Read S'gaw Karen လံာ်လူၤကၣ် 5 Bible Online

လံာ်လူၤကၣ် 5 - S'gaw Karen bible

လံာ်လူၤကၣ် 5

¹ဘၣ်တနံၤဖဲယ့ၣ်ၡူးအိၣ်ဆၢထၢၣ်လၢနိၣ်ကံးန့ရ့ၤသးအကၢၢ်ခိၣ်န့ၣ်, ပှၤဂီၢ်မုၢ်တဖၣ်သနံးလိာ်အသးဒ်သိးအကနၢ်ဟူဘၣ်ကစၢ်ယွၤ အကလုၢ်ကထါအဂီၢ်လီၤ.

²အဝဲဒၣ်ထံၣ်ချံခံဘ့ၣ်ဘၣ်တၢ်တွံၢ်ထီၣ်ပာ်အီၤလၢထံကၢၢ်ခိၣ်လီၤ. ပှၤမၤညၣ်ဖိတဖၣ်ဟးထီၣ်တ့ၢ်လၢချံတဖၣ်န့ၣ်အပူၤဒီးသ့ဝဲအစၤ တဖၣ်လီၤ.

³ယ့ၣ်ၡူးလဲၤနုာ်လီၤဆူချံတဘ့ၣ်အပူၤလၢအမ့ၢ်စီၤပ့းတရူးအတၢ်, ဒီးမၢအီၤလၢအကသုးယံၤထီၣ်အချံလၢထံကၢၢ်ခိၣ်တစဲးဖိလီၤ. အန့ၣ်ဝံၤဒီးယ့ၣ်ၡူးဆ့ၣ်နီၤလၢချံပူၤဒီးသိၣ်လီၤသီလီၤပှၤဂီၢ်မုၢ် တဖၣ်လီၤ.

⁴ဖဲအဝဲဒၣ်စံးကတိၤတၢ်ဝံၤန့ၣ်, စံးဘၣ်စီၤၡံမိၣ်, “သုးယံၤထီၣ်နချံဆူထံအယိာ်, ဒီးနၤဒီးပှၤမၤသကိးတၢ်ဒီးနၤတဖၣ် ပာ်လီၤသုစၤတဖၣ်လၢသုကဖီၣ်န့ၢ်ညၣ်အဂီၢ်တက့ၢ်.”

⁵စီၤၡံမိၣ်စံးဆၢအီၤ, “ကစၢ်ဧၢ, ပမၤတ့ၢ်လံဒီနၤညါဒီးပတဖီၣ်န့ၢ်တၢ်နီတမံၤဘၣ်. ဘၣ်ဆၣ်, နမ့ၢ်စံးဒ်န့ၣ်ဒီးယကပာ်လီၤစၤတဖၣ်လီၤ.”

⁶အဝဲသ့ၣ်ပာ်လီၤစၤတဖၣ်ဒီးဖီၣ်န့ၢ်ညၣ်အါအါဂီၢ်ဂီၢ်တုၤဒၣ်လဲာ် စၤတဖၣ်ဘူးတ့ၢ်မးလၢကယာ်ကွံာ်လီၤ.

⁷လၢတၢ်န့ၣ်အဃိ, အဝဲသ့ၣ်ဝံၢ်ဝၢ်ဃီၤအစုဆူအတံၤသကိးတဖၣ် လၢချံအဂၤတဘ့ၣ်အပူၤဒ်သိးအကဟဲဒီးမၤစၢၤအဝဲသ့ၣ်လီၤ. အဝဲသ့ၣ်ဟဲဝဲဒီးမၤပှဲၤချံခံဘ့ၣ်လၢာ်လၢညၣ်, ပှဲၤဝဲတုၤဒၣ်လဲာ်ချံတဖၣ်ဘူးတ့ၢ်မးလၢကလီၤဘျၢဝဲလီၤ.

⁸ဖဲစီၤၡံမိၣ်ပ့းတရူးထံၣ်တၢ်လၢအမၤအသးတမံၤအံၤန့ၣ်, အဝဲဒၣ်ချံးခီၣ်တီၤလီၤလၢယ့ၣ်ၡူးအမဲာ်ညါဒီးစံးဝဲ, “ဟးထီၣ်ကွံာ်လၢယအိၣ်တက့ၢ်, ကစၢ်ဧၢ, ယမ့ၢ်ပှၤတၢ်ဒဲးဘးဖိတဂၤလီၤ.”

⁹အဝဲဒၣ်ဒီးပှၤလၢအအိၣ်ဒီးအီၤတဖၣ်ကမၢကမၣ်ဝဲကိးဂၤဒဲးလၢ အဖီၣ်န့ၢ်တ့ၢ်ညၣ်အါအါဂီၢ်ဂီၢ်အဃိလီၤ.

¹⁰ပှၤမၤသကိးတၢ်ဒီးစီၤၡံမိၣ်လၢအမ့ၢ်ဝဲစီၤစ့းဘ့းဒဲအဖိခွါ, စီၤယၤကိာ်ဒီးစီၤယိၤဟၣ်တဖၣ်ကမၢကမၣ်ဝဲစ့ၢ်ကီးလီၤ. ယ့ၣ်ၡူးစံးဘၣ်စီၤၡံမိၣ်, “တဘၣ်ပျံၤတၢ်တဂ့ၤ. စးထီၣ်မုၢ်တနံၤအံၤဒီးဆူညါန့ၣ်, နကဖီၣ်န့ၢ်ပှၤကညီတဖၣ်လီၤ.”

¹¹အဝဲသ့ၣ်တွံၢ်ထီၣ်အချံတဖၣ်လၢထံကၢၢ်နံၤ, ပာ်တ့ၢ်ကွံာ်တၢ်ခဲလၢာ်ခဲဆ့ဒီးပိာ်ထီၣ်ယ့ၣ်ၡူးအခံန့ၣ်လီၤ.

¹²ဘၣ်တဘျီယ့ၣ်ၡူးအိၣ်ဝဲဖဲဝ့ၢ်တဖျၢၣ်လၢပှၤတူၢ်ဘၣ်တၢ်ဆါအၢလၢ အလီၤပျံၤမးတကလုာ်အိၣ်ဝဲဒၣ်တဂၤန့ၣ်လီၤ. ဖဲအဝဲထံၣ်ယ့ၣ်ၡူးန့ၣ်ထိၣ်လီၤပှီၤအသးလၢယ့ၣ်ၡူးအခီၣ်ထံး ဒီးဃ့ကညးအီၤဒီးစံးဝဲ, “ကစၢ်ဧၢ, နသးမ့ၢ်အိၣ်ဒီးနမၤကဆှီထီၣ်က့ၤယၤသ့ဝဲလီၤ.”

¹³ယ့ၣ်ၡူးယူာ်ဃီၤအစုဒီးထိးဘၣ်အီၤဒီးစံးဝဲ, “ယသးအိၣ်ယဲလီၤ. မ်နကဆှီထီၣ်က့ၤတက့ၢ်.” ဒီးတၢ်ဆါအၢန့ၣ်ဘျါက့ၤဝဲတဘျီဃီလီၤ.

¹⁴ယ့ၣ်ၡူးခါလီၤအကလုၢ်ဒီးစံးဝဲ, “တဘၣ်စံးဘၣ်တဲဘၣ်ပှၤနီတဂၤတဂ့ၤ. မ့မ့ၢ်လဲၤတဘျီဃီဆူပှၤလုၢ်တၢ်အခိၣ်အအိၣ်ဒီးဒုးနဲၣ်နသးလၢအီၤတက့ၢ်. အန့ၣ်ဝံၤအလီၢ်ခံ, ဒ်သိးတၢ်အုၣ်အသးကအိၣ်လၢပှၤကိးဂၤဒဲးအမဲာ်ညါ လၢနဘၣ်တၢ်မၤဘျါနၤလံအဂီၢ်န့ၣ်, လုၢ်ထီၣ်ပာ်ထီၣ်တၢ်ဒ်စီၤမိၤၡ့မၤလိာ်တ့ၢ်ဝဲအသိးန့ၣ်တက့ၢ်.”

¹⁵ဘၣ်ဆၣ်ဒီးတၢ်ကစီၣ်ဘၣ်ဃးယ့ၣ်ၡူးအဂ့ၢ်ဟူထီၣ်သါလီၤဝဲအါန့ၢ်အလီၢ်, ဒီးပှၤဂီၢ်မုၢ်ဖးဒိၣ်ဟဲဒ်သိးအကနၢ်ဟူဘၣ်အတၢ်ကတိၤဒီးဒ်သိးအတၢ် ဆူးတၢ်ဆါတဖၣ်ကဘၣ်တၢ်မၤဘျါက့ၤအီၤအဂီၢ်လီၤ.

¹⁶ဘၣ်ဆၣ်, အဝဲလဲၤဆူပှၢ်မုၢ်ကနၢဒီးဖဲန့ၣ်, အဝဲဒၣ်ဃ့ဘါထုကဖၣ်တၢ်လီၤ.

¹⁷ဘၣ်တနံၤဖဲယ့ၣ်ၡူးသိၣ်လီၤသီလီၤတၢ်အဆၢကတီၢ်န့ၣ်, ပှၤဖၤရံၤၡဲတဖၣ်ဒီးပှၤသိၣ်လိတၢ်သိၣ်တၢ်သီတဖၣ်ဆ့ၣ်နီၤအိၣ်ဖဲ န့ၣ်လီၤ. အဝဲသ့ၣ်ဟဲလၢကယဲၢ်ဝ့ၢ်အိၣ်ဖဲကီၢ်ကၤလံၤလါ ဒီးကီၢ်ယူဒၤဒီးလၢဝ့ၢ်ယရူၤၡလ့ၣ်လီၤ. ကစၢ်အစိကမီၤအိၣ်ဝဲဒီး ယ့ၣ်ၡူးလၢအကမၤဘျါပှၤဆူးပှၤဆါတဖၣ်အဂီၢ်လီၤ.

¹⁸ပှၤတနီၤဟဲစိာ်ပှၤသံတခီပၤတဂၤလၢလီၢ်မံအလိၤ, ဒီးဂုာ်ကျဲးစၢးလဲၤစိာ်နုာ်အီၤဆူဟံၣ်ပူၤဒ်သိးအကပာ် မံလီၤအီၤလၢယ့ၣ်ၡူးအမဲာ်ညါန့ၣ်လီၤ.

¹⁹ဘၣ်ဆၣ်ဒီးမ့ၢ်လၢပှၤအိၣ်ဝဲဂီၢ်မုၢ်ဂီၢ်ပၤအဃိ, အဝဲသ့ၣ်တထံၣ်န့ၢ်ကျဲလၢအကစိာ်နုာ်အီၤအဂီၢ်ဘၣ်. လၢတၢ်န့ၣ်အဃိ, အဝဲသ့ၣ်လဲၤစိာ်ထီၣ်အီၤလၢဟံၣ်ခိၣ်, အိးဟိထီၣ်ဒၢးခီအဘ့ၣ်ဘၣ်တနီၤဒီးစဲၤလီၤအီၤလၢအလီၢ်မံလိၤဆူ ပှၤအိၣ်ပာ်ဖှိၣ်အသးတဖၣ်အခၢၣ်သးလၢယ့ၣ်ၡူးအမဲာ်ညါလီၤ.

²⁰ဖဲယ့ၣ်ၡူးထံၣ်ဘၣ်အဝဲသ့ၣ်အတၢ်နာ်အိၣ်ဆံးအါလဲၣ်န့ၣ်, အဝဲစံးဘၣ်ပှၤဆါတဂၤန့ၣ်, “နတၢ်ဒဲးဘးတဖၣ်ဘၣ်တၢ်ပျၢ်ကွံာ်အီၤလံ, ယတံၤသကိးဧၢ.”

²¹ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်ဒီးပှၤဖၤရံၤၡဲ တဖၣ်စံးလိာ်အသးတဂၤဒီးတဂၤဒီးစံးဝဲ, “ပှၤလၢအကတိၤကမၣ်ကစၢ်ယွၤလၢကျဲဒ်အံၤအသိးတဂၤ အံၤမ့ၢ်မတၤတဂၤလဲၣ်. ပှၤကညီပျၢ်တၢ်ဒဲးဘးတသ့နီတဂၤဘၣ်, သ့ထဲကစၢ်ယွၤတဂၤဧိၤလီၤ.”

²²ယ့ၣ်ၡူးသ့ၣ်ညါအဝဲသ့ၣ်အတၢ်ဆိကမိၣ်တဖၣ်ဒီးစံးဘၣ်အဝဲသ့ၣ်, “ဘၣ်မနုၤလၢသုဆိကမိၣ်တၢ်ဒ်န့ၣ်အသိးတဖၣ်လဲၣ်.

²³မ့ၢ်အညီဒိၣ်လၢပကစံး, ‘နတၢ်ဒဲးဘးတဖၣ်ဘၣ်တၢ်ပျၢ်ကွံာ်အီၤလံ.’ မ့တမ့ၢ်, ‘ဂဲၤဆၢထၢၣ်ဒီးဟးတက့ၢ်’ န့ၣ်ဧါ.

²⁴ဘၣ်ဆၣ်ဒီးယကဟ့ၣ်သုတၢ်အုၣ်အသးလၢပှၤကညီအဖိခွါအိၣ်ဒီး တၢ်စိတၢ်ကမီၤလၢဟီၣ်ခိၣ်ချၢလၢအကပျၢ်ကွံာ်တၢ်ဒဲးဘးတဖၣ် လီၤ.” သတးဒီးအဝဲဒၣ်စံးဘၣ်ပှၤသံတခီပၤတဂၤန့ၣ်, “ယစံးဘၣ်နၤ, ဂဲၤဆၢထၢၣ်, ဟံးထီၣ်နလီၢ်မံဒီးက့ၤဆူဟံၣ်တက့ၢ်.”

²⁵တဘျီဃီပှၤတဂၤန့ၣ်ဂဲၤဆၢထၢၣ်လၢအဝဲသ့ၣ်ကိးဂၤဒဲးအမဲာ်ညါ, ဟံးထီၣ်လီၢ်မံလၢအဝဲဒၣ်မံလီၤတ့ၢ်ဝဲလၢအလိၤ, ဒီးက့ၤဆူဟံၣ်အိၣ်ဒီးတၢ်စံးထီၣ်ပတြၢၤကစၢ်ယွၤလီၤ.

²⁶အဝဲသ့ၣ်ကိးဂၤဒဲးကမၢကမၣ်ဝဲဒိၣ်မးဒီးလၢတၢ်ပျံၤတၢ်ဖုးအဒိၣ် အအါအပူၤ, အဝဲသ့ၣ်စံးထီၣ်ပတြၢၤကစၢ်ယွၤဒီးစံးဝဲ, “မုၢ်တနံၤအံၤ, ပထံၣ်ဘၣ်တၢ်လၢအလီၤလိၢ်လီၤလးမးတဖၣ်လီၤ.”

²⁷တၢ်မၤအသးတမံၤအံၤဝံၤအလီၢ်ခံန့ၣ်, ယ့ၣ်ၡူးဟးထီၣ်ဒီးထံၣ်ဘၣ်ဝဲပှၤဃ့သွဲတဂၤလၢအမံၤမ့ၢ်ဝဲစီၤလ့ၤဝံ, ဆ့ၣ်နီၤဝဲဒၣ်ဖဲအဝဲၤလီၢ်န့ၣ်လီၤ. ယ့ၣ်ၡူးစံးဘၣ်အီၤ, “ဟဲဒီးကဲဘၣ်ယပျဲၢ်ယဘီၣ်တက့ၢ်.”

²⁸စီၤလ့ၤဝံဂဲၤဆၢထၢၣ်ဝဲ, ပာ်လီၤတဲာ်တ့ၢ်တၢ်ခဲလၢာ်ဒီးပိာ်ထီၣ်အခံလီၤ.

²⁹တုၤနုၤတစုစီၤလ့ၤဝံမၤတၢ်အီၣ်အမူးဖးဒိၣ်တမူးလၢအဟံၣ်ပူၤလၢယ့ၣ်ၡူး အဂီၢ်, ဒီးလၢပှၤဘၣ်တၢ်ကွဲအီၤသ့ၣ်တဖၣ်အကျါန့ၣ်အိၣ်ဃုာ်ဒီး ပှၤဃ့သွဲအါဒံအါဂၤဒီးပှၤအဂၤသ့ၣ်တဖၣ်လီၤ.

³⁰ပှၤဖၤရံၤၡဲတနီၤဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတနီၤ လၢအဘၣ်ထွဲဒီးပှၤဖၤရံၤၡဲအကရူၢ်န့ၣ်, ပာ်တၢ်ကမၣ်လၢယ့ၣ်ၡူးအပျဲၢ်အဘီၣ်တဖၣ်အလိၤလီၤ. အဝဲသ့ၣ်သံကွၢ်ဝဲ, “ဘၣ်မနုၤအဃိသုအီၣ်သကိးအီသကိးတၢ်လၢ ပှၤဃ့သွဲတဖၣ်ဒီးပှၤတၢ်ဒဲးဘးဖိတဖၣ်လဲၣ်.”

³¹ယ့ၣ်ၡူးစံးဆၢအဝဲသ့ၣ်, “ပှၤလၢအအိၣ်ဆူၣ်အိၣ်ချ့တဖၣ်န့ၣ်တလိၣ်ဘၣ်ကသံၣ်သရၣ်ဘၣ်. ပှၤလိၣ်ဘၣ်ကသံၣ်သရၣ်န့ၣ်မ့ၢ်ဒၣ်ထဲပှၤဘၣ်ဆူးဘၣ်ဆါတဖၣ်လီၤ.

³²တမ့ၢ်ယဟဲဒ်သိးယကကိးက့ၤပှၤတီပှၤလိၤတဖၣ်လၢအကပီၢ် ယၢ်လီၤက့ၤအသးအဂီၢ်ဘၣ်. မ့မ့ၢ်ယဟဲကိးက့ၤပှၤတၢ်ဒဲးဘးဖိ တဖၣ်လီၤ.”

³³ပှၤတနီၤစံးဘၣ်ယ့ၣ်ၡူး, “စီၤယိၤဟၣ်အပျဲၢ်အဘီၣ်တဖၣ်ဒုၣ်တၢ်အီၣ်ဒီး ဃ့ဘါထုကဖၣ်တၢ်တလီၢ်လီၢ်, ဒီးပှၤဖၤရံၤၡဲအပျဲၢ်အဘီၣ်တဖၣ်မၤဝဲဒ်န့ၣ်အသိးစ့ၢ်ကီးလီၤ. မ့မ့ၢ်နဲနပျဲၢ်နဘီၣ်တဖၣ်အီၣ်တၢ်ဒီးအီတၢ်လီၤ.”

³⁴ယ့ၣ်ၡူးစံးဆၢဝဲ, “ပှၤဘၣ်တၢ်ကွဲအီၤဆူတၢ်ဖျီအမူးပူၤတဖၣ်န့ၣ်, ဖဲတလးမူးပိာ်ခွါအိၣ်ဒီးအဝဲသ့ၣ်တဖၣ်အဖၢမုၢ်ဒီး, သုဆိကမိၣ်သုဒုးကီၤဝံၤကီၤစ့ၤအီၤကန့ၢ်ဧါ. သပှၢ်ကတၢၢ်တန့ၢ်ဘၣ်.

³⁵ဘၣ်ဆၣ်ဒီးမုၢ်နံၤမုၢ်သီကဟဲဝဲဖဲတလးမူးပိာ်ခွါကဘၣ် တၢ်ဟံးထီၣ်ကွံာ်အီၤလၢအဝဲသ့ၣ်အသိးအကျါ, ဒီးဖဲအဆၢကတီၢ်အဝဲန့ၣ်အဝဲသ့ၣ်ကဒုၣ်တၢ်အီၣ်လီၤ.”

³⁶ယ့ၣ်ၡူးစံးဘၣ်တဲဘၣ်စ့ၢ်ကီးအဝဲသ့ၣ်လၢတၢ်ကတိၤဒိ တထံၣ်အံၤလီၤ. “ပှၤတဖှီယာ်ကွံာ်တၢ်ကံးယာ်အက့တက့လၢ ဆ့ကၤအသီတဘ့ၣ်အလိၤဒ်သိးအကဆးကျးဆ့ကၤအလီၢ်လံၤ တဘ့ၣ်အဂီၢ်န့ၣ်နီတဂၤဘၣ်. မ့ၢ်မၤဝဲဒ်န့ၣ်ဒီး, အဝဲကမၤယာ်ဘၣ်ဆ့ကၤအသီ, ဒီးတၢ်ကံးယာ်အက့လၢအသီတက့န့ၣ်, တဘၣ်လိာ်အသးဒီးတၢ်အလီၢ်လံၤန့ၣ်ဘၣ်လီၤ.

³⁷ဒ်န့ၣ်အသိးပှၤတဒၢနုာ်စပံးထံအသီလၢစပံးထံဒၢတၢ်ဖံးအလီၢ်လံၤ တဖၣ်အပူၤနီတဂၤဘၣ်. အဂ့ၢ်မ့ၢ်လၢစပံးထံအသီကမၤသ့ၣ်ဖးကွံာ်စပံးထံဒၢတၢ်ဖံး အလီၢ်လံၤတဖၣ်, စပံးထံကယွၤလီၤကွံာ်ဒီးစပံးထံဒၢတၢ်ဖံးတဖၣ်ကဟးဂီၤကွံာ်ဝဲဒၣ် အဃိန့ၣ်လီၤ.

³⁸မ့မ့ၢ်စပံးထံအသီန့ၣ်, ကြၢးဘၣ်တၢ်ဒၢနုာ်အီၤလၢစပံးထံဒၢတၢ်ဖံးအသီတဖၣ်အပူၤလီၤ.

³⁹ဒီးပှၤအီစပံးထံအလီၢ်လံၤဝံၤဆၢဒိးန့ၢ်ဘၣ်စပံးထံအသီန့ၣ်, တအိၣ်နီတဂၤဘၣ်. အဝဲဒၣ်စံးဝဲ, ‘အလီၢ်လံၤန့ၣ်ဝံၣ်ဒိၣ်တက့ၢ်လီၤ.’ ”