Read S'gaw Karen လံာ်ယိၤဟၣ် 11 Bible Online

လံာ်ယိၤဟၣ် 11 - S'gaw Karen bible

လံာ်ယိၤဟၣ် 11

¹ပှၤအိၣ်ဝဲတဂၤအမံၤမ့ၢ်စီၤလါစရူးလၢအအိၣ်လၢသဝီဘ့ၤ သနံဒီးအဝဲဆိးက့ဝဲန့ၣ်လီၤ. ဘ့ၤသနံမ့ၢ်သဝီလၢနီၢ်မၤရံဒီးအဒီပုၢ်ဝဲၢ်မုၣ်နီၢ်မၢ်သၤ အိၣ်ဝဲန့ၣ်လီၤ.

²(နီၢ်မၤရံအဝဲအံၤမ့ၢ်ပှၤတဂၤဃီလၢအလူလီၤအသိနၢမူလၢ ယ့ၣ်ၡူးအခီၣ်အလိၤဒီးတြူာ်ကွံာ်ဝဲအခီၣ်လၢအခိၣ်သူလီၤ. စီၤလါစရူးလၢအဆိးက့အံၤမ့ၢ်အဝဲအဒီပုၢ်ဝဲၢ်ခွါလီၤ.)

³ပှၤဒီပုၢ်ဝဲၢ်မုၣ်ခံဂၤအံၤဆှၢလီၤန့ၢ်ယ့ၣ်ၡူးအတၢ်ကစီၣ်လၢ အစံးဝဲ, “ကစၢ်ဧၢ, နတံၤသကိးလၢနအဲၣ်အီၤတဂၤဆိးက့ဝဲန့ၣ်လီၤ.”

⁴ဖဲယ့ၣ်ၡူးနၢ်ဟူတၢ်ကစီၣ်အံၤန့ၣ်အဝဲဒၣ်စံး, “တၢ်ဆူးတၢ်ဆါအံၤတမ့ၢ်တၢ်ဆါလၢအကဆှၢအီၤဆူတၢ်သံ န့ၣ်ဘၣ်. မ့မ့ၢ်လၢကစၢ်ယွၤအလၤကပီၤအဂီၢ်, ဒီးခီဖျိတၢ်အံၤန့ၣ်, ကစၢ်ယွၤအဖိခွါအလၤကပီၤကအိၣ်ဖျါထီၣ်ဝဲန့ၣ်လီၤ.”

⁵ယ့ၣ်ၡူးအဲၣ်ဘၣ်နီၢ်မၢ်သၤဒီးအဒီပုၢ်ဝဲၢ်မုၣ်ဒီးစီၤလါစရူးလီၤ.

⁶သနာ်က့, ဖဲအဝဲဒိးန့ၢ်တၢ်ကစီၣ်လၢစီၤလါစရူးဆိးက့ဝဲန့ၣ်, အဝဲအိၣ်အါထီၣ်ဒံးဝဲဖဲတၢ်လီၢ်န့ၣ်ခံသီညါလီၤ.

⁷အန့ၣ်ဝံၤဒီး, အဝဲစံးဘၣ်အပျဲၢ်အဘီၣ်တဖၣ်, “မ်ပက့ၤကဒါက့ၤဆူကီၢ်ယူဒၤတက့ၢ်.”

⁸အပျဲၢ်အဘီၣ်တဖၣ်စံးဆၢအီၤ, “သရၣ်ဧၢ, ဖဲအပူၤကွံာ်တယံာ်ဒံးဘၣ်ဒၣ်လဲာ်န့ၣ်, ပှၤယူဒၤဖိတဖၣ်သါကကွံာ်သံနၤလၢလၢၢ်, ဒီးခဲအံၤနကက့ၤကဒါက့ၤကဒီးဆူန့ၣ်ဧါ.”

⁹ယ့ၣ်ၡူးစံးဆၢဝဲဒၣ်, “မုၢ်နံၤတနံၤန့ၣ်အိၣ်တဆံခံနၣ်ရံၣ် တမ့ၢ်ဘၣ်ဧါ. လၢတၢ်န့ၣ်အဃိပှၤတဂၤဂ့ၤတဂၤဂ့ၤလၢ အဟးလၢမုၢ်ဆါခီန့ၣ်, အခီၣ်တဘၣ်တိၢ်ဘၣ်. မ့ၢ်လၢအဝဲထံၣ်ဘၣ်ဟီၣ်ခိၣ်အံၤအတၢ်ကပီၤအဃိလီၤ.

¹⁰ဘၣ်ဆၣ်အဝဲမ့ၢ်ဟးလၢမုၢ်နၤခီအဆၢကတီၢ်န့ၣ်, အခီၣ် ကဘၣ်တိၢ်ဘၣ်ထံး, မ့ၢ်လၢတၢ်ကပီၤတအိၣ်ဘၣ်လၢအပူၤဘၣ် အဃိလီၤ.”

¹¹ယ့ၣ်ၡူးကတိၤတၢ်န့ၣ်တဖၣ်ဝံၤစံးကဒီးဝဲ, “ပတံၤသကိးစီၤလါစရူးတဂၤမံဘၣ်အသးလံ. ဘၣ်ဆၣ်ယကလဲၤဒီးထိၣ်ဂဲၤထၢၣ်အီၤန့ၣ်လီၤ.”

¹²အပျဲၢ်အဘီၣ်တဖၣ်စံးဆၢအီၤ, “ကစၢ်ဧၢ, အဝဲမ့ၢ်မံဘၣ်အသးဒီး, ကအိၣ်ဆူၣ်အိၣ်ချ့ထီၣ်က့ၤဝဲလီၤ.”

¹³ယ့ၣ်ၡူးစံးတၢ်အံၤအခီပညီမ့ၢ်ဝဲစီၤလါစရူးသံလံန့ၣ်လီၤ. ဘၣ်ဆၣ်အဝဲသ့ၣ်ဆိကမိၣ်ဝဲလၢယ့ၣ်ၡူးစံးဒၣ်ဝဲ စီၤလါစရူးမံဘၣ်အသးဒ်ညီနုၢ်မံဝဲအသိးန့ၣ်လီၤ.

¹⁴လၢတၢ်န့ၣ်အဃိ, ယ့ၣ်ၡူးစံးဘၣ်အဝဲသ့ၣ်လိၤလိၤ, “စီၤလါစရူးသံလံ.

¹⁵ဘၣ်ဆၣ်ဒီးလၢသုဂီၢ်န့ၣ်, ယသးခုလၢယတအိၣ်ဘၣ်ဒီးအီၤဖဲန့ၣ် အဃိလီၤ. ခီဖျိတၢ်အံၤ, သုကနာ်တၢ်လီၤ. မ်ပလဲၤသကိးဆူအအိၣ်တက့ၢ်.”

¹⁶စီၤသိၤမါ (အခီပညီမ့ၢ်ပှၤသဃံာ်) စံးဘၣ်အပျဲၢ်အဘီၣ်သကိး ဒီးအီၤတဖၣ်, “မ်ပဝဲခဲလၢာ်ပလဲၤသကိးဒီးသရၣ်, ဒ်သိးပကသံဃုာ်ဒီးအီၤအဂီၢ်တက့ၢ်.”

¹⁷ဖဲယ့ၣ်ၡူးလဲၤတုၤဝဲန့ၣ်, ထံၣ်ဘၣ်ဝဲလၢ စီၤလါစရူးဘၣ်တၢ်ခူၣ်လီၤတ့ၢ်လံအီၤအိၣ်လွံၢ်သီလံန့ၣ်လီၤ.

¹⁸သဝီဘ့ၤသနံအံၤအိၣ်စီၤစုၤယံၤဒီးဝ့ၢ်ယရူၤၡလ့ၣ်ခံမံးလး ဃၣ်ဃၣ်,

¹⁹ဒီးပှၤယူဒၤဖိအါဂၤဟဲဆူနီၢ်မၢ်သၤဒီးနီၢ်မၤရံအအိၣ် ဒ်သိးကကတိၤမုာ်ထီၣ်က့ၤအသးလၢအဝဲသ့ၣ်အဒီပုၢ်ဝဲၢ်သံ အဃိန့ၣ်လီၤ.

²⁰တုၤနီၢ်မၢ်သၤနၢ်ဟူယ့ၣ်ၡူးဟဲဝဲလံဒီး, အဝဲဟးထီၣ်လဲၤသဂၢၢ် အီၤ, မ့မ့ၢ်နီၢ်မၤရံတဂၤဆ့ၣ်နီၤအိၣ်ဒၣ်လၢဟံၣ်ပူၤန့ၣ်လီၤ.

²¹နီၢ်မၢ်သၤစံးဘၣ်ယ့ၣ်ၡူး “ကစၢ်ဧၢ, နမ့ၢ်အိၣ်ဘၣ်ဖဲအံၤဒီး တမ့ၢ်လၢယဒီပုၢ်ဝဲၢ်ခွါတဂၤအံၤကသံဒံးဘၣ်.

²²ဘၣ်ဆၣ်ယသ့ၣ်ညါလၢ, ခဲကနံၣ်အံၤဒၣ်လဲာ် ဖဲဒၣ်တၢ်လၢနဃ့လၢကစၢ်ယွၤတမံၤလၢ်လၢ်န့ၣ်, ကစၢ်ယွၤကဟ့ၣ်လီၤနၤလီၤ.”

²³ယ့ၣ်ၡူးစံးဘၣ်အီၤ, “နဒီပုၢ်ဝဲၢ်ခွါကမူထီၣ်က့ၤဝဲလီၤ.”

²⁴နီၢ်မၢ်သၤစံးဆၢအီၤ, “ယသ့ၣ်ညါလၢအဝဲကမူထီၣ်က့ၤလၢမုၢ်နံၤခံကတၢၢ်န့ၣ်လီၤ.”

²⁵ယ့ၣ်ၡူးစံးဘၣ်အီၤ, “ယဲဒၣ်အံၤ ယမ့ၢ်တၢ်ဂဲၤဆၢထၢၣ်သမူထီၣ်က့ၤ ဒီးတၢ်မူန့ၣ်လီၤ. ပှၤလၢအစူၢ်က့ၤနာ်က့ၤယၤတဂၤလၢ်လၢ်န့ၣ်, မ့ၢ်သံဘၣ်ဆၣ်ဒီးကမူဝဲလီၤ.

²⁶ဒီးပှၤတဂၤလၢ်လၢ်လၢအမူဝဲဒီးစူၢ်က့ၤနာ်က့ၤယၤန့ၣ်, တသံနီတဘျီလၢၤဘၣ်. နနာ်တၢ်အံၤစ့ၢ်ကီးဧါ.”

²⁷နီၢ်မၢ်သၤစံးဆၢအီၤ, “မ့ၢ်ကစၢ်ဧၢ, ယနာ်လၢနမ့ၢ်ခရံာ်, ကစၢ်ယွၤအဖိခွါလၢအကဟဲလီၤဆူဟီၣ်ခိၣ်ချၢအံၤန့ၣ်လီၤ.”

²⁸နီၢ်မၢ်သၤစံးတၢ်ဒ်အံၤဝံၤဒီး, အဝဲက့ၤကဒါက့ၤဒီးကိး အဒီပုၢ်ဝဲၢ်မုၣ်နီၢ်မၤရံကစုဒုဒီးစံးဘၣ်အီၤ, “သရၣ်ဟဲတုၤဖဲအံၤလံဒီးအဲၣ်ဒိးထံၣ်နၤလီၤ.”

²⁹ဖဲနီၢ်မၤရံနၢ်ဟူတၢ်အံၤဒီး, ဂဲၤဆၢထၢၣ်ဒီးဟးထီၣ်ချ့သဒံးလၢကသဂၢၢ်အီၤ အဂီၢ်လီၤ.

³⁰(ယ့ၣ်ၡူးဟဲတတုၤဒံးဆူသဝီပူၤဘၣ်. မ့မ့ၢ်အိၣ်ဒံးဒၣ်ဖဲနီၢ်မၢ်သၤဟဲသဂၢၢ်အီၤအလီၢ်န့ၣ်လီၤ.)

³¹ဖဲပှၤယူဒၤဖိလၢအကတိၤမုာ်ထီၣ်က့ၤအီၤဒီးအိၣ်ဒီးအီၤ လၢဟံၣ်ပူၤတဖၣ်ထံၣ်နီၢ်မၤရံဂဲၤဆၢထၢၣ်ချ့သဒံးန့ၣ်, အဝဲသ့ၣ်ပိာ်ထီၣ်အခံလီၤ. အဝဲသ့ၣ်ဆိကမိၣ်ဝဲလၢအဝဲ ကလဲၤဆူတၢ်သွၣ်ခိၣ်ဒ်သိးအကဟီၣ်ဝဲဖဲန့ၣ်လီၤ.

³²နီၢ်မၤရံလဲၤတုၤဖဲယ့ၣ်ၡူးအိၣ်တၢ်အလီၢ်ဒီး တုၤအထံၣ်အီၤတဘျီဃီအဝဲထိၣ်လီၤပှီၤအသးဖဲယ့ၣ်ၡူး အခီၣ်ထံးဒီးစံးဝဲ, “ကစၢ်ဧၢ, နမ့ၢ်အိၣ်တ့ၢ်နဲဖဲအံၤဒီး ယဒီပုၢ်ဝဲၢ်ခွါတဂၤအံၤတမ့ၢ်လၢအကသံဒံးဘၣ်.”

³³ယ့ၣ်ၡူးထံၣ်ဘၣ်နီၢ်မၤရံဟီၣ်, ဒီးပှၤယူဒၤဖိလၢအဟဲပိာ်အခံတဖၣ်ဟီၣ်စ့ၢ်ကီးအဃိ, အသးဘၣ်ဒိဘၣ်ထံးဒီးအသူၣ်လီၤအသးလီၤဝဲန့ၣ်လီၤ.

³⁴အဝဲသံကွၢ်ပှၤတဖၣ်န့ၣ်, “သုလဲၤပာ်လီၤအီၤဖဲလဲၣ်.” အဝဲသ့ၣ်စံးဆၢအီၤ, “ကစၢ်ဧၢ, ဟဲဒီးကွၢ်တက့ၢ်.”

³⁵ဒီးယ့ၣ်ၡူးအမဲာ်ထံလီၤဝဲလီၤ.

³⁶ပှၤယူဒၤဖိတဖၣ်စံးဝဲ, “ကွၢ်တက့ၢ်. မ့ၢ်အအဲၣ်ဘၣ်အီၤထဲလဲၣ်န့ၣ်သုထံၣ်သ့ၣ်ညါသ့လီၤ.”

³⁷လၢအဝဲသ့ၣ်အကျါတနီၤစံးဝဲ “အဝဲဒုးထံၣ်ထီၣ်က့ၤပှၤမဲာ်ဘျီၣ်တဂၤန့ၣ်တမ့ၢ်ဘၣ်ဧါ. ဒ်သိးစီၤလါစရူးအသုတသံတဂ့ၤဒီး, မၤဝဲတသ့ဘၣ်ဧါ.”

³⁸လၢတၢ်သူၣ်ဘၣ်ဒိသးဘၣ်ထံးအပူၤ, ယ့ၣ်ၡူးလဲၤဆူတၢ် သွၣ်ခိၣ်, လၢအမ့ၢ်လ့အပူၤလၢအခိၣ်ထိးဘၣ်တၢ်ကျၢၢ်ဘၢ အီၤလၢလၢၢ်န့ၣ်လီၤ.

³⁹ယ့ၣ်ၡူးဟ့ၣ်လီၤအကလုၢ်ဒီးစံးဝဲ “သုးကွံာ်လၢၢ်န့ၣ် တက့ၢ်.” နီၢ်မၢ်သၤ, ပှၤလၢအသံတဂၤအဒီပုၢ်ဝဲၢ်မုၣ်စံးဆၢတၢ်ဒီး စံးဝဲ “ကစၢ်ဧၢ, ပှၤပာ်လီၤအီၤအိၣ်လွံၢ်သီလံအဃိကနၢအုၣ်လံလီၤ.”

⁴⁰ယ့ၣ်ၡူးစံးဘၣ်အီၤ, “မ့ၢ်ယတတဲဘၣ်လံနၤလၢနမ့ၢ်နာ်တၢ်ဒီး နကထံၣ်ဘၣ်ကစၢ်ယွၤအလၤကပီၤန့ၣ်ဘၣ်ဧါ.”

⁴¹ပှၤသ့ၣ်တဖၣ်န့ၣ်သုးကွံာ်လၢၢ်န့ၣ်လီၤ. ယ့ၣ်ၡူးကွၢ်ထီၣ်တၢ်ဒီးစံးဝဲ, “ပၢ်ဧၢ, ယစံးဘျုးနၤလၢနဒိကနၣ်ယၤအဃိလီၤ.

⁴²ယသ့ၣ်ညါလၢနဒိကနၣ်ယၤထီဘိတထံၣ်ဃီလီၤ. ဘၣ်ဆၣ်ယစံးတၢ်အံၤမ့ၢ်ဒၣ်ဒ်သိးဒီးပှၤဂီၢ်မုၢ်ဖဲအံၤတဖၣ် ကနာ်ဝဲလၢနမၢလီၤယၤအဂီၢ်န့ၣ်လီၤ.”

⁴³အဝဲစံးတၢ်အံၤဝံၤဒီး, ကိးပသူထီၣ်ဝဲလၢအကလုၢ်ဖးဒိၣ်, “စီၤလါစရူးဧၢ, ဟဲက့ၤထီၣ်တက့ၢ်.”

⁴⁴အဝဲဟဲက့ၤထီၣ်က့ၤဝဲ, အစုဒီးအခီၣ်တဖၣ်ဘၣ်ဘိၣ်ဘံဃာ်အသးလၢတၢ်ကံးယာ် လၢတၢ်ဘိၣ်ဘံပှၤအစိၣ်တဖၣ်ဒီးအမဲာ်ကျၢၢ်ဘၢအသး လၢတၢ်ကံးယာ်စ့ၢ်ကီးန့ၣ်လီၤ. ယ့ၣ်ၡူးစံးဘၣ်အဝဲသ့ၣ် “ဃ့ၣ်လီၤကွံာ်တၢ်ကံးယာ်ဒီးပျၢ်ကွံာ်အီၤတက့ၢ်.”

⁴⁵ပှၤယူဒၤဖိအါဂၤလၢအဟဲအိၣ်သကိးနီၢ်မၤရံ, ထံၣ်ဘၣ် ယ့ၣ်ၡူးမၤတ့ၢ်တၢ်အံၤဒီးအဝဲသ့ၣ်စူၢ်က့ၤနာ်က့ၤအီၤန့ၣ်လီၤ.

⁴⁶ဘၣ်ဆၣ်လၢအဝဲသ့ၣ်အကျါတနီၤက့ၤကဒါက့ၤဆူပှၤဖၤရံၤၡဲ တဖၣ်အအိၣ်ဒီးစံးဘၣ်တဲဘၣ်အဝဲသ့ၣ်တၢ်လၢယ့ၣ်ၡူး မၤတ့ၢ်ဝဲတဖၣ်န့ၣ်လီၤ.

⁴⁷အန့ၣ်သတးဒီး, ပှၤဖၤရံၤၡဲတဖၣ်ဒီးပှၤလုၢ်တၢ်အခိၣ်အဒိၣ် တဖၣ်ကိးကီၣ်ကးအတၢ်အိၣ်ဖှိၣ်ဒီးစံးဝဲ “ပကမၤဒ်လဲၣ်. အဂ့ၢ်ဒ်အံၤ, ပှၤတဂၤအံၤမၤတၢ်လီၤလးအါမးလီၤ.

⁴⁸ပမ့ၢ်ပျဲအမၤတၢ်ဒ်အံၤတဖၣ်ဆူညါဒီး, ပှၤခဲလၢာ်ကစူၢ်က့ၤနာ်က့ၤအီၤဒီးပှၤရိမ့ၤဖိ အပဒိၣ်ပပှၢ်တဖၣ်ကဟဲဒီးမၤဟးဂီၤကွံာ် ပတၢ်လုၢ်ဟံၣ်ဒီးပပှၤဒီကလုာ်ညါန့ၣ်လီၤ.”

⁴⁹ဒီးပှၤလၢအဝဲသ့ၣ်အကျါတဂၤလၢအမံၤမ့ၢ်ဝဲစီၤကၤယါဖၤ, လၢအမ့ၢ်ပှၤလုၢ်တၢ်အခိၣ်အဒိၣ်ကတၢၢ်တဂၤလၢနံၣ်အဝဲန့ၣ်အဂီၢ် စံးဝဲ, “သုတသ့ၣ်ညါနၢ်ပၢၢ်တၢ်နီတမံၤဘၣ်.

⁵⁰မ့ၢ်သုတသ့ၣ်ညါလၢ, တၢ်ပျဲပှၤတဂၤတူၢ်သံအသးလၢပှၤခဲလၢာ် အဂီၢ်အံၤဂ့ၤဒိၣ်န့ၢ်ဒံးပှၤဒီကလုာ်ညါကဟးဂီၤကွံာ်တက့ၢ်န့ၣ်ဘၣ် ဧါ.”

⁵¹ဘၣ်ဆၣ်ဒီးတၢ်အံၤတမ့ၢ်စီၤကၤယါဖၤအတၢ်ကတိၤဒၣ်ဝဲဘၣ်. မ့ၢ်လၢအဝဲမ့ၢ်ပှၤလုၢ်တၢ်အခိၣ်အဒိၣ်ကတၢၢ်လၢနံၣ်အဝဲန့ၣ် အဂီၢ်အဃိ, အဝဲကတိၤဆိပာ်တၢ်ဒ်ဝံတဂၤအသိး လၢယ့ၣ်ၡူးကသံလၢပှၤယူဒၤဖိအဂီၢ်,

⁵²ဒီးတမ့ၢ်ထဲပှၤတကလုာ်ဧိၤန့ၣ်အဂီၢ်ဘၣ်. မ့ၢ်စ့ၢ်ကီးလၢအကထုးဖှိၣ်ပာ်ဖှိၣ်က့ၤကစၢ်ယွၤအပှၤဂီၢ်မုၢ် လၢအလီၤပြံလီၤပြါတဖၣ်ဒ်သိးအကကဲထီၣ်က့ၤပှၤတဖုဃီ အဂီၢ်န့ၣ်လီၤ.

⁵³စးထီၣ်လၢမုၢ်နံၤအဝဲန့ၣ်, ပှၤယူဒၤဖိအခိၣ်အနၢ်တဖၣ် ကူၣ်ထီၣ်ဖးလီၤလၢအကမၤသံယ့ၣ်ၡူးန့ၣ်လီၤ.

⁵⁴လၢတၢ်န့ၣ်အဃိ, ယ့ၣ်ၡူးတဟးထီၣ်က့ၤလီၤလၢကီၢ်ယူဒၤ အပူၤဖျိဖျိဖျါဖျါလၢၤဘၣ်. မ့မ့ၢ်ဟးထီၣ်ကွံာ်ဝဲဖဲန့ၣ်ဒီးလဲၤဝဲဆူဝ့ၢ်ကိးဝဲအမံၤလၢအ့ဖရဲၣ်, လၢအအိၣ်ဘူးဒီးပှၢ်မုၢ်ကနၢဒီးအိၣ်ဝဲဆိးဝဲဒီးအပျဲၢ်အဘီၣ် တဖၣ်ဖဲန့ၣ်လီၤ.

⁵⁵မ့ၢ်လၢပှၤယူဒၤဖိအဘူၣ်လဲၤကပာ်အဆၢကတီၢ်ဘူးထီၣ်လံ အဃိ, ပှၤအိၣ်လၢခိအါဒံအါဂၤလဲၤထီၣ်ဝဲဆူဝ့ၢ်ယရူၤၡလ့ၣ် ဒ်သိးကမၤထွဲတၢ်မၤကဆှီထီၣ်သးအလုၢ်အလၢ်တချုးဘူၣ် အဆၢကတီၢ်ဘၣ်ဒံးဝဲန့ၣ်လီၤ.

⁵⁶အဝဲသ့ၣ်ဃုထံၣ်ယ့ၣ်ၡူးဒီးဖဲအဝဲသ့ၣ်ပာ်ဖှိၣ်အသးလၢတၢ်လုၢ်ဟံၣ် အပူၤန့ၣ်, သံကွၢ်လိာ်အသးတဂၤဒီးတဂၤ, “နဲနဆိကမိၣ်ဒ်လဲၣ်. အဝဲကဟဲဆူဘူၣ်အံၤဧါ, တဟဲဘၣ်ဧါ.”

⁵⁷ပှၤလုၢ်တၢ်အခိၣ်အဒိၣ်တဖၣ်ဒီးပှၤဖၤရံၤၡဲတဖၣ်ဟ့ၣ်လီၤ အကလုၢ်လၢပှၤတဂၤလၢ်လၢ်လၢအသ့ၣ်ညါယ့ၣ်ၡူးအိၣ်တၢ် အလီၢ်န့ၣ်, ကဘၣ်ဒုးသ့ၣ်ညါအဝဲသ့ၣ်လၢတၢ်ကလဲၤ ဟံးဃာ်ဖီၣ်ဃာ်အီၤအဂီၢ်လီၤ.