Read S'gaw Karen လံာ်ယိၤဟၣ် 7 Bible Online

လံာ်ယိၤဟၣ် 7 - S'gaw Karen bible

လံာ်ယိၤဟၣ် 7

¹တၢ်အံၤဝံၤအလီၢ်ခံဒီး, ယ့ၣ်ၡူးဟးဝ့ၤဝီၤဝဲလၢကီၢ်ကၤလံၤလါ အပူၤလီၤ. မ့ၢ်လၢပှၤယူဒၤဖိအခိၣ်အနၢ်တဖၣ်ဃုမၤသံအီၤ အဃိ, အဝဲတသးအိၣ်ဟးဝ့ၤဝီၤလၢကီၢ်ယူဒၤအပူၤန့ၣ်ဘၣ်.

²ပှၤယူဒၤဖိအဘူၣ်ဒဲကဘၣ်ဘူးထီၣ်လံအဃိ,

³ယ့ၣ်ၡူးအဒီပုၢ်ဝဲၢ်ခွါတဖၣ်စံးဘၣ်အီၤ, “ဟးထီၣ်လၢတၢ်လီၢ်အံၤဒီးလဲၤဆူကီၢ်ယူဒၤဒ်သိး နပျဲၢ်နဘီၣ်တဖၣ်ကထံၣ်ဘၣ်နတၢ်ဖံးတၢ်မၤတဖၣ်လၢ နမၤအီၤန့ၣ်တက့ၢ်.

⁴ပှၤတဂၤလၢအအဲၣ်ဒိးအမံၤဟူသၣ်ဖျါန့ၣ်, တပာ်ခူသူၣ်တၢ်လၢအဝဲမၤဝဲန့ၣ်ဘၣ်. မ့ၢ်လၢနမၤတ့ၢ်လံတၢ်တဖၣ်အံၤအဃိဒီး, ပျဲဟီၣ်ခိၣ်ဒီဘ့ၣ်သ့ၣ်ညါတၢ်ဘၣ်ဃးဒီးနၤတက့ၢ်.”

⁵(ယ့ၣ်ၡူးအဒီပုၢ်ဝဲၢ်ခွါတဖၣ်ဒၣ်လဲာ်တနာ်အီၤဘၣ်.)

⁶ယ့ၣ်ၡူးစံးဘၣ်အဝဲသ့ၣ်, “တၢ်ဆၢကတီၢ်လၢယဂီၢ်တဘၣ် ဒံးဘၣ်. မ့မ့ၢ် လၢသုဂီၢ်န့ၣ်တၢ်ဆၢကတီၢ်ဘၣ်ဒၣ်ထီဘိလီၤ.

⁷ဟီၣ်ခိၣ်သးဟ့သုတသ့ဘၣ်. ဘၣ်ဆၣ်သးဟ့ယၤလီၤ. မ့ၢ်လၢယစံးဘၣ်တဲဘၣ်အီၤတလီၢ်လီၢ်လၢ အကျဲတဖၣ်န့ၣ်အၢဝဲသီဝဲအဃိလီၤ.

⁸လဲၤထီၣ်သုဝဲဆူဘူၣ်ပူၤတက့ၢ်. မ့မ့ၢ်ယဲ ယတလဲၤဆူဘူၣ်အံၤဒံးဘၣ်. မ့ၢ်လၢတၢ်ဆၢကတီၢ်တဘၣ်ဒံးဘၣ်လၢယဂီၢ်အဃိလီၤ.”

⁹ယ့ၣ်ၡူးစံးတၢ်ဒ်အံၤဝံၤဒီးအိၣ်တ့ၢ်ဝဲဒၣ်လၢကီၢ်ကၤလံၤလါ အပူၤန့ၣ်လီၤ.

¹⁰ယ့ၣ်ၡူးအဒီပုၢ်ဝဲၢ်ခွါတဖၣ်လဲၤထီၣ်ဆူဘူၣ်ပူၤဝံၤအလီၢ်ခံ, အဝဲလဲၤစ့ၢ်ကီးဝဲလီၤ. ဘၣ်ဆၣ်တလဲၤဝဲဖျိဖျိဖျါဖျါဘၣ်. မ့မ့ၢ်လဲၤဝဲလၢတၢ်ခူသူၣ်အပူၤလီၤ.

¹¹ပှၤယူဒၤဖိအခိၣ်အနၢ်တဖၣ်လူၤဃုအီၤဖဲဘူၣ်ပူၤဒီးသံကွၢ် တၢ်ဒီးစံးဝဲ, “အဝဲအိၣ်ဖဲလဲၣ်.”

¹²လၢပှၤဂီၢ်မုၢ်အကျါ, ပှၤကတိၤကသွံကသွါတၢ်လၢ ယ့ၣ်ၡူးအဂ့ၢ်အကျိၤအါမးလီၤ. လၢအကျါတနီၤစံးဝဲ, “အဝဲမ့ၢ်ပှၤအဂ့ၤတဂၤလီၤ.” အဂၤတနီၤတခီစံးဝဲ, “တမ့ၢ်ဘၣ်, အဝဲမ့ၢ်ပှၤလၢအဆှၢကမၣ်ပှၤဂီၢ်မုၢ်လီၤ.”

¹³ဘၣ်ဆၣ်ပှၤကတိၤတၢ်လၢယ့ၣ်ၡူးအဂ့ၢ်ဖျိဖျိဖျါဖျါ တဘူၣ်နီတဂၤဘၣ်. မ့ၢ်လၢအဝဲသ့ၣ်ပျံၤပှၤယူဒၤဖိ အခိၣ်အနၢ်တဖၣ်အဃိလီၤ.

¹⁴ဖဲဘူၣ်အကတီၢ်လီၤဖးဖီန့ၣ်, ယ့ၣ်ၡူးလဲၤထီၣ်ဆူတၢ်လုၢ်ဟံၣ်ဒီး စးထီၣ်သိၣ်လီၤသီလီၤတၢ်န့ၣ်လီၤ.

¹⁵ပှၤယူဒၤဖိအခိၣ်အနၢ်တဖၣ်ကမၢကမၣ်ဝဲဒိၣ်မးဒီးစံး, “ပှၤတဂၤအံၤတမၤလိဘၣ်တၢ်လၢပှၤယူဒၤဖိတၢ်သိၣ် တၢ်သီအသရၣ်ဒိၣ်တဖၣ်အစုပူၤသနာ်က့, သ့ၣ်ညါ တၢ်အါထဲအံၤညါန့ၣ်, ဟဲအသးဒ်လဲၣ်.”

¹⁶ယ့ၣ်ၡူးစံးဆၢတၢ်ဒီးစံးဝဲ, “တၢ်လၢယသိၣ်လိအံၤတမ့ၢ်ယတၢ်သိၣ်လိသီလိဒၣ်ယဲဘၣ်. မ့မ့ၢ် ဟဲလၢကစၢ်ယွၤလၢအမၢလီၤယၤတဂၤအအိၣ်န့ၣ်လီၤ.

¹⁷ပှၤတဂၤဂ့ၤတဂၤဂ့ၤအသးမ့ၢ်အိၣ်လၢကမၤဘၣ်ကစၢ်ယွၤ အတၢ်ဘၣ်အသးဒီး, အဝဲကသ့ၣ်ညါဝဲလၢယတၢ်သိၣ်လိသီလိအံၤဟဲလၢ ကစၢ်ယွၤအအိၣ်ဧါ, မ့တမ့ၢ်ဒီးလၢယကတိၤဒၣ်တၢ်လၢယစိကမီၤဒၣ်ယဲလဲၣ်န့ၣ်လီၤ.

¹⁸ပှၤတဂၤလၢအကတိၤတၢ်လၢအစိကမီၤဒၣ်ဝဲန့ၣ်, မ့ၢ်အဃုမၤန့ၢ်အလၤအကပီၤဒၣ်ဝဲလီၤ. မ့မ့ၢ်ပှၤလၢအဃုပှၤလၢအမၢလီၤအီၤတဂၤအလၤ ကပီၤန့ၣ်, မ့ၢ်ပှၤအတီတဂၤဒီးတၢ်လီတၢ်ဝ့ၤတအိၣ်လၢ အပူၤနီတမံၤဘၣ်.

¹⁹စီၤမိၤၡ့ဟ့ၣ်သုလၢတၢ်သိၣ်တၢ်သီ တမ့ၢ်ဘၣ်ဧါ. ဘၣ်ဆၣ်ဒီးသုတဒိကနၣ်တၢ်သိၣ်တၢ်သီန့ၣ်နီ တဂၤဘၣ်. ဘၣ်မနုၤအဃိလၢသုဃုမၤသံယၤန့ၣ်လဲၣ်.”

²⁰ပှၤဂီၢ်မုၢ်စံးဆၢတၢ်ဒီးစံးဝဲ, “တၢ်နါအိၣ်လၢနပူၤလီၤ. မ့ၢ်မတၤဃုမၤသံနၤတဂၤန့ၣ်လဲၣ်.”

²¹ယ့ၣ်ၡူးစံးဆၢတၢ်ဒီးစံးဝဲ, “ယမၤတၢ်လီၤလးတမံၤ, ဒီးသုကမၢကမၣ်ဘၣ်သုသးကိးဂၤဒဲးလီၤ.

²²စီၤမိၤၡ့မၢသုကူးတရံးသုဖိခွါတဖၣ်, အန့ၣ်ဒီးသုကူးတရံးဘၣ်ပိာ်ခွါဖိသၣ်လၢမုၢ်အိၣ်ဘှံးနံၤ န့ၣ်လီၤ. (ပှၤစးထီၣ်လုၢ်လၢ်အံၤမ့ၢ်သုပၢ်ဖးဒိၣ်လၢပျၢၤဒီး တမ့ၢ်စီၤမိၤၡ့ဘၣ်.)

²³ပှၤတဂၤမ့ၢ်ဘၣ်တၢ်ကူးတရံးအီၤလၢမုၢ်အိၣ်ဘှံးနံၤဒ်သိး စီၤမိၤၡ့အတၢ်သိၣ်တၢ်သီဘၣ်ဃးတၢ်ကူးတရံးအံၤအသု တဘၣ်တၢ်လုၣ်သ့ၣ်ခါပတာ်အီၤတဂ့ၤဒီး, ဘၣ်မနုၤအဃိသုသးဒိၣ်ယၤလၢယမၤဘျါက့ၤပှၤတဂၤ ဂ့ၤဂ့ၤဘၣ်ဘၣ်လၢမုၢ်အိၣ်ဘှံးအနံၤန့ၣ်လဲၣ်.

²⁴တဘၣ်စံၣ်ညီၣ်ပှၤဒ်တၢ်အိၣ်ဖျါအသိးလၢၤတဂ့ၤ. မ့မ့ၢ်စံၣ်ညီၣ်တၢ်ဒ်တၢ်မ့ၢ်တၢ်တီအိၣ်ဝဲအသိးန့ၣ် တက့ၢ်.”

²⁵ပှၤဝ့ၢ်ယရူၤၡလ့ၣ်ဖိတနီၤစံးဝဲ, “ပှၤတဂၤအံၤတမ့ၢ်ပှၤလၢပှၤယူဒၤဖိအခိၣ်အနၢ် တဖၣ်ကျဲးစၢးဃုမၤသံကွံာ်အီၤန့ၣ်ဘၣ်ဧါ.

²⁶ကွၢ်တက့ၢ်. အဝဲကတိၤတၢ်လၢကမျၢၢ်အမဲာ်ညါဒီး အဝဲသ့ၣ်တကတိၤထီဒါအီၤနီတမံၤဘၣ်. မ့ၢ်အဝဲသ့ၣ်, သ့ၣ်ညါနီၢ်နီၢ်လၢအဝဲမ့ၢ်ခရံာ်အဃိန့ၣ်ဧါ.

²⁷ဘၣ်ဆၣ်တုၤခရံာ်ဟဲဝဲန့ၣ်, ပှၤတသ့ၣ်ညါအဝဲဟဲလၢလဲၣ်နီ တဂၤန့ၣ်ဘၣ်. ဒီးအဝဲတဂၤအံၤဟဲဝဲလၢလဲၣ်န့ၣ်ပဝဲခဲလၢာ် ပသ့ၣ်ညါလီၤ.”

²⁸ယ့ၣ်ၡူးသိၣ်လိသီလိတၢ်လၢတၢ်လုၢ်ဟံၣ်ပူၤအဖၢမုၢ်ဒီး ကတိၤတၢ်လၢအကလုၢ်ဖးဒိၣ်ဒီးစံးဝဲ, “မ့ၢ်သုသ့ၣ်ညါယၤနီၢ်နီၢ်ဒီးသ့ၣ်ညါယဟဲလၢလဲၣ်န့ၣ်ဧါ. ယတဟဲလၢယတၢ်ဘၣ်ယသးဒၣ်ယဲန့ၣ်ဘၣ်. ပှၤလၢ အမၢလီၤယၤတဂၤန့ၣ် မ့ၢ်ပှၤလၢအမ့ၢ်အတီလီၤ. သုတသ့ၣ်ညါအီၤဘၣ်.

²⁹ဘၣ်ဆၣ်ယသ့ၣ်ညါအီၤမ့ၢ်လၢယဟဲလၢအအိၣ်ဒီး အဝဲဒၣ်မၢလီၤယၤအဃိလီၤ.”

³⁰ထဲန့ၣ်ဒီးအဝဲသ့ၣ်ဂုာ်ကျဲးစၢးဃုကျဲလၢကဖီၣ်ယ့ၣ်ၡူး ဘၣ်ဆၣ်ပှၤတထိးဘူးအီၤနီတဂၤဘၣ်. မ့ၢ်လၢတၢ်ဆၢကတီၢ်နၣ်ရံၣ်တဘၣ်ဒံးဘၣ်လၢအဂီၢ် အဃိလီၤ.

³¹ဘၣ်ဆၣ်ဒီးပှၤအါဂၤလၢပှၤဂီၢ်မုၢ်အကျါနာ်အီၤဒီးစံး, “တုၤခရံာ်ဟဲဝဲဒီးမ့ၢ်အဝဲကမၤတၢ်လီၤလးဒိၣ်န့ၢ်အါ န့ၢ်ဒံးအဝဲတဂၤအံၤမၤတ့ၢ်ဝဲန့ၣ်ဧါ.”

³²ပှၤဖၤရံၤၡဲတဖၣ်နၢ်ဟူပှၤဂီၢ်မုၢ်ကတိၤကသွံကသွါတၢ် ဘၣ်ဃးယ့ၣ်ၡူးအဂ့ၢ်အဃိ, အဝဲသ့ၣ်ဒီးပှၤလုၢ်တၢ်အခိၣ် အဒိၣ်တဖၣ်မၢလီၤတၢ်လုၢ်ဟံၣ်အပှၤပၢၤတၢ်ဖိတနီၤလၢ ကလဲၤဖီၣ်န့ၢ်ယ့ၣ်ၡူးအဂီၢ်လီၤ.

³³ယ့ၣ်ၡူးစံးဝဲဒၣ်, “ယကအိၣ်ဒီးသုတစိၢ်တလီၢ်ဝံၤဒီး ယကက့ၤက့ၤဆူပှၤလၢအမၢလီၤယၤတဂၤအအိၣ်န့ၣ်လီၤ.

³⁴သုကဃုယၤ, ဘၣ်ဆၣ်သုတထံၣ်န့ၢ်ယၤဘၣ်. အဂ့ၢ်မ့ၢ်လၢတၢ်လီၢ်လၢယကအိၣ်န့ၣ်, သုလဲၤတသ့ဘၣ်အဃိလီၤ.”

³⁵ပှၤယူဒၤဖိအခိၣ်အနၢ်တဖၣ်စံးကတိၤလိာ်သးတဂၤဒီးတဂၤ, “ပထံၣ်အီၤတသ့ဘၣ်န့ၣ်, မ့ၢ်အဝဲကလဲၤဝဲဆူလဲၣ်. မ့ၢ်အဝဲကလဲၤဆူပှၤကြံးခ် ဖိအဝ့ၢ်တဖၣ်ဖဲပပှၤကလုာ်အိၣ်ဝဲဒီး သိၣ်လိသီလိပှၤကြံးခ်ဖိတဖၣ်န့ၣ်ဧါ.

³⁶အဝဲစံးဝဲလၢပကဃုထံၣ်အီၤဘၣ်ဆၣ်ပတထံၣ်န့ၢ်အီၤဘၣ်. ဒီးတၢ်လီၢ်လၢအဝဲကအိၣ်န့ၣ်ပလဲၤတသ့ဘၣ်. အတၢ်ကတိၤအံၤအခီပညီမ့ၢ်တၢ်မနုၤလဲၣ်.”

³⁷ဒီးလၢဘူၣ်လၢခံကတၢၢ်တနံၤ ဒီးအကါဒိၣ်ကတၢၢ်တနံၤ န့ၣ်, ယ့ၣ်ၡူးဆၢထၢၣ်ဒီးကတိၤတၢ်လၢအကလုၢ်ဖးဒိၣ်ဒီးစံးဝဲ, “ပှၤတဂၤလၢ်လၢ်လၢတၢ်သူအသးလၢထံန့ၣ်မ် အဟဲဆူယအိၣ်ဒီးအီထံတက့ၢ်.”

³⁸ဒ်တၢ်ကွဲးအသးစံးဝဲအသိး, “ပှၤတဂၤလၢ်လၢ်လၢအစူၢ်က့ၤနာ် က့ၤယၤန့ၣ်, ထံမူကျိတဖၣ်ကယွၤလီၤလၢအသးပူၤလီၤ.”

³⁹ယ့ၣ်ၡူးစံးတၢ်အံၤဘၣ်ဃးဒီးယွၤအသးလၢ ပှၤလၢအစူၢ်က့ၤနာ်က့ၤအီၤတဖၣ်ကဒိးန့ၢ်ဘၣ်ဝဲန့ၣ်လီၤ. အကတီၢ်ဖဲန့ၣ်, ယွၤအသးတဘၣ်တၢ်ဟ့ၣ်လီၤအီၤဒံးဘၣ်န့ၣ်, မ့ၢ်လၢယ့ၣ်ၡူးတဘၣ်တၢ်ဒုးဂဲၤထၢၣ်အီၤဆူတၢ်လၤ ကပီၤဒံးဘၣ်အဃိလီၤ.

⁴⁰ပှၤအိၣ်ဝဲတနီၤလၢပှၤဂီၢ်မုၢ်အကျါနၢ်ဟူယ့ၣ်ၡူးအတၢ် ကတိၤဒီးစံး, “ပှၤတဂၤအံၤမ့ၢ်နီၢ်နီၢ်ဝံတဂၤန့ၣ်လီၤ.”

⁴¹အဂၤတနီၤစံးဝဲ, “အဝဲဒၣ်မ့ၢ်ခရံာ်န့ၣ်လီၤ.” ဘၣ်ဆၣ်ပှၤအဂၤတဖၣ်စံးဝဲ, “ခရံာ်တဟဲထီၣ်ဝဲဒၣ်လၢကီၢ် ကၤလံၤလါန့ၣ်ဘၣ်.

⁴²တၢ်ကွဲးအသးစံးဝဲဒၣ်လၢခရံာ်ကမ့ၢ်ပှၤဟဲလီၤစၢၤလၢ စီၤပၤဒၤဝံးဒီးကအိၣ်ဖျဲၣ်ထီၣ်လၢဝ့ၢ်ဘ့ၤသလ့ဃ့ၣ်, ဝ့ၢ်လၢစီၤပၤဒၤဝံးအိၣ်ဝဲန့ၣ်လီၤ.”

⁴³အန့ၣ်သတးဒီး, တၢ်လီၤမုၢ်လီၤဖးအိၣ်ထီၣ်ဝဲလၢပှၤဂီၢ်မုၢ် အကျါလၢယ့ၣ်ၡူးအဃိလီၤ.

⁴⁴ပှၤတနီၤအဲၣ်ဒိးဖီၣ်အီၤဘၣ်ဆၣ်ဒီးပှၤတထိးဘူးအီၤနီတဂၤ ဘၣ်န့ၣ်လီၤ.

⁴⁵ဖဲတၢ်လုၢ်ဟံၣ်အပှၤပၢၤတၢ်ဖိတဖၣ်က့ၤကဒါက့ၤဝဲန့ၣ်, ပှၤလုၢ်တၢ်အခိၣ်အဒိၣ်တဖၣ် ဒီးပှၤဖၤရံၤၡဲတဖၣ်သံကွၢ် အဝဲသ့ၣ်, “ဘၣ်မနုၤအဃိသုတဟဲက့ၤဖီၣ်အီၤန့ၣ်လဲၣ်.”

⁴⁶တၢ်လုၢ်ဟံၣ်အပှၤပၢၤတၢ်ဖိတဖၣ်စံးဆၢတၢ်ဒီးစံးဝဲ, “ပှၤကတိၤတၢ်ဒ်ပှၤတဂၤအံၤအသိးတအိၣ်နီတဂၤဒံးဘၣ်.”

⁴⁷အန့ၣ်ဒီး ပှၤဖၤရံၤၡဲတဖၣ်သံကွၢ်အဝဲသ့ၣ်, “မ့ၢ်အဝဲဆှၢကမၣ် သုစ့ၢ်ကီးလံဧါ.

⁴⁸ခိၣ်နၢ်အကျါတဂၤဂၤ, မ့တမ့ၢ်ပှၤဖၤရံၤၡဲအကျါတဂၤဂၤ စူၢ်က့ၤနာ်က့ၤအီၤန့ၣ်, မ့ၢ်သုနၢ်ဟူဘၣ်တဘျီဘျီလံဧါ.

⁴⁹ပှၤဂီၢ်မုၢ်အံၤတသ့ၣ်ညါစီၤမိၤၡ့အတၢ်သိၣ်တၢ်သီဘၣ် အဃိဒီး, ဘၣ်တၢ်ဆိၣ်အၢလၢကစၢ်ယွၤလီၤ.”

⁵⁰စီၤနံၤကဒ့မူးလၢအမ့ၢ်ပှၤဖၤရံၤၡဲအကျါတဂၤလၢ အမ့ၢ်ပှၤတဂၤဃီလၢအလဲၤဃုထံၣ်ယ့ၣ်ၡူးလၢအပူၤကွံာ်န့ၣ်, အိၣ်ဖဲန့ၣ်စ့ၢ်ကီးလီၤ. အဝဲစံးဘၣ်ပှၤဂၤတဖၣ်,

⁵¹“မ့မ့ၢ်ဒ်ပတၢ်သိၣ်တၢ်သီအသိးန့ၣ်, တချုးဒံးဘၣ်လၢပနၢ်ဟူဆိပှၤတဂၤန့ၣ်အတၢ်ကတိၤဒီး ဃုထံၣ်သ့ၣ်ညါဆိအဝဲမၤတ့ၢ်လံတၢ်မနုၤလဲၣ်န့ၣ်ဒီး, ပစံၣ်ညီၣ်ဃၣ်အီၤတသ့ဘၣ်.”

⁵²အဝဲသ့ၣ်စံးဆၢတၢ်ဒီးစံးဝဲ, “မ့မ့ၢ်ဒ်န့ၣ်ဒီး, နမ့ၢ်ပှၤလၢအဟဲလၢကီၢ်ကၤလံၤလါစ့ၢ်ကီးဧါ. ဃုမၤလိက့ၤတၢ်ကွဲးအသးစီဆှံတဖၣ်ဒီးနကထံၣ် သ့ၣ်ညါလၢဝံတဟဲထီၣ်လၢကီၢ်ကၤလံၤလါအပူၤနီတဂၤနီ တဘျီဘၣ်န့ၣ်လီၤ.”

⁵³ထဲန့ၣ်ဒီး, ပှၤကိးဂၤဒဲးက့ၤက့ၤဆူအဟံၣ်ဒၣ်ဝဲလီၤ. ဒီးယ့ၣ်ၡူးလဲၤဆူကစၢၢ်သ့ၣ်စၤယံးလီၤ.