Read S'gaw Karen လံာ်သိၣ်လီၤသီလီၤတၢ် 5 Bible Online

လံာ်သိၣ်လီၤသီလီၤတၢ် 5 - S'gaw Karen bible

လံာ်သိၣ်လီၤသီလီၤတၢ် 5

¹စီၤမိၤၡ့ကိးဖှိၣ်ကယဲၢ်ကီၢ်အံၣ်စရ့လးအပှၤဂီၢ်မုၢ်ခဲလၢာ် ဒီးစံးဘၣ်အဝဲသ့ၣ်, ကီၢ်အံၣ်စရ့လးအပှၤဂီၢ်မုၢ်သ့ၣ်ဧၢ, ဒိကနၣ်ကယဲၢ်တၢ်ဘူၣ်တၢ်ဘါအတၢ်သိၣ်တၢ်သီခဲလၢာ်လၢယဟ့ၣ်လီၤသု တနံၤအံၤန့ၣ်တက့ၢ်. မၤလိအီၤဒီးစူၢ်အီၤသပှၢ်ကတၢၢ်တက့ၢ်.

²လၢကစၢၢ်စံၤနါန့ၣ်, ယွၤပကစၢ်ယွၤမၤတၢ်အၢၣ်လီၤအီလီၤတမံၤ,

³တမ့ၢ်ထဲဒၣ်ဆူဒီးပပၢ်တဖၣ်ဧိၤဘၣ်, မ့မ့ၢ်ဃုာ်ဒီးပဝဲကိးဂၤ ဒဲးလၢအအိၣ်မူမုၢ်မဆါတနံၤအံၤန့ၣ်လီၤ.

⁴ဖဲန့ၣ်လၢကစၢၢ်ဒီခိၣ်န့ၣ်, ယွၤကတိၤတၢ်ဒီးသုမဲာ်သကိးမဲာ် လၢမ့ၣ်အူအကျါလီၤ.

⁵အကတီၢ်ဖဲန့ၣ်, ယဆၢထၢၣ်လၢသုဝဲဒီးယွၤအဘၢၣ်စၢၤ, လၢယကတဲဘၣ်သုတၢ်လၢအဝဲဒၣ်စံးတ့ၢ်ဝဲန့ၣ်လီၤ. အဂ့ၢ်ဒ်အံၤ, သုပျံၤဘၣ်မ့ၣ်အူဒီးသုတလဲၤထီၣ်ဘၣ်ဆူကစၢၢ်လိၤဘၣ်. ယွၤစံးဝဲဒၣ်,

⁶ယမ့ၢ်ယွၤ, သုကစၢ်ယွၤ, ပှၤတဂၤလၢအအုၣ်က့ၤခီၣ်က့ၤသုလၢ ကီၢ်အဲၤကူပတူးဖဲသုမ့ၢ်တ့ၢ်ကုၢ်တဖၣ်န့ၣ်လီၤ.

⁷ဘူၣ်ထီၣ်ဘါထီၣ်ကစၢ်အဂၤ, နီတဂၤတဂ့ၤ, မ့မ့ၢ်ဘါထီၣ်ထဲယၤတဂၤဧိၤတက့ၢ်.

⁸တၢ်တမံၤလၢ်လၢ်လၢအအိၣ်လၢမူခိၣ်မ့ၢ်ဂ့ၤ, လၢဟီၣ်ခိၣ်မ့ၢ်ဂ့ၤ, လၢထံကျါလၢဟီၣ်ခိၣ်လာ်မ့ၢ်ဂ့ၤအက့ၢ်အဂီၤတဖၣ်န့ၣ်, မၤထီၣ်အီၤလၢနဂီၢ်ဒၣ်နဲတဂ့ၤ.

⁹တီၤလီၤလၢတၢ်ဂီၤတၢ်ဖီၣ်တမံၤမံၤအမဲာ်ညါမ့ၢ်ဂ့ၤ, ဘါထီၣ်အီၤမ့ၢ်ဂ့ၤန့ၣ်တဂ့ၤ. အဂ့ၢ်ဒ်အံၤ, ယမ့ၢ်ယွၤ, သုကစၢ်ယွၤလၢအသးက့ၣ်တၢ်န့ၣ်လီၤ. ယဟဲစိာ်တၢ်စံၣ်ညီၣ်လၢကယဲၢ်ပှၤတဖၣ်လၢအသးဟ့ယၤအလိၤဒီးလၢ အဝဲသ့ၣ်အစၢၤအသွဲၣ်တဖၣ်အလိၤတုၤလီၤလၢပှၤသၢစိၤတစိၤဒီး လွံၢ်စိၤတစိၤန့ၣ်လီၤ.

¹⁰ဘၣ်ဆၣ်ဒီးယဒုးနဲၣ်ယတၢ်အဲၣ်ဆူပှၤအစိၤလၢအကထိတဖၣ်အအိၣ်လၢ အအဲၣ်ယၤဒီးစူၢ်ယတၢ်ဘူၣ်တၢ်ဘါအတၢ်သိၣ်တၢ်သီတဖၣ်န့ၣ်လီၤ.

¹¹သူယမံၤလၢတၢ်အၢတၢ်သီအတၢ်တိာ်ပာ်တဖၣ်အဂီၢ်တဂ့ၤ. အဂ့ၢ်ဒ်အံၤ, ယၤယွၤ, သုကစၢ်ယွၤအံၤ, ကစံၣ်ညီၣ်ပှၤတဂၤလၢ်လၢ်လၢ အသူကမၣ်ယမံၤန့ၣ်လီၤ.

¹²တိၢ်န့ၢ်ဖံးဃာ်မုၢ်အိၣ်ဘှံးအနံၤဒီးပာ်စီဆှံအီၤဒ်ယၤယွၤ, သုကစၢ်ယွၤမၤလိာ်တ့ၢ်သုအသိးန့ၣ်တက့ၢ်.

¹³သုအိၣ်ဒီးမုၢ်နံၤဃုနံၤဃုသီလၢသုကမၤသုတၢ်မၤအဂီၢ်,

¹⁴ဘၣ်ဆၣ်ဒီးနွံသီတသီန့ၣ်, မ့ၢ်ဝဲတၢ်အိၣ်ဘှံးအမုၢ်တနံၤလၢတၢ် ကပာ်စီဆှံထီၣ်အီၤလၢယဂီၢ်န့ၣ်လီၤ. လၢမုၢ်နံၤအဝဲန့ၣ်, ပှၤတဘၣ်မၤတၢ်နီတဂၤဘၣ်. သုဝဲမ့ၢ်ဂ့ၤ, သုဖိသုလံၤတဖၣ်မ့ၢ်ဂ့ၤ, သုကုၢ်သုပှၤတဖၣ်မ့ၢ်ဂ့ၤ, သုဆၣ်ဖိကီၢ်ဖိတဖၣ်မ့ၢ်ဂ့ၤ, ပှၤတခီဘီမုၢ်ဖိတဖၣ်လၢအအိၣ်ဆိးလၢသုထံသုကီၢ်ပူၤမ့ၢ်ဂ့ၤ, တဘၣ်မၤတၢ်နီတဂၤဘၣ်. သုကုၢ်တဖၣ်ကဘၣ်အိၣ်ဘှံးဒၣ်ဒ်သုဝဲအသိးလီၤ.

¹⁵သ့ၣ်နီၣ်ထီၣ်လၢသုမ့ၢ်တ့ၢ်ကုၢ်တဖၣ်လၢကီၢ်အဲၤကူပတူးအပူၤ, ဒီးယၤ, ယွၤ, သုကစၢ်ယွၤအုၣ်က့ၤခီၣ်က့ၤသုခီဖျိယတၢ်စိ တၢ်ကမီၤဒီးတၢ်ဂံၢ်တၢ်ဘါဖးဒိၣ်န့ၣ်တက့ၢ်. လၢတၢ်န့ၣ်အဃိ, ယမၤလိာ်သုလၢသုကတိၢ်န့ၢ်ဖံးဃာ်မုၢ်အိၣ် ဘှံးအနံၤန့ၣ်လီၤ.

¹⁶ယူးယီၣ်သုပၢ်ဒီးသုမိၢ်, ဒ်ယၤ, ယွၤ, သုကစၢ်ယွၤမၤလိာ်သု, ဒ်သိးတၢ်ကိးမံၤဒဲးကလဲၤအသးဂ့ၤဂ့ၤဘၣ်ဘၣ်လၢသုဂီၢ်, ဒီးဒ်သိးသုကအိၣ်မူယံာ်ယံာ်ထၢထၢလၢကီၢ်တဘ့ၣ်လၢယဟ့ၣ် လီၤသုအပူၤန့ၣ်တက့ၢ်.

¹⁷မၤသံတၢ်တဂ့ၤ.

¹⁸မၤကမၣ်မုၣ်ကမၣ်ခွါတဂ့ၤ.

¹⁹ဟုၣ်တၢ်တဂ့ၤ.

²⁰ပာ်တၢ်ကမၣ်ကဘျံးကဘျၣ်လၢပှၤနီတဂၤအလိၤတဂ့ၤ.

²¹သးကွံပှၤအဂၤတဂၤအမါတဂ့ၤ. သးကွံအဟံၣ်, အဝဲအဟီၣ်ခိၣ်, အဝဲအကုၢ်တဖၣ်, အဝဲအဂီၤဘုၣ်ဂီၤဖံး, အဝဲအကသ့ၣ်ယီၤတဖၣ်မ့ၢ်ဂ့ၤ, တၢ်အဂၤတမံၤဂ့ၤတမံၤဂ့ၤလၢအမ့ၢ် အဝဲအတၢ်န့ၣ်တဂ့ၤ.”

²²တၢ်တဖၣ်အံၤမ့ၢ်တၢ်မၤလိာ်တဖၣ်လၢယွၤဟ့ၣ်လီၤသုဝဲကိးဂၤဒဲး, ဖဲသုပာ်ဖှိၣ်ထီၣ်သုသးလၢကစၢၢ်အခါန့ၣ်လီၤ. ဖဲအဝဲကတိၤတၢ်လၢအကလုၢ်ဖးဒိၣ်လၢမ့ၣ်အူအကျါဒီးလၢတၢ်အၢၣ် အတီၢ်အကျါန့ၣ်, အဝဲဟ့ၣ်လီၤတၢ်မၤလိာ်တဖၣ်အံၤဒီးအဂၤတအိၣ်ဘၣ်. အန့ၣ်ဝံၤဒီးအဝဲကွဲးလီၤဝဲလၢလၢၢ်ဘ့ၣ်ဘၣ်ခံဘ့ၣ်အလိၤ, ဒီးဟ့ၣ်လီၤအီၤလၢယၤန့ၣ်လီၤ.

²³ဖဲကစၢၢ်ဒီဖျၢၣ်ညါကဲၤထီၣ်ဒီးမ့ၣ်အူဒီးသုနၢ်ဟူဘၣ်တၢ် ကလုၢ်လၢတၢ်ခံးကျါန့ၣ်, သုခိၣ်သုနၢ်တဖၣ်ဒီးပှၤအဒူၣ်တဖၣ်အခိၣ်တဖၣ်ဟဲဆူယအိၣ်ဒီးစံးဝဲ,

²⁴ယွၤ, ပကစၢ်ယွၤဒုးနဲၣ်ပှၤလၢအတၢ်ဒိၣ်တၢ်မုၢ်ဒီးအလၤကပီၤ, ဖဲပနၢ်ဟူဘၣ်အဝဲကတိၤတၢ်ဒီးပှၤလၢမ့ၣ်အူအကျါန့ၣ်လီၤ. တနံၤအံၤပထံၣ်ဘၣ်လံလၢ, ကစၢ်ယွၤမ့ၢ်ကတိၤတ့ၢ်တၢ်ဒီးပှၤတဂၤ ဒၣ်လဲာ်န့ၣ်, အဝဲအိၣ်မူဝဲဆူညါသ့ဒံးကစီဒီန့ၣ်လီၤ.

²⁵ဘၣ်ဆၣ်ဒီး, ဘၣ်မနုၤလၢပကဘၣ်မၤကဒီးတၢ်သံခ့သံပှၤအတၢ်မၤန့ၣ်လဲၣ်. မ့ၣ်အူလီၤပျံၤလီၤဖုးန့ၣ်ကမၤဟးဂီၤကွံာ်ပှၤလီၤ. ပမ့ၢ်နၢ်ဟူဘၣ်ကစၢ်ယွၤကတိၤကဒီးတၢ်န့ၣ်, ပကသံသပှၢ်ကတၢၢ်န့ၣ်လီၤ.

²⁶မ့ၢ်ပှၤတဂၤဂၤအိၣ်မူဒံးဝဲ, ဖဲအနၢ်ဟူဘၣ်ကစၢ်ယွၤလၢအမူဝဲ ကတိၤတၢ်လၢမ့ၣ်အူအကျါဝံၤအလီၢ်ခံန့ၣ်ဧါ.

²⁷စီၤမိၤၡ့ဧၢ, က့ၤကဒါက့ၤ, ဒီးဒိကနၣ်တၢ်လၢယွၤ, ပကစၢ်ယွၤစံးဝဲခဲလၢာ်တက့ၢ်. အန့ၣ်ဝံၤဒီးဟဲကဒါက့ၤဒီး တဲဘၣ်ပှၤတၢ်လၢအဝဲဒၣ်စံးဘၣ်တ့ၢ်နၤတက့ၢ်. ပကဒိကနၣ်ဒီးစူၢ်အီၤန့ၣ်လီၤ.

²⁸ဖဲယွၤနၢ်ဟူဘၣ်တၢ်အံၤန့ၣ်, အဝဲစံးဘၣ်ယၤ, “ယနၢ်ဟူတ့ၢ်တၢ်လၢပှၤဂီၢ်မုၢ်အံၤစံးဝဲ, ဒီးအဝဲသ့ၣ်တဲတၢ်န့ၣ်ဘၣ်လီၤ.

²⁹ထီဘိအဝဲသ့ၣ်မ့ၢ်ပာ်သူၣ်ပာ်သးဒၣ်ဒ်သိးအံၤဧိၤ, အဝဲသ့ၣ်မ့ၢ်မၤလၤကပီၤဒၣ်ထဲယၤတဂၤအံၤဧိၤ, ဒီးစူၢ်ကယဲၢ်ယတၢ်မၤလိာ်တဖၣ်န့ၣ်, တၢ်ကိးမံၤဒဲးကမၤအသးဂ့ၤ ဂ့ၤဘၣ်ဘၣ်လၢအဝဲသ့ၣ်အဂီၢ်ဒီးလၢအဝဲသ့ၣ်အစၢၤအသွဲၣ်တဖၣ်အဂီၢ် လီၤထူလီၤယိာ်န့ၣ်လီၤ.

³⁰လဲၤဒီးတဲဘၣ်အဝဲသ့ၣ်လၢကက့ၤကဒါက့ၤဆူအဝဲသ့ၣ်အဒဲတဖၣ်တ က့ၢ်.

³¹မ့မ့ၢ်နဲဒၣ်စီၤမိၤၡ့ဧၢ, အိၣ်ဒီးယၤဖဲအံၤတက့ၢ်. ဒီးယကဟ့ၣ်လီၤနၤလၢကယဲၢ်ယတၢ်ဘူၣ်တၢ်ဘါအတၢ်သိၣ်တၢ်သီတဖၣ်ဒီး တၢ်မၤလိာ်တဖၣ်န့ၣ်လီၤ. သိၣ်လိသီလိပှၤဂီၢ်မုၢ်လၢတၢ်တဖၣ်န့ၣ်ဒ်သိးအဝဲသ့ၣ်ကစူၢ်ဝဲ, လၢကီၢ်တဘ့ၣ်လၢယဟ့ၣ်လီၤအဝဲသ့ၣ်အပူၤအဂီၢ်န့ၣ်တက့ၢ်.”

³²ကီၢ်အံၣ်စရ့လးအပှၤဂီၢ်မုၢ်ဧၢ, မၤတၢ်ကိးမံၤလၢယွၤ, သုကစၢ်ယွၤမၤလိာ်တ့ၢ်သုသပှၢ်ကတၢၢ်တက့ၢ်. စူၢ်အဝဲအတၢ်ဘူၣ်တၢ်ဘါအတၢ်သိၣ်တၢ်သီတမံၤလၢ်လၢ်တက့ၢ်.

³³စူၢ်အီၤကိးထံၣ်ဒဲး, ဒ်သိးတၢ်ကိးမံၤဒဲးကလဲၤအသးဂ့ၤဂ့ၤ ဘၣ်ဘၣ်လၢသုဂီၢ်ဒီးဒ်သိးသုကအိၣ်ဆိးဘၣ်ဒံးဆူညါလၢကီၢ် တဘ့ၣ်လၢသုကလဲၤနုာ်လီၤမၤန့ၢ်အီၤအပူၤအဂီၢ်န့ၣ်တက့ၢ်.