Read S'gaw Karen လံာ်သိၣ်လီၤသီလီၤတၢ် 23 Bible Online

လံာ်သိၣ်လီၤသီလီၤတၢ် 23 - S'gaw Karen bible

လံာ်သိၣ်လီၤသီလီၤတၢ် 23

¹ပှၤပိာ်ခွါလၢတၢ်ဒ့ကွံာ်အဒံၣ်ချံမ့ၢ်ဂ့ၤ, တၢ်ဒီၣ်တဲာ်ကွံာ်အပိာ်ခွါအက့ၢ်အဂီၤမ့ၢ်ဂ့ၤ, တနုာ်လီၤဘၣ်ဆူယွၤအပှၤဂီၢ်မုၢ်အကျါနီတဂၤဘၣ်.

²ပှၤတဂၤလၢ်လၢ်မ့ၢ်အိၣ်ဖျဲၣ်ထီၣ်လၢမိၢ်ပၢ်လၢတဒိးတ့ဒိးဖျီ အသးတဖၣ်မ့ၢ်ဂ့ၤ, ဒီးပှၤဟဲလီၤစၢၤလီၤသွဲၣ်လၢပှၤဒ်န့ၣ်အသိးမ့ၢ်ဂ့ၤတုၤလီၤ လၢပှၤအစိၤတဆံဒၣ်လဲာ်န့ၣ်, တနုာ်လီၤဘၣ်ဆူယွၤအပှၤဂီၢ်မုၢ်အကျါနီတဂၤဘၣ်.

³ပှၤဧၣ်မိၣ်ဖိမ့ၢ်ဂ့ၤ, ပှၤမိၤအးဖိမ့ၢ်ဂ့ၤ, ဒီးပှၤလၢအလီၤစၢၤလီၤသွဲၣ်လၢအဝဲသ့ၣ်တုၤလီၤလၢပှၤအစိၤ တဆံဒၣ်လဲာ်န့ၣ်, တနုာ်လီၤဘၣ်ဆူယွၤအပှၤဂီၢ်မုၢ်အကျါနီတဂၤဘၣ်.

⁴အဂ့ၢ်ဒ်အံၤ, ဖဲသုဟးထီၣ်လၢကီၢ်အဲၤကူပတူးအပူၤန့ၣ်, အဝဲသ့ၣ်ဂ့ၢ်လိာ်လၢကဟ့ၣ်သုတၢ်အီၣ်ဒီးထံလၢကျဲန့ၣ်လီၤ. ဒီးအဝဲသ့ၣ်ဒိးလဲစီၤဘဧိၢ်အဖိခွါစီၤဘံးလၣ်, လၢအမ့ၢ်ကီၢ်မ့းစပတၤမံ, ပှၤဝ့ၢ်ပသူၢ်ဖိတဂၤဒ်သိးကဆိၣ်အၢသု န့ၣ်လီၤ.

⁵ဘၣ်ဆၣ်ဒီးယွၤသုကစၢ်ယွၤတဒိကနၣ်ဘၣ်စီၤဘံးလၣ်ဘၣ်. အခိၣ်တလိာ်အဝဲလဲလိာ်ကွံာ်တၢ်ဆိၣ်အၢတမံၤဆူတၢ်ဆိၣ်ဂ့ၤတမံၤ မ့ၢ်လၢအဝဲအဲၣ်သုအဃိန့ၣ်လီၤ.

⁶ဖဲတၢ်ဆၢကတီၢ်လၢသုမ့ၢ်ဒံးဒၣ်ပှၤတကလုာ်န့ၣ်, မၤတၢ်နီတမံၤလၢသုကမၤစၢၤပှၤကလုာ်တဖၣ်အံၤမ့ၢ်ဂ့ၤမၤဘီၣ်ထီၣ်ညီထီၣ်အဝဲသ့ၣ်မ့ၢ်ဂ့ၤ, န့ၣ်တဂ့ၤ.

⁷သးဘၣ်အၢပှၤအဒိၣ်တဖၣ်တဂ့ၤ. အဝဲသ့ၣ်မ့ၢ်သုဘူးသုတံၢ်တဖၣ် န့ၣ်လီၤ. ဒီးသးဘၣ်အၢပှၤအဲၤကူပတူးဖိတဖၣ်န့ၣ်တဂ့ၤ, တဘျီန့ၣ်သုအိၣ်ဆိးတ့ၢ်လၢအဝဲသ့ၣ်အကီၢ်ပူၤန့ၣ်လီၤ.

⁸စးထီၣ်လၢအဝဲသ့ၣ်အစၢၤအသွဲၣ်တဖၣ်သၢစိၤတစိၤဒီးဆူညါန့ၣ် တၢ်ကဘၣ်ဂံၢ်ဃုာ်အီၤလၢယွၤအပှၤဂီၢ်မုၢ်အကျါန့ၣ်လီၤ.

⁹ဖဲသုအိၣ်ဆိးလၢတၢ်သူၣ်ဒဲအလီၢ်, ဖဲတၢ်ဒုးတၢ်ယၤအဆၢကတီၢ် န့ၣ်, သုဘၣ်ဟးဆှဲးတၢ်တမံၤလၢ်လၢ်လၢကမၤတကဆှီ သုဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးန့ၣ်လီၤ.

¹⁰ပှၤပိာ်ခွါတဂၤမ့ၢ်အိၣ်ဘၣ်ဖုးဒီးအတၢ်ယွၤလီၤဘၣ်ဃးဒီးပိာ် ခွါလၢမုၢ်နၤန့ၣ်ကဲထီၣ်ပှၤလၢအတကဆှီဘၣ်တဂၤအဃိကဘၣ်ဟးထီၣ် လၢပှၤသူၣ်ဒဲအလီၢ်အချၢန့ၣ်လီၤ.

¹¹ဖဲမုၢ်ဟါလီၤအကတီၢ်န့ၣ်အဝဲကဘၣ်သ့စီကွံာ်အသး, ဒီးဖဲမုၢ်လီၤနုာ်အကတီၢ်န့ၣ်အဝဲဟဲက့ၤနုာ်လီၤဆူတၢ်သူၣ်ဒဲ အလီၢ်သ့န့ၣ်လီၤ.

¹²သုဘၣ်အိၣ်ဒီးတၢ်လီၢ်တတီၤလၢသူၣ်ဒဲအလီၢ်အချၢဒ်သိးသုကလဲၤ ဟးတၢ်အဃၢအဂီၢ်န့ၣ်လီၤ.

¹³စိာ်ဃုာ်ဒီးနီၣ်က့တဘိဒ်တၢ်ပီးတၢ်လီအသိး, ဒ်သိးဖဲသုလဲၤတၢ်အဃၢဝံၤန့ၣ်သုခူၣ်တၢ်ပူၤကသ့ဝဲဒီးမၤ ဘၢအီၤကသ့အဂီၢ်တက့ၢ်.

¹⁴မၤကဆှဲကဆှီသုသူၣ်ဒဲအလီၢ်ဒ်တၢ်ဘူၣ်တၢ်ဘါအိၣ်ဝဲအလုၢ်အလၢ်အသိး, မ့ၢ်လၢယွၤသုကစၢ်ယွၤအိၣ်လၢသုသူၣ်ဒဲအလီၢ်, ဒ်သိးကဒီဒၣ်အိၣ်ပှိၤသုဒီးဟ့ၣ်လီၤသုတၢ်မၤနၢၤလၢ သုဒုၣ်သုဒါအဖီခိၣ်အဃိန့ၣ်တက့ၢ်. မၤတၢ်လၢအတကြၢးတဘၣ်တဃံတလၤနီတမံၤလၢယွၤကဃၣ်ဒူၣ်ချၢကွံာ် အသးလၢသုအဂီၢ်န့ၣ်တဂ့ၤ.

¹⁵ကုၢ်တဂၤမ့ၢ်ဃ့ၢ်ထူၣ်ဖျဲးကွံာ်လၢအကစၢ်အအိၣ်, ဒီးဟဲဆူသုအိၣ်လၢတၢ်ကဟုကယာ်အဂီၢ်န့ၣ်, သုတဘၣ်ဆှၢကဒါက့ၤအီၤဘၣ်.

¹⁶အဝဲကအိၣ်ဆိးဖဲဝ့ၢ်တဖျၢၣ်ဖျၢၣ်လၢအကဃုထၢဝဲ, ဒီးသုတဘၣ်မၤအီၤအၢအၢသီသီဘၣ်.

¹⁷ဒီးပှၤအံၣ်စရ့လးဖိအပိာ်ခွါမ့ၢ်ဂ့ၤ, အပိာ်မုၣ်မ့ၢ်ဂ့ၤ, တဘၣ်ကဲထီၣ်တၢ်လုၢ်လီၢ်အပှၤဃဲသဲမုၣ်နီတဂၤဘၣ်.

¹⁸ကျိၣ်ဧိၤစ့ဧိၤလၢတၢ်မၤန့ၢ်အီၤလၢကျဲဒ်အံၤအသိးစ့ၢ်ကီး, တၢ်တဘၣ်ဟဲစိာ်အီၤဆူယွၤသုကစၢ်ယွၤအဟံၣ်လၢတၢ်ကမၤလၢပှဲၤတၢ် အၢၣ်လီၤတမံၤအဂီၢ်ဘၣ်. အဂ့ၢ်ဒ်အံၤ, ယွၤသးဟ့တၢ်လုၢ်လီၢ်အပှၤဃဲသဲမုၣ်တဖၣ်န့ၣ်လီၤ.

¹⁹ဖဲသုဒုးလိၢ်လီၤကျိၣ်ဧိၤစ့ဧိၤမ့ၢ်ဂ့ၤ, တၢ်အီၣ်တၢ်အီမ့ၢ်ဂ့ၤ, တၢ်တမံၤလၢ်လၢ်မ့ၢ်ဂ့ၤဆူသုတံၤသကိးပှၤအံၣ်စရ့လးဖိကဒဲ ကဒဲအအိၣ်န့ၣ်, ဃ့က့ၤအီၤအအ့ၣ်ထီၣ်တဂ့ၤ.

²⁰သုဃ့တၢ်အအ့ၣ်ထီၣ်သ့ဖဲသုဒုးလိၢ်လီၤတၢ်တမံၤလၢ်လၢ်ဆူ ပှၤတခီဘီမုၢ်ဖိတဖၣ်အအိၣ်, ဘၣ်ဆၣ်ဆူသုတံၤသကိးပှၤအံၣ်စရ့ လးဖိကဒဲကဒဲအအိၣ်န့ၣ်သုဃ့အအ့ၣ်ထီၣ်တသ့ဘၣ်. စူၢ်တၢ်သိၣ်တၢ်ဘျၢအံၤ, ဒီးယွၤသုကစၢ်ယွၤကဆိၣ်ဂ့ၤတၢ်လၢသု မၤတမံၤလၢ်လၢ်လၢကီၢ်လၢသုကလဲၤမၤန့ၢ်အီၤအပူၤန့ၣ်လီၤ.

²¹တုၤသုမၤတၢ်ဆိၣ်လီၤတမံၤဒီးယွၤသုကစၢ်ယွၤန့ၣ်, သုးဆၢသုးကတီၢ်လၢသုကမၤတၢ်လၢသုအၢၣ်လီၤအီၤန့ၣ်တဂ့ၤ. ယွၤကဟံးဃာ်သုဒ်သုတၢ်အၢၣ်လီၤအသိး, ဒီးသုမ့ၢ်တတိၢ်န့ၢ်ဖံးဃာ်အီၤဒီးကကဲထီၣ်တၢ်ဒဲးဘးလၢသု ဂီၢ်န့ၣ်လီၤ.

²²သုမ့ၢ်တမၤတၢ်ဆိၣ်တမံၤဒီးယွၤန့ၣ်, တမ့ၢ်ဘၣ်တၢ်ဒဲးဘးဘၣ်.

²³ဘၣ်ဆၣ်ဒီးသုမ့ၢ်မၤတၢ်ဆိၣ်တမံၤဒ်သုတၢ်သးအိၣ်ဒၣ်ဝဲအသိး န့ၣ်မၤလီၤတံၢ်လၢသုကတိၢ်န့ၢ်ဖံးဃာ်အီၤတက့ၢ်.

²⁴တုၤသုဟးလၢကျဲဖိတဘိလၢပှၤတဂၤဂၤအစပံးလီၢ်အပူၤန့ၣ်, သုအီၣ်စပံးသၣ်တဖၣ်ဒ်သုအဲၣ်ဒိးအီၣ်အသိးသ့ဝဲ, ဘၣ်ဆၣ်ဒီးသုတဘၣ်က့ၤစိာ်အီၤနီတမံၤလၢသုတၢ်ပူၤတၢ်တ့ၤ အပူၤဘၣ်.

²⁵တုၤသုလဲၤတၢ်လၢပှၤတဂၤဂၤအစံာ်ပျီပူၤဒီး, သုအီၣ်ဘုစဲၤတဖၣ်လၢသုဒဲးအီၤလၢသုစုခဲလၢာ်သ့ဝဲ, ဘၣ်ဆၣ်ဒီးသုတဘၣ်ကူးဘုစဲၤနီတစဲၤလၢထးဂဲာ်ဘၣ်.