Read S'gaw Karen လံာ်သိၣ်လီၤသီလီၤတၢ် 1 Bible Online

လံာ်သိၣ်လီၤသီလီၤတၢ် 1 - S'gaw Karen bible

လံာ်သိၣ်လီၤသီလီၤတၢ် 1

¹လၢလံာ်အံၤအပူၤအိၣ်ဒီးတၢ်ကတိၤတဖၣ်လၢစီၤမိၤၡ့ကတိၤတ့ၢ် ဝဲဆူကီၢ်အံၣ်စရ့လးအပှၤဂီၢ်မုၢ်, ဖဲအဝဲသ့ၣ်အိၣ်လၢပှၢ်မုၢ်ကနၢအပူၤလၢထံကျိယၢ်ဒ့ၣ်အမုၢ်ထီၣ် အခါန့ၣ်လီၤ. အဝဲသ့ၣ်အိၣ်လၢထံကျိယၢ်ဒ့ၣ်အတၢ်တြီၤပူၤဘူးဒီးဝ့ၢ်စူး, လၢအအိၣ်ဖဲလၢတၢ်ဘၢၣ်စၢၤဖဲတခီမ့ၢ်ဝ့ၢ်ပၤရၣ်ဒီးလၢအဂၤတခီ န့ၣ်အိၣ်ဒီးဝ့ၢ်တိဖလး, ဝ့ၢ်လၤဘၣ်, ဝ့ၢ်ဃစ့ရိးဒီးဝ့ၢ်ဒံစၤဟးတဖၣ်န့ၣ်လီၤ.

²(တၢ်လဲၤကျဲလၢကစၢၢ်စံၤနါဆူကၤဒ့ၣ်ဘၢ်နံခီဖျိကီၢ်အဒိၣ် အတၢ်လူၢ်တၢ်တြီၤအကျဲန့ၣ်, ယံာ်ဝဲတဆံတသီန့ၣ်လီၤ.)

³ဖဲအဝဲသ့ၣ်ဟးထီၣ်ကွံာ်လၢကီၢ်အဲၤကူပတူးဝံၤအလီၢ်ခံအနံၣ် လွံၢ်ဆံ, လါတဆံတလါထီၣ်အခီၣ်ထံးကတၢၢ်တသီန့ၣ်စီၤမိၤၡ့တဲဘၣ်ပှၤဂီၢ် မုၢ်လၢကယဲၢ်တၢ်ကိးမံၤဒဲးလၢယွၤမၤလိာ်တ့ၢ်အီၤဒ်သိးအကတဲ ဘၣ်အဝဲသ့ၣ်န့ၣ်လီၤ.

⁴တၢ်အံၤမ့ၢ်ဖဲယွၤမၤနၢၤကွံာ်ပှၤဧၣ်မိၣ်ဖိတဖၣ်အစီၤပၤစံဃိၣ် လၢအပၢတၢ်လၢဝ့ၢ်ဃ့ၡဘိၣ်, ဒီးကီၢ်ဘၤၡၣ်အစီၤပၤစီၤဧိာ်လၢအပၢတၢ်လၢဝ့ၢ်ဧၤၡတြိးဒီး ဝ့ၢ်အ့ဒြၤတဖၣ်, အလီၢ်ခံန့ၣ်လီၤ.

⁵စီၤမိၤၡ့စးထီၣ်တဲနၢ်ပၢၢ်ကစၢ်ယွၤအတၢ်ဘူၣ်တၢ်ဘါအတၢ်သိၣ်တၢ် သီတဖၣ်ဒီးတၢ်သိၣ်လိတဖၣ်, ဖဲတၢ်ဆၢကတီၢ်လၢပှၤဂီၢ်မုၢ်အိၣ်ဝဲလၢထံကျိယၢ်ဒ့ၣ်အမုၢ်ထီၣ် လၢကီၢ်မိၤအးအလီၢ်ကဝီၤပူၤအခါန့ၣ်လီၤ.

⁶အဝဲစံးဝဲဒၣ်, “ဖဲပအိၣ်လၢကစၢၢ်စံၤနါန့ၣ်ယွၤ, ပကစၢ်ယွၤစံးဘၣ်ပှၤ, သုအိၣ်ဆိးတ့ၢ်ဖဲကစၢၢ်အံၤယံာ်တ့ၢ်လံ.

⁷ဘိၣ်ထီၣ်စှၢၤထီၣ်သုတၢ်ဖိတၢ်လံၤဒီးလဲၤဆူညါတက့ၢ်. လဲၤဆူပှၤဧၣ်မိၣ်ဖိတဖၣ်အကီၢ်လၢအအိၣ်ဒီးတၢ်လူၢ်တၢ်တြီၤဒီး ဆူကယဲၢ်တၢ်လီၢ်အိၣ်ခိၣ်အိၣ်ဃၢၤတဖၣ်, လၢအမ့ၢ်ဆူထံကျိယၢ်ဒ့ၣ်အတြီၤပူၤ, ဆူတၢ်လူၢ်တၢ်တြီၤဒီး တၢ်ပၢၤခိၣ်တဖၣ်, ဆူလီၢ်ကဝီၤလၢကလံၤထံးတကပၤဒီးဆူပီၣ်လဲၣ်ဖးဒိၣ်မဲးဒံး ထၢၣ်ရ့နယၢၣ်အကၢၢ်နံၤန့ၣ်တက့ၢ်. လဲၤဆူကီၢ်ကနၤဧၣ်ဒီးဆူညါဆူကီၢ်လဘၤနိၣ်အကစၢၢ်ကလိ တဖၣ်ယံၤဝဲတုၤဆူထံကျိမိၢ်ပှၢ်ဖရၤသးန့ၣ်တက့ၢ်.

⁸ကယဲၢ်တၢ်ခဲလၢာ်အံၤမ့ၢ်ကီၢ်လၢယၤ, ယွၤ, အၢၣ်လီၤတ့ၢ်လၢကဟ့ၣ် အီၤဆူသုမိၢ်ပၢ်ဖံဖုလၢပျၢၤတဖၣ်လၢအမ့ၢ်စီၤအၤဘြၤဟၣ်, စီၤအံၤစဲးဒီးစီၤယၤကိာ်ဒီးဆူအဝဲသ့ၣ်အစၢၤအသွဲၣ်တဖၣ် အအိၣ်န့ၣ်လီၤ. လဲၤဒီးမၤန့ၢ်အီၤတက့ၢ်.”

⁹စီၤမိၤၡ့စံးဘၣ်ပှၤဂီၢ်မုၢ်, “ဖဲပအိၣ်ဒံးလၢကစၢၢ်စံၤနါ အခါန့ၣ်, ယစံးဘၣ်တ့ၢ်သု, မူဒါလၢတၢ်ပၢဆှၢသုအဂီၢ်န့ၣ်ဒိၣ်မးလၢ ယဂီၢ်လီၤ. ယမၤအီၤထဲတဂၤဧိၤတသ့ဘၣ်.

¹⁰ယွၤ, သုကစၢ်ယွၤမၤအါထီၣ်သုနီၣ်ဂံၢ်ဒ်ဆၣ်ဧိၤဖီဧိၤတဖၣ်လၢ မူခိၣ်လိၤအသိးန့ၣ်လီၤ.

¹¹မ်ယွၤ, သုမိၢ်ပၢ်ဖံဖုလၢပျၢၤတဖၣ်အကစၢ်ယွၤမၤအါထီၣ်သု အစးတဖၣ်လၢအကထိတဖၣ်ဒီးဒုးဘီၣ်ထီၣ်ညီထီၣ်သုဒ်အအၢၣ်လီၤတ့ၢ် ဝဲအသိးန့ၣ်တက့ၢ်.

¹²မ့မ့ၢ်ဒၣ်ထဲယၤတဂၤဧိၤန့ၣ်, ယစိာ်ထီၣ်မူဒါအဃၢလၢတၢ်မၤလိၤ မၤဘၣ်သုတၢ်ဂ့ၢ်လိာ်ဘှီလိာ်တဖၣ်အဂီၢ်ကသ့ဒ်လဲၣ်.

¹³ဃုထၢထီၣ်ပှၤတနီၤ, လၢအကူၣ်သ့, အိၣ်ဒီးတၢ်သ့ၣ်ညါနၢ်ပၢၢ်ဒီး မ့ၢ်ပှၤလၢအတၢ်လဲၤခီဖျိအါဝဲလၢတဒူၣ်ဘၣ်တဒူၣ်စုာ်စုာ်အပူၤ, ဒီးယကဒုးကဲထီၣ်အဝဲသ့ၣ်လၢသုခိၣ်သုနၢ်န့ၣ်လီၤ.”

¹⁴သုအၢၣ်လီၤထွဲလၢတၢ်အံၤမ့ၢ်တၢ်လၢပဂ့ၤမၤအီၤတမံၤလီၤ.

¹⁵မၤသးဒ်န့ၣ်ဒီး, ယဟံးန့ၢ်ပှၤကူၣ်တၢ်သ့ဒီးခိၣ်နၢ်တဖၣ်လၢအတၢ် လဲၤခီဖျိအါဝဲလၢသုဃုထၢထီၣ်အီၤလၢသုဒူၣ်တဖၣ်အကျါ, ဒီးယပာ်ထီၣ်အဝဲသ့ၣ်ဒ်သုခိၣ်သုနၢ်အသိးန့ၣ်လီၤ. ပှၤတနီၤအမူအဒါအိၣ်ဝဲလၢပှၤတကထိအဖီခိၣ်, တနီၤလၢပှၤတကယၤအဖီခိၣ်, တနီၤလၢပှၤယဲၢ်ဆံအဖီခိၣ်, ဒီးတနီၤလၢပှၤတဆံအဖီခိၣ်အဂီၢ်န့ၣ်လီၤ. ယဃုထၢပာ်လီၤစ့ၢ် ကီးပှၤခိၣ်ပှၤနၢ်အဂၤတဖၣ်လၢပှၤအဒူၣ်တဖၣ်န့ၣ်လီၤ.

¹⁶အကတီၢ်ဖဲန့ၣ်, ယသိၣ်လိနဲၣ်ယုၤအဝဲသ့ၣ်, လၢကဒိကနၣ်တၢ်ဂ့ၢ်လိာ် ဘှီလိာ်တဖၣ်လၢအဟဲထီၣ်လၢအပှၤဂီၢ်မုၢ်အကျါန့ၣ်လီၤ. ယမၢအစံၣ်ညီၣ်တီတၢ်ဂ့ၢ်လိာ်ဘှီလိာ်တီတီလိၤလိၤလၢအဘၣ်ဃး ဒီးအပှၤဂီၢ်မုၢ်ဒၣ်ဝဲမ့ၢ်ဂ့ၤ, ဘၣ်ဃးဃုာ်ဒီးပှၤတခီဘီမုၢ်ဖိတဖၣ်လၢအအိၣ်ဆိးလၢအကျါမ့ၢ် ဂ့ၤန့ၣ်လီၤ.

¹⁷ယတဲအဝဲသ့ၣ်လၢ, အသုတကွၢ်မဲာ်တၢ်လၢအတၢ်စံၣ်ညီၣ်တဖၣ်အပူၤတ ဂ့ၤ. လၢတၢ်စံၣ်ညီၣ်အပူၤန့ၣ်ကဘၣ်ဒိကနၣ်ပှၤအဒိၣ်မ့ၢ်ဂ့ၤ, ပှၤအဆံးမ့ၢ်ဂ့ၤဒ်သိးသိးန့ၣ်လီၤ. တဘၣ်ပျံၤဘၣ်ပှၤနီတဂၤဘၣ်. အဂ့ၢ်ဒ်အံၤ, တၢ်စံၣ်ညီၣ်တဲာ်တဖၣ်လၢ အမၤဝဲန့ၣ်ဟဲလၢကစၢ်ယွၤအအိၣ်လီၤ. တၢ်ဂ့ၢ်တမံၤဂ့ၤတမံၤဂ့ၤမ့ၢ်ကီကဲာ်ဆိးလၢအဂီၢ်န့ၣ်, ကဘၣ်ဟဲစိာ်ဝဲဆူယအိၣ်လီၤ. ဒီးယကစံၣ်ညီၣ်တဲာ်အီၤန့ၣ်လီၤ.

¹⁸တဘျီဃီန့ၣ်, ယဟ့ၣ်သုတၢ်သိၣ်လိနဲၣ်ယုၤတဖၣ်လၢတၢ်အဂၤကိးမံၤ ဒဲးလၢသုကဘၣ်မၤအီၤအဂီၢ်လီၤ.

¹⁹ပမၤတၢ်လၢယွၤ, ပကစၢ်ယွၤမၤလိာ်တ့ၢ်ပှၤန့ၣ်လီၤ. ပဟးထီၣ်ကွံာ်လၢကစၢၢ်စံၤနါ, ဒီးလဲၤခီဖျိပှၢ်မုၢ်ကနၢဖး ဒိၣ်ဖးလဲၣ်ဒီးလီၤပျံၤလီၤဖုး, လၢပတၢ်လဲၤကျဲဆူပှၤဧၣ်မိၣ်ဖိတဖၣ်အကီၢ်လၢအပှဲၤဒီးတၢ်လူၢ်တၢ်တြီၤန့ၣ်လီၤ. ဖဲပလဲၤတုၤလၢဝ့ၢ်ကၤဒ့ၣ်ဘၢ်န့န့ၣ်,

²⁰ယတဲဘၣ်သု, ခဲအံၤသုဟဲတုၤဆူပှၤဧၣ်မိၣ်ဖိတဖၣ်အကီၢ်လၢအပှဲၤ ဒီးတၢ်လူၢ်တၢ်တြီၤလၢယွၤ, ပကစၢ်ယွၤ, ပမိၢ်ပၢ်ဖံဖုလၢပျၢၤတဖၣ်အကစၢ်ယွၤဟ့ၣ်လီၤပှၤန့ၣ်လံ.

²¹ကွၢ်တကၢ်. ကီၢ်လၢယွၤပကစၢ်ယွၤဟ့ၣ်လီၤသုန့ၣ်, အိၣ်ဖဲန့ၣ်လီၤ. လဲၤဒီးမၤန့ၢ်အီၤဒ်အဝဲမၤလိာ်တ့ၢ်ဝဲအသိး န့ၣ်တက့ၢ်. မၤယံာ်မၤနီၢ်သုသးဒီးပျံၤတၢ်တဂ့ၤ.

²²ဘၣ်ဆၣ်ဒီးသုဟဲဆူယအိၣ်ဒီးစံး, မ်ပဆှၢလီၤပှၤတဖၣ်လၢပမဲာ် ညါလၢကလဲၤကွၢ်ဟုၣ်ကွၢ်စုကီၢ်န့ၣ်, ဒ်သိးအဝဲသ့ၣ်တဲဘၣ်ပှၤကသ့လၢကျဲအဂ့ၤကတၢၢ်လၢပဂ့ၤပိာ်အီၤ မ့ၢ်ကျဲမတၤလဲၣ်, ဒီးဖဲန့ၣ်ဝ့ၢ်ဒ်လဲၣ်တဖၣ်အိၣ်ဝဲလဲၣ်, န့ၣ်တက့ၢ်.

²³တၢ်န့ၣ်ယထံၣ်အီၤလီၤဂာ်ဒ်တၢ်အဂ့ၤတမံၤ, လၢပကြၢးမၤအီၤအဃိ ဒီးယဃုထၢထီၣ်ပှၤတဆံခံဂၤ, တဂၤစုာ်စုာ်လၢဒူၣ်တဒူၣ်စုာ်စုာ်အပူၤန့ၣ်လီၤ.

²⁴အဝဲသ့ၣ်လဲၤနုာ်လီၤဆူကီၢ်လၢအပှဲၤဒီးတၢ်လူၢ်တၢ်တြီၤအပူၤ ယံၤဝဲတုၤလၢအ့ၡကိၤလးအတၢ်တြီၤပူၤဒီးလဲၤကွၢ်ဟုၣ်ကွၢ်စုးကီၢ်န့ၣ်လီၤ.

²⁵အဝဲသ့ၣ်ဟဲက့ၤစိာ်န့ၢ်ပှၤသ့ၣ်သၣ်တနီၤလၢအထံၣ်ဘၣ်ဝဲဖဲန့ၣ်, ဒီးတဲဖျါထီၣ်ဝဲလၢကီၢ်လၢယွၤ, ပကစၢ်ယွၤဟ့ၣ်လီၤပှၤန့ၣ်, အဟီၣ်ခိၣ်ညၣ်ထ့ၣ်ဂ့ၤဝဲဒိၣ်မးလီၤ.

²⁶ဘၣ်ဆၣ်ဒီးသုပူထီၣ်တၢ်ထီဒါယွၤ, သုကစၢ်ယွၤအတၢ်မၤလိာ်, ဒီးသုတသးအိၣ်လဲၤနုာ်ဘၣ်ဆူကီၢ်န့ၣ်အပူၤဘၣ်.

²⁷သုကဒူးကဒ့ၣ်လိာ်သုသးတဂၤဒီးတဂၤဒီးစံးလၢယွၤသးဟ့ပှၤ လီၤ. အဝဲထုးထီၣ်ကွံာ်ပှၤလၢကီၢ်အဲၤကူပတူးအပူၤ, မ့ၢ်ဒၣ်လၢအကဟ့ၣ်လီၤပှၤဆူပှၤဧၣ်မိၣ်ဖိတဖၣ်အံၤအစုပူၤ, ဒ်သိးအဝဲသ့ၣ်မၤသံပှၤကသ့အဂီၢ်န့ၣ်လီၤ.

²⁸ဘၣ်မနုၤအဃိပကဘၣ်လဲၤဖဲန့ၣ်လဲၣ်. ပပျံၤတၢ်လီၤ. ပှၤလၢပဆှၢလီၤတ့ၢ်အီၤတဖၣ်တဲဘၣ်ပှၤလၢ, ပှၤဂီၢ်မုၢ်ဖဲန့ၣ် တဖၣ်အဂံၢ်အဘါဆူၣ်န့ၢ်ပှၤဒီးအနီၢ်ထီန့ၢ်ပှၤတက့ၢ်, ဒီးလၢအဝဲသ့ၣ်အိၣ်ဆိးလၢဝ့ၢ်တဖၣ်လၢအိၣ်ဒီးအခိၣ်ဒူလၢ အကစီၤထီၣ်ထီတုၤဝဲဆူမူခိၣ်န့ၣ်လီၤ. အဝဲသ့ၣ်ထံၣ်ဘၣ်ပှၤဧနးဖိတဖၣ်လၢအနီၢ်ဒိၣ်နီၢ်သွါဖဲန့ၣ်လီၤ.

²⁹ဘၣ်ဆၣ်ဒီးယတဲဘၣ်သု, ပျံၤပှၤဂီၢ်မုၢ်တဖၣ်န့ၣ်တဂ့ၤ.

³⁰ယွၤ, သုကစၢ်ယွၤကဆှၢသုဒီးအဝဲကဒုးတၢ်လၢသုဂီၢ်, ဒ်သိးဒၣ်သုထံၣ်အဝဲမၤတ့ၢ်ဝဲလၢကီၢ်အဲၤကူပတူးအပူၤအသိး,

³¹ဒီးလၢပှၢ်မုၢ်ကနၢအပူၤအသိးန့ၣ်လီၤ. သုထံၣ်ဘၣ်တ့ၢ်လၢအဝဲ ဟဲစိာ်သုလၢကျဲဒီဘိညါတုၤဆူတၢ်လီၢ်အံၤပူၤပူၤဖျဲး ဖျဲးဒ်လဲၣ်, ဒ်ပၢ်တဂၤစိာ်အဖိအသိးန့ၣ်လီၤ.

³²ယတဲတ့ၢ်သုဒ်န့ၣ်ဘၣ်ဆၣ်, သုတနာ်ဒံးဘၣ်ယွၤဘၣ်.

³³အဝဲလဲၤဆိဒၣ်လဲာ်လၢသုမဲာ်ညါဒီးဃုထံၣ်တၢ်လီၢ်တတီၤလၢသူၣ် ဒဲအဂီၢ်ဘၣ်ဆၣ်သုတနာ်ဒံးဘၣ်အီၤဘၣ်. အဝဲလဲၤဆိတၢ်လၢသုမဲာ်ညါလၢမ့ၣ်အူထူၣ်အပူၤလၢမုၢ်နၤဒီး လၢတၢ်အၢၣ်အထူၣ်အပူၤလၢမုၢ်ဆါ, ဒ်သိးကဒုးနဲၣ်သု ကျဲအဂီၢ်န့ၣ်လီၤ.

³⁴ယွၤနၢ်ဟူဘၣ်တ့ၢ်သုတၢ်ကဒူးကဒ့ၣ်တဖၣ်ဒီးအသးဒိၣ်ထီၣ်, ဒီးလၢတၢ်န့ၣ်အဃိအဝဲတဲဖျါထီၣ်ဝဲသမှံၤသပှၢ်လၢ,

³⁵လၢပှၤအၢပှၤသီတစိၤအံၤအကျါန့ၣ်, ပှၤတနုာ်လီၤဘၣ်နီ တဂၤဆူကီၢ်လၢအပှဲၤဒီးဟီၣ်ခိၣ်ညၣ်ထ့ၣ်လၢယအၢၣ်လီၤတ့ၢ်လၢ ယကဟ့ၣ်သုမိၢ်ပၢ်ဖံဖုလၢပျၢၤန့ၣ်ဘၣ်.

³⁶ထဲဒၣ်စီၤယဖူန့ၤအဖိခွါစီၤကၤလ့းဧိၤကနုာ်လီၤဘၣ်ဆူကီၢ် န့ၣ်လီၤ. အဝဲအသးတီတ့ၢ်ယၤဒီးယကဟ့ၣ်အီၤဒီးအဝဲအစၢၤအသွဲၣ်တဖၣ်လၢ ကီၢ်တဘ့ၣ်လၢအဝဲလဲၤကွၢ်ဟုၣ်ကွၢ်စုးတ့ၢ်ဝဲန့ၣ်လီၤ.

³⁷လၢသုဃိန့ၣ်, ကစၢ်ယွၤသးဒိၣ်ထီၣ်ယၤဒီးစံးဝဲ, နဲဒၣ်ဒၣ်လဲာ်န့ၣ်, စီၤမိၤၡ့ဧၢ, နတလဲၤနုာ်လီၤဘၣ်ဆူကီၢ်န့ၣ် အပူၤဘၣ်.

³⁸ဘၣ်ဆၣ်ဒီးဒုးဆူၣ်ထီၣ်ပှၤမၤစၢၤနၤ, စီၤနိၣ်အဖိခွါစီၤယိၤၡူ အတၢ်ပာ်လီၤသးန့ၣ်တက့ၢ်. အဝဲကဆှၢပှၤအံၣ်စရ့လးဖိလၢကလဲၤ မၤန့ၢ်ထံကီၢ်န့ၣ်အဂီၢ်လီၤ.

³⁹အန့ၣ်ဝံၤဒီးယွၤစံးဘၣ်ပဝဲကိးဂၤဒဲး, သုဖိတဖၣ်လၢ, အသးစၢ်ကဲာ်ဆိးဒံးလၢကနီၤဖးတၢ်အဘၣ်ဒီးတၢ်တဘၣ်အဆၢ, သုဖိတဖၣ်လၢသုစံးလၢကဘၣ်တၢ်ဖီၣ်န့ၢ်အီၤလၢသုဒုၣ်သုဒါ တဖၣ်ဧိၤန့ၣ်ကလဲၤနုာ်လီၤဘၣ်ဆူကီၢ်န့ၣ်အပူၤလီၤ. ယကဟ့ၣ်လီၤကီၢ်န့ၣ်ဆူအဝဲသ့ၣ်အအိၣ်ဒီးအဝဲသ့ၣ်ကမၤန့ၢ်အီၤ န့ၣ်လီၤ.

⁴⁰မ့မ့ၢ်သုဝဲပှၤဂီၢ်မုၢ်အံၤ, ဃၣ်ကဒါက့ၤသုသးဒီးက့ၤကဒါ က့ၤဆူပှၢ်မုၢ်ကနၢအပူၤလၢကျဲလဲၤဆူပီၣ်လဲၣ်က့ၣ်ကွီၤအကၣ်ဘၣ် န့ၣ်တက့ၢ်.

⁴¹သုစံးဆၢက့ၤလၢ, စီၤမိၤၡ့ဧၢ, ပမၤတ့ၢ်တၢ်ဒဲးဘးထီဒါယွၤ န့ၣ်လီၤ. ဘၣ်ဆၣ်ဒီးခဲကနံၣ်ပကလဲၤထီၣ်ဒုးတၢ်, ဒ်ယွၤ, ပကစၢ်ယွၤမၤလိာ်တ့ၢ်ပှၤအသိးန့ၣ်လီၤ. အန့ၣ်တစု, ပှၤတဂၤစုာ်စုာ်ကတဲာ်ကတီၤထီၣ်အသးလၢကလဲၤထီၣ်ဒုးတၢ် အဂီၢ်, မ့ၢ်လၢသုဆိကမိၣ်လၢတၢ်လဲၤထီၣ်ဒုးကီၢ်တဘ့ၣ်လၢအပှဲၤဒီးတၢ်လူၢ်တၢ်တြီၤန့ၣ်, ကမ့ၢ်တၢ်လၢအညီအဃိန့ၣ်လီၤ.

⁴²ဘၣ်ဆၣ်ဒီးယွၤစံးဘၣ်ယၤ, ဟ့ၣ်ပလီၢ်အဝဲသ့ၣ်လၢအသုတလဲၤထီၣ် ဒုးတၢ်တဂ့ၤ. အဂ့ၢ်ဒ်အံၤ, ယတအိၣ်ဘၣ်ဒီးအဝဲသ့ၣ်ဘၣ်. ဒီးအဝဲသ့ၣ်အဒုၣ်အဒါတဖၣ်ကမၤနၢၤကွံာ်အီၤန့ၣ်လီၤ.

⁴³ယတဲဘၣ်တ့ၢ်သုတၢ်လၢယွၤစံးတ့ၢ်ဝဲတဖၣ်, ဘၣ်ဆၣ်ဒီးသုတပာ်ကဲ အီၤနီတစဲးဘၣ်. သုပူထီၣ်တၢ်ထီဒါယွၤ, ဒီးလၢသုတၢ်ပာ်ထီၣ်ထီသးအပူၤန့ၣ်သုလဲၤထီၣ်ဆူကီၢ်လၢအပှဲၤ ဒီးတၢ်လူၢ်တၢ်တြီၤအပူၤလၢသုကဒုးတၢ်အဂီၢ်န့ၣ်လီၤ.

⁴⁴အန့ၣ်တစု, ပှၤဧၣ်မိၣ်ဖိတဖၣ်လၢအအိၣ်ဆိးဝဲလၢတၢ်လူၢ်တဖၣ် န့ၣ်, ဟဲထီၣ်ထီဒါသု, ဒ်ကနဲတဖုတဂီၢ်န့ၣ်လီၤ. အဝဲသ့ၣ်လူၤသုတုၤဒၣ်လဲာ်ဆူဝ့ၢ်ဃိၢ်မါဒီးမၤနၢၤကွံာ်သု ဖဲန့ၣ်လၢကီၢ်အဒိၣ်လၢအပှဲၤဒီးတၢ်လူၢ်တၢ်တြီၤအပူၤန့ၣ်လီၤ.

⁴⁵မၤသးဒ်န့ၣ်ဒီးသုကိးထီၣ်တၢ်ဆူယွၤအအိၣ်လၢတၢ်မၤစၢၤအဂီၢ်လီၤ. ဘၣ်ဆၣ်ဒီးအဝဲတဒိကနၣ်သုမ့ၢ်ဂ့ၤ, တကနၣ်ဃုာ်သုမ့ၢ်ဂ့ၤနီတမံၤဘၣ်.

⁴⁶လၢတၢ်န့ၣ်အဃိ, ပအိၣ်ဆိးလၢဝ့ၢ်ကၤဒ့ၣ်အပူၤအါနံၤအါသီန့ၣ် လီၤ.