Read S'gaw Karen လံာ်ယိၤဟၣ် 8 Bible Online

လံာ်ယိၤဟၣ် 8 - S'gaw Karen bible

လံာ်ယိၤဟၣ် 8

¹[ဒီးလၢမုၢ်ဆ့ၣ်ထီၣ်ဂီၤဂီၤန့ၣ်, ယ့ၣ်ၡူးက့ၤကဒါက့ၤဆူ တၢ်လုၢ်ဟံၣ်အပူၤန့ၣ်လီၤ.

²ပှၤဂီၢ်မုၢ်ခဲလၢာ်ဟဲအိၣ်ဝးတရံးအီၤ, ဒီးအဝဲဆ့ၣ်နီၤဒီးသိၣ်လီၤသီလီၤအဝဲသ့ၣ်န့ၣ်လီၤ.

³ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ် ဒီးပှၤဖၤရံၤၡဲတဖၣ်ဟဲဆှၢနုာ်ပိာ်မုၣ်တဂၤလၢ အဘၣ်တၢ်ဖီၣ်န့ၢ်အီၤဖဲအအဲၣ်ဘၢတၢ်အဖၢမုၢ်, ဒီးအဝဲသ့ၣ်မၢပိာ်မုၣ်တဂၤအံၤဆၢထၢၣ်လၢပှၤ ခဲလၢာ်အမဲာ်ညါလီၤ.

⁴အဝဲသ့ၣ်စံးဘၣ်ယ့ၣ်ၡူး, “သရၣ်ဧၢ, ပိာ်မုၣ်တဂၤအံၤဘၣ်တၢ်ဖီၣ်န့ၢ်အီၤဖဲအအဲၣ်ဘၢတၢ်အခါ ဒၣ်လဲာ်လီၤ.

⁵လၢပတၢ်သိၣ်တၢ်သီအပူၤ, စီၤမိၤၡ့မၤလိာ်ဝဲလၢပိာ်မုၣ်ဒ်သိးအံၤ တဂၤကဘၣ်တၢ်ကွံာ်သံအီၤလၢလၢၢ်လီၤ. ခဲအံၤ, နကစံးဒ်လဲၣ်.”

⁶အဝဲသ့ၣ်စံးတၢ်ဒ်အံၤမ့ၢ်ဒ်သိးကဖီၣ်န့ၢ်ယ့ၣ်ၡူးလၢအတၢ်ကတိၤ ဒၣ်ဝဲ, ဒီးပာ်တၢ်ကမၣ်လၢအလိၤကသ့အဂီၢ်လီၤ. ဘၣ်ဆၣ်ယ့ၣ်ၡူးသကူးလီၤအသးဝံၤဒီးကွဲးလံာ်လၢဟီၣ်ခိၣ်လိၤ လၢအစုမုၢ်စုနၢန့ၣ်လီၤ.

⁷ဖဲအဝဲသ့ၣ်ဆၢထၢၣ်ဖဲန့ၣ်ဒီးသံကွၢ်အီၤတၢ်သံကွၢ်တဖၣ် အခါန့ၣ်, ယ့ၣ်ၡူးဝံၢ်ထီၣ်က့ၤအသးဒီးစံးဘၣ်အဝဲသ့ၣ်, “လၢသုဝဲအကျါတဂၤဂၤမ့ၢ်တမၤတၢ်ဒဲးဘးနီတမံၤဘၣ်ဒီး, မ်အကကွံာ်ဆိပိာ်မုၣ်အံၤလၢလၢၢ်တဖျၢၣ်တက့ၢ်.”

⁸အန့ၣ်ဝံၤ, ယ့ၣ်ၡူးသကူးလီၤကဒီးအသးဒီးကွဲးလံာ်လၢဟီၣ်ခိၣ်လိၤန့ၣ် လီၤ.

⁹ဖဲအဝဲသ့ၣ်နၢ်ဟူတၢ်အံၤဝံၤဒီးဟးထီၣ်ကွံာ်ဝဲတဂၤဘၣ်တဂၤ, ပှၤလၢအသးပှၢ်တဖၣ်ဟးထီၣ်လၢညါန့ၣ်လီၤ. ယ့ၣ်ၡူးအိၣ်တီၢ်ထဲတဂၤဧိၤဒီးပိာ်မုၣ်န့ၣ်အိၣ်ဆၢထၢၣ်ဒံးဒၣ် ဖဲန့ၣ်လီၤ.

¹⁰ယ့ၣ်ၡူးဝံၢ်ထီၣ်အသးဒီးစံးဘၣ်ပိာ်မုၣ်န့ၣ်, “နီၢ်ဧၢ, အဝဲသ့ၣ်အိၣ်ဖဲလဲၣ်. ပှၤလၢအကစံၣ်ညီၣ်နၤတအိၣ်တီၢ်နီ တဂၤလၢၤဘၣ်ဧါ.”

¹¹ပိာ်မုၣ်န့ၣ်စံးဆၢအီၤ, “ကစၢ်ဧၢ, တအိၣ်နီတဂၤလၢၤဘၣ်.” ဒီးယ့ၣ်ၡူးစံးဘၣ်အီၤ, “မ့မ့ၢ်ဒ်န့ၣ်ဒီးယတစံၣ်ညီၣ်နၤစ့ၢ်ကီး ဘၣ်. က့ၤက့ၤဒီးတဘၣ်မၤလၢၤတၢ်ဒဲးဘးတဂ့ၤ.”]

¹²ယ့ၣ်ၡူးကတိၤကဒီးတၢ်ဒီးပှၤဖၤရံၤၡဲတဖၣ်ဒီးစံးဝဲ, “ယဲဒၣ်အံၤယမ့ၢ်ဟီၣ်ခိၣ်အတၢ်ကပီၤလီၤ. ပှၤလၢအပိာ်ယခံ တဂၤလၢ်လၢ်ကအိၣ်ဒီးတၢ်မူအတၢ်ကပီၤဒီးတဟးဘၣ်ဝဲ လၢတၢ်ခံးကျါနီတဘျီဘၣ်.”

¹³အန့ၣ်ဒီးပှၤဖၤရံၤၡဲတဖၣ်စံးဘၣ်အီၤ, “ခဲအံၤနအုၣ်နသးလၢနကစၢ်ဒၣ်နဲအဂ့ၢ်လီၤ. ဒီးတၢ်လၢနစံးန့ၣ်, တၢ်တူၢ်လိာ်အီၤဒ်တၢ်အုၣ်အသးနီၢ်နီၢ်တသ့ဘၣ်.”

¹⁴ယ့ၣ်ၡူးစံးဆၢအဝဲသ့ၣ်, “ယအုၣ်ယသးလၢယကစၢ်ဒၣ်ယဲအဂီၢ် သနာ်က့, တၢ်လၢယစံးန့ၣ်မ့ၢ်ဝဲတီဝဲလီၤ. အဂ့ၢ်ဒ်လဲၣ်န့ၣ်, ယသ့ၣ်ညါယဟဲလၢလဲၣ်ဒီးယကလဲၤဆူလဲၣ်န့ၣ်လီၤ. မ့မ့ၢ်သုဝဲသ့ၣ်အံၤသုတသ့ၣ်ညါယဟဲလၢလဲၣ်ဒီးယကလဲၤဆူလဲၣ် န့ၣ်ဘၣ်.

¹⁵သုစံၣ်ညီၣ်တၢ်ဒ်ပှၤဟီၣ်ခိၣ်ဖိအကျဲအသိးလီၤ. ယဲ, ယတစံၣ်ညီၣ်ပှၤနီတဂၤဘၣ်.

¹⁶ဘၣ်ဆၣ်ယမ့ၢ်ဘၣ်စံၣ်ညီၣ်တၢ်ဒီး, ယတၢ်စံၣ်ညီၣ်ကမ့ၢ်ဝဲတီဝဲလီၤ. အဂ့ၢ်မ့ၢ်လၢယတစံၣ်ညီၣ်တၢ်ထဲတဂၤဧိၤဘၣ်ဒီးပၢ်လၢအမၢလီၤ ယၤအံၤအိၣ်ဒီးယၤအဃိလီၤ.

¹⁷တၢ်ကွဲးအသးလၢသုတၢ်သိၣ်တၢ်သီအပူၤ, ဖဲပှၤခံဂၤအတၢ်အုၣ်အသးဃူဃီၣ်လီၤပလိာ်ဝဲန့ၣ်, တၢ်လၢအဝဲသ့ၣ်စံးန့ၣ်, မ့ၢ်ဝဲတီဝဲလီၤ (သိၣ်သီ ၁၉:၁၅).

¹⁸ယအုၣ်ယသးလၢယကစၢ်ဒၣ်ယဲအဂီၢ်, ဒီးပၢ်လၢအမၢလီၤယၤန့ၣ်, အုၣ်စ့ၢ်ကီးအသးလၢယဂီၢ်လီၤ.”

¹⁹အဝဲသ့ၣ်သံကွၢ်အီၤ, “နပၢ်အိၣ်ဖဲလဲၣ်.” ယ့ၣ်ၡူးစံးဆၢတၢ်ဒီးစံးဝဲ, “သုတသ့ၣ်ညါယၤမ့ၢ်ဂ့ၤယပၢ်မ့ၢ်ဂ့ၤန့ၣ်ဘၣ်. သုမ့ၢ်သ့ၣ်ညါယၤန့ၣ် သုကသ့ၣ်ညါယပၢ်စ့ၢ်ကီးလီၤ.”

²⁰ယ့ၣ်ၡူးစံးတၢ်တဖၣ်အံၤဖဲအသိၣ်လီၤသီလီၤတၢ်လၢ တၢ်လုၢ်ဟံၣ်ပူၤဖဲတၢ်ပာ်ဖှိၣ်စ့အလီၢ်ဒီးမ့ၢ်လၢအဆၢ ကတီၢ်နၣ်ရံၣ်တဘၣ်ဒံးဘၣ်အဃိ, ပှၤတဟဲဟံးဃာ်အီၤနီ တဂၤန့ၣ်ဘၣ်.

²¹ယ့ၣ်ၡူးစံးဘၣ်ကဒီးအဝဲသ့ၣ်, “ယကဟးထီၣ်လဲၤတၢ်, ဒီးသုကဃုယၤဘၣ်ဆၣ်သုကသံလၢသုတၢ်ဒဲးဘးတဖၣ် အပူၤလီၤ. တၢ်လီၢ်လၢယလဲၤန့ၣ်သုလဲၤတသ့ဘၣ်.”

²²မၤသးဒ်န့ၣ်ဒီးပှၤယူဒၤဖိအခိၣ်အနၢ်တဖၣ်စံးဝဲ, “အဝဲစံးလၢတၢ်လီၢ်လၢအလဲၤဝဲန့ၣ်, ပလဲၤတသ့ဘၣ်. တၢ်အံၤအခီပညီမ့ၢ်အဝဲကမၤသံလီၤအသးန့ၣ်ဧါ.”

²³ယ့ၣ်ၡူးစံးဆၢအဝဲသ့ၣ်, “သုဘၣ်ဃးဒီးတၢ်လၢလာ်အံၤ, မ့မ့ၢ်ယဲယဘၣ်ဃးဒီးတၢ်လၢထးလီၤ. သုဘၣ်ဃးဒီးဟီၣ်ခိၣ်အံၤ, မ့မ့ၢ်ယဲယတဘၣ်ဃးဒီးဟီၣ်ခိၣ်အံၤဘၣ်.

²⁴လၢတၢ်န့ၣ်အဃိ, ယစံးဘၣ်သုလၢသုကသံလၢသုတၢ်ဒဲးဘးတဖၣ် အပူၤလီၤ. ဒီးသုမ့ၢ်တနာ်လၢ ‘ယမ့ၢ်တၢ်လၢယမ့ၢ်’ ဘၣ်ဒီး သုကသံလၢသုတၢ်ဒဲးဘးတဖၣ်အပူၤလီၤ.”

²⁵အဝဲသ့ၣ်သံကွၢ်အီၤ, “နမ့ၢ်မတၤလဲၣ်.” ယ့ၣ်ၡူးစံးဆၢ အဝဲသ့ၣ်, “မ့ၢ်ဒ်ယစံးတ့ၢ်သုလၢအခီၣ်ထံးလံၤလံၤအသိးန့ၣ်လီၤ.

²⁶ယကတိၤတၢ်လၢသုဂ့ၢ်ဒီးယစံၣ်ညီၣ်တၢ်လၢသုဂ့ၢ်အလီၢ် အိၣ်အါမးလီၤ. မ့မ့ၢ်ပှၤလၢအမၢလီၤယၤတဂၤမ့ၢ်ပှၤအတီအလိၤ ဒီးယစံးဘၣ်တဲဘၣ်ပှၤဟီၣ်ခိၣ်ဖိထဲဒၣ်တၢ်လၢယနၢ်ဟူဘၣ် တ့ၢ်လၢအအိၣ်လီၤ.”

²⁷အဝဲသ့ၣ်တနၢ်ပၢၢ်ဝဲဒၣ်လၢယ့ၣ်ၡူးကတိၤတၢ်ဒီးအဝဲသ့ၣ်ဘၣ်ဃးဒီးပၢ် အဂ့ၢ်န့ၣ်ဘၣ်.

²⁸မၤသးဒ်န့ၣ်ဒီးယ့ၣ်ၡူးစံးဘၣ်အဝဲသ့ၣ်, “တုၤသုယူာ်ထီၣ် ပှၤကညီဖိခွါအံၤဒီး, သုကသ့ၣ်ညါလၢ ‘ယမ့ၢ်တၢ်လၢယမ့ၢ်’ လီၤ. တုၤနုၤတစုသုကသ့ၣ်ညါလၢယတမၤတၢ်လၢယစိ ကမီၤဒၣ်ယဲနီတမံၤဘၣ်. မ့မ့ၢ်တခီ, ယစံးကတိၤထဲတၢ်လၢ ယပၢ်သိၣ်လိယၤလၢယကစံးကတိၤအီၤတဖၣ်ဧိၤန့ၣ်လီၤ.

²⁹ဒီးပှၤလၢအမၢလီၤယၤတဂၤန့ၣ်, အိၣ်ဒီးယၤလီၤ. အဝဲတပာ်တ့ၢ်ယၤထဲတဂၤဧိၤဘၣ်. အဂ့ၢ်မ့ၢ်လၢယမၤအတၢ်ဘၣ်အသးထီဘိတထံၣ်ဃီအဃိလီၤ.”

³⁰ပှၤအါဂၤလၢအနၢ်ဟူယ့ၣ်ၡူးစံးကတိၤတၢ်တဖၣ်အံၤန့ၣ်, စူၢ်က့ၤနာ်က့ၤအီၤလီၤ.

³¹မၤသးဒ်န့ၣ်ဒီး, ယ့ၣ်ၡူးစံးဘၣ်ပှၤယူဒၤဖိလၢအစူၢ်က့ၤနာ်က့ၤအီၤ တဖၣ်, “သုမ့ၢ်စူၢ်ယတၢ်သိၣ်လိသီလိဒီးသုမ့ၢ်နီၢ်နီၢ်ယပျဲၢ် ယဘီၣ်တဖၣ်လီၤ.

³²သုကသ့ၣ်ညါတၢ်မ့ၢ်တၢ်တီ, ဒီးတၢ်မ့ၢ်တၢ်တီန့ၣ်ကမၤထူၣ်ဖျဲးသုလီၤ.”

³³အဝဲသ့ၣ်စံးဆၢအီၤ, “ပမ့ၢ်စီၤအၤဘြၤဟၣ်အစၢၤအသွဲၣ်တဖၣ် ဒီးပတကဲပှၤဂၤအကုၢ်နီတဘျီဒံးဘၣ်ဒီးနစံးလၢ ‘တၢ်ကမၤထူၣ်ဖျဲးသု’ န့ၣ်, နပာ်နဲအခီပညီဒ်လဲၣ်.”

³⁴ယ့ၣ်ၡူးစံးဘၣ်အဝဲသ့ၣ်, “ယစံးဘၣ်သုတီတီလိၤလိၤလီၤ. ပှၤတဂၤလၢ်လၢ်လၢအမၤတၢ်ဒဲးဘးန့ၣ်, မ့ၢ်တၢ်ဒဲးဘးအကုၢ် အပှၤလီၤ.”

³⁵ဒီးကုၢ်န့ၣ်တဘၣ်ဃးဒီးဒူၣ်ဖိထၢဖိတဒူၣ်ထီဘိတထံၣ် ဃီဘၣ်. မ့မ့ၢ်ဖိခွါတဂၤန့ၣ်, ဘၣ်ဃးဖဲန့ၣ်လီၤစိၤလီၤထီလီၤ.

³⁶ဖိခွါမ့ၢ်မၤထူၣ်ဖျဲးသုဒီးသုကထူၣ်ဖျဲးနီၢ်နီၢ်လီၤ.

³⁷ယသ့ၣ်ညါလၢသုမ့ၢ်စီၤအၤဘြၤဟၣ်အစၢၤအသွဲၣ်တဖၣ် လီၤ. အန့ၣ်ဒၣ်လဲာ်သုဂုာ်ကျဲးစၢးမၤသံယၤအဂ့ၢ်မ့ၢ်လၢ သုတတူၢ်လိာ်ယတၢ်သိၣ်လိသီလိအဃိလီၤ.

³⁸ယကတိၤတၢ်ဘၣ်ဃးတၢ်လၢယပၢ်ဒုးနဲၣ်တ့ၢ်ယၤ, မ့မ့ၢ်သုမၤတၢ်လၢသုပၢ်စံးဘၣ်တ့ၢ်သုန့ၣ်လီၤ.”

³⁹အဝဲသ့ၣ်စံးဆၢအီၤ, “ပပၢ်မ့ၢ်စီၤအၤဘြၤဟၣ်လီၤ.” ဒီးယ့ၣ်ၡူးစံးဘၣ်အီၤ, “သုမ့မ့ၢ်နီၢ်နီၢ်စီၤအၤဘြၤဟၣ် အဖိတဖၣ်ဒီးသုကမၤတၢ်တမံၤဃီလၢအဝဲမၤတ့ၢ်ဝဲတဖၣ်လီၤ.

⁴⁰တၢ်လၢယမၤန့ၣ်, မ့ၢ်တၢ်စံးဘၣ်တဲဘၣ်သုတၢ်မ့ၢ်တၢ်တီလၢ ယနၢ်ဟူလၢကစၢ်ယွၤအအိၣ်န့ၣ်လီၤ. အန့ၣ်ဒၣ်လဲာ်, သုဂုာ်ကျဲးစၢးမၤသံယၤလီၤ. စီၤအၤဘြၤဟၣ်တမၤတၢ်ဒ်သိး အံၤန့ၣ်ဘၣ်.

⁴¹သုမၤတၢ်လၢသုပၢ်မၤတ့ၢ်လံဝဲန့ၣ်လီၤ.” အဝဲသ့ၣ်စံးဆၢတၢ်ဒီးစံးဝဲ, “ပအိၣ်ဒီးပပၢ်ထဲတဂၤဧိၤလၢအမ့ၢ် ကစၢ်ယွၤအကစၢ်ဒၣ်ဝဲဒီးပမ့ၢ်အဖိနီၢ်နီၢ်တဖၣ်န့ၣ်လီၤ.”

⁴²ယ့ၣ်ၡူးစံးဘၣ်အဝဲသ့ၣ်, “ကစၢ်ယွၤမ့မ့ၢ်သုပၢ်နီၢ်နီၢ်ဒီးသု ကအဲၣ်ယၤလီၤ. အဂ့ၢ်မ့ၢ်လၢယဟဲလၢကစၢ်ယွၤအအိၣ်ဒီး ခဲအံၤယအိၣ်ဖဲအံၤလီၤ. ယတဟဲဖဲယသးဒၣ်ယဲဘၣ်. မ့မ့ၢ်အဝဲမၢလီၤယၤလီၤ.

⁴³ဘၣ်မနုၤအဃိသုတနၢ်ပၢၢ်တၢ်လၢယစံးကတိၤန့ၣ်လဲၣ်. တၢ်အဝဲအံၤမ့ၢ်ဒၣ်လၢတၢ်လၢယစံးဘၣ်တဲဘၣ်သုန့ၣ်, သုတူၢ်အီၤတပှဲၤဘၣ်အဃိလီၤ.

⁴⁴သုမ့ၢ်သုပၢ်မုၣ်ကီၤလံၢ်အဖိတဖၣ်ဒီးသုသးအိၣ်မၤအတၢ်ဘၣ် အသးန့ၣ်လီၤ. လၢအခီၣ်ထံးလံၤလံၤန့ၣ်, အဝဲမ့ၢ်ပှၤမၤသံပှၤကညီဒီးတဆၢထၢၣ်လၢ တၢ်မ့ၢ်တၢ်တီအဂီၢ်နီတဘျီဘၣ်, အဂ့ၢ်မ့ၢ်လၢ တၢ်မ့ၢ်တၢ်တီတအိၣ်ဘၣ်လၢအပူၤအဃိလီၤ. တုၤအဝဲကတိၤတၢ်ကဘျံးကဘျၣ်ဒီးမ့ၢ်ဒၣ်အဝဲမၤတၢ်လၢ အဝဲမၤညီနုၢ်ဝဲန့ၣ်လီၤ. အဂ့ၢ်မ့ၢ်လၢအဝဲမ့ၢ်ပှၤကတိၤကဘျံး ကဘျၣ်တၢ်တဂၤဒီးမ့ၢ်တၢ်ကဘျံးကဘျၣ်ခဲလၢာ်အပၢ်အဃိလီၤ.

⁴⁵ဘၣ်ဆၣ်မ့ၢ်ယစံးဘၣ်တဲဘၣ်သုတၢ်မ့ၢ်တၢ်တီအဃိသတး ဒီး, သုတစူၢ်က့ၤနာ်က့ၤယၤဘၣ်.

⁴⁶မတၤတဂၤလၢသုကျါအုၣ်အသးလၢယမၤတၢ်ဒဲးဘးကသ့ န့ၣ်လဲၣ်. ယမ့ၢ်ကတိၤတၢ်မ့ၢ်တၢ်တီဒီး, ဘၣ်မနုၤအဃိလၢသုတစူၢ်က့ၤနာ်က့ၤယၤန့ၣ်လဲၣ်.

⁴⁷ပှၤလၢအဟဲလၢကစၢ်ယွၤအအိၣ်န့ၣ်, ဒိကနၣ်ကစၢ်ယွၤကလုၢ် ကထါတဖၣ်လီၤ. မ့မ့ၢ်သုဝဲတခီ, သုတဟဲလၢကစၢ်ယွၤအအိၣ်ဘၣ်အဃိသတးဒီး, သုတဒိကနၣ်တၢ်ဘၣ်.”

⁴⁸ပှၤယူဒၤဖိတဖၣ်စံးဆၢတၢ်ဒီးစံးဘၣ်အီၤ, “ပစံးလၢနမ့ၢ် ပှၤၡၤမရံဖိတဂၤဒီးတၢ်နါအိၣ်လၢနပူၤန့ၣ်, မ့ၢ်အတဘၣ် ဘၣ်ဧါ.”

⁴⁹ယ့ၣ်ၡူးစံးဆၢဝဲ, “တၢ်နါတအိၣ်လၢယပူၤဘၣ်. ယယူးယီၣ်ယပၢ်, ဘၣ်ဆၣ်သုတယူးယီၣ်ယၤဘၣ်.

⁵⁰ယတဃုတၢ်လၤကပီၤလၢယဂီၢ်ဒၣ်ယဲဘၣ်. ဘၣ်ဆၣ်ပှၤလၢအဃုတၢ်အံၤဒီးစံၣ်ညီၣ်အိၣ်ပှိၤယၤန့ၣ် အိၣ်ဝဲတဂၤလီၤ.

⁵¹ယစံးဘၣ်တဲဘၣ်သုတီတီလိၤလိၤ, ပှၤလၢအတိၢ်န့ၢ်ယကလုၢ်ကထါတဂၤလၢ်လၢ်န့ၣ် တသံနီတဘျီဘၣ်.”

⁵²အဝဲသ့ၣ်စံးဘၣ်အီၤ, “ခဲအံၤပသ့ၣ်ညါလီၤတံၢ်လၢတၢ်နါ အိၣ်လၢနပူၤလီၤ. စီၤအၤဘြၤဟၣ်သံလံ, ဒီးဝံတဖၣ်သံလံ. အန့ၣ်ဒၣ်လဲာ် နစံးလၢ ‘ပှၤလၢအတိၢ်န့ၢ်ယကလုၢ်ကထါန့ၣ် တသံနီတဘျီဘၣ်.’

⁵³ပပၢ်စီၤအၤဘြၤဟၣ်သံဝဲလံ. မ့ၢ်နစံးလီၤနသးလၢနဒိၣ်န့ၢ် စီၤအၤဘြၤဟၣ်န့ၣ်ဧါ. ဒီးဝံသ့ၣ်တဖၣ်သံဝဲစ့ၢ်ကီးလံ. နစံးလီၤနသးလၢနမ့ၢ်မတၤတဂၤလဲၣ်.”

⁵⁴ယ့ၣ်ၡူးစံးဆၢတၢ်ဒီးစံးဝဲ, “ယမ့ၢ်ဘၣ်မၤလၤကပီၤလီၤ ယသးဒၣ်ယဲဒီး, တၢ်လၤကပီၤအဝဲန့ၣ်တမ့ၢ်လၢအလုၢ်အပှ့ၤ ကအိၣ်ဘၣ်. ပှၤလၢအမၤလၤကပီၤယၤတဂၤန့ၣ်မ့ၢ်ယပၢ်, ပှၤတဂၤဃီလၢသုစံးလၢအမ့ၢ်သုကစၢ်ယွၤန့ၣ်လီၤ.

⁵⁵သုတသ့ၣ်ညါတ့ၢ်အီၤနီတစုဘၣ်. မ့မ့ၢ်ယဲဒၣ်ယသ့ၣ်ညါ အီၤလီၤ. ယမ့ၢ်စံးလၢယတသ့ၣ်ညါအီၤဘၣ်ဒီး, ယကကဲထီၣ်ပှၤလီတၢ်ဒ်သုဝဲအသိးလီၤ. ဘၣ်ဆၣ်ယသ့ၣ်ညါ အီၤဒီးယဒိကနၣ်အကလုၢ်ကထါလီၤ.

⁵⁶သုပၢ်စီၤအၤဘြၤဟၣ်သူၣ်ခုသးခုလၢအကထံၣ်ဘၣ်ယတၢ်ဟဲ အဆၢကတီၢ်, ဒီးထံၣ်ဘၣ်ဝဲဒီးသူၣ်ခုသးခုဝဲလီၤ.”

⁵⁷ပှၤယူဒၤဖိတဖၣ်စံးဘၣ်အီၤ, “နသးတအိၣ်အနံၣ်ယဲၢ်ဆံဒံးဘၣ်ဒီး မ့ၢ်နထံၣ်ဘၣ်စီၤအၤဘြၤဟၣ်လံဧါ.”

⁵⁸ယ့ၣ်ၡူးစံးဆၢတၢ်ဒီးစံးဝဲ, “ယစံးဘၣ်တဲဘၣ်သုတီတီလိၤ လိၤ, တချုးလၢစီၤအၤဘြၤဟၣ်အိၣ်ဖျဲၣ်ထီၣ်ဒံးဘၣ်ဒီးယမ့ၢ် တၢ်လၢယမ့ၢ်လီၤ.”

⁵⁹ထဲန့ၣ်ဒီး, အဝဲသ့ၣ်ထၢထီၣ်လၢၢ်တဖၣ်လၢကကွံာ်အီၤ အဂီၢ်, ဘၣ်ဆၣ်ယ့ၣ်ၡူးပာ်ခူသူၣ်အသးဒီး ဟးထီၣ်ကွံာ်လၢတၢ်လုၢ်ဟံၣ်အပူၤန့ၣ်လီၤ.