Read S'gaw Karen မၤတၢ် 18 Bible Online

မၤတၢ် 18 - S'gaw Karen bible

မၤတၢ် 18

¹အန့ၣ်ဝံၤအလီၢ်ခံ, စီၤပီလူးဟးထီၣ်လၢဝ့ၢ်အၤသ့ၣ်, ဒီးလဲၤဆူဝ့ၢ်ကရံၣ်သူးလီၤ.

²ဖဲန့ၣ်အဝဲဒၣ်ထံၣ်လိာ်ပှၤယူဒၤဖိတဂၤလၢအမံၤမ့ၢ်စီၤအကူလၤ, အိၣ်ဖျဲၣ်ထီၣ်လၢဝ့ၢ်ပီၣ်တူးဒီးဟဲတုၤသီဒီးအမါနီၢ်ပြံစကံးလၤန့ၣ်လီၤ. အဝဲသ့ၣ်ဟးထီၣ်ကွံာ်လၢကီၢ်အံၤတလံမ့ၢ်လၢစီၤပၤဖးဒိၣ်ကျီၤဒံ ဟ့ၣ်လီၤတၢ်ကလုၢ်လၢပှၤယူဒၤဖိကိးဂၤဒဲးကဘၣ်ဟးထီၣ်ကွံာ် ဖဲဝ့ၢ်ရိမ့ၤအဃိန့ၣ်လီၤ. စီၤပီလူးလဲၤထံၣ်လိာ်အဝဲသ့ၣ်,

³ဒီးအိၣ်ဝဲဆိးဝဲဒီးမၤသကိးတၢ်ဒီးအဝဲသ့ၣ်, မ့ၢ်လၢအဝဲဒၣ်လုၢ်အီၣ်အသးသမူခီဖျိအဆးဒဲဒ်အဝဲသ့ၣ် အသိးအဃိလီၤ.

⁴ပှၤယူဒၤဖိအမုၢ်အိၣ်ဘှံးနံၤကိးဘျီဒဲးန့ၣ်, အဝဲဒၣ်ကတိၤဂ့ၢ်လိာ်ဘှီလိာ်တၢ်ဖဲဘူၣ်ဘျီၣ်လၢအမ့ၢ်တၢ်ဘါ အလီၢ်, ဒီးဂုာ်ကျဲးစၢးဝဲဒ်သိးပှၤယူဒၤဖိဒီးပှၤကြံးခ်ဖိ ခံဖုလၢာ်ကနာ်တၢ်အဂီၢ်လီၤ.

⁵ဖဲစီၤစံလၤဒီးစီၤတံၤမသ့းလၢအဟးထီၣ်လၢကီၢ်မၤက့းဒနံ ဟဲတုၤဝဲန့ၣ်, စီၤပီလူးဟ့ၣ်လီၤအဆၢကတီၢ်လၢာ်လၢာ်ဆ့ဆ့ လၢတၢ်စံၣ်တဲၤတဲလီၤတၢ်သးခုအကစီၣ်အဂီၢ်, ဒီးအုၣ်အသးလၢပှၤယူဒၤဖိတဖၣ်အမဲာ်ညါလၢယ့ၣ်ၡူးမ့ၢ်ခရံာ် န့ၣ်လီၤ.

⁶ဖဲအဝဲသ့ၣ်ထီဒါဒီးကတိၤဒုၣ်ဒွဲၣ်အီၤန့ၣ်, အဝဲဒၣ်တြုၤလီၤကွံာ် ဟီၣ်ခိၣ်ကမူၣ်လၢအကူအသိးအလိၤဒီးစံးဘၣ်အဝဲသ့ၣ်, “သုမ့ၢ်တုၤလၢတၢ်ဟးဂီၤဒီးမ့ၢ်သုတၢ်ကမၣ်ဒၣ်သုဝဲလီၤ. တၢ်ကမၣ်တလီၤတီလၢယလိၤဘၣ်. စးထီၣ်ခဲအံၤဒီးဆူညါန့ၣ်ယကလဲၤစံၣ်တဲၤတဲလီၤတၢ် လၢပှၤကလုာ်ဂၤတဖၣ်အသိးအကျါလီၤ.”

⁷လၢတၢ်န့ၣ်အဃိ, အဝဲဒၣ်ဟးထီၣ်ကွံာ်လၢအဝဲသ့ၣ်အအိၣ် ဒီးလဲၤအိၣ်ဝဲဆိးဝဲဖဲပှၤကလုာ်ဂၤလၢအမံၤမ့ၢ်စီၤတံတူးယူစတူး တဂၤအဟံၣ်, လၢအအိၣ်ဘူးဒီးဘူၣ်ဘျီၣ်လၢအမ့ၢ်တၢ်ဘါလီၢ် န့ၣ်လီၤ. အဝဲဒၣ်မ့ၢ်ပှၤလၢအဘူၣ်ထီၣ်ဘါထီၣ်ယွၤတဂၤလီၤ.

⁸စီၤကြံစပူးလၢအမ့ၢ်ဘူၣ်ဘျီၣ်အခိၣ်တဂၤန့ၣ်, စူၢ်က့ၤနာ်က့ၤကစၢ်ဃုာ်ဒီးအပှၤဟံၣ်ဖိဃီဖိခဲလၢာ်လီၤ. ပှၤအါဒံအါဂၤဖဲဝ့ၢ်ကရံၣ်သူးလၢအနၢ်ဟူဘၣ်တၢ်သးခု အကစီၣ်တဖၣ်န့ၣ်, စူၢ်က့ၤနာ်က့ၤတၢ်ဒီးဘၣ်တၢ်ဘျၢအီၤလၢ ထံလီၤ.

⁹ဘၣ်မုၢ်တနၤန့ၣ်, စီၤပီလူးဒိးန့ၢ်ဘၣ်တၢ်ထံၣ်လၢညါခီဖဲ ကစၢ်စံးဘၣ်အီၤ, “တဘၣ်ပျံၤတၢ်တဂ့ၤ. မ့မ့ၢ်ကတိၤတၢ်ဒီးတဘၣ်ဆိကတီၢ်တဂ့ၤ.

¹⁰အဂ့ၢ်ဒ်အံၤယအိၣ်ဒီးနၤလီၤ. ပှၤမၤဆူးမၤဆါနၤတသ့နီတဂၤဘၣ်. အဂ့ၢ်မ့ၢ်လၢပှၤအါဒံအါဂၤလၢဝ့ၢ်တဖျၢၣ်အံၤအပူၤမ့ၢ်ယပှၤဂီၢ်မုၢ် အဃိလီၤ.”

¹¹လၢတၢ်န့ၣ်အဃိစီၤပီလူးအိၣ်ဝဲဖဲဝ့ၢ်ကရံၣ်သူးန့ၣ်တနံၣ် ဃုလါဒီးသိၣ်လိပှၤဂီၢ်မုၢ်တဖၣ်လၢကစၢ်ယွၤအကလုၢ် ကထါန့ၣ်လီၤ.

¹²ဖဲစီၤကးလံၤအိၣ် ဘၣ်တၢ်ဒုးကဲထီၣ်အီၤလၢရိမ့ၤအပဒိၣ် ဖးဒိၣ်လၢအပၢကီၢ်အဃါယၤန့ၣ်, ပှၤယူဒၤဖိတဖၣ်ပာ်ဖှိၣ်ထီၣ် အသး, ဖီၣ်စီၤပီလူးဒီးဆှၢအီၤဆူကွီၢ်ဘျီၣ်လီၤ.

¹³အဝဲသ့ၣ်စံးဝဲ, “ပှၤတဂၤအံၤဂုာ်ကျဲးစၢးကွဲန့ၢ်လွဲန့ၢ်ပှၤဂီၢ်မုၢ်လၢ အကဘါထီၣ်ကစၢ်ယွၤလၢကျဲလၢအထီဒါတၢ်သိၣ်တၢ်သီန့ၣ်လီၤ.”

¹⁴ဖဲစီၤပီလူးသါကအဲးထီၣ်အထးခိၣ်န့ၣ်, စီၤကးလံၤအိၣ်စံးဘၣ်ပှၤယူဒၤဖိသ့ၣ်တဖၣ်, “ပှၤယူဒၤဖိသ့ၣ်ဧၢ, တၢ်ဂ့ၢ်အံၤမ့မ့ၢ်တၢ်လၢအဘၣ်ဃးဒီးတၢ်ကမၣ်အဒိၣ်အမုၢ် ဒီးတၢ်လုၣ်သ့ၣ်ခါပတာ်ထံကီၢ်အတၢ်သိၣ်တၢ်သီန့ၣ်, ကြၢးဝဲဘၣ်ဝဲလၢယကဒိကနၣ်သုတၢ်ပာ်ဖျါလၢတၢ်သးစူၤ အပူၤလီၤ.

¹⁵ဘၣ်ဆၣ်ဒီးမ့ၢ်လၢအမ့ၢ်ဒၣ်တၢ်ဂ့ၢ်လိာ်ဘှီလိာ်ဘၣ်ဃးတၢ် ကတိၤအဖျၢၣ်ဒီးတၢ်မံၤတၢ်သၣ်, ဒီးသုတၢ်သိၣ်တၢ်သီဒၣ်သုဝဲ အဃိ, သုကဘၣ်စံၣ်ညီၣ်သုတၢ်ဒၣ်သုဝဲန့ၣ်လီၤ. ယတကဲစံၣ်ညီၣ်ကွီၢ်လၢတၢ်ဂ့ၢ်ဒ်န့ၣ်အသိးတဖၣ်အဂီၢ်ဘၣ်.”

¹⁶ဒီးအဝဲဒၣ်နီၣ်ထီၣ်ကွံာ်အဝဲသ့ၣ်ဆူကွီၢ်ဘျီၣ်အချၢလီၤ.

¹⁷ဒီးအဝဲသ့ၣ်ကိးဂၤဒဲးစှီၤဃာ်ဘူၣ်ဘျီၣ်အခိၣ်စီၤစိၤစသ့ၣ်, ဒီးတီၢ်အီၤလၢစံၣ်ညီၣ်ကွီၢ်အမဲာ်ညါလီၤ. ဘၣ်ဆၣ်ဒီးစီၤကးလံၤအိၣ်တကနၣ်ဃုာ်ဝဲနီတစဲးဘၣ်.

¹⁸စီၤပီလူးအိၣ်ဒံးဝဲဖဲဝ့ၢ်ကရံၣ်သူးဒီးအပျဲၢ်အဘီၣ်တဖၣ် အါနံၤအါသီဝံၤအလီၢ်ခံ, အဝဲဒၣ်ဟးထီၣ်ကွံာ်လၢအဝဲသ့ၣ်အအိၣ်ဒီးဒိးထီၣ်ကဘီလၢ အလဲၤဆူကီၢ်စူၤရံဃုာ်ဒီးနီၢ်ပြံစကံးလၤဒီးစီၤအကူလၤန့ၣ်လီၤ. တချုးအဒိးထီၣ်ကဘီန့ၣ်, အဝဲဒၣ်အိၣ်ဒီးတၢ်ဆိၣ်လီၤ အသးဖဲဝ့ၢ်က့ၣ်ဃရ့းဒီးလူၤကျိကွံာ်အခိၣ်လီၤ.

¹⁹အဝဲသ့ၣ်လဲၤတုၤလၢဝ့ၢ်အ့းဖ့းစူး, ဒီးပာ်တီၢ်နီၢ်ပြံစကံးလၤဒီးစီၤအကူလၤဖဲန့ၣ်လီၤ. အဝဲလဲၤနုာ်လီၤဆူဘူၣ်ဘျီၣ်ပူၤဒီးကတိၤဂ့ၢ်လိာ်ဘှီလိာ် တၢ်ဒီးပှၤယူဒၤဖိတဖၣ်လီၤ.

²⁰အဝဲသ့ၣ်မၢအဝဲအိၣ်ယံာ်ထီၣ်တစဲး, ဘၣ်ဆၣ်အဝဲဒၣ်တအၢၣ်လီၤ အဝဲသ့ၣ်ဘၣ်.

²¹ဘၣ်ဆၣ်ဒီးဖဲအဟးထီၣ်န့ၣ်စံးဘၣ်အဝဲသ့ၣ်, “ကစၢ်ယွၤမ့ၢ်ဘၣ်အသးဒီးယကဟဲက့ၤကဒါက့ၤဆူ သုအိၣ်လီၤ.” ဒီးအဝဲဒၣ်ဒိးထီၣ်ကဘီဒီးဟးထီၣ်ကွံာ် လၢဝ့ၢ်အ့းဖ့းစူးန့ၣ်လီၤ.

²²ဖဲအဝဲဒၣ်လဲၤတုၤလၢဝ့ၢ်ကဲၤစါရံၤန့ၣ်လဲၤထီၣ်ဆူဝ့ၢ်ယရူၤၡလ့ၣ် ဒီးဆၢဂ့ၤဆၢဝါတၢ်အိၣ်ဖှိၣ်ဖိတဖၣ်, ဝံၤဒီးလဲၤထီၣ်ဆူဝ့ၢ်အၣ်တံၤအီာ်ဘၣ်ဃးဒီးကီၢ်စူၤရံန့ၣ်လီၤ.

²³အဝဲဒၣ်အိၣ်ဖဲန့ၣ်တစိၢ်တလီၢ်ဝံၤဟးထီၣ်ဝဲဒၣ်လီၤ. အဝဲလဲၤခီဂာ်တၢ်လီၢ်တၢ်ကျဲဖဲကီၢ်ကလၤတံဒီးကီၢ်ဖြူၤ ကံ, ဒီးဟ့ၣ်ဆူၣ်ထီၣ်အပျဲၢ်အဘီၣ်ဖဲန့ၣ်တဖၣ်အဂံၢ်အဘါလီၤ.

²⁴ပှၤယူဒၤဖိလၢအမံၤမ့ၢ်စီၤအပီးလိၤဒီးအိၣ်ဖျဲၣ်ထီၣ်ဖဲဝ့ၢ် အလ့းစၣ်ဒြူးတဂၤန့ၣ်, ဟဲဆူဝ့ၢ်အ့းဖ့းစူးလီၤ. အဝဲဒၣ်မ့ၢ်ပှၤစံးသ့ကတိၤဘၣ်တဂၤဒီးတၢ်ဂ့ၢ်အိၣ်လၢ တၢ်ကွဲးအသးစီဆှံအပူၤတဖၣ်န့ၣ်နၢ်ပၢၢ်ဝဲဂ့ၤဂ့ၤလီၤ.

²⁵အဝဲဒၣ်ဘၣ်တၢ်သိၣ်လိနဲၣ်လိတ့ၢ်အီၤလၢကစၢ်အကျဲဧိၤ ကပူၤဧိၤ, ဒီးလၢတၢ်သူၣ်ဆူၣ်သးဂဲၤအဒိၣ်အမုၢ်အပူၤစံၣ် တဲၤတဲလီၤတၢ်ဒီးသိၣ်လိသီလိတၢ်လီၤတံၢ်လီၤဆဲးဘၣ်ဃး ယ့ၣ်ၡူးအဂ့ၢ်န့ၣ်လီၤ. ဘၣ်ဆၣ်ဒီးအဝဲဒၣ်သ့ၣ်ညါထဲစီၤယိၤဟၣ်အတၢ်ဘျၢတမံၤဧိၤလီၤ.

²⁶အဝဲကတိၤထီၣ်တၢ်ဒူဒူလၢဘူၣ်ဘျီၣ်လၢအမ့ၢ်တၢ်ဘါလီၢ်အပူၤ လီၤ. ဖဲနီၢ်ပြံစကံးလၤဒီးစီၤအကူလၤနၢ်ဟူဘၣ်အဝဲဒၣ်ကတိၤ တၢ်န့ၣ်, က့ၤကိးအီၤဆူအဟံၣ်, တဲဖျါန့ၢ်အီၤကစၢ်ယွၤအကျဲဒ်သိးအကနၢ်ပၢၢ်ဝဲလီၤတံၢ်ဒိၣ်န့ၢ် အလီၢ်တက့ၢ်လီၤ.

²⁷ဖဲစီၤအပီးလိၤပာ်လီၤအသးလၢအကလဲၤဆူကီၢ်အဃါယၤန့ၣ်, အပျဲၢ်အဘီၣ်ဖဲဝ့ၢ်အ့းဖ့းစူးတဖၣ်မၤစၢၤအီၤခီဖျိအကွဲး လံာ်ဆူအပျဲၢ်အဘီၣ်အိၣ်လၢကီၢ်အဃါယၤတဖၣ်အအိၣ်, ဒီးသဆၣ်ထီၣ်အဝဲသ့ၣ်အခံဒ်သိးအကတူၢ်လိာ်မုာ်အီၤဖဲန့ၣ်လီၤ. ဖဲအဝဲဒၣ်လဲၤတုၤန့ၣ်, ကဲထီၣ်တၢ်မၤစၢၤအဒိၣ်အမုၢ်လၢပှၤလၢအကဲထီၣ်တ့ၢ်ပှၤလၢ အစူၢ်က့ၤနာ်က့ၤတၢ်ခီဖျိကစၢ်ယွၤအဘျုးအဖှိၣ်တဖၣ်အဂီၢ်လီၤ.

²⁸အဂ့ၢ်ဒ်အံၤ, လၢအဝဲဒၣ်ကတိၤဂ့ၢ်လိာ်ဘှီလိာ်တၢ်အိၣ်ဒီး အသဟီၣ်လၢအဆူၣ်ဒီးအသယၢၢ်လၢအဃၢအဃိ, မၤနၢၤကွံာ်ပှၤယူဒၤဖိတဖၣ်လၢတၢ်ကတိၤဂ့ၢ်လိာ်ဘှီလိာ်တၢ် လၢကမျၢၢ်အမဲာ်ညါခီဖျိအယၢၤထီၣ်တၢ်ကွဲးအသးစီဆှံလၢ အဟ့ၣ်တၢ်အုၣ်အသးလၢယ့ၣ်ၡူးမ့ၢ်ခရံာ်န့ၣ်လီၤ.