Read S'gaw Karen လံာ်ယိၤဟၣ် 4 Bible Online

လံာ်ယိၤဟၣ် 4 - S'gaw Karen bible

လံာ်ယိၤဟၣ် 4

¹ဖဲယ့ၣ်ၡူးသ့ၣ်ညါလၢပှၤဖၤရံၤၡဲတဖၣ်နၢ်ဟူလၢ အဝဲမၤန့ၢ်ဒီးဘျၢဘၣ်အပျဲၢ်အဘီၣ်တဖၣ်အါန့ၢ်စီၤယိၤဟၣ်န့ၣ်,

²(အနီၢ်နီၢ်န့ၣ် ယ့ၣ်ၡူးအကစၢ်ဒၣ်ဝဲတဘျၢပှၤလၢထံနီတဂၤဘၣ်, မ့ၢ်ဒၣ်အပျဲၢ်အဘီၣ်တဖၣ်ဘျၢတၢ်လီၤ.)

³အဝဲဟးထီၣ်လၢကီၢ်ယူဒၤဒီး လဲၤဝဲဆူကီၢ်ကၤလံၤ လါလီၤ.

⁵လဲၤတုၤဝဲလၢဝ့ၢ်စံဃၢ်, အိၣ်လၢကီၢ်ၡၤမရံအပူၤ, ဘူးဒီးဟီၣ်ခိၣ်အကဝီၤလၢစီၤယၤကိာ်ဟ့ၣ်လီၤအဖိခွါ စီၤယိၤသးန့ၣ်လီၤ.

⁶စီၤယၤကိာ်အထံပူၤအိၣ်ဝဲဖဲန့ၣ်ဒီးမ့ၢ်လၢယ့ၣ်ၡူးလဲၤ တၢ်ဒီးလီၤဘှံးလီၤတီၤအဃိဆ့ၣ်နီၤဝဲဖဲထံပူၤအဃၢၤ လီၤ. ဒီးအဆၢကတီၢ်ကဘၣ်ဖဲမုၢ်ထူၣ်ဃၣ်ဃၣ်လီၤ.

⁷ပှၤၡၤမရံမုၣ်တဂၤဟဲဒၢၣ်ထံဒီးယ့ၣ်ၡူးစံးဘၣ် အီၤ, “ဟ့ၣ်ဒုးအီယၤလၢထံတက့ၢ်.”

⁸(အပျဲၢ်အဘီၣ်လဲၤပှ့ၤတၢ်အီၣ်တၢ်အီလၢဝ့ၢ်ပူၤန့ၣ်လီၤ.)

⁹ဒီးပိာ်မုၣ်န့ၣ်စံးဆၢအီၤ, “နဲနမ့ၢ်ပှၤယူဒၤဖိဒီးယဲယမ့ၢ် ပှၤၡၤမရံဖိ, နဃ့အီယၤလၢထံကသ့ဒ်လဲၣ်. (အဝဲစံးတၢ်အံၤမ့ၢ်လၢပှၤယူဒၤဖိတဖၣ်တသူလီခီ လၢပှၤၡၤမရံဖိတဖၣ်သူဝဲန့ၣ်ဘၣ်အဃိလီၤ.)

¹⁰ယ့ၣ်ၡူးစံးဆၢတၢ်ဒီးစံးဘၣ်အီၤ, “နမ့ၢ်သ့ၣ်ညါတ့ၢ်ကစၢ်ယွၤ အတၢ်ဟ့ၣ်ဒီးပှၤလၢအဃ့အီနၤလၢထံတဂၤမ့ၢ်မတၤလဲၣ်န့ၣ်, နကဃ့တၢ်လၢအီၤဒီးအဝဲကဟ့ၣ်နၤထံလၢအဟ့ၣ် တၢ်မူန့ၣ်လီၤ.

¹¹ပိာ်မုၣ်စံးဘၣ်အီၤ, “ကစၢ်ဧၢ, နထံစဲၤတအိၣ်ဘၣ်ဒီးထံပူၤ တခီယိာ်မးလီၤ. နကလဲၤမၤန့ၢ်ထံလၢအဟ့ၣ်တၢ်မူန့ၣ်ဖဲလဲၣ်.

¹²ပပၢ်စီၤယၤကိာ်ဟ့ၣ်လီၤပှၤလၢထံပူၤအံၤလီၤ. အဝဲဒီးအဖိ တဖၣ်, ဒီးအဆၣ်ဖိကီၢ်ဖိတဖၣ်အီထံလၢထံပူၤအံၤလီၤ. မ့ၢ်နစံးလီၤနသးလၢနဒိၣ်န့ၢ်ဒံးစီၤယၤကိာ်တက့ၢ်န့ၣ်ဧါ.”

¹³ယ့ၣ်ၡူးစံးဆၢတၢ်ဒီးစံးဘၣ်အီၤ, “ပှၤတဂၤလၢ်လၢ်လၢ အအီထံအံၤ, တၢ်ကသူကဒီးအသးလၢထံန့ၣ်လီၤ.

¹⁴မ့မ့ၢ်ပှၤတဂၤလၢ်လၢ်လၢအအီထံလၢယကဟ့ၣ်အီအီၤန့ၣ်, အသးတသူထံနီတဘျီလၢၤဘၣ်. ထံလၢယကဟ့ၣ်အီၤန့ၣ်, ကကဲထီၣ်ထံထီၣ်ပၢၢ်လၢအပူၤလၢကဟ့ၣ်ထီၣ်တၢ်မူ အထံဒီးတၢ်မူအထူအယိာ်န့ၣ်လီၤ.”

¹⁵ပိာ်မုၣ်န့ၣ်စံးဘၣ်အီၤ, “ကစၢ်ဧၢ, ဟ့ၣ်ယၤထံအဝဲန့ၣ်ဒ်သိး ယသးသုတသူထံလၢၤတဂ့ၤ, ဒီးဒ်သိးယသုတဟဲဒၢၣ်ဘၣ်လၢၤထံဖဲအံၤတဂ့ၤန့ၣ်တက့ၢ်.”

¹⁶ယ့ၣ်ၡူးစံးဘၣ်အီၤ, “က့ၤဒီးကိးန့ၢ်နဝၤဒီးဟဲကိးအီၤဖဲအံၤ တက့ၢ်.”

¹⁷ပိာ်မုၣ်န့ၣ်စံးဆၢအီၤ, “ယဝၤတအိၣ်ဘၣ်.” ယ့ၣ်ၡူးစံးဘၣ်အီၤ, “နစံးလၢနဝၤတအိၣ်ဘၣ်န့ၣ်ဘၣ်ကစီဒီလီၤ.

¹⁸နဝၤအိၣ်တ့ၢ်လံယဲၢ်ဆီလံဒီးပိာ်ခွါလၢနအိၣ်ဒီးအီၤခဲအံၤတဂၤ န့ၣ်တမ့ၢ်နဝၤဘၣ်. နတဲဘၣ်တ့ၢ်ယၤတၢ်မ့ၢ်တၢ်တီလီၤ.”

¹⁹ပိာ်မုၣ်န့ၣ်စံးဝဲ, “ကစၢ်ဧၢ, ယထံၣ်လၢနမ့ၢ်ဝံတဂၤန့ၣ်လီၤ.

²⁰ပဝဲပှၤၡၤမရံဖိပမိၢ်ပၢ်ဖံဖုလၢပျၢၤတဖၣ်ဘူၣ်ထီၣ်ဘါထီၣ် ကစၢ်ယွၤဖဲကစၢၢ်အံၤအလိၤ, မ့မ့ၢ်သုဝဲပှၤယူဒၤဖိတဖၣ် သုစံးလၢပကြၢးဘူၣ်ထီၣ်ဘါထီၣ်ကစၢ်ယွၤလၢဝ့ၢ်ယရူၤၡလ့ၣ် အပူၤန့ၣ်လီၤ.”

²¹ယ့ၣ်ၡူးစံးဘၣ်အီၤ, “နာ်ယၤတက့ၢ်ပိာ်မုၣ်ဧၢ, တၢ်ဆၢကတီၢ် ကတုၤဝဲဖဲပှၤတဘူၣ်ထီၣ်ဘါထီၣ်ဘၣ်ပၢ်ယွၤလၢကစၢၢ်အံၤ အလိၤမ့ၢ်ဂ့ၤ, လၢဝ့ၢ်ယရူၤၡလ့ၣ်အပူၤမ့ၢ်ဂ့ၤန့ၣ်လၢၤဘၣ်.

²²သုဝဲပှၤၡၤမရံဖိတဖၣ်သုဘူၣ်ထီၣ်ဘါထီၣ်မတၤလဲၣ်န့ၣ်သု တသ့ၣ်ညါဘၣ်. မ့မ့ၢ်ပဝဲပှၤယူဒၤဖိတဖၣ်ပသ့ၣ်ညါပှၤလၢ ပဘူၣ်ထီၣ်ဘါထီၣ်အီၤ, မ့ၢ်လၢတၢ်အုၣ်က့ၤခီၣ်က့ၤန့ၣ်ဟဲထီၣ် လၢပှၤယူဒၤဖိတဖၣ်အအိၣ်အဃိန့ၣ်လီၤ.

²³မ့မ့ၢ်အဆၢကတီၢ်နၣ်ရံၣ်ကဘၣ်ဝဲ, ဒီးဘၣ်ခဲကနံၣ်အံၤဒၣ် လဲာ်ဖဲပှၤလၢအဘူၣ်ထီၣ်ဘါထီၣ်တၢ်နီၢ်နီၢ်တဖၣ် ကဘူၣ်ထီၣ်ဘါထီၣ်ပၢ်ယွၤလၢသူၣ်လၢသးဒီးလၢတၢ်မ့ၢ် တၢ်တီလီၤ. အဂ့ၢ်ဒ်အံၤ, ပၢ်ယွၤအဲၣ်ဒိးပှၤလၢအဘူၣ်ထီၣ်ဘါထီၣ်အီၤဒ်န့ၣ်အသိး တဖၣ်လီၤ.

²⁴ကစၢ်ယွၤမ့ၢ်သူၣ်မ့ၢ်သးဒီးပှၤလၢအဘူၣ်ထီၣ်ဘါထီၣ်အီၤ တဖၣ်, ဘၣ်ဘူၣ်ထီၣ်ဘါထီၣ်အီၤလၢသူၣ်လၢသး ဒီးလၢတၢ်မ့ၢ်တၢ်တီလီၤ.”

²⁵ပိာ်မုၣ်န့ၣ်စံးဘၣ်အီၤ, “ယသ့ၣ်ညါလၢမ့းၡံအၤ, လၢအမ့ၢ်ခရံာ်န့ၣ်ကဟဲဝဲ, ဒီးတုၤအဟဲဝဲဒီးကစံးဘၣ်တဲဘၣ် ပှၤလၢတၢ်ခဲလၢာ်န့ၣ်လီၤ.”

²⁶ယ့ၣ်ၡူးစံးဆၢအီၤ, “ယၤ, ပှၤလၢအကတိၤတၢ်ဒီးနၤခဲအံၤန့ၣ်, မ့ၢ်ပှၤအဝဲန့ၣ်လီၤ.”

²⁷အကတီၢ်ဖဲန့ၣ်ယ့ၣ်ၡူးအပျဲၢ်အဘီၣ်တဖၣ်ဟဲက့ၤတုၤဝဲ ဒီးကမၢကမၣ်ဝဲဒိၣ်မးလၢအထံၣ်ဘၣ်ယ့ၣ်ၡူးကတိၤတၢ်ဒီး ပိာ်မုၣ်န့ၣ်အဃိလီၤ. ဘၣ်ဆၣ်ဒီးအဝဲသ့ၣ်တသံကွၢ်ဝဲ, “နအဲၣ်ဒိးတၢ်မနုၤလၢအအိၣ်လဲၣ်” မ့တမ့ၢ် “နကတိၤတၢ်ဒီးအီၤဘၣ်မနုၤလဲၣ်” န့ၣ်နီတဂၤဘၣ်.

²⁸အန့ၣ်ဒီး, ပိာ်မုၣ်ပာ်တ့ၢ်အသပၢၤထံဒီးက့ၤက့ၤဝဲဆူဝ့ၢ်ပူၤ ဒီးစံးဘၣ်ပှၤဂီၢ်မုၢ်,

²⁹“ဟဲဒီးကွၢ်ပှၤတဂၤလၢအစံးဘၣ်တဲဘၣ်ယၤတၢ်ခဲလၢာ်လၢ ယမၤတ့ၢ်လံန့ၣ်တက့ၢ်. မ့ၢ်ကမ့ၢ်ခရံာ်န့ၣ်ဧါ.”

³⁰မၤသးဒ်န့ၣ်ဒီး, အဝဲသ့ၣ်ဟးထီၣ်လၢဝ့ၢ်ပူၤဒီးလဲၤဆူယ့ၣ်ၡူး အအိၣ်လီၤ.

³¹အကတီၢ်ဖဲန့ၣ်, အပျဲၢ်အဘီၣ်တဖၣ်ဃ့ကညးယ့ၣ်ၡူးဒီးစံး, “သရၣ်ဧၢ, အီၣ်တၢ်တက့ၢ်.”

³²ဘၣ်ဆၣ်အဝဲဒၣ်စံးဆၢဝဲ, “ယအိၣ်ဒီးတၢ်အီၣ်လၢယကအီၣ်အီၤလၢ သုတသ့ၣ်ညါဘၣ်န့ၣ်လီၤ.”

³³မၤသးဒ်န့ၣ်ဒီးအပျဲၢ်အဘီၣ်တဖၣ်သံကွၢ်လိာ်အသးတဂၤဒီး တဂၤ, “မ့ၢ်ပှၤဟဲစိာ်န့ၢ်အီၤတၢ်အီၣ်တဂၤဂၤလံဧါ.”

³⁴ယ့ၣ်ၡူးစံးဘၣ်အဝဲသ့ၣ်, “ယတၢ်အီၣ်န့ၣ်မ့ၢ်ယကမၤပှၤလၢ အမၢလီၤယၤတဂၤအတၢ်ဘၣ်အသးဒီးမၤအီၤတုၤအဝံၤ တစုန့ၣ်လီၤ.

³⁵သုညီနုၢ်စံး, ‘ဆူညါလွံၢ်လါဒီး ကူးဘုအကတီၢ်ကဘၣ်ဝဲလီၤ.’ ဘၣ်ဆၣ် ယစံးဘၣ်သု, ကွၢ်စံာ်ပျီတဖၣ်လီၤတံၢ်လီၤဆဲးတက့ၢ်. ဘုဂီၤထီၣ်လံဒီးတၢ်ကူးအီၤအကတီၢ်ဘၣ်လံ.

³⁶ပှၤလၢအကူးဘုတဂၤန့ၣ်, န့ၢ်ဘၣ်တၢ်အဘူးအလဲဒီးပာ်ဖှိၣ်တၤသူတၤသၣ်တဖၣ် လၢတၢ်မူအထူအယိာ်အဂီၢ်, ဒ်သိးပှၤလၢအဖှံတၢ်ဒီးပှၤလၢအကူးက့ၤတၢ်ခံဂၤလၢာ် ကသးခုသကိးဝဲအဂီၢ်လီၤ.

³⁷တၢ်ကတိၤအမ့ၢ်အတီတထံၣ်စံးဝဲဒၣ်, ‘ပှၤဖှံတၢ်မ့ၢ်တဂၤ, ဒီးပှၤအဂၤတဂၤကူးက့ၤတၢ်န့ၣ်လီၤ.’

³⁸ယမၢလီၤသုလၢသုကလဲၤကူးဘုလၢစံာ်လီၢ်တလီၢ် လၢသုတမၤတ့ၢ်တၢ်လၢအပူၤနီတဘျီဘၣ်န့ၣ်လီၤ. ပှၤအဂၤတဖၣ်မၤတ့ၢ်တၢ်ဖဲန့ၣ်, ဒီးသုဘၣ်ဘျုးလၢအဝဲသ့ၣ်အတၢ်မၤအဃိလီၤ.”

³⁹ပှၤၡၤမရံဖိအါဂၤလၢဝ့ၢ်ပူၤစူၢ်က့ၤနာ်က့ၤယ့ၣ်ၡူးမ့ၢ်လၢပိာ်မုၣ် န့ၣ်အုၣ်အသးဒီးစံးဝဲ, “အဝဲစံးဘၣ်တဲဘၣ်ယၤတၢ်ခဲလၢာ်လၢ ယမၤတ့ၢ်လံ” အဃိန့ၣ်လီၤ.

⁴⁰သတးဒီး, ဖဲပှၤၡၤမရံဖိတဖၣ်ဟဲတုၤလၢအအိၣ်န့ၣ်, ဃ့ကညးအီၤလၢအကအိၣ်ဒီးအဝဲသ့ၣ်ဒီးယ့ၣ်ၡူးအိၣ်ဖဲန့ၣ်ခံသီလီၤ.

⁴¹ဒီးမ့ၢ်လၢယ့ၣ်ၡူးအတၢ်စံးတၢ်ကတိၤအဃိဒီး, ပှၤစူၢ်က့ၤနာ်က့ၤတၢ်အါထီၣ်အါဂၤန့ၣ်လီၤ.

⁴²ဒီးအဝဲသ့ၣ်စံးဘၣ်ပိာ်မုၣ်န့ၣ်, “ပစူၢ်က့ၤနာ်က့ၤတၢ်ခဲအံၤ တမ့ၢ်လၢၤလၢနတၢ်ကတိၤတဖၣ်အဃိဘၣ်. မ့မ့ၢ်, မ့ၢ်လၢ ပနၢ်ဟူအတၢ်စံးတၢ်ကတိၤလၢပကစၢ်ဒၣ်ဝဲအဃိဒီးပသ့ၣ်ညါ လၢအဝဲမ့ၢ်နီၢ်နီၢ်ပှၤလၢအအုၣ်က့ၤခီၣ်က့ၤပှၤဟီၣ်ခိၣ်ဖိန့ၣ်လီၤ.”

⁴³ယ့ၣ်ၡူးအိၣ်ဖဲန့ၣ်ခံသီဝံၤအလီၢ်ခံ, အဝဲဟးထီၣ်ဒီးလဲၤဝဲဆူကီၢ်ကၤလံၤလါန့ၣ်လီၤ.

⁴⁴အဂ့ၢ်ဒ်အံၤ, အကစၢ်ဒၣ်ဝဲစံးတ့ၢ်ဝဲ, “တၢ်လၢဝံန့ၣ် လၢအထံအကီၢ်ဒၣ်ဝဲအပူၤပှၤတယူးယီၣ်ပာ်ကဲအီၤဘၣ်.”

⁴⁵ဖဲအဝဲလဲၤတုၤဝဲလၢကီၢ်ကၤလံၤလါန့ၣ်, ပှၤဖဲန့ၣ်တဖၣ်တူၢ်လိာ်ခီၣ်ဆၢအီၤဂ့ၤမးမ့ၢ်လၢ အဝဲသ့ၣ်လဲၤတ့ၢ်လံဆူဘူၣ်လဲၤကပာ်လၢဝ့ၢ်ယရူၤၡလ့ၣ် ဒီးထံၣ်ဘၣ်လံတၢ်ခဲလၢာ်လၢအဝဲမၤတ့ၢ်ဝဲဖဲဘူၣ် အကတီၢ်န့ၣ်အဃိလီၤ.

⁴⁶အန့ၣ်ဝံၤ, ယ့ၣ်ၡူးက့ၤကဒါက့ၤဆူဝ့ၢ်ကၤနါလၢကီၢ်ကၤလံၤလါ အပူၤ, တၢ်လီၢ်ဖဲတဘျီအဝဲမၤကဲထီၣ်ထံလၢစပံးထံန့ၣ်လီၤ. လၢဝ့ၢ်ကပ့းရနီၣ်န့ၣ်ပဒိၣ်အိၣ်ဝဲတဂၤလၢအဖိခွါဆိးက့ဝဲန့ၣ်လီၤ.

⁴⁷အဝဲဒၣ်နၢ်ဟူလၢယ့ၣ်ၡူးဟဲလၢကီၢ်ယူဒၤဆူကီၢ်ကၤလံၤလါ သတးဒီး, လဲၤဝဲဆူအအိၣ်ဒီးဃ့ကညးအီၤဒ်သိးအကလဲၤ ဆူဝ့ၢ်ကပ့းရနီၣ်ဒီးမၤဘျါက့ၤအဖိခွါလၢဘူးအကသံတ့ၢ် တဂၤန့ၣ်လီၤ.

⁴⁸ယ့ၣ်ၡူးစံးဘၣ်အီၤ, “သုမ့ၢ်တထံၣ်ဘၣ်တၢ်လီၤလိၢ်လီၤလးဒီးတၢ်ပနီၣ်လီၤလး တဖၣ်ဘၣ်န့ၣ်, သုတစူၢ်က့ၤနာ်က့ၤတၢ်နီတဂၤဘၣ်.”

⁴⁹ဒီးပဒိၣ်န့ၣ်စံးဆၢအီၤ, “ကစၢ်ဧၢ, ဟဲဒီးယၤခဲအံၤတချုးလၢယဖိသံဒံးဘၣ်န့ၣ်တက့ၢ်.”

⁵⁰ယ့ၣ်ၡူးစံးဘၣ်အီၤ, “က့ၤက့ၤတက့ၢ်. နဖိခွါန့ၣ်ကမူကစီဒီလီၤ.” ပှၤတဂၤန့ၣ်နာ်ယ့ၣ်ၡူးအတၢ်ကတိၤတဖၣ်ဒီးက့ၤက့ၤဝဲလီၤ.

⁵¹ဖဲအက့ၤဝဲအဖၢမုၢ်န့ၣ်, အခ့အပှၤတဖၣ်ဟဲသဂၢၢ်အီၤဒီး စံးဘၣ်အီၤ, “နဖိခွါမူဝဲကစီဒီလီၤ.”

⁵²အဝဲသံကွၢ်ပှၤသ့ၣ်တဖၣ်လၢအဖိခွါအိၣ်မုာ်ထီၣ်က့ၤဖဲ တၢ်ဆၢကတီၢ်မတၤလဲၣ်ဒီး, အဝဲသ့ၣ်စံးဆၢဝဲ, “အတၢ် ကိၢ်လီၤက့ၤန့ၣ်ကဘၣ်ဖဲမဟါတနံၤမုၢ်ဃ့ၢ်လီၤတနၣ်ရံၣ်န့ၣ်လီၤ.”

⁵³အန့ၣ်ဒီးပၢ်တဂၤအံၤသ့ၣ်နီၣ်ထီၣ်က့ၤဝဲလၢတၢ်အံၤမ့ၢ်နၣ်ရံၣ် တကတီၢ်ဃီဖဲယ့ၣ်ၡူးစံးဘၣ်အီၤ, “နဖိခွါန့ၣ်ကမူကစီဒီလီၤ” န့ၣ်လီၤ. သတးဒီးအဝဲဒီးအဒူၣ်ဖိထၢဖိခဲလၢာ်စူၢ်က့ၤနာ်က့ၤ ယ့ၣ်ၡူးန့ၣ်လီၤ.

⁵⁴အဝဲအံၤမ့ၢ်ယ့ၣ်ၡူးမၤတၢ်လီၤလးခံမံၤတမံၤဖဲ အဟးထီၣ်လၢကီၢ်ယူဒၤဒီးဟဲဆူကီၢ်ကၤလံၤလါဝံၤ အလီၢ်ခံန့ၣ်လီၤ.