Read S'gaw Karen လံာ်ယိၤဟၣ် 9 Bible Online

လံာ်ယိၤဟၣ် 9 - S'gaw Karen bible

လံာ်ယိၤဟၣ် 9

¹ဖဲယ့ၣ်ၡူးလဲၤတၢ်အဖၢမုၢ်ဒီး, အဝဲထံၣ်ပှၤတဂၤလၢအမဲာ်ဘျီၣ်လၢအအိၣ်ဖျဲၣ်ထီၣ်လံၤလံၤ န့ၣ်လီၤ.

²အပျဲၢ်အဘီၣ်တဖၣ်သံကွၢ်အီၤ, “သရၣ်ဧၢ, ပှၤတဂၤအံၤအိၣ်ဖျဲၣ်ထီၣ်အမဲာ်ဘျီၣ်န့ၣ်, ဟဲအသးလၢမတၤအတၢ်ဒဲးဘးအဃိလဲၣ်. မ့ၢ်အတၢ်ဒဲးဘးဒၣ်ဝဲဧါ. မ့တမ့ၢ်, မ့ၢ်အမိၢ်အပၢ်အတၢ်ဒဲးဘးအဃိဧါ.”

³ယ့ၣ်ၡူးစံးဆၢတၢ်ဒီးစံးဝဲ, “အဝဲအတၢ်မဲာ်ဘျီၣ်န့ၣ်တဘၣ်ဃးလၢအတၢ်ဒဲးဘးမ့ၢ်ဂ့ၤ, အမိၢ်အပၢ်အတၢ်ဒဲးဘးမ့ၢ်ဂ့ၤန့ၣ်ဘၣ်. မ့ၢ်ဒၣ်လၢကစၢ်ယွၤအစိကမီၤကမၤတၢ်လၢအပူၤ ဒီးကဘၣ်တၢ်ထံၣ်န့ၢ်အီၤအဂီၢ်တခီန့ၣ်လီၤ.

⁴ဖဲမုၢ်ဆါခီအကတီၢ်အံၤ, ပကဘၣ်မၤပှၤလၢအမၢလီၤယၤ တဂၤအတၢ်မၤလီၤ. မုၢ်နၤကဟဲဝဲဖဲပှၤမၤတၢ်တသ့လၢၤနီ တဂၤဘၣ်.

⁵ဖဲယအိၣ်ဒံးလၢဟီၣ်ခိၣ်အံၤအပူၤဒီး, ယမ့ၢ်တၢ်ကပီၤလၢဟီၣ်ခိၣ် အဂီၢ်လီၤ.”

⁶ယ့ၣ်ၡူးကတိၤတၢ်အံၤဝံၤဒီး, အဝဲထူးပှဲာ်လီၤတၢ်လၢဟီၣ်ခိၣ် အလိၤဒီးကၢကပံာ်လၢအထူးပျ့ၤထံဝံၤဒီးပဲလီၤကပံာ်အံၤလၢပှၤ တဂၤအံၤအမဲာ်ချံအလိၤ,

⁷ဒီးစံးဘၣ်အီၤ, “လဲၤဒီးပျၢ်နမဲာ်လၢနိၣ်ၡံလိၤန့ၣ်တက့ၢ်.” (မံၤဝဲအံၤအခီပညီမ့ၢ်တၢ်မၢလီၤ) အန့ၣ်ဒီးပှၤတဂၤအံၤလဲၤဝဲဒီးပျၢ် အမဲာ်, ဒီးထံၣ်ထီၣ်က့ၤတၢ်ဒီးဟဲက့ၤဝဲလီၤ.

⁸ထဲန့ၣ်ဒီး, ပှၤလၢအဃၢၤတဖၣ်ဒီးပှၤအဂၤလၢအထံၣ်တ့ၢ် အဝဲဃ့အီၣ်တၢ်လၢညါတဖၣ်သံကွၢ်တၢ်ဒီးစံးဝဲ, “အဝဲအံၤတမ့ၢ်ပှၤတဂၤဃီလၢအညီနုၢ်ဆ့ၣ်နီၤဒီးဃ့အီၣ်တၢ် န့ၣ်ဘၣ်ဧါ.”

⁹ပှၤတနီၤစံးဝဲ, “မ့ၢ်အဝဲလီၤ.” ဘၣ်ဆၣ်အဂၤတနီၤစံးဝဲ, “တမ့ၢ်အဝဲဘၣ်. မ့ၢ်ပှၤလၢအလီၤဂာ်ဒီးအီၤတခီလီၤ.” အန့ၣ်ဒီး အဝဲအကစၢ်ဒၣ်ဝဲစံး, “ယမ့ၢ်ပှၤအဝဲန့ၣ်လီၤ.”

¹⁰အဝဲသ့ၣ်သံကွၢ်အီၤ, “နထံၣ်ထီၣ်က့ၤတၢ်အခဲအံၤန့ၣ်, ဟဲအသးလၢကျဲဒ်လဲၣ်.”

¹¹အဝဲဒၣ်စံးဆၢဝဲ, “ပှၤလၢပှၤကိးအီၤလၢယ့ၣ်ၡူးတဂၤကၢကပံာ်, ပဲလီၤဝဲလၢယမဲာ်ချံအလိၤ, ဒီးမၢယလဲၤပျၢ်ယမဲာ်လၢနိၣ်ၡံလိၤလီၤ. လၢတၢ်န့ၣ်အဃိယလဲၤယဲဒီးယပျၢ်ယမဲာ်ဝံၤတဘျီဃီ ယထံၣ်ထီၣ်က့ၤတၢ်န့ၣ်လီၤ.”

¹²အဝဲသ့ၣ်သံကွၢ်အီၤ, “အဝဲအိၣ်ဖဲလဲၣ်.” ဒီးအဝဲဒၣ်စံးဆၢဝဲ, “ယတသ့ၣ်ညါဘၣ်.”

¹³ဒီးအဝဲသ့ၣ်လဲၤဆှၢပှၤမဲာ်ဘျီၣ်တ့ၢ်တဂၤအံၤဆူ ပှၤဖၤရံၤၡဲတဖၣ်အအိၣ်န့ၣ်လီၤ.

¹⁴မုၢ်နံၤလၢယ့ၣ်ၡူးကၢကပံာ်ဒီးမၤဘျါက့ၤအီၤလၢအတၢ် မဲာ်ဘျီၣ်န့ၣ်, မ့ၢ်ပှၤယူဒၤဖိအမုၢ်အိၣ်ဘှံးနံၤန့ၣ်လီၤ.

¹⁵တုၤနုၤတစု, ပှၤဖၤရံၤၡဲတဖၣ်သံကွၢ်ကဒီးပှၤတဂၤအံၤ လၢအထံၣ်ထီၣ်က့ၤတၢ်ဒ်လဲၣ်အဂ့ၢ်န့ၣ်လီၤ. အဝဲစံးဆၢဝဲ, “ယ့ၣ်ၡူးပဲလီၤကပံာ်လၢယမဲာ်ချံအလိၤဝံၤ ယပျၢ်ယမဲာ်ဒီးခဲအံၤယထံၣ်ထီၣ်က့ၤတၢ်န့ၣ်လီၤ.”

¹⁶ပှၤဖၤရံၤၡဲတနီၤစံးဝဲ, “ပှၤတဂၤလၢအမၤတၢ်တမံၤအံၤ တမ့ၢ်ပှၤဟဲလၢကစၢ်ယွၤအအိၣ်ဘၣ်. အဂ့ၢ်မ့ၢ်လၢ အဝဲတစူၢ်မုၢ်အိၣ်ဘှံးနံၤအတၢ်သိၣ်တၢ်သီအဃိလီၤ.” မ့မ့ၢ်အဂၤတနီၤစံးဝဲ, “ပှၤတဂၤလၢအမ့ၢ်ပှၤတၢ်ဒဲးဘးဖိန့ၣ်, မၤတၢ်လီၤလးဒ်သိးအံၤတဖၣ်ကသ့ဝဲလၢကျဲဒ်လဲၣ်.” ဒီးတၢ်လီၤမုၢ်လီၤဖးအိၣ်ထီၣ်လၢအဝဲသ့ၣ်အသိးအကျါလီၤ.

¹⁷ပှၤဖၤရံၤၡဲတဖၣ်သံကွၢ်ကဒီးပှၤတဂၤအံၤ, “နစံးလၢအဝဲမၤဘျါက့ၤနၤလၢနတၢ်မဲာ်ဘျီၣ်လီၤ. ဂ့ၤလံ. နဲတခီနစံးလၢအဝဲအဂ့ၢ်ဒ်လဲၣ်.” အဝဲစံးဆၢဝဲ, “အဝဲဒၣ်မ့ၢ်ဝံတဂၤလီၤ.”

¹⁸ပှၤယူဒၤဖိအခိၣ်အနၢ်တဖၣ်, တချုးလၢအကိးဒံးဘၣ်ပှၤတဂၤအံၤ အမိၢ်အပၢ်န့ၣ်, တနာ်ဝဲဒၣ်လၢပှၤတဂၤအံၤအမဲာ်ဘျီၣ်တ့ၢ်တဘျီ ဒီးခဲအံၤထံၣ်ထီၣ်က့ၤတၢ်န့ၣ်ဘၣ်.

¹⁹အဝဲသ့ၣ်သံကွၢ်ဝဲ, “အဝဲအံၤမ့ၢ်သုဖိခွါလၢသုစံးလၢ အအိၣ်ဖျဲၣ်မဲာ်ဘျီၣ်န့ၣ်ဧါ. မ့မ့ၢ်ဒ်န့ၣ်ဒီး, ခဲအံၤအဝဲထံၣ်ထီၣ်က့ၤတၢ်န့ၣ်သ့လၢကျဲဒ်လဲၣ်.”

²⁰အမိၢ်အပၢ်တဖၣ်စံးဆၢတၢ်ဒီးစံးဝဲ, “ပသ့ၣ်ညါလၢ အဝဲမ့ၢ်ပဖိခွါ, ဒီးပသ့ၣ်ညါလၢအဝဲအိၣ်ဖျဲၣ်ထီၣ်မဲာ်ဘျီၣ်န့ၣ်လီၤ.

²¹ဘၣ်ဆၣ်ဒီးခဲအံၤအဝဲထံၣ်ထီၣ်က့ၤတၢ်လၢကျဲဒ်လဲၣ်န့ၣ် ပတသ့ၣ်ညါဘၣ်. ဒီးမတၤမၤဘျါက့ၤအီၤလဲၣ်န့ၣ်, ပတသ့ၣ်ညါစ့ၢ်ကီးဘၣ်. သံကွၢ်အီၤတက့ၢ်. အဝဲဒၣ်ဒိၣ်တုာ်ခိၣ်ပှဲၤလံ ဒီးစံးဆၢတၢ်လၢအဂီၢ်ဒၣ်ဝဲသ့ကစီဒီလီၤ.”

²²အမိၢ်အပၢ်တဖၣ်စံးဆၢတၢ်ဒ်အံၤမ့ၢ်လၢအပျံၤပှၤယူဒၤဖိအခိၣ် အနၢ်တဖၣ်လၢအပာ်လီၤတ့ၢ်လံအသးလၢပှၤတဂၤလၢ်လၢ်လၢ အစံးလၢအနာ်ယ့ၣ်ၡူးမ့ၢ်ခရံာ်န့ၣ်, ကဘၣ်တၢ်ဟီထီၣ်ကွံာ်အီၤလၢဘူၣ်ဘျီၣ်ပူၤအဃိန့ၣ်လီၤ.

²³လၢတၢ်န့ၣ်အဃိအမိၢ်အပၢ်စံးတ့ၢ်ဝဲ, “အဝဲဒၣ်ဒိၣ်တုာ်ခိၣ်ပှဲၤလံ. သံကွၢ်အီၤတက့ၢ်.”

²⁴ပှၤယူဒၤဖိအခိၣ်အနၢ်တဖၣ်ကိးကဒါက့ၤပှၤလၢအမဲာ်ထံၣ်ထီၣ် က့ၤတၢ်တဂၤန့ၣ်ခံဘျီတဘျီဒီးစံးဘၣ်အီၤ, “အၢၣ်လီၤနသးလၢကစၢ်ယွၤအမဲာ်ညါလၢနကတဲတၢ်မ့ၢ် တၢ်တီန့ၣ်တက့ၢ်. ပသ့ၣ်ညါလၢပှၤလၢအမၤဘျါနၤအံၤ မ့ၢ်ပှၤတၢ်ဒဲးဘးဖိတဂၤန့ၣ်လီၤ.”

²⁵ပှၤတဂၤအံၤစံးဆၢတၢ်ဒီးစံးဝဲ, “အဝဲမ့ၢ်ပှၤတၢ်ဒဲးဘးဖိဧါ, တမ့ၢ်ဘၣ်လဲၣ်န့ၣ်, ယတသ့ၣ်ညါဘၣ်. တၢ်လၢယသ့ၣ်ညါ တမံၤန့ၣ်, လၢညါယမဲာ်ဘျီၣ်, ဘၣ်ဆၣ်ခဲအံၤယထံၣ်ထီၣ်က့ၤတၢ်လံ.”

²⁶အဝဲသ့ၣ်သံကွၢ်ကဒီးအီၤ, “အဝဲမၤနၤဒ်လဲၣ်. မၤဘျါက့ၤနၤလၢနတၢ်မဲာ်ဘျီၣ်န့ၣ်လၢကျဲဒ်လဲၣ်.”

²⁷အဝဲစံးဆၢတၢ်ဒီးစံးဝဲ, “ယစံးဘၣ်တဲဘၣ်သုဝံၤတ့ၢ်လံ ဒီးသုတကနၣ်ယၤဘၣ်. ဘၣ်မနုၤအဃိလၢသုအဲၣ်ဒိးနၢ်ဟူကဒီး တၢ်ဂ့ၢ်အံၤန့ၣ်လဲၣ်. ဘၣ်သ့ၣ်သ့ၣ်သုဝဲစ့ၢ်ကီးကမ့ၢ် သုအဲၣ်ဒိးကဲထီၣ်ယ့ၣ်ၡူးအပျဲၢ်အဘီၣ်တဖၣ်သၢၣ်.”

²⁸အဝဲသ့ၣ်ကတိၤဒုၣ်ဒွဲၣ်အီၤဒီးစံး, “နမ့ၢ်ပှၤအဝဲန့ၣ်အပျဲၢ်အဘီၣ်လီၤ. မ့မ့ၢ်ပဝဲပမ့ၢ်စီၤမိၤၡ့အပျဲၢ်အဘီၣ်တဖၣ်န့ၣ်လီၤ.

²⁹ပသ့ၣ်ညါလၢကစၢ်ယွၤကတိၤတၢ်ဒီးစီၤမိၤၡ့လီၤ. မ့မ့ၢ်ပှၤအဝဲတဂၤန့ၣ်ဟဲလၢလဲၣ်ဒၣ်လဲာ်ပတသ့ၣ်ညါဘၣ်.”

³⁰ပှၤအမဲာ်ထံၣ်ထီၣ်က့ၤတၢ်တဂၤန့ၣ်စံးဆၢတၢ်ဒီးစံးဝဲ, “တၢ်တမံၤအံၤမ့ၢ်တၢ်လီၤကမၢကမၣ်ဒိၣ်မးလီၤ. ပှၤတဂၤအံၤဟဲလၢလဲၣ်န့ၣ်သုတသ့ၣ်ညါဘၣ်. ဘၣ်ဆၣ်အဝဲမၤဘျါက့ၤယၤလၢယတၢ်မဲာ်ဘျီၣ်န့ၣ်လီၤ.

³¹ပသ့ၣ်ညါလၢကစၢ်ယွၤတဒိကနၣ်ပှၤတၢ်ဒဲးဘးဖိတဖၣ် န့ၣ်ဘၣ်. မ့မ့ၢ်အဝဲဒိကနၣ်ပှၤလၢအယူးယီၣ်အီၤ ဒီးမၤတၢ်လၢအဘၣ်အသးန့ၣ်လီၤ.

³²လၢဟီၣ်ခိၣ်ကဲထီၣ်လံၤလံၤန့ၣ်, ပှၤတဂၤဂၤဒုးထံၣ်ထီၣ်က့ၤပှၤအိၣ်ဖျဲၣ်မဲာ်ဘျီၣ်တဂၤ န့ၣ်, ပှၤတနၢ်ဟူဘၣ်အီၤနီတခီၣ်ဘၣ်.

³³မ့တမ့ၢ်ဘၣ်လၢပှၤတဂၤအံၤဟဲလၢကစၢ်ယွၤအအိၣ်ဘၣ်ဒီး, အဝဲမၤတၢ်တသ့နီတမံၤဘၣ်.”

³⁴အဝဲသ့ၣ်စံးဆၢတၢ်ဒီးစံးဝဲ, “နအိၣ်ဖျဲၣ်ထီၣ်ဒီး တၢ်ကွၢ်ဒိၣ်ထီၣ်နၤလၢတၢ်ဒဲးဘးယိာ်အပူၤဒီးနဂုာ် ကျဲးစၢးသိၣ်လိသီလိပှၤန့ၣ်ဧါ.” အန့ၣ်ဒီး, အဝဲသ့ၣ်ဟီထီၣ်ကွံာ်အီၤလၢဘူၣ်ဘျီၣ်ပူၤန့ၣ်လီၤ.

³⁵ယ့ၣ်ၡူးနၢ်ဟူလၢပှၤဟီထီၣ်ကွံာ်အီၤဒီးဖဲအဝဲထံၣ်န့ၢ် ပှၤတဂၤအံၤန့ၣ်သံကွၢ်အီၤဒီးစံး, “နစူၢ်က့ၤနာ်က့ၤပှၤကညီဖိခွါဧါ.”

³⁶ပှၤတဂၤအံၤစံးဆၢအီၤ, “ကစၢ်ဧၢ, ဒ်သိးယနာ်အီၤကသ့န့ၣ်, စံးဘၣ်တဲဘၣ်ယၤလၢအဝဲမ့ၢ်မတၤလဲၣ်န့ၣ်တက့ၢ်.”

³⁷ယ့ၣ်ၡူးစံးဘၣ်အီၤ, “နထံၣ်တ့ၢ်လံအီၤလံ. အဝဲမ့ၢ်ပှၤလၢအကတိၤတၢ်ဒီးနၤခဲအံၤတဂၤန့ၣ်လီၤ.”

³⁸အဝဲစံးဝဲဒၣ်, “ကစၢ်ဧၢ, ယနာ်လီၤ.” ဒီးချံးခီၣ်တီၤလီၤလၢယ့ၣ်ၡူး အမဲာ်ညါဒီးဘူၣ်ထီၣ်ဘါထီၣ်အီၤလီၤ.

³⁹ယ့ၣ်ၡူးစံးဝဲဒၣ်, “ယဟဲဆူဟီၣ်ခိၣ်အံၤလၢယကစံၣ်ညီၣ်တၢ် အဂီၢ်, ဒ်သိးပှၤလၢအတထံၣ်တၢ်တဖၣ်ကထံၣ်ထီၣ်က့ၤတၢ်, ဒီးပှၤလၢအထံၣ်တၢ်တဖၣ်အမဲာ်ကဘျီၣ်အဂီၢ်န့ၣ်လီၤ.”

⁴⁰ပှၤဖၤရံၤၡဲတနီၤလၢအအိၣ်ဒီးအီၤဖဲန့ၣ်, နၢ်ဟူအဝဲစံးတၢ်ဒ်အံၤဒီး သံကွၢ်အီၤ, “နအဲၣ်ဒိးစံးလၢပဝဲဒၣ်တဖၣ်အံၤပမဲာ်ဘျီၣ်စ့ၢ်ကီး န့ၣ်ဧါ.”

⁴¹ယ့ၣ်ၡူးစံးဆၢတၢ်ဒီးစံး, “သုမဲာ်မ့ၢ်ဘျီၣ်တ့ၢ်ဒီးသုတၢ်ကမၣ်တမ့ၢ် အကအိၣ်ဘၣ်. ဘၣ်ဆၣ်သုစံးလၢသုထံၣ်တၢ်အဃိ, သုတၢ်ကမၣ်အိၣ်ဒံးဒၣ်တၢ်န့ၣ်လီၤ.”