Read S'gaw Karen လံာ်သိၣ်လီၤသီလီၤတၢ် 9 Bible Online

လံာ်သိၣ်လီၤသီလီၤတၢ် 9 - S'gaw Karen bible

လံာ်သိၣ်လီၤသီလီၤတၢ် 9

¹ဒိကနၣ်တက့ၢ်. ကီၢ်အံၣ်စရ့လးအပှၤဂီၢ်မုၢ်ဧၢ, ဒိကနၣ်တက့ၢ်. တနံၤအံၤဘူးထီၣ်လၢသုကခီဂာ်ဘၣ်ထံကျိ ယၢ်ဒ့ၣ်ဒီးမၤန့ၢ်ကီၢ်လၢအဘၣ်ဃးဒီးပှၤကလုာ်တဖၣ်လၢအဒိၣ်န့ၢ် သုဒီးအစိကမီၤအါန့ၢ်သုန့ၣ်လီၤ. အဝဲသ့ၣ်အဝ့ၢ်တဖၣ်န့ၣ်ဒိၣ်ဝဲဒီးအိၣ်ဒီးအခိၣ်ဒူတဖၣ်လၢအကစီၤ ထီၣ်ထီဝဲတုၤဆူမူကပိာ်လိၤန့ၣ်လီၤ.

²ပှၤဂီၢ်မုၢ်တဖၣ်အနီၢ်ကစၢ်ဒၣ်ဝဲအနီၢ်ထီဒီးအဂံၢ်အဘါဆူၣ်ဝဲဒၣ် လီၤ. အဝဲသ့ၣ်မ့ၢ်ပှၤနီၢ်ဒိၣ်နီၢ်သွါတဖၣ်ဒီးသုနၢ်ဟူတ့ၢ်လၢပှၤ စံးဝဲလၢပှၤဆၢထၢၣ်ထီဒါအဝဲသ့ၣ်တန့ၢ်နီတဂၤဘၣ်န့ၣ်လီၤ.

³မ့မ့ၢ်ခဲကနံၣ်အံၤ, သုကထံၣ်ဘၣ်လၢသုနီၢ်ကစၢ်ဒၣ်သုဝဲလၢ ယွၤ, သုကစၢ်ယွၤကလဲၤဆိတၢ်လၢသုမဲာ်ညါလီၤဂာ်ဒ်မ့ၣ်အူအီၣ်တၢ် တပျုာ်တပျီၤအသိးန့ၣ်လီၤ. ယွၤကမၤနၢၤကွံာ်အဝဲသ့ၣ်, ဖဲသုလဲၤထီၣ်ဒုးတၢ်အခါ, ဒ်သိးသုကနီၣ်ထီၣ်ကွံာ်အဝဲသ့ၣ် ဒီးမၤဟးဂီၤကွံာ်အီၤချ့သဒံးဒ်အဝဲအၢၣ်လီၤတ့ၢ်ဝဲအသိး န့ၣ်လီၤ.

⁴ဖဲယွၤ, သုကစၢ်ယွၤနီၣ်ထီၣ်ကွံာ်အဝဲသ့ၣ်လၢသုဂီၢ်ဝံၤတစု န့ၣ်, စံးလီၤသုသးလၢအဝဲဆှၢနုာ်သုလၢသုကမၤန့ၢ်ဘၣ်ကီၢ်အံၤ, မ့ၢ်လၢသုကြၢးဒိးန့ၢ်အီၤအဃိန့ၣ်တဂ့ၤ. တမ့ၢ်ဘၣ်. ယွၤကနီၣ်ထီၣ်ကွံာ်ပှၤဂီၢ်မုၢ်တဖၣ်အံၤလၢသုဂီၢ်, မ့ၢ်လၢအဝဲသ့ၣ်မ့ၢ်ပှၤအၢပှၤသီတဖၣ်အဃိန့ၣ်လီၤ.

⁵တမ့ၢ်လၢသုမ့ၢ်ပှၤတဖၣ်လၢအဂ့ၤဒီးမၤတၢ်လၢအဘၣ်အဃိဒီးယွၤ ပျဲသုမၤန့ၢ်ဘၣ်အဝဲသ့ၣ်အကီၢ်အံၤဘၣ်. ယွၤကနီၣ်ထီၣ်ကွံာ်အဝဲသ့ၣ်မ့ၢ်လၢအဝဲသ့ၣ်မ့ၢ်ပှၤအၢပှၤသီတဖၣ် မ့ၢ်လၢအဝဲပာ်လီၤအသးလၢကဟံးဃာ်ဂၢၢ်ကျၢၤအတၢ်အၢၣ်လီၤအီလီၤ လၢအမၤတ့ၢ်ဝဲဒီးသုပၢ်ဖးဒိၣ်လၢပျၢၤတဖၣ်ဒ်စီၤအၤဘြၤဟၣ်, စီၤအံၤစဲးဒီးစီၤယၤကိာ်တဖၣ်အဃိန့ၣ်လီၤ.

⁶သုသ့ၣ်ညါသပှၢ်ကတၢၢ်သ့ဝဲလၢယွၤတဟ့ၣ်သုကီၢ်လၢအပှဲၤဒီးဟီၣ် ခိၣ်ညၣ်ထ့ၣ်ဂ့ၤအံၤ, မ့ၢ်လၢသုဂ့ၤဒိးန့ၢ်အီၤအဃိဘၣ်. တမ့ၢ်ဘၣ်. သုမ့ၢ်ပှၤဂီၢ်မုၢ်တဖုလၢအခိၣ်ကိၤဝဲန့ၣ်လီၤ.

⁷သုမၤသးဒိၣ်ထီၣ်တ့ၢ်ယွၤသုကစၢ်ယွၤလၢပှၢ်မုၢ်ကနၢအပူၤန့ၣ် သးပ့ၤနီၣ်ကွံာ်အီၤနီတစုတဂ့ၤ. စးထီၣ်မုၢ်တနံၤလၢသု ဟးထီၣ်ကွံာ်လၢကီၢ်အဲၤကူပတူးတုၤလၢဖဲအံၤအမုၢ်တနံၤန့ၣ်, သုပူထီၣ်တၢ်ထီဒါအီၤအခါန့ၣ်လီၤ.

⁸ဖဲကစၢၢ်စံၤနါဒၣ်လဲာ်န့ၣ်, သုထိၣ်ဂဲၤယွၤအတၢ်သးထီၣ်, တုၤဒၣ်လဲာ်အဝဲအသးဒိၣ်ထီၣ်တုၤလၢသါကမၤဟးဂီၤကွံာ်သုန့ၣ်လီၤ.

⁹ယလဲၤထီၣ်ဆူကစၢၢ်ဒီခိၣ်လၢယကဒိးန့ၢ်ဘၣ်လၢၢ်ဘ့ၣ်ဘၣ်တဖၣ်လၢတၢ် ကွဲးလီၤဃာ်တၢ်အၢၣ်လီၤအီလီၤတဖၣ်လၢယွၤမၤတ့ၢ်ဒီးသုလၢ အလိၤန့ၣ်လီၤ. ယအိၣ်ဖဲန့ၣ်အနံၤလွံၢ်ဆံဒီးအနၤလွံၢ်ဆံဒီးယတအီၣ်တၢ်မ့ၢ် ဂ့ၤ, အီတၢ်မ့ၢ်ဂ့ၤနီတမံၤဘၣ်န့ၣ်လီၤ.

¹⁰တုၤနုၤတစု, ယွၤဟ့ၣ်လီၤယၤလၢလၢၢ်ဘ့ၣ်ဘၣ်ခံဘ့ၣ်, ဒီးလၢအလိၤန့ၣ်အဝဲကွဲးလီၤတၢ်လၢအစုဒၣ်ဝဲ, တၢ်တဖၣ်လၢအဝဲစံးဘၣ်တ့ၢ်သုလၢမ့ၣ်အူအပူၤဖဲမုၢ်တနံၤလၢသု ပာ်ဖှိၣ်ထီၣ်တ့ၢ်သုသးဖဲန့ၣ်လၢကစၢၢ်န့ၣ်လီၤ.

¹¹မ့ၢ်လံ, တုၤအနံၤလွံၢ်ဆံဒီးအနၤလွံၢ်ဆံန့ၣ်ပူၤကွံာ်အလီၢ်ခံ ဒီးယွၤဟ့ၣ်လီၤယၤလၢလၢၢ်ဘ့ၣ်ဘၣ်ခံဘ့ၣ်ဒီးလၢအလိၤန့ၣ်အဝဲ ကွဲးတၢ်အၢၣ်လီၤအီလီၤန့ၣ်လီၤ.

¹²အန့ၣ်ဝံၤဒီး, ယွၤစံးဘၣ်ယၤ, က့ၤလီၤလၢကစၢၢ်အလိၤတဘျီဃီတက့ၢ်. အဂ့ၢ်ဒ်အံၤ, နပှၤဂီၢ်မုၢ်, လၢနဆှၢထီၣ်အီၤလၢကီၢ်အဲၤကူပတူးန့ၣ်, မၤသံၣ်သူမီၣ်ကျာ် လီၤအသးဒီးမၤတ့ၢ်တၢ်အၢတၢ်သီလံ. အဝဲသ့ၣ်ဃၣ်ကဒါကွံာ်လံအသးလၢတၢ်လၢယမၤလိာ်တ့ၢ်အဝဲသ့ၣ်လၢ ကဘၣ်မၤဝဲ, ဒီးအဝဲသ့ၣ်မၤထီၣ်တၢ်ဂီၤတၢ်ဖီၣ်တခါလၢအဂီၢ်န့ၣ်လီၤ.

¹³ယွၤစံးဘၣ်စ့ၢ်ကီးယၤ, ပှၤဂီၢ်မုၢ်အံၤအခိၣ်ကိၤဝဲဆံးအါဆံး အါလဲၣ်န့ၣ်ယသ့ၣ်ညါယဲလီၤ.

¹⁴ကျဲးစၢးတြီယၤတဂ့ၤ, ယပာ်လီၤယသးလၢယကမၤဟးဂီၤကွံာ်အဝဲ သ့ၣ်ဒ်သိးပှၤသုတသ့ၣ်နီၣ်ထီၣ်အဝဲသ့ၣ်နီတဂၤနီတစု လၢၤတဂ့ၤအဂီၢ်န့ၣ်လီၤ. ဒီးယကဒုးကဲထီၣ်နၤလၢပှၤတကလုာ်အပၢ်, ပှၤတကလုာ်လၢအဒိၣ်န့ၢ်, ဒီးအစိကမီၤဆူၣ်န့ၢ်ဒံးအဝဲသ့ၣ်တက့ၢ်န့ၣ်လီၤ.

¹⁵လၢတၢ်န့ၣ်အဃိ, ယဃၣ်ယသးဒီးက့ၤလီၤလၢကစၢၢ်အလိၤ, စိာ်ဃုာ်ဒီးလၢၢ်ဘ့ၣ်ဘၣ်ခံဘ့ၣ်လၢတၢ်အၢၣ်လီၤအီလီၤဘၣ်တၢ် ကွဲးလီၤအီၤလၢအလိၤန့ၣ်လီၤ. မ့ၣ်အူအလၣ်တဖၣ်ကဲၤထီၣ်ဝဲလၢကစၢၢ်တခီန့ၣ်လီၤ.

¹⁶ယထံၣ်ဘၣ်တ့ၢ်လၢသုလုၣ်သ့ၣ်ခါပတာ်ကွံာ်လံတၢ်မၤလိာ်လၢယွၤ, သုကစၢ်ယွၤဟ့ၣ်လီၤတ့ၢ်သု, ဒီးလၢသုမၤတၢ်ဒဲးဘးထီဒါအီၤ ခီဖျိတၢ်မၤထီၣ်တိၢ်, စ့ဒီးထးတၢ်ဂီၤတၢ်ဖီၣ်တခါလၢအက့ၢ်အဂီၤမ့ၢ်ကျီၢ်ဖါတဒု, လၢသုဂီၢ်န့ၣ်လီၤ.

¹⁷လၢတၢ်န့ၣ်အဃိ, ဖဲန့ၣ်, လၢသုမဲာ်ညါန့ၣ် ယတ့ၢ်လီၤကွံာ်လၢၢ်ဘ့ၣ်ဘၣ်တဖၣ်ဒီးမၤကၢ်လီၤကလဲကွံာ်အီၤန့ၣ်လီၤ.

¹⁸မၤကဒီးတစု, ယထီၣ်လီၤပှီၤယသးဒီးဆုးလီၤယခိၣ်လၢယွၤအမဲာ် ညါလၢအနံၤလွံၢ်ဆံအတီၢ်ပူၤဒီးယတအီၣ်တၢ်မ့ၢ်ဂ့ၤ, ယတအီတၢ်မ့ၢ်ဂ့ၤနီတမံၤဘၣ်. ယမၤတ့ၢ်တၢ်အံၤမ့ၢ်လၢသုမၤတ့ၢ်တၢ်ဒဲးဘးထီဒါယွၤ, ဒီးမၤသးဒိၣ်ထီၣ်အီၤအဃိန့ၣ်လီၤ.

¹⁹ယပျံၤဘၣ်ယွၤအတၢ်သးဒိၣ်ကဲၤထီၣ်ဒိၣ်မး, မ့ၢ်လၢအဝဲ အသးထီၣ်ဆူၣ်လံတုၤလၢကမၤဟးဂီၤကွံာ်သုအဃိန့ၣ်လီၤ. ဘၣ်ဆၣ်ဒီးမၤကဒီးတစုယွၤဒိကနၣ်ယၤန့ၣ်လီၤ.

²⁰ယွၤအသးဒိၣ်ထီၣ်ဘၣ်စ့ၢ်ကီးစီၤအၤဟရိၣ်နးမးတုၤလၢအက မၤသံအီၤလီၤ. လၢတၢ်န့ၣ်အဃိယဘါထုကဖၣ်တၢ်လၢစီၤအၤဟရိၣ်အ ဂီၢ်, လၢတၢ်တကတီၢ်ဃီန့ၣ်လီၤ.

²¹ယဟံးထီၣ်တၢ်ဒဲးဘးတမံၤလၢသုမၤတ့ၢ်အီၤန့ၣ်, လၢအမ့ၢ်တိၢ်စ့ဒီးထးကျီၢ်ဖါအဂီၤဒီးကွံာ်အီၤဆူမ့ၣ်အူ အပူၤလီၤ. အန့ၣ်ဝံၤဒီးယမၤကၢ်လီၤကလဲကွံာ်အီၤ, ဂံာ်ကမူၣ်အီၤပြံကဒံတုၤအကဲထီၣ်ဖၣ်ကမူၣ်, ဒီးတ့ၢ်လီၤကွံာ်ဖၣ်ကမူၣ်န့ၣ်ဆူထံကျိဖိအပူၤလၢအယွၤလီၤ ဝဲလၢကစၢၢ်အလိၤန့ၣ်လီၤ.

²²သုမၤသးဒိၣ်ထီၣ်စ့ၢ်ကီးယွၤ, သုကစၢ်ယွၤ, ဖဲသုအိၣ်လၢဝ့ၢ်တးဘဧ့ရၤ, ဝ့ၢ်မးစၤဒီးဝ့ၢ်ကံးဘြိၤဟး တဝၤအပူၤအခါန့ၣ်လီၤ.

²³ဒီးဖဲအဝဲဆှၢထီၣ်သုလၢဝ့ၢ်ကၤဒ့ၣ်ဘၢ်န့ဃုာ်ဒီးအတၢ်မၤလိာ် လၢသုကလဲၤဒီးမၤန့ၢ်ကီၢ်လၢအဝဲဟ့ၣ်လီၤသုန့ၣ်, သုပူထီၣ်ထီဒါအီၤလီၤ. သုတနာ်အီၤမ့ၢ်ဂ့ၤစူၢ်အီၤမ့ၢ်ဂ့ၤ န့ၣ်ဘၣ်.

²⁴စးထီၣ်လၢယသ့ၣ်ညါသုလံၤလံၤန့ၣ်သုပူထီၣ်တ့ၢ်တၢ်ထီဒါယွၤ န့ၣ်လီၤ.

²⁵လၢတၢ်န့ၣ်အဃိ, ယထိၣ်လီၤပှီၤယသးဒီးဆုးလီၤယခိၣ်လၢယွၤ အမဲာ်ညါလၢအနံၤလွံၢ်ဆံဒီးအနၤလွံၢ်ဆံအတီၢ်ပူၤဒ်လၢအခီၣ် ထံးအသိးန့ၣ်လီၤ. အဂ့ၢ်ဒ်အံၤ, ယသ့ၣ်ညါတ့ၢ်လၢအဝဲပာ်လီၤလံအသးလၢကမၤဟးဂီၤ ကွံာ်သုန့ၣ်လီၤ.

²⁶ဒီးယဘါထုကဖၣ်တၢ်ဒီးစံး, ယွၤပၢဘၣ်တၢ်ခဲလၢာ်ကစၢ်ဧၢ, မၤဟးဂီၤကွံာ်နပှၤဂီၢ်မုၢ်ဒၣ်နဲတဂ့ၤ. ပှၤဂီၢ်မုၢ်အံၤနမၤပူၤဖျဲးတ့ၢ်အီၤဒီးထုးထီၣ်ကွံာ်အီၤလၢ ကီၢ်အဲၤကူပတူးအပူၤလၢနဂံၢ်နဘါဖးဒိၣ်ဒီးတၢ်စိတၢ်ကမီၤအပူၤန့ၣ် လီၤ.

²⁷သ့ၣ်နီၣ်ထီၣ်က့ၤနခ့နပှၤတဖၣ်, လၢအမ့ၢ်ဝဲစီၤအၤဘြၤဟၣ်, စီၤအံၤစဲးဒီးစီၤယၤကိာ်တက့ၢ်. ဒီးတဘၣ်ပာ်သူၣ်ပာ်သးလၢပှၤဂီၢ်မုၢ်အံၤအတၢ်ခိၣ်ကိၤ, ဒီးအတၢ်ဒဲးဘးအဂ့ၢ်န့ၣ်တဂ့ၤ.

²⁸မ့တမ့ၢ်ဒ်န့ၣ်ဘၣ်ဒီး, ပှၤအဲၤကူပတူးဖိတဖၣ်ကစံးဝဲလၢ, နဆှၢနပှၤဂီၢ်မုၢ်ဆူကီၢ်လၢနအၢၣ်လီၤတ့ၢ်အဝဲသ့ၣ်န့ၣ်တသ့ဘၣ် န့ၣ်လီၤ. အဝဲသ့ၣ်ကစံးလၢနဟံးထီၣ်ဒီးဆှၢနပှၤဂီၢ်မုၢ်ဆူပှၢ် မုၢ်ကနၢလၢနကမၤသံကွံာ်အီၤအဂီၢ်မ့ၢ်လၢနသးဟ့အဝဲသ့ၣ် အဃိန့ၣ်လီၤ.

²⁹နီၢ်နီၢ်, ဒ်လဲၣ်ဂ့ၤဒ်လဲၣ်ဂ့ၤန့ၣ်, ပှၤတဖၣ်အံၤမ့ၢ်ပှၤဂီၢ်မုၢ် လၢနဃုထၢအီၤလၢကမ့ၢ်နတၢ်ဒၣ်နဲဒီးမ့ၢ်ပှၤတဖၣ်လၢနထုးထီၣ် ကွံာ်အီၤလၢကီၢ်အဲၤကူပတူးအပူၤခီဖျိနစိနကမီၤဖးဒိၣ်ဒီး နတၢ်ဒိၣ်တၢ်မုၢ်အဃိန့ၣ်လီၤ.