Read S'gaw Karen မၤတၢ် 28 Bible Online

မၤတၢ် 28 - S'gaw Karen bible

မၤတၢ် 28

¹ဖဲပတုၤပဝဲဂ့ၤဂ့ၤဘၣ်ဘၣ်ဖဲခိဝံၤအလီၢ်ခံန့ၣ်, ပသ့ၣ်ညါဘၣ်က့ၤပဝဲလၢကီးတဖျၢၣ်န့ၣ်အမံၤမ့ၢ်ဝဲမ့းလံတ့ၤ လီၤ.

²ပှၤအိၣ်ဆိးဖဲကီးတဖျၢၣ်န့ၣ်အလိၤတဖၣ်ဂ့ၤလၢပဖီခိၣ်ဒိၣ်မး လီၤ. တၢ်ဟဲစူၤဒီးတၢ်ဂိၢ်အဃိ, အဝဲသ့ၣ်မၤကဲၤထီၣ်မ့ၣ်အူဒီးတူၢ်လိာ်ခီၣ်ဆၢပဝဲကိးဂၤဒဲးလီၤ.

³ဖဲစီၤပီလူးထၢဖှိၣ်သ့ၣ်ဒ့တကဒိၣ်ဒီးဒၢနုာ်ဝဲလၢမ့ၣ်အူ အပူၤအဆၢကတီၢ်န့ၣ်, မ့ၣ်အူကိၢ်အဃိဂုၢ်ဘီၣ်အီးတဘိဟဲထီၣ်ဒီးဖျးအီၤဒီးအိၣ်စဲဘူး အသးလၢအစုလိၤလီၤ.

⁴ပှၤကီးဖိဖဲန့ၣ်တဖၣ်ထံၣ်ဂုၢ်သ့ၣ်အိၣ်ဘျးလီၤအသးလၢ စီၤပီလူးအစုလိၤဒီးစံးလိာ်အသးတဂၤဒီးတဂၤ, “ပှၤတဂၤအံၤကမ့ၢ်ပှၤမၤသံပှၤကညီလီၤ. အဝဲပူၤဖျဲးကွံာ်လၢပီၣ်လဲၣ်အပူၤသနာ်က့, ဘူၣ်တီၢ် ကစၢ်တပျဲမူအီၤလၢၤဘၣ်.”

⁵ဘၣ်ဆၣ်ဒီးစီၤပီလူးတဆ့လီၤကွံာ်ဂုၢ်သ့ၣ်ဆူမ့ၣ်အူအပူၤ, ဒီးအနီၢ်ကစၢ်ဒၣ်ဝဲတဘၣ်တၢ်နီတမံၤဘၣ်.

⁶အဝဲသ့ၣ်အိၣ်ခိးကွၢ်ဝဲလၢစီၤပီလူးကညိးထီၣ်မ့တမ့ၢ်ကလီၤ ဃံၤသံသတူၢ်ကလာ်လီၤ. ဘၣ်ဆၣ်ဒီးဖဲအခိးဝဲယံာ်ထီၣ်ဒီး တထံၣ်ဝဲတၢ်လီၤတိၢ်လီၤဆီမၤအသးဒီးအီၤနီတမံၤဘၣ်န့ၣ်, အဝဲသ့ၣ်အတၢ်ဆိကမိၣ်လဲလိာ်အသးဒီးစံးဝဲ, “အဝဲမ့ၢ်ယွၤတဂၤန့ၣ်လီၤ.”

⁷ဘူးဒီးတၢ်လီၢ်ဖဲန့ၣ်, ဟီၣ်ခိၣ်ဖးလဲၢ်အိၣ်ဝဲတကဝီၤလၢအမ့ၢ်ကီး အပဒိၣ်စီၤပီးပျံၤအတၢ်န့ၣ်လီၤ. အဝဲဒၣ်တူၢ်လိာ်ခီၣ်ဆၢပှၤဂ့ၤမး, ဒီးလၢသၢသီအတီၢ်ပူၤပကဲအဝဲအပှၤသမှံၤတဖၣ်လီၤ.

⁸တၢ်မၤအသးလၢစီၤပီးပျံၤအပၢ်မံလၢအလီၢ်မံခိၣ်မ့ၢ်လၢ အလိၤကိၢ်ဒီးအဟၢဖၢဝံာ်အဃိလီၤ. စီၤပီလူးလဲၤနုာ်ဆူအဒၢးပူၤ, ဃ့ဘါထုကဖၣ်တၢ်, ပာ်ထီၣ်အစုလၢအလိၤဒီးမၤဘျါက့ၤအီၤလီၤ.

⁹ဖဲတၢ်အံၤမၤအသးန့ၣ်, ပှၤဆူးပှၤဆါအဂုၤအဂၤတဖၣ်လၢကီးန့ၣ် အပူၤဟဲဝဲဒီးဘၣ်တၢ်မၤဘျါက့ၤအီၤလီၤ.

¹⁰အဝဲသ့ၣ်ဟ့ၣ်ပှၤတၢ်ဟ့ၣ်အါအါဂီၢ်ဂီၢ်, ဒီးလၢခံဖဲပဒိးထီၣ်ကဘီန့ၣ်, အဝဲသ့ၣ်တီၣ်ထီၣ်တၢ်လၢပကလိၣ်ဘၣ်အီၤလၢပတၢ်လဲၤတဘျီန့ၣ် အဂီၢ်လီၤ.

¹¹သၢလါဝံၤအလီၢ်ခံ, ပဒိးထီၣ်ဝ့ၢ်အလ့းစၣ်ဒြ့းအကဘီတဘ့ၣ်လၢ တၢ်ကိးအီၤလၢ, “ကစၢ်သဃံာ်” လၢအအိၣ်တ့ၢ်လံဖဲကီးန့ၣ်အပူၤ ဖဲတၢ်ဂိၢ်ခါဒီဆၢကတီၢ်န့ၣ်လီၤ.

¹²ပလဲၤတုၤဖဲဝ့ၢ်စူၤရၤကူဒီး ပအိၣ်ဖဲန့ၣ်သၢသီလီၤ.

¹³ပဟးထီၣ်ကဒီးဖဲန့ၣ်ဒီးလဲၤတၢ်တုၤလၢဝ့ၢ်ရ့ကံၤလီၤ. တသီဝံၤအလီၢ်ခံန့ၣ်, ကလံၤဟဲအူထီၣ်တၢ်လၢကလံၤထံးတခီဒီး လၢခံသီတသီန့ၣ်ပလဲၤတုၤဖဲဝ့ၢ်ပီးတံၤလူးလီၤ.

¹⁴ဖဲန့ၣ်ပထံၣ်လိာ်ပသးဒီးပှၤစူၢ်က့ၤနာ်က့ၤတၢ်တဖၣ်, ဒီးအဝဲသ့ၣ်မၢပအိၣ်ဒီးအီၤတနွံလီၤ. ဒီးပလဲၤတုၤပဝဲလၢဝ့ၢ်ရိမ့ၤန့ၣ်လီၤ.

¹⁵ဒီပုၢ်ဝဲၢ်ပှၤစူၢ်က့ၤနာ်က့ၤတၢ်ဖဲဝ့ၢ်ရိမ့ၤတဖၣ်နၢ်ဟူဘၣ်ပဂ့ၢ်ပကျိၤ ဒီးဟဲအိၣ်ခိးပခိၣ်တုၤလၢဝ့ၢ်လၢအမံၤမ့ၢ်အးပံပရူးအဖၠါပူၤဒီးပှၤ သမှံၤအဘျီၣ်သၢဖျၢၣ်န့ၣ်လီၤ. ဖဲစီၤပီလူးထံၣ်အဝဲသ့ၣ်န့ၣ်, အဝဲဒၣ်စံးဘျုးစံးဖှိၣ်ကစၢ်ယွၤဒီးအသးအဂံၢ်အဘါဆူၣ် ထီၣ်ဝဲဒိၣ်မးန့ၣ်လီၤ.

¹⁶ဖဲပတုၤလၢဝ့ၢ်ရိမ့ၤန့ၣ်, စီၤပီလူးဘၣ်တၢ်ဟ့ၣ်အီၤတၢ်ပျဲလၢအကအိၣ်ဒၣ်အတၢ် လၢအတၢ်အိၣ်တၢ်ဆိးအလီၢ်ဒၣ်ဝဲ, ဒီးသုးဖိတဂၤအိၣ်ခိးကွၢ်ထွဲအီၤလီၤ.

¹⁷သၢသီလဲၤပူၤကွံာ်ဝံၤအလီၢ်ခံန့ၣ်, စီၤပီလူးကိးဖှိၣ်ပှၤယူဒၤဖိအခိၣ်အနၢ်ဖဲဝ့ၢ်ရိမ့ၤ တဖၣ်န့ၣ်လီၤ. ဖဲအဝဲသ့ၣ်ဟဲတုၤဖှိၣ်န့ၣ်, အဝဲဒၣ်စံးဘၣ် အဝဲသ့ၣ်, “ယဒီပုၢ်ဝဲၢ်ပှၤအံၣ်စရ့လးဖိသ့ၣ်ဧၢ, ယတမၤတ့ၢ်ယဲတၢ်လၢအထီဒါပပှၤကလုာ်မ့ၢ်ဂ့ၤ, ပလုၢ်ပလၢ်လၢပဒိးန့ၢ်ဘၣ်လၢပမိၢ်ပၢ်ဖံဖုလၢပျၢၤတဖၣ် အအိၣ်မ့ၢ်ဂ့ၤနီတမံၤဘၣ်. သနာ်က့ဒီး, တၢ်ဖီၣ်ဒၢနုာ်ယၤလၢဝ့ၢ်ယရူၤၡလ့ၣ်အဃိာ်ပူၤဒီးတၢ်ဟ့ၣ်လီၤယၤ ဆူပှၤရိမ့ၤဖိတဖၣ်အစုပူၤလီၤ.

¹⁸အဝဲသ့ၣ်သမံသမိးယၤဝံၤအလီၢ်ခံ, မ့ၢ်လၢအတထံၣ်န့ၢ်ယတၢ် ကမၣ်လၢအကြၢးဒီးတၢ်စံၣ်ညီၣ်သံနီတမံၤဘၣ်အဃိ, အဲၣ်ဒိးပျၢ်ဖျဲးကွံာ်ယၤလီၤ.

¹⁹ဘၣ်ဆၣ်ဒီးဖဲပှၤယူဒၤဖိတဖၣ်ထီဒါတၢ်အံၤန့ၣ်, ယတၢ်ဂ့ၢ်လၢယကပာ်ဖျါထီဒါယပှၤကလုာ်ဒၣ်ယဲန့ၣ်တအိၣ်နီ တမံၤသနာ်က့, ယဘၣ်ပတံထီၣ်တၢ်ဆူစီၤပၤဖးဒိၣ်အအိၣ်န့ၣ်လီၤ.

²⁰လၢတၢ်န့ၣ်အဃိ, ယဃ့ထံၣ်ဒီးဃ့ကတိၤဘၣ်တၢ်ဒီးသု, အဂ့ၢ်ဒ်အံၤယဘၣ်တၢ်စၢဃာ်ယၤလၢပျံၤထးအံၤ, မ့ၢ်ဒၣ်လၢပှၤလၢပှၤအံၣ်စရ့လးဖိပာ်ထီၣ်အတၢ်မုၢ်လၢ် လၢအလိၤတဂၤန့ၣ်အဃိလီၤ.”

²¹အဝဲသ့ၣ်စံးဘၣ်အီၤ, “ပတဒိးန့ၢ်တ့ၢ်တၢ်ပရၢလၢကီၢ်ယူဒၤဘၣ်ဃးနဂ့ၢ်နီတဘ့ၣ်ဘၣ်. ပဒီပုၢ်ဝဲၢ်ပှၤယူဒၤဖိသကိးပှၤယူဒၤဖိဒ်ပှၤတဟဲစိာ်စ့ၢ်ကီးတၢ် ကစီၣ်ဖဲန့ၣ်လၢအကတိၤအၢနဂ့ၢ်နီတမံၤဘၣ်.

²²ဘၣ်ဆၣ်ဒီး ပအဲၣ်ဒိးနၢ်ဟူဘၣ်နတၢ်ဆိကမိၣ်တဖၣ်လီၤ. အဂ့ၢ်ဒ်အံၤ, ပသ့ၣ်ညါပဝဲလၢတၢ်လီၢ်ကိးပူၤဒဲးန့ၣ်, ပှၤကတိၤထီဒါပှၤတကရၢလၢနဘၣ်ထွဲဒီးအီၤတဖုအံၤန့ၣ်လီၤ.”

²³လၢတၢ်န့ၣ်အဃိအဝဲသ့ၣ်သ့ၣ်နံၤဖးသီဒီးစီၤပီလူး, ဒီးဖဲနံၤအဝဲန့ၣ်ပှၤယူဒၤဖိဟဲအါအါဂီၢ်ဂီၢ်ဖဲတၢ်လီၢ် လၢစီၤပီလူးအိၣ်ဝဲန့ၣ်လီၤ. စးထီၣ်လၢဂီၤတုၤလၢမုၢ်နၤခီန့ၣ်, အဝဲဒၣ်တဲဖျါထီၣ်ဒီးဟ့ၣ်အဝဲသ့ၣ်လၢအတၢ်ကစီၣ်ဘၣ်ဃး ကစၢ်ယွၤအဘီအမုၢ်န့ၣ်လီၤ. အဝဲဒၣ်ဂုာ်ကျဲးစၢးဒုးနာ်အဝဲသ့ၣ်ဘၣ်ဃးယ့ၣ်ၡူးအဂ့ၢ်ခီဖျိ အယၢၤထီၣ်စီၤမိၤၡ့အတၢ်သိၣ်တၢ်သီဒီးဝံအတၢ်ကွဲးတဖၣ် န့ၣ်လီၤ.

²⁴အဝဲသ့ၣ်တနီၤနာ်အဝဲအတၢ်စံးတၢ်ကတိၤ, မ့မ့ၢ်အဂၤတဖၣ် တနာ်ဝဲဘၣ်.

²⁵ဖဲအဝဲသ့ၣ်အသးတလီၤပလိာ်ဒီးဟးထီၣ်ကွံာ်ဝဲန့ၣ်, စီၤပီလူးကတိၤတၢ်ဒီးအီၤအကတၢၢ်တဘီဒ်အံၤလီၤ. “သးစီဆှံကတိၤတၢ်ဒီးသုမိၢ်ပၢ်ဖံဖုလၢပျၢၤတဖၣ် ခီဖျိဝံယၡါယၤန့ၣ်ဘၣ်မးလီၤ.

²⁶အဂ့ၢ်ဒ်အံၤ အဝဲဒၣ်စံးဝဲ, ‘လဲၤဆူပှၤတကလုာ်အအိၣ်ဒီးစံး, သုကဒိကနၣ်ဝံၤဒိကနၣ်က့ၤ, ဘၣ်ဆၣ်သုတနၢ်ပၢၢ်သုဝဲဘၣ်. သုကကွၢ်ဝံၤကွၢ်က့ၤဘၣ်ဆၣ်သုတထံၣ်တၢ်ဘၣ်.

²⁷အဂ့ၢ်ဒ်အံၤ, ပှၤတကလုာ်အံၤအသးခံးဝဲလီၤ. အဝဲသ့ၣ်ကးတံာ်အနၢ်ပူၤ, ဒီးကးတံာ်အမဲာ်ချံလီၤ. မ့တမ့ၢ်ဘၣ်ဒီး, အဝဲသ့ၣ်ကထံၣ်တၢ်လၢအမဲာ်ချံ, နၢ်ဟူတၢ်လၢအနၢ်, နၢ်ပၢၢ်တၢ်လၢအသး, ဒီးကဃၣ်က့ၤအသးဆူယအိၣ်, ကစၢ်ယွၤစံးဝဲ, ဒီးယကမၤဘျါက့ၤအဝဲသ့ၣ်န့ၣ်လီၤ.’

²⁸လၢတၢ်န့ၣ်အဃိသုကဘၣ်သ့ၣ်ညါဒ်အံၤ, ကစၢ်ယွၤအတၢ်ကစီၣ်ဘၣ်ဃးတၢ်အုၣ်က့ၤခီၣ်က့ၤန့ၣ်, ဘၣ်တၢ်ဆှၢလံအီၤဆူပှၤကလုာ်ဂၤတဖၣ်အအိၣ်လံ. အဝဲသ့ၣ်ကဒိကနၣ်တၢ်လီၤ.”

²⁹(စီၤပီလူးစံးတၢ်ဒ်အံၤဝံၤအလီၢ်ခံန့ၣ်, ပှၤယူဒၤဖိသ့ၣ်တဖၣ်ဟးထီၣ်, အိၣ်ဒီးတၢ်ဂ့ၢ်လိာ်ဘှီလိာ်ဆူၣ်ဆူၣ်ကလဲာ်လၢအဝဲသ့ၣ်ကဒဲကဒဲ အကျါန့ၣ်လီၤ.)

³⁰လၢခံနံၣ်အတီၢ်ပူၤန့ၣ်, စီၤပီလူးအိၣ်ဝဲဖဲတၢ်လီၢ်လၢအနီၢ်ကစၢ်ဒိး လဲဝဲဒီးတူၢ်လိာ်ခီၣ်ဆၢကယဲၢ်ပှၤလၢအဟဲအိၣ်သကိးအီၤတဖၣ် လီၤ.

³¹အဝဲဒၣ်စံၣ်တဲၤတဲလီၤတၢ်ဘၣ်ဃးကစၢ်ယွၤအဘီအမုၢ်, ဒီးသိၣ်လီၤသီလီၤတၢ်ဘၣ်ဃးကစၢ်ယ့ၣ်ၡူးခရံာ်အဂ့ၢ်ဒီး ကတိၤတၢ်လၢတၢ်သူၣ်ဒူသးဒူအလၢအပှဲၤဒီးလၢတၢ်သဘျ့ နီၢ်နီၢ်အပူၤလီၤ. ပှၤလၢအကတြီအီၤတအိၣ်နီတဂၤဘၣ်.