Read S'gaw Karen လံာ်ယိၤဟၣ် 20 Bible Online

လံာ်ယိၤဟၣ် 20 - S'gaw Karen bible

လံာ်ယိၤဟၣ် 20

¹လၢမုၢ်ခီၣ်ထံးနံၤဂီၤဂီၤဒီးတၢ်ခံးဒံးအဆၢကတီၢ်န့ၣ်, ပှၤမၤကဒါလၣ်မုၣ်နီၢ်မၤရံလဲၤဆူတၢ်သွၣ်ခိၣ်ဒီးထံၣ် ဘၣ်ဝဲလၢလၢၢ်လၢအအိၣ်လၢတၢ်ပူၤခိၣ်ထိးန့ၣ်, ဘၣ်တၢ်သုးကွံာ်အီၤလံန့ၣ်လီၤ.

²အန့ၣ်ဒီး, အဝဲလဲၤဃ့ၢ်ဆူစီၤၡံမိၣ်ပ့းတရူးဒီးအပျဲၢ် အဘီၣ်အဂၤတဂၤလၢယ့ၣ်ၡူးအဲၣ်အီၤအအိၣ်ဒီးစံးဘၣ် အဝဲသ့ၣ်, “ပှၤစိာ်ကွံာ်ကစၢ်အစိၣ်လၢတၢ်သွၣ်ခိၣ် အပူၤလံ. ဒီးပှၤပာ်အီၤဖဲလဲၣ်န့ၣ်ပတသ့ၣ်ညါဘၣ်.”

³အန့ၣ်ဝံၤ, စီၤပ့းတရူးဒီးအပျဲၢ်အဘီၣ်အဂၤတဂၤန့ၣ် ဟးထီၣ်ဒီးလဲၤဝဲဆူတၢ်သွၣ်ခိၣ်န့ၣ်လီၤ.

⁴အဝဲသ့ၣ်ခံဂၤလိာ်န့ၣ်ဃ့ၢ်ဝဲ, ဘၣ်ဆၣ်အပျဲၢ်အဘီၣ်အဂၤ တဂၤန့ၣ်ဃ့ၢ်ချ့န့ၢ်စီၤပ့းတရူးဒီးလဲၤတုၤဆိဝဲလၢတၢ်သွၣ် ခိၣ်ပူၤန့ၣ်လီၤ.

⁵အဝဲသကူးလီၤအသးဒီးကွၢ်နုာ်တၢ်ဒီးထံၣ်ဘၣ်ဝဲ တၢ်ကံးယာ်ဖှီဝါကဆှၣ်တဖၣ်အိၣ်ပာ်လီၤအသး, ဘၣ်ဆၣ်တလဲၤနုာ်ဝဲဘၣ်.

⁶စီၤၡံမိၣ်ပ့းတရူးဟဲလၢအဝဲအလီၢ်ခံ, ဒီးတဘျီဃီလဲၤနုာ်ဝဲဆူတၢ်သွၣ်ခိၣ်အပူၤ န့ၣ်လီၤ. ဒီးထံၣ်ဘၣ်ဝဲတၢ်ကံးယာ်ဖှီဝါကဆှၣ်အိၣ် ပာ်လီၤအသးဖဲန့ၣ်,

⁷ဒီးထံၣ်စ့ၢ်ကီးဝဲတၢ်ကံးယာ်လၢပှၤဖၢၣ်ဃာ်ယ့ၣ်ၡူး အခိၣ်န့ၣ်လီၤ. ခိၣ်ဖၢၣ်အံၤတအိၣ်တပူၤဃီဒီးတၢ်ကံးယာ်ဖှီဝါ ကဆှၣ်တဖၣ်န့ၣ်ဘၣ်. မ့မ့ၢ်အိၣ်ထူထီၣ်အသးလၢအလီၢ်ဒၣ် ဝဲန့ၣ်လီၤ.

⁸အန့ၣ်ဝံၤ, အပျဲၢ်အဘီၣ်လၢအလဲၤတုၤဆိလၢတၢ်သွၣ်ခိၣ်ပူၤ တဂၤန့ၣ်, လဲၤနုာ်စ့ၢ်ကီးဝဲ, ထံၣ်ဘၣ်တၢ်ဒီးနာ်တၢ်လီၤ.

⁹(အန့ၣ်ဒၣ်လဲာ်, တၢ်ကွဲးအသးလၢအစံးဝဲလၢယ့ၣ်ၡူး ကဘၣ်ဂဲၤဆၢထၢၣ်က့ၤလၢတၢ်သံန့ၣ်, အဝဲသ့ၣ်တနၢ်ပၢၢ် ဒံးဝဲဘၣ်န့ၣ်လီၤ.)

¹⁰အန့ၣ်ဝံၤ, အပျဲၢ်အဘီၣ်တဖၣ်က့ၤကဒါက့ၤဆူအဟံၣ်ဒၣ် ဝဲန့ၣ်လီၤ.

¹¹နီၢ်မၤရံဆၢထၢၣ်ဒီးဟီၣ်ဝဲဖဲတၢ်သွၣ်ခိၣ်ပူၤအချၢ, ဒီးဖဲအဟီၣ်ဝဲအခါန့ၣ်, အဝဲသကူးလီၤအသးဒီးကွၢ်နုာ် တၢ်ဆူတၢ်သွၣ်ခိၣ်အပူၤ,

¹²ဒီးထံၣ်ဘၣ်ဝဲကလူးခံဂၤကူကၤတၢ်အဝါ, ဆ့ၣ်နီၤဝဲဖဲယ့ၣ်ၡူးအစိၣ်အိၣ်တ့ၢ်ဝဲအလီၢ်, လၢအခိၣ်ထးတဂၤဒီးလၢအခီၣ်ထံးတဂၤန့ၣ်လီၤ.

¹³အဝဲသ့ၣ်သံကွၢ်အီၤ, “နီၢ်ဧၢ, ဘၣ်မနုၤအဃိလၢနဟီၣ် န့ၣ်လဲၣ်.” အဝဲစံးဆၢတၢ်ဒီးစံးဝဲ, “အဝဲသ့ၣ်စိာ်ကွံာ်ယကစၢ်န့ၣ်လံ. ဒီးပာ်ဝဲဖဲလဲၣ်န့ၣ်ယတသ့ၣ်ညါဘၣ်.”

¹⁴စံးတၢ်န့ၣ်ဝံၤ, အဝဲဃၣ်တရံးအသးဒီးထံၣ်ဘၣ်ဝဲယ့ၣ်ၡူး ဆၢထၢၣ်ဖဲန့ၣ်, ဘၣ်ဆၣ်အဝဲတသ့ၣ်ညါလၢအမ့ၢ်ယ့ၣ်ၡူး ဘၣ်န့ၣ်လီၤ.

¹⁵ယ့ၣ်ၡူးသံကွၢ်အီၤ, “နီၢ်ဧၢ, ဘၣ်မနုၤအဃိလၢနဟီၣ် န့ၣ်လဲၣ်. မ့ၢ်နဃုမတၤတဂၤန့ၣ်လဲၣ်.” နီၢ်မၤရံဆိကမိၣ်ဝဲလၢအမ့ၢ်ပှၤကွၢ်တၤသၣ်အလီၢ် အဃိစံးဘၣ်အီၤ, “တၢ်ဒိၣ်ဧၢ, နမ့ၢ်စိာ်ကွံာ်အီၤဒီးနပာ်အီၤဖဲ လဲၣ်န့ၣ်, စံးဘၣ်တဲဘၣ်ယၤတက့ၢ်. ယကလဲၤဒီးဟံးန့ၢ်က့ၤ အီၤလီၤ.”

¹⁶ယ့ၣ်ၡူးကိးထီၣ်အီၤ, “နီၢ်မၤရံဧၢ” အဝဲဃၣ်အသးဆူအအိၣ်ဒီးကိးဆၢက့ၤအီၤလၢဧ့ၤဘြံၤ အကျိာ် “ရၤဘူနံၤဧၢ” (အခီပညီမ့ၢ် ‘သရၣ်’ လီၤ.)

¹⁷ယ့ၣ်ၡူးစံးဘၣ်အီၤ, “တဘၣ်ဖိးဃာ်ယၤတဂ့ၤ. အဂ့ၢ်ဒ်လဲၣ်န့ၣ်, ယတက့ၤထီၣ်ဘၣ်ဆူပၢ်အအိၣ်ဒံးဘၣ်. မ့မ့ၢ်လဲၤဆူယဒီပုၢ်ဝဲၢ် တဖၣ်အအိၣ်ဒီးစံးဘၣ်တဲဘၣ်အဝဲသ့ၣ်လၢယက့ၤထီၣ်ကဒါ က့ၤဆူပှၤလၢအမ့ၢ်ယပၢ်ဒီးမ့ၢ်အဝဲသ့ၣ်အပၢ်, ယကစၢ်ယွၤဒီးအဝဲသ့ၣ်အကစၢ်ယွၤအအိၣ်န့ၣ်တက့ၢ်.”

¹⁸အန့ၣ်ဒီး, ပှၤမၤကဒါလၣ်မုၣ်နီၢ်မၤရံလဲၤဒီးစံးဘၣ်တဲဘၣ် အပျဲၢ်အဘီၣ်တဖၣ်လၢအဝဲထံၣ်ဘၣ်ကစၢ်ဒီးတၢ်လၢ ကစၢ်စံးဘၣ်တဲဘၣ်တ့ၢ်အီၤတဖၣ်န့ၣ်လီၤ.

¹⁹ဖဲမုၢ်ခီၣ်ထံးနံၤမုၢ်ဟါလီၤတ့ၢ်လံအကတီၢ်န့ၣ်, အပျဲၢ်အဘီၣ်တဖၣ်ပာ်ဖှိၣ်ထီၣ်အသးဒီးမ့ၢ်လၢ အဝဲသ့ၣ်ပျံၤဘၣ်ပှၤယူဒၤဖိအခိၣ်အနၢ်တဖၣ်အဃိ, တြဲၤတဖၣ်ဘၣ်တၢ်ကးတံာ်ဃာ်အီၤလီၤ. တုၤနုၤတစုယ့ၣ်ၡူးဟဲဒီးအိၣ်ဆၢထၢၣ်လၢအဝဲသ့ၣ်အသိး အကျါဒီးစံး, “မ်တၢ်ဃူတၢ်ဖိးအိၣ်ဒီးသုတက့ၢ်.”

²⁰စံးတၢ်အံၤဝံၤဒီး, အဝဲဒုးနဲၣ်အဝဲသ့ၣ်တဖၣ်လၢအစုဒီးအကပၤ န့ၣ်လီၤ. အပျဲၢ်အဘီၣ်တဖၣ်သူၣ်ခုသးခုဝဲလၢအထံၣ်ဘၣ် ကစၢ်အဃိန့ၣ်လီၤ.

²¹ယ့ၣ်ၡူးစံးဘၣ်ကဒီးအဝဲသ့ၣ်, “မ်တၢ်ဃူတၢ်ဖိးအိၣ်ဒီးသု တက့ၢ်. ဒ်ပၢ်မၢလီၤတ့ၢ်ယၤအသိး, ယမၢလီၤသုစ့ၢ်ကီးလီၤ.”

²²ဝံၤဒီးယ့ၣ်ၡူးသါသဖှိထီၣ်လၢအဝဲသ့ၣ်အလိၤဒီးစံး, “ဒိးန့ၢ်သး စီဆှံတက့ၢ်.

²³သုမ့ၢ်ပျၢ်ကွံာ်ပှၤအတၢ်ဒဲးဘးတဖၣ်ဒီး, အတၢ်ဒဲးဘးတဖၣ်ဘၣ်တၢ်ပျၢ်ကွံာ်အီၤလီၤ. သုမ့ၢ်တပျၢ်ကွံာ်အဝဲသ့ၣ်အတၢ်ဒဲးဘးတဖၣ် ဘၣ်ဒီး, တၢ်တပျၢ်ကွံာ်ဘၣ်အီၤဘၣ်.”

²⁴ဖဲယ့ၣ်ၡူးဟဲဝဲန့ၣ်, စီၤသိၤမါ (လၢအဘၣ်တၢ်ကိးအီၤလၢပှၤ သဃံာ်) လၢအမ့ၢ်အပျဲၢ်အဘီၣ်တဆံခံဂၤအကျါတဂၤန့ၣ်, တအိၣ်လၢအဝဲသ့ၣ်အသိးအကျါဘၣ်.

²⁵လၢတၢ်န့ၣ်အဃိ, အပျဲၢ်အဘီၣ်အဂၤတဖၣ်စံးဘၣ်အီၤ, “ပထံၣ်ဘၣ်လံကစၢ်လံ.” စီၤသိၤမါစံးဘၣ်အဝဲသ့ၣ်, “မ့တမ့ၢ်ဘၣ်လၢယထံၣ်ဘၣ်ထးဆဲးဖျိအလီၢ်လၢ အစုလိၤဒီးကလၢၢ်ဘၣ်တၢ်ပူၤလီၢ်တဖၣ်န့ၣ်လၢယစုနၢ, ဒီးကလၢၢ်ဘၣ်အကပၤလၢယစုဘၣ်ဒီးယတနာ်ဘၣ်.”

²⁶တၢ်မၤအသးအံၤဝံၤလၢခံတနွံန့ၣ်, အပျဲၢ်အဘီၣ်တဖၣ်ပာ်ဖှိၣ်ကဒီးအသးလၢဟံၣ် အပူၤဒီးအအံၤတဘျီစီၤသိၤမါအိၣ်ဒီးအဝဲသ့ၣ် န့ၣ်လီၤ. တြဲၤတဖၣ်ဘၣ်တၢ်ကးတံာ်အီၤ, ဘၣ်ဆၣ် ယ့ၣ်ၡူးဟဲဒီးဆၢထၢၣ်လၢအဝဲသ့ၣ်အသိးအကျါဒီးစံး, “မ်တၢ်ဃူတၢ်ဖိးအိၣ်ဒီးသုတက့ၢ်.”

²⁷ဝံၤဒီးယ့ၣ်ၡူးစံးဘၣ်စီၤသိၤမါ, “ပာ်နစုနၢဖဲအံၤဒီးကွၢ်ယစု တဖၣ်အံၤတက့ၢ်. ဝံၤဒီးယူာ်ဃီၤနစုဒီးကလၢၢ်ကွၢ်ယကပၤ တက့ၢ်. ဆိကတီၢ်လၢနတၢ်သးဒ့ဒီဒီးနာ်တၢ်တက့ၢ်.”

²⁸စီၤသိၤမါစံးဆၢယ့ၣ်ၡူး “ယကစၢ်ဒီးယကစၢ်ယွၤ” န့ၣ်လီၤ.

²⁹ယ့ၣ်ၡူးစံးဘၣ်အီၤ, “မ့ၢ်နထံၣ်ဘၣ်ယၤအဃိနနာ် တၢ်ဧါ. ပှၤလၢအတထံၣ်ဘၣ်ယၤသနာ်က့နာ်တၢ်တဖၣ်န့ၣ်, ဘၣ်ဆိၣ်ဂ့ၤဝဲလီၤ.”

³⁰ယ့ၣ်ၡူးမၤတၢ်လီၤလးအဂၤတဖၣ်တဘျုးမံၤလၢအပျဲၢ်အဘီၣ် တဖၣ်အမဲာ်ညါ, ဘၣ်ဆၣ်တဘၣ်တၢ်ကွဲးနီၣ်ကွဲးဃါအီၤလၢလံာ်အံၤအပူၤဘၣ် န့ၣ်လီၤ.

³¹ဘၣ်ဆၣ်တၢ်သ့ၣ်တဖၣ်အံၤဘၣ်တၢ်ကွဲးဃာ်အီၤ, မ့ၢ်ဒ်သိးသုကနာ်လၢယ့ၣ်ၡူးမ့ၢ်ခရံာ်, ကစၢ်ယွၤအဖိခွါ, ဒီးခီဖျိသုတၢ်နာ်အီၤန့ၣ်, သုကန့ၢ်ဘၣ်တၢ်မူအဂီၢ်န့ၣ်လီၤ.