Read S'gaw Karen မၤတၢ် 27 Bible Online

မၤတၢ် 27 - S'gaw Karen bible

မၤတၢ် 27

¹ဖဲတၢ်စံၣ်ညီၣ်အၢၣ်လီၤလၢပကဘၣ်ဒိးကဘီဆူကီၢ်အံၤတလံန့ၣ်, အဝဲသ့ၣ်ဟ့ၣ်လီၤစီၤပီလူးဒီးပှၤဃိာ်ဖိအဂၤတဖၣ်ဆူစီၤယူၤလံ အစုပူၤန့ၣ်လီၤ. အဝဲဒၣ်မ့ၢ်ပှၤသုးဖိတကယၤအခိၣ်ဘၣ် ဃးဒီးရိမ့ၤသုးမုၢ်တဖုလၢအဘၣ်တၢ်သ့ၣ်ညါအီၤဒ် “စီၤပၤဖးဒိၣ် အသုးမုၢ်” န့ၣ်လီၤ.

²ပဒိးထီၣ်ကဘီလၢအဟဲလၢဝ့ၢ်အဒြၤမူးတ့ၣ်တဘ့ၣ်လၢအအိၣ် ကတဲာ်ကတီၤအသးဒ်သိးအကဟးထီၣ်ဒီးလဲၤဆူဝ့ၢ်အိၣ်လၢကီၢ် အၤစံအသရ့ၤတဖၣ်န့ၣ်လီၤ. ပှၤသ့းစၤလနံဖိလၢအဘၣ်ဃးဒီးကီၢ်မၤက့းဒနံစီၤအရံ စတၢ်ဃူးတဂၤလဲၤဃုာ်တၢ်ဒီးပှၤလီၤ.

³မုၢ်ဆ့ၣ်ထီၣ်တနံၤန့ၣ်ပလဲၤတုၤလၢဝ့ၢ်စံဒိၣ်လီၤ. စီၤယူၤလံဂ့ၤဝဲလၢစီၤပီလူးအဖီခိၣ်ဒီးဟ့ၣ်အဝဲဒၣ်အခွဲးလၢ အကလဲၤအိၣ်သကိးအတံၤသကိးတဖၣ်ဒီးဒိးန့ၢ်တၢ် လၢအလိၣ်ဘၣ်ဝဲတဖၣ်လီၤ.

⁴ပဟးထီၣ်ဖဲန့ၣ်ဒီးမ့ၢ်လၢကလံၤအူဆီၣ်ကဒါက့ၤပှၤ အဃိ, ပလဲၤခီဂာ်တၢ်လၢကီးကူပြူးအကပၤလၢအတဒၢဒီး ကလံၤအဆူၣ်န့ၣ်လီၤ.

⁵ပလဲၤခီဂာ်ကီၢ်ကံၤလံၤကံဒီးကီၢ်ပၣ်ဖူၤလံအကၢၢ်ခိၣ် ဒီးလဲၤတုၤဖဲဝ့ၢ်မူရၤဘၣ်ဃးဒီးကီၢ်လူၤကံန့ၣ်လီၤ.

⁶ဖဲန့ၣ်ပှၤသုးဖိတကယၤအခိၣ်ထံၣ်န့ၢ်ကဘီတဘ့ၣ်လၢ အဟဲလၢဝ့ၢ်အလ့းစၣ်ဒြ့းဒီးကလဲၤဆူကီၢ်အံၤတလံ အဃိ, အဝဲဒၣ်ဒုးဒိးထီၣ်ပှၤလၢအကဘီတဘ့ၣ်န့ၣ်လီၤ.

⁷ပလဲၤတၢ်ကယီကယီလၢအါနံၤအါသီအတီၢ်ပူၤဒီးလၢခံက့ၤ န့ၣ်ပလဲၤတုၤပဝဲကီကီခဲခဲလၢတၢ်လီၢ်တတီၤလၢအဘူး ဒီးဝ့ၢ်ကနံဒူးန့ၣ်လီၤ. မ့ၢ်လၢကလံၤတပျဲပလဲၤဆူညါလၢကျဲအဝဲန့ၣ်တကပၤလၢၤဘၣ် အဃိ, ပလဲၤခီဂာ်လၢကီးကြ့တ့ၤအကပၤလၢအပူၤဖျဲးဒီး ကလံၤအဆူၣ်, ဒီးလဲၤတရူာ်ဘၣ်စၤလမိၣ်အနိာ်ထိးန့ၣ်လီၤ.

⁸ပလဲၤတၢ်ဘူးဘူးတံၢ်တံၢ်ဒီးထံကၢၢ်နံၤ, ဒီးလၢတၢ်ကီတၢ်ခဲဖးဒိၣ်အပူၤတုၤဃီၤဆူတၢ်လီၢ် တတီၤလၢအဘၣ်တၢ်ကိးအီၤလၢ “သန့အဂ့ၤ” အိၣ်ဘူးဒီးဝ့ၢ်လၤစဲန့ၣ်လီၤ.

⁹ပအိၣ်ပဝဲဖဲန့ၣ်အါနံၤအါသီတုၤပကလဲၤဆူညါအဂီၢ်, တၢ်ဘၣ်ယိၣ်ဘၣ်ဘီအလီၢ်အိၣ်ထီၣ်ဝဲဒၣ်န့ၣ်လီၤ. အဂ့ၢ်ဒ်အံၤ, ခဲအံၤတၢ်ဆၢကတီၢ်စဲၤခံဝဲဒီးတၢ်ပျၢ်တၢ်ဒဲးဘးအမုၢ်နံၤ ပူၤကွံာ်လံဝဲအဃိန့ၣ်လီၤ. လၢတၢ်န့ၣ်အဃိ စီၤပီလူးဟ့ၣ်ကူၣ်ဟ့ၣ်ဖး အဝဲသ့ၣ်ဒီးစံးဝဲ,

¹⁰“တံၤသကိးသ့ၣ်ဧၢ, ယထံၣ်လၢပတၢ်လဲၤစးထီၣ်ဖဲအံၤဒီးဆူညါ ကမ့ၢ်တၢ်လၢအလီၤပျံၤလီၤဖုးလီၤ. တၢ်ဟးဂူာ်ဟးဂီၤဒီးတၢ်လီၤမူၤလီၤမၢ်အဒိၣ်အမုၢ်ကအိၣ်ဝဲဒၣ်, တမ့ၢ်ထဲတၢ်ဖိတၢ်လံၤလၢတၢ်ပဒၢးအီၤဒီးကဘီန့ၣ်ဘၣ်. သးသမူတဖၣ်ကလီၤမၢ်ကွံာ်စ့ၢ်ကီးလီၤ.”

¹¹ဘၣ်ဆၣ်ဒီးပှၤသုးဖိတကယၤအခိၣ်တနာ်စီၤပီလူးအတၢ် ကတိၤဘၣ်. အဝဲဒၣ်နာ်ကဘီခိၣ်, ဒီးကဘီကစၢ်အတၢ်ကတိၤလီၤ.

¹²ကဘီသန့ဖဲန့ၣ်တမ့ၢ်တၢ်လီၢ်အကြၢးအဘၣ်လၢအဝဲသ့ၣ် ကအိၣ်ဝဲဖဲတၢ်ဂိၢ်ခါအကတီၢ်ဘၣ်. လၢတၢ်န့ၣ်အဃိ, ပှၤအါဒၣ်တက့ၢ်ဘၣ်အသးလၢအကဟးထီၣ် ဖဲန့ၣ်, ဒီးကဂုာ်ကျဲးစၢးလဲၤတုၤဝဲဖဲဝ့ၢ်ဖံၤနံက့ၤဒီးမ့ၢ်သ့ ကအိၣ်ဝဲဖဲန့ၣ်လၢတၢ်ဂိၢ်ခါအကတီၢ်လီၤ. ဝ့ၢ်ဖံၤနံက့ၤမ့ၢ်ကီးကြ့တ့ၤကဘီသန့တခါလၢအကွၢ်ဃီၤ တၢ်ဆူမုၢ်နုာ်အကလံၤထံးဒီးမုၢ်နုာ်အကလံၤစိးန့ၣ်လီၤ.

¹³ကလံၤလၢကလံၤထံးတခီစးထီၣ်အူတၢ်ကဖီကဖီ, ဒီးပှၤသ့ၣ်တဖၣ်န့ၣ်ဆိကမိၣ်ဝဲလၢလဲၤတၢ်ဒ်အကူၣ်ကျဲၤပာ်ဝဲ အသိးကသ့အဃိ, အဝဲသ့ၣ်ထုးထီၣ်က့ၤနီၣ်သက့ၤ, ဒီးဂုာ်ကျဲးစၢးဒုးလဲၤကဘီဘူးဘူးတံၢ်တံၢ်ဒီးကီးကြ့တ့ၤ အကၢၢ်နံၤတသ့ဖဲအသ့န့ၣ်လီၤ.

¹⁴ဘၣ်ဆၣ်ဒီးတယံာ်ဘၣ်န့ၣ်, ကလံၤလၢအဆူၣ်မးလၢအဘၣ် တၢ်ကိးအီၤလၢ “အူၤရကျူဒိၣ်အျခီပညီမုၢ်ထီၣ်ကလံၤစိး အကလံၤ” န့ၣ်အိၣ်ဟဲလၢကီးတကပၤဒီးလီၤဘၣ်လၢ အဝဲသ့ၣ်အလိၤလီၤ.

¹⁵ကဘီဘၣ်ဒိလၢကလံၤမုၢ်, ဒီးမ့ၢ်လၢတၢ်ထိၣ်လိၤက့ၤကဘီအခိၣ် တန့ၢ်ဘၣ်အဃိ, ပပျၢ်စုပျၢ်ခီၣ်ဒီးပျဲအဘၣ်တၢ်စိာ်ကွံာ်အီၤလၢ ကလံၤန့ၣ်လီၤ.

¹⁶ပဒိးန့ၢ်ဘၣ်တၢ်တဒၢလၢကလံၤတဆံးတက့ၢ်ဖဲပခီဃီၤဆူကီး ဖိတဖျၢၣ်လၢအမ့ၢ်ဝဲကျီၤဒ့ၤ, ဒီးဖဲန့ၣ်မၤန့ၢ်က့ၤကဘီအချံဖိကီကီခဲခဲဒ်သိးအသုတဟး ဂီၤကွံာ်တဂ့ၤအဂီၢ်လီၤ.

¹⁷အဝဲသ့ၣ်ထုးထီၣ်ချံဖိတဘ့ၣ်န့ၣ်လၢကဘီဖီခိၣ်ဒီးပာ် အီၤလၢကဘီအဒါလိၤဝံၤဒီးစၢဝးတရံးကဘီလၢပျံၤတနီၤ ဃံးဃံးလီၤ. အဝဲသ့ၣ်ဘၣ်ယိၣ်လၢအကတုၤထီၣ်ဘၣ်ဖုး လၢမဲးခိၣ်ဘူးဒီးကီၢ်လ့ဘယၢ်အကၢၢ်ပၤနံၤလီၤ. လၢတၢ်န့ၣ်အဃိအဝဲသ့ၣ်ထုးလီၤကဘီယၢ်လၣ်ဒီးပျဲ အလဲၤတၢ်ဖဲကလံၤဆှၢအီၤအလီၢ်လီၤ.

¹⁸ကလံၤမုၢ်လၢအဆူၣ်မးအူဒံးတၢ်အဃိ, မုၢ်ဆ့ၣ်ထီၣ်တနံၤန့ၣ် အဝဲသ့ၣ်စးထီၣ်တ့ၢ်လီၤကွံာ်တၢ်ဖိတၢ်လံၤလၢကဘီပဒၢး ဆှၢဝဲတဖၣ်ဆူထံကျါလီၤ.

¹⁹လၢခံတနံၤကဒီးန့ၣ်, အဝဲသ့ၣ်တ့ၢ်လီၤကဘီအဃၢၤအဃိၣ်တနီၤဆူထံကျါလၢ အစုဒၣ်ဝဲလီၤ.

²⁰လၢအါနံၤအါသီအတီၢ်ပူၤန့ၣ်, ပတထံၣ်ဘၣ်မုၢ်မ့ၢ်ဂ့ၤ, ဆၣ်တဖၣ်မ့ၢ်ဂ့ၤဘၣ်, ဒီးကလံၤအူဒံးတၢ်ဆူၣ်ဆူၣ်ကလဲာ်လီၤ. လၢခံကတၢၢ်ပတၢ်မုၢ်လၢ်လၢပကဒိးန့ၢ်တၢ်မၤပူၤဖျဲးပှၤလၢာ် ကွံာ်ဝဲဒၣ်န့ၣ်လီၤ.

²¹ဖဲပှၤတအီၣ်တၢ်အီတၢ်ယံာ်ထီၣ်ဝဲန့ၣ်, စီၤပီလူးဂဲၤဆၢထၢၣ်လၢအဝဲသ့ၣ်အမဲာ်ညါဒီးစံးဝဲ, “တံၤသကိးသ့ၣ်ဧၢ, သုကြၢးဒိကနၣ်တ့ၢ်ယကလုၢ် ဒီးသုတကြၢးဟးထီၣ်လၢကီးကြ့တ့ၤဘၣ်. သုမ့ၢ်ကနၣ်တ့ၢ် ယကလုၢ်န့ၣ်, ပကပူၤဖျဲးဒီးတၢ်ဟးဂူာ်ဟးဂီၤ, ဒီးတၢ်လီၤမူၤလီၤမၢ်တဖၣ်အံၤခဲလၢာ်လီၤ.

²²မ့မ့ၢ်ခဲကနံၣ်အံၤယဃ့ကညးသု, ပာ်ဆူၣ်သုသးတက့ၢ်. သုသးသမူတလီၤမၢ်ကွံာ်နီတဂၤဘၣ်. ကဟးဂီၤကွံာ်ဒၣ်ထဲ ကဘီတဘ့ၣ်ဧိၤလီၤ.

²³အဂ့ၢ်ဒ်အံၤ, ဖဲနၤလၢအပူၤကွံာ်န့ၣ်, ကစၢ်ယွၤလၢယမ့ၢ်အတၢ်ဒီး ယဘါအီၤတဂၤအကလူးဟဲဆူယအိၣ်,

²⁴ဒီးစံးဘၣ်ယၤ, ‘စီၤပီလူးဧၢ, ပျံၤတၢ်တဂ့ၤ. နကဘၣ်ဂဲၤဆၢထၢၣ်ဒံးလၢစီၤပၤဖးဒိၣ်အမဲာ်ညါလီၤ. သတးဒီးကစၢ်ယွၤပျဲပူၤဖျဲးပှၤလၢအဒိးကဘီဒီးနၤကိးဂၤ ဒဲးလီၤ.’

²⁵လၢတၢ်န့ၣ်အဃိ, တံၤသကိးသ့ၣ်ဧၢ, ပာ်ဆူၣ်သုသးတက့ၢ်. အဂ့ၢ်ဒ်အံၤယနာ်ကစၢ်ယွၤလၢတၢ်ကမၤအသးဒ်ယဘၣ် တၢ်စံးဘၣ်တဲဘၣ်ယၤအသိးန့ၣ်လီၤ.

²⁶ဘၣ်ဆၣ်ဒီး ကလံၤကအူဆီၣ်ထီၣ်ပှၤဆူကီးတဖျၢၣ်ဖျၢၣ်အလိၤ လီၤ.”

²⁷ဖဲတဆံလွံၢ်နၤတနၤန့ၣ်, ကလံၤမုၢ်အူဝ့ၤဝီၤပှၤလၢပီၣ်လဲၣ်မဲဒံးထၢၣ်ရ့နယၢၣ် အပူၤလီၤ. ကဘၣ်ဖဲဖးဖီမုၢ်အကတီၢ်န့ၣ်, ပှၤကဘီဖိတဖၣ်တၢ်လီၤဂာ်ဘၣ်အီၤလၢအဘူးထီၣ်ဒီးခိန့ၣ်လီၤ.

²⁸လၢတၢ်န့ၣ်အဃိ, အဝဲသ့ၣ်ထိၣ်ကွၢ်ထံဒီးထံၣ်ဝဲလၢအယိာ်ဝဲ အပျၢ်ဃိးဆံ, ဒီးအိၣ်တတီၤဒိၣ်ဒိၣ်ထိၣ်ကွၢ်ကဒီးဝဲန့ၣ်အိၣ်ဝဲ အပျၢ်ဃုဆံန့ၣ်လီၤ.

²⁹အဝဲသ့ၣ်ဘၣ်ယိၣ်လၢကဘီကဘၣ်တိၢ်လၢလၢၢ်, သတးဒီး စဲၤလီၤနီၣ်သက့ၤလွံၢ်ခါလၢကဘီအလီၢ်ခံတကပၤဒီးဃ့ဘါထု ကဖၣ်ဝဲဒ်သိးမုၢ်ကဆ့ၣ်ထီၣ်အဂီၢ်န့ၣ်လီၤ.

³⁰ပှၤကဘီဖိတဖၣ်ကျဲးစၢးဒ်သိးအကဃ့ၢ်ပူၤဖျဲးကွံာ်လၢ ကဘီပူၤခီဖျိအစဲၤလီၤကဘီအချံဖိလၢအဘၣ်တၢ်စၢဃာ် တ့ၢ်အီၤလၢကဘီအလိၤန့ၣ်ဆူထံကျါအိၣ်ဒီးတၢ်ပာ်မၤ အသးလၢအစဲၤလီၤနီၣ်သက့ၤတနီၤလၢကဘီအမဲာ်ညါ တကပၤလီၤ.

³¹ဘၣ်ဆၣ်ဒီးစီၤပီလူးစံးဘၣ်ပှၤသုးဖိတကယၤအခိၣ်ဒီး သုးဖိတဖၣ်, “ပှၤကဘီဖိသ့ၣ်တဖၣ်အံၤမ့ၢ်တအိၣ်လၢ ကဘီပူၤန့ၣ်သုပူၤဖျဲးတသ့ဘၣ်.”

³²လၢတၢ်န့ၣ်အဃိ, ပှၤသုးဖိတဖၣ်ကျီထီၣ်တဲာ်ကွံာ်ချံဖိအပျံၤ ဒီးပျဲအလီၤထွံကွံာ်လီၤ.

³³ဘူးမုၢ်ကဆ့ၣ်ထီၣ်န့ၣ်, စီၤပီလူးမၢန့ၢ်ဆီၣ်ခံအဝဲသ့ၣ်ဒ်သိး အကအီၣ်ကအီတၢ်တဆံးတက့ၢ်လီၤ. “ခဲအံၤသုအိၣ်ခိးတ့ၢ်တၢ်အိၣ်လံတဆံလွံၢ်သီလံ. ဒီးဒီကတီၢ် ညါအံၤန့ၣ်သုတအီၣ်ဒံးတၢ်နီတမံၤဘၣ်.

³⁴မ်ဒ်န့ၣ်ဒီး, ယဃ့ကညးသုလၢသုကအီၣ်တၢ်အီၣ်တမံၤမံၤ လီၤ. ဒ်သိးသုကမူအဂီၢ်န့ၣ်, သုလိၣ်ဘၣ်တၢ်အီၣ်လီၤ. သုခိၣ်သူတဘိဒၣ်လဲာ်တလီၤမၢ်ကွံာ်လၢသုခိၣ်လိၤဘၣ်.”

³⁵စီၤပီလူးစံးတၢ်ဒ်အံၤဝံၤဒီး, အဝဲဒၣ်ဟံးန့ၢ်ကိၣ်တစဲး, စံးဘျုးစံးဖှိၣ်ကစၢ်ယွၤလၢအဝဲသ့ၣ်ခဲလၢာ်အမဲာ်ညါ, စိၢ်ဘျဲးဝဲ, ဒီးအီၣ်တၢ်လီၤ.

³⁶အန့ၣ်ဒီးအဝဲသ့ၣ်အသးအဂံၢ်အဘါဟဲဆူၣ်ထီၣ်, ဒီးအီၣ်စ့ၢ်ကီးတၢ်ကိးဂၤဒဲးလီၤ.

³⁷ပဝဲလၢအအိၣ်လၢကဘီအပူၤခဲလၢာ်အနီၣ်ဂံၢ်မ့ၢ်ဝဲခံကယၤ နွံဆံဃုဂၤလီၤ.

³⁸ဖဲပှၤကိးဂၤဒဲးအီၣ်တၢ်လၢအီၣ်လံန့ၣ်, အဝဲသ့ၣ်မၤဖှံထီၣ်ကဘီခီဖျိအတ့ၢ်လီၤကွံာ်ဘုကၠူၣ်ခဲလၢာ် ဆူပီၣ်လဲၣ်ပူၤန့ၣ်လီၤ.

³⁹ဖဲမုၢ်ဆ့ၣ်ထီၣ်န့ၣ်, ပှၤကဘီဖိတဖၣ်ထံၣ်စိဃီၤခိဘၣ်ဆၣ်မ့ၢ်တၢ်လီၢ်ဖဲလဲၣ်တတီၤလဲၣ်န့ၣ် တသ့ၣ်ညါဝဲဘၣ်. ဘၣ်ဆၣ်ဒီး အဝဲသ့ၣ်ထံၣ်ပီၣ်လဲၣ်က့ၣ်ကျီၤအနံၤ တတီၤ, ဒီးပာ်လီၤအသးလၢမ့ၢ်သ့န့ၣ်အဝဲသ့ၣ်ကတိၢ်ထီၣ် အကဘီဖဲန့ၣ်လီၤ.

⁴⁰လၢတၢ်န့ၣ်အဃိအဝဲသ့ၣ်ဒုးထူၣ်ဖျဲးကွံာ်နီၣ်သက့ၤတဖၣ် အပျံၤဒီးပျဲအလီၤဘျၢကွံာ်လၢပီၣ်လဲၣ်ပူၤဒီးတဘျီဃီဖဲန့ၣ်အဝဲသ့ၣ် ဃ့ၣ်လီၤကွံာ်ပျံၤလၢအစၢဃာ်နီၣ်ဝၢ်ကၢၤကဘီတဖၣ်န့ၣ်လီၤ. အန့ၣ်ဝံၤအဝဲသ့ၣ်သလၣ်ထီၣ်ယၢ်လၣ်လၢကဘီအမဲာ်ညါဒ်သိး ကလံၤကဆီၣ်ကဘီဆူကၢၢ်ပၤနံၤအဂီၢ်လီၤ.

⁴¹ဘၣ်ဆၣ်ဒီးကဘီန့ၣ်လဲၤတိၢ်ထီၣ်အသးလၢသိၣ်ခိၣ်လီၤ. ကဘီအခိၣ်တကပၤအိၣ်ကတာ်ထီအသးဒီးဟူးတန့ၢ်ဘၣ်. မ့မ့ၢ်အခံတကပၤသ့ၣ်ဖးကွံာ်ဝဲလၢလပီဒိတၢ်ဆူၣ်မးအဃိ န့ၣ်လီၤ.

⁴²ပှၤသုးဖိတဖၣ်ပာ်လီၤအသးလၢအကမၤသံကွံာ်ပှၤဃိာ်ဖိ ကိးဂၤဒဲးဒ်သိးအဝဲသ့ၣ်အသုတပီၢ်ထံဆူခိဒီးထူၣ်ဖျဲးကွံာ်နီ တဂၤတဂ့ၤအဂီၢ်လီၤ.

⁴³ဘၣ်ဆၣ်ပှၤသုးဖိတကယၤအခိၣ်သးအိၣ်မၤပူၤဖျဲးစီၤပီ လူးသတးဒီး, အဝဲဒၣ်တြီပှၤသုးဖိတဖၣ် ဒ်သိးအသုတမၤ သံပှၤဃိာ်ဖိတဖၣ်တဂ့ၤလီၤ. လၢတၢ်န့ၣ်အလီၢ်အဝဲဟ့ၣ်လီၤ အကလုၢ်ဒ်သိးပှၤလၢအပီၢ်ထံသ့ကိးဂၤဒဲးကစံၣ်လီၤဆိဆူထံ ကျါဒီးပီၢ်ထံဆူခိန့ၣ်လီၤ.

⁴⁴ပှၤလၢအအိၣ်လီၤတဲာ်တဖၣ်ကဘၣ်ပိာ်ထီၣ်အခံခီဖျိထိၣ်ထီၣ်ဖီအသး လၢအဖီၣ်သ့ၣ်ဘၣ်အဒါ, မ့တမ့ၢ်ကဘီအက့အခီလၢအသ့ၣ်ဖးကွံာ်တဖၣ် အဃိန့ၣ်လီၤ. ဒီးလၢကျဲဒ်အံၤအပူၤပတုၤပဝဲဆူခိန့ၣ်ဂ့ၤဂ့ၤဘၣ်ဘၣ်လီၤ.