Read S'gaw Karen လံာ်ယိၤဟၣ် 2 Bible Online

လံာ်ယိၤဟၣ် 2 - S'gaw Karen bible

လံာ်ယိၤဟၣ် 2

¹ဒီးလၢသၢနံၤတနံၤန့ၣ်, တၢ်တ့တၢ်ဖျီအမူးအိၣ်ဝဲတမူးလၢဝ့ၢ် ကၤနါလၢအအိၣ်ဝဲလၢကီၢ်ကၤလံလါအပူၤ, ဒီးယ့ၣ်ၡူးအမိၢ် အိၣ်ဝဲဖဲန့ၣ်လီၤ.

²ယ့ၣ်ၡူးဒီးအပျဲၢ်အဘီၣ်တဖၣ်ဘၣ်တၢ်ကွဲစ့ၢ်ကီးအီၤဆူမူး တမူးအံၤန့ၣ်လီၤ.

³ဖဲစပံးထံလၢာ်ကွံာ်ဝဲလၢပှၤသမှံၤတဖၣ်အဂီၢ်ဒီး, ယ့ၣ်ၡူး အမိၢ်စံးဘၣ်အီၤ, “အဝဲသ့ၣ်အစပံးထံတအိၣ်လၢၤဘၣ်.”

⁴ဒီးယ့ၣ်ၡူးစံးဘၣ်အီၤ, “ပိာ်မုၣ်ဧၢ, ဘၣ်မနုၤအဃိနမၢယမၤဘၣ်ဃး ယသးလဲၣ်. တၢ်ဆၢကတီၢ်လၢယဂီၢ်တဘၣ်ဒံးဘၣ်.”

⁵ယ့ၣ်ၡူးအမိၢ်စံးဘၣ်တၢ်ခ့တၢ်ပှၤတဖၣ်, “တၢ်လၢအဝဲကမၢသုတမံၤမံၤန့ၣ်မၤအီၤတက့ၢ်.”

⁶ပှၤယူဒၤဖိတဖၣ်အိၣ်ဒီးအလုၢ်အလၢ်လၢတၢ်မၤ ကဆှီသးအဂီၢ်ဒီးလၢတၢ်အံၤအဂီၢ်ထံကတံၤလၢၢ်လၢအတြီၢ်ဝဲ အပီၢ် ၃၀-၄၀ အိၣ်ဝဲဖဲန့ၣ်ဃုဖျၢၣ်လီၤ.

⁷ယ့ၣ်ၡူးစံးဘၣ်တၢ်ခ့တၢ်ပှၤတဖၣ်, “မၤပှဲၤကတံၤလၢၢ်တဖၣ်အံၤလၢထံတက့ၢ်.” ဒီးအဝဲသ့ၣ်မၤပှဲၤဝဲပၢၢ်လၢအခိၣ်ဒူန့ၣ်လီၤ.

⁸ဒီးစံးဘၣ်ကဒီးအဝဲသ့ၣ်, “ခဲအံၤဘျၢၣ်ထီၣ်န့ၢ်ထံတခွးဒီးလဲၤစိာ်အီၤ ဆူမူးခိၣ်အအိၣ်န့ၣ်တက့ၢ်.” ဒီးအဝဲသ့ၣ်လဲၤစိာ်ဝဲလီၤ.

⁹ဒီးထံလၢအကဲထီၣ်စပံးထံအံၤအဝဲလ့ၣ်ကွၢ်ဝဲဒီးစပံးထံအံၤ ဟဲလၢလဲၣ်န့ၣ်အဝဲတသ့ၣ်ညါဝဲဘၣ်. (ဘၣ်ဆၣ်တၢ်ခ့တၢ်ပှၤတဖၣ်လၢအဟဲဘျၢၣ်ထီၣ်န့ၢ်ထံအံၤ သ့ၣ်ညါဝဲန့ၣ်လီၤ.) ဒီးမူးခိၣ်တဂၤအံၤကိးထီၣ်တလးမူးပိာ် ခွါ,

¹⁰ဒီးစံးဘၣ်အီၤ, “ပှၤကိးဂၤဒဲးဒုးအီပှၤသမှံၤတဖၣ်စပံးထံအဂ့ၤ ကတၢၢ်လၢညါဒီးအဝဲသ့ၣ်အီဘျဲးအီဝဲဝံၤမး, ဒုးအီက့ၤဝဲစပံးထံလၢအဂ့ၤဖဲအကြၢးလၢခံန့ၣ်လီၤ. မ့မ့ၢ်နဲ နပာ်ဒံးစပံးထံလၢအဂ့ၤကတၢၢ်တုၤခဲအံၤန့ၣ်လီၤ.”

¹¹ယ့ၣ်ၡူးမၤတၢ်လီၤလးအခီၣ်ထံးကတၢၢ်တဘျီအံၤလၢဝ့ၢ်ကၤ နါလၢကီၢ်ကၤလံၤလါအပူၤဒီးဖဲန့ၣ်အဝဲလီၣ်ဖျါထီၣ်အလၤ ကပီၤ, ဒီးအပျဲၢ်အဘီၣ်တဖၣ်စူၢ်က့ၤနာ်က့ၤအီၤန့ၣ်လီၤ.

¹²လၢတၢ်အံၤဝံၤအလီၢ်ခံဒီး, ယ့ၣ်ၡူးဒီးအမိၢ်, ဒီးအဒီပုၢ်ဝဲၢ်တဖၣ်ဒီးအပျဲၢ်အဘီၣ်တဖၣ်လဲၤလီၤ ဝဲဆူဝ့ၢ်ကပ့းရနီၣ်ဒီးအိၣ်ဝဲဖဲန့ၣ်စှၤနံၤစှၤသီလီၤ.

¹³မ့ၢ်လၢပှၤယူဒၤဖိအဘူၣ်လဲၤကပာ်ဘူးထီၣ်လံအဃိ, ယ့ၣ်ၡူးလဲၤထီၣ်ဆူဝ့ၢ်ယရူၤၡလ့ၣ်န့ၣ်လီၤ.

¹⁴ဖဲတၢ်လုၢ်ဟံၣ်အပူၤန့ၣ်အဝဲထံၣ်န့ၢ်ပှၤဆါကျီၢ်, သိဖိဒီးထိၣ်လွံၢ် တဖၣ်, ဒီးပှၤခီလဲစ့တဖၣ်မၤအတၢ်မၤလၢအစီၢ်နီၤခိၣ်တဖၣ် အလိၤန့ၣ်လီၤ.

¹⁵ဒီးမၤနီၣ်ဖျ့လၢပျံၤဖိတဖၣ်ဒီးနီၣ်ထီၣ်ကွံာ်ဆၣ်ဖိကီၢ်ဖိလၢ အမ့ၢ်သိဒီးကျီၢ်တဖၣ်ခဲလၢာ်လၢတၢ်လုၢ်ဟံၣ်အပူၤ, ဒီးမၤလီၤတကျၢၢ်ကွံာ်ပှၤခီလဲစ့တဖၣ်အစီၢ်နီၤခိၣ်ဒီးမၤပြံပြါကွံာ် အစ့တဖၣ်န့ၣ်လီၤ.

¹⁶ဒီးအဝဲမၢဆူၣ်ပှၤလၢအဆါထိၣ်လွံၢ်တဖၣ်ဒီးစံးဝဲ, “စိာ်ထီၣ်ကွံာ်တၢ်တဖၣ်အံၤလၢတၢ်လီၢ်အံၤတက့ၢ်. တဘၣ်ဒုးကဲထီၣ်ယပၢ်အဟံၣ်လၢတၢ်ဆါတၢ်ပှ့ၤ အလီၢ်လၢၤတဂ့ၤ.”

¹⁷အပျဲၢ်အဘီၣ်တဖၣ်သ့ၣ်နီၣ်ထီၣ်ယွၤအကလုၢ်ကထါ လၢအစံးဝဲ, “ကစၢ်ယွၤဧၢ, ယတၢ်သးဆူၣ်လၢနဟံၣ် အဂီၢ်န့ၣ်, အီၣ်ဂီၤကွံာ်လံယၤလံ” (စံး. ၆၉:၉).

¹⁸အန့ၣ်ဒီးပှၤယူဒၤဖိအခိၣ်အနၢ်တဖၣ်စံးဘၣ်အီၤ, “နမၤတၢ်လီၤလးမနုၤသ့လၢကဒုးနဲၣ်ပှၤလၢယွၤ ဟ့ၣ်နၤတၢ်အခွဲးအယာ်လၢနကမၤတၢ်အံၤန့ၣ်လဲၣ်.”

¹⁹ယ့ၣ်ၡူးစံးဆၢဝဲ, “မၤလီၤပှီၢ်ကွံာ်တၢ်လုၢ်ဟံၣ်အံၤ တက့ၢ်. ဒီးလၢသၢသီအတီၢ်ပူၤန့ၣ်ယကသူၣ်ထီၣ်ကဒါ က့ၤအီၤန့ၣ်လီၤ.”

²⁰အဝဲသ့ၣ်သံကွၢ်အီၤ, “နကသူၣ်ထီၣ်ကဒါက့ၤအီၤလၢသၢသီ အတီၢ်ပူၤန့ၣ်ဧါ. တၢ်လုၢ်ဟံၣ်အံၤတၢ်သူၣ်ထီၣ်အီၤယံာ်လွံၢ်ဆံဃု နံၣ်ညါန့ၣ်လီၤ.”

²¹ဘၣ်ဆၣ်ဒီးတၢ်လုၢ်ဟံၣ်လၢယ့ၣ်ၡူးကတိၤတ့ၢ်လၢ အဂ့ၢ်န့ၣ်, မ့ၢ်ဒၣ်အဝဲအနီၢ်ခိန့ၣ်လီၤ.

²²မၤသးဒ်န့ၣ်ဒီး, ဖဲအဝဲဘၣ်တၢ်ဒုးဂဲၤဆၢထၢၣ်သမူထီၣ်က့ၤ အီၤလၢတၢ်သံန့ၣ်, အပျဲၢ်အဘီၣ်တဖၣ်သ့ၣ်နီၣ်ထီၣ်က့ၤလၢအဝဲကတိၤ တ့ၢ်တၢ်အံၤ, ဒီးအဝဲသ့ၣ်စူၢ်က့ၤနာ်က့ၤယွၤကလုၢ်ကထါ ဒီးတၢ်လၢယ့ၣ်ၡူးကတိၤတ့ၢ်ဝဲန့ၣ်လီၤ.

²³ဖဲယ့ၣ်ၡူးအိၣ်ဝဲလၢဝ့ၢ်ယရူၤၡလ့ၣ်လၢဘူၣ်လဲၤကပာ်အဆၢ ကတီၢ်န့ၣ်, ပှၤထံၣ်တၢ်လီၤလးတဖၣ်လၢအမၤဝဲဒီး ပှၤအါဂၤ စူၢ်က့ၤနာ်က့ၤအီၤန့ၣ်လီၤ.

²⁴ဘၣ်ဆၣ်ယ့ၣ်ၡူးတနာ်န့ၢ်အဝဲသ့ၣ်ဘၣ်. မ့ၢ်လၢအသ့ၣ်ညါတ့ၢ်ပှၤကညီခဲလၢာ်အဃိန့ၣ်လီၤ.

²⁵ဒီးအလီၢ်တအိၣ်လၢပှၤတဂၤဂ့ၤတဂၤဂ့ၤကစံးဘၣ်တဲဘၣ် အီၤလၢပှၤကညီအဂ့ၢ်န့ၣ်ဘၣ်. အဂ့ၢ်ဒ်အံၤ, အနီၢ်ကစၢ်ဒၣ်ဝဲသ့ၣ်ညါတၢ်လၢအအိၣ်လၢ ပှၤကညီအသးကံၢ်ပူၤန့ၣ်လီၤ.