Read S'gaw Karen လံာ်ယိၤဟၣ် 13 Bible Online

လံာ်ယိၤဟၣ် 13 - S'gaw Karen bible

လံာ်ယိၤဟၣ် 13

¹ဖဲဘူၣ်လဲၤကပာ်တချုးဘၣ်တနံၤန့ၣ်, ယ့ၣ်ၡူးသ့ၣ်ညါဝဲလၢ တၢ်ဆၢကတီၢ်နၣ်ရံၣ်တုၤအိၣ်အီၤလၢအဝဲကဘၣ်ဟးထီၣ် ကွံာ်လၢဟီၣ်ခိၣ်အံၤဒီးက့ၤဆူပၢ်အအိၣ်န့ၣ်လီၤ. အဝဲအဲၣ်ဘၣ်ပှၤတဖၣ်လၢဟီၣ်ခိၣ်အံၤလၢအမ့ၢ်အတၢ် ဒၣ်ဝဲ, ဒီးအဲၣ်အီၤတုၤအကတၢၢ်န့ၣ်လီၤ.

²ယ့ၣ်ၡူးဒီးအပျဲၢ်အဘီၣ်တဖၣ်အီၣ်ဟါတၢ်အီၣ်အခါ, မုၣ်ကီၤလံၢ်ဒၢနုာ်တ့ၢ်လံဝဲတၢ်ကူၣ်လၢအကဟ့ၣ်လီၤကွံာ် ယ့ၣ်ၡူးလၢစီၤၡံမိၣ်အဖိခွါစီၤယူဒၤအံၣ်စကၤရံၤအိာ် အသးပူၤန့ၣ်လီၤ.

³ယ့ၣ်ၡူးသ့ၣ်ညါဝဲလၢပၢ်ဟ့ၣ်လံအီၤတၢ်စိတၢ်ကမီၤလၢာ်လၢာ် ဆ့ဆ့, ဒီးသ့ၣ်ညါစ့ၢ်ကီးဝဲလၢအဝဲဟဲလၢကစၢ်ယွၤအအိၣ် ဒီးကက့ၤဆူကစၢ်ယွၤအအိၣ်န့ၣ်လီၤ.

⁴လၢတၢ်န့ၣ်အဃိ, အဝဲဂဲၤဆၢထၢၣ်လၢတၢ်အီၣ်အလီၢ်, ဘ့ၣ်လီၤကွံာ်အဆ့ကၤဖီခိၣ်, ဒီးစၢဃာ်အယီၢ်ဒ့လၢတၢ်ကံး ယာ်လၢပှၤထွါပှၤလိၤတဘ့ၣ်န့ၣ်လီၤ.

⁵ဝံၤဒီးအဝဲလူလီၤထံလၢသရာ်အပူၤဒီးစးထီၣ်သ့အပျဲၢ်အဘီၣ် တဖၣ်အခီၣ်ဒီးထွါသူထီၣ်က့ၤဝဲလၢတၢ်ကံးယာ်လၢအစၢဃာ် အယီၢ်ဒ့တဘ့ၣ်န့ၣ်လီၤ.

⁶ဖဲယ့ၣ်ၡူးဟဲတုၤစီၤၡံမိၣ်ပ့းတရူးအအိၣ်ဒီး, အဝဲစံးဘၣ်အီၤ, “ကစၢ်ဧၢ, မ့ၢ်နကသ့ယခီၣ်စ့ၢ်ကီးဧါ.”

⁷ယ့ၣ်ၡူးစံးဆၢအီၤ, “တၢ်လၢယမၤခဲအံၤန့ၣ်, နတနၢ်ပၢၢ်ဘၣ်. ဘၣ်ဆၣ်လၢခံက့ၤနကနၢ်ပၢၢ်လီၤ.”

⁸စီၤပ့းတရူးစံးဝဲ “နတဘၣ်သ့ယခီၣ်နီတဘျီဘၣ်.” ယ့ၣ်ၡူးစံးဆၢအီၤ, “ယမ့ၢ်တသ့ဘၣ်နခီၣ်ဒီးနတဘၣ် ဃးဒီးယၤလၢၤဘၣ်.”

⁹စီၤၡံမိၣ်ပ့းတရူးစံးဆၢအီၤဒီးစံး “ကစၢ်ဧၢ, မ့မ့ၢ်ဒ်န့ၣ်ဒီး, တဘၣ်သ့ထဲယခီၣ်တဂ့ၤ. သ့ဃုာ်စ့ၢ်ကီးယစုတဖၣ်ဒီးယခိၣ် တက့ၢ်.”

¹⁰ယ့ၣ်ၡူးစံးဝဲ, “ပှၤတဂၤလၢ်လၢ်လၢအလုၢ်ထံဝံၤန့ၣ်, ကဆှီဝဲလၢာ်လၢာ်ဆ့ဆ့လံအဃိသ့ကွံာ်အသးအလီၢ် တအိၣ်လၢၤဘၣ်. ကဘၣ်သ့ကွံာ်ဒၣ်ထဲအခီၣ်ဧိၤန့ၣ်လီၤ. မ့တမ့ၢ်ဘၣ်ထဲပှၤလၢသုကျါတဂၤဧိၤန့ၣ်, သုဝဲခဲလၢာ်သု ကဆှီလံ.”

¹¹(ယ့ၣ်ၡူးသ့ၣ်ညါတ့ၢ်ပှၤလၢအကဟ့ၣ်လီၤကွံာ်အီၤဒီးလၢတၢ်န့ၣ် အဃိအဝဲစံးဝဲ “မ့တမ့ၢ်ဘၣ်ထဲပှၤလၢသုကျါတဂၤဧိၤ န့ၣ်, သုဝဲခဲလၢာ်သုကဆှီလံန့ၣ်လီၤ.”)

¹²တုၤယ့ၣ်ၡူးသ့အဝဲသ့ၣ်အခီၣ်ဝံၤဒီး, အဝဲကၤထီၣ်က့ၤအဆ့ကၤ အဖီခိၣ်ဒီးက့ၤကဒါက့ၤဆူအလီၢ်လၢစီၢ်နီၤခိၣ်အကပၤန့ၣ်လီၤ. ဝံၤဒီးသံကွၢ်အဝဲသ့ၣ် “တၢ်လၢယမၤဘၣ်တ့ၢ်သုအံၤ, သုနၢ်ပၢၢ်စ့ၢ်ကီးဧါ.

¹³သုကိးယၤလၢသရၣ်ဒီးကစၢ်ဒီးသုကတိၤတၢ်ဒ်အံၤမ့ၢ်တၢ်လၢ အဘၣ်လီၤ. အဂ့ၢ်ဒ်အံၤယမ့ၢ်တၢ်အဝဲန့ၣ်လီၤ.

¹⁴ယၤလၢယမ့ၢ်သုကစၢ်ဒီးသုသရၣ်အံၤ, မ့ၢ်သ့ကွံာ်သုခီၣ်ဒီး, သုဝဲသ့ၣ်ကဒဲကဒဲသုကြၢးသ့ကွံာ်လိာ်သုခီၣ်လီၤ.

¹⁵ယပာ်လီၤန့ၢ်သုတၢ်အဒိအတဲာ်အံၤ, ဒ်သိးသုကမၤတၢ်ဒ်ယမၤတ့ၢ်သုအသိးန့ၣ်လီၤ.

¹⁶ယစံးဘၣ်တဲဘၣ်သုတၢ်မ့ၢ်တၢ်တီ, ကုၢ်တဒိၣ်န့ၢ်အကစၢ်နီတဂၤ ဘၣ်. ဒီးပှၤစိာ်တၢ်ကစီၣ်တဒိၣ်န့ၢ်ပှၤလၢအမၢလီၤအီၤနီတဂၤဘၣ်.

¹⁷ခဲအံၤမ့ၢ်လၢသုသ့ၣ်ညါတၢ်မ့ၢ်တၢ်တီအံၤလံဒီး, သုမ့ၢ်မၤအီၤန့ၣ်, သုကဘၣ်ဆိၣ်ဂ့ၤနီၢ်နီၢ်လီၤ.

¹⁸ယတကတိၤတၢ်လၢသုဝဲခဲလၢာ်အဂ့ၢ်ဘၣ်. ယသ့ၣ်ညါပှၤလၢ ယဃုထၢအီၤတဖၣ်လီၤ. ဘၣ်ဆၣ်တၢ်ကွဲးအသးကဘၣ် လၢထီၣ်ပှဲၤထီၣ်လၢအစံးဝဲ, ‘ပှၤလၢအအီၣ်တၢ်ဒီးယၤတဂၤ န့ၣ်ထီဒါယၤလီၤ’ (စံး. ၄၁:၉).

¹⁹ခဲအံၤတချုးလၢတၢ်မၤအသးဒံးဘၣ်န့ၣ်, ယတဲဘၣ်သုလၢတၢ်ဂ့ၢ် တဖၣ်အံၤဒ်သိးတုၤတၢ်မၤအသးဒီး, သုကနာ်လၢ ‘ယမ့ၢ်တၢ်လၢ ယမ့ၢ်’ န့ၣ်လီၤ.

²⁰ယစံးဘၣ်တဲဘၣ်သုတၢ်မ့ၢ်တၢ်တီ, ပှၤတဂၤလၢ်လၢ်လၢအတူၢ်လိာ်ပှၤလၢယမၢလီၤအီၤန့ၣ်, မ့ၢ်အတူၢ်လိာ်ယၤစ့ၢ်ကီးဒီးပှၤတဂၤလၢ်လၢ်လၢအတူၢ် လိာ်ယၤန့ၣ်, တူၢ်လိာ်ပှၤလၢအမၢလီၤယၤစ့ၢ်ကီးန့ၣ်လီၤ.

²¹ယ့ၣ်ၡူးစံးတၢ်အံၤဝံၤဒီးအသးဘၣ်တံာ်တာ်ဒိၣ်ဒိၣ် ကလဲာ်ဒီးကတိၤဖျါထီၣ်ဝဲ, ‘ယစံးဘၣ်တဲဘၣ်သုတၢ်မ့ၢ် တၢ်တီ, ပှၤလၢသုကျါတဂၤကဟ့ၣ်လီၤကွံာ်ယၤလီၤ.”

²²အပျဲၢ်အဘီၣ်တဖၣ်ကွၢ်လိာ်အသးတဂၤဒီးတဂၤ, မ့ၢ်လၢအဝဲအဲၣ်ဒိးစံးမတၤတဂၤလဲၣ်န့ၣ်, အဝဲသ့ၣ် တသ့ၣ်ညါဝဲအဃိလီၤ.

²³အပျဲၢ်အဘီၣ်အကျါတဂၤလၢယ့ၣ်ၡူးအဲၣ်အီၤန့ၣ်, သန့ၤလီၤတၢ်သဃဲၤလိာ်အသးဒီးယ့ၣ်ၡူးန့ၣ်လီၤ.

²⁴စီၤၡံမိၣ်ပ့းတရူးကျၢၢ်ကျာ်အခိၣ်ဆူအအိၣ်ဒီးစံး, “တၢ်န့ၣ်မ့ၢ်မတၤလဲၣ်န့ၣ် သံကွၢ်အီၤတက့ၢ်.”

²⁵အဃိဒီး, အပျဲၢ်အဘီၣ်တဂၤအံၤသုးဘူးအသးဆူယ့ၣ်ၡူး အကပၤဝံၤသံကွၢ်အီၤ, “ကစၢ်ဧၢ, နစံးတၢ်န့ၣ်မ့ၢ်မတၤတဂၤလဲၣ်.”

²⁶ယ့ၣ်ၡူးစံးဆၢတၢ်ဒီးစံးဝဲ, “ယကဘျၢလီၤကိၣ်လၢလီခီပူၤဒီးပှၤလၢယဟ့ၣ်လီၤအီၤ တဂၤန့ၣ်, မ့ၢ်ပှၤအဝဲန့ၣ်လီၤ. ထဲန့ၣ်ဒီးအဝဲဟံးန့ၢ်ကိၣ်, ဘျၢလီၤအီၤလၢလီခီပူၤဝံၤဟ့ၣ်လီၤဝဲစီၤယူဒၤလၢအမ့ၢ် စီၤၡံမိၣ်အံၣ်စကၤရံၤအိာ်အဖိခွါန့ၣ်လီၤ.

²⁷တုၤစီၤယူဒၤဟံးန့ၢ်အီၣ်ကိၣ်ဝံၤတဘျီဃီဒီး, မုၣ်ကီၤလံၢ်နုာ်လီၤလၢအသးပူၤန့ၣ်လီၤ. ယ့ၣ်ၡူးစံးဘၣ်အီၤ, “တၢ်လၢနကဘၣ်မၤန့ၣ်မၤချ့ချ့တက့ၢ်.”

²⁸ဘၣ်မနုၤအဃိယ့ၣ်ၡူးစံးဘၣ်အီၤတၢ်ဒ်အံၤလဲၣ်န့ၣ်, ပှၤအဂၤလၢအအီၣ်သကိးတၢ်ဒီးအီၤတဖၣ်တနၢ်ပၢၢ်နီ တဂၤဘၣ်.

²⁹မ့ၢ်လၢစီၤယူဒၤပၢၤစ့အထၢၣ်အဃိ, အပျဲၢ်အဘီၣ်တနီၤဆိ ကမိၣ်ဝဲလၢယ့ၣ်ၡူးစံးဘၣ်အီၤလၢအကလဲၤပှ့ၤတၢ်လၢ အဝဲလိၣ်ဘၣ်ဝဲလၢဘူၣ်အဂီၢ်, မ့တမ့ၢ်ဘၣ်ဒီးလၢကဟ့ၣ် လီၤပှၤဖှီၣ်ဖိယာ်ဖိလၢတၢ်တမံၤမံၤန့ၣ်လီၤ.

³⁰စီၤယူဒၤဟံးန့ၢ်ကိၣ်ဒီးဟးထီၣ်ကွံာ်ဝဲတဘျီဃီ န့ၣ်လီၤ. ဘၣ်မုၢ်နၤခီအဆၢကတီၢ်လီၤ.

³¹စီၤယူဒၤဟးထီၣ်ကွံာ်ဝံၤအလီၢ်ခံ, ယ့ၣ်ၡူးစံးဝဲ, “ခဲကနံၣ်အံၤပှၤကညီဖိခွါအလၤကပီၤအိၣ်ဖျါထီၣ်ဝဲ, ဒီးကစၢ်ယွၤအလၤကပီၤအိၣ်ဖျါထီၣ်ဝဲခီဖျိအီၤန့ၣ်လီၤ.

³²ဒီးကစၢ်ယွၤအလၤကပီၤမ့ၢ်ဘၣ်တၢ်လီၣ်ဖျါထီၣ်ခီဖျိအီၤ ဒီး, ကစၢ်ယွၤကလီၣ်ဖျါပှၤကညီဖိခွါအလၤကပီၤလၢ အပူၤဒၣ်ဝဲ, ဒီးကမၤဝဲခဲကနံၣ်အံၤလီၤ.

³³ယဖိယလံၤသ့ၣ်ဧၢ, ယတအိၣ်ဒီးသုယံာ်ယံာ်လၢၤဘၣ်. သုကဃုယၤဘၣ်ဆၣ်ဒီးဒ်ယစံးဘၣ်တ့ၢ်ပှၤယူဒၤဖိအခိၣ် အနၢ်တဖၣ်အသိးန့ၣ်, ယစံးဘၣ်တဲဘၣ်သုခဲကနံၣ်အံၤ, ‘တၢ်လီၢ်လၢယလဲၤန့ၣ်သုလဲၤတသ့ဘၣ်.’

³⁴ဒီးခဲကနံၣ်အံၤယဟ့ၣ်သုတၢ်မၤလိာ်အသီတထံၣ်, အဲၣ်လိာ်ကွံလိာ်သုသးတဂၤဒီးတဂၤတက့ၢ်. ဒ်ယအဲၣ်တ့ၢ်သု အသိးန့ၣ်, သုကဘၣ်အဲၣ်လိာ်ကွံလိာ်သုသးတဂၤဒီး တဂၤဒ်န့ၣ်အသိးလီၤ.

³⁵သုမ့ၢ်အဲၣ်လိာ်ကွံလိာ်သုသးတဂၤဒီးတဂၤန့ၣ်ဒီး, ပှၤကိးဂၤဒဲးကသ့ၣ်ညါလၢသုမ့ၢ်ယပျဲၢ်ယဘီၣ်တဖၣ်လီၤ.”

³⁶စီၤၡံမိၣ်ပ့းတရူးသံကွၢ်ယ့ၣ်ၡူး, “ကစၢ်ဧၢ, နကလဲၤဆူလဲၣ်.” ယ့ၣ်ၡူးစံးဆၢအီၤ, “တၢ်လီၢ်လၢယကလဲၤန့ၣ်, နလဲၤပိာ်ယခံ ခဲအံၤတသ့ဘၣ်. ဘၣ်ဆၣ်လၢခံန့ၣ်နကဟဲပိာ်ယခံလီၤ.”

³⁷စီၤပ့းတရူးသံကွၢ်အီၤ, “ကစၢ်ဧၢ, ယလဲၤပိာ်နခံခဲအံၤတသ့ န့ၣ်ဘၣ်မနုၤလဲၣ်. ယအိၣ်ကတဲာ်ကတီၤယသးလၢယကဟ့ၣ် လီၤယသးသမူလၢနဂီၢ်လီၤ.”

³⁸ယ့ၣ်ၡူးစံးဆၢတၢ်ဒီးစံးဝဲ, “မ့ၢ်နအိၣ်ကတဲာ်ကတီၤနသးနီၢ်နီၢ်လၢ နကဟ့ၣ်လီၤနသးသမူလၢယဂီၢ်လံဧါ. ယစံးဘၣ်တဲဘၣ်နၤတၢ်မ့ၢ် တၢ်တီ, တချုးလၢဆီဖါကီၢ်အိၣ်အိထီၣ်ဒံးဘၣ်န့ၣ်, နကသမၢယၤသၢဘျီလၢနတသ့ၣ်ညါယၤဘၣ်န့ၣ်လီၤ.”