Read S'gaw Karen မၤတၢ် 2 Bible Online

မၤတၢ် 2 - S'gaw Karen bible

မၤတၢ် 2

¹ဖဲဘူၣ်ယဲၢ်ဆံအမုၢ်နံၤတုၤဃီၤဝဲန့ၣ်, ပှၤစူၢ်က့ၤနာ်က့ၤတၢ်ခဲလၢာ်ပာ်ဖှိၣ်ထီၣ်အသးလၢတၢ်လီၢ် တပူၤဃီန့ၣ်လီၤ.

²သတူၢ်ကလာ်, တၢ်အသီၣ်ဟဲလီၤလၢမူခိၣ်လီၤဂာ်ဒ်ကလံၤလၢအအူတၢ်ဆူၣ်မး အသိး, ဒီးတၢ်အသီၣ်အံၤမၤပှဲၤဟံၣ်လၢအဝဲသ့ၣ်ဆ့ၣ်နီၤဝဲလၢအပူၤဒီ တဖျၢၣ်ညါလီၤ.

³အန့ၣ်ဒီးအဝဲသ့ၣ်ထံၣ်ဝဲမ့ၣ်အူလၣ်လၢအလီၤဂာ်ဒီးတၢ်အပျ့ၤ တဖၣ်ရၤလီၤအသး, ဒီးထိးဘၣ်ပှၤအိၣ်ဖဲန့ၣ်တဂၤဘၣ်တဂၤစုာ်စုာ်လီၤ.

⁴အဝဲသ့ၣ်ခဲလၢာ်လၢထီၣ်ပှဲၤထီၣ်ဒီးသးစီဆှံ, ဒီးကတိၤထီၣ်တၢ်လၢကျိာ်ဂၤတဖၣ်ဒ်ယွၤအသးဒုးသ့စံးသ့ ကတိၤအီၤအသိးန့ၣ်လီၤ.

⁵ဒီးအကတီၢ်ဖဲန့ၣ်, ပှၤယူဒၤဖိဒီးပှၤလၢအအဲၣ်ယွၤပျံၤယွၤလၢ အဟဲလၢကိးထံကိးကီၢ်ဒဲးတဖၣ်, အိၣ်ဆိးဝဲလၢဝ့ၢ်ယရူၤၡလ့ၣ် အပူၤန့ၣ်လီၤ.

⁶တုၤအဝဲသ့ၣ်နၢ်ဟူတၢ်သီၣ်အံၤန့ၣ်ဒီး, ဟဲပာ်ဖှိၣ်ထီၣ်အသးဂီၢ်မုၢ်ဂီၢ်ပၤလီၤ. အဝဲသ့ၣ်ခဲလၢာ်ကမၢကမၣ်ဝဲ, အဂ့ၢ်မ့ၢ်လၢပှၤတဂၤဘၣ်တဂၤ နၢ်ဟူဝဲပှၤစူၢ်က့ၤနာ်က့ၤတၢ်တဖၣ် စံးကတိၤတၢ်လၢအဝဲသ့ၣ်အကျိာ်ဒၣ်ဝဲအဃိန့ၣ်လီၤ.

⁷အဝဲသ့ၣ်တဖၣ်တၢ်လီၤကမၢကမၣ်ဒီးတၢ်လီၤလးဘၣ်အီၤဒိၣ်ဒိၣ် ကလဲာ်ဒီးစံး, “ပှၤတဖၣ်အံၤလၢအကတိၤတၢ်န့ၣ်, မ့ၢ်ဒၣ်ပှၤကီၢ်ကၤလံၤလါဖိလီၤ, တမ့ၢ်ဘၣ်ဧါ.

⁸မ့မ့ၢ်ဒ်န့ၣ်ဒီးပဝဲခဲလၢာ်ပနၢ်ဟူဘၣ်အဝဲသ့ၣ်အတၢ်ကတိၤလၢ ပကျိာ်ဒၣ်ပဝဲန့ၣ်, မ့ၢ်တၢ်ဒ်လဲၣ်.

⁹ပဝဲသ့ၣ်တဖၣ်ပမ့ၢ်ပှၤပၢ်သ့ၤဖိ, ပှၤမၤဒဲဖိ, ပှၤဧ့ၤလၣ်ဖိ, ပှၤမ့းစပတၤမံဖိ, ပှၤယူဒၤဖိ, ပှၤကပၤဒကံဖိ, ပှၤပီၣ်တူးဖိ, ပှၤအၤစံဖိ,

¹⁰ပှၤဖြူၤကံဖိ, ပှၤပၣ်ဖူၤလံဖိ, ပှၤအဲၤကူပတူးဖိ, ပှၤလံၤဘူဖိလၢအအိၣ်ဘူးဒီး ပှၤကူၤရ့ၤန့ဖိ, ဒီးပဝဲတနီၤပဟဲလၢဝ့ၢ်ရိမ့ၤဒီးပမ့ၢ်

¹¹ပှၤယူဒၤဖိဒီးပှၤကလုာ်ဂၤလၢအနုာ်လီၤဆူပှၤယူဒၤဖိအတၢ် ဘူၣ်တၢ်ဘါအပူၤ, ဒီးပဝဲဒၣ်တနီၤပမ့ၢ်ပှၤကြ့တ့ၤဖိဒီးပှၤဧ့ရ့းဖိတဖၣ်လီၤ. ဘၣ်ဆၣ်ဒီးပဝဲဒၣ်ကိးဂၤဒဲးပနၢ်ဟူဘၣ်အဝဲသ့ၣ်စံးကတိၤ တၢ်လၢပကျိာ်ဒၣ်ပဝဲ, ဘၣ်ဃးတၢ်မၤအဒိၣ်အမုၢ်တဖၣ်လၢ ကစၢ်ယွၤမၤတ့ၢ်လံဝဲန့ၣ်လီၤ.”

¹²အဝဲသ့ၣ်တဖၣ်တၢ်ကမၢကမၣ်ဘၣ်အီၤဒိၣ်ဒိၣ်ကလဲာ်ဒီးဆိကမိၣ် က့ၤတၢ်တဘၣ်လၢၤဘၣ်သတးဒီး, သံကွၢ်လိာ်အသးတဂၤဒီးတဂၤ, “တၢ်မၤအသးတခါအံၤအခီပညီဒ်လဲၣ်” န့ၣ်လီၤ.

¹³မ့မ့ၢ်ပှၤအဂၤတဖၣ်နံၤဘၣ်ဖၣ်လဲပှၤစူၢ်က့ၤနာ်က့ၤတၢ်တဖၣ်န့ၣ်ဒီးစံးဝဲ, “ပှၤသ့ၣ်တဖၣ်အံၤမူၤလၢစပံးထံလီၤ.”

¹⁴အန့ၣ်ဒီး, စီၤပ့းတရူးလၢအအိၣ်ဖဲန့ၣ်ဒီးပှၤတၢ်မၢဖိအဂၤတဆံတဂၤ န့ၣ်, ဆၢထၢၣ်ဝဲဒီးကတိၤထီၣ်တၢ်လၢအကလုၢ်ဖးဒိၣ်ဒီးစံး, “ဒီပုၢ်ဝဲၢ်ပှၤယူဒၤဖိဒီးပှၤအိၣ်လၢဝ့ၢ်ယရူၤၡလ့ၣ်အပူၤခဲလၢာ်သ့ၣ်ဧၢ, ကနၣ်တက့ၢ်. ပျဲယတဲဘၣ်သုလၢတၢ်မၤအသးအံၤအခီပညီန့ၣ်တက့ၢ်.

¹⁵ပှၤသ့ၣ်တဖၣ်အံၤတမ့ၢ်အမူၤလၢစပံးထံဒ်သုဆိကမိၣ်သုဝဲအသိးန့ၣ်ဘၣ်. အဂ့ၢ်ဒ်လဲၣ်န့ၣ်, တၢ်ဆၢကတီၢ်ဘၣ်ဒံးဒၣ်ဂီၤခီခွံနၣ်ရံၣ်လီၤ.

¹⁶မ့မ့ၢ်တၢ်အံၤမ့ၢ်ဒၣ်တၢ်လၢဝံယိၤအ့လးစံးတ့ၢ်ဝဲလၢအဂ့ၢ်န့ၣ်လီၤ.

¹⁷‘ကစၢ်ယွၤစံးဝဲဒၣ်, အအံၤမ့ၢ်တၢ်လၢယကမၤအီၤလၢ မုၢ်နံၤမုၢ်သီ လၢခံကတၢၢ်တဖၣ်, ယကလူလီၤဂၢ်လီၤယသးလၢ ပှၤဟီၣ်ခိၣ်ဖိခဲလၢာ်အလိၤ, သုဖိမုၣ်ဖိခွါတဖၣ်ကတဲဖျါထီၣ်ယတၢ်ကစီၣ်, သုပှၤသးစၢ်တဖၣ်ကထံၣ်တၢ်ထံၣ်လၢညါခီတဖၣ်, ဒီးသုပှၤသးပှၢ်တဖၣ်ကမံမီၢ်တၢ်မံမီၢ်တဖၣ်လီၤ.

¹⁸ဖဲမုၢ်နံၤလၢခံတဖၣ်အကတီၢ်န့ၣ်, ယကလူလီၤဂၢ်လီၤယသး လၢယကုၢ်ယပှၤမုၣ်မုၣ်ခွါခွါတဖၣ်အလိၤဒၣ်လဲာ်ဒီး အဝဲသ့ၣ်ကတဲဖျါထီၣ်ယတၢ်ကစီၣ်လီၤ.

¹⁹ယကမၤတၢ်လီၤလးတဖၣ်လၢမူကပိာ်လိၤ, ဒီးဒုးနဲၣ်ဖျါထီၣ်တၢ်ပနီၣ်လီၤလးတဖၣ်လၢ ဟီၣ်ခိၣ်ချၢလီၤ. တၢ်သွံၣ်, မ့ၣ်အူ, ဒီးမ့ၣ်အူလုၢ်ကအိၣ်ဝဲ,

²⁰မုၢ်ကခံးလီၤကွံာ်, ဒီးလါကထီၣ်ဂီၤဒ်တၢ်သွံၣ်အသိး, တချုးကစၢ်အမုၢ်နံၤဖးဒိၣ်လၢအပှဲၤဒီး တၢ်လၤကပီၤတုၤဃီၤဒံးဘၣ်န့ၣ်လီၤ.

²¹ဒီးအကတီၢ်ဖဲန့ၣ်, ပှၤတဂၤလၢ်လၢ်လၢ အကိးထီၣ်တၢ်ဆူကစၢ်အအိၣ်န့ၣ်, ကဒိးန့ၢ်ဘၣ်တၢ်အုၣ်က့ၤခီၣ်က့ၤအီၤလီၤ.’

²²“ပှၤအံၣ်စရ့လးဖိသကိးသကိးဒီးယၤသ့ၣ်ဧၢ, ကနၣ်ယတၢ်ကတိၤတဖၣ်အံၤတက့ၢ်. တၢ်ဒုးနဲၣ်ဖျါထီၣ်န့ၢ်သုဂ့ၤဂ့ၤကလဲာ်လၢပှၤနစၤရ့းဖိယ့ၣ် ၡူးမ့ၢ်ပှၤလၢယွၤအစိကမီၤအိၣ်ဒီးအီၤခီဖျိတၢ်မၤလီၤလး တဖၣ်, ဒီးတၢ်ပနီၣ်လီၤလးတဖၣ်လၢကစၢ်ယွၤမၤဝဲခီဖျိအီၤန့ၣ်လီၤ. သုကစၢ်ဒၣ်သုဝဲသုသ့ၣ်ညါတၢ်တဖၣ်အံၤမ့ၢ်လၢအမၤတ့ၢ်အသး လၢသုသိးသုကျါအဃိလီၤ.

²³ဒ်ကစၢ်ယွၤကူၣ်ကျဲၤဒီးသ့ၣ်ညါပာ်ဝဲအသိး, ယ့ၣ်ၡူးဘၣ်တၢ်ဟ့ၣ်လီၤကွံာ်အီၤဆူသုစုပူၤဒီးသုမၤသံအီၤခီ ဖျိသုပျဲပှၤတၢ်ဒဲးဘးဖိတဖၣ်ပျၤထီအီၤလၢထူၣ်စုညါအလိၤန့ၣ်လီၤ.

²⁴ဘၣ်ဆၣ်ဒီးကစၢ်ယွၤဒုးဂဲၤဆၢထၢၣ်က့ၤအီၤလၢတၢ်သံ, ဒီးမၤထူၣ်ဖျဲးထီၣ်အီၤလၢတၢ်သံအစိကမီၤအဖီလာ်, မ့ၢ်လၢတၢ်သံဟံးဃာ်အီၤတသ့လ့ၤတက့ၤဘၣ်အဃိလီၤ.

²⁵အဂ့ၢ်ဒ်အံၤ, စီၤဒၤဝံးစံးတ့ၢ်ဝဲဘၣ်ဃးဒီးအီၤ, ‘ယထံၣ်ကစၢ်လၢယမဲာ်ညါထီဘိ, အဝဲဒၣ်အိၣ်လၢယစုထွဲတခီသတးဒီး တၢ်မၤဟူးမၤဝးယၤတသ့နီတမံၤဘၣ်.

²⁶အန့ၣ်ဒီးယသးပှဲၤဒီးတၢ်သးခု, ယတၢ်စံးတၢ်ကတိၤတဖၣ်ပှဲၤဒီး တၢ်သူၣ်ဖှံသးညီလီၤ. ဒီးယဲဒၣ်ယမ့ၢ်ပှၤလၢအသံသ့သနာ်က့, ယကအိၣ်မံသူၣ်မံသးလၢတၢ်မုၢ်လၢ်အပူၤလီၤ.

²⁷အဂ့ၢ်ဒ်အံၤ, နတပာ်တ့ၢ်ကွံာ်ယသးသမူလၢ ပှၤသံတဖၣ်အကီၢ်ပူၤဘၣ်. နတပျဲစ့ၢ်ကီးနခ့နပှၤလၢအသးတီဒီးနၤ ကအုၣ်သံကျၣ်သံန့ၣ်ဘၣ်.

²⁸နဒုးနဲၣ်တ့ၢ်လံယၤကျဲတဖၣ်လၢအဆှၢပှၤဆူတၢ်မူ, ဒီးနတၢ်အိၣ်ဆိးဒီးယၤကမၤပှဲၤယသးဒီး တၢ်သူၣ်ဖှံသးညီလီၤ.’

²⁹“ယဒီပုၢ်ဝဲၢ်သ့ၣ်ဧၢ, ယဘၣ်စံးဘၣ်သုလိၤလိၤဘၣ်ဃးပပၢ်ဖးဒိၣ်မံၤဟူသၣ်ဖျါစီၤပၤ ဒၤဝံးအဂ့ၢ်လီၤ. အဝဲဒၣ်သံဝဲဒီးဘၣ်တၢ်ခူၣ်လီၤကွံာ်အီၤ, ဒီးအသွၣ်ခိၣ်န့ၣ်အိၣ်ဒံးဒၣ်ဖဲအံၤတုၤမုၢ်မဆါတနံၤအံၤန့ၣ်လီၤ.

³⁰ဒ်အဝဲမ့ၢ်တ့ၢ်ဝံတဂၤအသိး, အဝဲသ့ၣ်ညါတၢ်လၢကစၢ်ယွၤအၢၣ်လီၤတ့ၢ်အီၤလၢအကမၤဝဲလၢ အဂီၢ်န့ၣ်လီၤ. ကစၢ်ယွၤမၤတၢ်အၢၣ်လီၤအီလီၤဒီးအီၤလၢ အကဒုးကဲထီၣ်အစၢၤအသွဲၣ်တဂၤလၢစီၤပၤ, ဒ်အဝဲကဲဘၣ်ဝဲအသိးန့ၣ်လီၤ.

³¹စီၤဒၤဝံးထံၣ်စိပာ်စၢၤတၢ်လၢကစၢ်ယွၤကမၤဝဲန့ၣ်သတးဒီး, အဝဲဒၣ်ကတိၤတၢ်ဘၣ်ဃးခရံာ်အတၢ်ဂဲၤဆၢထၢၣ်က့ၤလၢတၢ်သံ အဂ့ၢ်, ဖဲအစံးဝဲ, ‘အဝဲတဘၣ်တၢ်ပာ်တ့ၢ်ကွံာ်အီၤလၢ တၢ်သံအကီၢ်ပူၤဘၣ်. အနီၢ်ခိန့ၣ်တအုၣ်သံကျၣ်သံဝဲဘၣ်.’

³²ယ့ၣ်ၡူးတဂၤအံၤကစၢ်ယွၤဒုးဂဲၤဆၢထၢၣ်က့ၤအီၤလၢတၢ်သံ, ဒီးတၢ်လၢအမၤအသးအံၤ, ပဝဲဒၣ်ခဲလၢာ်ပထံၣ်ဘၣ်လၢပမဲာ်လီၤ.

³³အဝဲဒၣ်ဘၣ်တၢ်ပာ်ထီၣ်ထီအီၤလၢပၢ်ကစၢ်ယွၤအစုထွဲတကပၤ, ဒီးဒိးန့ၢ်သးစီဆှံလၢအအိၣ်ဒ်အအၢၣ်လီၤအီလီၤတ့ၢ်ဝဲအသိး န့ၣ်လီၤ. ဒီးတၢ်လၢသုထံၣ်ဘၣ်ဒီးနၢ်ဟူဘၣ်ခဲကနံၣ်အံၤ, မ့ၢ်ယ့ၣ်ၡူးအတၢ်ဟ့ၣ်လၢအလူလီၤဂၢ်လီၤဝဲလၢပလိၤန့ၣ်လီၤ.

³⁴အဂ့ၢ်ဒ်လဲၣ်န့ၣ်, စီၤဒၤဝံးအကစၢ်ဒၣ်ဝဲတလဲၤထီၣ်ဘၣ်ဆူမူခိၣ်ဘၣ် သနာ်က့, အတၢ်ကတိၤအိၣ်ဒ်အံၤ, ‘ကစၢ်ယွၤစံးဘၣ်ယကစၢ်, ဆ့ၣ်နီၤဖဲအံၤလၢယစုထွဲတခီ,

³⁵တုၤယပာ်လီၤနဒုၣ်နဒါတဖၣ်ဒ်ခီၣ်ယီၢ်လီၢ်အသိးလၢနခီၣ်အဖီ လာ်တစုန့ၣ်တက့ၢ်.’

³⁶အန့ၣ်သတးဒီး, သုဝဲပှၤအံၣ်စရ့လးဖိခဲလၢာ်သုကဘၣ်သ့ၣ်ညါ လီၤတံၢ်လၢယ့ၣ်ၡူးလၢသုပျၤထီအီၤလၢထူၣ်စုညါလိၤတဂၤအံၤ, မ့ၢ်ပှၤလၢကစၢ်ယွၤဒုးကဲထီၣ်အီၤလၢကစၢ်ဒီးခရံာ်န့ၣ်လီၤ.”

³⁷တုၤပှၤတဖၣ်နၢ်ဟူဘၣ်တၢ်လၢစီၤပ့းတရူးစံးတ့ၢ်ဝဲအံၤန့ၣ်, အဝဲသ့ၣ်အသးဘၣ်ဒိဘၣ်ထံးနးမးဒီးစံးဘၣ်စီၤပ့းတရူးဒီး ပှၤတၢ်မၢဖိအဂၤတဖၣ်, “ဒီပုၢ်ဝဲၢ်သ့ၣ်ဧၢ, ပကမၤဘၣ်ဒ်လဲၣ်.”

³⁸စီၤပ့းတရူးစံးဘၣ်အဝဲသ့ၣ်, သုဝဲဒၣ်ကိးဂၤဒဲးသုဘၣ်ပီၢ်ယၢ်ဒီးဃၣ်လိၤက့ၤသုသးဆူယွၤ အအိၣ်, ဒီးသုဘၣ်ဒိးဘျၢသုသးလၢထံလၢယ့ၣ်ၡူးခရံာ်အမံၤအပူၤ, ဒ်သိးသုကဒိးန့ၢ်ဘၣ်တၢ်ပျၢ်သုတၢ်ဒဲးဘးဒီးကစၢ်ယွၤအတၢ်ဟ့ၣ် လၢအမ့ၢ်သးစီဆှံန့ၣ်လီၤ.

³⁹ကစၢ်ယွၤအတၢ်အၢၣ်လီၤအီလီၤအံၤမ့ၢ်ဝဲလၢသုဂီၢ်ဒီးလၢ သုဖိသုလံၤအဂီၢ်, ဒီးကယဲၢ်ပှၤအိၣ်လၢထံယံၤကီၢ်ယံၤတဖၣ်ခဲလၢာ် အဂီၢ်, ပှၤခဲလၢာ်လၢပကစၢ်ယွၤကိးန့ၢ်ဆူအအိၣ်န့ၣ်လီၤ.”

⁴⁰စီၤပ့းတရူးအုၣ်အသးလၢအဝဲသ့ၣ်အမဲာ်ညါ, ဒီးလၢတၢ်စံးတၢ်ကတိၤအါထံၣ်အါဘီအပူၤမၢန့ၢ်ဆီၣ်ခံ အဝဲသ့ၣ်ဒီးစံး, “မၤပူၤဖျဲးသုသးလၢတၢ်စံၣ်ညီၣ်ဃၣ်လၢ အကဟဲဘၣ်ပှၤတစိၤအံၤလၢအအၢအသီန့ၣ်တက့ၢ်.”

⁴¹အဝဲသ့ၣ်အါဒံအါဂၤနာ်တၢ်လၢစီၤပ့းတရူးစံးဝဲ, ဒီးဘၣ်တၢ်ဘျၢအီၤလၢထံ ဒီးနံၤအဝဲန့ၣ်ပှၤစူၢ်က့ၤနာ်က့ၤတၢ်အနီၣ်ဂံၢ်အါထီၣ်ပှၤသၢကထိဂၤ ဃၣ်ဃၣ်လီၤ.

⁴²အဝဲသ့ၣ်ဟံးန့ၢ်တၢ်ဆၢကတီၢ်လၢကမၤလိန့ၢ်တၢ်လၢ ပှၤတၢ်မၢဖိတဖၣ်အအိၣ်, ကရ့လိာ်မုာ်လိာ်သကိးအသး, ကအီၣ်သကိးအီသကိး, ဒီးကဘါထုကဖၣ်သကိးတၢ်အဂီၢ်န့ၣ်လီၤ.

⁴³တၢ်လီၤလးဒီးတၢ်ပနီၣ်လီၤလးအါမံၤမၤအသးခီဖျိပှၤတၢ်မၢဖိတဖၣ်, ဒီးတၢ်ပျံၤတၢ်ဖုးလီၤဘၣ်ပှၤကိးဂၤဒဲးန့ၣ်လီၤ.

⁴⁴ပှၤလၢအစူၢ်က့ၤနာ်က့ၤတၢ်ကိးဂၤဒဲးအိၣ်မူသကိးလၢတၢ်ရ့လိာ်မုာ် လိာ်သးဘူးဘူးတံၢ်တံၢ်အပူၤ, ဒီးဟ့ၣ်နီၤလိာ်သကိးအသးတၢ်လၢအအိၣ်ဒီးအဝဲသ့ၣ်တဂၤဒီး တဂၤန့ၣ်လီၤ.

⁴⁵အဝဲသ့ၣ်ဆါလီၤကွံာ်အတၢ်စုလီၢ်ခီၣ်ခိၣ်ဒီးအတၢ်ဖိတၢ်လံၤတဖၣ်, ဒီးဟ့ၣ်နီၤလီၤဝဲစ့ဒ်တဂၤဒီးတဂၤလိၣ်ဘၣ်ဝဲအသိးန့ၣ်လီၤ.

⁴⁶တနံၤဘၣ်တနံၤအဝဲသ့ၣ်လဲၤသကိးဆူတၢ်လုၢ်ဟံၣ်အပူၤ, ဒီးအီၣ်သကိးတၢ်အီၣ်လၢအဝဲသ့ၣ်အဟံၣ်တဖၣ်အပူၤပှဲၤဒီး တၢ်သူၣ်ခုသးခုဒီးတၢ်သူၣ်အိၣ်သးအိၣ်,

⁴⁷အိၣ်ဒီးတၢ်စံးထီၣ်ပတြၢၤကစၢ်ယွၤ, ဒီးအဝဲသ့ၣ်ဒိးန့ၢ်ပှၤခဲလၢာ်အတၢ်ဘၣ်သူၣ်ဘၣ်သးန့ၣ်လီၤ. ဒီးကိးနံၤဒဲးန့ၣ်, ကစၢ်ပာ်ဖှိၣ်အါထီၣ်ပှၤဒိးန့ၢ်တၢ်အုၣ်က့ၤခီၣ်က့ၤ တဖၣ်ဆူအဝဲသ့ၣ်အတၢ်အိၣ်ဖှိၣ်အပူၤန့ၣ်လီၤ.