Read S'gaw Karen လံာ်ယိၤဟၣ် 21 Bible Online

လံာ်ယိၤဟၣ် 21 - S'gaw Karen bible

လံာ်ယိၤဟၣ် 21

¹တၢ်အံၤဝံၤအလီၢ်ခံ, ယ့ၣ်ၡူးလီၣ်ဖျါထီၣ်ကဒီးအသးတဘျီလၢ အပျဲၢ်အဘီၣ်တဖၣ်ဖဲပီၣ်လဲၣ်တံၤဘ့ၤရံအနံၤန့ၣ်လီၤ. တၢ်မၤအသးမ့ၢ်ဒ်အံၤလီၤ.

²စီၤၡံမိၣ်ပ့းတရူး, စီၤသိၤမါ (လၢတၢ်ကိးအီၤလၢပှၤသဃံာ်), စီၤနၤသန့လး (ပှၤဝ့ၢ်ကၤနါဖိလၢကီၢ်ကၤလံၤလါ), စီၤစ့းဘ့းဒဲ အဖိခွါခံဂၤ, ဒီးယ့ၣ်ၡူးအပျဲၢ်အဘီၣ်အဂၤခံဂၤ, ဒီးအဝဲသ့ၣ်ခဲလၢာ်န့ၣ်အိၣ်ဝဲတပူၤဃီလီၤ.

³စီၤၡံမိၣ်ပ့းတရူးစံးဘၣ်ပှၤအဂၤတဖၣ်, “ယကလဲၤမၤအီၣ် ညၣ်လီၤ.” အဝဲသ့ၣ်စံးဘၣ်အီၤ, “ပကလဲၤဒီးနၤလီၤ.” အန့ၣ်ဒီး, အဝဲသ့ၣ်ဟးထီၣ်ဒီးဒိးထီၣ်ချံ, ဘၣ်ဆၣ်ဒီနၤညါန့ၣ်မၤညၣ်တန့ၢ်နီတဘ့ၣ်ဘၣ်န့ၣ်လီၤ.

⁴ဖဲမုၢ်ဟဲထီၣ်န့ၣ်, ယ့ၣ်ၡူးဆၢထၢၣ်လၢထံနံၤ, ဘၣ်ဆၣ်အပျဲၢ်အဘီၣ်တဖၣ်တသ့ၣ်ညါလၢအမ့ၢ်အီၤဘၣ်.

⁵အန့ၣ်ဒီး, ယ့ၣ်ၡူးသံကွၢ်အဝဲသ့ၣ်, “ဖိသ့ၣ်လံၤသ့ၣ်ဧၢ, မ့ၢ်သုမၤအီၣ်ညၣ်တန့ၢ်ဘၣ်ဧါ.” အဝဲသ့ၣ်စံးဆၢအီၤ, “တန့ၢ်နီတဘ့ၣ်ဘၣ်.”

⁶ယ့ၣ်ၡူးစံးဘၣ်အဝဲသ့ၣ်, “တ့ၢ်လီၤသုစၤလၢသုချံအစုထွဲ တကပၤန့ၣ်ဒီးသုကဖီၣ်န့ၢ်ညၣ်တနီၤလီၤ.” ထဲန့ၣ်ဒီးအဝဲသ့ၣ် တ့ၢ်လီၤအစၤဒီးမ့ၢ်လၢအဝဲသ့ၣ်ဖီၣ်န့ၢ်ညၣ်အါမးအဃိ ထုးထီၣ်က့ၤအစၤတန့ၢ်လၢၤဘၣ်န့ၣ်လီၤ.

⁷အပျဲၢ်အဘီၣ်လၢယ့ၣ်ၡူးအဲၣ်အီၤတဂၤစံးဘၣ် စီၤပ့းတရူး, “မ့ၢ်ကစၢ်န့ၣ်လီၤ.” ဖဲစီၤပ့းတရူးနၢ်ဟူလၢ အမ့ၢ်ကစၢ်လီၤန့ၣ်, မ့ၢ်လၢအဝဲအိၣ်ဘ့ၣ်ဆ့အဃိအဝဲ သိးထီၣ်က့ၤအဆ့ကၤအဖီခိၣ်ဒီးကံၢ်တူာ်ဃာ်ဝဲဒီးစံၣ်လီၤ ဆူထံကျါန့ၣ်လီၤ.

⁸အပျဲၢ်အဘီၣ်အဂၤတဖၣ်ဟဲက့ၤဆူထံကၢၢ်နံၤလၢချံ အပူၤ, ဒီးတွံၢ်ဃုာ်အစၤလၢအပှဲၤဒီးညၣ်တဖၣ်န့ၣ် လီၤ. အဝဲသ့ၣ်အိၣ်တယံၤကဲၣ်ဆိးဒီးခိဘၣ်. ကအိၣ်ဒၣ်အပျၢ်ခံကယၤဃၣ်ဃၣ်န့ၣ်လီၤ.

⁹ဖဲအဝဲသ့ၣ်ဟဲက့ၤထီၣ်ဆူထံကၢၢ်ခိၣ်န့ၣ်, ထံၣ်ဝဲသွဲၣ်လးမ့ၣ်အူ ကဖးတပူၣ်ဒီးညၣ်ကၣ်အိၣ်လၢအဖီခိၣ်ဒီးကိၣ်အိၣ်တနီၤ စ့ၢ်ကီးန့ၣ်လီၤ.

¹⁰အန့ၣ်ဒီး, ယ့ၣ်ၡူးစံးဘၣ်အဝဲသ့ၣ်, “ဟဲစိာ်ညၣ်လၢသုဖီၣ်န့ၢ်တ့ၢ်ခဲကနံၣ်အံၤတနီၤတက့ၢ်.”

¹¹စီၤၡံမိၣ်ပ့းတရူးလဲၤထီၣ်ဆူချံအပူၤဝံၤဒီးဟဲက့ၤတွံၢ်ထီၣ်စၤလၢ အပှဲၤဒီးညၣ်ဖးဒိၣ်, ခဲလၢာ်အိၣ်ဝဲတကယၤယဲၢ်ဆံသၢဘ့ၣ် န့ၣ်လီၤ. ညၣ်အါထဲထဲအံၤသနာ်က့, စၤတယာ်ဝဲဒၣ်ဘၣ်.

¹²ယ့ၣ်ၡူးစံးဘၣ်အဝဲသ့ၣ်, “ဟဲဒီးအီၣ်ဂီၤအတၢ်အီၣ် တက့ၢ်.” အပျဲၢ်အဘီၣ်ကသံကွၢ်အီၤလၢအမ့ၢ်မတၤ လဲၣ်န့ၣ်, တဘူၣ်နီတဂၤဘၣ်. မ့ၢ်လၢအဝဲသ့ၣ်, သ့ၣ်ညါဝဲလၢအမ့ၢ်ကစၢ်အဃိန့ၣ်လီၤ.

¹³အန့ၣ်ဒီး ယ့ၣ်ၡူးလဲၤဃီၤဝဲ, ဟံးန့ၢ်ကိၣ်ဒီးဟ့ၣ်လီၤအဝဲသ့ၣ်, ဒီးညၣ်စ့ၢ်ကီးမၤဝဲဒ်န့ၣ်အသိးလီၤ.

¹⁴အအံၤမ့ၢ်ယ့ၣ်ၡူးဂဲၤဆၢထၢၣ်က့ၤလၢတၢ်သံဝံၤဒီးဒုးနဲၣ် အသးလၢအပျဲၢ်အဘီၣ်တဖၣ်ပှဲၤထီၣ်သၢဘျီတဘျီန့ၣ်လီၤ.

¹⁵အဝဲသ့ၣ်အီၣ်ဂီၤတၢ်အီၣ်ဝံၤဒီး, ယ့ၣ်ၡူးစံးဘၣ်စီၤၡံမိၣ် ပ့းတရူး, “စီၤယိၤနါအဖိခွါစီၤၡံမိၣ်ဧၢ, မ့ၢ်နအဲၣ်ယၤအါန့ၢ်ဒံးအဝဲသ့ၣ်တဖၣ်အဲၣ်ယၤန့ၣ်ဧါ.” အဝဲစံးဆၢဝဲ, “ကစၢ်ဧၢ, မ့ၢ်လီၤ, နသ့ၣ်ညါလၢယအဲၣ်နၤလီၤ.” ယ့ၣ်ၡူးစံးဘၣ်အီၤ “လုၢ်အီၣ်လုၢ်အီယသိဖိတဖၣ်တက့ၢ်.”

¹⁶ယ့ၣ်ၡူးစံးဘၣ်အီၤခံဘျီတဘျီ, “စီၤယိၤနါအဖိခွါစီၤၡံမိၣ်ဧၢ, မ့ၢ်နအဲၣ်ယၤဧါ.” အဝဲစံးဆၢဝဲ, “ကစၢ်ဧၢ, မ့ၢ်လီၤ, နသ့ၣ်ညါလၢယအဲၣ်နၤလီၤ.” ယ့ၣ်ၡူးစံးဘၣ်အီၤ, “အံးက့ၤကွၢ်က့ၤယသိတက့ၢ်.”

¹⁷ယ့ၣ်ၡူးစံးဘၣ်အီၤပှဲၤထီၣ်သၢဘျီတဘျီ, “စီၤယိၤနါအဖိခွါ စီၤၡံမိၣ်ဧၢ, မ့ၢ်နအဲၣ်ယၤဧါ.” ယ့ၣ်ၡူးသံကွၢ်အီၤ, မ့ၢ်နအဲၣ် ယၤဧါ. ပှဲၤထီၣ်သၢဘျီတဘျီအဃိဒီး, စီၤပ့းတရူးအသးတမုာ်ဝဲဘၣ်ဒီးစံးဘၣ်ယ့ၣ်ၡူး, “ကစၢ်ဧၢ, နသ့ၣ်ညါတၢ်ခဲလၢာ်လီၤ. နသ့ၣ်ညါလၢယအဲၣ်နၤလီၤ.” ယ့ၣ်ၡူးစံးဘၣ်အီၤ, “လုၢ်အီၣ်လုၢ်အီယသိတက့ၢ်.

¹⁸ယစံးဘၣ်နၤတၢ်မ့ၢ်တၢ်တီ, ဖဲနသးစၢ်ဒံးအခါန့ၣ်, နကတဲာ်ကတီၤထီၣ်နသးဒီးလဲၤဖဲနအဲၣ်ဒိးလဲၤန့ၣ် လီၤ. ဘၣ်ဆၣ်တုၤနသးပှၢ်ထီၣ်ဒီး, နကယူာ်ထီၣ်နစု တဖၣ်ဒီးပှၤအဂၤတဂၤကစၢဃာ်နၤဒီးကဆှၢနၤဆူတၢ်လီၢ်လၢ နတအဲၣ်ဒိးလဲၤဘၣ်န့ၣ်လီၤ.”

¹⁹(ယ့ၣ်ၡူးစံးတၢ်အံၤမ့ၢ်ဒ်သိးကဒုးနဲၣ်ဖျါထီၣ်ကျဲလၢ စီၤပ့းတရူးကဘၣ်သံဝဲဒီးမၤလၤကပီၤယွၤဒ်လဲၣ်အဂ့ၢ် န့ၣ်လီၤ.) ဝံၤဒီးယ့ၣ်ၡူးစံးဘၣ်အီၤ, “ဟဲဒီး ကဲဘၣ်ယပျဲၢ်ယဘီၣ် တက့ၢ်.”

²⁰ဒီးစီၤပ့းတရူးဃၣ်ဃီၤအသးဒီးထံၣ်အပျဲၢ်အဘီၣ်အဂၤတဂၤလၢ ယ့ၣ်ၡူးအဲၣ်အီၤအိၣ်လၢအလီၢ်ခံန့ၣ်လီၤ. မ့ၢ်ပှၤတဂၤဃီလၢအသန့ၤလီၤအသးသဃဲၤဒီးယ့ၣ်ၡူး, ဖဲအဝဲသ့ၣ်အီၣ်ဟါတၢ်အီၣ်အခါဒီးသံကွၢ်ယ့ၣ်ၡူး, “ကစၢ်ဧၢ, မ့ၢ်မတၤကဟ့ၣ်လီၤကွံာ်နၤန့ၣ်လဲၣ်.”

²¹ဖဲစီၤပ့းတရူးထံၣ်အီၤန့ၣ်, အဝဲသံကွၢ်ယ့ၣ်ၡူး, “ကစၢ်ဧၢ, ပှၤတဂၤအံၤတၢ်ကမၤအသးဒီးအီၤဒ်လဲၣ်.”

²²ယ့ၣ်ၡူးစံးဆၢအီၤ, “ယသးမ့ၢ်အိၣ်လၢအဝဲကအိၣ်မူတုၤ လီၤလၢယဟဲက့ၤအဆၢကတီၢ်န့ၣ်ဒီး, တၢ်အံၤဘၣ်ဃးဒီးနၤ မနုၤလဲၣ်. ဟဲဒီးကဲဘၣ်ယပျဲၢ်ယဘီၣ်တက့ၢ်.”

²³အန့ၣ်သတးဒီး, တၢ်ကစီၣ်ဟူထီၣ်သါလီၤလၢယ့ၣ်ၡူးအပျဲၢ် တဖၣ်အကျါလၢအပျဲၢ်အဘီၣ်တဂၤအံၤတဘၣ်သံဝဲဘၣ်လီၤ. ဘၣ်ဆၣ်, ယ့ၣ်ၡူးတစံးလၢအဝဲတဘၣ်သံဝဲန့ၣ်ဘၣ်. မ့မ့ၢ် ယ့ၣ်ၡူးစံးဝဲ, “ယမ့ၢ်သးအိၣ်လၢအဝဲကအိၣ်မူတုၤလီၤ လၢယဟဲက့ၤအဆၢကတီၢ်န့ၣ်ဒီး, တၢ်အံၤဘၣ်ဃးဒီးနၤမနုၤလဲၣ်.” တခီန့ၣ်လီၤ.

²⁴အဝဲမ့ၢ်အပျဲၢ်အဘီၣ်တဂၤလၢအကတိၤဖျါထီၣ်တၢ်ဂ့ၢ်တဖၣ် အံၤ, မ့ၢ်ပှၤတဂၤဃီလၢအကွဲးနီၣ်ကွဲးဃါတၢ်သ့ၣ်တဖၣ် အံၤ, ဒီးပသ့ၣ်ညါလၢတၢ်လၢအဝဲအုၣ်အသးတဖၣ်န့ၣ်, မ့ၢ်တၢ်မ့ၢ်တၢ်တီလီၤ.

²⁵တၢ်အဂုၤအဂၤတဖၣ်လၢယ့ၣ်ၡူးမၤဝဲန့ၣ်, အိၣ်ဒံးအါမံၤန့ၣ်လီၤ. တၢ်မ့ၢ်ကွဲးလီၤအီၤတမံၤဘၣ်တမံၤခဲလၢာ်ဒီး, ယဆိကမိၣ်လၢလံာ်တဖၣ်လၢအကဘၣ်တၢ်ကွဲးအီၤန့ၣ်, ဟီၣ်ခိၣ်ဒီဘ့ၣ်တမ့ၢ်လၢအကတြီၢ်လၢၤဘၣ်န့ၣ်လီၤ.