Read S'gaw Karen လံာ်ယိၤဟၣ် 17 Bible Online

လံာ်ယိၤဟၣ် 17 - S'gaw Karen bible

လံာ်ယိၤဟၣ် 17

¹ယ့ၣ်ၡူးကတိၤတၢ်အံၤဝံၤဒီး, အဝဲကွၢ်ထီၣ်တၢ်ဆူမူခိၣ်ဒီးစံးဝဲဒၣ်, “ပၢ်ဧၢ, တၢ်ဆၢကတီၢ်နၣ်ရံၣ်တုၤဃီၤဝဲဒၣ်လံ. မၤလၤကပီၤ နဖိခွါ, ဒ်သိးဖိခွါကမၤလၤကပီၤနၤအဂီၢ်န့ၣ်တက့ၢ်.

²အဂ့ၢ်ဒ်လဲၣ်န့ၣ်, နဟ့ၣ်အီၤတၢ်စိကမီၤလၢပှၤဟီၣ်ခိၣ်ဖိခဲလၢာ် အဖီခိၣ်ဒ်သိးအဝဲကဟ့ၣ်တၢ်မူအထူအယိာ်လၢပှၤလၢ နဟ့ၣ်လီၤအီၤခဲလၢာ်အဂီၢ်န့ၣ်လီၤ.

³ဒီးတၢ်မူအထူအယိာ်အခီပညီမ့ၢ်ဝဲတၢ်သ့ၣ်ညါနၤ, ကစၢ်ယွၤ အမ့ၢ်အတီတဂၤဧိၤ, ဒီးတၢ်သ့ၣ်ညါယ့ၣ်ၡူးခရံာ်လၢနမၢလီၤ အီၤန့ၣ်လီၤ.

⁴ယဒုးနဲၣ်ဖျါထီၣ်နလၤကပီၤလၢဟီၣ်ခိၣ်အံၤ, ဒီးတၢ်မၤလၢနဟ့ၣ်လီၤယၤလၢယကမၤန့ၣ်, ယမၤအီၤဝံၤလံန့ၣ်လီၤ.

⁵ပၢ်ဧၢ, ခဲအံၤဟ့ၣ်ယၤတၢ်လၤကပီၤဖဲနအိၣ်အလီၢ်, တၢ်လၤကပီၤတမံၤဃီလၢအအိၣ်ဒီးယၤဖဲယအိၣ်ဒီးနၤ တချုးဟီၣ်ခိၣ်ဘၣ်တၢ်တ့လီၤအီၤဒံးဘၣ်န့ၣ်တက့ၢ်.

⁶ပှၤလၢနဟ့ၣ်လီၤယၤလၢဟီၣ်ခိၣ်ချၢအံၤန့ၣ်, ယဒုးသ့ၣ်ညါလံ အီၤလၢနၤလံ. အဝဲသ့ၣ်မ့ၢ်နတၢ်ဒီးနဟ့ၣ်လီၤယၤလၢ အဝဲသ့ၣ်လီၤ. အဝဲသ့ၣ်တိၢ်န့ၢ်တ့ၢ်လံနကလုၢ်ကထါ,

⁷ဒီးခဲအံၤအဝဲသ့ၣ်, သ့ၣ်ညါဝဲလၢတၢ်ခဲလၢာ်လၢနဟ့ၣ်လီၤ ယၤန့ၣ်, ဟဲဝဲလၢနအိၣ်န့ၣ်လီၤ.

⁸အဂ့ၢ်ဒ်လဲၣ်န့ၣ်, ယဟ့ၣ်အဝဲသ့ၣ်တၢ်ကစီၣ်လၢနဟ့ၣ်လီၤ ယၤဒီးအဝဲသ့ၣ်တူၢ်လိာ်ဝဲဒၣ်န့ၣ်လီၤ. အဝဲသ့ၣ်, သ့ၣ်ညါဝဲဒၣ်နီၢ်နီၢ်လၢယဟဲလၢနအိၣ်, ဒီးအဝဲသ့ၣ်နာ်ဝဲလၢနမၢလီၤယၤန့ၣ်လီၤ.

⁹ယဘါထုကဖၣ်လၢအဝဲသ့ၣ်အဂီၢ်လီၤ. ယတဘါထု ကဖၣ်လၢဟီၣ်ခိၣ်အဂီၢ်ဘၣ်. မ့မ့ၢ်, ယဃ့ဘါထုကဖၣ်လၢပှၤလၢနဟ့ၣ်လီၤယၤတဖၣ်အဂီၢ်, မ့ၢ်လၢအဝဲသ့ၣ်မ့ၢ်နတၢ်အဃိန့ၣ်လီၤ.

¹⁰တၢ်လၢအအိၣ်ဒီးယၤခဲလၢာ်မ့ၢ်နတၢ်, ဒီးတၢ်လၢအအိၣ်ဒီး နၤခဲလၢာ်မ့ၢ်ယတၢ်ဒီးခီဖျိအဝဲသ့ၣ်န့ၣ်, ယလၤကပီၤအိၣ်ဖျါ ထီၣ်ဝဲလီၤ.

¹¹ဒီးခဲအံၤယကက့ၤဆူနအိၣ်လီၤ. တယံာ်ဘၣ်ဒီးယတအိၣ်လၢဟီၣ်ခိၣ်ချၢအံၤလၢၤဘၣ်. ဘၣ်ဆၣ်ဒီးအဝဲသ့ၣ်အိၣ်ဒံးလၢဟီၣ်ခိၣ်ချၢန့ၣ်လီၤ. ပၢ်စီဆှံဧၢ, ပှၤလၢနဟ့ၣ်လီၤယၤတဖၣ်န့ၣ်, ဒ်သိးအကမ့ၢ်တၢ်တမံၤ ဃီဒ်နၤဒီးယၤပမ့ၢ်တၢ်တမံၤဃီအသိးန့ၣ်ဒီး, အံးကွၢ်ကဟု ကယာ်က့ၤအီၤလၢနမံၤ, မံၤလၢနဟ့ၣ်ယၤအစိကမီၤ အပူၤန့ၣ်တက့ၢ်.

¹²ဖဲယအိၣ်ဒံးဒီးအဝဲသ့ၣ်န့ၣ်, ယအံးကွၢ်ကဟုကယာ်က့ၤအီၤလၢနမံၤအစိကမီၤအပူၤ, မံၤလၢနဟ့ၣ်လီၤယၤန့ၣ်လီၤ. ပှၤလၢနဟ့ၣ်လီၤယၤတဖၣ်န့ၣ်, ယကဟုကယာ်အီၤဒီးအဝဲသ့ၣ်တလီၤမၢ်နီတဂၤဘၣ်. လီၤမၢ်ကွံာ်ဒၣ်ထဲပှၤလၢအကဘၣ်လီၤမၢ်ဒၣ်တၢ်တဂၤ, ဒ်သိးတၢ်ကွဲးအသးကလၢထီၣ်ပှဲၤထီၣ်ဝဲအဂီၢ်န့ၣ်လီၤ.

¹³ဒီးခဲအံၤယကက့ၤဆူနအိၣ်ဒီးယစံးကတိၤတၢ်တဖၣ် အံၤလၢဟီၣ်ခိၣ်ချၢဒ်သိးအဝဲသ့ၣ်ကဒိးန့ၢ်ယတၢ်သူၣ်ခုသးခု လၢအသးကံၢ်ပူၤလၢလၢပှဲၤပှဲၤအဂီၢ်န့ၣ်လီၤ.

¹⁴ယဟ့ၣ်လီၤအဝဲသ့ၣ်လၢနကလုၢ်ကထါဒီးဟီၣ်ခိၣ်သးဟ့ အဝဲသ့ၣ်, မ့ၢ်လၢအဝဲသ့ၣ်တဘၣ်ဃးဘၣ်ဒီးဟီၣ်ခိၣ်, ဒ်ယတဘၣ်ဃးဒီးဟီၣ်ခိၣ်အသိးန့ၣ်လီၤ.

¹⁵ယတဃ့နၤဒ်သိးနကထုးထီၣ်ကွံာ်အဝဲသ့ၣ်လၢ ဟီၣ်ခိၣ်ချၢအဂီၢ်န့ၣ်ဘၣ်. မ့မ့ၢ်, ယဃ့နၤလၢနကအံးကွၢ်ကဟုကယာ်အဝဲသ့ၣ်ဒ်သိး အကပူၤဖျဲးဒီးတၢ်အၢတၢ်သီတဂၤအဂီၢ်န့ၣ်လီၤ.

¹⁶ဒ်ယတဘၣ်ဃးဘၣ်ဒီးဟီၣ်ခိၣ်အသိးန့ၣ်, အဝဲသ့ၣ်စ့ၢ်ကီးတဘၣ်ဃးဒီးဟီၣ်ခိၣ်ဘၣ်.

¹⁷မၤစီဆှံထီၣ်အဝဲသ့ၣ်လၢနဂီၢ်ဒၣ်နဲခီဖျိတၢ်မ့ၢ်တၢ်တီ တက့ၢ်. နကလုၢ်နကထါန့ၣ်, မ့ၢ်တၢ်မ့ၢ်တၢ်တီလီၤ.

¹⁸ယမၢလီၤအဝဲသ့ၣ်ဆူဟီၣ်ခိၣ်ချၢ, ဒ်နမၢလီၤယၤဆူဟီၣ်ခိၣ်ချၢ အသိးန့ၣ်လီၤ.

¹⁹ယပာ်စီဆှံယသးလၢအဝဲသ့ၣ်အဂီၢ်, ဒ်သိးအဝဲသ့ၣ်စ့ၢ်ကီးကပာ်စီဆှံအသးနီၢ်နီၢ်အဂီၢ်န့ၣ်လီၤ.

²⁰ယတဃ့ဘါထုကဖၣ်ထဲအဝဲသ့ၣ်အဂီၢ်ဧိၤဘၣ်. မ့မ့ၢ်, ယဃ့စ့ၢ်ကီးလၢပှၤလၢအစူၢ်က့ၤနာ်က့ၤယၤခီဖျိအဝဲသ့ၣ် အတၢ်ကစီၣ်အဂီၢ်လီၤ.

²¹ယဃ့ဘါထုကဖၣ်ယဲဒ်သိးအဝဲသ့ၣ်ခဲလၢာ်ကမ့ၢ်တၢ်တမံၤဃီ အဂီၢ်န့ၣ်လီၤ. ပၢ်ဧၢ, မ်အဝဲသ့ၣ်ကအိၣ်လၢပပူၤ, ဒ်နအိၣ်လၢယပူၤဒီးယအိၣ်လၢနပူၤအသိးန့ၣ်တက့ၢ်. မ်အဝဲသ့ၣ်ကမ့ၢ်ဒၣ်ဝဲတၢ်တမံၤဃီ, ဒ်သိးဟီၣ်ခိၣ်ကနာ်လၢနမၢလီၤယၤန့ၣ်တက့ၢ်.

²²ယဟ့ၣ်အဝဲသ့ၣ်တၢ်လၤကပီၤတမံၤဃီလၢနဟ့ၣ်လီၤယၤ, ဒ်သိးအဝဲသ့ၣ်ကမ့ၢ်တၢ်တမံၤဃီဒ်နၤဒီးယၤပမ့ၢ်တၢ်တမံၤဃီ အသိးန့ၣ်လီၤ.

²³ယအိၣ်လၢအဝဲသ့ၣ်အပူၤဒီးနအိၣ်လၢယပူၤ, ဒ်သိးအဝဲသ့ၣ်ကမ့ၢ်တၢ်တမံၤဃီလၢလၢပှဲၤပှဲၤ, ဒီးဒ်သိး ဟီၣ်ခိၣ်ကသ့ၣ်ညါလၢနမၢလီၤယၤဒီးနအဲၣ်အဝဲသ့ၣ်ဒ် နအဲၣ်ယၤအသိးန့ၣ်လီၤ.

²⁴ပၢ်ဧၢ, နဟ့ၣ်လီၤယၤလၢအဝဲသ့ၣ်ဒီးယသးအိၣ်လၢအဝဲသ့ၣ် ကအိၣ်ဒီးယၤဖဲယအိၣ်တပူၤလၢ်လၢ်, ဒ်သိးအဝဲသ့ၣ်ကထံၣ်ဘၣ် ယလၤကပီၤ, တၢ်လၤကပီၤလၢနဟ့ၣ်လီၤယၤန့ၣ်လီၤ. အဂ့ၢ်ဒ်အံၤ, နအဲၣ်တ့ၢ်ယၤတချုးလၢဟီၣ်ခိၣ်ဘၣ်တၢ်တ့လီၤအီၤဒံးဘၣ်န့ၣ်လီၤ.

²⁵ပၢ်လၢအတီအလိၤတဂၤဧၢ, ဟီၣ်ခိၣ်တသ့ၣ်ညါနၤဘၣ်. ဘၣ်ဆၣ်ယသ့ၣ်ညါနၤဒီးအဝဲသ့ၣ်, သ့ၣ်ညါလၢနမၢလီၤ ယၤန့ၣ်လီၤ.

²⁶ယဒုးသ့ၣ်ညါတ့ၢ်အဝဲသ့ၣ်လၢနၤ, ဒီးယကမၤယဲဒံး, ဒ်သိးတၢ်အဲၣ်လၢနအဲၣ်ယၤန့ၣ်ကအိၣ်လၢအဝဲသ့ၣ်အပူၤ, ဒီးဒ်သိးယကအိၣ်လၢအဝဲသ့ၣ်အပူၤစ့ၢ်ကီးန့ၣ်လီၤ.”