Read S'gaw Karen လံာ်သိၣ်လီၤသီလီၤတၢ် 15 Bible Online

လံာ်သိၣ်လီၤသီလီၤတၢ် 15 - S'gaw Karen bible

လံာ်သိၣ်လီၤသီလီၤတၢ် 15

¹လၢနွံနံၣ်တနံၣ်အကတၢၢ်ကိးနံၣ်ဒဲးန့ၣ်သုကဘၣ်တြူာ်ကွံာ်ပှၤ တဖၣ်လၢကဘၣ်ဟ့ၣ်သုစ့, အကမၢ်တဖၣ်န့ၣ်လီၤ.

²အအံၤမ့ၢ်တၢ်လၢသုကဘၣ်မၤအီၤဒ်လဲၣ်န့ၣ်လီၤ. ကယဲၢ်ပှၤတဂၤလၢ်လၢ်လၢအဒုးလိၢ်လီၤစ့ဆူအပှၤအံၣ်စရ့လးဖိ ကဒဲကဒဲတဂၤဂၤန့ၣ်, ကဘၣ်တြူာ်ကွံာ်ဒ့ၣ်ကမၢ်န့ၣ်လီၤ. အဝဲတဘၣ်ကျဲးစၢးထၢဖှိၣ်က့ၤစ့န့ၣ်ဘၣ်. ယွၤအနီၢ်ကစၢ်ဒၣ်ဝဲဘိးဘၣ်သ့ၣ်ညါဝဲဒၣ်လၢဒ့ၣ်ကမၢ်န့ၣ်ဘၣ်တၢ်တြူာ်ကွံာ်အီၤလံန့ၣ်လီၤ.

³သုကထၢဖှိၣ်ဘၣ်တၢ်လၢပှၤတခီဘီမုၢ်ဖိတဂၤဘၣ်ဟ့ၣ်သုန့ၣ်လီၤ. မ့မ့ၢ်သုတဘၣ်ထၢဖှိၣ်တၢ်လၢသုပှၤဂီၢ်မုၢ်ကဒဲကဒဲအကျါတဂၤ ဂၤဘၣ်ဟ့ၣ်သုန့ၣ်ဘၣ်.

⁴ယွၤသုကစၢ်ယွၤကဆိၣ်ဂ့ၤသုလၢကီၢ်တဘ့ၣ်လၢအဟ့ၣ်လီၤသု အပူၤန့ၣ်လီၤ. ပှၤတဖှီၣ်ဘၣ်ယာ်ဘၣ်လၢသုပှၤဂီၢ်မုၢ်အကျါနီ တဂၤဘၣ်.

⁵စူၢ်အီၤဒီးမၤကယဲၢ်တၢ်ခဲလၢာ်လၢယမၤလိာ်တ့ၢ်သုလၢမုၢ်မဆါ တနံၤအံၤန့ၣ်တက့ၢ်.

⁶ယွၤကဆိၣ်ဂ့ၤသုဒ်အဝဲအၢၣ်လီၤတ့ၢ်ဝဲအသိးန့ၣ်လီၤ. သုကဒုးလိၢ်လီၤစ့ဆူပှၤအါကလုာ်အအိၣ်, ဘၣ်ဆၣ်ဒီးသုတလိၢ်ဘၣ် လၢပှၤအအိၣ်နီတဂၤဘၣ်. သုကပၢတၢ်လၢပှၤအါကလုာ်အဖီခိၣ်, ဘၣ်ဆၣ်ပှၤလၢကပၢတၢ်လၢသုဖီ ခိၣ်တအိၣ်နီတကလုာ်ဘၣ်.

⁷လၢဝ့ၢ်တဖၣ်အကျါတဖျၢၣ်ဖျၢၣ်လၢအအိၣ်လၢယွၤသု ကစၢ်ယွၤဟ့ၣ်လီၤသုအပူၤန့ၣ်, ပှၤအံၣ်စရ့လးဖိကဒဲကဒဲ ဒီးသုမ့ၢ်အိၣ်တဂၤလၢအလိၣ်ဘၣ်တၢ်န့ၣ်, အဲၣ်လီၤသုသးဒီးဂ့ၢ်လိာ်လၢသုကမၤစၢၤအီၤအဂီၢ်တဂ့ၤ.

⁸အခိၣ်တလိာ်, ဟ့ၣ်ညီတၢ်ဒီးဒုးလိၢ်အီၤတၢ်ထဲသိးလၢအလိၣ်ဘၣ် ဝဲန့ၣ်တက့ၢ်.

⁹မ့ၢ်လၢနံၣ်လၢဒ့ၣ်ကမၢ်တဖၣ်ကဘၣ်တၢ်တြူာ်ကွံာ်အီၤန့ၣ်ဘူးထီၣ် လံအဃိ, ဂ့ၢ်လိာ်လၢသုကဒုးလိၢ်အီၤလၢတၢ်တမံၤမံၤန့ၣ်တဂ့ၤ. ပျဲတၢ်ဆိကမိၣ်အအၢအသီဒ်န့ၣ်အသိးတမံၤအိၣ်လၢသုသးပူၤတဂ့ၤ. သုမ့ၢ်ဂ့ၢ်လိာ်လၢသုကဟ့ၣ်ဒုးလိၢ်တၢ်န့ၣ်, အဝဲကကိးထီၣ်တၢ်ဆူယွၤအအိၣ်ထီဒါသုဒီးသုကဘၣ်တၢ်ပာ်တၢ်ကမၣ် လၢသုလိၤန့ၣ်လီၤ.

¹⁰ဟ့ၣ်အီၤတၢ်လၢတၢ်သဘျ့ဒီးလၢတၢ်တအဲၣ်လီၤသးအပူၤ, ဒီးယွၤကဆိၣ်ဂ့ၤသုလၢကယဲၢ်တၢ်လၢသုမၤအီၤခဲလၢာ်အပူၤန့ၣ်လီၤ.

¹¹ပှၤအံၣ်စရ့လးဖိလၢအဖှီၣ်ဝဲယာ်ဝဲဒီးလိၣ်ဘၣ်တၢ်မၤစၢၤန့ၣ် ကအိၣ်ဒၣ်ထီဘိန့ၣ်လီၤ. ဒီးလၢတၢ်န့ၣ်အဃိယမၤလိာ်သုလၢသုကဟ့ၣ်ညီတၢ်ဆူအဝဲသ့ၣ်န့ၣ်လီၤ.

¹²ပှၤအံၣ်စရ့လးဖိကဒဲကဒဲတဂၤလၢအမ့ၢ်ပိာ်ခွါမ့ၢ်ဂ့ၤ, ပိာ်မုၣ်မ့ၢ်ဂ့ၤ, မ့ၢ်ဆါလီၤကွံာ်အသးဆူသုအိၣ်ဒ်ကုၢ်တဂၤအသိးန့ၣ်, သုကဘၣ်ပျၢ်ဖျဲးကွံာ်အီၤဖဲအမၤတၢ်မၤလၢသုဂီၢ်ပှဲၤထီၣ်ဃု နံၣ်ဝံၤအလီၢ်ခံန့ၣ်လီၤ. ဖဲနွံနံၣ်တနံၣ်တုၤဃီၤန့ၣ်, သုကဘၣ်ပျၢ်ဖျဲးကွံာ်အီၤန့ၣ်လီၤ.

¹³တုၤသုပျၢ်ဖျဲးကွံာ်အီၤန့ၣ်, ပျၢ်ဖျဲးကွံာ်အီၤစုယၢ်ခီတဂ့ၤ.

¹⁴လၢတၢ်လၢယွၤဆိၣ်ဂ့ၤနၤလၢအမ့ၢ်သိ, ဘုဧိၤဟုဧိၤ, ဒီးစပံးထံအကျါန့ၣ်, ဟ့ၣ်လီၤအီၤလၢတၢ်သူၣ်အိၣ်သးအိၣ်အပူၤ န့ၣ်တက့ၢ်.

¹⁵သ့ၣ်နီၣ်ထီၣ်က့ၤလၢသုမ့ၢ်တ့ၢ်ကုၢ်တဖၣ်လၢကီၢ်အဲၤကူပတူး အပူၤဒီးယွၤသုကစၢ်ယွၤမၤထူၣ်ဖျဲးထီၣ်သုန့ၣ်တက့ၢ်. လၢတၢ်န့ၣ်အဃိ, ခဲကနံၣ်အံၤယဟ့ၣ်လီၤသုလၢတၢ်မၤလိာ်အံၤန့ၣ်လီၤ.

¹⁶ဘၣ်ဆၣ်ဒီးနကုၢ်န့ၣ်တမ့ၢ်ကအဲၣ်ဒိးဟးထီၣ်ကွံာ်ဘၣ်. အဝဲကအဲၣ်သုဒီးသုပှၤဟံၣ်ဖိဃီဖိဒီးကသးမံသးမုာ်လၢကအိၣ် ဆိးဒီးသုန့ၣ်လီၤ.

¹⁷အန့ၣ်တစုလဲၤကိးအီၤဆူသုဟံၣ်အပဲတြီဖးဒိၣ်ဒီးဖဲန့ၣ်မၤထူၣ်ဖျိအနၢ်တက့ၢ်. အန့ၣ်ဒီး, အဝဲကမ့ၢ်သုကုၢ်တစိၤသးန့ၣ်လီၤ. မၤဘၣ်စ့ၢ်ကီးသုကုၢ်ပိာ်မုၣ်တဖၣ်ဒ်န့ၣ်အသိးတက့ၢ်.

¹⁸တုၤသုပျၢ်ဖျဲးကုၢ်တဂၤန့ၣ်အိၣ်ဒီးတၢ်သူၣ်တမုာ်သးတမုာ်တ ဂ့ၤ. မ့ၢ်လၢအဝဲမၤတ့ၢ်တၢ်လၢနဂီၢ်လၢဃုနံၣ်အတီၢ်ပူၤအိၣ်ဒီးအဘူး အလဲပှဲၤသိးဒၣ်တၢ်ခ့တၢ်ပှၤလၢတၢ်ဒိးလဲအီၤတဂၤအဘူးအလဲတဝာ် န့ၣ်လီၤ. မၤတၢ်အံၤဒီးယွၤသုကစၢ်ယွၤကဆိၣ်ဂ့ၤသုလၢတၢ်လၢသုမၤအီၤ ခဲလၢာ်အပူၤန့ၣ်လီၤ.

¹⁹ပာ်လီၤဆီကယဲၢ်သုဂီၤဘုၣ်ဂီၤဖံးဒီးသိဖါအဝဲၢ်ကိတဖၣ်လၢ ယွၤသုကစၢ်ယွၤအဂီၢ်န့ၣ်တက့ၢ်. သုတဘၣ်သူဂီၤဘုၣ်ဂီၤဖံးတဖၣ်အံၤလၢတၢ်ဖံးတၢ်မၤအဂီၢ်ဒီး သုတဘၣ်တံာ်သုသိဖါတဖၣ်အံၤအဆူၣ်နီတဒုဘၣ်.

²⁰ကိးနံၣ်ဒဲးန့ၣ်သုဝဲဒီးသုပှၤဟံၣ်ဖိကဘၣ်အီၣ်အဝဲသ့ၣ်လၢ ယွၤအမဲာ်ညါဖဲတၢ်ဘူၣ်ထီၣ်ဘါထီၣ်အလီၢ်တတီၤန့ၣ်လီၤ.

²¹ဘၣ်ဆၣ်ဒီးတၢ်မ့ၢ်လဲၤကမၣ်အသးတမံၤမံၤဒီးဆၣ်ဖိကီၢ်ဖိတဖၣ် အံၤ, ဒ်ပစံးတၢ်အသိးအခီၣ်မ့ၢ်ဟးဂီၤမ့ၢ်ဂ့ၤ, အမဲာ်ချံမ့ၢ်ဘျီၣ်မ့ၢ်ဂ့ၤ, မ့ၢ်အိၣ်ဒီးတၢ်ဂံၢ်စၢ်ဘါစၢ်အဂၤ ဒိၣ်ဒိၣ်မုၢ်မုၢ်တမံၤမံၤမ့ၢ်ဂ့ၤဒီး, သုတဘၣ်လုၢ်ထီၣ်အီၤဆူယွၤသုကစၢ်ယွၤအအိၣ်ဘၣ်.

²²သုကဘၣ်အီၣ်ဆၣ်ဖိကီၢ်ဖိဒ်န့ၣ်အသိးလၢသုဟံၣ်ပူၤလီၤ. ကယဲၢ်သုဝဲခဲလၢာ်လၢအကဆှီဝဲဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲ အသိးမ့ၢ်ဂ့ၤ, တကဆှီမ့ၢ်ဂ့ၤန့ၣ်, ကဘၣ်အီၣ်အီၤဒ်သိးဒၣ်အအီၣ်တၤဃီၤဒီးတၤယုၢ်အသိးန့ၣ်လီၤ.

²³ဘၣ်ဆၣ်ဒီးသူအသွံၣ်လၢတၢ်အီၣ်အဂီၢ်တဂ့ၤ. အခိၣ်တလိာ်, သုကဘၣ်လူလီၤအီၤဆူဟီၣ်ခိၣ်အလိၤဒ်ထံအသိးလီၤ.