Read S'gaw Karen လံာ်ယိၤဟၣ် 5 Bible Online

လံာ်ယိၤဟၣ် 5 - S'gaw Karen bible

လံာ်ယိၤဟၣ် 5

¹အန့ၣ်ဝံၤအလီၢ်ခံဒီး, ယ့ၣ်ၡူးလဲၤထီၣ်ဆူဝ့ၢ်ယရူၤၡလ့ၣ် လၢပှၤယူဒၤဖိအဘူၣ်တဘူၣ်အဂီၢ်န့ၣ်လီၤ.

²ဖဲတၢ်လီၢ်ကိးဝဲလၢသိတြဲၤအဃၢၤလၢဝ့ၢ်ယရူၤၡလ့ၣ် အပူၤန့ၣ်, နိၣ်အိၣ်ဝဲတနိၣ်အိၣ်ဒီးအတၢ်ဒုးခိၣ်ယဲၢ်ဖျၢၣ်ဒီး နိၣ်အံၤတၢ်ကိးအီၤလၢဧ့ၤဘြံၤအကျိာ်လၢဘ့ၤသ့းစဒါန့ၣ်လီၤ.

³ပှၤဆူးပှၤဆါအါဒံအါဂၤအိၣ်မံလီၤလၢတၢ်ဒုးခိၣ်တဖၣ်အံၤ အဖီလာ်ဒီးပှၤတဖၣ်န့ၣ်မ့ၢ်ဝဲပှၤမဲာ်ဘျီၣ်, ပှၤခီၣ်ဟးဂီၤ, ဒီးပှၤသံတခီပၤတဖၣ်န့ၣ်လီၤ.

⁴(အဝဲသ့ၣ်အိၣ်ခိးဝဲထံကဟူးဝးထီၣ်မ့ၢ်လၢ တဘျီဘၣ်တဘျီဖဲကစၢ်အကလူးဟဲလီၤဒီးမၤဟူးဝးထီၣ်နိၣ်အံၤ အထံန့ၣ်, ပှၤဆူးပှၤဆါလၢအလဲၤနုာ်လီၤဆူ ထံကျါအဆိကတၢၢ်တဂၤန့ၣ်, ဘျါက့ၤလၢအတၢ်ဆါလၢအအိၣ်ဒီးအီၤအဃိန့ၣ်လီၤ.)

⁵ပှၤအိၣ်ဖဲန့ၣ်တဂၤလၢအဆိးက့တ့ၢ်လံလၢ သၢဆံဃိးနံၣ်အတီၢ်ပူၤန့ၣ်လီၤ.

⁶ယ့ၣ်ၡူးထံၣ်ဘၣ်အီၤအိၣ်မံလီၤဖဲန့ၣ်ဒီးသ့ၣ်ညါဝဲလၢ အဆါယံာ်တ့ၢ်လံအဃိအဝဲဒၣ်စံးဘၣ်အီၤ, “မ့ၢ်နသး အိၣ်ဘျါက့ၤဧါ.”

⁷ပှၤဆါတဂၤအံၤစံးဆၢအီၤ, “ကစၢ်ဧၢ, ဖဲတၢ်မၤဟူးဝးထီၣ်ထံ အကတီၢ်န့ၣ်ပှၤလၢအကလဲၤစိာ်လီၤယၤဆူထံကျါတအိၣ်နီတဂၤ ဘၣ်. ဒီးဖဲယကျဲးစၢးလဲၤလီၤအဖၢမုၢ်န့ၣ်ပှၤအဂၤလဲၤတုၤဆိလၢ ယမဲာ်ညါန့ၣ်လီၤ.”

⁸ယ့ၣ်ၡူးစံးဘၣ်အီၤ, “ဂဲၤဆၢထၢၣ်, ဟံးထီၣ်နလီၢ်မံ, ဒီးဟးတက့ၢ်.”

⁹တဘျီဃီပှၤဆါတဂၤအံၤဘျါက့ၤဝဲဒၣ်, ဒီးဟံးထီၣ်အလီၢ်မံ ဒီးဟးထီၣ်ဝဲဒၣ်န့ၣ်လီၤ.

¹⁰တၢ်မၤအသးအံၤဘၣ်ဝဲလၢပှၤယူဒၤဖိအမုၢ်အိၣ်ဘှံးနံၤ အဃိ, ပှၤယူဒၤဖိအခိၣ်အနၢ်တဖၣ်စံးဘၣ်ပှၤလၢအဘျါက့ၤ တဂၤန့ၣ်, “တနံၤအံၤမ့ၢ်မုၢ်အိၣ်ဘှံးနံၤအဃိ, နဟးစိာ်နလီၢ် မံအံၤန့ၣ်ထီဒါပတၢ်သိၣ်တၢ်သီလီၤ.”

¹¹အဝဲစံးဆၢတၢ်ဒီးစံး, “ပှၤလၢအမၤဘျါက့ၤယၤတဂၤစံးဘၣ် ယၤလၢယကဟံးထီၣ်ယလီၢ်မံဒီးဟးထီၣ်န့ၣ်လီၤ.”

¹²အဝဲသ့ၣ်သံကွၢ်အီၤ, “ပှၤလၢအမၢနမၤတၢ်အံၤန့ၣ်မ့ၢ်မတၤ တဂၤလဲၣ်.”

¹³ဘၣ်ဆၣ်ပှၤလၢအဘျါက့ၤတဂၤအံၤယ့ၣ်ၡူးမ့ၢ်မတၤလဲၣ်န့ၣ် တသ့ၣ်ညါဝဲဘၣ်. အဂ့ၢ်မ့ၢ်လၢပှၤအိၣ်ဖဲန့ၣ်ဂီၢ်မုၢ်ဂီၢ်ပၤဒီး ယ့ၣ်ၡူးဟးထီၣ်ကွံာ်ဝဲကစုဒုအဃိန့ၣ်လီၤ.

¹⁴လၢခံက့ၤဒီး, ယ့ၣ်ၡူးထံၣ်န့ၢ်အီၤလၢတၢ်လုၢ်ဟံၣ်အပူၤ ဒီးစံးဘၣ်အီၤ, “ကနၣ်တက့ၢ်. ခဲအံၤနဘျါက့ၤလံအဃိ မၤလၢၤတၢ်ဒဲးဘးတဂ့ၤ. နမ့ၢ်မၤဒီးတၢ်နးန့ၢ်အလီၢ်ကဟဲဘၣ် နၤန့ၣ်လီၤ.”

¹⁵အန့ၣ်ဒီး, ပှၤတဂၤန့ၣ်ဟးထီၣ်ကွံာ်ဝဲဒီးလဲၤစံးဘၣ်တဲဘၣ် ပှၤယူဒၤဖိအခိၣ်အနၢ်တဖၣ်လၢပှၤလၢအမၤဘျါက့ၤအီၤန့ၣ်မ့ၢ် ယ့ၣ်ၡူးန့ၣ်လီၤ.

¹⁶မၤသးဒ်န့ၣ်ဒီး, ပှၤယူဒၤဖိအခိၣ်အနၢ်တဖၣ်စးထီၣ်ထီဒုၣ်ထီဒါ ယ့ၣ်ၡူးမ့ၢ်လၢအဝဲမၤဘျါက့ၤပှၤဆါတဂၤအံၤလၢမုၢ်အိၣ်ဘှံးနံၤ အဃိန့ၣ်လီၤ.

¹⁷ဒီးယ့ၣ်ၡူးစံးဆၢအဝဲသ့ၣ်, “ယပၢ်မၤတၢ်ထီဘိတထံၣ်ဃီဒီးယဲစ့ၢ်ကီးယဘၣ်မၤယဲလီၤ.”

¹⁸တၢ်ကတိၤအံၤမၤဆူၣ်မၤကိၤထီၣ်ပှၤယူဒၤဖိအခိၣ်အနၢ်တဖၣ် အသးအါန့ၢ်အလီၢ်လၢအကမၤသံကွံာ်ယ့ၣ်ၡူး, တမ့ၢ်ထဲလၢအဝဲလုၣ်သ့ၣ်ခါပတာ်မုၢ်အိၣ်ဘှံးနံၤတၢ်သိၣ် တၢ်သီဧိၤဘၣ်. မ့မ့ၢ်, မ့ၢ်လၢအဝဲစံးစ့ၢ်ကီးဝဲလၢ ကစၢ်ယွၤမ့ၢ်အပၢ်ဒၣ်ဝဲဒီးပာ်အသးထဲသိးဒီးယွၤအဃိ န့ၣ်လီၤ.

¹⁹မၤသးဒ်န့ၣ်ဒီး, ယ့ၣ်ၡူးစံးဆၢအဝဲသ့ၣ်, “ယစံးဘၣ်တဲဘၣ်သုတၢ်မ့ၢ်တၢ်တီလီၤ. ဖိခွါမၤဒၣ်အတၢ်တသ့နီတမံၤဘၣ်. မၤဝဲသ့ထဲတၢ်လၢအဝဲထံၣ်အပၢ်မၤဝဲန့ၣ်လီၤ. တၢ်လၢပၢ်မၤတမံၤလၢ်လၢ်န့ၣ်, ဖိခွါမၤစ့ၢ်ကီးဝဲလီၤ.

²⁰အဂ့ၢ်ဒ်အံၤ, ပၢ်အဲၣ်ဖိခွါဒီးဒုးနဲၣ်အီၤကယဲၢ်တၢ်လၢ အကစၢ်ဒၣ်ဝဲမၤဝဲခဲလၢာ်န့ၣ်လီၤ. ကဒုးနဲၣ်အီၤလၢတၢ်မၤဒိၣ်န့ၢ် အအံၤတဖၣ်ဒီးသုကကမၢကမၣ်ဒိၣ်မးန့ၣ်လီၤ.

²¹ဒ်ပၢ်ဒုးဂဲၤဆၢထၢၣ်သမူထီၣ်က့ၤပှၤလၢအသံတဖၣ် ဒီးဟ့ၣ်အဝဲသ့ၣ်လၢတၢ်မူအသိးန့ၣ်, ဖိခွါစ့ၢ်ကီးဟ့ၣ်တၢ်မူလၢပှၤလၢအသးအိၣ်ဟ့ၣ်ဝဲ တဖၣ်န့ၣ်လီၤ.

²²ပၢ်ကစၢ်ဒၣ်ဝဲတစံၣ်ညီၣ်စ့ၢ်ကီးပှၤနီတဂၤဘၣ်. အဝဲဟ့ၣ်လီၤအဖိခွါတၢ်စိတၢ်ကမီၤခဲလၢာ်လၢကစံၣ်ညီၣ် တၢ်အဂီၢ်,

²³ဒ်သိးပှၤခဲလၢာ်ကယူးယီၣ်ဖိခွါဒ်အယူးယီၣ်ပၢ်အသိး န့ၣ်လီၤ. ပှၤလၢတယူးယီၣ်ဘၣ်ဖိခွါန့ၣ်, တယူးယီၣ်ဘၣ်ပၢ်လၢအမၢလီၤအီၤတဂၤန့ၣ်ဘၣ်.

²⁴ယစံးဘၣ်တဲဘၣ်သုတၢ်မ့ၢ်တၢ်တီ, ပှၤလၢအနၢ်ဟူယတၢ်စံးတၢ် ကတိၤတဖၣ်ဒီးစူၢ်က့ၤနာ်က့ၤပှၤလၢအမၢလီၤယၤန့ၣ်, အိၣ်ဒီးတၢ်မူအထူအယိာ်လံန့ၣ်လီၤ. အဝဲသ့ၣ်တဘၣ်တၢ်စံၣ်ညီၣ် အီၤဘၣ်. အဂ့ၢ်မ့ၢ်လၢအခီဂာ်တ့ၢ်လံတၢ်သံ ဒီးနုာ်လီၤဆူတၢ်မူအပူၤလံအဃိန့ၣ်လီၤ.

²⁵ယစံးဘၣ်တဲဘၣ်သုတၢ်မ့ၢ်တၢ်တီလၢအဆၢကတီၢ်ကဘၣ်ဝဲ, ဒီးဘၣ်လံခဲကနံၣ်အံၤလၢပှၤအသံတဖၣ်ကနၢ်ဟူကစၢ်ယွၤ အဖိခွါအကလုၢ်, ဒီးပှၤလၢအနၢ်ဟူတဖၣ်န့ၣ်ကမူထီၣ်ဝဲလီၤ.

²⁶ဒ်ပၢ်အကစၢ်ဒၣ်ဝဲမ့ၢ်တၢ်မူအဂံၢ်ခီၣ်ထံးအသိးန့ၣ်, ဒုးကဲထီၣ်စ့ၢ်ကီးအဖိခွါလၢကမ့ၢ်တၢ်မူအဂံၢ်ခီၣ် ထံးဒ်န့ၣ်အသိးလီၤ.

²⁷ဒီးအဝဲမ့ၢ်ပှၤကညီဖိခွါအဃိဒီး, ယွၤဟ့ၣ်လီၤစ့ၢ်ကီးအီၤတၢ်စိတၢ် ကမီၤလၢကစံၣ်ညီၣ်တၢ်အဂီၢ်လီၤ.

²⁸တဘၣ်ကမၢကမၣ်လၢတၢ်အံၤအဃိတဂ့ၤ. အဂ့ၢ်ဒ်အံၤ, တၢ်ဆၢကတီၢ်ကဟဲဝဲဖဲပှၤအသံခဲလၢာ် ကနၢ်ဟူအကလုၢ်,

²⁹ဒီးကဟဲက့ၤထီၣ်ဝဲလၢအသွၣ်ခိၣ်အပူၤ, ပှၤလၢအမၤတၢ်ဂ့ၤတဖၣ်ကဂဲၤဆၢထၢၣ်က့ၤဒီးမူဝဲ ဒီးပှၤလၢအမၤတၢ်အၢတဖၣ်ကဂဲၤဆၢထၢၣ်က့ၤဒီး ဘၣ်တၢ်စံၣ်ညီၣ်ဃၣ်အီၤန့ၣ်လီၤ.

³⁰ယမၤတၢ်လၢယစိကမီၤဒၣ်ယဲတသ့နီတမံၤဘၣ်. ယစံၣ်ညီၣ်တၢ်ဒ်ယွၤစံးဘၣ်တဲဘၣ်ယၤအသိးအဃိ ယတၢ်စံၣ်ညီၣ်န့ၣ်ဘၣ်ဝဲလီၤ. အဂ့ၢ်ဒ်အံၤ, တမ့ၢ်ယကျဲးစၢးမၤတၢ်လၢအဘၣ်ယသးန့ၣ်ဘၣ်. မ့မ့ၢ်, ယမၤထဲပှၤလၢအမၢလီၤယၤတဂၤအတၢ်ဘၣ်အသး အဃိန့ၣ်လီၤ.

³¹ယမ့ၢ်အုၣ်ယသးလၢယဂီၢ်ဒၣ်ယဲဒီးတၢ်လၢယစံးန့ၣ် တၢ်တူၢ်လိာ်အီၤဒ်တၢ်အုၣ်သးနီၢ်နီၢ်တသ့ဘၣ်.

³²ဘၣ်ဆၣ်ဒီးပှၤအိၣ်ဝဲအဂၤတဂၤလၢအအုၣ်အသးလၢ ယဂီၢ်, ဒီးယသ့ၣ်ညါလၢတၢ်လၢအဝဲတဲတၢ်ဘၣ်ဃး ဒီးယၤန့ၣ်မ့ၢ်ဝဲတီဝဲလီၤ.

³³သုမၢလီၤသုပှၤဆူစီၤယိၤဟၣ်အအိၣ်ဒီးအဝဲဒၣ်အုၣ် အသးလၢတၢ်မ့ၢ်တၢ်တီအဂီၢ်လီၤ.

³⁴တမ့ၢ်လၢယသန့ၤယသးလၢပှၤကညီအတၢ်အုၣ်အသး န့ၣ်ဘၣ်. ယကတိၤတၢ်ဒ်အံၤ, မ့ၢ်ဒၣ်ဒ်သိးဒီး သုကတုၤလၢတၢ်အုၣ်က့ၤခီၣ်က့ၤအဂီၢ်န့ၣ်လီၤ.

³⁵စီၤယိၤဟၣ်မၤအသးဒ်မ့ၣ်အူဒၢတဖျၢၣ်အသိး, ကဲၤထီၣ်ဒီး ကပီၤထီၣ်ဝဲဒီးသုသးအိၣ်တစိၢ်တလီၢ်လၢသုကသူၣ်ဖှံသးညီလၢ အတၢ်ကပီၤအပူၤန့ၣ်လီၤ.

³⁶ဘၣ်ဆၣ်ဒီးယအိၣ်ဒီးတၢ်အုၣ်အသးလၢယဂီၢ်လၢ အဒိၣ်န့ၢ်ဒံးစီၤယိၤဟၣ်အတၢ်အုၣ်အသးတက့ၢ်လီၤ. တၢ်လၢယမၤလၢအမ့ၢ်တၢ်မၤတဖၣ်လၢပၢ်ဟ့ၣ်လီၤ ယၤလၢယကမၤန့ၣ်, အုၣ်အသးလၢယဂီၢ်ဒီးဒုးနဲၣ်ဝဲလၢ ပၢ်မၢလီၤယၤန့ၣ်လီၤ.

³⁷ဒီးပၢ်လၢအမၢလီၤယၤန့ၣ်အုၣ်စ့ၢ်ကီးအသးလၢယဂီၢ်လီၤ. သုတနၢ်ဟူဘၣ်အကလုၢ်ဒီးထံၣ်ဘၣ်အမဲာ်နီတဘျီဘၣ်.

³⁸ဒီးသုတဟံးဃာ်ယွၤအကလုၢ်ကထါလၢသုသးကံၢ်ပူၤဘၣ်. မ့ၢ်လၢသုတနာ်ပှၤလၢပၢ်မၢလီၤအီၤတဂၤန့ၣ်အဃိလီၤ.

³⁹သုဃုကွၢ်ထံတၢ်ကွဲးအသးစီဆှံတဖၣ်, မ့ၢ်လၢသုဆိကမိၣ် လၢသုကန့ၢ်ဘၣ်တၢ်မူအထူအယိာ်လၢအပူၤအဃိလီၤ. ဒီးတၢ်ကွဲးအသးစီဆှံတဖၣ်အံၤအုၣ်အသးလၢယဂ့ၢ်လီၤ.

⁴⁰အန့ၣ်ဒၣ်လဲာ်, သုတသးအိၣ်ဟဲဆူယအိၣ်လၢ သုကန့ၢ်ဘၣ်တၢ်မူအဂီၢ်န့ၣ်ဘၣ်.

⁴¹ယတဃုမၤန့ၢ်ပှၤဟီၣ်ခိၣ်ဖိအတၢ်စံးပတြၢၤယၤဘၣ်.

⁴²ဘၣ်ဆၣ်ဒီးသုမ့ၢ်ပှၤဒ်လဲၣ်န့ၣ်ယသ့ၣ်ညါ, ဒီးယသ့ၣ်ညါလၢတၢ်အဲၣ်တၢ်ကွံကစၢ်ယွၤ တအိၣ်လၢသုသးကံၢ်ပူၤဘၣ်န့ၣ်လီၤ.

⁴³ယဟဲယဲလၢယပၢ်အမံၤ, ဘၣ်ဆၣ်ဒီးသုတတူၢ်လိာ်ယၤဘၣ်. ပှၤအဂၤမ့ၢ်ဟဲဆူသုအိၣ်လၢအမံၤဒၣ်ဝဲဒီး, သုကတူၢ်လိာ်အီၤန့ၣ်လီၤ.

⁴⁴သုသးအိၣ်ဒိးန့ၢ်တၢ်စံးပတြၢၤလိာ်သးကဒဲကဒဲန့ၣ်လီၤ. မ့မ့ၢ် သုတဂုာ်ကျဲးစၢးမၤန့ၢ်တၢ်စံးပတြၢၤထဲလၢကစၢ်ယွၤတဂၤဧိၤ အအိၣ်အဃိ, သုနာ်ယၤကသ့ဒ်လဲၣ်.

⁴⁵သုတဆိကမိၣ်လၢယကမ့ၢ်ပှၤပာ်တၢ်ကမၣ်လၢသုလိၤ လၢပၢ်အမဲာ်ညါန့ၣ်တဂ့ၤ. စီၤမိၤၡ့လၢသုပာ်တၢ်မုၢ်လၢ်လၢ အပူၤတဂၤန့ၣ်, ကမ့ၢ်ပှၤတဂၤလၢအပာ်တၢ်ကမၣ်လၢသုလိၤ တခီန့ၣ်လီၤ.

⁴⁶သုမ့ၢ်နာ်တ့ၢ်စီၤမိၤၡ့နီၢ်နီၢ်ဒီး, သုကနာ်တ့ၢ်ယၤ, မ့ၢ်လၢအဝဲကွဲးတၢ်ဘၣ်ဃးဒီးယၤအဃိလီၤ.

⁴⁷ဘၣ်ဆၣ်ဒီး, မ့ၢ်လၢသုတနာ်တၢ်လၢအဝဲကွဲးတ့ၢ်ဝဲအဃိ, တၢ်လၢယစံးကတိၤတဖၣ်သုနာ်ကသ့ဒ်လဲၣ်.”