့ၢ်ပူၤဒီးလဲၤဝဲဆူတၢ်လီၢ်လၢ ပှၤတအိၣ်ဝဲနီတဂၤဘၣ်လီၤ. ပှၤဂီၢ်မုၢ်တဖၣ်လူၤဃုအီၤ, ဒီးဖဲအဝဲသ့ၣ်ထံၣ်အီၤန့ၣ် ဂုာ်ကျဲးစၢးတြီအီၤဒ်သိးအသု တဟးသဒၣ်အဝဲသ့ၣ်တဂ့ၤအဂီၢ်လီၤ.

⁴³ဘၣ်ဆၣ်ဒီး, အဝဲဒၣ်စံးဘၣ်အဝဲသ့ၣ်, “ယကဘၣ်စံၣ်တဲၤတဲလီၤတၢ်သးခုအကစီၣ်ဘၣ်ဃး ကစၢ်ယွၤအဘီအမုၢ်လၢဝ့ၢ်အဂၤတဖၣ်အပူၤစ့ၢ်ကီးလီၤ. အဂ့ၢ်ဒ်အံၤ, ကစၢ်ယွၤဆှၢလီၤယၤလၢတၢ်တမံၤန့ၣ်အဂီၢ်လီၤ.”

⁴⁴လၢတၢ်န့ၣ်အဃိ, အဝဲဒၣ်စံၣ်တဲၤတဲလီၤတၢ်လၢဘူၣ်ဘျီၣ်လၢ အမ့ၢ်တၢ်ဘါလီၢ်တဖၣ်အပူၤသကုၤကီၢ်န့ၣ်လီၤ.