Read S'gaw Karen လံာ်ယိၤဟၣ် 19 Bible Online

လံာ်ယိၤဟၣ် 19 - S'gaw Karen bible

လံာ်ယိၤဟၣ် 19

¹မၤသးဒ်န့ၣ်ဒီး, စီၤပံၤလးဟ့ၣ်လီၤကွံာ်ယ့ၣ်ၡူးလၢ တၢ်ကတီၢ်အီၤဖျ့အီၤအဂီၢ်န့ၣ်လီၤ.

²ပှၤသုးဖိတဖၣ်မၤထီၣ်ခိၣ်သလုးတဖျၢၣ်လၢတၤဆှုၣ်အဒ့ တဖၣ်ဒီးကုာ်ထီၣ်ဝဲလၢယ့ၣ်ၡူးအခိၣ်လိၤ, ဝံၤဒီးဒုးကၤထီၣ်အီၤဆ့ကၤလုးတကုာ်တဘ့ၣ်,

³ဒီးဟဲဆူအအိၣ်ဒီးစံးဝဲ, “ပှၤယူဒၤဖိတဖၣ်အစီၤပၤဧၢ, မ်နအိၣ်ကၢအိၣ်ခိးတက့ၢ်” ဒီးအဝဲသ့ၣ်ဒဲအမဲာ်လီၤ.

⁴စီၤပံၤလးဟးထီၣ်ကဒီးတဘျီဆူတၢ်ချၢဒီးစံးဘၣ်ပှၤဂီၢ်မုၢ်န့ၣ်, “ကွၢ်တက့ၢ်. ယကကိးထီၣ်ယ့ၣ်ၡူးဆူသုအိၣ်ဒ်သိး သုကထံၣ်သ့ၣ်ညါဘၣ်လၢယတထံၣ်န့ၢ်တၢ်ဂ့ၢ်လၢတၢ်ကစံၣ်ညီၣ် အီၤအဂီၢ်နီတမံၤဘၣ်န့ၣ်လီၤ.”

⁵အန့ၣ်ဒီး, ယ့ၣ်ၡူးဟဲထီၣ်ဆူတၢ်ချၢ, ကၢၢ်ဝဲခိၣ်သလုး တၤဆှုၣ်ဒီးကၤဝဲဆ့ကၤလုးတကုာ်တဘ့ၣ်န့ၣ်လီၤ. စီၤပံၤလးစံးဘၣ် အဝဲသ့ၣ်, “ကွၢ်တက့ၢ်. မ့ၢ်ပှၤအဝဲအံၤလီၤ.”

⁶တုၤပှၤလုၢ်တၢ်အခိၣ်အဒိၣ်တဖၣ်ဒီးတၢ်လုၢ်ဟံၣ်အပှၤပၢၤတၢ် တဖၣ်ထံၣ်ယ့ၣ်ၡူးဒီး, အဝဲသ့ၣ်ကိးပသူထီၣ်ဒီးစံးဝဲဒၣ်, “ပျၤထီအီၤလၢထူၣ်စုညါအလိၤ, ပျၤထီအီၤလၢထူၣ်စုညါ အလိၤတက့ၢ်.” စီၤပံၤလးစံးဘၣ်အဝဲသ့ၣ်, “မ့မ့ၢ်ဒ်န့ၣ်ဒီး, ဟဲဟံးန့ၢ်အီၤ ဒီးပျၤထီကွံာ်အီၤလၢထူၣ်စုညါအလိၤလၢသုကစၢ်ဒၣ်သုဝဲ တက့ၢ်. ယဲယတထံၣ်န့ၢ်တၢ်အဂ့ၢ်အခၢးလၢယကစံၣ်ညီၣ်အီၤ အဂီၢ်နီတမံၤဘၣ်.”

⁷အန့ၣ်ဒီး, ပှၤယူဒၤဖိတဖၣ်စံးဆၢတၢ်ဒီးစံးဝဲ, “မ့ၢ်လၢအဝဲစံးလီၤ အသးလၢအမ့ၢ်ကစၢ်ယွၤအဖိခွါအဃိဒီး, ဒ်ပတၢ်သိၣ်တၢ်သီတထံၣ်အိၣ်ဝဲအသိး, အဝဲကြၢးသံဝဲဒၣ်န့ၣ်လီၤ.”

⁸တုၤစီၤပံၤလးနၢ်ဟူတၢ်အံၤဒီး, အဝဲပျံၤတၢ်ဒိၣ်န့ၢ်အလီၢ်တက့ၢ်လီၤ.

⁹အဝဲက့ၤနုာ်ကဒါက့ၤဆူနီပူၤဝံၤသံကွၢ်ယ့ၣ်ၡူး “မ့ၢ်နဟဲလၢလဲၣ်.” ဘၣ်ဆၣ်ယ့ၣ်ၡူးတစံးဆၢအီၤဘၣ်.

¹⁰အန့ၣ်ဒီးစီၤပံၤလးစံးဘၣ်အီၤ, “နတကတိၤတၢ်ဒီးယၤဘၣ်ဧါ. မ့ၢ်နတသ့ၣ်ညါလၢ, ယအိၣ်ဒီးတၢ်စိတၢ်ကမီၤလၢယကမၤထူၣ်ဖျဲးနၤ ဒီးတၢ်စိတၢ်ကမီၤလၢယကပျၤထီနၤလၢထူၣ်စုညါအလိၤ စ့ၢ်ကီးန့ၣ်ဘၣ်ဧါ.”

¹¹ယ့ၣ်ၡူးစံးဆၢတၢ်ဒီးစံးဝဲ, “နအိၣ်ဒီးတၢ်စိတၢ်ကမီၤလၢ ယဖီခိၣ်မ့ၢ်ဒၣ်လၢကစၢ်ယွၤဟ့ၣ်လီၤနၤတၢ်စိတၢ်ကမီၤအံၤ အဃိန့ၣ်လီၤ. လၢတၢ်န့ၣ်အဃိ, ပှၤလၢအဟ့ၣ်လီၤယၤဆူ နစုပူၤအံၤန့ၣ်, အတၢ်ဒဲးဘးဒိၣ်ဒၣ်တၢ်တက့ၢ်န့ၣ်လီၤ.”

¹²တုၤစီၤပံၤလးနၢ်ဟူတၢ်အံၤဒီး, အဝဲဃုဝဲကျဲလၢကမၤထူၣ်ဖျဲးယ့ၣ်ၡူးအဂီၢ်န့ၣ်လီၤ. ဘၣ်ဆၣ်ဒီးပှၤယူဒၤဖိတဖၣ်ကိးပသူထီၣ်ဒီးစံးဝဲ, “နမ့ၢ်ပျၢ်ဖျဲးကွံာ်အီၤဒီး, အခီပညီနတမ့ၢ်ရိမ့ၤအစီၤပၤဖးဒိၣ် အတံၤသကိးဘၣ်. ပှၤတဂၤဂ့ၤတဂၤဂ့ၤလၢအစံးလီၤအသး လၢအမ့ၢ်စီၤပၤတဂၤန့ၣ်, မ့ၢ်ပှၤလၢအပူထီၣ်တၢ်ထီဒါရိမ့ၤအစီၤပၤဖးဒိၣ်န့ၣ်လီၤ.”

¹³တုၤစီၤပံၤလးနၢ်ဟူတၢ်ကတိၤတဖၣ်အံၤဒီး, အဝဲဆှၢထီၣ် ယ့ၣ်ၡူးဆူတၢ်ချၢဒီးဆ့ၣ်နီၤဝဲလၢပှၤစံၣ်ညီၣ်ကွီၢ်အလီၢ် ဆ့ၣ်နီၤအလိၤ, ဖဲတၢ်လီၢ်တတီၤလၢတၢ်ကိးအီၤလၢ, “လၢၢ်ဘ့ၣ်ဘၣ်လၢအဒါလီၤအသး” န့ၣ်လီၤ. (လၢဧ့ၤဘြံၤအကျိာ် တခီတၢ်ကိးအီၤလၢ “ကၤဘၤသါ” လီၤ.)

¹⁴အကတီၢ်ဝဲန့ၣ်ကဘၣ်ဖဲမုၢ်ထူၣ်ဃၣ်ဃၣ်, တချုးလၢဘူၣ်လဲၤကပာ်တုၤဃီၤဝဲတနံၤ န့ၣ်လီၤ. စီၤပံၤလးစံးဘၣ်ပှၤယူဒၤဖိတဖၣ်, “အအံၤမ့ၢ်သုစီၤပၤလီၤ.”

¹⁵အဝဲသ့ၣ်ကိးပသူထီၣ်ကဒါက့ၤ, “မၤသံအီၤ, မၤသံအီၤ, ပျၤထီအီၤလၢထူၣ်စုညါအလိၤတက့ၢ်.” စီၤပံၤလးသံကွၢ်အဝဲသ့ၣ်, “မ့ၢ်သုအဲၣ်ဒိးလၢယကပျၤထီ သုစီၤပၤလၢထူၣ်စုညါအလိၤန့ၣ်ဧါ.” ပှၤလုၢ်တၢ်အခိၣ်အဒိၣ်တဖၣ်စံးဆၢတၢ်ဒီးစံးဝဲ, “ပစီၤပၤအိၣ်ထဲတဂၤဧိၤလၢအမ့ၢ်ရိမ့ၤအစီၤပၤဖးဒိၣ်န့ၣ်လီၤ.”

¹⁶အန့ၣ်တစု, စီၤပံၤလးဟ့ၣ်လီၤယ့ၣ်ၡူးဆူအဝဲသ့ၣ်အစုပူၤ လၢတၢ်ကပျၤထီအီၤလၢထူၣ်စုညါအလိၤအဂီၢ်န့ၣ်လီၤ. မၤသးဒ်န့ၣ်ဒီး, အဝဲသ့ၣ်ဟံးန့ၢ်ယ့ၣ်ၡူးန့ၣ်လီၤ.

¹⁷ယ့ၣ်ၡူးယိးအထူၣ်စုညါဒီးဟးထီၣ်ကွံာ်ဝဲဖဲန့ၣ် ဒီးလဲၤတုၤဝဲလၢတၢ်လီၢ်တတီၤလၢတၢ်ကိးအီၤ, “တၢ်ခိၣ်ဃံအလီၢ်,” (လၢဧ့ၤဘြံၤအကျိာ်တၢ်ကိးအီၤလၢ “ကီၤလၤကီၤသါ”) န့ၣ်လီၤ.

¹⁸ဒီးဖဲန့ၣ်, အဝဲသ့ၣ်ပျၤထီယ့ၣ်ၡူးလၢထူၣ်စုညါအလိၤ, ဒီးပျၤထီစ့ၢ်ကီးပှၤအဂၤခံဂၤလၢထူၣ်စုညါအလိၤဖဲယ့ၣ်ၡူး အကပၤတခီတဂၤ, ဒီးယ့ၣ်ၡူးအိၣ်ဝဲလၢပှၤခံဂၤန့ၣ်အဘၢၣ် စၢၤလီၤ.

¹⁹စီၤပံၤလးကွဲးလံာ်ဘိးဘၣ်သ့ၣ်ညါလၢအစံးဝဲ, “ပှၤနစၤရ့းဖိ ယ့ၣ်ၡူး, ပှၤယူဒၤဖိတဖၣ်အစီၤပၤ,” ဒီးမၢပှၤပာ်ထီၣ်အီၤလၢထူၣ်စုညါအလိၤန့ၣ်လီၤ.

²⁰ဒီးပှၤယူဒၤဖိအါဂၤဖးဘၣ်တၢ်အံၤ, မ့ၢ်လၢတၢ်လီၢ်ဖဲ ယ့ၣ်ၡူးဘၣ်တၢ်ပျၤထီအီၤလၢထူၣ်စုညါအလိၤန့ၣ်, တယံၤကဲၣ်ဆိးဒီးဝ့ၢ်ဘၣ်အဃိန့ၣ်လီၤ. လံာ်ဘိးဘၣ်သ့ၣ်ညါအံၤဘၣ်တၢ်ကွဲးဃာ်အီၤလၢဧ့ၤဘြံၤ အကျိာ်, လးတ့ၣ်အကျိာ်ဒီးကြံးခ်အကျိာ်န့ၣ်လီၤ.

²¹ပှၤယူဒၤဖိအပှၤလုၢ်တၢ်အခိၣ်အဒိၣ်တဖၣ်စံးဘၣ်စီၤပံၤလး, “တဘၣ်ကွဲးလီၤ ‘ပှၤယူဒၤဖိတဖၣ်အစီၤပၤ’ န့ၣ်တဂ့ၤ. မ့မ့ၢ်ကွဲးလီၤ, ‘ပှၤတဂၤအံၤစံးဝဲ, ယမ့ၢ်ပှၤယူဒၤဖိတဖၣ်အစီၤပၤ’ န့ၣ်တက့ၢ်.”

²²စီၤပံၤလးစံးဆၢတၢ်ဒီးစံးဝဲ, “တၢ်လၢယကွဲးလီၤအီၤ ဝံၤလံန့ၣ်, ကအိၣ်ဒၣ်ဝဲဒ်ယကွဲးလီၤအီၤအသိးန့ၣ်တက့ၢ်.”

²³ဖဲပှၤသုးဖိတဖၣ်ပျၤထီယ့ၣ်ၡူးလၢထူၣ်စုညါအလိၤဝံၤဒီး, အဝဲသ့ၣ်ဟံးန့ၢ်အကူအသိးတဖၣ်ဒီးနီၤဖးဝဲလွံၢ်ပူ, တပူလၢသုးဖိတဂၤစုာ်စုာ်အဂီၢ်န့ၣ်လီၤ. အဝဲသ့ၣ်ဟံးန့ၢ်စ့ၢ်ကီး အဆ့ကၤလၢတၢ်ထါဖးထီဃာ်အီၤဒီဘ့ၣ်ညါလၢအတိၤ တအိၣ်ဘၣ်တဘ့ၣ်န့ၣ်လီၤ.

²⁴သုးဖိတဖၣ်စံးလိာ်အသးတဂၤဒီးတဂၤ, မ်ပသုတမၤယာ်အီၤ တဂ့ၤ. မ်ပကဖီၣ်တၢ်ဖးဒ်သိးပကသ့ၣ်ညါဘၣ်မတၤကန့ၢ် ဘၣ်ဆ့ကၤအဝဲအံၤလဲၣ်အဂီၢ်န့ၣ်တက့ၢ်.” တၢ်အံၤမၤအသးမ့ၢ်ဒ်သိးတၢ်ကွဲးအသး, ကလၢထီၣ် ပှဲၤထီၣ်ဝဲအဂီၢ်လၢအစံးဝဲ, “အဝဲသ့ၣ်နီၤဖးယတၢ်ကူတၢ်သိးတဖၣ်လၢ အဝဲသ့ၣ်အကျါကဒဲကဒဲ, ဒီးဖီၣ်တၢ်ဖးလၢကန့ၢ်ဘၣ်ယဆ့ကၤအဂီၢ်လီၤ” (စံး. ၂၂:၁၈). တၢ်အံၤမ့ၢ်တၢ်လၢပှၤသုးဖိတဖၣ်မၤဝဲန့ၣ်လီၤ.

²⁵ပှၤလၢအအိၣ်ဆၢထၢၣ်ဘူးဒီးယ့ၣ်ၡူးအထူၣ်စုညါန့ၣ်, မ့ၢ်ဝဲယ့ၣ်ၡူးအမိၢ်, အမိၢ်အဒီပုၢ်ဝဲၢ်မုၣ်, စီၤကျ့းအီၤပၤအမါနီၢ်မၤရံ, ဒီးပှၤမၤကဒါလၣ်မုၣ်နီၢ်မၤရံန့ၣ်လီၤ.

²⁶ယ့ၣ်ၡူးထံၣ်ဘၣ်အမိၢ်ဒီးအပျဲၢ်အဘီၣ်လၢအအဲၣ်ဝဲတဂၤဆၢထၢၣ် ဖဲန့ၣ်, သတးဒီးအဝဲစံးဘၣ်အမိၢ် “ပိာ်မုၣ်ဧၢ, အဝဲမ့ၢ်နဖိခွါလီၤ.”

²⁷ဝံၤဒီးစံးဘၣ်အပျဲၢ်အဘီၣ်အဝဲန့ၣ်, “အဝဲမ့ၢ်နမိၢ်လီၤ.” ဒီးစးထီၣ်ဖဲန့ၣ်ဒီးဆူညါအပျဲၢ်အဘီၣ် တဂၤအံၤတူၢ်လိာ်ကွၢ်ထွဲက့ၤယ့ၣ်ၡူးအမိၢ်လၢအဟံၣ်ဒၣ်ဝဲ န့ၣ်လီၤ.

²⁸ယ့ၣ်ၡူးသ့ၣ်ညါဝဲလၢတၢ်ခဲလၢာ်လၢအဝဲကဘၣ် မၤန့ၣ်မၤဝဲဝံၤလံသတးဒီး, ဒ်သိးတၢ်ကွဲးအသးကလၢ ထီၣ်ပှဲၤထီၣ်ဝဲအဂီၢ်န့ၣ်အဝဲစံးဝဲဒၣ်, “တၢ်သူယသး လၢထံလီၤ.”

²⁹ဒီးဖဲန့ၣ်, ကတံၤအိၣ်ဝဲတဖျၢၣ်လၢအပှဲၤဒီးစပံးထံအဆံၣ် သတးဒီးပှၤစုၣ်လီၤဝဲကုၤပီၣ်လဲၣ်တလိၣ်လၢစပံးထံအံၤ အပူၤ, ဝံၤစဲထီၣ်ဝဲလၢသ့ၣ်အ့စိးအဒ့တဒ့အလိၤ ဒီးယူာ်ထီၣ်ဝဲဆူယ့ၣ်ၡူးအကိာ်ပူၤန့ၣ်လီၤ.

³⁰ယ့ၣ်ၡူးဒိးန့ၢ်စပံးထံအဆံၣ်န့ၣ်ဝံၤဒီးစံးဝဲဒၣ်, “တၢ်လၢ ထီၣ်ပှဲၤထီၣ်လံ.” ဒီးအဝဲဆုးလီၤအခိၣ်ဒီးဟ့ၣ်လီၤကွံာ်အသးလီၤ.

³¹အန့ၣ်ဝံၤဒီး, ပှၤယူဒၤဖိအခိၣ်အနၢ်တဖၣ်ဃ့စီၤပံၤလး အခွဲးလၢကပျဲအဝဲသ့ၣ်တီၢ်ကၢ်ကွံာ်ပှၤလၢတၢ်မၤသံအီၤလၢ ထူၣ်စုညါအလိၤတဖၣ်အခီၣ်, ဒီးကစိာ်လီၤကွံာ်အစိၣ်လၢထူၣ်စုညါတဖၣ်အလိၤအဂီၢ် န့ၣ်လီၤ. အဝဲသ့ၣ်ဃ့တၢ်အံၤမ့ၢ်လၢမုၢ်နံၤတခီမ့ၢ်မုၢ်ယဲၢ် နံၤ, ဒီးအဝဲသ့ၣ်တသးအိၣ်လၢပှၤအစိၣ်တဖၣ်အံၤ ကအိၣ်စဲထီအသးလၢထူၣ်စုညါအလိၤတုၤလၢပှၤ ယူဒၤဖိအမုၢ်အိၣ်ဘှံးနံၤန့ၣ်ဘၣ်. အဂ့ၢ်ဒ်အံၤ, အဝဲသ့ၣ်အမုၢ်အိၣ်ဘှံးနံၤလၢအကဟဲအံၤမ့ၢ်နံၤလၢ အစီဆှံလီၤဆီဝဲအဃိန့ၣ်လီၤ.

³²လၢတၢ်န့ၣ်အဃိ, သုးဖိတဖၣ်လဲၤဆူပှၤခံဂၤလၢအဘၣ် တၢ်ပျၤထီအီၤလၢထူၣ်စုညါအလိၤဃုာ်ဒီးယ့ၣ်ၡူးအအိၣ်, ဒီးတီၢ်ကၢ်ကွံာ်ဝဲအခီၣ်တဂၤဝံၤတဂၤလီၤ.

³³ဘၣ်ဆၣ်ဖဲအဝဲသ့ၣ်ဟဲတုၤလၢယ့ၣ်ၡူးအအိၣ်န့ၣ်, ထံၣ်ဘၣ်ဝဲလၢအသံတ့ၢ်လံသတးဒီးတတီၢ်ကၢ်အခီၣ် လၢၤဘၣ်န့ၣ်လီၤ.

³⁴ဘၣ်ဆၣ်ဒီး, ပှၤသုးဖိအကျါတဂၤဆဲးဖျိယ့ၣ်ၡူးအကပၤ လၢဘီ, ဒီးတၢ်သွံၣ်ဒီးထံဟဲယွၤလီၤဝဲတဘျီဃီန့ၣ်လီၤ.

³⁵(ပှၤလၢအထံၣ်တၢ်မၤအသးအံၤတဂၤစံးကတိၤတၢ်ဘၣ်ဃး တၢ်ဂ့ၢ်အံၤ, ဒ်သိးသုဝဲစ့ၢ်ကီးသုကနာ်တၢ်အဂီၢ်န့ၣ်လီၤ. တၢ်လၢအဝဲစံးကတိၤန့ၣ်မ့ၢ်တၢ်မ့ၢ်တၢ်တီ, ဒီးအကစၢ်ဒၣ်ဝဲသ့ၣ်ညါလၢအစံးကတိၤတၢ်မ့ၢ်တၢ်တီန့ၣ်လီၤ.)

³⁶တၢ်အံၤမၤအသးမ့ၢ်ဒ်သိးတၢ်ကွဲးအသးလၢအစံးဝဲ, “အဃံတဘၣ်တၢ်မၤကၢ်ကွံာ်အီၤနီတဘိဘၣ်” (ဟးထီၣ် ၁၂:၄၆). ကလၢထီၣ်ပှဲၤထီၣ်ဝဲအဂီၢ်န့ၣ်လီၤ.

³⁷ဒီးတၢ်ကွဲးအသးအဂၤတတီၤစံးဝဲ, “ပှၤကကွၢ်ပှၤလၢအဝဲသ့ၣ်ဆဲးထူၣ်ဖျိဝဲတဂၤန့ၣ်လီၤ” (ကၤ ၁၂:၁၀).

³⁸တၢ်တဖၣ်အံၤအလီၢ်ခံ, စီၤယိၤသးလၢဝ့ၢ်အရံၤမၤသဲဃ့စီၤပံၤလးလၢ ကက့ၤစိာ်ယ့ၣ်ၡူးအစိၣ်အဂီၢ်န့ၣ်လီၤ. (စီၤယိၤသးအံၤမ့ၢ်ပှၤပိာ်ယ့ၣ်ၡူးအခံလၢတၢ်ခူသူၣ်အပူၤတဂၤ, မ့ၢ်လၢအဝဲပျံၤပှၤယူဒၤဖိအခိၣ်အနၢ်တဖၣ်အဃိန့ၣ်လီၤ.) စီၤပံၤလးဟ့ၣ်အီၤအခွဲးအဃိ, အဝဲဟံးန့ၢ်ယ့ၣ်ၡူးအစိၣ်ဒီး က့ၤစိာ်ဝဲန့ၣ်လီၤ.

³⁹စီၤနံၤကဒ့မူး, ပှၤလၢအဃုထံၣ်တ့ၢ်ယ့ၣ်ၡူးလၢမုၢ်နၤခီတဘျီ တဂၤန့ၣ်, ဟဲစ့ၢ်ကီးဒီးစီၤယိၤသး, ဒီးဟဲစိာ်ဃုာ်ဝဲတၢ်နၢမူကိး ဝဲလၢမူရၣ်လၢအဃါဃုာ်အသးဒီးအကၠီၣ်, သၢဆံလံတြၤ ဃၣ်ဃၣ်န့ၣ်လီၤ.

⁴⁰ပှၤခံဂၤအံၤဟံးန့ၢ်ယ့ၣ်ၡူးအစိၣ်ဒီးဘိၣ်ဘံထီၣ်ဝဲလၢတၢ်ကံးယာ်ဖှီဝါ ကဆှၣ်ဃုာ်ဒီးတၢ်နၢမူ, ဒ်ပှၤယူဒၤဖိအလုၢ်အလၢ်လၢတၢ်ကတဲာ် ကတီၤပှၤအစိၣ်လၢတၢ်ကခူၣ်လီၤကွံာ်အဂီၢ်အိၣ်ဝဲအသိး န့ၣ်လီၤ.

⁴¹ဖဲတၢ်လီၢ်လၢယ့ၣ်ၡူးဘၣ်တၢ်ပျၤထီအီၤလၢထူၣ်စုညါ အလိၤန့ၣ်, တၤသၣ်အလီၢ်အိၣ်ဝဲ, ဒီးတၤသၣ်အလီၢ်အံၤ အပူၤတၢ်သွၣ်ခိၣ်အသီအိၣ်ဝဲတပူၤလၢပှၤတခူၣ်လီၤဒံးပှၤနီ တဂၤဘၣ်န့ၣ်လီၤ.

⁴²မ့ၢ်အဘၣ်ဝဲလၢပှၤယူဒၤဖိတဖၣ်အမုၢ်ကတဲာ်ကတီၤ တၢ်အနံၤ, ဒီးမ့ၢ်စ့ၢ်ကီးလၢတၢ်သွၣ်ခိၣ်အိၣ်ဘူးဝဲ အဃိ, အဝဲသ့ၣ်ပာ်လီၤယ့ၣ်ၡူးအစိၣ်ဖဲန့ၣ်လီၤ.