Read S'gaw Karen လံာ်လူၤကၣ် 8 Bible Online

လံာ်လူၤကၣ် 8 - S'gaw Karen bible

လံာ်လူၤကၣ် 8

¹တၢ်မၤအသးဝံၤအလီၢ်ခံတစိၢ်တလီၢ်န့ၣ်, ယ့ၣ်ၡူးလဲၤတၢ်ဒီးခီဂာ်ဝ့ၢ်တဖၣ်ဒီးသဝီတဖၣ်, ဒီးစံၣ်တဲၤတဲလီၤတၢ်သးခုအကစီၣ်ဘၣ်ဃးကစၢ်ယွၤ အဘီအမုၢ်လီၤ. ပှၤတၢ်မၢဖိတဆံခံဂၤလဲၤဃုာ်ဒီးအီၤ,

²ဒီးပိာ်မုၣ်တနီၤလၢယ့ၣ်ၡူးမၤဘျါတ့ၢ်အီၤလၢတၢ်ဝံတၢ်နါဒီး တၢ်ဆူးတၢ်ဆါတဖၣ်, နီၢ်မၤရံ (လၢအဘၣ်တၢ်ကိးစ့ၢ်ကီးအီၤလၢပှၤမၤကဒါလၣ်ဖိ) လၢတၢ်နါနွံဒုဘၣ်တၢ်ဟီထီၣ်ကွံာ်လၢအပူၤ,

³စီၤဃူၤစါလၢအကွၢ်ထွဲစီၤပၤအတၢ်ဖိတၢ်လံၤလၢ စီၤပၤဟ့ၤရိာ်အနီပူၤတဂၤအမါနီၢ်ယိၤအၣ်နၣ်, ဒီးနီၢ်စူၤစၣ်နၤဒီးပိာ်မုၣ်အဂၤအါဒံအါဂၤလၢ အသူအတၢ်စုလီၢ်ခီၣ်ခိၣ်ဒၣ်ဝဲလၢအကမၤစၢၤယ့ၣ်ၡူးဒီး အပျဲၢ်အဘီၣ်တဖၣ်, ပိာ်အဝဲဒၣ်အခံစ့ၢ်ကီးလီၤ.

⁴ပှၤဂီၢ်မုၢ်တဖၣ်ဟဲဆူယ့ၣ်ၡူးအအိၣ်တဘိယူၢ်ဃီလၢဝ့ၢ် တဝ့ၢ်ဝံၤတဝ့ၢ်ဒီးဖဲပှၤဂီၢ်မုၢ်ဖးဒိၣ်အိၣ်ပာ်ဖှိၣ်အသးန့ၣ်, ယ့ၣ်ၡူးကတိၤတၢ်ကတိၤဒိတထံၣ်အံၤလီၤ.

⁵“ပှၤတဂၤလဲၤဖှံလီၤတၢ်အချံလီၤ. ဖဲအဝဲဒၣ်ဖှံတၢ်ချံလၢစံာ်ပျီပူၤန့ၣ်, တနီၤလီၤဘၣ်လၢကျဲလိၤ, တၢ်ယီၢ်တံၢ်အီၤ, ဒီးထိၣ်တဖၣ်အီၣ်ကွံာ်အီၤလီၤ.

⁶တနီၤလီၤဘၣ်လၢလၢၢ်ခိၣ်, ဒီးဖဲတၢ်မုၢ်တၢ်ဘိတဖၣ်မဲထီၣ်န့ၣ်, မ့ၢ်လၢဟီၣ်ခိၣ်တစုၣ်စီၣ်ဘၣ်အဃိ, အဝဲသ့ၣ်ဃ့ထီကွံာ်ဝဲဒၣ်လီၤ.

⁷အဂၤတနီၤလီၤဘၣ်ဝဲလၢတၤဆှုၣ်တၤမဲအကျါဒီးမ့ၢ် အဒိၣ်ထီၣ်ဃုာ်တပူၤဃီဒီးခဲဘၢကွံာ်အီၤအဃိသံကွံာ်ဝဲဒၣ်လီၤ.

⁸ဒီးတၢ်ချံတနီၤနီၤလီၤဘၣ်လၢဟီၣ်ခိၣ်ညၣ်ထ့ၣ်ဂ့ၤအလီၢ်လီၤ. တၢ်မုၢ်တၢ်ဘိတဖၣ်ဒိၣ်ထီၣ်ဒီးသၣ်ထီၣ်တၤသၣ်တကယၤစုာ်စုာ် လီၤ.” ဒီးယ့ၣ်ၡူးမၤကတၢၢ်အတၢ်ကတိၤဒီးစံးဝဲ, “လၢတၢ်န့ၣ်အဃိ, ပှၤအိၣ်ဒီးအနၢ်လၢအနၢ်ဟူတၢ်သ့န့ၣ်မ်အဒိကနၣ်တၢ်တက့ၢ်.”

⁹ယ့ၣ်ၡူးအပျဲၢ်အဘီၣ်တဖၣ်သံကွၢ်အီၤလၢတၢ် ကတိၤဒိတထံၣ်အံၤအခီပညီမ့ၢ်တၢ်မနုၤလဲၣ်န့ၣ်လီၤ.

¹⁰ယ့ၣ်ၡူးစံးဆၢဝဲ, “တၢ်သ့ၣ်ညါနၢ်ပၢၢ်ဘၣ်ဃးဒီးကစၢ်ယွၤအဘီအမုၢ်အတၢ် ခူသူၣ်န့ၣ်, တၢ်ဟ့ၣ်တ့ၢ်လံအီၤလၢသုဝဲလံ. မ့မ့ၢ်ပှၤအဂၤတဖၣ်န့ၣ်, တၢ်ပာ်ဖျါထီၣ်အီၤခီဖျိတၢ်ကတိၤဒိဒ်သိး အဝဲသ့ၣ်ကကွၢ်တၢ်ဘၣ်ဆၣ်တထံၣ်တၢ်ဘၣ်, ဒီးကဒိကနၣ်တၢ်ဘၣ်ဆၣ်တနၢ်ပၢၢ်တၢ်ဘၣ်န့ၣ်လီၤ.”

¹¹တၢ်ကတိၤဒိတထံၣ်အံၤအခီပညီမ့ၢ်ဝဲဒ်အံၤ, တၢ်ချံမ့ၢ်ဝဲကစၢ်ယွၤအကလုၢ်ကထါလီၤ.

¹²တၢ်ချံလၢအလီၤဘၣ်လၢကျဲလိၤပာ်ဖျါထီၣ်ပှၤတဖၣ်လၢအနၢ် ဟူဘၣ်တၢ်, ဘၣ်ဆၣ်မုၣ်ကီၤလံၢ်ဟဲဒီးဟံးထီၣ်ကွံာ်တၢ်အကလုၢ် ကထါလၢအဝဲသ့ၣ်တဖၣ်အသးကံၢ်ပူၤ, ဒ်သိးအကတြီအဝဲသ့ၣ်လၢအသုတစူၢ်က့ၤနာ်က့ၤတၢ်ဒီး ဒိးန့ၢ်ဘၣ်တၢ်အုၣ်က့ၤခီၣ်က့ၤတဂ့ၤအဂီၢ်န့ၣ်လီၤ.

¹³တၢ်ချံလၢအလီၤလၢလၢၢ်ခိၣ်ပာ်ဖျါထီၣ်ပှၤတဖၣ်လၢအနၢ်ဟူ ဘၣ်တၢ်အကလုၢ်ကထါဒီးတူၢ်လိာ်ဝဲလၢတၢ်သးခုအပူၤလီၤ. ဘၣ်ဆၣ်မၤအသးဒ်တၢ်ချံလၢအဂံၢ်တအိၣ်သူၣ်လီၤအသး ယိာ်ယိာ်ဘၣ်န့ၣ်လီၤ. အဝဲသ့ၣ်စူၢ်တၢ်နာ်တၢ်ထဲတစိၢ်ဖိဧိၤ, ဒီးဖဲတၢ်မၤကွၢ်အဆၢကတီၢ်ဟဲန့ၣ်, အဝဲသ့ၣ်လီၤဃံၤကွံာ်ဝဲလီၤ.

¹⁴တၢ်ချံလၢအလီၤဘၣ်လၢတၤဆှုၣ်တၤမဲအလိၤပာ်ဖျါထီၣ်ပှၤတဖၣ်လၢ အနၢ်ဟူဘၣ်တၢ်အကလုၢ်ကထါဘၣ်ဆၣ်, တၢ်သူၣ်ကိၢ်သးဂီၤ, တၢ်ထူးတၢ်တီၤဒီးတၢ်အိၣ်မူအအံၤတဃၣ် အတၢ်မုာ်တၢ်ပၢၤတဖၣ်နုာ်လီၤခဲဘၢကွံာ်အဝဲသ့ၣ်ဒ်တၤဆှုၣ် တၤမဲအသိး, ဒီးမၤအသးဒ်တၢ်မုၢ်တၢ်ဘိလၢအသၣ်တမံလၢၤနီတစုဘၣ်အသိးန့ၣ်လီၤ.

¹⁵တၢ်ချံလၢအလီၤဘၣ်လၢဟီၣ်ခိၣ်ညၣ်ထ့ၣ်အဂ့ၤပာ်ဖျါထီၣ်ပှၤ တဖၣ်လၢအနၢ်ဟူဘၣ်တၢ်အကလုၢ်ကထါဒီးဟံးဃာ်ဂၢၢ်ကျၢၤ ဝဲလၢသးလၢအဂ့ၤဒီးစူၢ်ယွၤအကလုၢ်အပူၤဒီးမၤဝဲဒ်န့ၣ်သပှၢ် ပှၢ်တုၤအဝဲသ့ၣ်သၣ်ထီၣ်တၤသၣ်တစုလီၤ.

¹⁶ပှၤတဒွဲၣ်ထီၣ်မ့ၣ်အူဒၢဒီးကျၢၢ်ဘၢအီၤလၢတၢ်တမံၤမံၤ, မ့တမ့ၢ်ပာ်အီၤလၢလီၢ်မံခးအဖီလာ်နီတဂၤဘၣ်. မ့မ့ၢ်တခီပှၤပာ်အီၤလၢမ့ၣ်အူဒၢအလီၢ်, ဒ်သိးပှၤဟဲနုာ်တဖၣ်ကထံၣ်ဘၣ်တၢ်ကပီၤအဂီၢ်လီၤ.

¹⁷တၢ်တမံၤလၢ်လၢ်လၢအဘၣ်တၢ်ပာ်ခူသူၣ်အီၤန့ၣ်, ကဘၣ်တၢ်ဒုးအိၣ်ဖျါထီၣ်အီၤလၢခိဒီးတၢ်တမံၤလၢ်လၢ်လၢ အဘၣ်တၢ်မၤဘံၣ်မၤဘၢဃာ်အီၤန့ၣ်, ကဘၣ်တၢ်ထံၣ်န့ၢ်ဒီးလီၣ်ဖျါထီၣ်အီၤန့ၣ်လီၤ.

¹⁸လၢတၢ်န့ၣ်အဃိ, သုနၢ်ဟူတၢ်ဒ်လဲၣ်ဒ်လဲၣ်န့ၣ်, ပလီၢ်သုသးတက့ၢ်. အဂ့ၢ်ဒ်အံၤ, ပှၤတဂၤလၢ်လၢ်လၢအတၢ်အိၣ်ဝဲတမံၤမံၤန့ၣ်, တၢ်ကဟ့ၣ်အါထီၣ်အီၤ, မ့မ့ၢ်ပှၤတဂၤလၢ်လၢ်လၢအတၢ်တအိၣ်နီတမံၤန့ၣ်, တၢ်လၢအဝဲဒၣ်ဆိကမိၣ်လၢအအိၣ်ဒီးအီၤတစဲးဖိဒၣ်လဲာ်, တၢ်ကဟံးထီၣ်ကွံာ်လၢအအိၣ်လီၤ.”

¹⁹ယ့ၣ်ၡူးအမိၢ်ဒီးအဒီပုၢ်ဝဲၢ်တဖၣ်ဟဲဆူအအိၣ်, ဘၣ်ဆၣ်လဲၤတုၤဃီၤဆူအအိၣ်တသ့ဘၣ်. မ့ၢ်လၢပှၤအိၣ်ဝဲအါမးအဃိလီၤ.

²⁰ပှၤတဂၤစံးဘၣ်ယ့ၣ်ၡူး, “နမိၢ်ဒီးနဒီပုၢ်ဝဲၢ်ခွါတဖၣ်အိၣ်ဆၢထၢၣ်လၢတၢ်ချၢ ဒီးအဲၣ်ဒိးထံၣ်နၤလီၤ.”

²¹ယ့ၣ်ၡူးစံးဘၣ်အဝဲသ့ၣ်ကိးဂၤဒဲး, “ယမိၢ်ဒီးယဒီပုၢ်ဝဲၢ်ခွါတဖၣ်မ့ၢ်ဝဲပှၤသ့ၣ်တဖၣ်လၢ အနၢ်ဟူကစၢ်ယွၤအကလုၢ်ကထါဒီးစူၢ်ဝဲန့ၣ်လီၤ.”

²²ဘၣ်တနံၤန့ၣ်ယ့ၣ်ၡူးလဲၤနုာ်ဒီးအပျဲၢ်အဘီၣ်တဖၣ်ဆူချံ တဘ့ၣ်အပူၤဒီးစံးဘၣ်အဝဲသ့ၣ်, “မ်ပကလဲၤခီဂာ်သကိးဆူနိၣ်အဝၢ်ဘးခီတက့ၢ်.” ဒီးအဝဲသ့ၣ်လဲၤဝဲလီၤ.

²³ဖဲအဝဲသ့ၣ်လဲၤတၢ်လၢချံပူၤအဖၢမုၢ်န့ၣ်, ယ့ၣ်ၡူးမံဘၣ်အသးလီၤ. ကလံၤမုၢ်လီၤလၢနိၣ်ပူၤဒီးထံနုာ်လီၤပှဲၤချံအကိပူၤ, ဒီးအဝဲသ့ၣ်ကိးဂၤဒဲးအိၣ်လၢတၢ်ဘၣ်ယိၣ်ဘၣ်ဘီဖးဒိၣ်အပူၤလီၤ.

²⁴အပျဲၢ်အဘီၣ်တဖၣ်လဲၤဆူယ့ၣ်ၡူးအအိၣ်ဒီးကိးပၢၢ်ထီၣ်အီၤဒီးစံးဝဲ, “ကစၢ်ဧၢ, ကစၢ်ဧၢ, ပကသံလီၤ.” ယ့ၣ်ၡူးဂဲၤဆၢထၢၣ်ဒီးခါလီၤအကလုၢ်လၢကလံၤဒီးလပီတဖၣ် အလိၤ, အဝဲသ့ၣ်အိၣ်ဘှ့ၣ် က့ၤဝဲဒီးတၢ်အိၣ်က့ၤမးဝဲ ဂၢၢ်တပၢၢ်လီၤ.

²⁵တုၤနုၤတစုအဝဲဒၣ်စံးဘၣ်အပျဲၢ်အဘီၣ်တဖၣ်, “သုတၢ်စူၢ်တၢ်နာ်အိၣ်ဖဲလဲၣ်.” ဘၣ်ဆၣ်ဒီးအဝဲသ့ၣ်ကမၢကမၣ်ဒီးပျံၤတၢ်ဖုးတၢ်ဒီးစံးလိာ် အသးတဂၤဒီးတဂၤ, “ပှၤတဂၤအံၤမ့ၢ်မတၤလဲၣ်. အဝဲဒၣ်ခါလီၤအကလုၢ်လၢကလံၤဒီးလပီတဖၣ်အလိၤ, ဒီးအဝဲသ့ၣ်စူၢ်အကလုၢ်မးလဲၣ်.”

²⁶အဝဲသ့ၣ်လဲၤ, ဒီးခီဂာ်ဆူကီၢ်ကဒါရၤလၢအအိၣ်ဖဲကီၢ်ကၤလံၤလါ အဝၢ်ဘးခီလီၤ.

²⁷ဖဲယ့ၣ်ၡူးစံၣ်လီၤလၢထံကၢၢ်ခိၣ်န့ၣ်, အဝဲဒၣ်ဘၣ်တၢ်သဂၢၢ်အီၤလၢပှၤဝ့ၢ်ဖိဖဲန့ၣ်တဂၤ လၢတၢ်နါတဖၣ်အိၣ်လၢအလိၤန့ၣ်လီၤ. အဝဲဒၣ်တကူတသိးတၢ်လၢအလိၤန့ၣ်ယံာ်တ့ၢ်လံ, ဒီးတအိၣ်လၢဟံၣ်ဘၣ်. မ့မ့ၢ်အိၣ်ဒၣ်ဝဲဖဲတၢ်သွၣ်ခိၣ်အတၢ်ကအိပူၤတဖၣ်န့ၣ်လီၤ.

²⁸ဖဲအဝဲဒၣ်ထံၣ်ယ့ၣ်ၡူးန့ၣ်ကိးထီၣ်ဝဲလၢအကလုၢ်ဖးဒိၣ်, ထိၣ်လီၤပှီၤအသးလၢအမဲာ်ညါ, ဒီးကတိၤတၢ်လၢအကလုၢ်ဖးဒိၣ်, “တၢ်ထီကတၢၢ်ကစၢ်ယွၤအဖိခွါယ့ၣ်ၡူးဧၢ, နဘၣ်ဃးဒီးယၤဒ်လဲၣ်. ယဃ့ကညးနၤ, တဘၣ်စံၣ်ညီၣ်ယၤတဂ့ၤ.”

²⁹အဝဲဒၣ်စံးတၢ်အံၤန့ၣ်, မ့ၢ်လၢယ့ၣ်ၡူးဟီထီၣ်ကွံာ်တ့ၢ်လံတၢ်နါဒ်သိး အကဟးထီၣ်ကွံာ်လၢအလိၤအဃိန့ၣ်လီၤ. တၢ်နါအံၤဖီၣ်ဃာ်တ့ၢ်အီၤအါစုအါဘျီ, ဒီးအဝဲဒၣ်အစုအခီၣ်ဘၣ်တၢ်စၢဃာ်အီၤလၢထးသွဲသနာ်က့ ဖ့ၣ်တဲာ်ကွံာ်ဝဲဒီးဘၣ်တၢ်နီၣ်ဟးထီၣ်ကွံာ်အီၤလၢ တၢ်နါအဝဲန့ၣ်ဆူပှၢ်မုၢ်ကနၢအပူၤလီၤ.

³⁰ယ့ၣ်ၡူးသံကွၢ်အီၤ, “နမံၤဒ်လဲၣ်.” အဝဲစံးဆၢဝဲ, “ယမံၤမ့ၢ်လ့းကူၣ်,” အဂ့ၢ်မ့ၢ်လၢတၢ်နါအါဒုလဲၤနုာ်တ့ၢ်လံလၢအပူၤအဃိန့ၣ်လီၤ.

³¹တၢ်နါတဖၣ်ဃ့ကညးယ့ၣ်ၡူးဒ်သိးအသုတဒုးလဲၤလီၤ အဝဲသ့ၣ်ဆူတၢ်ယိာ်ပူၤတဂ့ၤအဂီၢ်န့ၣ်လီၤ.

³²ထိးတဖုတဂီၢ်အီၣ်အဆၣ်ဘူးဘူးတံၢ်တံၢ်ဖဲတၢ်လူၢ်ကပၤလီၤ. တၢ်နါတဖၣ်ဃ့ကညးယ့ၣ်ၡူးလၢအကပျဲအဝဲသ့ၣ်လဲၤနုာ်ဆူ ထိးတဖုန့ၣ်အပူၤဒီးအဝဲဒၣ်ပျဲအဝဲသ့ၣ်လီၤ.

³³လၢတၢ်န့ၣ်အဃိတၢ်နါတဖၣ်ဟးထီၣ်ကွံာ်လၢပှၤတဂၤန့ၣ် အလိၤဒီးလဲၤနုာ်လၢထိးတဖုန့ၣ်အပူၤလီၤ. ထိးဒီဖုညါဃ့ၢ်သဖှိလီၤလၢလ့ကပၤဆူနိၣ်ပူၤဒီးလီၤအုးသံကွံာ်လီၤ.

³⁴ပှၤကွၢ်ထိးတဖၣ်ထံၣ်တၢ်လၢအမၤအသးလီၤ. သတးဒီးအဝဲသ့ၣ်က့ၤဃ့ၢ်ဝဲဒီး ဒုးဟူထီၣ်သါလီၤတၢ်ကစီၣ်န့ၣ်လၢဝ့ၢ်ပူၤဒီးလၢခိခိၣ်ဒူသဝီတဖၣ်အပူၤလီၤ.

³⁵ပှၤဂီၢ်မုၢ်တဖၣ်ဟးထီၣ်ဒ်သိးအကထံၣ်ဘၣ်တၢ်လၢအမၤတ့ၢ်အသး တဖၣ်လီၤ. အဝဲသ့ၣ်ဟဲဆူယ့ၣ်ၡူးအအိၣ်ဒီးထံၣ်ဘၣ်ပှၤတဂၤလၢ တၢ်နါတဖၣ်ဟးထီၣ်ကွံာ်လၢအလိၤ, ဆ့ၣ်နီၤဖဲယ့ၣ်ၡူးအခီၣ်ထံး, အိၣ်ဒီးတၢ်ကူတၢ်သိးလၢအလိၤ, အိၣ်ဒီးအသးလၢအဘၣ်လီၢ်ဘၣ်စး, ဒီးအဝဲသ့ၣ်ပျံၤတၢ်ကိးဂၤဒဲးလီၤ.

³⁶ပှၤလၢအထံၣ်ဘၣ်တ့ၢ်ဝဲတၢ်မၤအသးတဖၣ်စံးဘၣ် တဲဘၣ်ပှၤဂီၢ်မုၢ်လၢပှၤလၢတၢ်နါဒိးတ့ၢ်အီၤတဂၤ ဘၣ်တၢ်မၤဘျါက့ၤအီၤလၢကျဲဒ်လဲၣ်အဂ့ၢ်န့ၣ်လီၤ.

³⁷တုၤနုၤတစုပှၤဂီၢ်မုၢ်လၢအအိၣ်ဖဲကီၢ်ကဒါရၤအခိၣ်အဃၢၤ တဖၣ်ခဲလၢာ်မၢယ့ၣ်ၡူးဟးထီၣ်ကွံာ်, အဂ့ၢ်မ့ၢ်လၢအဝဲသ့ၣ်ပျံၤတၢ်ဖုးတၢ်နးနးကလဲာ်အဃိလီၤ. သတးဒီးယ့ၣ်ၡူးနုာ်လီၤဆူချံပူၤဒီးဟးထီၣ်ကွံာ်ဝဲဒၣ်လီၤ.

³⁸ပှၤလၢတၢ်နါဟးထီၣ်ကွံာ်တ့ၢ်ဝဲလၢအလိၤတဂၤန့ၣ်ဃ့ ကညးယ့ၣ်ၡူးဒီးစံး, “ပျဲယလဲၤဒီးနၤတက့ၢ်.” ဘၣ်ဆၣ်ဒီးယ့ၣ်ၡူးပျၢ်ကွံာ်အီၤဒီးစံးဝဲ,

³⁹“က့ၤက့ၤဆူနဟံၣ်ဒီးဘိးဘၣ်သ့ၣ်ညါပှၤဂၤတဖၣ်လၢ ကစၢ်ယွၤမၤတ့ၢ်တၢ်လၢနဂီၢ်ဒ်လဲၣ်န့ၣ်တက့ၢ်.” ပှၤတဂၤန့ၣ်လဲၤလၢဝ့ၢ်ဒီဝ့ၢ်ညါဒီးစံးဘၣ်တဲဘၣ်ပှၤလၢ ယ့ၣ်ၡူးမၤတ့ၢ်တၢ်လၢအဂီၢ်ဒ်လဲၣ်အဂ့ၢ်န့ၣ်လီၤ.

⁴⁰ဖဲယ့ၣ်ၡူးက့ၤကဒါက့ၤဆူနိၣ်အဝၢ်ဘးခီတကပၤန့ၣ်, ပှၤဂီၢ်မုၢ်တူၢ်လိာ်ခီၣ်ဆၢအီၤ, အဂ့ၢ်မ့ၢ်လၢအဝဲသ့ၣ်အိၣ်ခိးကွၢ်လၢ်တ့ၢ်အကျဲအဃိန့ၣ်လီၤ.

⁴¹ဖဲန့ၣ်, ပှၤတဂၤလၢအမံၤမ့ၢ်ဝဲစီၤယၤအ့ၤရူး, ပှၤခိၣ်ပှၤနၢ်တဂၤ, ဖဲဝ့ၢ်အဘူၣ်ဘျီၣ်လၢအမ့ၢ်တၢ်ဘါလီၢ် ဟဲတုၤဝဲဒၣ်လီၤ. အဝဲဒၣ်ချံးခီၣ်တီၤလီၤဖဲယ့ၣ်ၡူးအခီၣ်ထံးဒီးဃ့ ကညးအီၤဒ်သိးအကလဲၤဆူအဟံၣ်,

⁴²အဂ့ၢ်မ့ၢ်လၢအဝဲဒၣ်အဖိမုၣ်လၢအအိၣ်ထဲတဂၤဧိၤ, ဒီးအသးအိၣ်ဝဲတဆံခံနံၣ်န့ၣ်ဘူးတ့ၢ်လၢကသံအဃိန့ၣ်လီၤ. ဖဲယ့ၣ်ၡူးလဲၤတၢ်လၢကျဲန့ၣ်, ပှၤဂီၢ်မုၢ်တဖၣ်သနံးအီၤကိးကပၤဒဲးလီၤ.

⁴³ပိာ်မုၣ်အိၣ်ဝဲဒၣ်တဂၤလၢအတူၢ်ဘၣ်တ့ၢ်ဝဲတၢ်ဆါသွံၣ်လီၤနးမးလၢ တဆံခံနံၣ်အတီၢ်ပူၤဒီးအဝဲဒၣ်လၢာ်ဘူၣ်လၢာ်စ့ၤလၢကသံၣ် သရၣ်တဖၣ်ကမၤဘျါအီၤအဂီၢ်တုၤဒၣ်လဲာ်တၢ်လၢ အအိၣ်ဒီးအီၤလၢာ်ကွံာ်ဝဲခဲလၢာ်ဘၣ်ဆၣ်ဒီးပှၤမၤဘျါအီၤ တန့ၢ်နီတဂၤဘၣ်.

⁴⁴အဝဲဒၣ်ဟဲထီၣ်လၢကမျၢၢ်အကျါလၢယ့ၣ်ၡူးအလီၢ်ခံဒီးထိးယ့ၣ်ၡူး အဆ့ကၤအနွံဒီးအတၢ်သွံၣ်လီၤန့ၣ်ဆိကတီၢ်ကွံာ်ဝဲတဘျီဃီလီၤ.

⁴⁵ယ့ၣ်ၡူးသံကွၢ်ဝဲ, “မတၤထိးယၤလဲၣ်.” ပှၤကိးဂၤဒဲးသမၢဝဲ, ဒီးစီၤပ့းတရူးစံးဝဲ, “ကစၢ်ဧၢ, ပှၤဂီၢ်မုၢ်အိၣ်ဝးတရံးနၤဒီးသနံးနၤလီၤ.”

⁴⁶ဘၣ်ဆၣ်ဒီးယ့ၣ်ၡူးစံးဝဲ, “ပှၤထိးယၤတဂၤလီၤ. အဂ့ၢ်ဒ်အံၤယသ့ၣ်ညါယဲဖဲတၢ်စိကမီၤဟးထီၣ်ဝဲလၢယလိၤန့ၣ် လီၤ.”

⁴⁷ပိာ်မုၣ်တဂၤန့ၣ်ထံၣ်လၢအဝဲဘၣ်တၢ်သ့ၣ်ညါန့ၢ်အီၤ, သတးဒီးဟဲဝဲလၢတၢ်ကနိးကစုာ်အပူၤဒီးထိၣ်လီၤပှီၤ အသးလၢယ့ၣ်ၡူးအခီၣ်ထံးလီၤ. ဖဲန့ၣ်, လၢပှၤကိးဂၤဒဲးအမဲာ်ညါ, အဝဲဒၣ်တဲဘၣ်ယ့ၣ်ၡူးလၢအဝဲဒၣ်ထိးဘၣ်တ့ၢ်အီၤလၢမနုၤအဃိ, ဒီးအဝဲဒၣ်ဘၣ်တၢ်မၤဘျါအီၤတဘျီဃီလၢကျဲဒ်လဲၣ်အဂ့ၢ်န့ၣ်လီၤ.

⁴⁸ယ့ၣ်ၡူးစံးဘၣ်ပိာ်မုၣ်န့ၣ်, “ယဖိမုၣ်ဧၢ, နတၢ်စူၢ်တၢ်နာ်မၤဘျါက့ၤနၤလံ, က့ၤက့ၤနဲလၢတၢ်သူၣ်မုာ်သးမုာ်အပူၤတက့ၢ်.”

⁴⁹ဖဲယ့ၣ်ၡူးကတိၤတၢ်ကတိၤတထံၣ်အံၤအဖၢမုၢ်န့ၣ်, ပှၤဆှၢတၢ်ကစီၣ်တဂၤဟဲလၢပှၤအခိၣ်, စီၤယၤအ့ၤရူးတဂၤအံၤအဟံၣ်, ဒီးစံးဘၣ်အီၤ, “နဖိမုၣ်သံလံ. တဘၣ်မၤတံာ်တာ်လၢၤသရၣ်တဂ့ၤ.”

⁵⁰ဘၣ်ဆၣ်ဒီးယ့ၣ်ၡူးနၢ်ဟူတၢ်အံၤဒီးစံးဘၣ်စီၤယၤအ့ၤရူး, “တဘၣ်ဘၣ်ယိၣ်တၢ်တဂ့ၤ. ထဲနာ်တၢ်တက့ၢ်. ဒီးအဝဲဒၣ်ကအိၣ်ဆူၣ်ထီၣ်က့ၤဝဲလီၤ.”

⁵¹ဖဲအဝဲဒၣ်လဲၤတုၤလၢဟံၣ်န့ၣ်, အဝဲတပျဲပှၤလဲၤနုာ်ဃုာ်ဒီးအီၤနီတဂၤဘၣ်. ပျဲဒၣ်ဝဲထဲစီၤပ့းတရူး, စီၤယိၤဟၣ်, စီၤယၤကိာ် ဒီးဖိသၣ်မုၣ်အမိၢ်အပၢ်တဖၣ်လီၤ.

⁵²ပှၤအိၣ်ဝဲဖဲန့ၣ်ကိးဂၤဒဲးဟီၣ်ဝဲယၢၤဝဲလၢဖိသၣ်မုၣ်အဃိလီၤ. ယ့ၣ်ၡူးစံးဝဲ, “တဘၣ်ဟီၣ်တဂ့ၤ. ဖိသၣ်မုၣ်န့ၣ်တသံဘၣ်, မ့ၢ်ဒၣ်အမံဘၣ်အသးလီၤ.”

⁵³အဝဲသ့ၣ်နံၤဘၣ်ဖၣ်လဲအီၤ, အဂ့ၢ်မ့ၢ်လၢအဝဲသ့ၣ်သ့ၣ်ညါလၢပိာ်မုၣ်ဖိသၣ်န့ၣ်သံဝဲအဃိလီၤ.

⁵⁴ဘၣ်ဆၣ်ဒီးယ့ၣ်ၡူးဟံးဃာ်ပိာ်မုၣ်ဖိသၣ်အစုဒီးကိးထီၣ်ဝဲ, “ဖိသၣ်မုၣ်ဧၢ, ဂဲၤဆၢထၢၣ်တက့ၢ်.”

⁵⁵ပိာ်မုၣ်ဖိသၣ်အသးသမူဟဲက့ၤကဒါက့ၤ, ဒီးဂဲၤဆၢထၢၣ်က့ၤဝဲတဘျီဃီလီၤ. ဒီးယ့ၣ်ၡူးမၢအဝဲသ့ၣ်လၢ အကဟ့ၣ်အီၣ်ဖိသၣ်မုၣ်န့ၣ်လၢတၢ်တမံၤမံၤလီၤ.

⁵⁶ပိာ်မုၣ်ဖိသၣ်အမိၢ်အပၢ်တဖၣ်ကမၢကမၣ်ဝဲ, ဘၣ်ဆၣ်ဒီးယ့ၣ်ၡူးမၤလိာ်အဝဲသ့ၣ်ဒ်သိးအသု တစံးဘၣ်တဲဘၣ်ပှၤနီတဂၤလၢတၢ်မၤတ့ၢ်အသးအံၤအဂ့ၢ်တဂ့ၤန့ၣ်လီၤ.