Read S'gaw Karen မၤတၢ် 21 Bible Online

မၤတၢ် 21 - S'gaw Karen bible

မၤတၢ် 21

¹ပဆၢဂ့ၤဆၢဝါအဝဲသ့ၣ်ဒီးဟးထီၣ်ကွံာ်ဖဲန့ၣ်လီၤ. ပဒိးကဘီဒီးလဲၤခီဂာ်တၢ်လိၤလိၤဝံၤအလီၢ်ခံပလဲၤတုၤဖဲ ကီးကိၣ်န့ၣ်လီၤ. မုၢ်ဆ့ၣ်ထီၣ်တနံၤန့ၣ်ပတုၤဃီၤဖဲကီးရဒူး, ဒီးပလဲၤပဝဲဆူဝ့ၢ်ပတါရါလီၤ.

²ဖဲန့ၣ်ပထံၣ်ကဘီတဘ့ၣ်လၢအကလဲၤဆူကီၢ်ဖံၤနံက့ၤလီၤ. လၢတၢ်န့ၣ်အဃိ, ပဒိးထီၣ်ကဘီန့ၣ်ဒီးဟးထီၣ်ကွံာ်ဖဲန့ၣ်လီၤ.

³ဖဲပလဲၤတၢ်ဒီးတုၤတၢ်လီၢ်ဖဲကီးကူပြူးဟဲအိၣ်ဖျါထီၣ်န့ၣ်, ပလဲၤလၢအကလံၤထံးတကပၤဒီးလဲၤပဝဲဆူကီၢ်စူၤရံလီၤ. ပလဲၤထီၣ်ဆူထံကၢၢ်ခိၣ်ဖဲဝ့ၢ်ထါယၢၣ်ဖဲကဘီကပာ်လီၤ အတၢ်ဖိတၢ်လံၤလၢတၢ်ပဒၢးအီၤန့ၣ်လီၤ.

⁴ပထံၣ်ပှၤစူၢ်က့ၤနာ်က့ၤတၢ်ဖဲန့ၣ်တနီၤ, ဒီးအိၣ်ဒီးအဝဲသ့ၣ်တနွံလီၤ. အဝဲသ့ၣ်တဖၣ်န့ၣ်သးစီဆှံထိၣ်ဂဲၤအီၤသတးဒီး, တဲဘၣ်စီၤပီလူးလၢအသုတလဲၤဆူဝ့ၢ်ယရူၤၡလ့ၣ်တဂ့ၤန့ၣ်လီၤ.

⁵ဘၣ်ဆၣ်ဒီးဖဲတၢ်ဆၢကတီၢ်ဘၣ်ဝဲန့ၣ်, ပဟးထီၣ်ဒီးလဲၤကဒီးတၢ်လီၤ. အဝဲသ့ၣ်ခဲလၢာ်ဃုာ်ဒီးအဖိအမါတဖၣ်လဲၤဆှၢလီၤပှၤဆူဝ့ၢ်အချၢ တုၤလၢထံကၢၢ်ခိၣ်ဒီးဖဲန့ၣ်, ပဝဲခဲလၢာ်ပတီၤလီၤဒီးဃ့ဘါထု ကဖၣ်တၢ်လီၤ.

⁶အန့ၣ်ဝံၤဒီးပဆၢဂ့ၤဆၢဝါလိာ်ပသးတဂၤဒီးတဂၤ, ဒီးပက့ၤထီၣ်က့ၤဆူကဘီတဘ့ၣ်န့ၣ်အဖီခိၣ်ဖဲအဝဲသ့ၣ် တခီက့ၤက့ၤဝဲဆူအဟံၣ်န့ၣ်လီၤ.

⁷ပလဲၤကဒီးတၢ်လၢကဘီစးထီၣ်ဖဲဝ့ၢ်ထါယၢၣ်ဒီးဆူဝ့ၢ်ပတလ့း မဲဒီးဖဲန့ၣ်, ပထံၣ်လိာ်သးဒီးအပျဲၢ်အဘီၣ်တဖၣ်ဒီးအိၣ်ဒီး အဝဲသ့ၣ်တသီလီၤ.

⁸မုၢ်ဆ့ၣ်ထီၣ်တနံၤန့ၣ်ပဟးထီၣ်ဒီးလဲၤတုၤလၢဝ့ၢ်ကဲၤစါရံၤလီၤ. ဖဲန့ၣ်ပလဲၤဆူပှၤစိာ်တၢ်သးခုကစီၣ်စီၤဖံလံးပူးအဟံၣ်, ဒီးအိၣ်ဒီးအီၤလီၤ. အဝဲဒၣ်မ့ၢ်ပှၤလၢအဘၣ်တၢ်ဃုထၢထီၣ်အီၤဖဲဝ့ၢ်ယရူၤၡလ့ၣ်နွံ ဂၤအကျါတဂၤလီၤ.

⁹အဝဲဒၣ်အိၣ်ဒီးအဖိမုၣ်မုၣ်ကနီၤလွံၢ်ဂၤ, လၢအတဲဖျါထီၣ်ကစၢ်ယွၤအတၢ်ကစီၣ်န့ၣ်လီၤ.

¹⁰ပအိၣ်ဖဲန့ၣ်စှၤနံၤစှၤသီဝံၤအလီၢ်ခံ, ဝံတဂၤလၢအမံၤမ့ၢ်စီၤအကၤဘူးဟဲတုၤဝဲလၢကီၢ်ယူဒၤလီၤ.

¹¹အဝဲဒၣ်ဟဲဆူပအိၣ်, ဟံးထီၣ်စီၤပီလူးအယီၢ်တကိး, စၢလီၤက့ၤအစုအခီၣ်ဒၣ်ဝဲလၢယီၢ်တကိးအဝဲန့ၣ်ဒီးစံးဝဲ, “သးစီဆှံစံးဝဲဒၣ်, ယီၢ်တကိးအဝဲအံၤအကစၢ်န့ၣ်ပှၤယူဒၤဖိဖဲ ဝ့ၢ်ယရူၤၡလ့ၣ်တဖၣ်ကစၢဃာ်အီၤဒ်သိးအံၤ, ဒီးအဝဲသ့ၣ်ကဟ့ၣ်လီၤကွံာ်အီၤဆူပှၤကလုာ်ဂၤတဖၣ်အစုပူၤလီၤ.

¹²ဖဲပနၢ်ဟူတၢ်အံၤန့ၣ်, ပဝဲဒီးပှၤအဂၤဖဲန့ၣ်တဖၣ်ပဃ့ကညးစီၤပီလူးဒ်သိးအသုတလဲၤ ဆူဝ့ၢ်ယရူၤၡလ့ၣ်တဂ့ၤန့ၣ်လီၤ.

¹³ဘၣ်ဆၣ်ဒီးအဝဲဒၣ်စံးဆၢဝဲ, “သုဟီၣ်သုယၢၤဒ်သိးအံၤဒီးမၤသဘှံးယသးဘၣ်မနုၤ အဃိလဲၣ်. ယအိၣ်ကတဲာ်ကတီၤယသးတမ့ၢ်ထဲလၢယကဘၣ် တၢ်စၢဃာ်ယၤဖဲဝ့ၢ်ယရူၤၡလ့ၣ်န့ၣ်ဘၣ်. မ့မ့ၢ်လၢယကသံဖဲန့ၣ်လၢကစၢ်ယ့ၣ်ၡူးအဂီၢ်ဒၣ်လဲာ်န့ၣ်လီၤ.”

¹⁴ပတဲအီၤတန့ၢ်ဘၣ်အဃိ, ပဆိကတီၢ်ပတၢ်ဃ့ကညးဒီးစံး, “မ်ကစၢ်အတၢ်ဘၣ်အသးဘၣ်တၢ်မၤလၢထီၣ်ပှဲၤထီၣ်အီၤတက့ၢ်.”

¹⁵ပအိၣ်ဖဲန့ၣ်တစိၢ်တလီၢ်ဝံၤ, ပကတဲာ်ကတီၤထီၣ်ပတၢ်ဖိတၢ်လံၤဒီးလဲၤကဒီးဆူဝ့ၢ် ယရူၤၡလ့ၣ်လီၤ.

¹⁶အပျဲၢ်အဘီၣ်ဖဲဝ့ၢ်ကဲၤစါရံၤတနီၤလဲၤစ့ၢ်ကီးဒီးပှၤ, ဒီးဆှၢပှၤဆူပှၤတဂၤလၢပကဘၣ်လဲၤအိၣ်သမှံၤဒီးအီၤ, ပှၤကီးကူပြူးဖိစီၤမနါစိၣ်လၢအမ့ၢ်တ့ၢ်အပျဲၢ်အဘီၣ် လၢပျၢၤလံၤလံၤတဂၤအဟံၣ်န့ၣ်လီၤ.

¹⁷ဖဲပလဲၤတုၤဝ့ၢ်ယရူၤၡလ့ၣ်န့ၣ်ပှၤစူၢ်က့ၤနာ်က့ၤတၢ်တဖၣ် တူၢ်လိာ်မုာ်ပှၤလၢတၢ်သူၣ်ခုသးခုအပူၤလီၤ.

¹⁸မုၢ်ဆ့ၣ်ထီၣ်တနံၤန့ၣ်, စီၤပီလူးလဲၤဒီးပှၤဒ်သိးအကအိၣ်သကိး စီၤယၤကိာ်, ဒီးတၢ်အိၣ်ဖှိၣ်အပှၤသူၣ်က့သးပှၢ်တဖၣ်အိၣ်ဝဲဖဲန့ၣ် ကိးဂၤဒဲးလီၤ.

¹⁹စီၤပီလူးကတိၤဆၢဂ့ၤဆၢဝါအဝဲသ့ၣ်ဝံၤဒီး, တဲဖျါထီၣ်ဝဲလၢလၢပှဲၤပှဲၤတၢ်ခဲလၢာ်လၢကစၢ်ယွၤမၤတ့ၢ်ဝဲ လၢပှၤကလုာ်ဂၤတဖၣ်အကျါခီဖျိအဝဲဒၣ်အတၢ်ဖံးတၢ်မၤ န့ၣ်လီၤ.

²⁰အဝဲသ့ၣ်နၢ်ဟူအဝဲအတၢ်စံးတၢ်ကတိၤဝံၤဒီး, စံးထီၣ်ပတြၢၤကစၢ်ယွၤကိးဂၤဒဲးလီၤ. အန့ၣ်ဝံၤဒီးစံးဝဲ, “ဒီပုၢ်ဝဲၢ်စီၤပီလူးဧၢ, နကထံၣ်လၢပှၤယူဒၤဖိလၢအကဲထီၣ် ပှၤစူၢ်က့ၤနာ်က့ၤတၢ်အိၣ်ဝဲလၢအကထိဒီးအကထိတဖၣ်, ဒီးအဝဲသ့ၣ်ခဲလၢာ်ပာ်ဒိၣ်ပှၤယူဒၤဖိအတၢ်သိၣ်တၢ်သီလီၤ.

²¹အဝဲသ့ၣ်ဘၣ်တၢ်စံးဘၣ်တဲဘၣ်အီၤလၢနဂ့ၢ်, လၢနသိၣ်လိတ့ၢ်ပှၤယူဒၤဖိအိၣ်ဖဲထံဂၤကီၢ်ဂၤတဖၣ်ဒ်သိး အကညိကွံာ်စီၤမိၤၡ့အတၢ်သိၣ်တၢ်သီ, ဒီးလၢအသုတကူးတရံးအဖိတဖၣ်ဒီးအသုတမၤထွဲပိာ်ထွဲ ယူဒၤအလုၢ်အလၢ်တဖၣ်, တဂ့ၤအဂီၢ်န့ၣ်လီၤ.

²²နဟဲတုၤလံအဂ့ၢ်န့ၣ်အဝဲသ့ၣ်ကနၢ်ဟူဘၣ်ဝဲသပှၢ်ကတၢၢ်လီၤ. လၢတၢ်န့ၣ်အဃိ, ပကမၤဒ်လဲၣ်.

²³မၤဒ်ပစံးဘၣ်နၤအသိးတက့ၢ်. ပှၤအိၣ်ဝဲဒၣ်ဖဲအံၤလွံၢ်ဂၤလၢအဆိၣ်လီၤအသးလၢယွၤ အမဲာ်ညါလီၤ.

²⁴လဲၤဃုာ်ဒီးအဝဲသ့ၣ်ဒီးမၤဃုာ်သကိးတၢ်မၤကဆှီထီၣ်သး အလုၢ်အလၢ်ဒီးအီၤဒီးဟ့ၣ်လီၤအတၢ်လၢာ်ဘူၣ်လၢာ်စ့ၤ တက့ၢ်. တုၤနုၤတစု, အဝဲသ့ၣ်လူၤအခိၣ်ကသ့ဝဲလီၤ. လၢကျဲဒ်အံၤအပူၤန့ၣ်, ပှၤကိးဂၤဒဲးကသ့ၣ်ညါလၢနဂ့ၢ်နကျိၤလၢအဘၣ်တၢ်တဲအီၤတဖၣ် တမ့ၢ်ဝဲတီဝဲနီတမံၤဘၣ်, ဒီးလၢနနီၢ်ကစၢ်ဒၣ်နဲနအိၣ်မူပိာ်ထွဲစီၤမိၤၡ့အတၢ်သိၣ်တၢ် သီအခံကစီဒီန့ၣ်လီၤ.

²⁵မ့မ့ၢ်ပှၤကလုာ်ဂၤလၢအကဲထီၣ်ပှၤစူၢ်က့ၤနာ်က့ၤတၢ်တဖၣ်န့ၣ်, ပဆှၢလီၤလံလံာ်ပရၢတဘ့ၣ်ဆူအအိၣ်ဒီးတဲဘၣ်အီၤလၢပအၢၣ်လီၤ စံၣ်ညီၣ်တ့ၢ်ပဝဲလၢတၢ်အီၣ်တမံၤလၢ်လၢ်လၢအဘၣ်တၢ်လုၢ် ထီၣ်အီၤဆူတၢ်ဂီၤတၢ်ဖီၣ်အအိၣ်မ့ၢ်ဂ့ၤ, တၢ်သွံၣ်မ့ၢ်ဂ့ၤ, ဆၣ်ဖိကီၢ်ဖိလၢတၢ်စံၢ်သံအီၤမ့ၢ်ဂ့ၤ, အသုတအီၣ်ဝဲတဂ့ၤ. ဒီးလၢအကဘၣ်ဟးဆှဲးတၢ်မၤကမၣ်မုၣ် ကမၣ်ခွါန့ၣ်လီၤ.

²⁶လၢတၢ်န့ၣ်အဃိစီၤပီလူးလဲၤဒီးပှၤလွံၢ်ဂၤန့ၣ်, ဒီးမုၢ်ဆ့ၣ်ထီၣ်တနံၤန့ၣ်မၤကဆှီအသးဒီးအဝဲသ့ၣ်ဒ်ယူဒၤ အလုၢ်အလၢ်အိၣ်ဝဲအသိးန့ၣ်လီၤ. အန့ၣ်ဝံၤအလီၢ်ခံ, အဝဲဒၣ်လဲၤဆူတၢ်လုၢ်ဟံၣ်အပူၤဒီးဟ့ၣ်ထီၣ်တၢ်ဘိးဘၣ် သ့ၣ်ညါလၢတၢ်မၤကဆှီထီၣ်ကယံာ်ဝဲအသီဆံးအါဒီးဖဲ အနံၤအသီပှဲၤထီၣ်န့ၣ်, တၢ်လုၢ်တၢ်ပာ်ကဘၣ်တၢ်မၤအီၤလၢအဝဲသ့ၣ်တဂၤဘၣ်တဂၤ အဂီၢ်န့ၣ်လီၤ.

²⁷ဖဲနွံသီဘူးကပှဲၤထီၣ်န့ၣ်, ပှၤယူဒၤဖိလၢကီၢ်အၤစံတနီၤထံၣ်စီၤပီလူးလၢတၢ်လုၢ်ဟံၣ် အပူၤလီၤ. အဝဲသ့ၣ်မၤတၢထီၣ်တၢလီၤပှၤဂီၢ်မုၢ်ဒီဖုညါဒီးပှၤစှီၤ ဃာ်စီၤပီလူးလီၤ.

²⁸အဝဲသ့ၣ်ကိးထီၣ်ဝဲ, “အံၣ်စရ့လးဖိသ့ၣ်ဧၢ, မၤစၢၤပှၤတက့ၢ်. ပှၤတဂၤအံၤမ့ၢ်ပှၤတဂၤဃီလၢအလဲၤသကုၤဆးဒးဒီးသိၣ်လိပှၤ ကိးဂၤဒဲးတၢ်လၢအထီဒါပှၤအံၣ်စရ့လးဖိ, စီၤမိၤၡ့အတၢ်သိၣ်တၢ်သီ, ဒီးတၢ်လုၢ်ဟံၣ်တဖျၢၣ်အံၤန့ၣ်လီၤ. ဒီးခဲကနံၣ်အံၤ, အဝဲဟဲကိးဃုာ်ဒၣ်လဲာ်ပှၤကလုာ်ဂၤတနီၤဆူတၢ်လုၢ်ဟံၣ်တဖျၢၣ် အံၤအပူၤ, ဒီးမၤဘၣ်အၢတၢ်လီၢ်စီဆှံအဝဲအံၤန့ၣ်လံ.”

²⁹(အဝဲသ့ၣ်စံးတၢ်ဒ်သိးအံၤန့ၣ်မ့ၢ်လၢအထံၣ်ဘၣ်ပှၤအ့းဖ့းစူး ဖိစီၤတြီဖံမူးတပူၤဃီဒီးစီၤပီလူးလၢဝ့ၢ်ပူၤ, ဒီးအဝဲသ့ၣ်ဆိကမိၣ်ဝဲလၢစီၤပီလူးလဲၤကိးနုာ်အီၤဆူတၢ် လုၢ်ဟံၣ်အပူၤအဃိန့ၣ်လီၤ.)

³⁰တၢ်တၢထီၣ်တၢလီၤဝဲလၢဝ့ၢ်ဒီဖျၢၣ်ညါ, ဒီးပှၤဂီၢ်မုၢ်တဖၣ်ဃ့ၢ်ဖှိၣ်ဝဲဆူစီၤပီလူးအအိၣ်, စှီၤဃာ်အီၤဒီးတွံၢ်ထီၣ်ကွံာ်အီၤဆူတၢ်လုၢ်ဟံၣ်အချၢလီၤ. တဘျီဃီဖဲန့ၣ်, တၢ်လုၢ်ဟံၣ်အတြဲၤတဖၣ်ဘၣ် တၢ်ကးတံာ်ဃာ်အီၤလီၤ.

³¹ဖဲကမျၢၢ်အအၢအသီတဖုအံၤ ဂုာ်မၤသံစီၤပီလူးအဆၢကတီၢ်န့ၣ်, တၢ်ကစီၣ်ဘၣ်တၢ်ဆှၢထီၣ်အီၤဆူ ပှၤရိမ့ၤသုးဖိတကထိအခိၣ်အအိၣ်, လၢယရူၤၡလ့ၣ်ဒီဝ့ၢ်ညါတၢထီၣ်တၢလီၤဝဲဒၣ်လံန့ၣ်လီၤ.

³²တဘျီဃီအဝဲဒၣ်ကိးထီၣ်သုးဖိတကယၤအခိၣ်တဖၣ်ဒီးသုးဖိ တဖၣ်ဒီးလဲၤလီၤသဖှိဝဲဆူပှၤဂီၢ်မုၢ်တဖၣ်အအိၣ်လီၤ. ဖဲပှၤဂီၢ်မုၢ်တဖၣ်ထံၣ်ဘၣ်အဝဲဒၣ်ဒီးသုးဖိတဖၣ်န့ၣ်, အဝဲသ့ၣ်ဆိကတီၢ်ကွံာ်အတၢ်တီၢ်စီၤပီလူးန့ၣ်လီၤ.

³³ပှၤသုးဖိတကထိအခိၣ်လဲၤဃီၤဝဲဆူစီၤပီလူးအအိၣ်, ဖီၣ်အီၤဒီးဟ့ၣ်လီၤအကလုၢ်ဒ်သိးပှၤကစၢဃာ်အီၤလၢပျံၤထးခံ ဘိလီၤ. အန့ၣ်ဝံၤဒီး အဝဲဒၣ်သံကွၢ်ဝဲ, “ပှၤတဂၤအံၤမ့ၢ်မတၤလဲၣ်. ဒီးအဝဲဒၣ်မၤတ့ၢ်တၢ်မနုၤတမံၤလဲၣ်.”

³⁴ပှၤတနီၤလၢပှၤကမျၢၢ်အကျါကိးပသူထီၣ်တၢ်တမံၤ, ဒီးအဂၤတဖၣ်ကိးထီၣ်ဝဲတမံၤဒၣ်လီၤ. တၢ်သဘံၣ်ဘုၣ်အိၣ်ဝဲတုၤဒၣ်လဲာ်တၢ်မၤအသးနီၢ်နီၢ်မ့ၢ်တၢ်မနုၤ လဲၣ်န့ၣ်, ပှၤသုးဖိတကထိအခိၣ်ဃုသ့ၣ်ညါဝဲတဘၣ်ဘၣ်. လၢတၢ်န့ၣ်အဃိအဝဲဟ့ၣ်လီၤအကလုၢ်လၢအပှၤတဖၣ်ကက့ၤ ကိးစီၤပီလူးဆူသုးဖိအိၣ်တၢ်အလီၢ်, တိာ်ပူၤန့ၣ်လီၤ.

³⁵ဖဲစီၤပီလူးဒီးသုးဖိတဖၣ်တုၤဃီၤဃီအခီၣ်ထံးန့ၣ်အဝဲသ့ၣ်ဘၣ် စိာ်ထီၣ်စီၤပီလူး, မ့ၢ်လၢကမျၢၢ်အၢသီတဖုအံၤအၢသီထီၣ်နးနးကလဲာ်အဃိလီၤ.

³⁶ကမျၢၢ်အၢသီဒီဖုညါဟဲလူၤအီၤဒီးကိးပသူထီၣ်ဝဲ, “မၤသံအီၤ တက့ၢ်.”

³⁷ဖဲပှၤသုးဖိတဖၣ်သါကဒုးနုာ်လီၤစီၤပီလူးဆူတိာ်အပူၤန့ၣ်, အဝဲဒၣ်ကတိၤတၢ်ဒီးပှၤသုးဖိတကထိအခိၣ်တဂၤဒီးစံး, “ယကတိၤတၢ်ဒီးနၤသ့ကစီဒီဧါ.” ပှၤသုးဖိတကထိအခိၣ် သံကွၢ်အီၤ, “နကတိၤကြံးခ်အကျိာ်ဘၣ်ဧါ.

³⁸မ့မ့ၢ်ဒ်န့ၣ်ဒီး, နတမ့ၢ်ပှၤအဲၤကူပတူးဖိ, လၢအပူၤကွံာ်တယံာ်ဒံးဘၣ်န့ၣ်ဒုးအိၣ်ထီၣ်တၢ်ပူထီၣ်လီထီၣ် ဒီးဆှၢထံဂ့ၢ်ကီၢ်ဂ့ၢ်အပှၤအၢပှၤသီအဂၤလွံၢ်ကထိဆူပှၢ် မုၢ်ကနၢန့ၣ်ဘၣ်သၢၣ်.”

³⁹စီၤပီလူးစံးဆၢဝဲ, “ယမ့ၢ်ပှၤယူဒၤဖိတဂၤ, ယအိၣ်ဖျဲၣ်ထီၣ်ဖဲဝ့ၢ်တၢ်စူးဘၣ်ဃးဒီးကီၢ်ကံၤလံၤကံ, ဝ့ၢ်လၢအမံၤဟူသၣ်ဖျါတဖျၢၣ်အပှၤဝ့ၢ်ဖိတဂၤန့ၣ်လီၤ. ဝံသးစူၤဟ့ၣ်ယၤအခွဲးလၢယကကတိၤတၢ်ဒီးပှၤဂီၢ်မုၢ်တဖၣ် တက့ၢ်.”

⁴⁰ပှၤသုးဖိတကထိအခိၣ်ဟ့ၣ်လီၤအခွဲးသတးဒီး, စီၤပီလူးဆၢထၢၣ်ဖဲဃီအခိၣ်ထိးဒီးဝံၢ်ဝၢ်အစုဆူပှၤဂီၢ် မုၢ်တဖၣ်အအိၣ်လီၤ. ဖဲအဝဲသ့ၣ်အိၣ်ဘှီၣ်လံန့ၣ်, စီၤပီလူးကတိၤတၢ်ဒီးအဝဲသ့ၣ်လၢဧ့ၤဘြံၤအကျိာ်လီၤ.