Read S'gaw Karen လံာ်သိၣ်လီၤသီလီၤတၢ် 27 Bible Online

လံာ်သိၣ်လီၤသီလီၤတၢ် 27 - S'gaw Karen bible

လံာ်သိၣ်လီၤသီလီၤတၢ် 27

¹အန့ၣ်ဝံၤဒီး, စီၤမိၤၡ့ဃုာ်ဒီးကီၢ်အံၣ်စရ့လးအခိၣ်အနၢ်တဖၣ် စံးဘၣ်ပှၤဂီၢ်မုၢ်, “စူၢ်ကယဲၢ်တၢ်သိၣ်လိနဲၣ်ယုၤတဖၣ်လၢယက ဟ့ၣ်လီၤသုလၢမုၢ်မဆါတနံၤအံၤတက့ၢ်.

²မုၢ်တနံၤဖဲသုခီဂာ်ထံကျိယၢ်ဒ့ၣ်ဒီးလဲၤနုာ်ဆူထံကီၢ်လၢ ယွၤ, သုကစၢ်ယွၤကဟ့ၣ်သုန့ၣ်, သုကဘၣ်ပာ်လီၤလၢၢ်ဖးဒိၣ်တနီၤ, ဖှူဘၢအီၤဒီးအီကတ့ၣ်,

³ဒီးလၢအဝဲသ့ၣ်အလိၤန့ၣ်ကွဲးလီၤကယဲၢ်တၢ်ဘူၣ်တၢ်ဘါအတၢ်သိၣ် တၢ်သီတဖၣ်အံၤဒီးတၢ်သိၣ်လိတဖၣ်အံၤတက့ၢ်. ဖဲသုလဲၤနုာ်ဃီၤဆူထံကီၢ်လၢအထူးအတီၤဒီးအဟီၣ်ခိၣ်ညၣ်ထ့ၣ် ဂ့ၤဝဲလၢယွၤ, သုမိၢ်ပၢ်ဖံဖုလၢပျၢၤအကစၢ်ယွၤအၢၣ်လီၤတ့ၢ်သု,

⁴ဒီးသုအိၣ်လၢထံကျိယၣ်ဒ့ၣ်အဝၢ်ဘးခီန့ၣ်, ပာ်လီၤလၢၢ်သ့ၣ်တဖၣ်အံၤလၢကစၢၢ်ဧ့ၤဘါလးအဒီခိၣ်, ဒ်ယသိၣ်လိနဲၣ်ယုၤသုတနံၤအံၤ, ဒီးဖှူဘၢအီၤဒီးအီကတ့ၣ်တက့ၢ်.

⁵ဘှီထီၣ်တၢ်လုၢ်လီၢ်တခါဖဲန့ၣ်, လၢအဘၣ်တၢ်မၤအီၤဒီးလၢၢ်တဖၣ် လၢတၢ်တသူတ့ၢ်ဘၣ်ထးအပီးအလီတဖၣ်လၢအဖီခိၣ်နီတမံၤတက့ၢ်.

⁶အဂ့ၢ်ဒ်အံၤ, တၢ်လုၢ်လီၢ်တခါလၢ်လၢ်လၢသုဘှီထီၣ်အီၤလၢယွၤ, သုကစၢ်ယွၤအဂီၢ်န့ၣ်, ကဘၣ်တၢ်မၤဒၣ်အီၤလၢလၢၢ်တဖၣ်လၢတၢ်တကူး တဲာ်အီၤဘၣ်န့ၣ်လီၤ. ဖဲန့ၣ်သုကဘၣ်လုၢ်ထီၣ်တၢ်လုၢ်တၢ်ပာ်တဖၣ်လၢတၢ်ကဘၣ်ဆိၣ်ကဲၤအီၤ,

⁷ဒီးဖဲန့ၣ်သုကဘၣ်လုၢ်ထီၣ်ပာ်ထီၣ်တၢ်ဒီးအီၣ်သုတၢ်လုၢ်မၤဃူ မၤဖိးတဖၣ်ဒီးစံးဘျုးစံးဖှိၣ်တၢ်အိၣ်ဒီးတၢ်သူၣ်ဖှံသးညီလၢယွၤ, သုကစၢ်ယွၤအမဲာ်ညါန့ၣ်လီၤ.

⁸လၢလၢၢ်တဖၣ်လၢတၢ်ဖှူဘၢအီၤဒီးအီကတ့ၣ်အလိၤန့ၣ်ကွဲးလီၤ ကစၢ်ယွၤအတၢ်ဘူၣ်တၢ်ဘါအတၢ်သိၣ်တၢ်သီတဖၣ်အတၢ်ကတိၤ အဖျၢၣ်ခဲလၢာ်အိၣ်ဖျါတြၢၢ်ကလာ်တက့ၢ်.”

⁹အန့ၣ်ဝံၤဒီး, စီၤမိၤၡ့ဃုာ်ဒီးပှၤလ့ၤဝံဖိပှၤလုၢ်တၢ်အခိၣ် တဖၣ်စံးဘၣ်ကယဲၢ်ကီၢ်အံၣ်စရ့လးအပှၤဂီၢ်မုၢ်, “ကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, ပာ်သူၣ်ပာ်သးစီၣ်ဝဲၤ ကဲၤဒီးဒိကနၣ်ယၤလီၤတံၢ်လီၤဆဲးတက့ၢ်. တနံၤအံၤသုကဲထီၣ်လံယွၤ, သုကစၢ်ယွၤအပှၤဂီၢ်မုၢ်လံ,

¹⁰လၢတၢ်န့ၣ်အဃိစူၢ်အီၤဒီးတိၢ်န့ၢ်ဖံးဃာ်ကယဲၢ်အဝဲအတၢ်ဘူၣ်တၢ် ဘါအတၢ်သိၣ်တၢ်သီတဖၣ်လၢယဟ့ၣ်လီၤသုတနံၤအံၤန့ၣ်တက့ၢ်.”

¹¹ဝံၤဒီးစီၤမိၤၡ့စံးဘၣ်ကီၢ်အံၣ်စရ့လးအပှၤဂီၢ်မုၢ်. “ဖဲသုခီဂာ်ကွံာ်ထံကျိယၢ်ဒ့ၣ်ဝံၤန့ၣ်, ပှၤအဒူၣ်လၢလာ်တဖၣ်အံၤကဘၣ်ဆၢထၢၣ်ဝဲလၢကစၢၢ်ကရံးစံၣ်အဒီခိၣ် ဖဲတၢ်ဆိၣ်ဂ့ၤတဖၣ်ဘၣ်တၢ်ယၢၤထီၣ်အီၤလၢပှၤဂီၢ်မုၢ်အဖီခိၣ် န့ၣ်လီၤ. ပှၤအဒူၣ်တဖၣ်န့ၣ်မ့ၢ်ဝဲ, စူၤမ့းအိၣ်အဒူၣ်, လ့ၤဝံအဒူၣ်, ယူဒၤအဒူၣ်, ယံးစၣ်ကၢ်အဒူၣ်, ယိၤသးအဒူၣ်ဒီးဘံၣ်ယၤမံၣ် အဒူၣ်န့ၣ်လီၤ.

¹³ဒီးပှၤအဒူၣ်လၢလာ်တဖၣ်အံၤကဆၢထၢၣ်ဝဲလၢကစၢၢ်ဧ့ၤဘါလးအဒီ ခိၣ်ဖဲတၢ်ဆိၣ်အၢတဖၣ်ဘၣ်တၢ်ယၢၤထီၣ်အီၤန့ၣ်လီၤ. ပှၤအဒူၣ်တဖၣ်န့ၣ်မ့ၢ်ဝဲရူၤဘ့ၣ်အဒူၣ်, ကးအဒူၣ်, အၤၡ့ၢ်အဒူၣ်, စဘူၤလိၣ်အဒူၣ်, ဒၣ်အဒူၣ်ဒီးနးသၤလံအဒူၣ်န့ၣ် လီၤ.

¹⁴ပှၤလ့ၤဝံဖိတဖၣ်ကဘၣ်ကိးထီၣ်တၢ်ကတိၤတဖၣ်အံၤလၢတၢ်ကလုၢ်အသီၣ် ဖးဒိၣ်တမံၤလီၤ.

¹⁵ကစၢ်ယွၤအတၢ်ဆိၣ်အၢအိၣ်ဝဲလၢပှၤတဂၤလၢ်လၢ်အလိၤ, ပှၤလၢအမၤတၢ်ဂီၤတၢ်ဖီၣ်တခါလၢလၢၢ်မ့ၢ်ဂ့ၤ, သ့ၣ်မ့ၢ်ဂ့ၤ, ထးဒီးတိၢ်, စ့ဃါဃုာ်သးတဖၣ်မ့ၢ်ဂ့ၤဒီးဘါထီၣ် ခူသူၣ်အီၤန့ၣ်လီၤ. ယွၤသးဟ့တၢ်ဘါထီၣ်တၢ်ဂီၤတၢ်ဖီၣ်န့ၣ်လီၤ.” ဒီးကယဲၢ်ပှၤဂီၢ်မုၢ်ခဲလၢာ်ကစံးဆၢဝဲ, “မ်အလၢထီၣ်ပှဲၤထီၣ် တက့ၢ်.”

¹⁶“ကစၢ်ယွၤအတၢ်ဆိၣ်အၢအိၣ်ဝဲလၢပှၤတဂၤလၢ်လၢ်အလိၤ, ပှၤလၢတစူၢ်ဘၣ်အပၢ်မ့ၢ်ဂ့ၤအမိၢ်မ့ၢ်ဂ့ၤန့ၣ်လီၤ.” ဒီးကယဲၢ်ပှၤဂီၢ်မုၢ်ခဲလၢာ်ကစံးဆၢဝဲ, “မ်အလၢထီၣ်ပှဲၤထီၣ် တက့ၢ်.”

¹⁷“ကစၢ်ယွၤအတၢ်ဆိၣ်အၢအိၣ်ဝဲလၢပှၤတဂၤလၢ်လၢ်အလိၤ, ပှၤလၢအသုးပှၤလၢအဃၢၤတဂၤအကီၢ်အဃၢၤအပနီၣ်န့ၣ်လီၤ.” ဒီးကယဲၢ်ပှၤဂီၢ်မုၢ်ခဲလၢာ်ကစံးဆၢဝဲ, “မ်အလၢထီၣ်ပှဲၤထီၣ် တက့ၢ်.”

¹⁸“ကစၢ်ယွၤအတၢ်ဆိၣ်အၢအိၣ်ဝဲလၢပှၤတဂၤလၢ်လၢ်အလိၤ, ပှၤတဂၤလၢအဆှၢပှၤမဲာ်ဘျီၣ်တဂၤဆူကျဲကမၣ်အပူၤန့ၣ်လီၤ.” ဒီးကယဲၢ်ပှၤဂီၢ်မုၢ်ခဲလၢာ်ကစံးဆၢဝဲ, “မ်အလၢထီၣ်ပှဲၤထီၣ် တက့ၢ်.”

¹⁹“ကစၢ်ယွၤအတၢ်ဆိၣ်အၢအိၣ်ဝဲလၢပှၤတဂၤလၢ်လၢ်အလိၤ, ပှၤလၢအထုးထီၣ်ကွံာ်ပှၤတခီဘီမုၢ်ဖိတဖၣ်, ပှၤဖိၣ်ဃဲတဖၣ်ဒီးပှၤမုၣ်ကမဲတဖၣ်လၢအဝဲသ့ၣ်အတၢ်ခွဲးတၢ်ယာ် တဖၣ်န့ၣ်လီၤ.” ဒီးကယဲၢ်ပှၤဂီၢ်မုၢ်ခဲလၢာ်ကစံးဆၢဝဲ, “မ်အလၢထီၣ်ပှဲၤထီၣ် တက့ၢ်.”

²⁰“ကစၢ်ယွၤအတၢ်ဆိၣ်အၢအိၣ်ဝဲလၢပှၤတဂၤလၢ်လၢ်အလိၤ, ပှၤလၢအမၤမဲာ်ဆှးအပၢ်ခီဖျိမံဃုာ်ဒီးအပၢ်အမါတဖၣ်အကျါတဂၤ ဂၤန့ၣ်လီၤ.” ဒီးကယဲၢ်ပှၤဂီၢ်မုၢ်ခဲလၢာ်ကစံးဆၢဝဲ, “မ်အလၢထီၣ်ပှဲၤထီၣ် တက့ၢ်.”

²¹“ကစၢ်ယွၤအတၢ်ဆိၣ်အၢအိၣ်ဝဲလၢပှၤတဂၤလၢ်လၢ်အလိၤ, ပှၤလၢအမံဃုာ်, အိၣ်ဃုာ်ဒီးဆၣ်ဖိကီၢ်ဖိတဒုန့ၣ်လီၤ.” ဒီးကယဲၢ်ပှၤဂီၢ်မုၢ်ခဲလၢာ်ကစံးဆၢဝဲ, “မ်အလၢထီၣ်ပှဲၤထီၣ် တက့ၢ်.”

²²“ကစၢ်ယွၤအတၢ်ဆိၣ်အၢအိၣ်ဝဲလၢပှၤတဂၤလၢ်လၢ်အလိၤ, ပှၤလၢအမံဃုာ်ဒီးအဒီပုၢ်ဝဲၢ်မုၣ်ဒၣ်ဝဲမ့ၢ်ဂ့ၤ, အဒီပုၢ်ဝဲၢ်မုၣ်လၢအမ့ၢ်အမိၢ်အဖိမုၣ်မ့တမ့ၢ်အပၢ်အဖိမုၣ်မ့ၢ် ဂ့ၤန့ၣ်လီၤ.” ဒီးကယဲၢ်ပှၤဂီၢ်မုၢ်ခဲလၢာ်ကစံးဆၢဝဲ, “မ်အလၢထီၣ်ပှဲၤထီၣ် တက့ၢ်.”

²³“ကစၢ်ယွၤအတၢ်ဆိၣ်အၢအိၣ်ဝဲလၢပှၤတဂၤလၢ်လၢ်အလိၤ, ပှၤလၢအမံဃုာ်ဒီးအမံၤပှၢ်ပိာ်မုၣ်န့ၣ်လီၤ.” ဒီးကယဲၢ်ပှၤဂီၢ်မုၢ်ခဲလၢာ်ကစံးဆၢဝဲ, “မ်အလၢထီၣ်ပှဲၤထီၣ် တက့ၢ်.”

²⁴“ကစၢ်ယွၤအတၢ်ဆိၣ်အၢအိၣ်ဝဲလၢပှၤတဂၤလၢ်လၢ်အလိၤ, ပှၤလၢအမၤသံတၢ်လၢတၢ်ခူသူၣ်အပူၤန့ၣ်လီၤ.” ဒီးကယဲၢ်ပှၤဂီၢ်မုၢ်ခဲလၢာ်ကစံးဆၢဝဲ, “မ်အလၢထီၣ်ပှဲၤထီၣ် တက့ၢ်.”

²⁵“ကစၢ်ယွၤအတၢ်ဆိၣ်အၢအိၣ်ဝဲလၢပှၤတဂၤလၢ်လၢ်အလိၤ, ပှၤလၢအတူၢ်လိာ်တိၢ်စ့ဒ်သိးကမၤသံပှၤတဂၤလၢအတၢ်ကမၣ်တအိၣ်ဘၣ် အဂီၢ်န့ၣ်လီၤ.” ဒီးကယဲၢ်ပှၤဂီၢ်မုၢ်ခဲလၢာ်ကစံးဆၢဝဲ, “မ်အလၢထီၣ်ပှဲၤထီၣ် တက့ၢ်.”

²⁶“ကစၢ်ယွၤအတၢ်ဆိၣ်အၢအိၣ်ဝဲလၢပှၤတဂၤလၢ်လၢ်အလိၤ, ပှၤလၢတစူၢ်ဘၣ်ကယဲၢ်ကစၢ်ယွၤအတၢ်ဘူၣ်တၢ်ဘါအတၢ်သိၣ်တၢ်သီတဖၣ် ဒီးတၢ်သိၣ်လိတဖၣ်န့ၣ်လီၤ.” ဒီးကယဲၢ်ပှၤဂီၢ်မုၢ်ခဲလၢာ်ကစံးဆၢဝဲ, “မ်အလၢထီၣ်ပှဲၤထီၣ် တက့ၢ်.”