Read S'gaw Karen လံာ်သိၣ်လီၤသီလီၤတၢ် 20 Bible Online

လံာ်သိၣ်လီၤသီလီၤတၢ် 20 - S'gaw Karen bible

လံာ်သိၣ်လီၤသီလီၤတၢ် 20

¹တုၤသုဟးထီၣ်ဒ်သိးသုကဒုးတၢ်ထီဒါသုဒုၣ်သုဒါတဖၣ်ဒီးသု မ့ၢ်ထံၣ်လ့ၣ်ကဟၣ်တဖၣ်ဒီးကသ့ၣ်တဖၣ်ဒီးသုးမုၢ်တဖုလၢအပှၤအနီၣ် ဂံၢ်အါန့ၢ်ဒံးသုပှၤန့ၣ်, ပျံၤအဝဲသ့ၣ်တဂ့ၤ. ယွၤသုကစၢ်ယွၤလၢအမၤပူၤဖျဲးတ့ၢ်သုလၢကီၢ်အဲၤကူပတူးန့ၣ် ကအိၣ်ဒီးသုလီၤ.

²တချုးလၢသုစးထီၣ်ဒုးတၢ်န့ၣ်, ပှၤလုၢ်တၢ်အခိၣ်တဂၤကဘၣ်ဟဲထီၣ် ဆူတၢ်မဲာ်ညါဒီးစံးဘၣ်သုးမုၢ်,

³ကီၢ်အံၣ်စရ့လးအပှၤသ့ၣ်ဧၢ, ဒိကနၣ်တၢ်တက့ၢ်. တနံၤအံၤသုကလဲၤဆူတၢ်ဒုးတၢ်ယၤအပူၤလီၤ. ပျံၤဘၣ်သုဒုၣ်သုဒါတဖၣ်မ့ၢ်ဂ့ၤ, မၤဟါမၢ်ကွံာ်သုတၢ်သးခူ တလ့ၢ်မ့ၢ်ဂ့ၤ, ပျံၤတၢ်ကလီကလီလၢအဂ့ၢ်တအိၣ်ကျိၤတအိၣ်မ့ၢ်ဂ့ၤ န့ၣ်တဂ့ၤ.

⁴ယွၤ, သုကစၢ်ယွၤကလဲၤဃုာ်ဒီးသုဒီးကဟ့ၣ်သုတၢ်မၤနၢၤန့ၣ် လီၤ.

⁵ဝံၤဒီးသုးခိၣ်သုးနၢ်တဖၣ်ကကတိၤလီၤတၢ်ဆူပှၤတဖၣ်ဒီးစံး, ဖဲအံၤ, မ့ၢ်ပှၤအိၣ်တဂၤဂၤလၢအဘှီထီၣ်ဟံၣ်တဖျၢၣ်ဝံၤဒၣ်သီသီ ဖိဒီးတပာ်စီဆှံဘၣ်ဒံးအီၤန့ၣ်ဧါ. မ့ၢ်အိၣ်ဒီး, အဝဲသ့ၣ်ကဘၣ်က့ၤဆူဟံၣ်လီၤ. မ့တမ့ၢ်ဘၣ်န့ၣ်, အဝဲမ့ၢ်ဘၣ်တၢ်မၤသံအီၤလၢတၢ်ဒုးအပူၤဒီးပှၤအဂၤတဂၤကပာ်စီ ဆှံကွံာ်အဟံၣ်န့ၣ်လီၤ.

⁶ဖဲအံၤ, မ့ၢ်ပှၤအိၣ်တဂၤဂၤလၢအသူၣ်လီၤဒံးဒၣ်အစပံးလီၢ်သီသီ ဖိဒီးတအိၣ်ဒံးဘၣ်ဒီးတၢ်ခွဲးတၢ်ယာ်လၢကဒဲးက့ၤစပံးသၣ်တဖၣ် န့ၣ်ဧါ. မ့ၢ်အိၣ်ဒီးအဝဲကဘၣ်က့ၤဆူဟံၣ်လီၤ. မ့တမ့ၢ်ဘၣ်န့ၣ်အဝဲမ့ၢ်ဘၣ်တၢ်မၤသံအီၤလၢတၢ်ဒုးအပူၤဒီးပှၤ အဂၤတဂၤကမုာ်လၤသးခုဘၣ်အစပံးထံန့ၣ်လီၤ.

⁷ဖဲအံၤ, မ့ၢ်ပှၤအိၣ်တဂၤဂၤလၢအမၤတၢ်အၢၣ်လီၤလၢကဒိးတ့ဒိး ဖျီအသးန့ၣ်ဧါ. မ့ၢ်အိၣ်ဒီး, အဝဲကဘၣ်က့ၤဆူ ဟံၣ်လီၤ. မ့တမ့ၢ်ဘၣ်န့ၣ်, အဝဲမ့ၢ်ဘၣ်တၢ်မၤသံအီၤလၢတၢ်ဒုး အပူၤဒီး, ပှၤအဂၤတဂၤကဒိးတ့ဒိးဖျီအသးဒီးပိာ်မုၣ်လၢအဝဲမၤန့ၢ်တၢ် တ့တၢ်ဖျီအတၢ်အၢၣ်လီၤဒီးအီၤန့ၣ်လီၤ.’

⁸သုးခိၣ်သုးနၢ်တဖၣ်ကဘၣ်စံးဘၣ်စ့ၢ်ကီးအပှၤတဖၣ်လၢ, ဖဲအံၤမ့ၢ်ပှၤအိၣ်တဂၤဂၤလၢအသဒံပှံၢ်လီၤမ့ၢ်ဂ့ၤ, အပျံၤတၢ်ဖုးတၢ်မ့ၢ်ဂ့ၤန့ၣ်ဧါ. မ့ၢ်အိၣ်ဒီး, အဝဲကဘၣ်က့ၤဆူဟံၣ်လီၤ. မ့တမ့ၢ်ဘၣ်န့ၣ်, အဝဲကမၤဟးဂီၤကွံာ် ပှၤအဂၤတဖၣ်အသးအဂံၢ်အဘါန့ၣ်လီၤ.

⁹တုၤသုးခိၣ်သုးနၢ်တဖၣ်ကတိၤတၢ်ဆူသုးမုၢ်အအိၣ်ဝံၤန့ၣ်, ပှၤခိၣ်ပှၤနၢ်တဖၣ်ကဘၣ်တၢ်ဃုထၢအီၤလၢပှၤတဖုစုာ်စုာ်အဂီၢ်န့ၣ် လီၤ.

¹⁰ဖဲသုလဲၤထီၣ်ဒုးဝ့ၢ်တဖျၢၣ်န့ၣ်, အဆိကတၢၢ်ဟ့ၣ်အပှၤဂီၢ်မုၢ် အတၢ်ခွဲးတၢ်ယာ်တမံၤလၢကဟ့ၣ်လီၤအသးဒီးပာ်လီၤအစု ကဝဲၤတက့ၢ်.

¹¹အဝဲသ့ၣ်မ့ၢ်အိးထီၣ်အတြဲၤတဖၣ်ဒီးဟ့ၣ်လီၤအသးန့ၣ်, အဝဲသ့ၣ်ခဲလၢာ်ကဘၣ်ကဲထီၣ်သုကုၢ်သုပှၤတဖၣ်ဒီးမၤန့ၢ်သုတၢ် မၤလၢတၢ်မၢဆူၣ်အီၤန့ၣ်လီၤ.

¹²ဘၣ်ဆၣ်ဝ့ၢ်အပှၤဂီၢ်မုၢ်မ့ၢ်တဟ့ၣ်လီၤသးဘၣ်, မ့မ့ၢ်ဃုထၢလၢကဒုးတၢ်န့ၣ်, ကဝီၤဃာ်ဝ့ၢ်န့ၣ်ဒီးသုသုးမုၢ် တက့ၢ်.

¹³ဝံၤဒီး, တုၤယွၤ, သုကစၢ်ယွၤပျဲသုမၤန့ၢ်ဝ့ၢ်န့ၣ်ဒီးမၤသံ ကွံာ်ပှၤပိာ်ခွါခဲလၢာ်လၢအအိၣ်လၢအပူၤတက့ၢ်.

¹⁴ဘၣ်ဆၣ်ဒီး, လၢသုကစၢ်ဒၣ်သုဝဲအဂီၢ်, သုဟံးန့ၢ်, ပိာ်မုၣ်တဖၣ်, ဖိသၣ်တဖၣ်, ဆၣ်ဖိကီၢ်ဖိအဒၢဒီးတၢ်အဂၤခဲလၢာ် လၢဝ့ၢ်ပူၤသ့ဝဲလီၤ. တၢ်လၢအဘၣ်ဃးဒီးသုဒုၣ်သုဒါတဖၣ်ခဲလၢာ်န့ၣ်, သုသူအီၤသ့ဝဲလီၤ. ယွၤဟ့ၣ်လီၤတၢ်န့ၣ်ဆူသုစုပူၤလီၤ.

¹⁵တၢ်န့ၣ်, မ့ၢ်တၢ်လၢသုကဘၣ်မၤဘၣ်ဝ့ၢ်တဖၣ်န့ၣ်ဒ်လဲၣ်, လၢအအိၣ်ယံၤဒီးထံကီၢ်လၢသုကသူၣ်လီၤသုလီၢ်အိၣ်လီၢ်ဆိးလၢ အပူၤန့ၣ်လီၤ.

¹⁶မ့မ့ၢ်, တုၤသုမၤန့ၢ်ဝ့ၢ်တဖၣ်လၢအအိၣ်ဝဲလၢထံကီၢ်လၢယွၤ, သုကစၢ်ယွၤကဟ့ၣ်လီၤသုအပူၤန့ၣ်, မၤသံကွံာ်ပှၤခဲလၢာ်တက့ၢ်.

¹⁷ကယဲၢ်ပှၤဂီၢ်မုၢ်ခဲလၢာ်လၢအမ့ၢ်, ပှၤဃ့ၤသးဖိ, ပှၤအမိၢ်ဖိ, ပှၤကနၤဧၣ်ဖိ, ပှၤပရးစၤဖိ, ပှၤဃံၤဝံဖိဒီးပှၤယဘူၣ်ဖိန့ၣ် မၤဟးဂီၤကွံာ်အီၤစီဖ့ကလ့ၤဒ်ယွၤဟ့ၣ်လီၤတ့ၢ်အကလုၢ်လၢသု ကဘၣ်မၤအီၤန့ၣ်တက့ၢ်.

¹⁸မၤသံကွံာ်အဝဲသ့ၣ်, ဒ်သိးဒီးအဝဲသ့ၣ်ဒုးမၤသုတၢ်ဒဲးဘးထီ ဒါယွၤ, ခီဖျိသိၣ်လိန့ၢ်သုလၢ, သုကမၤတၢ်လီၤသးဘၣ်အၢတဖၣ်လၢအဝဲ သ့ၣ်မၤဝဲ, လၢတၢ်ဘူၣ်ထီၣ်ဘါထီၣ်အယွၤတဖၣ်အပူၤ, သုတသ့ဝဲတဂ့ၤအဂီၢ်န့ၣ် တက့ၢ်.

¹⁹ဖဲသုကျဲးစၢးမၤန့ၢ်ဝ့ၢ်တဖျၢၣ်အခါန့ၣ်, တၢ်ကဝီၤဃာ်အီၤအဆၢ ကတီၢ်မ့ၢ်ယံာ်ထၢဒၣ်လဲာ်, ကူာ်လီၤကွံာ်အသ့ၣ်တဖၣ်လၢတၢ်အီၣ်အသၣ် သ့ဝဲန့ၣ်တဂ့ၤ. အီၣ်အသၣ်, ဘၣ်ဆၣ်မၤဟးဂီၤကွံာ်သ့ၣ်တဖၣ်န့ၣ် တဂ့ၤ. သ့ၣ်တဖၣ်န့ၣ်တမ့ၢ်ဘၣ်သုဒုၣ်သုဒါတဖၣ်ဘၣ်.

²⁰သုကကူာ်လီၤကွံာ်သ့ၣ်အဂၤတဖၣ်ဒီးသူအီၤလၢတၢ်မၤထီၣ်ဟီၣ်ခိၣ် ထီၣ်စိကဝီၤဃးတၢ်အပူၤ, တုၤလၢဝ့ၢ်န့ၣ်ဘၣ်တၢ်မၤန့ၢ်ကွံာ်အီၤတစုန့ၣ်လီၤ.