Read S'gaw Karen မၤတၢ် 20 Bible Online

မၤတၢ် 20 - S'gaw Karen bible

မၤတၢ် 20

¹ဖဲတၢ်တၢထီၣ်တၢလီၤဘှ့ၣ်လီၤက့ၤဝံၤအလီၢ်ခံန့ၣ်, စီၤပီလူးကိးဖှိၣ်အပျဲၢ်အဘီၣ်တဖၣ်ဒီးကတိၤဟ့ၣ်ဂံၢ် ဟ့ၣ်ဘါအဝဲသ့ၣ်ဝံၤ, ဆၢဂ့ၤဆၢဝါအဝဲသ့ၣ်ဒ်သိးအကလီၤ ဖးဒီးအီၤမုာ်မုာ်အဂီၢ်လီၤ. အန့ၣ်ဝံၤအလီၢ်ခံအဝဲဒၣ်ဟးထီၣ်ဒီးလဲၤဆူကီၢ်မၤက့းဒနံန့ၣ်လီၤ.

²အဝဲဒၣ်လဲၤခီဂာ်တၢ်လီၢ်တၢ်ကျဲဖဲန့ၣ်တဖၣ်ဒီးကတိၤဟ့ၣ် ဂံၢ်ဟ့ၣ်ဘါပှၤလၢတၢ်ကစီၣ်အါထံၣ်အါဘီန့ၣ်လီၤ. အန့ၣ်ဝံၤအလီၢ်ခံအဝဲဒၣ်လဲၤဆူကီၢ်အဃါယၤလီၤ.

³ဖဲန့ၣ်အဝဲဒၣ်အိၣ်ဝဲသၢလါလီၤ. ဖဲအဝဲဒၣ်အိၣ်ကတဲာ်ကတီၤအသးဒ်သိးအကလဲၤဆူကီၢ် စူၤရံန့ၣ်, သ့ၣ်ညါဝဲလၢပှၤယူဒၤဖိတဖၣ်ကူၣ်တၢ်ထီဒါအီၤ, ဒီးလၢတၢ်န့ၣ်အဃိပာ်လီၤအသးလၢအကက့ၤကဒါက့ၤဝဲ ခီဖျိကီၢ်မၤက့းဒနံလီၤ.

⁴ပှၤဘ့းရံၤဖိစီၤပူရူးအဖိခွါစီၤစိပၤတြူး, ပှၤသ့းစၤလနံဖိစီၤအရံစတၢ်ဃူးဒီးစီၤစ့းကူၣ်ဒူး, ပှၤဒ့ၢ်ဘ့ၤဖိ စီၤကါယူး, ဒီးစီၤတံၤမသ့း, ဒီးပှၤအၤစံဖိစီၤတူဃံၤကူးဒီးစီၤ တြီးဖံၤမူးတဖၣ်လဲၤဃုာ်ဒီးအီၤလီၤ.

⁵အဝဲသ့ၣ်တဖၣ်လဲၤဆိဆူဝ့ၢ်တြိၤအါလၢပမဲာ်ညါဒီးအိၣ်ခိး ပှၤဖဲန့ၣ်လီၤ.

⁶ဘူၣ်ကိၣ်တအိၣ်ဘၣ်ဒီးကိၣ်မံၣ်ဝံၤအလီၢ်ခံ, ပဒိးထီၣ်ကဘီဖဲဝ့ၢ်ဖံလံးပံၤဒီးဖဲယဲၢ်သီပူၤကွံာ်ဝံၤန့ၣ် ပထံၣ်လိာ်ပသးဒီးအဝဲသ့ၣ်ဖဲဝ့ၢ်တြိၤအါဒီးပအိၣ်ဖဲန့ၣ်တနွံလီၤ.

⁷လၢမုၢ်နွံနံၤအကျါမုၢ်ခီၣ်ထံးနံၤဟါခီန့ၣ်, ပပာ်ဖှိၣ်ထီၣ်သကိးပသးလၢတၢ်စိၢ်ဘျဲးကိၣ် အဂီၢ်လီၤ. စီၤပီလူးကတိၤတၢ်ဒီးပှၤဂီၢ်မုၢ်တဖၣ်ပၢၢ်တုၤလၢဖးဖီမုၢ် တစုအဂ့ၢ်မ့ၢ်လၢအကဘၣ်ဟးထီၣ်ဝဲလၢခံတနံၤအဃိလီၤ.

⁸ဖဲဒၢးထီၣ်ထီလၢပပာ်ဖှိၣ်ပသးအလီၢ်န့ၣ်, မ့ၣ်အူဒၢဘၣ်တၢ်ဒွဲၣ်ထီၣ်အီၤအါဖျၢၣ်လီၤ.

⁹ပိာ်ခွါသးစၢ်လၢအမံၤမ့ၢ်စီၤအူတူၤဃူးတဂၤဆ့ၣ်နီၤဝဲလၢပဲတြီဖိအလိၤ, ဒီးဖဲစီၤပီလူးကတိၤတၢ်ယံာ်ထီၣ်န့ၣ်, စီၤအူတူၤဃူးအမဲာ်ဖံးဃၢထီၣ်တုၤအဝဲဒၣ်မံဘၣ်အသးဒီးလီၤ တဲာ်လၢဟံၣ်သၢကထၢတကထၢဆူဟီၣ်ခိၣ်လိၤလီၤ. ဖဲအဝဲသ့ၣ်လဲၤထၢထီၣ်အီၤန့ၣ်အဝဲဒၣ်သံလံဝဲလံ.

¹⁰ဘၣ်ဆၣ်ဒီးစီၤပီလူးစံၣ်လီၤဆူဟံၣ်ဖီလာ်ဒီးသကူးလီၤအသးလၢ အဖီခိၣ်ဒီးဖိးဟုအီၤလီၤ. “တဘၣ်ကိၢ်တဂ့ၤ.” အဝဲဒၣ်စံးဝဲ, “အဝဲမူဒံးကစီဒီလီၤ.”

¹¹အန့ၣ်ဝံၤအလီၢ်ခံ, အဝဲဒၣ်က့ၤထီၣ်ဆူဟံၣ်ဖီခိၣ်, စိၢ်ဘျဲးကိၣ်ဒီးအီၣ်သကိးတၢ်လၢအပျဲၢ်အဘီၣ်တဖၣ်လီၤ. အဝဲဒၣ်ကတိၤတၢ်ဒီးအဝဲသ့ၣ်ဖးယံာ်တုၤလၢမုၢ်ဟဲဆ့ၣ်ထီၣ်ဝံၤ ဒီးဟးထီၣ်ဝဲဒၣ်လီၤ.

¹²အဝဲသ့ၣ်က့ၤဆှၢပှၤသးစၢ်တဂၤန့ၣ်ဆူအဟံၣ်, ဒီးမ့ၢ်အအိၣ်မူဒံးဝဲ အဃိ, အသူၣ်မုာ်သးမုာ်ဝဲဒိၣ်မးလီၤ.

¹³ပဒိးဆိပာ်ကဘီလၢစီၤပီလူးအမဲာ်ညါဒီးလဲၤဆူဝ့ၢ်အၣ်စူးဒ်သိး ပကဒုးဒိးထီၣ်အီၤလၢကဘီဖဲန့ၣ်လီၤ. အဝဲဒၣ်မၤလိာ်တ့ၢ်ပှၤလၢ ပကမၤဒ်သိးအံၤ, အဂ့ၢ်မ့ၢ်လၢအဝဲအနီၢ်ကစၢ်ကလဲၤဆူဝ့ၢ်အၣ်စူးလၢခိအကျဲ တကပၤအဃိန့ၣ်လီၤ.

¹⁴ဖဲအဝဲဒၣ်ထံၣ်လိာ်ပှၤလၢဝ့ၢ်အၣ်စူးန့ၣ်, အဝဲဒိးထီၣ်ကဘီလၢပသကိးဒီးလဲၤပဝဲဆူဝ့ၢ်မ့ၤတိၤလ့န့ၣ်လီၤ.

¹⁵ပဒိးကဒီးကဘီဖဲန့ၣ်ဒီးမုၢ်ဆ့ၣ်ထီၣ်တနံၤန့ၣ်, ပလဲၤတုၤဖဲတၢ်လီၢ်လၢအအိၣ်သဃီၤဒီးကီးဃံ အူးလီၤ. လၢခံတနံၤန့ၣ်, ပတုၤဖဲကီးစါမူးဒီးမုၢ်ဆ့ၣ်ထီၣ် တနံၤန့ၣ်တုၤဖဲဝ့ၢ်မံလ့ၤတူးလီၤ.

¹⁶စီၤပီလူးပာ်လီၤအသးလၢအကလဲၤခီပတာ်ကွံာ်ဝ့ၢ်အ့းဖ့း စူးဒ်သိးအဆၢကတီၢ်သုတလၢာ်ကွံာ်ဝဲဖဲကီၢ်အၤစံတဂ့ၤန့ၣ်လီၤ. အဝဲဒၣ်အဲၣ်ဒိးလဲၤတုၤဝ့ၢ်ယရူၤၡလ့ၣ်ဆိဆိ, မ့ၢ်သ့န့ၣ်, လၢဘူၣ်ယဲၢ်ဆံအနံၤအဂီၢ်လီၤ.

¹⁷ဖဲဝ့ၢ်မံလ့ၤတူးန့ၣ်, စီၤပီလူးဆှၢလီၤတၢ်ကစီၣ်ဆူဝ့ၢ်အ့းဖ့းစူး ဒီးမၢတၢ်အိၣ်ဖှိၣ်အပှၤသူၣ်က့သးပှၢ်တဖၣ်ဟဲထံၣ်အီၤလီၤ.

¹⁸ဖဲအဝဲသ့ၣ်ဟဲတုၤန့ၣ်, အဝဲဒၣ်စံးဘၣ်အီၤ, “စးထီၣ်မုၢ်တနံၤဖဲယဟဲတုၤကီၢ်အၤစံန့ၣ်, ယအိၣ်ဆိးဖံးမၤတပူၤဃီဒီးသုဒ်လဲၣ်ဒ်လဲၣ်န့ၣ်သုသ့ၣ်ညါသုဝဲလီၤ.

¹⁹လၢတၢ်ဆီၣ်လီၤသးလၢာ်လၢာ်ဆ့ဆ့ဒီး မဲာ်ထံမဲာ်နိအဒိၣ်အအါ အပူၤ, ယမၤယတၢ်ဖံးတၢ်မၤဒ်ကစၢ်အခ့အပှၤတဂၤအသိး ခီဖျိဆၢကတီၢ်အကီအခဲလၢအဟဲတုၤအိၣ်ယၤလၢပှၤယူဒၤ ဖိတဖၣ်အတၢ်ကူၣ်အၢကူၣ်သီအဃိန့ၣ်လီၤ.

²⁰သုသ့ၣ်ညါလၢ, ဖဲယစံၣ်တဲၤတဲလီၤန့ၢ်သုတၢ်ဒီးသိၣ်လိသီလိသုလၢ ကမျၢၢ်အကျါမ့ၢ်ဂ့ၤ, လၢသုဟံၣ်သုဃီပူၤမ့ၢ်ဂ့ၤ, တၢ်တမံၤလၢ်လၢ်လၢအကကဲထီၣ်တၢ်မၤစၢၤလၢသုဂီၢ်န့ၣ်, ယတပာ်ခူသူၣ်ယဲနီတမံၤဘၣ်န့ၣ်လီၤ.

²¹ယဟ့ၣ်ပလီၢ်ပှၤယူဒၤဖိဒီးပှၤကလုာ်ဂၤခံဖုလၢာ်သပှၢ်ပှၢ်ဒ်သိးအဝဲသ့ၣ် ကညိကွံာ်အတၢ်ဒဲးဘးဒီးဃၣ်က့ၤအသးဆူကစၢ်ယွၤအအိၣ်, ဒီးစူၢ်က့ၤနာ်က့ၤပကစၢ်ယ့ၣ်ၡူးန့ၣ်လီၤ.

²²ဒီးခဲကနံၣ်အံၤ, လၢတၢ်စူၢ်ဒီးတၢ်ဒိကနၣ်သးစီဆှံအကလုၢ် အပူၤန့ၣ်, ယကလဲၤယဲဆူဝ့ၢ်ယရူၤၡလ့ၣ်, ဒီးတၢ်ကမၤအသးဒီးယၤဖဲန့ၣ်ဒ်လဲၣ်ဒ်လဲၣ်န့ၣ်, ယတသ့ၣ်ညါဘၣ်.

²³ထဲတမံၤ, ယသ့ၣ်ညါလၢဝ့ၢ်ကိးဖျၢၣ်ဒဲးအပူၤန့ၣ် သးစီဆှံဟ့ၣ် ပလီၢ်တ့ၢ်ယၤလၢတၢ်စၢဃာ်ဒီးတၢ်မၤနးမၤဖှီၣ်အိၣ်ခိးပာ်စၢၤ ယခိၣ်န့ၣ်လီၤ.

²⁴ဘၣ်ဆၣ်ဒီး, တၢ်မၤနးမၤဖှီၣ်ယသးသမူတမ့ၢ်တၢ်အကါဒိၣ်လၢ ယဂီၢ်ဘၣ်. မ့မ့ၢ်အကါဒိၣ်ဝဲလၢယကမၤဝံၤယတၢ်မၤလၢကစၢ် ယ့ၣ်ၡူးဟ့ၣ်လီၤယၤ, လၢအမ့ၢ်ဝဲတၢ်အုၣ်သးလၢတၢ်သးခု အကစီၣ်ဘၣ်ဃးကစၢ်ယွၤအဘျုးအဖှိၣ်အဂ့ၢ်န့ၣ်လီၤ.

²⁵ယဟးဝ့ၤဝီၤတ့ၢ်လံလၢသုဝဲခဲလၢာ်အကျါဒီးစံၣ်တဲၤတဲလီၤယွၤ အဘီအမုၢ်န့ၣ်လီၤ. ဒီးခဲကနံၣ်အံၤ, ယသ့ၣ်ညါလၢသုတထံၣ်ဘၣ်လၢၤယၤနီတဂၤဘၣ်.

²⁶လၢတၢ်န့ၣ်အဃိ, မုၢ်တနံၤဃီအံၤယဘိးဘၣ်သ့ၣ်ညါသုသပှၢ်ကတၢၢ်လၢသုဝဲ တဂၤဂၤသုမ့ၢ်လီၤမၢ်ကွံာ်ဒီးတမ့ၢ်ယမူယဒါဘၣ်လီၤ.

²⁷အဂ့ၢ်ဒ်အံၤ, တၢ်လၢကစၢ်ယွၤတိာ်ပာ်ဝဲခဲလၢာ်ခဲဆ့န့ၣ်, ယတပာ်ခူသူၣ်ယဲဘၣ်ဒီးဘိးဘၣ်သ့ၣ်ညါသုလီၤ.

²⁸အံးထွဲကွၢ်ထွဲလီၤသုသးဒၣ်ဝဲ, ဒီးအံးထွဲကွၢ်ထွဲသိခဲလၢာ်လၢသးစီဆှံပာ်လီၤတ့ၢ်ဝဲလၢသု တၢ်အံးတၢ်ကွၢ်အပူၤန့ၣ်တက့ၢ်. ကဲထီၣ်ပှၤကွၢ်သိတဖၣ် လၢကစၢ်ယွၤအတၢ်အိၣ်ဖှိၣ်အဂီၢ်, တၢ်အိၣ်ဖှိၣ်လၢအဝဲဒုးကဲထီၣ်အီၤဆူ အတၢ်ဒၣ်ဝဲခီဖျိအဖိခွါအတၢ်သံန့ၣ်တက့ၢ်.

²⁹ယသ့ၣ်ညါယဲဒၣ်လၢယဟးထီၣ်ဝံၤအလီၢ်ခံန့ၣ်, ထွံၣ်မံၤအဒူတဖၣ်ကဟဲနုာ်လီၤဆူသုကျါ, ဒီးတပျဲပူၤသိတဖၣ် န့ၣ်ဘၣ်.

³⁰ဆၢကတီၢ်ကတုၤဃီၤဝဲဖဲပှၤတနီၤလၢသုသိးသုကျါဒၣ်ဝဲ ကလီန့ၢ်တၢ်ဒ်သိးအကကွဲန့ၢ်လွဲန့ၢ်အပျဲၢ်အဘီၣ်တဖၣ်ဆူ အအိၣ်လီၤ.

³¹လၢတၢ်န့ၣ်အဃိ, အိၣ်ပလီၢ်သူၣ်ပလီၢ်သးဒီးသ့ၣ်နီၣ်ထီၣ်လၢ, သၢနံၣ်အတီၢ်ပူၤလၢမုၢ်ဆါဆဲးလၢမုၢ်နၤယသိၣ်လီၤသီလီၤဒီး ဟ့ၣ်ပလီၢ်သုလၢမဲာ်ထံမဲာ်နိအဒိၣ်အအါအပူၤန့ၣ်တက့ၢ်.

³²ဒီးခဲကနံၣ်အံၤ, ယဟ့ၣ်လီၤသုဆူကစၢ်ယွၤအတၢ်အံးတၢ်ကွၢ်ဒီးတၢ်ကစီၣ်ဘၣ်ဃး အဝဲဒၣ်အဘျုးအဖှိၣ်အပူၤ, လၢအမၤထီၣ်မၤထီသုသ့ဝဲဒီးဟ့ၣ်သုတၢ်ဆိၣ်ဂ့ၤဆိၣ်ဝါလၢ အကတဲာ်ကတီၤပာ်ဝဲလၢအပှၤဂီၢ်မုၢ်ခဲလၢာ်အဂီၢ်န့ၣ်လီၤ.

³³ယတသးလီသးကွံပှၤနီတဂၤအစ့မ့ၢ်ဂ့ၤ, ထူမ့ၢ်ဂ့ၤ, တၢ်ကူတၢ်ကၤမ့ၢ်ဂ့ၤန့ၣ်ဘၣ်.

³⁴သုနီၢ်ကစၢ်ဒၣ်သုဝဲသုသ့ၣ်ညါလၢယဖံးတၢ်မၤတၢ်လၢယစု ဒၣ်ယဲ, ဒီးမၤန့ၢ်တၢ်ခဲလၢာ်လၢယတံၤသကိးဒီးယၤပန့ၢ်ဘၣ် အလီၢ်အိၣ်တဖၣ်လီၤ.

³⁵လၢတၢ်ကိးမံၤဒဲးအပူၤန့ၣ်, ယဒုးနဲၣ်တ့ၢ်သုလၢပကဘၣ်မၤတၢ်ဆူၣ်ဆူၣ်လၢတၢ်မၤစၢၤ ပှၤဂံၢ်စၢ်ဘါစၢ်တဖၣ်အဂီၢ်ဒီးတဘျီဃီသ့ၣ်နီၣ်ထီၣ်ကစၢ် ယ့ၣ်ၡူးအတၢ်ကတိၤလၢအစံးဝဲ, ‘ဟ့ၣ်တၢ်န့ၣ်ဘၣ်ဆိၣ်ဂ့ၤအါန့ၢ်ဒံးဒိးန့ၢ်တၢ်တက့ၢ်လီၤ.’

³⁶ဖဲစီၤပီလူးကတိၤတၢ်ဝံၤန့ၣ်, အဝဲတီၤလီၤဃုာ်ဒီးအဝဲသ့ၣ်ကိးဂၤဒဲးဒီးဃ့ဘါထုကဖၣ် တၢ်လီၤ.

³⁷အဝဲသ့ၣ်ကိးဂၤဒဲးဟီၣ်ဝဲဖဲအဖိးဃာ်အီၤဒီးနၢမူအီၤ ဒီးဆၢဂ့ၤဆၢဝါအီၤအခါန့ၣ်လီၤ.

³⁸အဝဲသ့ၣ်အသးအုးလီၤဆီဒၣ်တၢ်မ့ၢ်လၢအဝဲစံးဘၣ်တ့ၢ် အဝဲသ့ၣ်, “သုတထံၣ်ဘၣ်လၢၤယၤနီတဘျီဘၣ်” အဃိန့ၣ်လီၤ. ဒီးအဝဲသ့ၣ်ဆှၢလီၤအီၤဆူကဘီပူၤလီၤ.