Read S'gaw Karen လံာ်သိၣ်လီၤသီလီၤတၢ် 13 Bible Online

လံာ်သိၣ်လီၤသီလီၤတၢ် 13 - S'gaw Karen bible

လံာ်သိၣ်လီၤသီလီၤတၢ် 13

¹ဝံတဂၤမ့တမ့ၢ်ပှၤဖးတၢ်မံမီၢ်တဖၣ်အခီပညီတဂၤ ကအၢၣ်လီၤတၢ်လီၤလိၢ်လီၤလးတမံၤမ့တမ့ၢ်တၢ်လီၤကမၢကမၣ်တမံၤ,

²ဒ်သိးလၢကဆှၢသုဆူတၢ်ဘါထီၣ်ဒီးမၤကစၢ်တဖၣ်လၢသုတဘါထီၣ် တ့ၢ်အီၤအတၢ်မၤန့ၣ်လီၤ. တၢ်လၢအဝဲအၢၣ်လီၤတဖၣ်မ့ၢ်လၢထီၣ်ပှဲၤထီၣ်ဒၣ်လဲာ်,

³ကနၣ်ဃုာ်အီၤနီတစဲးတဂ့ၤ. ယွၤသုကစၢ်ယွၤသူအီၤလၢကမၤကွၢ် သုအဂီၢ်, ဒ်သိးကထံၣ်သ့ၣ်ညါဘၣ်ဝဲလၢမ့ၢ်သုအဲၣ်ယွၤလၢသုသးဒီဖျၢၣ် ညါကစီဒီဧါ, န့ၣ်လီၤ.

⁴ပိာ်ယွၤအခံဒီးအိၣ်ဒီးတၢ်ယူးယီၣ်ပာ်ကဲအီၤတက့ၢ်. စူၢ်အီၤဒီးတိၢ်န့ၢ်ဖံးဃာ်အဝဲအတၢ်မၤလိာ်တဖၣ်တက့ၢ်. ဘူၣ်ထီၣ်ဘါထီၣ်အီၤဒီးသးတီဒီးအီၤတက့ၢ်.

⁵မ့မ့ၢ်မၤသံကွံာ်ပှၤဖးတၢ်မံမီၢ်တဖၣ်အခီပညီတဂၤလၢ်လၢ်မ့ တမ့ၢ်ဝံတဂၤလၢအတဲဘၣ်သုလၢသုကပူထီၣ်ထီဒါယွၤ, လၢအမၤပူၤဖျဲးသုလၢကီၢ်အဲၤကူပတူးအပူၤတၢ်လီၢ်ဖဲသုမ့ၢ်တ့ၢ်ကုၢ်တဖၣ်န့ၣ်တက့ၢ်. ပှၤဒ်အံၤတဂၤန့ၣ်အၢဝဲသီဝဲဒီးကျဲးစၢးဆှၢကွံာ်သုလၢတၢ် အိၣ်မူလၢယွၤမၤလိာ်တ့ၢ်သုလၢသုကအိၣ်မူအီၤန့ၣ်လီၤ. အဝဲကြၢးဘၣ်တၢ်မၤသံအီၤဒ်သိးသုကမၤပူၤဖျဲးသုသးလၢတၢ် အၢတၢ်သီအံၤန့ၣ်လီၤ.

⁶သုဒီပုၢ်ဝဲၢ်ခွါမ့တမ့ၢ်သုဖိခွါ, မ့တမ့ၢ်သုဖိမုၣ်မ့ တမ့ၢ်သုမါလၢသုအဲၣ်အီၤမ့တမ့ၢ်သုတံၤသကိးလၢအဘူးတံၢ်ကတၢၢ်ဒီးသုဒၣ်လဲာ်, ကဟ့ၣ်ဂံၢ်ဟ့ၣ်ဘါခူသူၣ်သုလၢသုကဘါထီၣ်ကစၢ်အဂၤတဖၣ်, ကစၢ်တဖၣ်လၢသုဝဲဒီးသုမိၢ်ပၢ်ဖံဖုလၢပျၢၤတဖၣ်တဘါတ့ၢ်အီၤ နီတစုဘၣ်န့ၣ်လီၤ.

⁷ဘၣ်သ့ၣ်သ့ၣ်အဝဲသ့ၣ်အကျါတဂၤကဟ့ၣ်ဂံၢ်ဟ့ၣ်ဘါသုလၢသု ကဘါထီၣ်ပှၤဂီၢ်မုၢ်လၢအအိၣ်ဘူးဒီးသုအကစၢ်တဖၣ်မ့ၢ်ဂ့ၤ, ပှၤလၢအအိၣ်ယံၤဒီးသုတဖၣ်အကစၢ်တဖၣ်မ့ၢ်ဂ့ၤန့ၣ်လီၤ.

⁸ဘၣ်ဆၣ်ဒီးပျဲအဝဲကတိၤလွဲန့ၢ်သုတဂ့ၤ. ဒိကနၣ်အီၤဒၣ်လဲာ် တဂ့ၤ. ဒုးနဲၣ်အီၤသုတၢ်သူၣ်ကညီၤသးကညီၤမ့ၢ်ဂ့ၤသုတၢ်သးအိၣ်အီၤမ့ၢ်ဂ့ၤ, န့ၣ်တဂ့ၤ. ဒီးဒီဒၣ်အိၣ်ပှိၤအီၤတဂ့ၤ.

⁹မၤသံကွံာ်အီၤတက့ၢ်. ကဲထီၣ်ပှၤအဆိကတၢၢ်တဂၤလၢက ကွံာ်အီၤလၢလၢၢ်တက့ၢ်. ဝံၤဒီးပျဲပှၤအဂၤခဲလၢာ်ကွံာ်စ့ၢ် ကီးအီၤလၢလၢၢ်တက့ၢ်.

¹⁰ကွံာ်သံအီၤလၢလၢၢ်တက့ၢ်. အဝဲကျဲးစၢးဆှၢယံၤကွံာ်သု လၢယွၤသုကစၢ်ယွၤအအိၣ်, ယွၤတဂၤလၢအမၤပူၤဖျဲးသု လၢကီၢ်အဲၤကူပတူး, ဖဲသုမ့ၢ်တ့ၢ်ကုၢ်တဖၣ်န့ၣ်လီၤ.

¹¹အန့ၣ်တစု, ကယဲၢ်ကီၢ်အံၣ်စရ့လးအပှၤဂီၢ်မုၢ်ခဲလၢာ်ကနၢ်ဟူတၢ် လၢအမၤတ့ၢ်အသးန့ၣ်လီၤ. အဝဲသ့ၣ်ကပျံၤတၢ်ဖုးတၢ်ဒီးပှၤတမၤကဒီးတၢ်အၢတၢ်သီဒ်န့ၣ်အသိး တမံၤလၢၤဘၣ်န့ၣ်လီၤ.

¹²ဖဲသုအိၣ်ဆိးလၢဝ့ၢ်တဖၣ်လၢယွၤသုကစၢ်ယွၤဟ့ၣ်လီၤသုအပူၤ န့ၣ်, သုကနၢ်ဟူဘၣ်,

¹³ပှၤတဂိာ်တသီၣ်တၢ်တနီၤအိၣ်လၢသုပှၤကလုာ်အကျါလၢအဆှၢကမၣ်တ့ၢ် ပှၤဂီၢ်မုၢ်လၢအဝ့ၢ်ဒၣ်ဝဲဒ်သိးကဘါထီၣ်ကစၢ်တဖၣ်လၢသုတဘါထီၣ် တ့ၢ်အီၤလၢညါနီတစုဘၣ်အဂ့ၢ်န့ၣ်လီၤ.

¹⁴သုမ့ၢ်နၢ်ဟူဘၣ်တၢ်ကစီၣ်ပစိၣ်ပစ့ဒ်န့ၣ်ဒီးဃုသ့ၣ်ညါအီၤလီၤ တံၢ်လီၤဆဲးတက့ၢ်. တၢ်အၢတၢ်သီအံၤမၤတ့ၢ်အသးန့ၣ်မ့ၢ်တီဝဲသၢပျၢၤဒီး,

¹⁵အန့ၣ်တစုမၤသံကွံာ်ပှၤခဲလၢာ်လၢအအိၣ်လၢဝ့ၢ်ပူၤဒီးအဆၣ်ဖိ ကီၢ်ဖိခဲလၢာ်စ့ၢ်ကီးတက့ၢ်. မၤဟးဂီၤကွံာ်ဝ့ၢ်န့ၣ်လၢလၢပှဲၤပှဲၤတက့ၢ်.

¹⁶ဟဲစိာ်ဃီၤပှၤဂီၢ်မုၢ်လၢအအိၣ်ဖဲန့ၣ်တဖၣ်အတၢ်ဖိတၢ်လံၤခဲလၢာ် ဒီးပာ်ဖှိၣ်ထီၣ်အီၤဖဲဝ့ၢ်န့ၣ်အတၢ်လီၤပျီတက့ၢ်. ဒီးဆူးထီၣ်ကွံာ်ဝ့ၢ်န့ၣ်ဒီးတၢ်ခဲလၢာ်လၢအအိၣ်လၢအပူၤဒ်တၢ် လုၢ်တမံၤအသိးဆူယွၤသုကစၢ်ယွၤအအိၣ်တက့ၢ်. ဝ့ၢ်န့ၣ်ကဘၣ်တၢ်ပာ်တီၢ်အီၤလၢတၢ်ဟးဂီၤအပူၤလီၤထူလီၤယိာ် ဒီးတၢ်တဘှီထီၣ်က့ၤကဒီးအီၤနီတစုလၢၤဘၣ်န့ၣ်လီၤ.

¹⁷ဟံးဃာ်တၢ်လၢနဂီၢ်ဒၣ်နဲနီတမံၤလၢအဘၣ်တၢ်ဆိၣ်အၢအီၤဒ်သိး ကတုၤဆူတၢ်ဟးဂီၤန့ၣ်တဂ့ၤ. ဒီးအန့ၣ်တစုယွၤကဃၣ်ကွံာ်အသးလၢအတၢ်သးကဲၤထီၣ်ဒီးဒုးနဲၣ် သုလၢတၢ်သးကညီၤန့ၣ်လီၤ. အဝဲကသးကညီၤဘၣ်သုဒီးဒုးကဲထီၣ်သုလၢပှၤဂီၢ်မုၢ်လၢအအါဝဲ ဂီၢ်ဝဲတဖုဒ်အအၢၣ်လီၤတ့ၢ်ဒီးသုမိၢ်ပၢ်ဖံဖုလၢပျၢၤတဖၣ်,

¹⁸လၢသုမ့ၢ်စူၢ်ကယဲၢ်အဝဲအတၢ်မၤလိာ်တဖၣ်ခဲလၢာ်လၢယဟ့ၣ်လီၤသု လၢမုၢ်မဆါတနံၤအံၤဒီးမၤတၢ်လၢအဝဲအဲၣ်ဒိးဝဲန့ၣ်လီၤ.