Read S'gaw Karen လံာ်သိၣ်လီၤသီလီၤတၢ် 26 Bible Online

လံာ်သိၣ်လီၤသီလီၤတၢ် 26 - S'gaw Karen bible

လံာ်သိၣ်လီၤသီလီၤတၢ် 26

¹တုၤသုမၤန့ၢ်ကီၢ်လၢယွၤသုကစၢ်ယွၤဟ့ၣ်လီၤသုဒီးသူၣ်လီၤ သုတၢ်အိၣ်တၢ်ဆိးအလီၢ်ဖဲန့ၣ်ဝံၤအလီၢ်ခံန့ၣ်

²သုဝဲကိးဂၤဒဲးသုကဘၣ်ဒၢနုာ်သုတၤသူတၤသၣ်လၢသုထၢဖှိၣ် က့ၤအီၤအခီၣ်ထံးတပူန့ၣ်ဆူနာ်တဖျၢၣ်အပူၤဒီးလဲၤစိာ်အီၤဆူ တၢ်ဘူၣ်ထီၣ်ဘါထီၣ်အလီၢ်တတီၤန့ၣ်လီၤ.

³လဲၤဆူပှၤလုၢ်တၢ်အခိၣ်အိၣ်မူအိၣ်ဒါလၢဆၢကတီၢ်အဝဲန့ၣ်အအိၣ် ဒီးစံးဘၣ်အီၤ, ခဲအံၤယအၢၣ်လီၤဟ့ၣ်တၢ်သ့ၣ်ညါဆူယွၤလၢယနုာ်လီၤဘၣ်ဆူကီၢ် တဘ့ၣ်လၢအဝဲအၢၣ်လီၤတ့ၢ်တၢ်ဒီးပမိၢ်ပၢ်ဖံဖုလၢပျၢၤတဖၣ်လၢ ကဟ့ၣ်လီၤပှၤအဃိန့ၣ်လီၤ.

⁴ပှၤလုၢ်တၢ်အခိၣ်ကဟံးန့ၢ်နာ်လၢသုအိၣ်ဒီးပာ်လီၤအီၤလၢယွၤ သုကစၢ်ယွၤအတၢ်လုၢ်လီၢ်အမဲာ်ညါန့ၣ်လီၤ.

⁵တုၤနုၤတစုလၢယွၤအမဲာ်ညါသုကဘၣ်ရူးထီၣ်တၢ်ကတိၤတဖၣ်ဒ်အံၤလီၤ. ‘ယပၢ်ဖးဒိၣ်လၢပျၢၤတဂၤလၢအမ့ၢ်ပှၤစူၤရံဖိလၢအဟးဝ့ၤဝီၤ န့ၣ်လဲၤကိးအဟံၣ်ဖိဃီဖိဆူကီၢ်အဲၤကူပတူးဒ်သိးကအိၣ်ဆိးဝဲလီၤ. အဝဲသ့ၣ်လဲၤဖဲန့ၣ်အခါအနီၣ်ဂံၢ်အိၣ်ထဲစှၤဂၤ, ဘၣ်ဆၣ်အဝဲသ့ၣ်ကဲထီၣ်ပှၤဖးဒိၣ်တကလုာ်လၢအဒိၣ်ဒီးအဂံၢ်အဘါဆူၣ်ဝဲန့ၣ်လီၤ.

⁶ပှၤအဲၤကူပတူးဖိတဖၣ်မၤအၢမၤသီပှၤဒီးမၤဆူၣ်ပှၤလၢပကမၤ တၢ်ဒ်ကုၢ်တဖၣ်အသိးန့ၣ်လီၤ.

⁷တုၤနုၤတစုပကိးထီၣ်တၢ်မၤစၢၤဆူယွၤ, ပမိၢ်ပၢ်ဖံဖုလၢပျၢၤတဖၣ်အကစၢ်ယွၤအအိၣ်န့ၣ်လီၤ. အဝဲနၢ်ဟူပှၤဒီးထံၣ်ပတၢ်တူၢ်ဘၣ်ခီၣ်ဘၣ်, တၢ်ကိၢ်တၢ်ဂီၤ, ဒီးတၢ်နးတၢ်ဖှီၣ်တဖၣ်န့ၣ်လီၤ.

⁸လၢအစိဒိၣ်ကမီၤဒိၣ်ဒီးအဂံၢ်အဘါန့ၣ်, အဝဲမၤထူၣ်ဖျဲးထီၣ်ပှၤ လၢကီၢ်အဲၤကူပတူးန့ၣ်လီၤ. အဝဲမၤတၢ်လီၤလးတဖၣ်ဒီးတၢ်လၢအလီၤကမၢကမၣ်တဖၣ်, ဒီးဒုးအိၣ်ထီၣ်တၢ်လီၤပျံၤလီၤဖုးတဖၣ်လၢကမၤအသးန့ၣ်လီၤ.

⁹အဝဲဆှၢဃီၤပှၤဖဲအံၤဒီးဟ့ၣ်ပှၤကီၢ်တဘ့ၣ်လၢအထူးအတီၤဒီး ဟီၣ်ခိၣ်ညၣ်ထ့ၣ်ဂ့ၤဝဲန့ၣ်လီၤ.

¹⁰လၢတၢ်န့ၣ်အဃိခဲအံၤ, တၤသူတၤသၣ်လၢယွၤဟ့ၣ်တ့ၢ်ယၤလၢယကကူး က့ၤအီၤအခီၣ်ထံးတပူန့ၣ်, ယဟဲစိာ်အီၤဆူ ယွၤအအိၣ်န့ၣ်လီၤ.’ အန့ၣ်ဝံၤဒီးပာ်လီၤနာ်လၢယွၤအမဲာ်ညါဒီးဘူၣ်ထီၣ်ဘါထီၣ်တၢ် ဖဲန့ၣ်တက့ၢ်.

¹¹စံးဘျုးကစၢ်ယွၤလၢတၢ်အဂ့ၤတဖၣ်လၢ ယွၤသုကစၢ်ယွၤဟ့ၣ်လီၤသုဝဲဒီးသုပှၤဟံၣ်ဖိဃီဖိ, ဒီးပျဲပှၤလ့ၤဝံဖိတဖၣ်ဒီးပှၤတခီဘီမုၢ်ဖိတဖၣ်လၢအအိၣ် ဆိးလၢသုကျါဘူၣ်သကိးဘါသကိးတၢ်ဒီးသုတက့ၢ်.

¹²သၢနံၣ်တဘျီကိးစုဒဲးန့ၣ်ဟ့ၣ်တၢ်ဆံဆဲၣ်ပူလၢအမ့ၢ် သုတၤသူတၤသၣ်ဆံဆဲၣ်ပူတပူဆူပှၤလ့ၤဝံဖိတဖၣ်, ပှၤတခီဘီမုၢ်ဖိတဖၣ်, ပှၤဖိၣ်ဃဲတဖၣ်ဒီးပှၤမုၣ်ကမဲတဖၣ်အအိၣ်, ဒ်သိးလၢတၢ်အိၣ်မူကရူၢ်ကိးဖုဒဲးအပူၤအဝဲသ့ၣ်ကအိၣ်ဒီးတၢ်ခဲလၢာ်လၢအလိၣ်ဘၣ် ဝဲလၢကအီၣ်ဝဲအဂီၢ်တက့ၢ်. ဖဲသုမၤတၢ်ဒ်အံၤန့ၣ်,

¹³စံးဘၣ်ယွၤ, တၢ်ဆံဆဲၣ်ပူတပူစီဆှံတအိၣ်တ့ၢ်လၢယဟံၣ်ပူၤနီ တမံၤဘၣ်. ယဟ့ၣ်လီၤအီၤဆူပှၤလ့ၤဝံဖိတဖၣ်, ပှၤတခီဘီမုၢ်ဖိတဖၣ်, ပှၤဖိၣ်ဃဲတဖၣ်ဒီးပှၤမုၣ်ကမဲတဖၣ်အအိၣ် ဒ်နမၤလိာ်တ့ၢ်ယၤလၢယကမၤအီၤန့ၣ်လီၤ. နတၢ်မၤလိာ်ဘၣ်ဃးဒီးတၢ်ဆံဆဲၣ်ပူတပူန့ၣ်ယတလဲၤသဒၣ်အီၤမ့ၢ်ဂ့ၤ, သးပ့ၤနီၣ်အီၤမ့ၢ်ဂ့ၤဘၣ်.

¹⁴ဖဲယအိၣ်ဒီးတၢ်သူၣ်အုးသးအုးအခါန့ၣ်ယတအီၣ်တၢ်န့ၣ်နီ တစဲးဘၣ်, ယတဟံးန့ၢ်အီၤနီတစဲးလၢယဟံၣ်ပူၤဖဲယတကဆှီ ဘၣ်ဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးအခါဘၣ်. ဒီးယတဟ့ၣ်လီၤအီၤဒ်တၢ်မၤဘူၣ်အသိးဆူပှၤသံန့ၣ်နီတစဲးဘၣ်. ယစူၢ်နၤ, ယွၤဧၢ, ယမၤတၢ်ခဲလၢာ်ဒ်နတၢ်မၤလိာ်တ့ၢ်အသိးဘၣ်ဃး တၢ်ဆံဆဲၣ်ပူတပူန့ၣ်လီၤ.

¹⁵ကွၢ်လီၤတၢ်လၢနလီၢ်စီဆှံလၢမူခိၣ်ဒီးဆိၣ်ဂ့ၤနပှၤဂီၢ်မုၢ် အံၣ်စရ့လးတက့ၢ်. ဆိၣ်ဂ့ၤစ့ၢ်ကီးကီၢ်လၢအထူးအတီၤဒီးဟီၣ်ခိၣ်ညၣ်ထ့ၣ်ဂ့ၤဝဲ လၢနဟ့ၣ်လီၤပှၤ, ဒ်နအၢၣ်လီၤတ့ၢ်ပမိၢ်ပၢ်ဖံဖုလၢပျၢၤတဖၣ်အသိးန့ၣ်တက့ၢ်.

¹⁶မုၢ်မဆါတနံၤအံၤယွၤသုကစၢ်ယွၤမၤလိာ်သုလၢသုကစူၢ်ကယဲၢ် အဝဲအတၢ်ဘူၣ်တၢ်ဘါအတၢ်သိၣ်တၢ်သီခဲလၢာ်အဃိစူၢ်အီၤလၢ တၢ်သူၣ်တီသးတီလၢသုသးဒီဖျၢၣ်ညါတက့ၢ်.

¹⁷မုၢ်မဆါတနံၤအံၤသုအၢၣ်လီၤသ့ၣ်ညါတ့ၢ်ယွၤ, ဒ်သုကစၢ်ယွၤအသိး, သုအၢၣ်လီၤတ့ၢ်လၢသုကစူၢ်အီၤ, ကတိၢ်န့ၢ်ဖံးဃာ်အဝဲအတၢ်ဘူၣ်တၢ်ဘါအတၢ်သိၣ်တၢ်သီတဖၣ်, ဒီးကမၤတၢ်ခဲလၢာ်ဒ်အဝဲမၤလိာ်ဝဲအသိးန့ၣ်လီၤ.

¹⁸မုၢ်မဆါတနံၤအံၤယွၤတူၢ်လိာ်သုဒ်အပှၤဂီၢ်မုၢ်ဒၣ်ဝဲအသိး, ဒ်အဝဲအၢၣ်လီၤတ့ၢ်တၢ်ဒီးသုအသိးန့ၣ်လီၤ. ဒီးအဝဲမၤလိာ်သုလၢသုကစူၢ်အဝဲအတၢ်ဘူၣ်တၢ်ဘါအတၢ်သိၣ်တၢ်သီခဲလၢာ်န့ၣ်လီၤ.

¹⁹ယွၤကမၤဒိၣ်ထီၣ်သုဒိၣ်န့ၢ်ဒံးပှၤကလုာ်ဂၤတဖၣ်လၢအတ့လီၤဝဲခဲလၢာ်, ဒီးသုကဟဲစိာ်တၢ်စံးထီၣ်ပတြၢၤဒီးတၢ်ယူးယီၣ်အမံၤန့ၣ်လီၤ. သုကမ့ၢ်အဝဲအပှၤဂီၢ်မုၢ်ဒၣ်ဝဲဒ်အဝဲအၢၣ်လီၤတ့ၢ်ဝဲအသိးန့ၣ်လီၤ.”