Read S'gaw Karen မၤတၢ် 11 Bible Online

မၤတၢ် 11 - S'gaw Karen bible

မၤတၢ် 11

¹ပှၤတၢ်မၢဖိဒီးပှၤစူၢ်က့ၤနာ်က့ၤတၢ်သကုၤကီၢ်ယူဒၤတဖၣ်, နၢ်ဟူဘၣ်ဝဲလၢပှၤကလုာ်ဂၤတဖၣ်စ့ၢ်ကီးဒိးန့ၢ်ဘၣ်လံကစၢ် ယွၤအကလုၢ်ကထါလံန့ၣ်လီၤ.

²သတးဒီးဖဲစီၤပ့းတရူးလဲၤထီၣ်ဆူယရူၤၡလ့ၣ်န့ၣ်, အပျဲၢ်အဘီၣ်လၢအဟံးဃာ်ဒံးတၢ်စူၢ်တၢ်နာ်ဘၣ်ဃး တၢ်ကူးတရံးတဖၣ်ကတိၤပာ်တၢ်ကမၣ်လၢအလိၤ

³ဒီးစံးဝဲ, “နလဲၤအိၣ်သမှံၤဖဲပှၤကလုာ်ဂၤလၢအတဒိးဘၣ်တၢ်ကူးတရံး တဖၣ်အဟံၣ်, ဒီးနအီၣ်ဃုာ်တၢ်ဒီးအီၤဒၣ်လဲာ်မးလဲၣ်.

⁴သတးဒီး, စီၤပ့းတရူးတဲဘၣ်အဝဲသ့ၣ်တၢ်ဂ့ၢ်လၢအမၤတ့ၢ်အသး ခဲလၢာ်, စးထီၣ်လၢအခီၣ်ထံးန့ၣ်လီၤ.

⁵“ဖဲယအိၣ်လၢဝ့ၢ်ယၤဖိၤဒီးဃ့ဘါထုကဖၣ်တၢ်အဖၢမုၢ်န့ၣ်, ယဒိးန့ၢ်ဘၣ်တၢ်ထံၣ်လၢညါခီတမံၤလီၤ. ယထံၣ်ဘၣ်တၢ်တမံၤဟဲလီၤဝဲလီၤဂာ်ဒီးယၣ်ဖးဒိၣ်တဘ့ၣ်လၢတၢ် စဲၤလီၤအီၤလၢမူခိၣ်လၢအနၢၣ်လွံၢ်နၢၣ်, ဒီးဟဲအိၣ်ကတီၢ်ဝဲဘူး ဒီးယၤလီၤ.

⁶ယကွၢ်နုာ်တၢ်လၢယၣ်ပူၤလီၤတံၢ်လီၤဆဲးဒီးထံၣ်ဘၣ်ဆၣ်ဖိကီၢ်ဖိအဒၢ, ဒီးဆၣ်ဖိကီၢ်ဖိအမံၤ, ဒီးတၢ်စွါတၢ်စွဲဒီးထိၣ်ဧိၤလံာ်ဧိၤလၢအယူၤလၢမူဖးဖီ တဖၣ်လီၤ.

⁷ဒီးယနၢ်ဟူတၢ်အကလုၢ်သီၣ်ထီၣ်ဒီးစံးဘၣ်ယၤ, ‘စီၤပ့းတရူးဧၢ, ဂဲၤဆၢထၢၣ်, ဒီးမၤသံတၢ်ဒီးအီၣ်တၢ်တက့ၢ်.’

⁸ဘၣ်ဆၣ်ဒီးယစံးယဲ, ‘ကစၢ်ဧၢ, ယတအီၣ်လ့ၤတက့ၤဘၣ်. တၢ်တမံၤလၢ်လၢ်လၢတၢ်ပာ်အီၤလၢအတစီတဆှံဒီးတကဆှီလၢတၢ်ကအီၣ် အီၤအဂီၢ်န့ၣ်, ယတအီၣ်တ့ၢ်ယဲနီတစုဘၣ်.’

⁹တၢ်အကလုၢ်သီၣ်ထီၣ်ကဒီးလၢမူခိၣ်ဒီးစံးဝဲ, ‘တၢ်လၢကစၢ်ယွၤစံးလၢအကဆှီကစီဒီန့ၣ်, မ်နသုတဆိကမိၣ်လၢအတကဆှီဘၣ်တဂ့ၤ.’

¹⁰တၢ်မၤအသးဒ်သိးအံၤပှဲၤထီၣ်သၢစု ဒီးလၢခံကတၢၢ်န့ၣ်, တၢ်လၢအဘၣ်တၢ်စဲၤလီၤအီၤတမံၤန့ၣ်ဘၣ်တၢ်ထုးထီၣ်ကွံာ်အီၤ ဆူမူခိၣ်ခဲလၢာ်န့ၣ်လီၤ.

¹¹တဆၢတကတီၢ်ဃီဖဲန့ၣ်, ပှၤသၢဂၤလၢအဘၣ်တၢ်ဆှၢလီၤအီၤလၢ ဝ့ၢ်ကဲၤစါရံၤဟဲတုၤလၢဟံၣ်ဖဲယအိၣ်သမှံၤန့ၣ်လီၤ.

¹²ဒီးယွၤအသးစံးဘၣ်ယၤလၢယသုတမၤယံာ်မၤနီၢ်ယသး တဂ့ၤဒီးယကလဲၤပိာ်အဝဲသ့ၣ်အခံန့ၣ်လီၤ. ဒီပုၢ်ဝဲၢ်လၢဝ့ၢ်ယၤဖိၤဃုဂၤအံၤစ့ၢ်ကီးလဲၤဒီးယၤဆူဝ့ၢ် ကဲၤစါရံၤဒီးပဝဲကိးဂၤဒဲးပလဲၤနုာ်လီၤဆူစီၤကန့လံးအဟံၣ် ပူၤန့ၣ်လီၤ.

¹³အဝဲဒၣ်တဲဘၣ်ပှၤဘၣ်ဃးအထံၣ်ဘၣ်တ့ၢ်ကလူးတဂၤအိၣ်ဆၢထၢၣ် လၢအဟံၣ်ပူၤဒီးစံးဘၣ်အီၤ, ‘မၢလီၤပှၤတဂၤဂၤဆူဝ့ၢ်ယၤဖိၤဒ်သိးအကလဲၤကိးန့ၢ်ပှၤတဂၤ လၢအမံၤအလၢအပှဲၤမ့ၢ်ဝဲစီၤၡံမိၣ်ပ့းတရူးန့ၣ်တက့ၢ်.

¹⁴အဝဲကကတိၤတၢ်ဒီးနၤ, ဒီးနၤဒီးနပှၤဟံၣ်ဖိဃီဖိခဲလၢာ်ကဘၣ်တၢ်အုၣ်က့ၤခီၣ်က့ၤအီၤ ခီဖျိတၢ်ကတိၤလၢအကတိၤဝဲတဖၣ်န့ၣ်လီၤ.’

¹⁵ဒီးဖဲယစးထီၣ်ကတိၤတၢ်န့ၣ်, သးစီဆှံဟဲလီၤလၢအဝဲသ့ၣ်အလိၤဒ်အဟဲလီၤတ့ၢ်ဝဲလၢပလိၤ အဆိကတၢၢ်တဘျီအသိးန့ၣ်လီၤ.

¹⁶တုၤနုၤတစု, ယသ့ၣ်နီၣ်ထီၣ်က့ၤတၢ်ကတိၤလၢကစၢ်စံးတ့ၢ်ဝဲ, ‘စီၤယိၤဟၣ်ဘျၢတၢ်လၢထံ, မ့မ့ၢ်သုဝဲသုကဘၣ်တၢ်ဘျၢသုလၢသးစီဆှံန့ၣ်လီၤ.’

¹⁷အိၣ်ဖျါဝဲဒၣ်လၢကစၢ်ယွၤဟ့ၣ်ပှၤကလုာ်ဂၤသ့ၣ်တဖၣ်တၢ်ဟ့ၣ် တမံၤဃီလၢအဝဲဒၣ်ဟ့ၣ်ပှၤဖဲပအိၣ်ဒီးတၢ်နာ်လၢကစၢ်ယ့ၣ်ၡူးခရံာ်အပူၤန့ၣ်လီၤ. မ့မ့ၢ်ဒ်န့ၣ်ဒီး, ယမ့ၢ်မတၤတဂၤလၢကကျဲးစၢးတြီယွၤအကျဲန့ၣ်လဲၣ်.”

¹⁸ဖဲအဝဲသ့ၣ်နၢ်ဟူဘၣ်တၢ်ဂ့ၢ်တမံၤအံၤန့ၣ်, အဝဲသ့ၣ်ဆိကတီၢ်ကွံာ်အတၢ်ကတိၤပာ်တၢ်ကမၣ်, ဒီးစံးထီၣ်ပတြၢၤယွၤဒီးစံးဝဲ, “မ့မ့ၢ်ဒ်န့ၣ်ဒီးကစၢ်ယွၤဟ့ၣ်စ့ၢ်ကီးလံပှၤကလုာ်ဂၤတဖၣ် တၢ်အခွဲးအယာ်လၢအကပီၢ်ယၢ်ဒီးဃၣ်လိၤက့ၤအသးဒီးကမူဝဲအဂီၢ် န့ၣ်လီၤ.”

¹⁹ပှၤစူၢ်က့ၤနာ်က့ၤတၢ်တနီၤလီၤမုၢ်ပြံပြါဝဲဒၣ်, မ့ၢ်လၢတၢ်မၤအၢမၤနးအိၣ်ထီၣ်ဖဲစီၤစတ့းဖၣ်ဘၣ်တၢ်မၤသံအီၤ အဆၢကတီၢ်အဃိန့ၣ်လီၤ. အဝဲသ့ၣ်တနီၤလဲၤဝဲတုၤလၢတၢ်ပၢၤခိၣ်ဖံၤနံက့ၤဒီးကီးကူပြူးဒီး ဝ့ၢ်အၣ်တံၤအီာ်ဒီးစံးဘၣ်တဲဘၣ်တၢ်ကစီၣ်ထဲလၢပှၤယူဒၤ ဖိတကလုာ်ဧိၤလီၤ.

²⁰မ့မ့ၢ်ပှၤစူၢ်က့ၤနာ်က့ၤတၢ်အဂၤတနီၤလၢကီးကူပြူးဒီးကီၢ်ကူၤရ့ၤန့ တဖၣ်, လဲၤဝဲတုၤလၢဝ့ၢ်အၣ်တံၤအီာ်ဒီးစံၣ်တဲၤတဲလီၤတၢ်ကစီၣ်လၢ ပှၤကလုာ်ဂၤတဖၣ်စ့ၢ်ကီး, ဒီးစံးဘၣ်တဲဘၣ်အဝဲသ့ၣ်တၢ်သးခုအကစီၣ်ဘၣ်ဃးကစၢ်ယ့ၣ်ၡူး အဂ့ၢ်န့ၣ်လီၤ.

²¹ဒီးကစၢ်အစိကမီၤအိၣ်ဒီးအဝဲသ့ၣ်, ဒီးပှၤဂီၢ်မုၢ်ဂီၢ်ပၤစူၢ်က့ၤနာ်က့ၤတၢ်ဒီး ဃၣ်က့ၤအသးဆူကစၢ်အအိၣ်န့ၣ်လီၤ.

²²တၢ်ဂ့ၢ်တမံၤအံၤအကစီၣ်လဲၤတုၤဆူတၢ်အိၣ်ဖှိၣ်လၢဝ့ၢ်ယရူၤၡလ့ၣ်, သတးဒီးအဝဲသ့ၣ်ဆှၢလီၤစီၤဘၢ်နါဘၤဆူဝ့ၢ်အၣ်တံၤအီာ်န့ၣ်လီၤ.

²³ဖဲအဝဲဒၣ်လဲၤတုၤဒီးထံၣ်ကစၢ်ယွၤအတၢ်ဆိၣ်ဂ့ၤဘၣ်ပှၤတဖၣ်အံၤန့ၣ်, အဝဲသူၣ်ခုသးခုဒီးသဆၣ်ထီၣ်အဝဲသ့ၣ်ခဲလၢာ်အခံဒ်သိးအသး ကတီဒီးကစၢ်လၢအသးဒီဖျၢၣ်ညါန့ၣ်လီၤ.

²⁴စီၤဘၢ်နါဘၤမ့ၢ်ပှၤဂ့ၤပှၤဝါတဂၤလၢအလၢပှဲၤဒီးသးစီဆှံ ဒီးတၢ်စူၢ်တၢ်နာ်လီၤ. ဒီးပှၤအါဂၤဘၣ်တၢ်ဆှၢက့ၤအီၤဆူကစၢ် အအိၣ်န့ၣ်လီၤ.

²⁵တၢ်မၤအသးတမံၤအံၤဝံၤအလီၢ်ခံ, စီၤဘၢ်နါဘၤလဲၤဆူဝ့ၢ်တၢ်စူးဒ်သိးအကဃုထံၣ်န့ၢ်စီၤစီလူး အဂီၢ်လီၤ.

²⁶တုၤအထံၣ်န့ၢ်အီၤဒီးဟဲက့ၤကိးအီၤဆူဝ့ၢ်အၣ်တံၤအီာ်န့ၣ်လီၤ. လၢဒီနံၣ်ညါအတီၢ်ပူၤန့ၣ်, အဝဲသ့ၣ်ခံဂၤအံၤထံၣ်လိာ်အိၣ်သကိးဒီးတၢ်အိၣ်ဖှိၣ်ဖဲန့ၣ် ဒီးသိၣ်က့ၤသီက့ၤပှၤဂီၢ်မုၢ်လီၤ. အပျဲၢ်အဘီၣ်တဖၣ်ဘၣ်တၢ်ကိး အီၤလၢပှၤခရံာ်ဖိအဆိကတၢၢ်မ့ၢ်ဝဲဒၣ်ဖဲဝ့ၢ်အၣ်တံၤအီာ်အံၤန့ၣ်လီၤ.

²⁷အကတီၢ်ဖဲန့ၣ်, ဝံတနီၤဟးထီၣ်လၢဝ့ၢ်ယရူၤၡလ့ၣ်ဒီးလဲၤဆူဝ့ၢ်အၣ် တံၤအီာ်န့ၣ်လီၤ.

²⁸အဝဲသ့ၣ်အကျါတဂၤလၢအမံၤမ့ၢ် စီၤအကၤဘူးန့ၣ်ဂဲၤဆၢထၢၣ်, ဒီးစံးဆိပာ်တၢ်ခီဖျိယွၤအသးအစိကမီၤလၢတၢ်သၣ်ဝံၤလီၤဒိဖးဒိၣ် ကတုၤအိၣ်လၢဟီၣ်ခိၣ်ဒီဘ့ၣ်ညါန့ၣ်လီၤ. (အဝဲအံၤတုၤအိၣ်ဝဲဖဲစီၤကျီၤဒံကဲစီၤပၤဖးဒိၣ်အဆၢကတီၢ် န့ၣ်လီၤ.)

²⁹အပျဲၢ်အဘီၣ်တဖၣ်အိၣ်ဒီးတၢ်ပာ်လီၤအသးတဂၤဘၣ် တဂၤလၢအကဆှၢလီၤတၢ်မၤစၢၤအါအါတသ့ဖဲအသ့ဒ်သိး ကမၤစၢၤအဒီပုၢ်ဝဲၢ်အိၣ်လၢကီၢ်ယူဒၤတဖၣ်အဂီၢ်လီၤ.

³⁰အဝဲသ့ၣ်မၤဝဲတၢ်အံၤ, ဒီးဆှၢလီၤအကျိၣ်အစ့တဖၣ်န့ၣ်ဆူတၢ်အိၣ်ဖှိၣ်အပှၤသူၣ်က့သး ပှၢ်တဖၣ်အအိၣ်ခီဖျိစီၤဘၢ်နါဘၤဒီးစီၤစီလူးန့ၣ်လီၤ.