Read S'gaw Karen လံာ်လူၤကၣ် 6 Bible Online

လံာ်လူၤကၣ် 6 - S'gaw Karen bible

လံာ်လူၤကၣ် 6

¹ဘၣ်ဖဲပှၤယူဒၤဖိအမုၢ်အိၣ်ဘှံးနံၤတနံၤန့ၣ်, ယ့ၣ်ၡူးလဲၤတၢ်ဒီးခီဂာ်ဝဲစံာ်ပျီတဖၣ်လီၤ. အဝဲအပျဲၢ်အဘီၣ်တဖၣ်ဒဲးဘုအစဲၤတဖၣ်, လံာ်လူာ်ဝဲလၢအစုဒီးအီၣ်ဝဲလီၤ.

²ပှၤဖၤရံၤၡဲတနီၤစံးဝဲ, “တၢ်တမံၤလၢပတၢ်သိၣ်တၢ်သီစံးသုတဘၣ်မၤသုဝဲဖဲပှၤယူဒၤ ဖိအမုၢ်အိၣ်ဘှံးနံၤန့ၣ်, ဘၣ်မနုၤအဃိသုမၤလဲၣ်.”

³ယ့ၣ်ၡူးစံးဆၢအဝဲသ့ၣ်, “တၢ်လၢစီၤဒၤဝံးဒီးအပျဲၢ်တဖၣ်မၤဝဲဖဲ တၢ်သၣ်ဝံၤအဝဲသ့ၣ်အသးအခါန့ၣ်မ့ၢ်သုတဖးဘၣ်ဧါ.

⁴အဝဲဒၣ်လဲၤနုာ်ဆူကစၢ်ယွၤအဟံၣ်ပူၤ, ဟံးန့ၢ်ကိၣ်လၢအဘၣ်တၢ်လုၢ်ထီၣ်ပာ်ထီၣ်အီၤလၢကစၢ်ယွၤ, အီၣ်ဝဲဒီးဟ့ၣ်စ့ၢ်ကီးဝဲအပျဲၢ်တဖၣ်လီၤ. နီၢ်နီၢ်တခီန့ၣ်, မ့တမ့ၢ်လၢပှၤလုၢ်တၢ်အခိၣ်တဖၣ်ဘၣ်ဒီး, ပှၤတဂၤဂ့ၤတဂၤဂ့ၤမ့ၢ်အီၣ်ကိၣ်အဝဲန့ၣ်န့ၣ်, မ့ၢ်တၢ်လၢအထီဒါပတၢ်သိၣ်တၢ်သီလီၤ.

⁵ဒီးယ့ၣ်ၡူးမၤကတၢၢ်အတၢ်ကတိၤဒီးစံးဝဲ, “ပှၤကညီဖိခွါအံၤမ့ၢ်ဝဲပှၤယူဒၤဖိအမုၢ်အိၣ်ဘှံးနံၤအကစၢ်လီၤ.”

⁶ဖဲပှၤယူဒၤဖိအမုၢ်အိၣ်ဘှံးနံၤအဂၤတနံၤန့ၣ်, ယ့ၣ်ၡူးလဲၤနုာ်ဆူဘူၣ်ဘျီၣ်လၢအမ့ၢ်တၢ်ဘါအလီၢ်ဒီးသိၣ် လီၤသီလီၤတၢ်လီၤ. ပှၤအိၣ်ဝဲဒၣ်ဖဲန့ၣ်တဂၤလၢအစုထွဲတခီသံဝဲလီၤ.

⁷ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတနီၤဒီးပှၤဖၤရံၤၡဲတနီၤ ဃုထံၣ်န့ၢ်တၢ်ဂ့ၢ်တမံၤမံၤလၢအကပာ်တၢ်ကမၣ်လၢယ့ၣ်ၡူးအလိၤ အဂီၢ်လီၤ. လၢတၢ်န့ၣ်အဃိ, အဝဲသ့ၣ်ကွၢ်ဟုၣ်အီၤလၢမ့ၢ်အကမၤ ဘျါတၢ်လၢပှၤယူဒၤဖိအမုၢ်အိၣ်ဘှံးအနံၤ, တမၤဘျါဝဲလဲၣ်န့ၣ်လီၤ.

⁸ဘၣ်ဆၣ်ဒီးယ့ၣ်ၡူးသ့ၣ်ညါအဝဲသ့ၣ်အတၢ်ဆိကမိၣ်, ဒီးစံးဘၣ်ပှၤလၢအစုသံတခီပၤတဂၤန့ၣ်, “ဆၢထၢၣ်ဒီးဟဲဖဲအံၤလၢတၢ်မဲာ်ညါတက့ၢ်.” ပှၤတဂၤန့ၣ်ဂဲၤထၢၣ်ဒီးဆၢထၢၣ်ဝဲဖဲန့ၣ်လီၤ.

⁹အန့ၣ်ဝံၤဒီးယ့ၣ်ၡူးစံးဘၣ်အဝဲသ့ၣ်, “ယကသံကွၢ်သု, ပတၢ်သိၣ်တၢ်သီပျဲပှၤလၢပကမၤတၢ်မနုၤတမံၤဖဲပှၤယူဒၤဖိ အမုၢ်အိၣ်ဘှံးနံၤန့ၣ်လဲၣ်. လၢပကမၤစၢၤတၢ်ဧါ. မ့တမ့ၢ်လၢပကမၤဆါတၢ်လဲၣ်. လၢပကအုၣ်က့ၤခီၣ်က့ၤပှၤကညီတဂၤအသးသမူဧါ. မ့တမ့ၢ်ပကမၤဟးဂီၤကွံာ်အီၤန့ၣ်လဲၣ်.”

¹⁰အဝဲဒၣ်ကွၢ်ဃီၤတၢ်ဆူအဝဲသ့ၣ်ခဲလၢာ်အအိၣ်ဝးဝး, ဒီးစံးဘၣ်ပှၤတဂၤန့ၣ်, “ယူာ်ထီၣ်နစုတက့ၢ်.” အဝဲဒၣ်မၤဝဲဒ်န့ၣ်, ဒီးအစုဂ့ၤထီၣ်က့ၤဝဲဒၣ်လီၤ.

¹¹ဘၣ်ဆၣ်ဒီးအဝဲသ့ၣ်ပှဲၤဒီးတၢ်သူၣ်ဒိၣ်သးဖျိးဒီးကူၣ်ထီၣ်ဖးလီၤ သကိးဘၣ်ဃးအဝဲသ့ၣ်ကမၤယ့ၣ်ၡူးဒ်လဲၣ်အဂ့ၢ်န့ၣ်လီၤ.

¹²ဖဲအဆၢကတီၢ်အဝဲန့ၣ်, ယ့ၣ်ၡူးလဲၤထီၣ်ဆူတၢ်လူၢ်တလူၢ်အလိၤဒ်သိး အကဃ့ဘါထုကဖၣ်တၢ်အဂီၢ်ဒီးဃ့ထုကဖၣ်တၢ်လၢ ယွၤဒီနၤညါန့ၣ်လီၤ.

¹³ဖဲမုၢ်ဆ့ၣ်ထီၣ်န့ၣ်, အဝဲဒၣ်ကိးဃီၤအပျဲၢ်အဘီၣ်တဖၣ်ဆူအအိၣ်, ဒီးလၢအဝဲသ့ၣ်အကျါဃုထၢထီၣ်ပှၤတဆံခံဂၤ, လၢအယုၢ်ဝဲအမံၤလၢပှၤတၢ်မၢဖိတဖၣ်န့ၣ်လီၤ.

¹⁴စီၤၡံမိၣ် (လၢအကိးစ့ၢ်ကီးဝဲလၢစီၤပ့းတရူး) ဒီးအဒီပုၢ်ဝဲၢ်စီၤအၣ်ဒရ့း, စီၤယၤကိာ်ဒီးစီၤယိၤဟၣ်, စီၤဖံလံးပူးဒီးစီၤဘၢ်သလီးမဲ,

¹⁵စီၤမးသဲဒီးစီၤသိၤမါ, စီၤအၤလဖဲအဖိခွါစီၤယၤကိာ်, ဒီးစီၤၡံမိၣ် (လၢအဘၣ်တၢ်ကိးအီၤလၢပှၤစ့ၤလိၣ်ဖိ, ပှၤအဲၣ်အထံအကီၢ်),

¹⁶စီၤယၤကိာ်အဖိခွါစီၤယူဒၤ, ဒီးစီၤယူဒၤအံၣ်စကၤရံၤအိာ် လၢအကဲထီၣ်ပှၤဆါလီၤကွံာ်ယ့ၣ်ၡူးတဂၤန့ၣ်လီၤ.

¹⁷ယ့ၣ်ၡူးဟဲက့ၤလီၤဒီးတၢ်မၢဖိတဖၣ်လၢတၢ်လူၢ်ခိၣ်လီၤ. ဒီးဆၢထၢၣ်သကိးဒီးအပျဲၢ်အဘီၣ်ဂီၢ်မုၢ်ဂီၢ်ပၤဖဲတၢ်လီၢ်လၢ အပၢၤတတီၤလီၤ. ပှၤအိၣ်ဝဲဒၣ်ဖဲန့ၣ်အါအါဂီၢ်ဂီၢ်လၢ အဟဲလၢကီၢ်ယူဒၤဒီဘ့ၣ်ညါ, ဒီးလၢယရူၤၡလ့ၣ်ဒီးလၢပီၣ်လဲၣ်ကၢၢ်နံၤအဝ့ၢ်တဖၣ်လၢ အမ့ၢ်ဝဲဝ့ၢ်ထါယၢၣ်ဒီးဝ့ၢ်စံဒိၣ်န့ၣ်လီၤ.

¹⁸အဝဲသ့ၣ်ဟဲဝဲဒ်သိးအကနၢ်ဟူဘၣ်အတၢ်ကတိၤဒီးဒ်သိး အတၢ်ဆူးတၢ်ဆါတဖၣ်ကဘၣ်တၢ်မၤဘျါအီၤအဂီၢ်န့ၣ်လီၤ. ပှၤလၢအဘၣ်တၢ်မၤတံာ်တာ်အီၤလၢတၢ်ဝံတၢ်နါတဖၣ်ဟဲ စ့ၢ်ကီးဝဲဒီးဘၣ်တၢ်မၤဘျါက့ၤအီၤလီၤ.

¹⁹ပှၤကိးဒံကိးဂၤဒဲးဂုာ်ကျဲးစၢးထိးဘၣ်အီၤ, မ့ၢ်လၢတၢ်စိတၢ်ကမီၤဟဲထီၣ်လၢအဝဲဒၣ်အလိၤ, ဒီးမၤဘျါက့ၤအဝဲသ့ၣ်ကိးဂၤဒဲးအဃိန့ၣ်လီၤ.

²⁰ယ့ၣ်ၡူးကွၢ်ဃီၤအပျဲၢ်အဘီၣ်တဖၣ်ဒီးစံးဝဲ, “သုဝဲပှၤဖှီၣ်ဖိယာ်ဖိတဖၣ်အံၤ သုဘၣ်ဆိၣ်ဂ့ၤနီၢ်နီၢ်လီၤ. အဂ့ၢ်ဒ်အံၤ, ကစၢ်ယွၤအဘီအမုၢ်မ့ၢ်သုတၢ်လီၤ.

²¹“သုဝဲလၢတၢ်သၣ်ဝံၤအသးခဲကနံၣ်အံၤတဖၣ်န့ၣ် သုဘၣ်ဆိၣ်ဂ့ၤနီၢ်နီၢ်လီၤ. အဂ့ၢ်ဒ်အံၤ, သုကဘျဲးအီၣ်ဘျဲးအီသုဝဲလီၤ. “သုဝဲလၢအဟီၣ်အယၢၤခဲကနံၣ်အံၤတဖၣ်န့ၣ် သုဘၣ်ဆိၣ်ဂ့ၤနီၢ်နီၢ်လီၤ. အဂ့ၢ်ဒ်အံၤ, သုကနံၤထီၣ်သုဝဲလီၤ.

²²“ဖဲပှၤသးဟ့သု, ဒီးတတူၢ်လိာ်သု, ဒီးကတိၤတရီတပါသု, ဒီးစံးအၢစံးသီသုလၢပှၤကညီဖိခွါအံၤအဃိန့ၣ်, သုဘၣ်ဆိၣ်ဂ့ၤသုဝဲနီၢ်နီၢ်လီၤ.

²³တုၤတၢ်တမံၤန့ၣ်မၤအသးဒီး, သူၣ်ခုသးခုဒီးဂဲၤကလံာ်လၢတၢ်သးဖှံအပူၤတက့ၢ်. အဂ့ၢ်ဒ်အံၤ, ခိၣ်ဖးဖးဒိၣ်ဘၣ်တၢ်ပာ်ဃာ်အီၤလၢသုဂီၢ်လၢမူခိၣ်န့ၣ်လီၤ. အဂ့ၢ်ဒ်အံၤ အဝဲသ့ၣ်အပၢ်တဖၣ်မၤတ့ၢ်ဝံတဖၣ်ဒ်န့ၣ်အသိးလီၤ.

²⁴“မ့မ့ၢ်သုဝဲလၢအထူးအတီၤခဲကနံၣ်အံၤတဖၣ် သုဘၣ်အဖှီၣ်ဆံးဒိၣ်လဲၣ်. အဂ့ၢ်ဒ်အံၤ, သုအိၣ်မူဘၣ်တ့ၢ်လံသုတၢ်အိၣ်မူ အဘီၣ်အညီလံ.

²⁵“သုဝဲလၢအအီၣ်ကုးအီပှဲၤခဲကနံၣ်အံၤတဖၣ် သုဘၣ်အဖှီၣ်ဆံးဒိၣ်လဲၣ်. အဂ့ၢ်ဒ်အံၤ, သုကသၣ်ဝံၤလီၤဒိလီၤ. “သုဝဲလၢအနံၤခဲကနံၣ်အံၤတဖၣ် သုဘၣ်အဖှီၣ်ဆံးဒိၣ်လဲၣ်. အဂ့ၢ်ဒ်အံၤ, သုကသူၣ်အုးသးအုးဒီး သုကဟီၣ်ကယၢၤလီၤ.

²⁶“တုၤပှၤကိးဂၤဒဲးကတိၤဂ့ၤသုန့ၣ်, သုဘၣ်အဖှီၣ်ဆံးဒိၣ်လဲၣ်. အဂ့ၢ်ဒ်အံၤ, အဝဲသ့ၣ်အပၢ်တဖၣ်စံးဘၣ်တ့ၢ်ဝံအဘျၣ်တဖၣ် လၢတၢ်တမံၤဃီန့ၣ်လီၤ.

²⁷မ့မ့ၢ်, ယစံးဘၣ်တဲဘၣ်သုဝဲလၢအနၢ်ဟူဘၣ်ယတၢ်ကတိၤတဖၣ်, အဲၣ်သုဒုၣ်သုဒါတဖၣ်တက့ၢ်. မၤဂ့ၤပှၤလၢအသးဟ့သုတဖၣ်တက့ၢ်.

²⁸ဆိၣ်ဂ့ၤပှၤသ့ၣ်တဖၣ်လၢအဆိၣ်အၢသု, ဒီးဃ့ဘါထုကဖၣ်တၢ်လၢ ပှၤမၤအၢမၤသီသုတဖၣ်အဂီၢ်တက့ၢ်.

²⁹ပှၤတဂၤဂၤမ့ၢ်ဒဲနဘိးပၤတခီန့ၣ်, ပျဲအဒဲနဘိးပၤအဂၤတခီစ့ၢ်ကီးတက့ၢ်. ပှၤတဂၤမ့ၢ်ဟံးန့ၢ်နဆ့ကၤဖီခိၣ်န့ၣ်, ပျဲအဟံးန့ၢ်နဆ့ကၤစ့ၢ်ကီးတက့ၢ်.

³⁰ပှၤကိးဂၤဒဲးလၢအဃ့နတၢ်တမံၤမံၤန့ၣ်, ဟ့ၣ်အီၤတက့ၢ်. ဒီးဖဲပှၤတဂၤဟံးန့ၢ်တၢ်တမံၤမံၤလၢအမ့ၢ်နတၢ်န့ၣ်, တဘၣ်ဃ့က့ၤအီၤတဂ့ၤ.

³¹တၢ်တမံၤဃီလၢသုဆၢလၢပှၤဂၤကမၤဝဲလၢသုဂီၢ်န့ၣ်, မၤအီၤလၢအဂီၢ်တက့ၢ်.

³²“သုမ့ၢ်အဲၣ်ထဲပှၤလၢအအဲၣ်သုတဖၣ်န့ၣ်, သုမုၢ်လၢ်လၢသုကဒိးန့ၢ်တၢ်ဆိၣ်ဂ့ၤကသ့ဝဲလၢကျဲဒ်လဲၣ်. ပှၤတၢ်ဒဲးဘးဖိတဖၣ်ဒၣ်လဲာ်အဲၣ်ဝဲပှၤလၢအအဲၣ်အီၤတဖၣ်လီၤ.

³³ဒီးသုမ့ၢ်မၤဂ့ၤထဲပှၤသ့ၣ်တဖၣ်လၢအမၤဂ့ၤသုန့ၣ်, သုမုၢ်လၢ်လၢသုကဒိးန့ၢ်ဘၣ်တၢ်ဆိၣ်ဂ့ၤကသ့ဝဲလၢကျဲဒ်လဲၣ်. ပှၤတၢ်ဒဲးဘးဖိတဖၣ်ဒၣ်လဲာ်မၤဝဲဒ်န့ၣ်လီၤ.

³⁴ဒီးသုမ့ၢ်ဟ့ၣ်လိၢ်လီၤတၢ်ထဲပှၤလၢသုမုၢ်လၢ်သုကဒိး န့ၢ်ဘၣ်က့ၤတၢ်လၢအအိၣ်န့ၣ်, သုမုၢ်လၢ်လၢသုကဒိးန့ၢ်ဘၣ်တၢ်ဆိၣ်ဂ့ၤကသ့ဝဲလၢကျဲဒ်လဲၣ်. ပှၤတၢ်ဒဲးဘးဖိတဖၣ်ဒၣ်လဲာ်ဟ့ၣ်လိၢ်လီၤတၢ်လၢပှၤတၢ်ဒဲးဘးဖိ တဖၣ်အအိၣ်ဒ်သိးအကဒိးန့ၢ်ဘၣ်က့ၤဝဲပှဲၤသိးအလီၢ်လီၤ.

³⁵တဘၣ်မ့ၢ်ဒ်န့ၣ်ဘၣ်. အဲၣ်သုဒုၣ်သုဒါတဖၣ်ဒီးမၤဂ့ၤအဝဲသ့ၣ်တက့ၢ်. ဟ့ၣ်လိၢ်တၢ်, ဒီးမုၢ်လၢ်က့ၤတၢ်နီတမံၤတဂ့ၤ. သုကဒိးန့ၢ်ဘၣ်ခိၣ်ဖးလၢအဒိၣ်, ဒီးသုကမ့ၢ်တၢ်ထီကတၢၢ်ကစၢ်ယွၤတဂၤအဖိခွါတဖၣ်လီၤ. အဂ့ၢ်ဒ်အံၤ, အဝဲဒၣ်ဂ့ၤလၢပှၤတသ့ၣ်ညါတၢ်ဘျုးတၢ်ဖှိၣ်, ဒီးပှၤအၢပှၤသီတဖၣ် အဖီခိၣ်လီၤ.

³⁶အိၣ်ဒီးတၢ်သးကညီၤ, ဒ်သုပၢ်သးကညီၤတၢ်အသိးတက့ၢ်.

³⁷“စံၣ်ညီၣ်ပှၤဂၤတဂ့ၤ, ဒီးကစၢ်ယွၤတစံၣ်ညီၣ်သုဘၣ်. စံၣ်ညီၣ်ဃၣ်ပှၤဂၤတဂ့ၤ, ဒီးကစၢ်ယွၤတစံၣ်ညီၣ်ဃၣ်သုဘၣ်. ပျၢ်ကွံာ်ပှၤဂၤအတၢ်ကမၣ်တက့ၢ်, ဒီးကစၢ်ယွၤကပျၢ်ကွံာ်သုတၢ်ကမၣ်လီၤ.

³⁸ဟ့ၣ်တၢ်လၢပှၤဂၤတက့ၢ်. ဒီးကစၢ်ယွၤကဟ့ၣ်တၢ်လၢသုလီၤ. သပှၢ်ကတၢၢ် သုကဒိးန့ၢ်ဘၣ်တၢ်လၢအဘၣ်တၢ်ဃီၣ်အီၤ ပှဲၤထီၣ်ပှဲၤထီဒီးတၢ်ကဟ့ၣ်လီၤသုတၢ်အါအါဂီၢ်ဂီၢ်ဒီး ကလူလီၤအီၤလၢသုစုပူၤထဲသိးသုဟံးဃာ်အီၤသ့ဝဲန့ၣ်လီၤ. အဂ့ၢ်ဒ်အံၤ, ကစၢ်ယွၤကဃီၣ်ဟ့ၣ်တၢ်လၢသုပှဲၤသိးသိး သုဃီၣ်ဟ့ၣ်တၢ်လၢပှၤဂၤန့ၣ်လီၤ.”

³⁹ဒီးယ့ၣ်ၡူးစံးဘၣ်တဲဘၣ်အဝဲသ့ၣ်လၢတၢ်ကတိၤဒိတထံၣ်အံၤဒီးစံးဝဲ, “ပှၤမဲာ်ဘျီၣ်တဂၤဆှၢပှၤမဲာ်ဘျီၣ်အဂၤတဂၤတသ့ဘၣ်. မ့ၢ်မၤဝဲဒီးအဝဲသ့ၣ်ခံဂၤလၢာ်ကလီၤတဲာ်နုာ်ဆူတၢ်ပူၤလီၤ.

⁴⁰ပျဲၢ်တဒိၣ်န့ၢ်အသရၣ်နီတဂၤဘၣ်. ဘၣ်ဆၣ်ဒီး, ပျဲၢ်တဂၤလၢ်လၢ်ဖဲအဝဲဒၣ်မၤလိတၢ်ဝံၤဝဲလၢလၢပှဲၤပှဲၤလံ န့ၣ်, ကလီၤဂာ်ဒီးအသရၣ်လီၤ.

⁴¹ဘၣ်မနုၤအဃိနကွၢ်တၢ်ကမှံၤအိၣ်လၢနဒီပုၢ်ဝဲၢ်အမဲာ်ချံပူၤ, ဘၣ်ဆၣ်နတပာ်သူၣ်ပာ်သးလၢသ့ၣ်ဖူတကျီၣ်အိၣ်လၢ နမဲာ်ချံဒၣ်နဲအပူၤန့ၣ်လဲၣ်.

⁴²နစံးဘၣ်နဒီပုၢ်ဝဲၢ်, ‘ဒီပုၢ်ဝဲၢ်ဧၢ, ဝံသးစူၤပျဲယခွဲးထီၣ်ကွံာ်တၢ်ကမှံၤလၢနမဲာ်ချံပူၤ,’ ဘၣ်ဆၣ်နတထံၣ်ဒၣ်လဲာ်သ့ၣ်ဖူတကျီၣ်လၢနမဲာ်ချံဒၣ်နဲ အပူၤန့ၣ်ကသ့ဝဲဒ်လဲၣ်. ပှၤပာ်မၤအသးတဂၤဧၢ, ထုးထီၣ်ဆိသ့ၣ်ဖူတကျီၣ်အိၣ်လၢနမဲာ်ချံဒၣ်နဲအပူၤတက့ၢ်. တုၤနုၤတစုနကထံၣ်တၢ်ထံထံဆးဆး, ဒီးနခွဲးထီၣ်ကွံာ်တၢ်ကမှံၤလၢနဒီပုၢ်ဝဲၢ်အမဲာ်ချံပူၤကသ့ဝဲလီၤ.

⁴³“သ့ၣ်လၢအဂ့ၤတထူၣ်န့ၣ်တသၣ်ထီၣ်တၤသၣ်လၢအတဂ့ၤဘၣ်, ဒီးသ့ၣ်လၢအတဂ့ၤတထူၣ်န့ၣ်တသၣ်ထီၣ်တၤသၣ်လၢအဂ့ၤစ့ၢ်ကီးဘၣ်.

⁴⁴သ့ၣ်ကိးထူၣ်ဒဲးဘၣ်တၢ်သ့ၣ်ညါအီၤခီဖျိတၤသၣ်လၢအသၣ်ထီၣ်ဝဲန့ၣ်လီၤ. ပှၤတဒဲးချၢၣ်ဒၢသၣ်လၢတၤဆှုၣ် အမုၢ်အဘိတဖၣ်အလိၤဒီး ပှၤတဒဲးစပံးသၣ်လၢတၤဆှုၣ်တပှီာ်အလိၤဘၣ်.

⁴⁵ပှၤဂ့ၤပှၤဝါတဂၤန့ၣ်, ထုးထီၣ်တၢ်အဂ့ၤအဝါလၢတၢ်ဂ့ၤတၢ်ဝါ တဖၣ်အိၣ်ပာ်ဖှိၣ်အသးအလီၢ်, လၢအသးပူၤလီၤ. ပှၤအၢပှၤသီတဂၤန့ၣ်, ထုးထီၣ်တၢ်အၢတၢ်သီလၢအဝဲအတၢ်ပာ်ဖှိၣ်ဃာ်တၢ်အၢတၢ်သီတဖၣ် အလီၢ်အပူၤလီၤ. အဂ့ၢ်ဒ်အံၤ, ပှၤကညီတဂၤအထးခိၣ်ကတိၤတၢ်ဒ် တၢ်လၢအအိၣ်ပှဲၤဝဲလၢအသးပူၤအသိးန့ၣ်လီၤ.

⁴⁶“ဘၣ်မနုၤအဃိသုကိးယၤ, ‘ကစၢ်ဧၢ, ကစၢ်ဧၢ,’ ဒီးသုတမၤတၢ်လၢယတဲသုန့ၣ်လဲၣ်.

⁴⁷ပှၤတဂၤလၢ်လၢ်လၢအဟဲဆူယအိၣ်, ဒီးဒိကနၣ်ယတၢ်ကတိၤတဖၣ်ဒီးစူၢ်အီၤန့ၣ်, ယကဒုးနဲၣ်သုလၢအဝဲဒၣ်လီၤဂာ်ဒီးတၢ်မနုၤလဲၣ်န့ၣ်လီၤ.

⁴⁸အဝဲဒၣ်လီၤဂာ်ဒီးပှၤတဂၤလၢအသူၣ်ထီၣ်ဟံၣ်, ခူၣ်တၢ်ပူၤယိာ်ယိာ်, ဒီးပာ်လီၤဝဲအခီၣ်ထံးခီၣ်ဘိလၢလၢၢ်ခိၣ်န့ၣ်လီၤ. ထံလုၣ်ဘၢကွံာ်ထံကျိအကၢၢ်ခိၣ်ဒီးဘၣ်ဒိဟံၣ်တဖျၢၣ်န့ၣ်, ဘၣ်ဆၣ်ဒီးမၤဟူးမၤဝးအီၤတန့ၢ်ဘၣ်. အဂ့ၢ်မ့ၢ်လၢတၢ်သူၣ်အီၤကျၢၤကျၢၤအဃိလီၤ.

⁴⁹မ့မ့ၢ်ပှၤတဂၤလၢအနၢ်ဟူယကလုၢ်ဒီးတစူၢ်ဝဲန့ၣ်, လီၤဂာ်ဒီးပှၤတဂၤလၢ အသူၣ်ထီၣ်အဟံၣ်လၢဟီၣ်ခိၣ်လိၤ, တအိၣ်ဒီးတၢ်ပာ်လီၤဃာ်အခီၣ်ထံးခီၣ်ဘိနီတမံၤဘၣ်န့ၣ်လီၤ. ဖဲထံလုၣ်ဘၢတၢ်ဒီးဘၣ်ဒိဟံၣ်အဝဲန့ၣ်န့ၣ်, လီၤပှီၢ်ကွံာ်ဝဲတဘျီဃီ, ဒီးအတၢ်လီၤပှီၢ်န့ၣ်မ့ၢ်တၢ်နးမးန့ၣ်လီၤ.”