Read S'gaw Karen လံာ်လူၤကၣ် 7 Bible Online

လံာ်လူၤကၣ် 7 - S'gaw Karen bible

လံာ်လူၤကၣ် 7

¹ဖဲယ့ၣ်ၡူးစံးကတိၤတၢ်သ့ၣ်တဖၣ်အံၤခဲလၢာ်လၢပှၤဂီၢ်မုၢ်ဝံၤဝဲန့ၣ်, အဝဲဒၣ်လဲၤဆူဝ့ၢ်ကပ့းရနီၣ်လီၤ.

²ပှၤရိမ့ၤသုးဖိတကယၤအခိၣ်ဖဲဝ့ၢ်အဝဲန့ၣ်အပူၤတဂၤအိၣ် ဒီးတၢ်ခ့တၢ်ပှၤလၢအအဲၣ်ဝဲဒိၣ်မးတဂၤလီၤ. တၢ်ခ့တၢ်ပှၤပိာ်ခွါတဂၤန့ၣ်, အိၣ်တဆူၣ်နးမးတုၤဒၣ်လဲာ်ဘူးတ့ၢ်လၢအကသံလီၤ.

³ဖဲသုးခိၣ်နၢ်ဟူဘၣ်ဃးယ့ၣ်ၡူးအဂ့ၢ်န့ၣ်, အဝဲဒၣ်မၢလီၤပှၤယူဒၤသူၣ်က့သးပှၢ်တနီၤဆူအအိၣ်ဒ်သိး အကမၢအဝဲဒၣ်ဟဲဒီးမၤဘျါအခ့အပှၤတဂၤန့ၣ်အဂီၢ်လီၤ.

⁴အဝဲသ့ၣ်ဟဲဆူယ့ၣ်ၡူးအအိၣ်, ဒီးဃ့ကညးအီၤသပှၢ်ပှၢ်ဒီးစံး, “သုးခိၣ်တဂၤအံၤ ကြၢးဝဲဘၣ်ဝဲစဲဃဲၤဒီးနတၢ်မၤစၢၤလီၤ.

⁵အဝဲဒၣ်အဲၣ်ပပှၤကလုာ်, ဒီးအဝဲအနီၢ်ကစၢ်ဒၣ်ဝဲသူၣ်ထီၣ်ဘူၣ်ဘျီၣ်လၢ အမ့ၢ်တၢ်ဘါလီၢ်တဖျၢၣ်လၢပဂီၢ်လီၤ.”

⁶လၢတၢ်န့ၣ်အဃိ, ယ့ၣ်ၡူးလဲၤဒီးအဝဲသ့ၣ်လီၤ. ဖဲအဝဲဒၣ်ဘူးထီၣ်ဒီးဟံၣ်အဝဲန့ၣ်န့ၣ်, သုးခိၣ်ဆှၢလီၤအတံၤသကိးတဖၣ်ဆူအအိၣ်ဒ်သိးအကတဲဘၣ်အီၤ, “ကစၢ်ဧၢ, တဘၣ်မၤတံာ်တာ်နသးတဂ့ၤ. ယတကြၢးယဲလၢနကဟဲနုာ်ဆူယဟံၣ်ပူၤအဂီၢ်ဘၣ်.

⁷ယတဆိကမိၣ်လီၤစ့ၢ်ကီးယသးလၢယကြၢးယဲဘၣ်ယဲလၢယကဟဲဆူ နအိၣ်လၢယနီၢ်ကစၢ်ဒၣ်ယဲဘၣ်. ထဲခါလီၤနကလုၢ်, ဒီးယခ့ယပှၤကအိၣ်ဆူၣ်ထီၣ်က့ၤဝဲဒၣ်လီၤ.

⁸ယဲဒၣ်စ့ၢ်ကီးယမ့ၢ်ပှၤတဂၤလၢအဘၣ်တၢ်ပာ်လီၤယၤလၢသုးခိၣ် အလီၢ်အလၤဒိၣ်န့ၢ်ယၤတဖၣ်အဖီလာ်, ဒီးယအိၣ်ဒီးသုးဖိလၢ ယဖီလာ်တဖၣ်လီၤ. ယစံးဘၣ်အဝဲတဂၤန့ၣ်, ‘လဲၤတက့ၢ်.’ ဒီးအဝဲဒၣ်လဲၤဝဲလီၤ. ဒီးအဂၤတဂၤန့ၣ်, ‘ဟဲတက့ၢ်.’ ဒီးအဝဲဒၣ်ဟဲဝဲလီၤ. ဒီးယစံးဘၣ်ယကုၢ်ယပှၤ, ‘မၤတၢ်အဝဲအံၤတက့ၢ်.’ ဒီးအဝဲဒၣ်မၤဝဲလီၤ.

⁹ယ့ၣ်ၡူးကမၢကမၣ်ဝဲဖဲအနၢ်ဟူဘၣ်တၢ်ကတိၤအဝဲအံၤလီၤ. အဝဲဒၣ်ဃၣ်တရံးအသးဒီးစံးဘၣ်ပှၤဂီၢ်မုၢ်လၢအပိာ်အခံသ့ၣ် တဖၣ်, “တၢ်နာ်ဒ်အံၤအသိးန့ၣ်ယတထံၣ်တ့ၢ်ယဲနီတစုဘၣ်. ယစံးဘၣ်သု, လၢပှၤအံၣ်စရ့လးဖိအကျါဒၣ်လဲာ်, ယတထံၣ်ဘၣ်.”

¹⁰ပှၤဆှၢတၢ်ကစီၣ်တဖၣ်က့ၤက့ၤဝဲဆူသုးခိၣ်အဟံၣ်, ဒီးထံၣ်ဘၣ်ဝဲလၢအဝဲဒၣ်အခ့အပှၤအိၣ်ဆူၣ်ထီၣ်က့ၤလံန့ၣ်လီၤ.

¹¹တၢ်န့ၣ်ဝံၤအလီၢ်ခံတစိၢ်ဖိန့ၣ်, ယ့ၣ်ၡူးလဲၤဝဲဆူဝ့ၢ်တဖျၢၣ်လၢ အဘၣ်တၢ်ကိးအမံၤလၢနၤအံၣ်, ဒီးအပျဲၢ်အဘီၣ်တဖၣ်ဒီးပှၤဂီၢ်မုၢ်ဖးဒိၣ်လဲၤဝဲဒီးအီၤလီၤ.

¹²ဖဲအဝဲဒၣ်လဲၤတုၤဝ့ၢ်အကျဲစၢၤန့ၣ်, ပှၤတဖုလၢအကလဲၤခူၣ်လီၤပှၤသံဟဲဟးထီၣ်ဝဲဒၣ်လီၤ. ပှၤလၢအသံတဂၤန့ၣ်မ့ၢ်ဝဲပိာ်မုၣ်လၢအမ့ၢ်မုၣ်ကမဲတဂၤ အဖိခွါထဲတဂၤဧိၤန့ၣ်လီၤ. ဒီးပှၤဂီၢ်မုၢ်ဖးဒိၣ်လၢဝ့ၢ်အဝဲန့ၣ်အပူၤ အိၣ်ဝဲဒီးမုၣ်ကမဲတဂၤန့ၣ်လီၤ.

¹³ဖဲကစၢ်ထံၣ်ပိာ်မုၣ်အဝဲန့ၣ်, အဝဲဒၣ်အသးပူၤပှဲၤဒီးတၢ်သးကညီၤဘၣ်အီၤ, ဒီးစံးဘၣ်ပိာ်မုၣ်န့ၣ်, “တဘၣ်ဟီၣ်တဂ့ၤ.”

¹⁴တုၤနုၤတစုအဝဲဒၣ်လဲၤဃီၤဒီးထိးဘၣ်ကျုာ်ဒီးပှၤလၢအစိာ်တၢ် တဖၣ်အိၣ်ကတီၢ်ဝဲလီၤ. ယ့ၣ်ၡူးစံးဝဲ, “ပိာ်ခွါသးစၢ်ဧၢ, ယစံးဘၣ်နၤဂဲၤဆၢထၢၣ်တက့ၢ်.”

¹⁵ပှၤသံတဂၤန့ၣ်ဆ့ၣ်နီၤဝဲ, ဒီးကတိၤထီၣ်တၢ်, ဒီးယ့ၣ်ၡူးဟ့ၣ်လီၤက့ၤအီၤဆူအမိၢ်အစုပူၤန့ၣ်လီၤ.

¹⁶ပှၤကိးဂၤဒဲးပှဲၤဒီးတၢ်ပျံၤတၢ်ဖုး, ဒီးစံးထီၣ်တြၢၤကစၢ်ယွၤဒီးစံးဝဲ, “ဝံဖးဒိၣ်တဂၤဟဲအိၣ်ဖျါထီၣ်လၢပသိးပကျါလံ. ဒီး, ကစၢ်ယွၤဟဲဝဲဒ်သိးအကအုၣ်က့ၤခီၣ်က့ၤအပှၤဂီၢ်မုၢ်လံ.”

¹⁷တၢ်ကစီၣ်ဘၣ်ဃးဒီးယ့ၣ်ၡူးတမံၤအံၤဟူထီၣ်သါလီၤဝဲသကုၤကီၢ် ယူဒၤဒီဘ့ၣ်ညါဒီးလၢတၢ်လီၢ်အိၣ်ဖဲအဃၢၤဝးဝးန့ၣ်လီၤ.

¹⁸ပှၤဘျၢတၢ်စီၤယိၤဟၣ်အပျဲၢ်အဘီၣ်တဖၣ်စံးဘၣ်တဲဘၣ် အီၤဘၣ်ဃးဒီးတၢ်ဂ့ၢ်တၢ်ကျိၤသ့ၣ်တဖၣ်အံၤခဲလၢာ်လီၤ. အဝဲဒၣ်ကိးဃီၤအဝဲသ့ၣ်အကျါခံဂၤဆူအအိၣ်,

¹⁹ဒီးဆှၢအီၤဆူကစၢ်အအိၣ်ဒ်သိးအကသံကွၢ်အီၤ, “နမ့ၢ်နဲပှၤတဂၤလၢစီၤယိၤဟၣ်စံးလၢအကဟဲန့ၣ်ဧါ. မ့တမ့ၢ်ဘၣ်ဒီး, မ့ၢ်ပကဘၣ်အိၣ်ခိးကွၢ်လၢ်ပှၤတဂၤဒၣ်ဒံးဧါ.”

²⁰ဖဲအဝဲသ့ၣ်ဟဲဆူယ့ၣ်ၡူးအအိၣ်န့ၣ်စံးဝဲ, “ပှၤဘျၢတၢ်စီၤယိၤဟၣ်ဆှၢလီၤပှၤဒ်သိးပကသံကွၢ် နမ့ၢ်နဲပှၤတဂၤလၢအဝဲဒၣ်စံးလၢအကဟဲန့ၣ်ဧါ. မ့တမ့ၢ်ဘၣ်ဒီး, မ့ၢ်ပကဘၣ်အိၣ်ခိးကွၢ်လၢ်ပှၤတဂၤဒၣ်ဒံးဧါ.”

²¹တကတီၢ်ဃီဖဲန့ၣ်, ယ့ၣ်ၡူးမၤဘျါက့ၤပှၤအါဒံအါဂၤလၢအအိၣ်ဒီး တၢ်ဆူးတၢ်ဆါတဖၣ်, ပှၤလၢအတူၢ်ဘၣ်တၢ်နးတၢ်ဖှီၣ်တဖၣ်, ပှၤလၢတၢ်နါအိၣ်လၢအလိၤတဖၣ်ဒီးဒုးထံၣ်ထီၣ်က့ၤပှၤမဲာ်ဘျီၣ်အါဂၤလီၤ.

²²အဝဲဒၣ်စံးဆၢက့ၤစီၤယိၤဟၣ်အပှၤဆှၢတၢ်ကစီၣ်တဖၣ်, “က့ၤဒီးတဲဘၣ်စီၤယိၤဟၣ်တၢ်လၢသုထံၣ်ဘၣ်ဒီးနၢ် ဟူဘၣ်တ့ၢ်သုဝဲန့ၣ်တက့ၢ်. ပှၤမဲာ်ဘျီၣ်တဖၣ်ထံၣ်ထီၣ်က့ၤတၢ်, ပှၤခီၣ်ဟးဂီၤတဖၣ်ဟးထီၣ်က့ၤဝဲသ့, ပှၤလိၤတဂ့ၤတဖၣ်ဘၣ်တၢ်မၤကဆှီထီၣ်က့ၤအီၤ, ပှၤနၢ်တအၢတဖၣ်နၢ်ဟူထီၣ်က့ၤတၢ်, ပှၤသံတဖၣ်ဘၣ်တၢ်ဒုးဂဲၤဆၢထၢၣ်သမူထီၣ်က့ၤအီၤ, ဒီးတၢ်သးခုကစီၣ်ဘၣ်တၢ်စံၣ်တဲၤတဲလီၤန့ၢ်ပှၤဖှီၣ်ဖိယာ်ဖိတဖၣ်လီၤ.

²³ပှၤလၢအသးတဒ့ဒီလၢယဂ့ၢ်တဖၣ်န့ၣ်, ဘၣ်ဆိၣ်ဂ့ၤဝဲဆံးဒိၣ်လဲၣ်.”

²⁴ဖဲစီၤယိၤဟၣ်အပှၤစိာ်တၢ်ကစီၣ်တဖၣ်ဟးထီၣ်ဝံၤအလီၢ်ခံန့ၣ်, ယ့ၣ်ၡူးကတိၤတၢ်ဒီးပှၤဂီၢ်မုၢ်ဘၣ်ဃးစီၤယိၤဟၣ်အဂ့ၢ်ဒီးစံးဝဲ, “ဖဲသုဟးထီၣ်ဆူပှၢ်မုၢ်ကနၢဆူစီၤယိၤဟၣ်အအိၣ်န့ၣ်, သုမုၢ်လၢ်လၢသုကထံၣ်ဘၣ်တၢ်မနုၤလဲၣ်. တပိၢ်တဘိဟူးဝးဝဲလၢကလံၤကျါန့ၣ်ဧါ.

²⁵သုဟးထီၣ်လၢသုကထံၣ်ဘၣ်တၢ်မနုၤတမံၤအဂီၢ်လဲၣ်. ပှၤကညီလၢအကူတၢ်သိးတၢ်ဆှုၣ်ဆှုၣ်ဘှဲၣ်ဘှဲၣ်တဂၤဧါ. သပှၢ်ကတၢၢ်, ပှၤလၢအကူအကၤဒ်န့ၣ်အသိးဒီးအိၣ်မူလၢတၢ်မုာ်တၢ်လၤအပူၤတဖၣ်န့ၣ်, ဘၣ်တၢ်ထံၣ်အီၤလၢနူၢ်ပူၤစီၤပူၤလီၤ.

²⁶စံးဘၣ်တဲဘၣ်ယၤတက့ၢ်. သုဟးထီၣ်လၢသုကထံၣ်မနုၤတမံၤအဂီၢ်လဲၣ်. ဝံတဂၤဧါ. မ့ၢ်လီၤ. ယစံးဘၣ်သုလၢသုထံၣ်ဘၣ်ပှၤလၢအဒိၣ်န့ၢ်ဝံတဂၤ တက့ၢ်လီၤ.

²⁷စီၤယိၤဟၣ်မ့ၢ်ပှၤတဂၤလၢတၢ်ကွဲးအသးစံးဝဲလၢအဂ့ၢ်ဒ်အံၤ, ‘ကစၢ်ယွၤစံးဝဲ အဝဲအံၤမ့ၢ်ယပှၤဆှၢတၢ်ကစီၣ်, လၢယဆှၢလီၤအီၤလၢနမဲာ်ညါ ဒ်သိးအကအိးဟိထီၣ်ပာ်ကျဲလၢနဂီၢ်လီၤ.’ ”

²⁸ယ့ၣ်ၡူးစံးကဒီးဝဲ, “ယစံးဘၣ်တဲဘၣ်သု, စီၤယိၤဟၣ်ဒိၣ်န့ၢ်ပှၤလၢ အအိၣ်ဖျဲၣ်ထီၣ်တ့ၢ်ဝဲတဂၤလၢ်လၢ်လီၤ. ဘၣ်ဆၣ်ဒီး, ပှၤလၢအဆံးကတၢၢ် လၢကစၢ်ယွၤအဘီအမုၢ်အပူၤန့ၣ် ဒိၣ်န့ၢ်အီၤတက့ၢ်လီၤ.”

²⁹ပှၤဂီၢ်မုၢ်ခဲလၢာ်, ဒီးပှၤဃ့သွဲတဖၣ်နၢ်ဟူဘၣ်အဝဲအတၢ်စံးတၢ်ကတိၤလီၤ. အဝဲသ့ၣ်မ့ၢ်ပှၤတဖၣ်လၢအစူၢ်တ့ၢ်ကစၢ်ယွၤအတၢ်မၤလိာ်အတီအလိၤတဖၣ် ဒီးဘၣ်တၢ်ဘျၢတ့ၢ်အီၤလၢစီၤယိၤဟၣ်န့ၣ်လီၤ.

³⁰မ့မ့ၢ်, ပှၤဖၤရံၤၡဲဒီးသရၣ်သိၣ်လိတၢ်သိၣ်တၢ်သီတဖၣ်တကနၣ်ဃုာ် ကစၢ်ယွၤအတၢ်တိာ်ပာ်လၢအဝဲသ့ၣ်အနီၢ်ကစၢ်ဒၣ်ဝဲအဂီၢ်ဘၣ်. ဒီးတတူၢ်လိာ်စီၤယိၤဟၣ်အတၢ်ဘျၢအီၤလၢထံဘၣ်လီၤ.

³¹ခဲကနံၣ်အံၤ, ယကထိၣ်သတြီၤပှၤဂီၢ်မုၢ်လၢမုၢ်မဆါတနံၤအံၤတဖၣ်လၢ မနုၤတမံၤလဲၣ်. အဝဲသ့ၣ်လီၤဂာ်ဒီးတၢ်မနုၤတမံၤလဲၣ်.

³²အဝဲသ့ၣ်လီၤဂာ်ဒီးပှၤဖိသၣ်တဖၣ်လၢအဆ့ၣ်နီၤလၢဖၠါပူၤန့ၣ်လီၤ. အဝဲတဖုကိးပသူဃီၤဝဲဆူအဂၤတဖုအအိၣ်, ‘ပအူတၢ်ဖျီအတၢ်သးဝံၣ်လၢသုဂီၢ်, ဘၣ်ဆၣ်ဒီးသုတဂဲၤကလံၣ်ဘၣ်. ပသးဝံၣ်တၢ်သံအတၢ်သးဝံၣ်, ဘၣ်ဆၣ်ဒီးသုတဟီၣ်တယၢၤဘၣ်.’

³³ပှၤဘျၢတၢ်စီၤယိၤဟၣ်ဟဲဝဲ, ဒီးအဝဲဒၣ်ဒုၣ်တၢ်အီၣ် ဒီးတအီစပံးထံဘၣ်. ဒီးသုစံးသုဝဲ, ‘တၢ်နါအိၣ်လၢအဝဲအပူၤလီၤ.’

³⁴ပှၤကညီဖိခွါဟဲဝဲ, အီၣ်တၢ်ဒီးအီတၢ်ဒီးသုစံး, ‘ကွၢ်ပှၤတဂၤအံၤတက့ၢ်. အဝဲမ့ၢ်ပှၤအီၣ်လုၣ်ကိတၢ်ဒီးပှၤအီစပံးထံ, ပှၤဃ့သွဲဒီးပှၤတၢ်ဒဲးဘးဖိတဖၣ်အတံၤသကိးလီၤ.’

³⁵ဘၣ်ဆၣ်သနာ်က့ဒီးကစၢ်ယွၤအတၢ်ကူၣ်ဘၣ်ကူၣ်သ့န့ၣ်, ဘၣ်တၢ်ပာ်ဖျါထီၣ်အီၤလၢအမ့ၢ်ဝဲတီဝဲလၢပှၤတဂၤလၢ်လၢ်လၢ အတူၢ်လိာ်အီၤန့ၣ်လီၤ.”

³⁶ပှၤဖၤရံၤၡဲတဂၤကွဲယ့ၣ်ၡူးဒ်သိးအကအီၣ်ဟါအတၢ်အီၣ်ဒီးအီၤလီၤ. ယ့ၣ်ၡူးလဲၤဆူအဝဲဒၣ်အဟံၣ်, ဒီးဆ့ၣ်နီၤဒ်သိးအကအီၣ်တၢ်လီၤ.

³⁷ဖဲဝ့ၢ်အဝဲန့ၣ်အပူၤပှၤပိာ်မုၣ်အိၣ်ဝဲဒၣ်တဂၤ, လၢအအိၣ်မူလၢတၢ်ဒဲးဘးအပူၤန့ၣ်လီၤ. အဝဲဒၣ်နၢ်ဟူလၢယ့ၣ်ၡူးအီၣ်တၢ်လၢပှၤဖၤရံၤၡဲတဂၤန့ၣ်အ ဟံၣ်, သတးဒီးဟဲစိာ်ဝဲပလီလၢၢ်ဝါတဖျၢၣ်လၢအပှဲၤဒီးထံနၢမူ

³⁸ဒီးဆၢထၢၣ်လၢယ့ၣ်ၡူးအလီၢ်ခံဖဲအခီၣ်ထံး, ဟီၣ်ဝဲ, ဒီးမၤဘၣ်စီၣ်ယ့ၣ်ၡူးအခီၣ်လၢအဝဲဒၣ်အမဲာ်ထံလီၤ. အန့ၣ်ဝံၤဒီးထွါကွံာ်ယ့ၣ်ၡူးအခီၣ်လၢအဝဲဒၣ်အခိၣ်သူ, နၢမူဝဲ, ဒီးလူလီၤထံနၢမူန့ၣ်လၢအလိၤလီၤ.

³⁹ဖဲပှၤဖၤရံၤၡဲလၢအကွဲယ့ၣ်ၡူးတဂၤထံၣ်တၢ်တမံၤအံၤန့ၣ်, အဝဲဒၣ်ဆိကမိၣ်ဝဲလၢအသးပူၤ, “ပှၤတဂၤအံၤမ့မ့ၢ်စဲဃဲၤဝံတဂၤန့ၣ်, အဝဲဒၣ်ကသ့ၣ်ညါပိာ်မုၣ်လၢအထိးအီၤတဂၤအံၤမ့ၢ်မတၤလဲၣ်န့ၣ်လီၤ. ပိာ်မုၣ်တဂၤအံၤအိၣ်မူတ့ၢ်တၢ်ဒဲးဘးအတၢ်အိၣ်မူဒ်လဲၣ် တကလုာ်န့ၣ်အဝဲဒၣ်ကသ့ၣ်ညါဝဲလီၤ.”

⁴⁰ယ့ၣ်ၡူးကတိၤထီၣ်တၢ်ဒီးစံးဘၣ်အီၤ, “စီၤၡံမိၣ်ဧၢ, ယသးအိၣ်စံးဘၣ်နၤတၢ်တမံၤလီၤ.” အဝဲစံးဝဲ, “မ့ၢ်, သရၣ်ဧၢ, စံးဘၣ်ယၤတက့ၢ်.”

⁴¹ယ့ၣ်ၡူးကတိၤထီၣ်တၢ်ဒီးစံးဝဲ, “ပှၤအိၣ်ဝဲဒၣ်ခံဂၤလၢ အကမၢ်အိၣ်လၢအကဘၣ်လိးက့ၤပှၤဟ့ၣ်လိၢ်တိၢ်တဂၤလီၤ. ပှၤတဂၤန့ၣ်အကမၢ်အိၣ်စ့ဒန့ၤရံယဲၢ်ကယၤဒီးအဂၤတဂၤန့ၣ် အကမၢ်အိၣ်ဒန့ၤရံယဲၢ်ဆံလီၤ.

⁴²အဝဲသ့ၣ်လိးက့ၤအကမၢ်လၢအအိၣ်တန့ၢ်နီတဂၤဘၣ်. လၢတၢ်န့ၣ်အဃိ အဝဲဒၣ်ပျၢ်ကလီကွံာ်အဝဲသ့ၣ်ခံဂၤလၢာ်အကမၢ်လီၤ. မ့မ့ၢ်ဒ်န့ၣ်ဒီး, ဖဲလဲၣ်တဂၤကအဲၣ်အီၤဒိၣ်ဒၣ်တၢ်တက့ၢ်လဲၣ်.”

⁴³စီၤၡံမိၣ်စံးဆၢအီၤ, “ယဆိကမိၣ်, ကမ့ၢ်ပှၤလၢအဝဲပျၢ်ကွံာ်အကမၢ်အအါကတၢၢ်တဂၤလီၤ.” ယ့ၣ်ၡူးစံးဘၣ်အီၤ, “နတၢ်စံးဆၢဘၣ်ကစီဒီလီၤ.”

⁴⁴တုၤနုၤတစုယ့ၣ်ၡူးဃၣ်ဃီၤအသးဆူပိာ်မုၣ်အအိၣ်ဒီးစံးဘၣ်စီၤၡံမိၣ်, “နထံၣ်ပိာ်မုၣ်တဂၤအံၤကစီဒီဧါ. ယဟဲနုာ်ဆူနဟံၣ်ပူၤဒီး နတဟ့ၣ်ယၤထံလၢယခီၣ်အဂီၢ်နီတစဲးဘၣ်. မ့မ့ၢ်အဝဲဒၣ်သ့ကွံာ်ယခီၣ်လၢအမဲာ်ထံ, ဒီးတြူာ်သူထီၣ်က့ၤဝဲလၢအခိၣ်သူလီၤ.

⁴⁵နတတူၢ်လိာ်ခီၣ်ဆၢယၤလၢတၢ်နၢမူနီတဘီဘၣ်. မ့မ့ၢ်အဝဲဒၣ်န့ၣ်, စးထီၣ်လၢယဟဲနုာ်လီၤလံၤလံၤ တဆိကတီၢ်အတၢ်နၢမူယခီၣ်ဘၣ်.

⁴⁶နတဖှူယခိၣ်လၢသိနီတစဲးဘၣ်. မ့မ့ၢ်အဝဲဒၣ်လူလီၤသိနၢမူလၢယခီၣ်တဖၣ်အလိၤလီၤ.

⁴⁷လၢတၢ်န့ၣ်အဃိယစံးဘၣ်နၤ, တၢ်အဲၣ်အဒိၣ်အအါလၢအဝဲဒၣ်ပာ်ဖျါတ့ၢ်ဝဲအံၤ, ဟ့ၣ်တၢ်အုၣ်အသးလၢအဝဲအတၢ်ဒဲးဘးအဒိၣ်အမုၢ်တဖၣ် ဘၣ်တၢ်ပျၢ်ကွံာ်အီၤလံန့ၣ်လီၤ. မ့မ့ၢ်ပှၤလၢအတၢ်ဒဲးဘး ဘၣ်တၢ်ပျၢ်ကွံာ်ဒၣ်အီၤထဲတစဲးဖိတဂၤန့ၣ်, ပာ်ဖျါဒၣ်တၢ်အဲၣ်တစဲးဧိၤလီၤ.

⁴⁸အန့ၣ်ဝံၤဒီးယ့ၣ်ၡူးစံးဘၣ်ပိာ်မုၣ်တဂၤန့ၣ်, “နတၢ်ဒဲးဘးတဖၣ်ဘၣ်တၢ်ပျၢ်ကွံာ်အီၤလံ.”

⁴⁹ပှၤလၢအဆ့ၣ်နီၤသန့ၤဃုာ်လၢတၢ်အီၣ်အစီၢ်နီၤခိၣ်တဖၣ်စံးလိာ်အသး သကိးသကိး, “ပှၤလၢအပျၢ်ကွံာ်ဒၣ်လဲာ်တၢ်ဒဲးဘးတဂၤအံၤ, မ့ၢ်မတၤတဂၤလဲၣ်.”

⁵⁰ဘၣ်ဆၣ်ဒီးယ့ၣ်ၡူးစံးဘၣ်ပိာ်မုၣ်တဂၤန့ၣ်, “နတၢ်စူၢ်တၢ်နာ်အုၣ်က့ၤခီၣ်က့ၤနၤလံ. က့ၤက့ၤနဲလၢတၢ်သူၣ်မုာ်သးမုာ်အပူၤတက့ၢ်.”