Read S'gaw Karen မၤတၢ် 24 Bible Online

မၤတၢ် 24 - S'gaw Karen bible

မၤတၢ် 24

¹ယဲၢ်သီပူၤကွံာ်ဝံၤအလီၢ်ခံန့ၣ်, ပှၤလုၢ်တၢ်အခိၣ်အဒိၣ်ကတၢၢ်စီၤအနၤနံဃုာ်ဒီးပှၤယူဒၤဖိ ကရၢအခိၣ်အနၢ်တနီၤဒီးပီၢ်ရီတဂၤလၢအမံၤမ့ၢ်စီၤတ့ၢ်တူးလူး, လဲၤဝဲဒၣ်ဆူဝ့ၢ်ကဲၤစါရံၤန့ၣ်လီၤ. အဝဲသ့ၣ်လဲၤထီၣ်ဆူပဒိၣ်ဖးဒိၣ်စီၤဖ့လံးအမဲာ်ညါဒီးပာ်တၢ် ကမၣ်ထီဒါစီၤပီလူးလီၤ.

²စီၤပီလူးဘၣ်တၢ်ကိးနုာ်အီၤ, ဒီးစီၤတ့ၢ်တူးလူးကတိၤထီၣ်တၢ်ဒီးပာ်တၢ်ကမၣ်ထီဒါအီၤ ဒ်လၢလာ်အသိးလီၤ. “ပဒိၣ်ကစၢ်စီၤဖ့လံးဧၢ, နမ့ၢ်ပှၤခိၣ်ပှၤနၢ်လၢအကူၣ်ဘၣ်ဖးသ့မးတဂၤအဃိပဒိးန့ၢ်ဘၣ် တၢ်ဃူတၢ်ဖိး, တၢ်မုာ်တၢ်ပၢၤယံာ်တ့ၢ်လံဒီးတၢ်လဲလိာ်လၢ အလီၢ်အိၣ်တဖၣ်ဘၣ်တၢ်ဒုးအိၣ်ထီၣ်အီၤလၢထံကီၢ်တဘ့ၣ်အံၤ အတၢ်ဂ့ၤအဂီၢ်လီၤ.

³တၢ်သ့ၣ်တဖၣ်အံၤပတူၢ်လိာ်မုာ်အီၤလၢတၢ်လီၢ်ကိးပူၤဒဲး ကိးဆၢကတီၢ်ဒဲး, ဒီးပစံးဘျုးဘၣ်နၤအဒိၣ်အအါလီၤ.

⁴ယတအဲၣ်ဒိးဟံးန့ၢ်နဆၢကတီၢ်အါကဲၣ်ဆိးဘၣ်. ဘၣ်ဆၣ်ယဃ့ကညးနၤလၢနကဝံသးစူၤဒီးဒိကနၣ် ပတၢ်ဂ့ၢ်တၢ်ကျိၤလၢယကပာ်ဖျါထီၣ်အီၤလၢ တၢ်ကတိၤစှၤဘီအပူၤန့ၣ်တက့ၢ်.

⁵ပထံၣ်ဘၣ်ပှၤတဂၤအံၤလၢအမ့ၢ်ပှၤမၤတံာ်တာ်တၢ်လၢ အလီၤပျံၤလီၤဖုးတဂၤန့ၣ်လီၤ. အဝဲဒုးအိၣ်ထီၣ်တၢ်တၢထီၣ်တၢလီၤလၢပှၤယူဒၤဖိတဖၣ် အသိးအကျါသကုၤဟီၣ်ခိၣ်ဒီဘ့ၣ်ညါဒီးမ့ၢ်ဝဲပှၤနစၤရ့းဖိကရၢ အခိၣ်တဂၤလီၤ.

⁶အဝဲဒၣ်ဂုာ်ကျဲးစၢးစ့ၢ်ကီးဒ်သိးအကမၤတစီတဆှံဒီးမၤ ဘၣ်အၢတၢ်လုၢ်ဟံၣ်, သတးဒီးပဖီၣ်အီၤလီၤ. (ပပာ်လီၤပသးလၢပကစံၣ်ညီၣ်အီၤဒ်ပတၢ်သိၣ်တၢ်သီအိၣ်ဝဲ အသိးန့ၣ်လီၤ.

⁷ဘၣ်ဆၣ်ဒီး, ပှၤသုးဖိတကထိအခိၣ်စီၤလူၤစံဟဲဒီးဂုာ်န့ၢ် အီၤလၢတၢ်စုဆူၣ်ခီၣ်တကးအပူၤန့ၣ်လီၤ.

⁸အန့ၣ်ဝံၤဒီးစီၤလူၤစံဟ့ၣ်လီၤအကလုၢ်လၢပကဘၣ်ပာ်တၢ် ကမၣ်ထီဒါစီၤပီလူးလၢနမဲာ်ညါလီၤ.) နမ့ၢ်သံကွၢ်သံဒိး ပှၤတဂၤအံၤန့ၣ်, နနီၢ်ကစၢ်ဒၣ်နဲနကသ့ၣ်ညါဘၣ်လၢအအိၣ်, တၢ်ကမၣ်ကိးမံၤဒဲးလၢပပာ်လၢအဝဲဒၣ်အလိၤန့ၣ်လီၤ.”

⁹ပှၤယူဒၤဖိတဖၣ်စ့ၢ်ကီးပာ်တၢ်ကမၣ်ထီဒါစီၤပီလူးဒ်န့ၣ်အသိး, ဒီးစံးဝဲလၢတၢ်သ့ၣ်တဖၣ်အံၤခဲလၢာ်မ့ၢ်ဝဲတီဝဲန့ၣ်လီၤ.

¹⁰တုၤနုၤတစု, ပဒိၣ်ဖးဒိၣ်ဟ့ၣ်တၢ်ပနီၣ်လၢစီၤပီလူးကကတိၤ တၢ်ဒီးအဝဲဒၣ်စံးဝဲ, “ယသ့ၣ်ညါလၢနကဲတ့ၢ်စံၣ်ညီၣ်ကွီၢ်အါနံၣ်အါလါလၢပှၤ တကလုာ်အံၤအဖီခိၣ်, ဒီးလၢတၢ်န့ၣ်အဃိ, ယသးခုလၢယကကတိၤဒီဒၣ်ဘၣ်ယသးလၢနမဲာ်ညါန့ၣ်လီၤ.

¹¹ဒ်နနီၢ်ကစၢ်နဃုသ့ၣ်ညါနဲသ့အသိး, ယလဲၤထီၣ်ဘါယွၤဖဲဝ့ၢ်ယရူၤၡလ့ၣ်န့ၣ်ကအိၣ်ဒံးဒၣ်ထဲတဆံခံ သီဧိၤလီၤ.

¹²ပှၤယူဒၤဖိတဖၣ်အံၤတထံၣ်ယဂ့ၢ်လိာ်ဘှီလိာ်တၢ်ဒီးပှၤအိၣ် လၢတၢ်လုၢ်ဟံၣ်အပူၤနီတဂၤဘၣ်. ဒီးတထံၣ်စ့ၢ်ကီးယမၤတၢထီၣ်တၢလီၤပှၤဂီၢ်မုၢ်လၢဘူၣ်ဘျီၣ် အပူၤမ့ၢ်ဂ့ၤ, တၢ်လီၢ်အဂၤဖဲဝ့ၢ်ပူၤမ့ၢ်ဂ့ၤနီတတီၤဘၣ်.

¹³ဒ်န့ၣ်အသိး, တၢ်ကမၣ်လၢအဝဲသ့ၣ်ပာ်ထီၣ်လၢယလိၤန့ၣ်, အဝဲသ့ၣ်ဟ့ၣ်တၢ်အုၣ်အသးတသ့ဘၣ်.

¹⁴တၢ်လၢယအၢၣ်လီၤနၤမ့ၢ်တၢ်အံၤ, ယဘူၣ်ထီၣ်ဘါထီၣ်ပမိၢ်ပၢ်ဖံဖုလၢပျၢၤတဖၣ်အယွၤခီဖျိ ယပိာ်ကစၢ်အကျဲလၢအဝဲသ့ၣ်စံးလၢအကမၣ်န့ၣ်လီၤ. ဘၣ်ဆၣ်ဒီးယနာ်စ့ၢ်ကီးတၢ်ခဲလၢာ်လၢအအိၣ်ကွဲး အသးလၢစီၤမိၤၡ့အတၢ်သိၣ်တၢ်သီဒီးလၢဝံတဖၣ် အလံာ်ပူၤန့ၣ်လီၤ.

¹⁵ယအိၣ်ဒီးတၢ်မုၢ်လၢ်တမံၤဃီဒီးပှၤသ့ၣ်တဖၣ် အံၤလၢကစၢ်ယွၤအပူၤ, လၢပှၤကိးဂၤဒဲး, ပှၤအဂ့ၤမ့ၢ်ဂ့ၤ, ပှၤအအၢမ့ၢ်ဂ့ၤကဂဲၤထၢၣ်သမူထီၣ်က့ၤဝဲန့ၣ်လီၤ.

¹⁶လၢတၢ်န့ၣ်အဃိယဂုာ်ကျဲးစၢးယဲဒၣ်အဂ့ၤကတၢၢ်ထီဘိဒ်သိး ယကအိၣ်ဒီးသးလၢအသ့ၣ်ညါဒၣ်တၢ်လၢအဂ့ၤအပူၤလၢကစၢ်ယွၤဒီး ပှၤကညီအမဲာ်ညါန့ၣ်လီၤ.

¹⁷ယဟးဖးဒီးဝ့ၢ်ယရူၤၡလ့ၣ်ယံာ်ဝဲဒၣ်စှၤနံၣ်ဝံၤအလီၢ်ခံ, ယလဲၤကဒီးဖဲန့ၣ်ဒ်သိးယကလဲၤဆှၢကျိၣ်စ့တနီၤဆူယပှၤ ကလုာ်ဒၣ်ယဲအအိၣ်ဒီးလၢယကလုၢ်ထီၣ်ပာ်ထီၣ်တၢ် အဂီၢ်လီၤ.

¹⁸အဝဲသ့ၣ်ထံၣ်န့ၢ်ယၤလၢတၢ်လုၢ်ဟံၣ်အပူၤဖဲယမၤကဆှီထီၣ် က့ၤယသးဒ်တၢ်ဘူၣ်တၢ်ဘါအလုၢ်အလၢ်အိၣ်ဝဲအသိးဝံၤ အလီၢ်ခံန့ၣ်လီၤ. ပှၤကမျၢၢ်တအိၣ်ဒီးယၤဖဲန့ၣ်ဘၣ်. ဒီးတၢ်တၢထီၣ်တၢလီၤတအိၣ်ဘၣ်.

¹⁹ဘၣ်ဆၣ်ဒီးပှၤယူဒၤဖိလၢကီၢ်အၤစံအိၣ်ဝဲဖဲန့ၣ်တနီၤ, ဒီးအဝဲသ့ၣ်မ့ၢ်အဲၣ်ဒိးပာ်တၢ်ကမၣ်လၢယလိၤန့ၣ်, ကြၢးဟဲဆူနမဲာ်ညါလၢအကစၢ်ဒၣ်ဝဲဒီးပာ်ဖျါထီၣ် တၢ်ဂ့ၢ်တဖၣ်န့ၣ်လီၤ.

²⁰မ့တမ့ၢ်ဘၣ်ဒီး, ပျဲပှၤဖဲအံၤသ့ၣ်တဖၣ်တဲဖျါထီၣ်တၢ်ကမၣ်လၢ အထံၣ်ဝဲလၢယပူၤ, ဖဲယအိၣ်ဆၢထၢၣ်လၢကီၣ်ကးအမဲာ်ညါအဆၢကတီၢ်န့ၣ်တက့ၢ်.

²¹မ့မ့ၢ်တၢ်လၢယမၤန့ၣ်အိၣ်ဝဲထဲတမံၤဧိၤလၢအမ့ၢ်ယတၢ် ကိးထီၣ်ယဲဖဲယအိၣ်ဆၢထၢၣ်လၢအဝဲသ့ၣ်အမဲာ်ညါ, ‘သုစံၣ်ညီၣ်ယၤတနံၤအံၤမ့ၢ်လၢယနာ်ပှၤသံကဂဲၤဆၢထၢၣ် သမူထီၣ်က့ၤအဃိန့ၣ်လီၤ.’

²²တုၤနုၤတစုစီၤဖ့လံးလၢအသ့ၣ်ညါတ့ၢ်ကစၢ်အကျဲအဂ့ၢ် ဂ့ၤဂ့ၤတဂၤန့ၣ်, ဆိကတီၢ်ကွံာ်တၢ်သမံသမိးတၢ်ဒီးစံးဝဲ, “ယကစံၣ်ညီၣ်သုတၢ်ဂ့ၢ်တၢ်ကျိၤတမံၤအံၤဖဲပှၤသုးဖိ တကထိအခိၣ်စီၤလူၤစံဟဲတုၤဝဲန့ၣ်လီၤ.”

²³အဝဲဒၣ်ဟ့ၣ်လီၤအကလုၢ်ဆူပှၤသုးဖိတကယၤအခိၣ်လၢကွၢ် ထွဲစီၤပီလူးန့ၣ်, ဒ်သိးအကခိးကွၢ်အီၤ, ဘၣ်ဆၣ်ကဟ့ၣ်အီၤတၢ်သဘျ့တဆံးတက့ၢ်ဒီးကပျဲအတံၤသကိး တဖၣ်မၤန့ၢ်အီၤတၢ်လၢအလိၣ်ဘၣ်ဝဲတဖၣ်န့ၣ်လီၤ.

²⁴စှၤသီပူၤကွံာ်ဝံၤအလီၢ်ခံန့ၣ်, စီၤဖ့လံးဟဲဒီးအမါနီၢ်ဒြူၤစံးလ့ၤလၢအမ့ၢ်ပှၤယူဒၤမုၣ်တဂၤ န့ၣ်လီၤ. အဝဲဒၣ်မၢပှၤလဲၤကိးန့ၢ်အီၤလၢစီၤပီလူးဒီးကနၣ်အဝဲ ကတိၤတၢ်ဘၣ်ဃးတၢ်စူၢ်တၢ်နာ်လၢယ့ၣ်ၡူးခရံာ်အပူၤ အဂ့ၢ်န့ၣ်လီၤ.

²⁵ဘၣ်ဆၣ်ဒီးဖဲစီၤပီလူးကတိၤကဒီးတၢ်ဘၣ်ဃးတၢ်ဂ့ၤတၢ်ဝါ, တၢ်ပၢၤသူၣ်ပၢၤသးဒီးမုၢ်စံၣ်ညီၣ်နံၤလၢအကဟဲအဂ့ၢ်န့ၣ်, စီၤဖ့လံးပျံၤတၢ်ဒီးစံးဝဲ, “နက့ၤသ့လံ. ယတၢ်ဆၢကတီၢ်မ့ၢ်အိၣ်န့ၣ်, ယကကိးဒံးနၤလီၤ.”

²⁶အဝဲအိၣ်စ့ၢ်ကီးဒီးတၢ်မုၢ်လၢ်လၢစီၤပီလူးကဟ့ၣ်အီၤ ကျိၣ်စ့တဆံးတက့ၢ်, ဒီးလၢတၢ်ဂ့ၢ်တမံၤအံၤအဃိအဝဲဒၣ် မၤလိာ်အီၤတလီၢ်လီၢ်, ဒ်သိးအကကတိၤတၢ်ဒီးအီၤအဂီၢ်န့ၣ်လီၤ.

²⁷ခံနံၣ်ဝံၤအလီၢ်ခံန့ၣ်, စီၤပီၤကံၤဖ့စတူးကဲထီၣ်က့ၤပဒိၣ်ဖးဒိၣ် လၢစီၤဖ့လံးအလီၢ်, ဒီးမ့ၢ်လၢစီၤဖ့လံးအဲၣ်ဒိးမၤအိၣ်အမဲာ် သၣ်လၢပှၤယူဒၤဖိတဖၣ်အဃိပာ်ဃာ်ဒံးစီၤပီလူးလၢဃိာ်ပူၤလီၤ.