Read S'gaw Karen မၤတၢ် 25 Bible Online

မၤတၢ် 25 - S'gaw Karen bible

မၤတၢ် 25

¹စီၤဖ့စတူးဟဲတုၤလၢကီၢ်တဘ့ၣ်န့ၣ်အပူၤသၢသီဝံၤအလီၢ်ခံန့ၣ်, အဝဲဒၣ်ဟးထီၣ်ဖဲဝ့ၢ်ကဲၤစါရံၤဒီးလဲၤဝဲဆူဝ့ၢ်ယရူၤၡလ့ၣ်န့ၣ်လီၤ.

²ပှၤလုၢ်တၢ်အခိၣ်အဒိၣ်ဒီးပှၤယူဒၤဖိအခိၣ်အနၢ်တဖၣ်ပာ်ဖျါထီၣ် တၢ်ကမၣ်လၢအပာ်ဝဲလၢစီၤပီလူးအလိၤန့ၣ်လီၤ. အဝဲသ့ၣ်ဃ့ ကညးစီၤဖ့စတူး,

³ဒ်သိးအကမၤစၢၤအဝဲသ့ၣ်ခီဖျိအဒုးဟဲစီၤပီလူးဆူဝ့ၢ်ယရူၤၡလ့ၣ်, အဂ့ၢ်မ့ၢ်လၢအဝဲသ့ၣ်ကူၣ်ထီၣ်တ့ၢ်ဝဲလၢအကမၤသံအီၤလၢကျဲ န့ၣ်လီၤ.

⁴စီၤဖ့စတူးစံးဆၢဝဲ, “စီၤပီလူးဘၣ်တၢ်ဒုးဃာ်အီၤလၢဃိာ်ပူၤ ဖဲဝ့ၢ်ကဲၤစါရံၤ, ဒီးတယံာ်ဘၣ်န့ၣ်ယနီၢ်ကစၢ်ဒၣ်ယဲယကက့ၤ ကဒါက့ၤဖဲန့ၣ်လီၤ.

⁵မၢသုပှၤခိၣ်ပှၤနၢ်တဖၣ်လဲၤဒီးယၤဆူဝ့ၢ်ကဲၤစါရံၤ, ဒီးအဝဲဒၣ်မ့ၢ်မၤတၢ်ကမၣ်လၢအကြၢးဒီးတၢ်စံၣ်ညီၣ် တမံၤမံၤန့ၣ်, မ်အဝဲသ့ၣ်ကပာ်တၢ်ကမၣ်လၢအလိၤန့ၣ် တက့ၢ်.”

⁶စီၤဖ့စတူးအိၣ်ကဒီးဖဲဝ့ၢ်ယရူၤၡလ့ၣ်ဃိးသီမ့တမ့ၢ်အသီ တဆံဝံၤအလီၢ်ခံလဲၤဝဲဆူဝ့ၢ်ကဲၤစါရံၤလီၤ. မုၢ်ဆ့ၣ်ထီၣ်တနံၤန့ၣ်, အဝဲဒၣ်ဆ့ၣ်နီၤလၢစံၣ်ညီၣ်ကွီၢ်အလီၢ်ဆ့ၣ်နီၤအလိၤဒီးဟ့ၣ်လီၤ အကလုၢ်ဒ်သိးစီၤပီလူးကဘၣ်တၢ်ဟဲဆှၢနုာ်အီၤလီၤ.

⁷ဖဲစီၤပီလူးဟဲတုၤန့ၣ်, ပှၤယူဒၤဖိလၢအဟဲတ့ၢ်ဝဲလၢဝ့ၢ်ယရူၤၡလ့ၣ်တဖၣ်အိၣ်ဆၢထၢၣ် ဝးတရံးအီၤဒီးပာ်တၢ်ကမၣ်အဃၢလၢအလိၤအါမံၤလၢ အဝဲသ့ၣ်ဟ့ၣ်တၢ်အုၣ်အသးတသ့ဘၣ်တဖၣ်န့ၣ်လီၤ.

⁸မ့မ့ၢ်စီၤပီလူးတခီကတိၤဒီဒၣ်အသးဒီးစံးဝဲ, “ယတမၤတ့ၢ်တၢ်ကမၣ်ထီဒါပှၤယူဒၤဖိအတၢ်သိၣ်တၢ်သီမ့ၢ်ဂ့ၤ, တၢ်လုၢ်ဟံၣ်မ့ၢ်ဂ့ၤ, ဒီးရိမ့ၤအစီၤပၤဖးဒိၣ်မ့ၢ်ဂ့ၤနီတမံၤဘၣ်.”

⁹စီၤဖ့စတူးအဲၣ်ဒိးမၤအိၣ်အမဲာ်သၣ်လၢပှၤယူဒၤဖိ တဖၣ်သတးဒီး, အဝဲသံကွၢ်စီၤပီလူး, “မ့ၢ်နကသးဆူၣ်လဲၤဆူဝ့ၢ်ယရူၤၡလ့ၣ်ဒ်သိးနကဘၣ်တၢ် သမံသမိးနၤလၢယမဲာ်ညါဖဲန့ၣ်ကစီဒီဧါ.”

¹⁰ဘၣ်ဆၣ်ဒီးစီၤပီလူးစံးဆၢအီၤ, “ယအိၣ်ဆၢထၢၣ်လၢစီၤပၤဖးဒိၣ်အကွီၢ်ဘျီၣ်အပူၤဒီး အအံၤမ့ၢ်တၢ်လီၢ်ဖဲယကြၢးဘၣ်တၢ်သမံသမိးယၤန့ၣ်လီၤ. ဒ်နသ့ၣ်ညါနဲဂ့ၤဂ့ၤအသိး, ယတမၤကမၣ်ဘၣ်ပှၤယူဒၤဖိ တဖၣ်နီတမံၤဘၣ်.

¹¹ယမ့ၢ်လုၣ်သ့ၣ်ခါပတာ်ဘၣ်ထံကီၢ်အတၢ်သိၣ်တၢ်သီဒီးမၤတၢ် တမံၤမံၤလၢအကြၢးဒီးတၢ်စံၣ်ညီၣ်သံန့ၣ်, ယတဃ့လၢယကပူၤ ဖျဲးဘၣ်. ဘၣ်ဆၣ်ဒီးတၢ်လၢအဝဲသ့ၣ်ပာ်ဖျါထီဒါယၤ တဖၣ်မ့ၢ်တတီတလိၤဘၣ်ဒီး, ပှၤဟ့ၣ်လီၤယၤဆူအဝဲသ့ၣ်အစုပူၤတသ့နီတဂၤဘၣ်. ယပတံထီၣ်တၢ်ဆူစီၤပၤဖးဒိၣ်အအိၣ်လီၤ.”

¹²တုၤနုၤတစုစီၤဖ့စတူးကူၣ်သကိးဖးသကိးဒီးအပှၤကူၣ် လိာ်တၢ်တဖၣ်, ဝံၤဒီးစံးဆၢစီၤပီလူး, “နပတံထီၣ်တၢ်ဆူစီၤပၤဖးဒိၣ် အအိၣ်လံ. လၢတၢ်န့ၣ်အဃိနကလဲၤဘၣ်ဆူစီၤပၤဖးဒိၣ် အအိၣ်လီၤ.”

¹³စှၤသီပူၤကွံာ်ဝံၤအလီၢ်ခံန့ၣ်, စီၤပၤအကြံးပၤဒီးနီၢ်ဘ့ၢ်နံက့ၤဟဲဆူဝ့ၢ်ကဲၤစါရံၤဒ် သိးအကဟဲအိၣ်သကိးစီၤဖ့စတူးဒီးပာ်ဖျါထီၣ်အတၢ် တူၢ်လိာ်ခီၣ်ဆၢအီၤန့ၣ်လီၤ.

¹⁴ဖဲအဝဲသ့ၣ်အိၣ်ဖဲန့ၣ်စှၤသီဝံၤအလီၢ်ခံန့ၣ်, စီၤဖ့စတူးပာ်ဖျါထီၣ်န့ၢ်စီၤပၤလၢစီၤပီလူးအဂ့ၢ်, ဒီးစံးဝဲ, “ပှၤအိၣ်ဝဲတဂၤလၢစီၤဖ့လံးပာ်လီၤတဲာ်တ့ၢ်အီၤဒ်ပှၤဃိာ် ဖိတဂၤအသိးန့ၣ်လီၤ.

¹⁵ဒီးဖဲယလဲၤဆူဝ့ၢ်ယရူၤၡလ့ၣ်န့ၣ်, ယူဒၤပှၤလုၢ်တၢ်အခိၣ်အဒိၣ်တဖၣ်ဒီးအပှၤသူၣ်က့သးပှၢ် တဖၣ်ဟဲပာ်ဖျါထီၣ်တၢ်ကမၣ်လၢအပာ်ဝဲလၢစီၤပီလူး အလိၤဒီးမၢယစံၣ်ညီၣ်အီၤလီၤ.

¹⁶ဘၣ်ဆၣ်ဒီးယစံးဘၣ်အဝဲသ့ၣ်လၢပဝဲပှၤရိမ့ၤဖိတဖၣ်အိၣ် ဒီးအလုၢ်အလၢ်လၢအကဒုးထံၣ်လိာ်ပှၤလၢအဘၣ်တၢ်လိာ် ကွီၢ်အီၤတဂၤဒီးပှၤလၢအလိာ်ကွီၢ်တၢ်တဖၣ်မဲာ်သကိးမဲာ်ဒ်သိး အကအိၣ်ဒီးအခွဲးအယာ်လၢအကကတိၤဒီဒၣ်အသးတချုး လၢတၢ်ဟ့ၣ်လီၤကွံာ်ပှၤလၢအဘၣ်တၢ်လိာ်ကွီၢ်အီၤတဂၤန့ၣ်လီၤ.

¹⁷လၢတၢ်န့ၣ်အဃိ, ဖဲအဝဲသ့ၣ်ဟဲတုၤဖဲအံၤန့ၣ်, ယတမၤ ယံာ်မၤနီၢ်ယသးဘၣ်. မုၢ်ဆ့ၣ်ထီၣ်တနံၤန့ၣ်, ယဆ့ၣ်နီၤလၢစံၣ်ညီၣ်ကွီၢ်အလီၢ်ဆ့ၣ်နီၤအလိၤဒီးဟ့ၣ်လီၤ ယကလုၢ်လၢပှၤတဂၤန့ၣ်ကဘၣ်တၢ်ဟဲဆှၢနုာ်အီၤလီၤ.

¹⁸ပှၤလၢအပာ်တၢ်ကမၣ်လၢအလိၤတဖၣ်ဂဲၤဆၢထၢၣ် ပာ်ဖျါထီၣ်အဝဲအတၢ်ကမၣ်လီၤ. ဘၣ်ဆၣ်ဒီးတၢ်ကမၣ်အအၢ အသီလၢယဆိကမိၣ်လၢအကပာ်ဝဲလၢအလိၤတဖၣ်န့ၣ်, တပာ်ဝဲနီတမံၤဘၣ်.

¹⁹အိၣ်ဒၣ်အဝဲသ့ၣ်ဂ့ၢ်လိာ်ဘှီလိာ်အသးဒီးအီၤဘၣ်ဃး အတၢ်ဘူၣ်တၢ်ဘါဒၣ်ဝဲ, ဒီးဘၣ်ဃးပှၤတဂၤလၢအမံၤမ့ၢ် ယ့ၣ်ၡူးလၢအသံတ့ၢ်ဝဲ, ဘၣ်ဆၣ်ဒီးစီၤပီလူးစံးလၢ အအိၣ်မူဒံးဝဲန့ၣ်လီၤ.

²⁰ဒ်သိးယကသ့ၣ်ညါအါထီၣ်ဘၣ်ဃးတၢ်ဂ့ၢ်တဖၣ်အံၤန့ၣ်, ယကဘၣ်မၤဒ်လဲၣ်ဒၣ်လဲာ်ယပဲာ်ဖးနီၤဖးတဘၣ်ဘၣ်အဃိ, ယသံကွၢ်စီၤပီလူးမ့ၢ်အကသးဆူၣ်လဲၤဆူဝ့ၢ်ယရူၤၡလ့ၣ်ဒ် သိးအကဘၣ်တၢ်သမံသမိးအီၤဖဲန့ၣ်ဘၣ်ဃးတၢ်ဂ့ၢ်တဖၣ် အံၤဧါန့ၣ်လီၤ.

²¹ဘၣ်ဆၣ်ဒီးစီၤပီလူးပတံထီၣ်တၢ်ဒီးဃ့ဝဲလၢအကဘၣ် တၢ်ပာ်ထီဃာ်ဒံးအီၤလၢတၢ်ဒုးဃာ်အပူၤဒီးပျဲစီၤပၤ ဖးဒိၣ်စံၣ်ညီၣ်အတၢ်ဂ့ၢ်လီၤ. လၢတၢ်န့ၣ်အဃိ, ယဟ့ၣ်လီၤယကလုၢ်လၢပှၤသုးဖိတဖၣ်ကအိၣ်ခိးကွၢ်ထွဲဒံး အီၤလၢဃိာ်ပူၤတုၤလၢယဆှၢအီၤဆူစီၤပၤဖးဒိၣ် အအိၣ်သ့တစုန့ၣ်လီၤ.”

²²စီၤအကြံးပၤစံးဘၣ်စီၤဖ့စတူး, “ယဆၢနၢ်ဟူဘၣ်ပှၤတဂၤအံၤအတၢ်စံးတၢ်ကတိၤလၢယနီၢ် ကစၢ်ဒၣ်ယဲလီၤ.” စီၤဖ့စတူးစံးဆၢဝဲ, “နကနၢ်ဟူဘၣ်အဝဲအတၢ်စံးတၢ်ကတိၤခဲမုၢ်ဆ့ၣ်လီၤ.”

²³မုၢ်ဆ့ၣ်ထီၣ်တနံၤန့ၣ်, စီၤအကြံးပၤဒီးနီၢ်ဘ့ၢ်နံက့ၤဟဲဝဲအိၣ်ဒီး တၢ်မၤလၤကပီၤအီၤအဒိၣ်အမုၢ်ဒီးနုာ်လီၤဆူကမျၢၢ်ဒိကနၣ်တၢ် အဘျီၣ်ရိဖှိၣ်အပူၤဃုာ်ဒီးသုးဖိတကထိအခိၣ်တဖၣ်ဒီးဝ့ၢ် တဖျၢၣ်န့ၣ်အပှၤမံၤဟူသၣ်ဖျါတဖၣ်လီၤ. စီၤဖ့စတူးဟ့ၣ်လီၤအကလုၢ်ဒီးစီၤပီလူးဘၣ်တၢ်ဟဲဆှၢနုာ်အီၤလီၤ.

²⁴ဒီးစီၤဖ့စတူးစံးဝဲ, “စီၤပၤအကြံးပၤဒီးပှၤလၢအအိၣ်ဒီး ပှၤဖဲအံၤခဲလၢာ်သ့ၣ်သုဧၢ, သုထံၣ်ဘၣ်ပှၤတဂၤအံၤလၢပှၤ ယူဒၤဖိခဲလၢာ်, လၢအအိၣ်ဖဲအံၤမ့ၢ်ဂ့ၤလၢဝ့ၢ်ယရူၤၡလ့ၣ်မ့ၢ်ဂ့ၤ, ဟဲပတံထီၣ်တၢ်ဆူယအိၣ်လၢအဂ့ၢ်န့ၣ်လီၤ. အဝဲသ့ၣ်ကိးပသူထီၣ်လၢပှၤတဂၤအံၤတကြၢးအိၣ်မူလၢၤ ဘၣ်န့ၣ်လီၤ.

²⁵ဘၣ်ဆၣ်ဒီး, ယနီၢ်ကစၢ်ဒၣ်ယဲယတထံၣ်လၢအဝဲမၤဘၣ်တၢ်တမံၤမံၤ လၢအကြၢးဒီးတၢ်စံၣ်ညီၣ်သံအီၤန့ၣ်ဘၣ်. ဒီးမ့ၢ်လၢအဝဲအနီၢ်ကစၢ်ဒၣ်ဝဲပတံထီၣ်တၢ်လၢစီၤပၤဖးဒိၣ် ကစံၣ်ညီၣ်န့ၢ်အတၢ်ဂ့ၢ်တၢ်ကျိၤအဃိ, ယပာ်လီၤယသးလၢ ယကဆှၢလီၤအီၤလီၤ.

²⁶ဘၣ်ဆၣ်, ယတအိၣ်ဒီးတၢ်ဂ့ၢ်လီၤတံၢ်လီၤဆဲးဘၣ်ဃးဒီးအီၤ လၢယကကွဲးဖျါထီၣ်ဆူစီၤပၤဖးဒိၣ်အအိၣ်နီတမံၤဘၣ်. လၢတၢ်န့ၣ်အဃိယဟဲဆှၢထီၣ်အီၤလၢသုဝဲခဲလၢာ်အမဲာ်ညါ, ဒီးလီၤဆီဒၣ်တၢ်လၢနၤ, စီၤပၤအကြံးပၤအမဲာ်ညါ, ဒ်သိးပသမံသမိးကွၢ်အီၤဝံၤအလီၢ်ခံ, ယကအိၣ်ဒီးတၢ်ဂ့ၢ်တၢ်ကျိၤလီၤတံၢ်လီၤဆဲးလၢယကကွဲးဖျါထီၣ် အီၤအဂီၢ်န့ၣ်လီၤ.

²⁷အဂ့ၢ်ဒ်အံၤ, ယကဆှၢလီၤပှၤဃိာ်ဖိတဂၤ, တအိၣ်ဘၣ်ဒီးတၢ်ပာ်ဖျါထီၣ်တၢ်ကမၣ်လၢပှၤပာ်လၢအလိၤ တဖၣ်လီၤတံၢ်လီၤဆဲးန့ၣ်, ဖျါဘၣ်ယၤလၢအခီပညီတအိၣ်ဘၣ် န့ၣ်လီၤ.”