S'gaw Karen bible online

လံာ်သိၣ်လီၤသီလီၤတၢ် 28

¹သုမ့ၢ်စူၢ်ယွၤ, သုကစၢ်ယွၤဒီးတိၢ်န့ၢ်ဖံးဃာ်အဝဲအတၢ်မၤလိာ် တဖၣ်လၢယဟ့ၣ်လီၤသုတနံၤအံၤ, လၢတၢ်သးတီအပူၤန့ၣ်, အဝဲကမၤဒိၣ်ထီၣ်သုအါန့ၢ်ဒံးပှၤကလုာ်အဂၤလၢဟီၣ်ခိၣ်ချၢအံၤ တကလုာ်လၢ်လၢ်တက့ၢ်န့ၣ်လီၤ.

²စူၢ်ယွၤ, သုကစၢ်ယွၤ, ဒီးကယဲၢ်တၢ်ဆိၣ်ဂ့ၤတဖၣ်အံၤကကဲ ထီၣ်သုတၢ်န့ၣ်လီၤ.

³ယွၤကဆိၣ်ဂ့ၤသုခူဧိၤဝ့ၢ်ဧိၤတဖၣ်ဒီးသုစံာ်ဧိၤပှဲၤဧိၤ တဖၣ်န့ၣ်လီၤ.

⁴ယွၤကဆိၣ်ဂ့ၤသုလၢဖိတဖၣ်အါအါဂီၢ်ဂီၢ်, ဒီးတၢ်မုၢ်တၢ်ဘိ တၤသူတၤသၣ်အါအါဂီၢ်ဂီၢ်, ဒီးဂီၤဘုၣ်ဂီၤဖံးဒီးသိဂီၢ် မုၢ်ဂီၢ်ပၤန့ၣ်လီၤ.

⁵ယွၤကဆိၣ်ဂ့ၤသုဘုဧိၤဟုဧိၤတဖၣ်ဒီးတၢ်အီၣ်လၢသုကတဲာ်ကတီၤ အီၤလၢတၢ်န့ၣ်တဖၣ်န့ၣ်လီၤ.

⁶ယွၤကဆိၣ်ဂ့ၤတၢ်ကိးမံၤဒဲးလၢသုမၤအီၤန့ၣ်လီၤ.

⁷ယွၤကမၤနၢၤကွံာ်သုဒုၣ်သုဒါတဖၣ်ဖဲအဝဲသ့ၣ်ဟဲထီၣ်ဒုးသု န့ၣ်လီၤ. အဝဲသ့ၣ်ကဟဲထီၣ်ဒုးသုထဲလၢကျိၤကျဲတကျိၤဧိၤ, ဘၣ်ဆၣ်အဝဲသ့ၣ်ကဃ့ၢ်ကွံာ်လၢသုအိၣ်လၢကျိၤကျဲခဲလၢာ်အပူၤ န့ၣ်လီၤ.

⁸ယွၤ, သုကစၢ်ယွၤကဆိၣ်ဂ့ၤသုတၢ်မၤဒီးမၤပှဲၤသုသိၣ်ဧိၤဖီ ဧိၤဒီးသုဘုသၣ်ဘုချံဒီးအဝဲကဆိၣ်ဂ့ၤသုလၢကီၢ်လၢအဝဲ ဟ့ၣ်လီၤသုအပူၤန့ၣ်လီၤ.

⁹သုမ့ၢ်စူၢ်ယွၤ, သုကစၢ်ယွၤဒီးမၤကယဲၢ်တၢ်လၢအမၤလိာ်သု ခဲလၢာ်န့ၣ်, အဝဲကဒုးကဲထီၣ်သုလၢအကစၢ်ဒၣ်ဝဲအပှၤဂီၢ်မုၢ်, ဒ်အဝဲအၢၣ်လီၤတ့ၢ်ဝဲအသိးန့ၣ်လီၤ.

¹⁰အန့ၣ်ဒီး, ကယဲၢ်ပှၤဂီၢ်မုၢ်ခဲလၢာ်လၢဟီၣ်ခိၣ်ချၢ, ကထံၣ်လၢယွၤဃုထၢတ့ၢ်သုဒ်သိးသုကမ့ၢ်အကစၢ်ဒၣ်ဝဲ အပှၤဂီၢ်မုၢ်, ဒီးအဝဲသ့ၣ်ကပျံၤဘၣ်သုန့ၣ်လီၤ.

¹¹ယွၤကဟ့ၣ်သုလၢဖိတဖၣ်အါအါဂီၢ်ဂီၢ်, ဂီၤဘုၣ်ဂီၤဖံးအါအါ ဂီၢ်ဂီၢ်, ဒီးတၢ်မုၢ်တၢ်ဘိတၤသူတၤသၣ်အါအါကလဲာ်လၢကီၢ် တဘ့ၣ်လၢအဝဲအၢၣ်လီၤတ့ၢ်သုမိၢ်ပၢ်ဖံဖုလၢပျၢၤတဖၣ်လၢ ကဟ့ၣ်လီၤသု, အပူၤန့ၣ်လီၤ.

¹²အဝဲကဒုးစူၤလီၤတၢ်လၢအဆၢကတီၢ်ဒၣ်ဝဲအပူၤ, လၢအတၢ်ပာ်ဖှိၣ်အဟံၣ်အထူးအတီၤလၢအအိၣ်ဝဲလၢမူကပိာ်လိၤန့ၣ်, ဒီးဆိၣ်ဂ့ၤသုတၢ်မၤခဲလၢာ်တုၤဒၣ်လဲာ်, သုကဒုးလိၢ်ဘၣ်တၢ်ဆူပှၤအါကလုာ်, ဘၣ်ဆၣ်သုလိၢ်န့ၢ်တၢ်လၢအဝဲ သ့ၣ်တကလုာ်ဂ့ၤတကလုာ်ဂ့ၤအအိၣ်, အလီၢ်တအိၣ်ဘၣ်န့ၣ်လီၤ.

¹³ယွၤ, သုကစၢ်ယွၤကဒုးကဲထီၣ်သုလၢပှၤခိၣ်ပှၤနၢ်လၢပှၤကလုာ် တဖၣ်အဖီခိၣ်ဒီးတမ့ၢ်ဘၣ်ပှၤတဖုလၢအပိာ်ပှၤအခံဘၣ်န့ၣ်လီၤ. သုမ့ၢ်စူၢ်ကယဲၢ်အဝဲအတၢ်မၤလိာ်တဖၣ်လၢယဟ့ၣ်လီၤသုတနံၤအံၤ လၢတၢ်သးတီန့ၣ်, ထီဘိသုကဘီၣ်ထီၣ်ညီထီၣ်ဒီးတဆံးလီၤစှၤလီၤနီတစုဘၣ်န့ၣ် လီၤ.

¹⁴ဘၣ်ဆၣ်သုတဘၣ်လဲၤကပာ်ကွံာ်အီၤလၢကျဲနီတဘိမ့ၢ်ဂ့ၤ, ဘူၣ်ထီၣ်ဘါထီၣ်ဒီးမၤကစၢ်အဂၤတဖၣ်အတၢ်မ့ၢ်ဂ့ၤ, နီတစုဘၣ်.

¹⁵မ့မ့ၢ်, သုမ့ၢ်တစူၢ်ဘၣ်ယွၤ, သုကစၢ်ယွၤဒီးတတိၢ်န့ၢ်ဖံးဃာ် ဘၣ်ကယဲၢ်အဝဲအတၢ်မၤလိာ်တဖၣ်ဒီးတၢ်ဘူၣ်တၢ်ဘါအတၢ်သိၣ်တၢ်သီ တဖၣ်လၢယဟ့ၣ်လီၤသုတနံၤအံၤလၢတၢ်သးတီန့ၣ်, ကယဲၢ်တၢ်အၢတၢ် သီတဖၣ်အံၤကလီၤဘၣ်လၢသုလိၤန့ၣ်လီၤ.

¹⁶ယွၤကဆိၣ်အၢသုခူဧိၤဝ့ၢ်ဧိၤတဖၣ်ဒီးသုစံာ်ဧိၤပှဲၤဧိၤတဖၣ် န့ၣ်လီၤ.

¹⁷ယွၤကဆိၣ်အၢသုဘုဧိၤဟုဧိၤတဖၣ်ဒီးတၢ်အီၣ်လၢသုကတဲာ်ကတီၤ အီၤလၢတၢ်န့ၣ်တဖၣ်န့ၣ်လီၤ.

¹⁸ယွၤကဆိၣ်အၢသုခီဖျိဟ့ၣ်သုလၢဖိတဖၣ်ထဲစှၤဂၤ, တၢ်မုၢ်တၢ်ဘိ, တၤသူတၤသၣ်ထဲတဆံးတက့ၢ်ဒီးဂီၤဘုၣ်ဂီၤဖံး ဒီးသိထဲစှၤကိာ်ဧိၤန့ၣ်လီၤ.

¹⁹ယွၤကဆိၣ်အၢတၢ်လၢသုမၤအီၤတမံၤလၢ်လၢ်န့ၣ်လီၤ.

²⁰သုမ့ၢ်မၤတၢ်အၢဒီးစူးကွံာ်ညိကွံာ်ယွၤန့ၣ်, အဝဲကဒုးလီၤဘၣ်တၢ်တတၢးတနါ, တၢ်သဘံၣ်ဘုၣ်လၢသုလိၤဒီးတၢ် ကိၢ်တၢ်ဂီၤလၢတၢ်တမံၤလၢ်လၢ်လၢသုမၤအီၤအပူၤလီၤ.

²¹အဝဲကဆှၢဃီၤတၢ်ဆူးတၢ်ဆါတမံၤဝံၤတမံၤလၢသုလိၤတုၤလီၤလၢ သုကျါပှၤတအိၣ်လီၤတဲာ်တ့ၢ်ဘၣ်နီတဂၤလၢ ကီၢ်လၢသုကဘၣ်မၤန့ၢ်အီၤအပူၤဘၣ်န့ၣ်လီၤ.

²²ယွၤကတီၢ်သုဒီးတၢ်ဆူးတၢ်ဆါတဖၣ်လၢအဘၣ်ကူဘၣ်ဂာ်တၢ်သ့, အိၣ်ဒီးတၢ်ညိးထီၣ်ဒီးတၢ်လိၤကိၢ်, အဝဲကဆှၢလီၤတၢ်ယီၤဃ့ဒီးကလံၤကိၢ်တဖၣ်လၢကမၤဟးဂီၤကွံာ် သုတၢ်မုၢ်တၢ်ဘိတဖၣ်န့ၣ်လီၤ. တၢ်တတၢးတနါတဖၣ်အံၤကအိၣ်ဒီးသုတုၤလီၤလၢသုသံတစုန့ၣ်လီၤ.

²³တၢ်တဟဲစူၤလီၤဘၣ်နီတစဲးဘၣ်, ဒီးသုဟီၣ်ခိၣ်တဖၣ်ကကိၤထီၣ် ဝဲဒ်ထးအသိးန့ၣ်လီၤ.

²⁴လၢတၢ်ဟဲစူၤအလီၢ်န့ၣ်, ယွၤကဆှၢလီၤဖၣ်ကမူၣ်ကလံၤမုၢ်တဖၣ်ဒီး မဲးကလံၤမုၢ်တဖၣ်တုၤလီၤလၢသုဘၣ်တၢ်မၤဟးဂီၤကွံာ်သုန့ၣ်လီၤ.

²⁵ယွၤကဟ့ၣ်သုဒုၣ်သုဒါတဖၣ်အတၢ်မၤနၢၤလၢသုဖီခိၣ်လီၤ. သုကလဲၤထီၣ်ဒုးအဝဲသ့ၣ်လၢကျိၤကျဲတကျိၤ, ဘၣ်ဆၣ်သုကဘၣ်ဃ့ၢ်ကွံာ်လၢအဝဲသ့ၣ်အအိၣ်လၢကျိၤကျဲခဲလၢာ်အပူၤ, ဒီးကယဲၢ်ပှၤဂီၢ်မုၢ်ခဲလၢာ်လၢဟီၣ်ခိၣ်ချၢကပျံၤဘၣ်ဖုးဘၣ်တၢ် ဖဲအဝဲသ့ၣ်ထံၣ်တၢ်လၢအမၤအသးဒီးသုန့ၣ်လီၤ.

²⁶ဖဲသုသံန့ၣ်, ထိၣ်တဖၣ်ဒီးဆၣ်ဖိကီၢ်ဖိအမံၤတဖၣ်ကဟဲဒီးအီၣ် ကွံာ်သုစိၣ်တဖၣ်, ဒီးပှၤတအိၣ်ဘၣ်နီတဂၤလၢကမၤပျံၤမၤဖုးဒီးဃါကွံာ်အဝဲသ့ၣ် န့ၣ်ဘၣ်.

²⁷ယွၤကဒုးလီၤဘၣ်တၢ်ဝ့တဖၣ်လၢသုလိၤ, ဒ်အမၤတ့ၢ်ဝဲလၢပှၤအဲၤကူပတူးဖိတဖၣ်အလိၤအသိးန့ၣ်လီၤ. အဝဲကမၤပှဲၤသုနီၢ်ခိဒီဂၤညါဒီးတၢ်ပူၤလီၢ်တဖၣ်လီၤ. သုကဘၣ်တၢ်လုၣ်ဘၢသုဒီးတၢ်သးဃ့တဖၣ်ဒီးတၢ်ကသးသု, ဘၣ်ဆၣ်တၢ်မၤဘျါက့ၤသုတအိၣ်ဘၣ်နီတမံၤဘၣ်.

²⁸ယွၤကမၤလီၤမၢ်ကွံာ်သုသးလၢအသ့ၣ်ညါတၢ်သ့, အဝဲကတီၢ်သုဒီးတၢ်မဲာ်ဘျီၣ်ဒီးတၢ်သးကဒံကဒါလီၤ.

²⁹သုကဟးပုာ်ကလၢၢ်တၢ်လၢမုၢ်ထူၣ်အခါဒ်ပှၤမဲာ်ဘျီၣ်တဂၤအသိး, ဒီးသုဃုထံၣ်သုကျဲတသ့ဝဲဘၣ်. လၢသုမၤတၢ်တမံၤလၢ်လၢ်အပူၤန့ၣ်, သုတဘီၣ်ထီၣ်ညီထီၣ်ဘၣ်. သုကဘၣ်တၢ်မၤနၢၤမၤပ့ၤသုဒီးဂုာ်န့ၢ်ဝာ်န့ၢ်သုတပယူာ်ဃီ ဒီးပှၤတအိၣ်ဘၣ်လၢကမၤစၢၤသုနီတဂၤဘၣ်.

³⁰သုကမၤတၢ်အၢၣ်လီၤအီလီၤဒီးပိာ်မုၣ်သးစၢ်တဂၤလၢတၢ်တ့တၢ်ဖျီအဂီၢ်, ဘၣ်ဆၣ်ပှၤအဂၤတဂၤဒၣ်ကဖျီအသးဒီးအီၤန့ၣ်လီၤ. သုကဘှီထီၣ်ဟံၣ်တဖျၢၣ်, ဘၣ်ဆၣ်သုတအိၣ်တဆိးဘၣ်လၢအပူၤလ့ၤ တက့ၤဘၣ်. သုကသူၣ်လီၤဖျးလီၤစပံးလီၢ်တလီၢ်, ဘၣ်ဆၣ်သုတအီၣ်ဘၣ်အစပံးသၣ်တဖၣ်လ့ၤတက့ၤဘၣ်.

³¹သုဂီၤဘုၣ်ဂီၤဖံးကဘၣ်တၢ်မၤသံကွံာ်အီၤဖဲဒၣ်သုမဲာ်ညါ, ဘၣ်ဆၣ်သုတအီၣ်ဘၣ်တၢ်ညၣ်နီတစဲးဘၣ်. သုကသ့ၣ်ယီၤတဖၣ်ကဘၣ်တၢ်မိၤကွံာ်အီၤဖဲသုကွၢ်အီၤအဖၢမုၢ်ဒၣ် လဲာ်, ဒီးအဝဲသ့ၣ်တဘၣ်တၢ်ဟ့ၣ်ကဒါက့ၤဘၣ်အီၤဆူသု အိၣ်ဘၣ်. သုသိတဖၣ်ကဘၣ်တၢ်ဟ့ၣ်ကွံာ်အီၤဆူသုဒုၣ်သုဒါတဖၣ်, ဒီးပှၤလၢအကမၤစၢၤသုတအိၣ်ဘၣ်နီတဂၤဘၣ်.

³²သုဖိခွါတဖၣ်ဒီးဖိမုၣ်တဖၣ်ကဘၣ်တၢ်ဟ့ၣ်လီၤကွံာ်အီၤဆူပှၤ ထံဂၤကီၢ်ဂၤတဖၣ်အစုပူၤဒ်ကုၢ်တဖၣ်အသိးဖဲသုကွၢ်အီၤအဖၢမုၢ်ဒၣ်လဲာ်လီၤ. ကိးမုၢ်နံၤဒဲးန့ၣ်သုမဲာ်ချံတဖၣ်ကလီၤဘှံးကွံာ်ကလီကလီလၢ တၢ်ခိးကွၢ်တၢ်ကလီကလီလၢသုဖိတဖၣ်အတၢ်ဟဲက့ၤကဒါက့ၤအဂီၢ် န့ၣ်လီၤ.

³³ပှၤကလုာ်တကလုာ်လၢထံဂၤကီၢ်ဂၤတခီကဟံးန့ၢ်ကွံာ်ကယဲၢ်တၢ်မုၢ် တၢ်ဘိတၤသူတၤသၣ်တဖၣ်လၢသုကျဲးစၢးမၤတ့ၢ်ဆူၣ်ဆူၣ်ဒီးသူၣ် လီၤဖျးလီၤအီၤ, ဖဲသုတဒိးန့ၢ်တၢ်နီတမံၤဘၣ်, မ့မ့ၢ်တခီသုဘၣ်တၢ်မၤနၢၤမၤပ့ၤ, မၤအၢမၤနးသုဆါဆါကလဲာ် တပယူာ်ဃီန့ၣ်လီၤ.

³⁴သုတၢ်တူၢ်ဘၣ်ခီၣ်ဘၣ်တဖၣ်ကမၤလီၤမၢ်ကွံာ်သုသးလၢအသ့ၣ်ညါတၢ် သ့န့ၣ်လီၤ.

³⁵ယွၤကမၤပှဲၤသုခီၣ်တဖၣ်ဒီးတၢ်ပူၤလီၢ်လၢအဆါမးဒီးတၢ်မၤဘျါအီၤတန့ၢ်တဖၣ်လီၤ. သုကအိၣ်ပှဲၤဒီးတၢ်ဝ့တဖၣ်စးထီၣ်လၢသုခိၣ်တုၤလၢသုခီၣ်န့ၣ်လီၤ.

³⁶ယွၤကစိာ်ယံၤကွံာ်သုဒီးသုစီၤပၤဆူထံကီၢ်အဂၤတဘ့ၣ်, ဖဲသုဝဲမ့ၢ်ဂ့ၤ, သုမိၢ်ပၢ်ဖံဖုလၢပျၢၤမ့ၢ်ဂ့ၤတအိၣ်ဆိး တ့ၢ်ဘၣ်လၢအပူၤကွံာ်နီတဘျီဘၣ်န့ၣ်လီၤ. ဖဲန့ၣ်သုကမၤကစၢ်တဖၣ်လၢတၢ်ဘှီအီၤလၢသ့ၣ်ဒီးလၢၢ်အတၢ်န့ၣ် လီၤ.

³⁷လၢထံကီၢ်တဖၣ်ဖဲယွၤကမၤလီၤပြံလီၤပြါသုအပူၤန့ၣ်, ပှၤဂီၢ်မုၢ်တဖၣ်ကဖုးဘၣ်အသးလၢတၢ်လၢအမၤအသးဒီးသု အဃိန့ၣ်လီၤ. အဝဲသ့ၣ်ကလိာ်လ့သုဒီးနံၤဘၣ်ဖၣ်လဲသုန့ၣ်လီၤ.

³⁸သုကဖှံလီၤတၢ်ချံအါအါဂီၢ်ဂီၢ်, ဘၣ်ဆၣ်ကူးဘၣ်တၢ်ထဲစှၤကိာ်ဧိၤ, မ့ၢ်လၢဒွဲၣ်ဧိၤတြၤဧိၤတဖၣ်ကအီၣ်ကွံာ်သုတၢ်မုၢ်တၢ်ဘိ, တၤသူတၤသၣ်တဖၣ်အဃိန့ၣ်လီၤ.

³⁹သုကသူၣ်လီၤဖျးလီၤစပံးလီၢ်တဖၣ်ဒီးအံးထွဲကွၢ်ထွဲအဝဲ သ့ၣ်, ဘၣ်ဆၣ်သုတဒဲးဘၣ်အစပံးသၣ်တဖၣ်မ့ၢ်ဂ့ၤ, အီဘၣ်စပံးထံလၢအီၤမ့ၢ်ဂ့ၤဘၣ်, မ့ၢ်လၢသံမိၢ်ပီၤတဖၣ်ကအီၣ် ကွံာ်စပံးအမုၢ်တဖၣ်အဃိန့ၣ်လီၤ.

⁴⁰သ့ၣ်စၤယံးတဖၣ်ကမဲထီၣ်သကုၤသုထံကီၢ်ပူၤ, ဘၣ်ဆၣ်သုတအိၣ်ဘၣ်ဒီးသ့ၣ်စၤယံးအသိနီတစဲးဘၣ်. မ့ၢ်လၢသ့ၣ်စၤယံးအသၣ်တဖၣ်ကလီၤဆှုကွံာ်အဃိန့ၣ်လီၤ.

⁴¹သုကအိၣ်ဒီးဖိခွါတဖၣ်ဒီးဖိမုၣ်တဖၣ်, ဘၣ်ဆၣ်ကလီၤမၢ်သဒၣ်ကွံာ်သု, မ့ၢ်လၢအဝဲသ့ၣ်ကဘၣ်တၢ်စိာ်ယံၤကွံာ်အီၤဒ်တၢ်ဒုးတၢ်ယၤအပှၤဘၣ် စၢဃာ်တဖၣ်အသိးအဃိန့ၣ်လီၤ.

⁴²ကယဲၢ်သုသ့ၣ်အထူၣ်တဖၣ်ဒီးတၢ်မုၢ်တၢ်ဘိ, တၤသူတၤသၣ်တဖၣ်ကဘၣ် တၢ်အီၣ်ဂီၤကွံာ်အီၤလၢတၢ်ဖိဃၢ်တဖၣ်န့ၣ်လီၤ.

⁴³ပှၤထံဂၤကီၢ်ဂၤဖိတဖၣ်လၢအအိၣ်ဆိးလၢသုထံလီၢ်ကီၢ်ပူၤကမၤ န့ၢ်တၢ်စိတၢ်ကမီၤဒံးယံာ်ဒံးဒိၣ်ထီၣ်, ဖဲသုဝဲတခီသုတၢ်စိတၢ်ကမီၤကစှၤလီၤကွံာ်ပှီၢ်ပှီၢ်အခါန့ၣ်လီၤ.

⁴⁴အဝဲသ့ၣ်ကအိၣ်ဒီးကျိၣ်ဧိၤစ့ဧိၤလၢကဒုးလိၢ်သု, မ့မ့ၢ်သုဝဲသုတအိၣ်ဘၣ်ဒီးကျိၣ်ဧိၤစ့ဧိၤနီတစဲးလၢသု ကဒုးလိၢ်လီၤအဝဲသ့ၣ်ဘၣ်. လၢခံကတၢၢ်အဝဲသ့ၣ်ကမ့ၢ်ပှၤပၢဘၣ်သုတဖၣ်န့ၣ်လီၤ.

⁴⁵ကယဲၢ်တၢ်တတၢးတနါတဖၣ်အံၤခဲလၢာ်ကဟဲလီၤဘၣ်လၢသုလိၤ, ဒီးကအိၣ်ဒီးသုတုၤလီၤလၢသုဘၣ်တၢ်မၤဟးဂီၤကွံာ်သု, မ့ၢ်လၢသုတစူၢ်ဘၣ်ယွၤ, သုကစၢ်ယွၤဒီးတိၢ်န့ၢ်ဖံးဃာ်ကယဲၢ်တၢ် ဘူၣ်တၢ်ဘါအတၢ်သိၣ်တၢ်သီတဖၣ်လၢအဝဲသ့ၣ်ဟ့ၣ်လီၤတ့ၢ်သုအဃိ န့ၣ်လီၤ.

⁴⁶အဝဲသ့ၣ်ကကဲထီၣ်ကစၢ်ယွၤအတၢ်စံၣ်ညီၣ်အတၢ်အုၣ်အသးတဖၣ်လၢသု လိၤဒီးလၢသုစၢၤသုသွဲၣ်တဖၣ်အလိၤလီၤစိၤလီၤထီန့ၣ်လီၤ.

⁴⁷ယွၤဆိၣ်ဂ့ၤတ့ၢ်သုလၢကျဲခဲလၢာ်အပူၤ, ဘၣ်ဆၣ်ဒီးသုတမၤတ့ၢ် အဝဲအတၢ်အိၣ်ဒီးတၢ်သူၣ်ဖှံသးညီဒီးသးတဖၣ်လၢအပှဲၤဒီးတၢ် သးခုဘၣ်လီၤ.

⁴⁸လၢတၢ်န့ၣ်အဃိ, သုကမၤဒုၣ်ဒါတဖၣ်လၢယွၤကဆှၢလီၤအီၤဒ်သိး ကထီဒါသုအတၢ်န့ၣ်လီၤ. သုကသၣ်ဝံၤသၣ်စ့ၤ, တၢ်ကသူသုသးလၢထံ, ဒီးအိၣ်ဘ့ၣ်ဆ့, လိၣ်ဘၣ်တၢ်ကိးမံၤဒဲး န့ၣ်လီၤ. ယွၤကမၤနးမၤဖှီၣ်သုဆါဆါကလဲာ်တုၤလီၤလၢသုဘၣ်တၢ်မၤဟး ဂီၤကွံာ်သုတစုန့ၣ်လီၤ.

⁴⁹ယွၤကဟဲစိာ်ပှၤကလုာ်တကလုာ်လၢဟီၣ်ခိၣ်အကတၢၢ်တခီလၢကထီဒါသု, ပှၤကလုာ်တကလုာ်လၢသုတသ့ၣ်ညါဘၣ်အကျိာ်န့ၣ်လီၤ. ဒ်လံာ်ကြီကြာ်တဘ့ၣ်အသိး, အဝဲသ့ၣ်ကဟဲသဖှိဃီၤဖီၣ်စှီၤန့ၢ်သုန့ၣ်လီၤ.

⁵⁰အဝဲသ့ၣ်ကမ့ၢ်ပှၤတဖၣ်လၢအအၢဝဲသီဝဲဒီးတဒုးနဲၣ်ဘၣ်အတၢ်သး ကညီၤဆူပှၤသးစၢ်မ့ၢ်ဂ့ၤ, ပှၤသးပှၢ်မ့ၢ်ဂ့ၤနီတဂၤဘၣ်န့ၣ်လီၤ.

⁵¹အဝဲသ့ၣ်ကအီၣ်ကွံာ်သုဆၣ်ဖိကီၢ်ဖိလၢသုဘုၣ်အီၤတဖၣ်ဒီးသု တၢ်မုၢ်တၢ်ဘိ, တၤသူတၤသၣ်တဖၣ်, ဒီးသုကသၣ်ဝံၤလီၤဒိသံကွံာ်န့ၣ်လီၤ. အဝဲသ့ၣ်တပာ်တ့ၢ်န့ၢ်သုလၢဘုဧိၤဟုဧိၤ, စပံးထံ, သ့ၣ်စၤယံးအသိ, ဆၣ်ဖိကီၢ်ဖိလၢသုဘုၣ်အီၤမ့ၢ်ဂ့ၤ, သိမ့ၢ်ဂ့ၤနီတမံၤဘၣ်, ဒီးသုကဘၣ်သံန့ၣ်လီၤ.

⁵²အဝဲသ့ၣ်ကဟဲထီၣ်ဒုးဝ့ၢ်ကိးဖျၢၣ်ဒဲးလၢထံကီၢ်လၢယွၤ, သုကစၢ်ယွၤဟ့ၣ်လီၤသုအပူၤ, ဒီးတၢ်ဒူၣ်တဖၣ်လၢအထီ ဒီးအိၣ်ခၢၣ်သနၢၣ်လၢသုနာ်န့ၢ်အီၤန့ၣ်ကလီၤပှီၢ်ကွံာ်ဝဲလီၤ.

⁵³ဖဲသုဒုၣ်သုဒါတဖၣ်ဟဲကဝီၤဃာ်သုဝ့ၢ်တဖၣ်န့ၣ်, သုကထံၣ်ဘၣ်တၢ်ကီတၢ်ခဲဒိၣ်မးတုၤတၢ်မုၢ်လၢ်ကလၢာ်ကွံာ်လၢတၢ် အီၣ်တၢ်အီအဃိဒီးတုၤသုကဘၣ်အီၣ်ကွံာ်ဒၣ်လဲာ်သုဖိတဖၣ်လၢ ယွၤ, သုကစၢ်ယွၤဟ့ၣ်လီၤတ့ၢ်သုန့ၣ်လီၤ.

⁵⁴ပှၤအိၣ်ဖျဲၣ်လၢတူၢ်ဒိၣ်ကီၤဒိၣ်, ပှၤပိာ်ခွါလၢအလုၢ်ဂ့ၤလၢ်ဝါ ကတၢၢ်တဂၤဒၣ်လဲာ်, ကဘၣ်ကီဘၣ်ခဲနးမးလၢတၢ်မုၢ်လၢ်လၢာ်ကွံာ်လၢတၢ်အီၣ်အဃိဖဲတၢ် ကဝီၤဃာ်ဝ့ၢ်အဆၢကတီၢ်အံၤတုၤအဝဲကအီၣ်ကွံာ်အဖိဒၣ်ဝဲတဖၣ် အကျါတနီၤ, မ့ၢ်လၢအဝဲတအိၣ်ဒီးတၢ်အီၣ်အဂ့ၤနီတမံၤဘၣ်အဃိန့ၣ်လီၤ.

⁵⁵တမ့ၢ်အဝဲကဟ့ၣ်ဒၣ်လဲာ်တၢ်အီၣ်န့ၣ်နီတစဲးဆူအဒီပုၢ်ဝဲၢ်ခွါ မ့ၢ်ဂ့ၤ, အမါလၢအဝဲအဲၣ်ဝဲမ့ၢ်ဂ့ၤ, အဝဲဖိတဂၤလၢ်လၢ်လၢအအိၣ်မူ တ့ၢ်ဒံးမ့ၢ်ဂ့ၤန့ၣ်ဘၣ်.

⁵⁶ပှၤအိၣ်ဖျဲၣ်လၢတူၢ်ဒိၣ်ကီၤဒိၣ်, ပှၤပိာ်မုၣ်လၢအလုၢ်ဂ့ၤလၢ်ဝါ ကတၢၢ်တဂၤ, ပှၤထူးဝဲတီၤဝဲဒိၣ်မးတုၤဒၣ်လဲာ်တဟးဘၣ်တ့ၢ်လၢအခိၣ်နီ တတီၤန့ၣ်, ကမၤစ့ၢ်ကီးတၢ်ဒ်န့ၣ်အသိးလီၤ.

⁵⁷ဖဲဒုၣ်ဒါတဖၣ်ဟဲကဝီၤဃာ်အဝဲအဝ့ၢ်န့ၣ်, အဝဲကအိၣ်လၢတၢ်ကီတၢ် ခဲနးမးလၢတၢ်မုၢ်လၢ်လၢာ်ကွံာ်အပူၤလၢတၢ်အီၣ်အဃိ, တုၤဒၣ်လဲာ်အဝဲကအီၣ်ကွံာ်ခူသူၣ်အဖိဆံးလၢအအိၣ်ဖျဲၣ်ထီၣ်သီ သီဒီးအဟံၣ်လီၢ်စ့ၢ်ကီးန့ၣ်လီၤ. အဝဲတနီၤဟ့ၣ်ဘၣ်တၢ်တဖၣ်န့ၣ်ဆူအဝၤလၢအအဲၣ်ဝဲမ့ၢ်ဂ့ၤ, ဆူအဖိတဂၤဂၤမ့ၢ်ဂ့ၤန့ၣ်ဘၣ်.

⁵⁸သုမ့ၢ်တစူၢ်ဘၣ်ကယဲၢ်ကစၢ်ယွၤအတၢ်သိၣ်လိတဖၣ်လၢအအိၣ်ကွဲးလီၤ အသးလၢလံာ်အံၤအပူၤလၢတၢ်သးတီ, ဒီးသုမ့ၢ်တယူးယီၣ်ပာ်ကဲဘၣ်ယွၤ, သုကစၢ်ယွၤအမံၤလၢအလီၤ လိၢ်လီၤလးဒီးလီၤပျံၤလီၤပာ်ကဲဘၣ်န့ၣ်,

⁵⁹အဝဲကဆှၢလီၤတၢ်ဆူးတၢ်ဆါတဖၣ်လၢတၢ်မၤဘျါအီၤတန့ၢ်ဒီးတၢ် ဆါသံသတြိာ်လၢအလီၤပျံၤလီၤဖုးလၢတၢ်ဆိကတီၢ်အီၤတသ့တဖၣ် ဆူသုလိၤဒီးသုစၢၤသုသွဲၣ်တဖၣ်အလိၤန့ၣ်လီၤ.

⁶⁰ကယဲၢ်တၢ်ဆူးတၢ်ဆါလီၤပျံၤလီၤဖုးတဖၣ်လၢသုထံၣ်ဘၣ်တ့ၢ်လံ အီၤလၢကီၢ်အဲၤကူပတူးအပူၤန့ၣ်, အဝဲကဒုးလီၤဘၣ်ကဒါက့ၤကဒီးအီၤလၢသုလိၤတဘျီ, ဒီးသုတဘျါက့ၤဘၣ်နီတစုဘၣ်.

⁶¹အဝဲကဆှၢလီၤစ့ၢ်ကီးကယဲၢ်တၢ်ဆူးတၢ်ဆါတဖၣ်အကလုာ်ကလုာ်ဒီးတၢ် ဆါသံသတြိာ်တဖၣ်လၢတဘၣ်တၢ်ယၢၤထီၣ်အီၤဖဲကစၢ်ယွၤအတၢ်ဘူၣ်တၢ် ဘါအတၢ်သိၣ်တၢ်သီတဖၣ်ဒီးအတၢ်သိၣ်လိတဖၣ်အလံာ်အံၤအပူၤဒီးသု ကဘၣ်တၢ်မၤဟးဂီၤကွံာ်သုန့ၣ်လီၤ.

⁶²သုမ့ၢ်အါထီၣ်ဂီၢ်ထီၣ်ဝဲဒ်ဆၣ်တဖၣ်လၢမူကပိာ်လိၤဒၣ်လဲာ်, ထဲပှၤလၢသုကျါစှၤဂၤဧိၤကအိၣ်မူတ့ၢ်ဝဲ, မ့ၢ်လၢသုတစူၢ်ဘၣ်ယွၤ, သုကစၢ်ယွၤဘၣ်အဃိန့ၣ်လီၤ.

⁶³ဒ်သိးဒၣ်ယွၤမုာ်လၤသးခုတ့ၢ်လၢတၢ်မၤဘီၣ်ထီၣ်ညီထီၣ်သု အပူၤ, လၢတၢ်မၤအါထီၣ်သုနီၣ်ဂံၢ်အပူၤအသိးန့ၣ်, အဝဲကမုာ်လၤသးခုစ့ၢ်ကီးလၢတၢ်မၤဟးဂီၤသုအပူၤဒီးလၢတၢ် ဟဲစိာ်တၢ်ဟးဂီၤလၢသုလိၤအပူၤန့ၣ်လီၤ. သုကဘၣ်တၢ်ထဲးထုးထီၣ်ကွံာ်သုလၢကီၢ်တဘ့ၣ်လၢသုကဘၣ်မၤပှဲၤ အီၤအပူၤန့ၣ်လီၤ.

⁶⁴ယွၤကမၤလီၤပြံလီၤပြါကွံာ်သုဆူကယဲၢ်ပှၤကလုာ်တဖၣ်အကျါ, လၢဟီၣ်ခိၣ်အကတၢၢ်အံၤတခီဆူအကတၢၢ်န့ၣ်တခီ, ဒီးဖဲန့ၣ်သုကမၤကစၢ်တဖၣ်လၢတၢ်ဘှီအီၤဒီးသ့ၣ်ဒီးလၢၢ်အတၢ်, ကစၢ်တဖၣ်လၢသုဝဲမ့ၢ်ဂ့ၤ, သုမိၢ်ပၢ်ဖံဖုလၢပျၢၤတဖၣ်မ့ၢ် ဂ့ၤတဘူၣ်ထီၣ်ဘါထီၣ်တ့ၢ်အီၤလၢအပူၤကွံာ်နီတဘျီဘၣ်န့ၣ်လီၤ.

⁶⁵သုတထံၣ်န့ၢ်ဘၣ်တၢ်ဃူတၢ်ဖိးလၢတၢ်လီၢ်နီတပူၤ, တၢ်လီၢ်လၢတၢ်ကကိးအီၤလၢသုတၢ်န့ၣ်တအိၣ်ဘၣ်နီတပူၤဘၣ်. ယွၤကလုၣ်ဘၢသုဒီးတၢ်ကိၢ်တၢ်ဂီၤ, တၢ်မုၢ်လၢ်လၢာ်ကွံာ်ဒီးတၢ် သးဟးဂီၤန့ၣ်လီၤ.

⁶⁶ထီဘိသုသးသမူကအိၣ်လၢတၢ်ဘၣ်ယိၣ်ဘၣ်ဘီအပူၤလီၤ. ကိးမုၢ်နံၤမုၢ်နၤဒဲးန့ၣ်သုကအိၣ်ပှဲၤဒီးတၢ်ပျံၤတၢ်ဖုး, ဒီးသုကအိၣ်မူလၢတၢ်ပျံၤဘၣ်တၢ်သံအပူၤတပယူာ်ဃီ န့ၣ်လီၤ.

⁶⁷သုသးတဖၣ်ကဘၣ်တၢ်မၤလီၤသဘှံးအီၤဒီးကပျံၤဘၣ်ကယဲၢ်တၢ်တမံၤ လၢ်လၢ်လၢသုထံၣ်အီၤလီၤ. ကိးမုၢ်နံၤဒဲးန့ၣ်သုကဆၢလၢမုၢ်ဟါကဟဲတုၤ, ကိးမုၢ်ဟါဒဲးန့ၣ်သုကဆၢလၢမုၢ်ဂီၤကဟဲတုၤလီၤ.

⁶⁸ယွၤမ့ၢ်တစံးတ့ၢ်လၢကဆှၢကဒါက့ၤကဒီးသုဆူကီၢ်အဲၤကူပတူး ဒၣ်လဲာ်, အဝဲကဆှၢကဒါက့ၤသုဖဲန့ၣ်လၢကဘီတဖၣ်အပူၤလီၤ. ဖဲန့ၣ်သုကကျဲးစၢးဆါလီၤကွံာ်သုသးဆူသုဒုၣ်သုဒါတဖၣ် အစုပူၤဒ်ကုၢ်တဖၣ်အသိး, ဘၣ်ဆၣ်ပှၤလၢကအဲၣ်ဒိးပှ့ၤသု တအိၣ်ဘၣ်နီတဂၤဘၣ်.”

Read S'gaw Karen လံာ်သိၣ်လီၤသီလီၤတၢ် 28 Bible Online

လံာ်သိၣ်လီၤသီလီၤတၢ် 28 - S'gaw Karen bible

လံာ်သိၣ်လီၤသီလီၤတၢ် 28