Read S'gaw Karen လံာ်သိၣ်လီၤသီလီၤတၢ် 19 Bible Online

လံာ်သိၣ်လီၤသီလီၤတၢ် 19 - S'gaw Karen bible

လံာ်သိၣ်လီၤသီလီၤတၢ် 19

¹ဖဲယွၤ, သုကစၢ်ယွၤမၤဟးဂီၤကွံာ်ပှၤဂီၢ်မုၢ်တဖၣ်လၢအဝဲဟ့ၣ် လီၤသုလၢအဝဲသ့ၣ်အထံအကီၢ်ဝံၤ, ဒီးဖဲသုဟံးန့ၢ်ကွံာ်အဝဲ သ့ၣ်အဝ့ၢ်တဖၣ်ဒီးအဟံၣ်အဃီတဖၣ်ဒီးသူၣ်လီၤသုအိၣ်သုဆိးအလီၢ် ဖဲန့ၣ်ဝံၤအလီၢ်ခံန့ၣ်,

²နီၤဖးလီၤလီၢ်ကဝီၤတဖၣ်သၢတီၤ, လၢတတီၤစုာ်စုာ်အိၣ်ဒီးဝ့ၢ်တဖျၢၣ်လၢတၢ်လဲၤတုၤအီၤသ့ဝဲညီကဒၣ်န့ၣ်တက့ၢ်.

³အန့ၣ်တစု, ပှၤတဂၤလၢအမၤသံဘၣ်ပှၤတဂၤဂၤ, လဲၤဃ့ၢ်ပူၤဖျဲးအသးလၢတၢ်ဒီဒၣ်အိၣ်ပှိၤအဂီၢ်, ဆူဝ့ၢ်တဖၣ်န့ၣ်အကျါတဖျၢၣ်ဖျၢၣ်ကသ့ဝဲလီၤ.

⁴လၢတၢ်တပာ်သူၣ်ပာ်သးအပူၤ, ပှၤတဂၤမ့ၢ်မၤသံဘၣ်ပှၤတဂၤဂၤလၢ တမ့ၢ်ဘၣ်အဒုၣ်အဒါဒီးအဝဲလဲၤဃ့ၢ်ပူၤဖျဲးအသးဆူဝ့ၢ်တဖၣ်န့ၣ် အကျါတဖျၢၣ်ဖျၢၣ်အပူၤဒ်သိးကအိၣ်ဘံၣ်အိၣ်ဘၢအသး သ့ဝဲဒၣ်လီၤ.

⁵အဒိ, ပှၤခံဂၤလဲၤသကိးတၢ်ဒ်သိးသိးဆူသ့ၣ်ပှၢ်ကျါလၢကကျီ သ့ၣ်, ဒီးဖဲပှၤအကျါတဂၤကျီတဲာ်သ့ၣ်တထူၣ်အခါ, ကွါအကနၣ်မ့ၢ်ဖျ့ထီၣ်လၢအတိၢ်ဒီးမၤသံဘၣ်ပှၤအဂၤတဂၤန့ၣ်, အဝဲလဲၤဃ့ၢ်ဆူဝ့ၢ်သၢဝ့ၢ်န့ၣ်အကျါတဝ့ၢ်ဒ်သိးကပူၤဖျဲးဝဲ အဂီၢ်သ့လီၤ.

⁶ဝ့ၢ်မ့ၢ်အိၣ်ဒၣ်ထဲတဖျၢၣ်ဧိၤန့ၣ်, တၢ်ဒ့ၣ်စၢၤဆူဝ့ၢ်န့ၣ်ကယံၤ ကဲာ်ဆိး, ဒီးဘူးတံၢ်လၢအအိၣ်မူအိၣ်ဒါလၢကဘၣ်ဟ့ၣ်ကၣ်က့ၤတၢ်မၤသံ ကချုးန့ၢ်အီၤဒီးလၢအဝဲအတၢ်သးဒိၣ်အပူၤန့ၣ်ကမၤသံဘၣ်ပှၤလၢ အတၢ်ကမၣ်တအိၣ်တဂၤလီၤ. မ့ၢ်နာ်သက့ဒ်န့ၣ်ဒီး, အဝဲမၤသံဘၣ်ဒၣ်ပှၤတဂၤလၢတမ့ၢ်အဒုၣ်အဒါန့ၣ်, လၢတၢ်မၤဖုးမၤပျီၢ်အသးအဃိန့ၣ်လီၤ.

⁷လၢတၢ်အံၤအဃိ, ယဟ့ၣ်လီၤယကလုၢ်လၢသုကပာ်လီၤဆီဝ့ၢ်သၢဖျၢၣ် န့ၣ်လီၤ.

⁸တုၤယွၤ, သုကစၢ်ယွၤမၤလဲၢ်ထီၣ်သုလီၢ်ကဝီၤ, ဒ်အဝဲတဲဘၣ်တ့ၢ်သုမိၢ်ပၢ်ဖံဖုလၢပျၢၤတဖၣ်လၢကမၤဝဲ, ဒီးဟ့ၣ်သုကယဲၢ်ထံကီၢ်လၢအဝဲအၢၣ်လီၤတ့ၢ်လံဝဲန့ၣ်,

⁹အန့ၣ်တစုသုကဘၣ်ဃုထၢအါထီၣ်ဝ့ၢ်သၢဝ့ၢ်လီၤ. (အဝဲကဟ့ၣ်သုထံကီၢ်အံၤ, ဖဲသုမၤတၢ်ခဲလၢာ်လၢယမၤလိာ်သု တနံၤအံၤဒီးဖဲသုအဲၣ်ယွၤ, သုကစၢ်ယွၤဒီးအိၣ်မူဒ်အဝဲအတၢ် သိၣ်လိတဖၣ်အိၣ်ဝဲအသိးန့ၣ်လီၤ.)

¹⁰မၤတၢ်အံၤ, ဒ်သိးဒီးပှၤဂီၢ်မုၢ်လၢအတၢ်ကမၣ်တအိၣ်န့ၣ်သုတဘၣ် သံတဂ့ၤဒီးဒ်သိးသုသုတမၤကမၣ်ဘၣ်တၢ်ခီဖျိတၢ်မၤသံဘၣ်အဝဲ သ့ၣ်လၢကီၢ်လၢယွၤဟ့ၣ်သုအပူၤတဂ့ၤန့ၣ်လီၤ.

¹¹ဘၣ်ဆၣ်ဒီး, ဘၣ်သ့ၣ်သ့ၣ်ပှၤတဂၤကကူၣ်ထီၣ်ဖးလီၤမၤသံ အဒုၣ်အဒါလၢအသွံၣ်ခုၣ်အပူၤ, ဝံၤဒီးကဃ့ၢ်ပူၤဖျဲးအသးဆူ ဝ့ၢ်တဖၣ်န့ၣ်အကျါတဖျၢၣ်လၢတၢ်ဒီဒၣ်အိၣ်ပှိၤအဂီၢ်လီၤ.

¹²လၢတၢ်ဂ့ၢ်ဒ်န့ၣ်အသိးအဂီၢ်န့ၣ်, အဝဲအနီၢ်ကစၢ်ဒၣ်ဝဲအဝ့ၢ်အပှၤ ခိၣ်ပှၤနၢ်တဖၣ်ကဘၣ်မၤလိာ်က့ၤအီၤဒီးဟ့ၣ်လီၤအီၤဆူ ဘူးတံၢ်အိၣ်မူအိၣ်ဒါလၢကဟ့ၣ်ကၣ်က့ၤတၢ်မၤသံအဂီၢ်အစုပူၤ, ဒ်သိးအဝဲကဘၣ်တၢ်မၤသံကွံာ်အီၤအဂီၢ်န့ၣ်လီၤ.

¹³ဒုးနဲၣ်တၢ်သးကညီၤလၢအီၤနီတစဲးတဂ့ၤ. ဒုးပူၤဖျဲးကီၢ်အံၣ်စရ့လးဒီးပှၤမၤသံတၢ်အံၤ, ဒ်သိးကယဲၢ်တၢ်ခဲလၢာ်ကလဲၤအသးဂ့ၤဂ့ၤဘၣ်ဘၣ်ဒီးသုတက့ၢ်.

¹⁴သုးကွံာ်ပှၤလၢသုဃၢၤအကီၢ်အဆၢအပနီၣ်, လၢတၢ်ပာ်လီၤတ့ၢ်လံ အီၤလၢပျၢၤလၢကီၢ်ဖဲယွၤ, သုကစၢ်ယွၤဟ့ၣ်လီၤသု အပူၤန့ၣ်တဂ့ၤ.

¹⁵လၢတၢ်ကစံၣ်ညီၣ်ပှၤတဂၤအတၢ်မၤကမၣ်တမံၤအဂီၢ်န့ၣ်, ပှၤအုၣ်အသးတဂၤတမ့ၢ်တၢ်လၢတၢ်ပှဲၤဘၣ်. အစှၤကတၢၢ်ပှၤအုၣ်အသးကဘၣ်အိၣ်ခံဂၤလၢကအုၣ်အသးလၢ ပှၤတဂၤန့ၣ်အတၢ်ကမၣ်အိၣ်ဝဲအဂ့ၢ်န့ၣ်လီၤ.

¹⁶ပှၤတဂၤမ့ၢ်ကျဲးစၢးမၤဘၣ်ဒိဆါပှၤအဂၤတဂၤလၢတၢ်အုၣ်သး ကဘျံးကဘျၣ်ထီဒါအီၤလၢတၢ်မၤကမၣ်တမံၤအဂ့ၢ်န့ၣ်,

¹⁷အဝဲသ့ၣ်ခံဂၤလိာ်ကဘၣ်လဲၤဆူတၢ်ဘူၣ်ထီၣ်ဘါထီၣ်အလီၢ်တတီၤဒီး ကဘၣ်တၢ်ဟ့ၣ်အီၤတၢ်စံၣ်ညီၣ်လၢပှၤလုၢ်တၢ်အခိၣ်တဖၣ်ဒီးစံၣ်ညီၣ် ကွီၢ်တဖၣ်လၢအအိၣ်မူအိၣ်ဒါဖဲန့ၣ်န့ၣ်လီၤ.

¹⁸ပှၤစံၣ်ညီၣ်ကွီၢ်တဖၣ်ကဘၣ်သမံသမိးကွီၢ်န့ၣ်လီၤတံၢ်လီၤဆဲး လၢာ်အခၢးလီၤ. ဒီးပှၤတဂၤန့ၣ်မ့ၢ်မၤတၢ်အုၣ်အသးကဘျံးကဘျၣ်တမံၤထီဒါအဝဲ အပှၤအံၣ်စရ့လးဖိကဒဲကဒဲဒီး,

¹⁹အဝဲကဘၣ်ဒိးန့ၢ်တၢ်စံၣ်ညီၣ်လၢပှၤအုၣ်အသးကဘျံးကဘျၣ်တဂၤကြၢး ဒိးန့ၢ်ဘၣ်ဝဲန့ၣ်လီၤ. လၢကျဲဒ်သိးအံၤန့ၣ်, သုကပူၤဖျဲးဒီးတၢ်အၢတၢ်သီအံၤန့ၣ်လီၤ.

²⁰တုၤနုၤတစု, ပှၤအဂၤကိးဂၤဒဲးကနၢ်ဟူတၢ်လၢအမၤတ့ၢ်အသးန့ၣ် လီၤ. အဝဲသ့ၣ်ကပျံၤတၢ်, ဒီးတမ့ၢ်ပှၤကမၤကဒီးလၢၤတၢ်အၢတၢ်သီဒ်န့ၣ် အသိးတမံၤနီတဂၤလၢၤဘၣ်.

²¹လၢကွီၢ်ဒ်သိးန့ၣ်တဖၣ်အဂီၢ်န့ၣ်, ဒုးနဲၣ်တၢ်သးကညီၤနီ တစဲးတဂ့ၤ. တၢ်စံၣ်ညီၣ်ကဘၣ်မ့ၢ်ဝဲ, သးသမူတဖျၢၣ်လၢသးသမူ တဖျၢၣ်အဂီၢ်, မဲာ်ချံတတိၣ်လၢမဲာ်ချံတတိၣ်အဂီၢ်, မဲတဘ့ၣ်လၢမဲတဘ့ၣ်အဂီၢ်, စုတခီလၢစုတခီအဂီၢ်ဒီးခီၣ်တခီ လၢခီၣ်တခီအဂီၢ်န့ၣ်လီၤ.