Read S'gaw Karen မၤတၢ် 3 Bible Online

မၤတၢ် 3 - S'gaw Karen bible

မၤတၢ် 3

¹တနံၤဖဲမုၢ်ဃ့ၢ်လီၤသၢနၣ်ရံၣ်တၢ်ဘါထုကဖၣ်အကတီၢ်န့ၣ်, စီၤပ့းတရူးဒီးစီၤယိၤဟၣ်လဲၤဝဲဆူတၢ်လုၢ်ဟံၣ်လီၤ.

²ဖဲန့ၣ်ပှၤအခီၣ်ဟးဂီၤလၢအအိၣ်ဖျဲၣ်ထီၣ်လံၤလံၤတဂၤဘၣ် တၢ်ဟဲစိာ်အီၤဆူတၢ်လုၢ်ဟံၣ်အတြဲၤ, လၢတၢ်ကိးန့ၢ်အမံၤလၢတြဲၤဃံလၤအခီၣ်ထံးန့ၣ်လီၤ. ကိးမုၢ်နံၤဒဲးအဝဲဒၣ်ဘၣ်တၢ်ဟဲစိာ်အီၤဒီးတၢ်ပာ်လီၤအီၤဖဲ တြဲၤခိၣ်ထိးန့ၣ်, ဒ်သိးအကဃ့အီၣ်တၢ်လၢပှၤလၢအလဲၤနုာ်ဆူတၢ်လုၢ်ဟံၣ်ပူၤ တဖၣ်အအိၣ်အဂီၢ်န့ၣ်လီၤ.

³တုၤအဝဲဒၣ်ထံၣ်ဘၣ်စီၤပ့းတရူးဒီးစီၤယိၤဟၣ်ဟဲလၢအကလဲၤ နုာ်ဝဲဆူတၢ်လုၢ်ဟံၣ်အပူၤန့ၣ်ဒီး, ဃ့အဝဲသ့ၣ်လၢအကဟ့ၣ် အီၤတၢ်တမံၤမံၤလီၤ.

⁴အဝဲသ့ၣ်ကွၢ်စူၣ်အီၤဒီးစီၤပ့းတရူးစံးဘၣ်အီၤ, “ကွၢ်ထီၣ်တၢ်ဆူပအိၣ်တက့ၢ်.”

⁵သတးဒီးအဝဲဒၣ်ကွၢ်ထီၣ်စီၤပ့းတရူးဒီးစီၤယိၤဟၣ်, အိၣ်ဒီးတၢ်မုၢ်လၢ်လၢကဒိးန့ၢ်ဘၣ်တၢ်တမံၤမံၤလၢအဝဲသ့ၣ် အအိၣ်လီၤ.

⁶ဘၣ်ဆၣ်စီၤပ့းတရူးစံးဘၣ်အီၤ, “ယကျိၣ်ယစ့တအိၣ်နီတဘ့ၣ် ဘၣ်. မ့မ့ၢ်ယဟ့ၣ်နၤတၢ်လၢအအိၣ်ဒီးယၤန့ၣ်လီၤ. လၢပှၤနစၤရ့းဖိယ့ၣ်ၡူးခရံာ်အမံၤန့ၣ်ယမၤလိာ်နၤ, ဂဲၤဆၢထၢၣ်ဒီးဟးတက့ၢ်.”

⁷အန့ၣ်ဒီးစီၤပ့းတရူးဖီၣ်ထီၣ်အစုထွဲဒီးဝံၢ်ဆၢထၢၣ်အီၤ, ဒီးတဘျီဃီဖဲန့ၣ်အဝဲဒၣ်အခီၣ်လၣ်ဒီးအခီၣ်ဒ့တဖၣ်ဆှိၣ်ထီၣ်ဝဲဒၣ်လီၤ.

⁸အန့ၣ်သတးဒီးအဝဲဒၣ်စံၣ်ထီၣ်ဝဲဒီးဆၢထၢၣ်လၢအခီၣ်, ဒီးဟးထီၣ်ဝဲဆူအံၤဆူဘးလီၤ. အန့ၣ်ဝံၤဒီးလဲၤသကိးဝဲဒီးအဝဲသ့ၣ်ခံဂၤန့ၣ်ဆူတၢ်လုၢ်ဟံၣ် ပူၤ, ဟးဝဲ, စံၣ်ထီၣ်ဝဲ, ဒီးစံးထီၣ်ပတြၢၤကစၢ်ယွၤလီၤ.

⁹ပှၤအိၣ်ဖဲန့ၣ်ခဲလၢာ်ထံၣ်အီၤလၢအဟးလၢအခီၣ်ဒီးစံးထီၣ်ပတြၢၤ ကစၢ်ယွၤ,

¹⁰ဒီးတုၤအသ့ၣ်ညါဝဲလၢအမ့ၢ်ပှၤတဂၤဃီလၢအဆ့ၣ်နီၤဃ့အီၣ် တၢ်ဖဲတၢ်လုၢ်ဟံၣ်အတြဲၤဃံလၤအခီၣ်ထံးန့ၣ်ဒီး, တၢ်လီၤကမၢကမၣ်ဘၣ်အဝဲသ့ၣ်ဒီးအသးလီၤကတုၤဝဲ, မ့ၢ်လၢအထံၣ်ဘၣ်တၢ်လၢအမၤအသးဒီးအီၤအဃိန့ၣ်လီၤ.

¹¹ဖဲပှၤတဂၤန့ၣ်ဟံးဃာ်ဒံးစီၤပ့းတရူးဒီးစီၤယိၤဟၣ်ဖဲတၢ်လီၢ် လၢတၢ်ကိးအမံၤလၢစီၤၡလိၤမိၤအတၢ်ဒုးခိၣ်န့ၣ်, ပှၤတဖၣ်န့ၣ်ကမၢကမၣ်ဝဲဒိၣ်ဒိၣ်ကလဲာ်ဒီးဃ့ၢ်ဃီၤဝဲဆူအဝဲ သ့ၣ်အအိၣ်န့ၣ်လီၤ.

¹²တုၤစီၤပ့းတရူးထံၣ်ဘၣ်ပှၤတဖၣ်န့ၣ်ဒီး, အဝဲဒၣ်စံးဘၣ်အဝဲသ့ၣ်, “ပှၤအံၣ်စရ့လးဖိသကိးသကိးဒီးယၤသ့ၣ်ဧၢ, ဘၣ်မနုၤသုကမၢကမၣ်လၢတၢ်အံၤအဃိလဲၣ်. ဒီးဘၣ်မနုၤသုကွၢ်ထံကွၢ်ဆးပှၤန့ၣ်လဲၣ်. ပှၤတဂၤအံၤဟးက့ၤလၢအခီၣ်သ့ဝဲန့ၣ်, မ့ၢ်သုဆိကမိၣ်လၢပမၤအီၤ လၢပစိကမီၤဒၣ်ဝဲ, မ့တမ့ၢ်ဘၣ်ဒီးလၢပမ့ၢ်ပှၤစီဆှံအဃိန့ၣ်ဧါ.

¹³စီၤအၤဘြၤဟၣ်, စီၤအံၤစဲးဒီးစီၤယၤကိာ်တဖၣ်အကစၢ်ယွၤ, ပမိၢ်ပၢ်ဖံဖုလၢပျၢၤတဖၣ်အကစၢ်ယွၤဟ့ၣ်လီၤအခ့အပှၤယ့ၣ်ၡူး လၢယွၤအလၤကပီၤန့ၣ်လီၤ. မ့မ့ၢ်သုဝဲဒၣ်, သုဟ့ၣ်လီၤကွံာ်အီၤဆူပှၤအခိၣ်အနၢ်တဖၣ်အစုပူၤ, ဒီးဖဲပဒိၣ်စီၤပံၤလးစံၣ်ညီၣ်တ့ၢ်လံဝဲလၢအကပျၢ်ထူၣ်ဖျဲး ကွံာ်အီၤဒၣ်လဲာ်န့ၣ်, သုညိကွံာ်အီၤလၢပဒိၣ်န့ၣ်အမဲာ်ညါလီၤ.

¹⁴အဝဲဒၣ်မ့ၢ်ပှၤစီဆှံဒီးပှၤအတီအလိၤတဂၤလီၤ. ဘၣ်ဆၣ်ဒီးသုညိကွံာ်အီၤလီၤ. မ့မ့ၢ်သုဃ့တၢ်သးကညီၤလၢပဒိၣ်စီၤပံၤလးဒ်သိးအကပျၢ်ထူၣ် ဖျဲးန့ၢ်သုလၢပှၤတဂၤလၢအမၤသံပှၤကညီန့ၣ်လီၤ.

¹⁵သုမၤသံကွံာ်ပှၤလၢအဆှၢပှၤဆူတၢ်မူနီၢ်နီၢ်တဂၤ, ဘၣ်ဆၣ်ဒီးကစၢ်ယွၤဒုးဂဲၤဆၢထၢၣ်က့ၤအီၤလၢတၢ်သံ, ဒီးတၢ်တမံၤအံၤပထံၣ်ဘၣ်လၢပနီၢ်ကစၢ်ဒၣ်ပဝဲလီၤ.

¹⁶ခီဖျိယ့ၣ်ၡူးအမံၤအစိကမီၤန့ၣ်, ပှၤလၢအခီၣ်ဟးဂီၤတဂၤအံၤအဂံၢ်အဘါဆူၣ်ထီၣ်ဝဲဒၣ်လီၤ. တၢ်လၢသုထံၣ်ဒီးသ့ၣ်ညါဘၣ်အံၤန့ၣ်, ဘၣ်တၢ်မၤအီၤခီဖျိလၢတၢ်စူၢ်တၢ်နာ်ယ့ၣ်ၡူးအမံၤအဃိန့ၣ် လီၤ. မ့ၢ်အစူၢ်အနာ်ယ့ၣ်ၡူးအဃိတၢ်ဒုးအိၣ်ဆူၣ်အိၣ်ချ့ထီၣ်က့ၤအီၤ, ဒ်သုထံၣ်ဘၣ်အသိးန့ၣ်လီၤ.

¹⁷ဒီးခဲကနံၣ်အံၤယဒီပုၢ်ဝဲၢ်သ့ၣ်ဧၢ, ယသ့ၣ်ညါလၢတၢ်လၢသုဝဲဒီးသုခိၣ်သုနၢ်တဖၣ်မၤဘၣ်ယ့ၣ်ၡူး န့ၣ်, မ့ၢ်ဒၣ်လၢသုတသ့ၣ်ညါဘၣ်အဃိလီၤ.

¹⁸တၢ်လၢကစၢ်ယွၤကတိၤဆိပာ်တ့ၢ်ဝဲခီဖျိဝံခဲလၢာ်လၢခရံာ် ကဘၣ်တူၢ်တၢ်နးတၢ်ဖှီၣ်န့ၣ်, ဒုးလၢထီၣ်ပှဲၤထီၣ်ဝဲလၢကျဲဒ်အံၤလီၤ.

¹⁹ပီၢ်ယၢ်လီၤဒီးဃၣ်လိၤက့ၤသုသးဆူကစၢ်ယွၤအအိၣ်, ဒ်သိးအဝဲကပျၢ်ကွံာ်သုတၢ်ဒဲးဘးအဂီၢ်န့ၣ်တက့ၢ်. သုမ့ၢ်မၤဒ်န့ၣ်ဒီး,

²⁰ကစၢ်ကဟ့ၣ်လီၤသးအတၢ်န့ၢ်ဂံၢ်န့ၢ်ဘါအကတီၢ်တဖၣ်, ဒီးကမၢလီၤယ့ၣ်ၡူးလၢအမ့ၢ်ခရံာ်လၢအဃုထၢပာ်တ့ၢ်လံဝဲလၢ သုဂီၢ်န့ၣ်လီၤ.

²¹အဝဲဒၣ်ကဘၣ်အိၣ်ဝဲလၢမူခိၣ်တုၤလီၤလၢအကတီၢ်ဖဲယွၤမၤ က့ၤတၢ်အသီခဲလၢာ်တစု, ဒ်ကစၢ်ယွၤဘိးဘၣ်သ့ၣ်ညါဆိပာ်စၢၤခီဖျိဝံစီဆှံလၢပျၢၤ တဖၣ်န့ၣ်လီၤ.

²²အဂ့ၢ်ဒ်အံၤ, စီၤမိၤၡ့စံးဝဲ ‘ကစၢ်ယွၤသုကစၢ်ကဒုးအိၣ်ထီၣ်ဝံတဂၤဟဲဆူသုအိၣ်ဒ်အမၢလီၤ ယၤအသိးန့ၣ်လီၤ. ဝံအဝဲန့ၣ်ကမ့ၢ်သုပှၤကလုာ်ဒၣ်သုဝဲ, ဒီးသုကဘၣ်စူၢ်အကလုၢ်ကိးထံၣ်ကိးဘီဒဲးန့ၣ်လီၤ.

²³ပှၤတဂၤလၢ်လၢ်လၢအတစူၢ်ဝံအဝဲန့ၣ်အကလုၢ်ဘၣ်န့ၣ်, ကဘၣ်တၢ်ထုးဖးကွံာ်အီၤဒီးယွၤအပှၤဂီၢ်မုၢ်ဒီးကဘၣ်တၢ်မၤဟး ဂီၤကွံာ်အီၤလီၤ.’

²⁴ဒီးဝံခဲလၢာ်လၢအအိၣ်ဒီးယွၤအတၢ်ကစီၣ်, စးထီၣ်လၢစီၤၡမူၤအ့လးဒီးဝံဟဲလၢအဝဲဒၣ်အလီၢ်ခံ တဖၣ်ဘိးဘၣ်သ့ၣ်ညါဆိပာ်စ့ၢ်ကီးတၢ်လၢအမၤအသးလၢမုၢ် မဆါတနံၤအံၤတဖၣ်အဂ့ၢ်န့ၣ်လီၤ.

²⁵ကစၢ်ယွၤအတၢ်အၢၣ်လီၤအီလီၤခီဖျိအဝံတဖၣ်န့ၣ်မ့ၢ်လၢသုဂီၢ်, ဒီးသုန့ၢ်သါဃုာ်တၢ်အၢၣ်လီၤအီလီၤလၢကစၢ်ယွၤမၤဝဲဒီး သုမိၢ်ပၢ်ဖံဖုလၢပျၢၤတဖၣ်န့ၣ်လီၤ. ဒ်အဝဲစံးဘၣ်စီၤအၤဘြၤဟၣ်အသိး, ‘ယကဆိၣ်ဂ့ၤပှၤဟီၣ်ခိၣ်ဖိခဲလၢာ်ခီဖျိနဖိနလံၤနစၢၤနသွဲၣ်တဖၣ်န့ၣ်လီၤ.’

²⁶အန့ၣ်သတးဒီး, ကစၢ်ယွၤဃုထၢထီၣ်အခ့အပှၤဒီးမၢလီၤဝဲလၢအကဟဲအဆိ ကတၢၢ်ဆူသုအိၣ်ဒ်သိးကဆိၣ်ဂ့ၤသု, ဒီးဒုးဃၣ်ကွံာ်သုကိးဂၤဒဲးလၢ သုကျဲအအၢအသီတဖၣ်န့ၣ်လီၤ.”