Read S'gaw Karen လံာ်ယိၤဟၣ် 16 Bible Online

လံာ်ယိၤဟၣ် 16 - S'gaw Karen bible

လံာ်ယိၤဟၣ် 16

¹ယစံးဘၣ်တဲဘၣ်တ့ၢ်သုတၢ်ခဲလၢာ်အံၤ, ဒ်သိးသုသုတညိကွံာ်သုတၢ်စူၢ်တၢ်နာ်တဂ့ၤအဂီၢ်န့ၣ်လီၤ.

²သုကဘၣ်တၢ်ဟီထီၣ်ကွံာ်သုလၢဘူၣ်ဘျီၣ်လၢအမ့ၢ် တၢ်ဘါလီၢ်တဖၣ်အပူၤ, ဒီးတၢ်ဆၢကတီၢ်ကတုၤဝဲဖဲ ပှၤတဂၤလၢ်လၢ်လၢအမၤသံသုန့ၣ်, ကဆိကမိၣ်ဝဲလၢအမၤတၢ်ဒ်အံၤအဃိဒီး မ့ၢ်အမၤကစၢ်ယွၤအတၢ်မၤန့ၣ်လီၤ.

³ပှၤကမၤသုဒ်သိးအံၤမ့ၢ်လၢအဝဲသ့ၣ်တသ့ၣ်ညါတ့ၢ်ပၢ်မ့ၢ်ဂ့ၤ, ယၤမ့ၢ်ဂ့ၤအဃိန့ၣ်လီၤ.

⁴ဘၣ်ဆၣ်ယစံးဘၣ်တဲဘၣ်သုတၢ်တဖၣ်အံၤ, ဒ်သိးဖဲတၢ်ဆၢကတီၢ်တုၤဝဲလၢအဝဲသ့ၣ်မၤတၢ်သ့ၣ်တဖၣ် အံၤဒီး, သုကသ့ၣ်နီၣ်ထီၣ်က့ၤတၢ်လၢယစံးဘၣ်တ့ၢ်သု အဂီၢ်န့ၣ်လီၤ. လၢအခီၣ်ထံးန့ၣ်မ့ၢ်လၢယအိၣ်ဒံးဒီးသုအဃိ, ယတစံးဘၣ်တဲဘၣ်တ့ၢ်သုတၢ်သ့ၣ်တဖၣ်အံၤဘၣ်.

⁵ဘၣ်ဆၣ်ဒီးခဲအံၤယကလဲၤဆူပှၤလၢအမၢလီၤတ့ၢ်ယၤတဂၤ အအိၣ်လီၤ. သနာ်က့သုတသံကွၢ်ယၤလၢမ့ၢ်ယကလဲၤဆူလဲၣ်, နီတဂၤဒံးဘၣ်.

⁶ခဲအံၤမ့ၢ်လၢယစံးဘၣ်တဲဘၣ်လံသုတၢ်သ့ၣ်တဖၣ်အံၤအဃိ, သုသးပူၤပှဲၤဒီးတၢ်သူၣ်အုးသးအုးန့ၣ်လီၤ.

⁷နာ်သက့ယစံးဘၣ်တဲဘၣ်သုတၢ်မ့ၢ်တၢ်တီ, ယလဲၤတၢ်အဝဲအံၤန့ၣ်မ့ၢ်တၢ်ဂ့ၤဒၣ်တၢ်တက့ၢ်လၢသုဂီၢ်န့ၣ်လီၤ. အဂ့ၢ်ဒ်အံၤ, ယမ့ၢ်တလဲၤဘၣ်ဒီးပှၤမၤစၢၤတၢ်တဂၤတဟဲ ဆူသုအိၣ်ဘၣ်. ဘၣ်ဆၣ်ယမ့ၢ်လဲၤဒီး, ယကမၢလီၤအီၤဆူ သုအိၣ်န့ၣ်လီၤ.

⁸ဒီးတုၤအဟဲဝဲဒီး, အဝဲကဒုးနဲၣ်ဖျါထီၣ်န့ၢ်ပှၤဟီၣ်ခိၣ်ဖိတဖၣ် လၢအဝဲသ့ၣ်အတၢ်ဆိကမိၣ်ကမၣ်တၢ်ဘၣ်ဃးတၢ်ဒဲးဘး အဂ့ၢ်, တၢ်လၢအမ့ၢ်အတီအဂ့ၢ်, ဒီးကစၢ်ယွၤအတၢ်စံၣ်ညီၣ် အဂ့ၢ်တဖၣ်န့ၣ်လီၤ.

⁹လၢတၢ်ဒဲးဘးအဂ့ၢ်, မ့ၢ်လၢအဝဲသ့ၣ်တစူၢ်က့ၤနာ်က့ၤယၤ အဃိလီၤ.

¹⁰လၢတၢ်အမ့ၢ်အတီအဂ့ၢ်, မ့ၢ်လၢယလဲၤဆူပၢ်အအိၣ်ဒီး သုတထံၣ်ဘၣ်လၢၤယၤဘၣ်အဃိန့ၣ်လီၤ.

¹¹လၢကစၢ်ယွၤအတၢ်စံၣ်ညီၣ်အဂ့ၢ်, မ့ၢ်လၢပှၤလၢအပၢဟီၣ်ခိၣ် အံၤဘၣ်တၢ်စံၣ်ညီၣ်တ့ၢ်လံအီၤအဃိန့ၣ်လီၤ.

¹²ယအိၣ်ဒံးဒီးတၢ်ဂ့ၢ်အါမးလၢယကစံးဘၣ်တဲဘၣ်သု, ဘၣ်ဆၣ်ဒီးခဲအံၤကမ့ၢ်တၢ်အါကဲၣ်ဆိးလၢသုကတူၢ်လိာ်အီၤ အဂီၢ်န့ၣ်လီၤ.

¹³မ့မ့ၢ်, ဖဲယွၤအသးလၢအလီၣ်ဖျါထီၣ်တၢ်မ့ၢ်တၢ်တီ ဘၣ်ဃးဒီးကစၢ်ယွၤန့ၣ်ဟဲဝဲဒီး, အဝဲကဒုးထံၣ်သ့ၣ်ညါသုလၢတၢ်မ့ၢ်တၢ်တီခဲလၢာ်န့ၣ်လီၤ. အဝဲတကတိၤတၢ်ဖဲအသးဒၣ်ဝဲဘၣ်. မ့မ့ၢ် အဝဲကစံးဘၣ်တဲဘၣ်သုတၢ်လၢအဝဲနၢ်ဟူဝဲဒီး ကစံးဘၣ်တဲဘၣ်သုတၢ်လၢအကမၤအသးတဖၣ်န့ၣ်လီၤ.

¹⁴အဝဲကဟ့ၣ်ယၤတၢ်လၤကပီၤ, မ့ၢ်လၢအဝဲကဟံးန့ၢ်တၢ်လၢယအိၣ် ဒီးကစံးဘၣ်တဲဘၣ်သုအဃိန့ၣ်လီၤ.

¹⁵တၢ်လၢအအိၣ်ဒီးပၢ်ခဲလၢာ်န့ၣ်, မ့ၢ်ယတၢ်လီၤ. လၢတၢ်န့ၣ်အဃိ, ယစံးတ့ၢ်လၢယွၤအသးကဟံးန့ၢ်တၢ်လၢယဟ့ၣ်လီၤအီၤ ဒီးစံးဘၣ်တဲဘၣ်သုန့ၣ်လီၤ.

¹⁶တစိၢ်ဖိဒီး, သုတထံၣ်ဘၣ်လၢၤယၤဘၣ်. ဒီးမၤကဒီးလၢခံတစိၢ်ဖိဒီး သုကထံၣ်ဘၣ်ယၤလီၤ.”

¹⁷အပျဲၢ်အဘီၣ်တနီၤသံကွၢ်လိာ်အသး, “တၢ်အံၤအခီပညီမ့ၢ်မနုၤလဲၣ်.” အဝဲစံးဘၣ်တဲဘၣ်ပှၤလၢတစိၢ် ဖိဒီးပတထံၣ်ဘၣ်လၢၤအီၤဘၣ်. ဒီးမၤကဒီးလၢခံတစိၢ်ဖိဒီးပကထံၣ် ဘၣ်အီၤလီၤ. ဒီးအဝဲစံးစ့ၢ်ကီးဝဲ, ‘အဂ့ၢ်ဒ်အံၤမ့ၢ်လၢယလဲၤဆူပၢ်အအိၣ်အဃိန့ၣ်လီၤ.’

¹⁸တၢ်ကတိၤ ‘တစိၢ်ဖိ’ စံးတၢ်အံၤအခီပညီမ့ၢ်တၢ်မနုၤလဲၣ်. အဝဲအဲၣ်ဒိးစံးတၢ်မနုၤလဲၣ်န့ၣ်ပတသ့ၣ်ညါဘၣ်.”

¹⁹ယ့ၣ်ၡူးသ့ၣ်ညါဝဲလၢအဝဲသ့ၣ်သးအိၣ်သံကွၢ်အီၤတၢ်အံၤ သတးဒီးအဝဲဒၣ်စံးဘၣ်တဲဘၣ်အဝဲသ့ၣ်, “မ့ၢ်သုသံကွၢ်လိာ်သုသးဘၣ်ဃးတၢ်လၢယစံးတ့ၢ်, ‘တစိၢ်ဖိဒီးသုတထံၣ်ဘၣ်လၢၤယၤဘၣ်. မၤကဒီးလၢခံတစိၢ်ဖိဒီးသုကထံၣ်ဘၣ်ယၤလီၤ’ အဂ့ၢ်န့ၣ်ဧါ.

²⁰ယစံးဘၣ်တဲဘၣ်သုတၢ်မ့ၢ်တၢ်တီ, သုကဟီၣ်သုကယၢၤဘၣ်ဆၣ်ဒီး ဟီၣ်ခိၣ်ကသးခုလီၤ. သုကသူၣ်အုးသးအုးဘၣ်ဆၣ်ဒီး သုတၢ်သူၣ်အုးသးအုးန့ၣ်, ကကဲထီၣ်ကဒါက့ၤလၢ တၢ်သူၣ်ခုသးခု န့ၣ်လီၤ.

²¹ဖဲပိာ်မုၣ်တဂၤကဆံးစၢ်အဖိန့ၣ်, အဝဲသူၣ်အုးသးအုးဝဲမ့ၢ်လၢ အနၣ်ရံၣ်လၢကဘၣ်တူၢ်တၢ်ဆူးတၢ်ဆါတုၤဃီၤဝဲလံအဃိ လီၤ. ဘၣ်ဆၣ်ဒီးတုၤဖိသၣ်အိၣ်ဖျဲၣ်ထီၣ်ဝဲဒီး, အဝဲသးပ့ၤနီၣ်ကွံာ်အတၢ်ဆူးတၢ်ဆါခဲလၢာ်မ့ၢ်လၢအဝဲသးခုဝဲလၢ ဖိသၣ်တဂၤအိၣ်ဖျဲၣ်ထီၣ်လံဝဲလၢဟီၣ်ခိၣ်ချၢအံၤအဃိန့ၣ်လီၤ.

²²သုတၢ်လဲၤခီဖျိမ့ၢ်တၢ်ဒ်သိးအံၤစ့ၢ်ကီးန့ၣ်လီၤ. အခဲအံၤသုသူၣ် အုးသးအုး, ဘၣ်ဆၣ်ယကထံၣ်ကဒီးသု, ဒီးသုသးတဖၣ်ကပှဲၤဒီးတၢ်သူၣ်ခုသးခု, တၢ်သူၣ်ခုသးခု တကလုာ်လၢပှၤဟံးထီၣ်ကွံာ်လၢသုအိၣ်တသ့နီတဂၤဘၣ် န့ၣ်လီၤ.

²³တုၤမုၢ်နံၤအဝဲန့ၣ်ဟဲတုၤဒီး, သုတသံကွၢ်ယၤလၢတၢ်နီတမံၤ လၢၤဘၣ်. ယစံးဘၣ်တဲဘၣ်သုတၢ်မ့ၢ်တၢ်တီ, ပၢ်ကဟ့ၣ်လီၤသုတၢ်တမံၤဂ့ၤတမံၤဂ့ၤလၢသုဃ့အီၤလၢ ယမံၤန့ၣ်လီၤ.

²⁴တုၤအခဲအံၤန့ၣ်, သုတဃ့တၢ်နီတမံၤလၢယမံၤဒံးဘၣ်. ဃ့တၢ်တက့ၢ်. ဒီးသုကန့ၢ်ဘၣ်တၢ်, ဒ်သိးသုတၢ်သူၣ်ခုသးခုကလၢထီၣ်ပှဲၤထီၣ်ဝဲအဂီၢ်န့ၣ်လီၤ.

²⁵ယစံးဘၣ်တဲဘၣ်သုတၢ်သ့ၣ်တဖၣ်အံၤလၢတၢ်ကတိၤ အဒိန့ၣ်လီၤ. ဘၣ်ဆၣ်ဒီးတၢ်ဆၢကတီၢ်ကတုၤဝဲဖဲ ယတသူလၢၤတၢ်ကတိၤအဒိဘၣ်. မ့မ့ၢ်ယကကတိၤတၢ်ဒီး သုဖျါဖျါဘၣ်ဃးဒီးပၢ်အဂ့ၢ်န့ၣ်လီၤ.

²⁶ဖဲမုၢ်နံၤအဝဲန့ၣ်တုၤဃီၤဝဲဒီး, သုကဃ့တၢ်လၢယမံၤ, ဒီးယတစံးဘၣ်တဲဘၣ်သုလၢယကဃ့န့ၢ်တၢ်လၢ သုဂီၢ်လၢပၢ်န့ၣ်ဘၣ်.

²⁷အဂ့ၢ်ဒ်လဲၣ်န့ၣ်, ပၢ်အကစၢ်ဒၣ်ဝဲအဲၣ်သုလီၤ. အဝဲဒၣ်အဲၣ် သုမ့ၢ်လၢသုအဲၣ်ယၤဒီးနာ်တ့ၢ်လၢယဟဲလၢပၢ်ကစၢ်ယွၤ အအိၣ်အဃိန့ၣ်လီၤ.

²⁸ယဟဲတ့ၢ်လၢပၢ်အအိၣ်, ဒီးယဟဲနုာ်လီၤဆူဟီၣ်ခိၣ်ချၢအံၤ လီၤ. ဒီးခဲအံၤယကဟးထီၣ်ကွံာ်လၢဟီၣ်ခိၣ်အံၤဒီးလဲၤ ဆူပၢ်အအိၣ်န့ၣ်လီၤ.”

²⁹ထဲန့ၣ်ဒီး, အပျဲၢ်အဘီၣ်တဖၣ်စံးဘၣ်အီၤ, “ခဲအံၤနကတိၤလံ တၢ်ဖျါဖျါ, ဒီးတသူတၢ်ကတိၤအဒိတဖၣ်န့ၣ်ဘၣ်.

³⁰ခဲကနံၣ်အံၤ, ပသ့ၣ်ညါလၢနသ့ၣ်ညါတၢ်ခဲလၢာ် ဒီးပှၤကသံကွၢ်နၤတၢ်သံကွၢ်တဖၣ်အလီၢ်တအိၣ်လၢၤနီ တဂၤဘၣ်န့ၣ်လီၤ. တၢ်အဝဲအံၤဒုးနာ်ပှၤလၢနဟဲလၢပၢ် အအိၣ်န့ၣ်လီၤ.”

³¹ယ့ၣ်ၡူးစံးဆၢအဝဲသ့ၣ်, “အခဲအံၤသုနာ်တၢ်လံဧါ.

³²တၢ်ဆၢကတီၢ်ဟဲဝဲဒီးဟဲတုၤလံ, ဖဲသုဝဲခဲလၢာ်သုကလီၤပြံလီၤပြါတဂၤဆူအဟံၣ်ဒၣ်ဝဲ, ဒီးယကဘၣ်တၢ်ပာ်တီၢ်ယၤထဲတဂၤဧိၤန့ၣ်လီၤ. ဘၣ်ဆၣ်ဒီးနီၢ်နီၢ်န့ၣ်ယတအိၣ်ထဲတဂၤဧိၤဘၣ်. အဂ့ၢ်မ့ၢ်လၢပၢ်အိၣ်ဒီးယၤအဃိလီၤ.

³³ယစံးဘၣ်တ့ၢ်သုတၢ်အံၤဒ်သိးသုကအိၣ်ဒီးတၢ်ဃူတၢ်ဖိးလၢ ယပူၤအဂီၢ်လီၤ. ဟီၣ်ခိၣ်ကမၤနးမၤဖှီၣ်သုလီၤ. ဘၣ်ဆၣ်ဒီး, ပာ်သုသးဒူဒူတက့ၢ်. ယမၤနၢၤလံဟီၣ်ခိၣ်လံ.