Read S'gaw Karen လံာ်ယိၤဟၣ် 10 Bible Online

လံာ်ယိၤဟၣ် 10 - S'gaw Karen bible

လံာ်ယိၤဟၣ် 10

¹ယ့ၣ်ၡူးစံးဝဲဒၣ်, “ယစံးဘၣ်တဲဘၣ်သုတီတီလိၤလိၤ, ပှၤတဂၤလၢအတဟဲနုာ်ဘၣ်ဆူသိကရၢၢ်ပူၤခီဖျိကျဲစၢၤ, မ့မ့ၢ်ဟဲခီနုာ်ဝဲလၢကျဲအဂၤတပူၤဒၣ်န့ၣ်, မ့ၢ်တၢ်ဟုၣ်တၢ်ဘျၣ်ဒီးတမျိးတမျာ်န့ၣ်လီၤ.

²မ့မ့ၢ်ပှၤလၢအဟဲနုာ်လီၤခီဖျိကျဲစၢၤတဂၤန့ၣ်, မ့ၢ်သိတဖၣ် အပှၤကွၢ်သိလီၤ.

³ပှၤပၢၤကျဲစၢၤတဂၤအိးထီၣ်န့ၢ်ကျဲလၢအဂီၢ်ဒီးသိတဖၣ် နၢ်ဟူအကလုၢ်ဖဲအဝဲကိးအသိဒၣ်ဝဲအမံၤတဒုဘၣ်တဒု ဒီးအဝဲဒၣ်ဆှၢထီၣ်အသိတဖၣ်ဆူကရၢၢ်အချၢန့ၣ်လီၤ.

⁴ဖဲအဝဲဆှၢထီၣ်အသိတဖၣ်ဆူတၢ်ချၢဝံၤဒီး, အဝဲလဲၤတၢ်လၢအဝဲသ့ၣ်တဖၣ်အမဲာ်ညါဒီးအဝဲသ့ၣ် ပိာ်ထီၣ်အခံမ့ၢ်လၢအသ့ၣ်ညါအကလုၢ်အဃိလီၤ.

⁵အဝဲသ့ၣ်တပိာ်ပှၤဂၤအခံဘၣ်. အခိၣ်တလိာ်, အဝဲသ့ၣ်ကဃ့ၢ်ကွံာ်လၢပှၤဒ်န့ၣ်သိးတဖၣ်အအိၣ် မ့ၢ်လၢအတသ့ၣ်ညါအကလုၢ်အဃိလီၤ.”

⁶ယ့ၣ်ၡူးစံးဘၣ်အဝဲသ့ၣ်လၢတၢ်ကတိၤဒိအံၤဘၣ်ဆၣ်ဒီး, အဝဲသ့ၣ်တနၢ်ပၢၢ်တၢ်ကတိၤဒိအံၤအခီပညီဘၣ်.

⁷မၤသးဒ်န့ၣ်ဒီး ယ့ၣ်ၡူးစံးကဒီးဝဲ, “ယစံးဘၣ်တဲဘၣ်သုတီတီ လိၤလိၤ, ယမ့ၢ်ကျဲစၢၤလၢသိတဖၣ်အဂီၢ်လီၤ.

⁸ပှၤအဂၤလၢအဟဲလၢယမဲာ်ညါတဖၣ် မ့ၢ်တၢ်ဟုၣ်တၢ်ဘျၣ်ဒီးတမျိးတမျာ်လီၤ. ဒီးသိတဖၣ်တကနၣ်အဝဲသ့ၣ်အကလုၢ်ဘၣ်.

⁹ယဲဒၣ်အံၤယမ့ၢ်ကျဲစၢၤလီၤ. ပှၤတဂၤလၢ်လၢ်လၢအဟဲနုာ် ခီဖျိယၤန့ၣ်, ကဘၣ်တၢ်အုၣ်က့ၤခီၣ်က့ၤအီၤလီၤ. အဝဲကဟဲ နုာ်ဒီးကဟးထီၣ်ဒီးကထံၣ်န့ၢ်တၢ်အီၣ်ဆၣ်အလီၢ်န့ၣ်လီၤ.

¹⁰တၢ်ဟုၣ်တၢ်ဘျၣ်န့ၣ်ဟဲဝဲဒ်သိးအကဟုၣ်တၢ်, မၤသံတၢ်ဒီးမၤဟးဂီၤတၢ်အဂီၢ်လီၤ. မ့မ့ၢ်ယဲဒၣ်အံၤယဟဲယဲဒ်သိးသုကန့ၢ်ဘၣ်တၢ်မူ ဒီးန့ၢ်ဘၣ်အီၤအါအါကလဲာ်အဂီၢ်လီၤ.

¹¹ယဲဒၣ်အံၤယမ့ၢ်ပှၤကွၢ်သိလၢအဂ့ၤတဂၤလၢအဟ့ၣ်လီၤကွံာ် အသးသမူလၢအသိအဂီၢ်လီၤ.

¹²ပှၤဒိးလဲအသးလၢအတမ့ၢ်ပှၤကွၢ်သိတဂၤဒီးသိတမ့ၢ်အတၢ် ဘၣ်န့ၣ်, တုၤအထံၣ်ထွံၣ်မံၤဟဲဒီးအဝဲပာ်တ့ၢ်ကွံာ်သိဒီးဃ့ၢ် ကွံာ်ဝဲသတးဒီး, ထွံၣ်မံၤဂုာ်အ့ၣ်သိဒီးမၤလီၤပြံပြါကွံာ်သိ တဖၣ်န့ၣ်လီၤ.

¹³ပှၤဒိးလဲအသးတဂၤအံၤဃ့ၢ်ကွံာ်ဝဲမ့ၢ်လၢအဝဲမ့ၢ်ဒၣ်ပှၤဒိးလဲ အသးတဂၤဒီးအသးတအိၣ်ဘၣ်သိတဖၣ်အဃိလီၤ.

¹⁴ယဲဒၣ်အံၤယမ့ၢ်ပှၤကွၢ်သိလၢအဂ့ၤတဂၤလီၤ. ဒ်ပၢ်သ့ၣ်ညါယၤဒီးယသ့ၣ်ညါပၢ်အသိးန့ၣ်, ယသ့ၣ်ညါ ယသိဒီးအဝဲသ့ၣ် သ့ၣ်ညါယၤလီၤ.

¹⁵ဒီးယဟ့ၣ်လီၤကွံာ်ယသးသမူလၢယသိအဂီၢ်လီၤ.

¹⁶သိအိၣ်ဝဲအဂၤတဖၣ်လၢအဘၣ်ဃးဒီးယၤလၢ အတအိၣ်လၢသိကရၢၢ်အဝဲအံၤအပူၤဘၣ်. ဘၣ်ဆၣ်ဒီးယကဘၣ်ဆှၢအီၤစ့ၢ်ကီးလီၤ. ဒီးအဝဲသ့ၣ်ကဒိကနၣ်ယကလုၢ်ဒီးကကဲထီၣ်သိ တဖုဃီအိၣ်ဒီးပှၤကွၢ်သိတဂၤဃီလီၤ.

¹⁷လၢတၢ်ဂ့ၢ်အံၤအဃိ, ယပၢ်အဲၣ်ယၤမ့ၢ်လၢယဟ့ၣ်လီၤကွံာ် ယသးသမူဒ်သိးယကဒိးန့ၢ်က့ၤကဒီးအီၤအဂီၢ်လီၤ.

¹⁸ပှၤဟံးန့ၢ်ကွံာ်ယသးသမူလၢယၤတသ့ဘၣ်နီတဂၤ ဘၣ်. ယဟ့ၣ်လီၤကွံာ်အီၤလၢယသးဒၣ်ယဲန့ၣ်လီၤ. ယအိၣ်ဒီးတၢ်စိကမီၤလၢယကဟ့ၣ်လီၤကွံာ်အီၤဒီး ယအိၣ်ဒီးတၢ်စိကမီၤလၢယကဟံးက့ၤအီၤအဂီၢ်လီၤ. အဝဲအံၤမ့ၢ်တၢ်လၢယပၢ်မၤလိာ်တ့ၢ်ယၤလၢယကမၤ အီၤအဂီၢ်လီၤ.”

¹⁹မ့ၢ်လၢတၢ်ကတိၤတဖၣ်အံၤအဃိဒီး, တၢ်လီၤမုၢ်လီၤဖးအိၣ်ထီၣ်ကဒီးလၢပှၤယူဒၤဖိအကျါန့ၣ်လီၤ.

²⁰အဝဲသ့ၣ်အါဂၤစံးဝဲ, “ပှၤတဂၤအံၤတၢ်နါဒိးအီၤ, ဒီးအဝဲမ့ၢ်ပှၤအပျုၢ်လီၤ. ဘၣ်မနုၤအဃိသုဒိကနၣ်အီၤန့ၣ်လဲၣ်.”

²¹ဘၣ်ဆၣ်ဒီးအဂၤတဖၣ်စံးဝဲ, “ပှၤလၢတၢ်နါဒိးအီၤန့ၣ်ကတိၤတၢ်ဒ်အံၤတသ့ဘၣ်. တၢ်နါဒုးထံၣ်ထီၣ်က့ၤပှၤလၢအမဲာ်ဘျီၣ်ဘၣ်ကသ့ဧါ.”

²²မ့ၢ်တၢ်ဂိၢ်ခါအဆၢကတီၢ်, ဒီးတၢ်ပာ်စီဆှံတၢ်လုၢ်ဟံၣ်အဘူၣ် ဘၣ်တၢ်မၤအီၤလၢဝ့ၢ်ယရူၤၡလ့ၣ်အပူၤလီၤ.

²³ယ့ၣ်ၡူးဟးထီၣ်ဟးလီၤလၢစီၤၡလိၤမိၤအတၢ်ဒုးခိၣ် အဖီလာ်လၢတၢ်လုၢ်ဟံၣ်အပူၤန့ၣ်လီၤ.

²⁴ဖဲန့ၣ်အခါ, ပှၤယူဒၤဖိတဖၣ်ဟဲအိၣ်ဝးတရံးအီၤ ဒီးသံကွၢ်တၢ်ဒီးစံးဝဲ, “နကပာ်ပှၤလၢတၢ်သးဒ့ဒီအပူၤ ဆံးယံာ်လဲၣ်. နမ့မ့ၢ်ခရံာ်ဒီးတဲဘၣ်ပှၤဖျါဖျါတက့ၢ်.”

²⁵ယ့ၣ်ၡူးစံးဆၢတၢ်ဒီးစံးဝဲ, “ယစံးဘၣ်တဲဘၣ်တ့ၢ်သုလံ. ဘၣ်ဆၣ်သုတနာ်ယၤဘၣ်. တၢ်မၤတဖၣ်လၢယမၤအီၤလၢ ယပၢ်အစိကမီၤန့ၣ်အုၣ်အသးလၢယဂီၢ်လီၤ.

²⁶သုတမ့ၢ်ယသိတဖၣ်အဃိ, သုတနာ်တၢ်ဘၣ်.

²⁷ယသိတဖၣ်ဒိကနၣ်ယကလုၢ်, ယသ့ၣ်ညါအီၤဒီးအဝဲသ့ၣ်ပိာ်ယခံလီၤ.

²⁸ယဟ့ၣ်အီၤလၢတၢ်မူအထူအယိာ်, ဒီးအဝဲသ့ၣ်တသံလၢၤနီတဘျီဘၣ်. ပှၤဂုာ်န့ၢ်ဆူၣ်အဝဲသ့ၣ်လၢယအိၣ်တသ့နီတဂၤဘၣ်.

²⁹ယပၢ်လၢအဟ့ၣ်လီၤအဝဲသ့ၣ်လၢယၤန့ၣ် ဒိၣ်န့ၢ်တၢ်ခဲလၢာ်, ဒီးပှၤဂုာ်န့ၢ်ဆူၣ်အဝဲသ့ၣ်လၢယပၢ်အစုပူၤ တသ့နီတဂၤဘၣ်.

³⁰ယပၢ်ဒီးယၤန့ၣ်မ့ၢ်တၢ်တမံၤဃီလီၤ.”

³¹အန့ၣ်ဒီးပှၤယူဒၤဖိတဖၣ်ထၢထီၣ်ကဒီးလၢၢ်လၢကကွံာ်အီၤ အဂီၢ်လီၤ.

³²ယ့ၣ်ၡူးစံးဘၣ်အဝဲသ့ၣ်, “ယဒုးနဲၣ်တ့ၢ်သုတၢ်မၤအဂ့ၤအါမံၤလၢယပၢ်အအိၣ်လံ. သုသးအိၣ်ကွံာ်ယၤလၢလၢၢ်လၢတၢ်မၤဖဲလဲၣ်တမံၤအဃိ လဲၣ်.”

³³ပှၤယူဒၤဖိတဖၣ်စံးဆၢအီၤ, “တမ့ၢ်လၢတၢ်မၤအဂ့ၤတမံၤမံၤ အဃိ, ပသးအိၣ်ကွံာ်သံနၤလၢလၢၢ်န့ၣ်ဘၣ်. မ့ၢ်လၢနကတိၤဒုၣ်ဒွဲၣ်စံးအၢယွၤအဃိလီၤ. နမ့ၢ်ဒၣ်ပှၤကညီ တဂၤလီၤ. ဘၣ်ဆၣ်နစံးလီၤနသးလၢနမ့ၢ်ကစၢ်ယွၤလီၤ.”

³⁴ယ့ၣ်ၡူးစံးဆၢအဝဲသ့ၣ်, “တၢ်ကွဲးအသးလၢသုတၢ်သိၣ် တၢ်သီဒၣ်ဝဲအပူၤလၢကစၢ်ယွၤစံးဝဲ, ‘သုမ့ၢ်ယွၤတဖၣ်လီၤ’ (စံး ၈၂:၆).

³⁵မ့မ့ၢ်ဒ်န့ၣ်ဒီးကစၢ်ယွၤအကလုၢ်ကထါလၢအမ့ၢ်ဝဲတီဝဲတဘိ ယူၢ်ဃီ, မ့ၢ်ကိးပှၤလၢအဒိးန့ၢ်ယွၤအကလုၢ်ကထါတဖၣ်လၢ ယွၤတဖၣ်ဒီး,

³⁶မ့ၢ်သုကစံးလၢယၤ, ပှၤလၢပၢ်ဃုထၢဒီးမၢလီၤဆူဟီၣ်ခိၣ်တဂၤ အံၤကတိၤဒုၣ်ဒွဲၣ်စံးအၢယွၤ, မ့ၢ်လၢယစံး, ‘ယဲဒၣ်အံၤယမ့ၢ် ကစၢ်ယွၤအဖိခွါ’ အဃိန့ၣ်ဧါ.

³⁷ယမ့ၢ်တမၤတၢ်တဖၣ်လၢယပၢ်သးအိၣ်လၢယကမၤ ဘၣ်ဒီး, တဘၣ်နာ်ယၤတဂ့ၤ.

³⁸ဘၣ်ဆၣ်ယမ့ၢ်မၤအီၤဒီး, သုမ့ၢ်တနာ်ယၤဒၣ်လဲာ်, နာ်တၢ်လၢယမၤတဖၣ်ဒ်သိးသုကသ့ၣ်ညါဒီးနၢ်ပၢၢ်လီၤတံၢ်လၢ ပၢ်အိၣ်လၢယပူၤဒီးယအိၣ်လၢပၢ်အပူၤန့ၣ်တက့ၢ်.”

³⁹အဝဲသ့ၣ်ကျဲးစၢးဟံးဃာ်ဖီၣ်ဃာ်ကဒီးယ့ၣ်ၡူး, ဘၣ်ဆၣ်အဝဲဟးပူၤဖျဲးကွံာ်အသးလၢအဝဲသ့ၣ်အစုပူၤလီၤ.

⁴⁰ယ့ၣ်ၡူးက့ၤကဒါက့ၤကဒီးဆူထံကျိယၢ်ဒ့ၣ်ဝၢ်ဘးခီဆူ တၢ်လီၢ်ဖဲစီၤယိၤဟၣ်ဘျၢတ့ၢ်ပှၤအလီၢ်, ဒီးအိၣ်ဝဲဖဲန့ၣ်လီၤ.

⁴¹ဒီးပှၤဟဲအါဂၤဆူအအိၣ်ဒီးအဝဲသ့ၣ်စံးဝဲ, “စီၤယိၤဟၣ်တမၤတၢ်လီၤလးနီတမံၤဘၣ်. ဘၣ်ဆၣ်ကယဲၢ်တၢ်လၢအဝဲစံးဝဲဘၣ်ဃးပှၤတဂၤအံၤအဂ့ၢ် အကျိၤန့ၣ်, မ့ၢ်ဝဲတီဝဲခဲလၢာ်လီၤ.”

⁴²ဒီးပှၤဖဲန့ၣ်အါဂၤစူၢ်က့ၤနာ်က့ၤအီၤလီၤ.