Read S'gaw Karen မၤတၢ် 4 Bible Online

မၤတၢ် 4 - S'gaw Karen bible

မၤတၢ် 4

¹ဖဲစီၤပ့းတရူးဒီးစီၤယိၤဟၣ်ကတိၤဒံးတၢ်ဒီးပှၤတဖၣ်အဖၢမုၢ်န့ၣ်, ပှၤလုၢ်တၢ်အခိၣ်တနီၤ, တၢ်လုၢ်ဟံၣ်အပှၤပၢၤတၢ်ဖိအခိၣ်တဂၤ, ဃုာ်ဒီးပှၤစးဒူၤကဲတနီၤဟဲတုၤဝဲဒၣ်လီၤ.

²အဝဲသ့ၣ်အသးဒိၣ်ထီၣ်မ့ၢ်လၢပှၤတၢ်မၢဖိခံဂၤန့ၣ်သိၣ် လီၤသီလီၤပှၤသ့ၣ်တဖၣ်လၢယ့ၣ်ၡူးဂဲၤဆၢထၢၣ်က့ၤလၢတၢ်သံ အဂ့ၢ်, ဒီးလၢကျဲဒ်အံၤဒုးနဲၣ်ဖျါထီၣ်ဝဲလၢပှၤသံတဖၣ် ကဂဲၤဆၢထၢၣ်သမူထီၣ်က့ၤအဂ့ၢ်အဃိန့ၣ်လီၤ.

³သတးဒီးအဝဲသ့ၣ်ဖီၣ်ပှၤတၢ်မၢဖိခံဂၤန့ၣ်, ဒီးဒၢနုာ်ဃာ်အီၤလၢဃိာ်ပူၤတုၤလၢမုၢ်ဆ့ၣ်ထီၣ်တနံၤ, မ့ၢ်လၢမုၢ်ကလီၤနုာ်တ့ၢ်ဝဲအဃိလီၤ.

⁴ဘၣ်ဆၣ်ဒီးပှၤအါဂၤလၢအနၢ်ဟူဘၣ်တၢ်ကစီၣ်န့ၣ်, စူၢ်က့ၤနာ်က့ၤယ့ၣ်ၡူးသတးဒီး, ပှၤစူၢ်က့ၤနာ်က့ၤတၢ်ခဲလၢာ်ကပှဲၤထီၣ်ယဲၢ်ကထိဂၤဃၣ်ဃၣ်န့ၣ်လီၤ.

⁵လၢမုၢ်ဆ့ၣ်ထီၣ်တနံၤန့ၣ်, ပှၤယူဒၤဖိကရၢအခိၣ်အနၢ်တဖၣ်, ပှၤသူၣ်က့သးပှၢ်တဖၣ်ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီ တဖၣ်အိၣ်ဖှိၣ်သကိးလၢဝ့ၢ်ယရူၤၡလ့ၣ်အပူၤန့ၣ်လီၤ.

⁶အဝဲသ့ၣ်ထံၣ်လိာ်အသးဒီးပှၤလုၢ်တၢ်အခိၣ်အဒိၣ်ကတၢၢ်စီၤအၣ် နၣ်, ဃုာ်ဒီးစီၤကၤယါဖၤ, စီၤယိၤဟၣ်, စီၤအလ့းစၣ်ဒြူး, ဒီးပှၤအဂၤတဖၣ်လၢအဘၣ်ဃးဒီးပှၤလုၢ်တၢ်အခိၣ်အဒိၣ်ကတၢၢ် အဒူၣ်န့ၣ်လီၤ.

⁷အဝဲသ့ၣ်မၢတၢ်မၢဖိတဖၣ်န့ၣ်ဆၢထၢၣ်လၢအဝဲသ့ၣ်အမဲာ်ညါ ဝံၤသံကွၢ်ဝဲ, “သုမၤတၢ်အံၤခီဖျိတၢ်စိတၢ်ကမီၤမနုၤမ့တမ့ၢ်ခီဖျိ မတၤတဂၤအမံၤလဲၣ်.”

⁸တုၤနုၤတစုစီၤပ့းတရူးလၢထီၣ်ပှဲၤထီၣ်ဒီးသးစီဆှံဒီးအဝဲဒၣ်စံးဆၢက့ၤ အဝဲသ့ၣ်, “ပှၤခိၣ်ပှၤနၢ်ဒီးပှၤသူၣ်က့သးပှၢ်သ့ၣ်ဧၢ,

⁹ပမ့ၢ်ဘၣ်တၢ်သံကွၢ်ပှၤလၢမုၢ်မဆါတနံၤအံၤဘၣ်ဃးဒီးတၢ် မၤဂ့ၤဘၣ်ပှၤအခီၣ်ဟးဂီၤတဂၤအံၤဒီးအဝဲဒၣ်ဘၣ်တၢ်မၤဘျါ က့ၤအီၤလၢကျဲဒ်လဲၣ်အဂ့ၢ်န့ၣ်ဒီး,

¹⁰သုဝဲခဲလၢာ်သုကြၢးသ့ၣ်ညါ, ဒီးပှၤအံၣ်စရ့လးဖိခဲလၢာ်ကြၢး သ့ၣ်ညါဝဲလၢ, ပှၤတဂၤအံၤအိၣ်ဆၢထၢၣ်ပှဲၤဂံၢ်ပှဲၤဘါလၢသုမဲာ်ညါဖဲအံၤ န့ၣ်ခီဖျိပှၤနစၤရ့းဖိယ့ၣ်ၡူးအမံၤအစိကမီၤအဃိန့ၣ်လီၤ. ယ့ၣ်ၡူးခရံာ်မ့ၢ်ပှၤလၢသုပျၤထီအီၤလၢထူၣ်စုညါအလိၤ, ဘၣ်ဆၣ်ဒီးယွၤဒုးဂဲၤဆၢထၢၣ်က့ၤအီၤလၢတၢ်သံန့ၣ်လီၤ.

¹¹တၢ်ကွဲးအသးစံးတၢ်ဘၣ်ဃးယ့ၣ်ၡူးအဂ့ၢ်, ‘လၢၢ်တဖျၢၣ်လၢသုဝဲပှၤဘှီထီၣ်ဟံၣ်တဖၣ် ညိကွံာ်ဝဲန့ၣ်, ကဲထီၣ်လံဟံၣ်သနၢၣ်အလၢၢ်လၢ အကါဒိၣ်ကတၢၢ်န့ၣ်လီၤ.’

¹²ပှၤလၢအအုၣ်က့ၤခီၣ်က့ၤပှၤသ့မ့ၢ်ထဲအဝဲဒၣ်တဂၤဧိၤလီၤ. လၢဟီၣ်ခိၣ်ဒီဘ့ၣ်ညါအပူၤ, မံၤအဂၤလၢကစၢ်ယွၤဟ့ၣ်လီၤဝဲလၢတၢ်အုၣ်က့ၤခီၣ်က့ၤအဂီၢ် န့ၣ်တအိၣ်နီတဖျၢၣ်ဘၣ်.”

¹³ပှၤလၢအအိၣ်လၢကီၣ်ကးအပူၤတဖၣ်တုၤအထံၣ်ဘၣ်စီၤပ့းတရူး ဒီးစီၤယိၤဟၣ်အတၢ်သူၣ်ဒူသးဒူဒီးသ့ၣ်ညါဝဲလၢပှၤခံ ဂၤအံၤမ့ၢ်ပှၤတမၤလိမၤဒိးဘၣ်တၢ်ဘၣ်, ဒီးမ့ၢ်ဒၣ်ပှၤမုၢ်ဆ့ၣ်မုၢ်ဂီၤဖိသတးဒီး, အဝဲသ့ၣ်ကမၢကမၣ်ဝဲဒၣ်လီၤ. အန့ၣ်ဒီးသ့ၣ်ညါဝဲလၢအဝဲသ့ၣ်မ့ၢ်တ့ၢ်ပှၤတဖၣ်လၢအရ့လိာ်ဘၣ် အသးတံၢ်တံၢ်ဒီးယ့ၣ်ၡူးန့ၣ်လီၤ.

¹⁴ဘၣ်ဆၣ်ဒီးမ့ၢ်လၢအဝဲသ့ၣ်ထံၣ်ဘၣ်ပှၤတဂၤလၢတၢ်မၤဘျါ က့ၤအခီၣ်န့ၣ်အိၣ်ဆၢထၢၣ်ဖဲစီၤပ့းတရူးဒီးစီၤယိၤဟၣ် အကပၤထံးအဃိ, အဝဲသ့ၣ်စံးကတိၤက့ၤတၢ်တသ့လၢၤနီတမံၤဘၣ်န့ၣ်လီၤ.

¹⁵သတးဒီးအဝဲသ့ၣ်မၢစီၤပ့းတရူးဒီးစီၤယိၤဟၣ်ဟးထီၣ်ကွံာ် ဆူတၢ်အိၣ်ဖှိၣ်အဒၢးအချၢဝံၤ, အဝဲသ့ၣ်အိၣ်ဖှိၣ်ကတိၤသကိးတၢ်ဂ့ၢ်ထဲအဝဲသ့ၣ်ဧိၤ,

¹⁶ဒီးသံကွၢ်လိာ်အသးတဂၤဒီးတဂၤ, “ပကမၤဘၣ်ပှၤခံဂၤအံၤဒ်လဲၣ်. အဝဲသ့ၣ်မၤတ့ၢ်လံတၢ်လီၤလးဒိၣ်ဒိၣ်မုၢ်မုၢ်တခါအံၤဒီးပှၤဝ့ၢ် ယရူၤၡလ့ၣ်ဖိကိးဂၤဒဲးသ့ၣ်ညါဝဲသတးဒီးပကသမၢပဝဲဒီးစံးလၢ အဝဲသ့ၣ်တမၤဝဲဘၣ်န့ၣ်, ပစံးတသ့လ့ၤတက့ၤဘၣ်.

¹⁷ဘၣ်ဆၣ်ဒီးဒ်သိးတၢ်ဂ့ၢ်တမံၤအံၤအသုတဟူထီၣ်သါလီၤအါထီၣ် ဆူညါလၢၤတဂ့ၤအဂီၢ်န့ၣ်, မ်ပကဟ့ၣ်ပလီၢ်အဝဲသ့ၣ်လၢအသုတကတိၤလၢၤတၢ်လၢယ့ၣ်ၡူး အမံၤလၢပှၤနီတဂၤတဂ့ၤန့ၣ်တက့ၢ်.”

¹⁸သတးဒီးအဝဲသ့ၣ်ကိးနုာ်ကဒါက့ၤစီၤပ့းတရူးဒီးစီၤယိၤဟၣ် ဒီးစံးဘၣ်အီၤ, “သုတဘၣ်စံးကတိၤတၢ်မ့ၢ်ဂ့ၤ, သိၣ်လီၤသီလီၤတၢ်မ့ၢ်ဂ့ၤ, လၢယ့ၣ်ၡူးအမံၤလ့ၤတက့ၤဘၣ်.”

¹⁹ဘၣ်ဆၣ်ဒီးစီၤပ့းတရူးဒီးစီၤယိၤဟၣ်စံးဆၢက့ၤအဝဲသ့ၣ်, “လၢကစၢ်ယွၤအမဲာ်ညါန့ၣ်, တၢ်အဘၣ်မ့ၢ်တၢ်ဒ်လဲၣ်န့ၣ်စံၣ်ညီၣ်ဒၣ်သုဝဲတက့ၢ်. မ့ၢ်တၢ်ဒိကနၣ်သုကလုၢ်ဧါ. မ့တမ့ၢ်ဘၣ်ဒီးတၢ်ဒိကနၣ်ကစၢ်ယွၤ အကလုၢ်လဲၣ်.

²⁰အဂ့ၢ်ဒ်လဲၣ်န့ၣ်, တၢ်လၢပထံၣ်ဘၣ်တ့ၢ်ဒီး နၢ်ဟူဘၣ်တ့ၢ်တဖၣ်န့ၣ်, ပဆိတ့ၢ်စံးကတိၤလၢအဂ့ၢ်တသ့ဘၣ်.”

²¹အန့ၣ်ဒီးကီၣ်ကးကတိၤဟ့ၣ်ပလီၢ်အဝဲသ့ၣ်ဆူၣ်န့ၢ်အလီၢ်တက့ၢ်ဝံၤဒီး ပျၢ်ထူၣ်ဖျဲးကွံာ်အဝဲသ့ၣ်လီၤ. လၢကစံၣ်ညီၣ်စီၤပ့းတရူးဒီးစီၤယိၤဟၣ်န့ၣ်သ့ၣ်ညါဝဲလၢတသ့ လ့ၤတက့ၤဘၣ်, အဂ့ၢ်မ့ၢ်လၢပှၤခဲလၢာ်စံးထီၣ်ပတြၢၤကစၢ်ယွၤ, လၢတၢ်လၢအမၤတ့ၢ်အသးအဃိန့ၣ်လီၤ.

²²ပှၤလၢအဘၣ်တၢ်မၤဘျါက့ၤအီၤလီၤလိၢ်လီၤလးတဂၤအံၤ, အသးအိၣ်အနံၣ်လွံၢ်ဆံအဘျဲၣ်န့ၣ်လီၤ.

²³တုၤတၢ်ပျၢ်ထူၣ်ဖျဲးကွံာ်စီၤပ့းတရူးဒီးစီၤယိၤဟၣ်ဝံၤတဘျီဃီဒီး, အဝဲသ့ၣ်က့ၤက့ၤဆူအတံၤသကိးတဖၣ်အအိၣ်ဒီးစံးဘၣ်တဲဘၣ်အဝဲ သ့ၣ်တၢ်လၢပှၤလုၢ်တၢ်အခိၣ်အဒိၣ်တဖၣ်ဒီးပှၤသူၣ်က့သးပှၢ် တဖၣ်စံးဘၣ်တ့ၢ်အဝဲသ့ၣ်န့ၣ်လီၤ.

²⁴တုၤပှၤစူၢ်က့ၤနာ်က့ၤတၢ်တဖၣ်နၢ်ဟူဝဲဒီး, အဝဲသ့ၣ်ဃ့ထုကဖၣ်ယွၤလၢသးတဖျၢၣ်ဃီဒီးစံးဝဲ, “ကစၢ်လၢအပၢဘၣ်တၢ်ခဲလၢာ်, ယွၤလၢအတ့လီၤပာ်လီၤမူကပိာ်လိၤ, ဟီၣ်ခိၣ်, ပီၣ်လဲၣ်, ဒီးကယဲၢ်တၢ်လၢအအိၣ်လၢအပူၤခဲလၢာ်, တဂၤဧၢ,

²⁵ခီဖျိလၢသးစီဆှံန့ၣ်နဒုးကတိၤပပၢ်ဖးဒိၣ်, နခ့နပှၤစီၤဒၤဝံး, တၢ်ကတိၤလၢအစံးဝဲ, ‘ဘၣ်မနုၤအဃိပှၤကလုာ်ဂၤတဖၣ် အသးဘၣ်ကဲၤထီၣ်လဲၣ်. ဘၣ်မနုၤအဃိအဝဲသ့ၣ်ဘၣ်ကူၣ်ထီၣ်ဖးလီၤတၢ် ကလီကလီန့ၣ်လဲၣ်.

²⁶စီၤပၤလၢဟီၣ်ခိၣ်ချၢတဖၣ်ကတဲာ်ကတီၤအသး, ဒီးပှၤလၢအပၢတၢ်တဖၣ်ပာ်ဖှိၣ်ထီၣ်သကိးအသး လၢကဒုးတၢ်ထီဒါကစၢ်ဒီးအခရံာ်န့ၣ်လီၤ.’

²⁷အဂ့ၢ်ဒ်အံၤ, စီၤဟ့ၤရိာ်ဒီးစီၤပီၣ်တံၤပံၤလး, ပှၤကလုာ်ဂၤတဖၣ်, ဒီးပှၤအံၣ်စရ့လးဖိတဖၣ်, အိၣ်ဖှိၣ်သကိးနီၢ်နီၢ်ဖဲဝ့ၢ်အံၤအပူၤဒီးကူၣ်ထီၣ်သကိးတၢ်ထီ ဒါနခ့နပှၤစီဆှံယ့ၣ်ၡူး, ပှၤလၢနဖှူအီၤလၢသိဒီးဒုးကဲအီၤလၢခရံာ် န့ၣ်လီၤ.

²⁸အဝဲသ့ၣ်ပာ်ဖှိၣ်ထီၣ်အသးဒ်သိးကမၤတၢ်ခဲလၢာ်လၢနစံၣ်ညီၣ် တဲာ်တ့ၢ်လၢအကဘၣ်မၤအသး, ခီဖျိနစိနကမီၤဒီး နတၢ်ဘၣ်နသးန့ၣ်လီၤ.

²⁹မ့မ့ၢ်ခဲကနံၣ်အံၤ, ကစၢ်ဧၢ, ကနၣ်ကွၢ်အဝဲသ့ၣ်အတၢ်ကတိၤပျံၤကတိၤဖုးတ့ၢ်ပဝဲဒၣ်တဖၣ်န့ၣ်, ဒီးဒုးစံးဒုးကတိၤပဝဲနခ့နပှၤတဖၣ်လၢနတၢ်ကစီၣ်, လၢတၢ်သူၣ်ဒူသးဒူအပူၤတက့ၢ်.

³⁰ယူာ်ထီၣ်နစုလၢတၢ်မၤဘျါက့ၤတၢ်အဂီၢ်, ဒီးလၢတၢ်မၤတၢ်လီၤလးဒီးတၢ်ပနီၣ်လီၤလးတဖၣ်အဂီၢ်, ခီဖျိနခ့နပှၤစီဆှံယ့ၣ်ၡူးအမံၤန့ၣ်တက့ၢ်.”

³¹တုၤအဝဲသ့ၣ်ဃ့ဘါထုကဖၣ်တၢ်ကတၢၢ်ဝဲဒီး, တၢ်လီၢ်ဖဲအဝဲသ့ၣ်အိၣ်ဖှိၣ်သကိးဝဲလၢအပူၤန့ၣ်ဟူးဝးဝဲလီၤ. အဝဲသ့ၣ်ကိးဂၤဒဲးလၢထီၣ်ပှဲၤထီၣ်ဒီးသးစီဆှံ, ဒီးစံၣ်တဲၤတဲလီၤယွၤအတၢ်ကစီၣ်လၢတၢ်သူၣ်ဒူသးဒူအပူၤလီၤ.

³²ပှၤစူၢ်က့ၤနာ်က့ၤတၢ်ခဲလၢာ်အိၣ်ဒီးတၢ်ဆိကမိၣ်တမံၤဃီဒီးသူၣ် တဖျၢၣ်ဃီသးတဖျၢၣ်ဃီန့ၣ်လီၤ. ကယဲၢ်တၢ်အိၣ်ဒီးယၤမ့ၢ်ဒၣ်ထဲလၢယဂီၢ်ဧိၤလီၤန့ၣ်, တစံးဝဲနီတဂၤဘၣ်. မ့မ့ၢ်အဝဲသ့ၣ်ဟ့ၣ်နီၤလိာ်သကိးအသးတၢ်တမံၤလၢ်လၢ်လၢ အအိၣ်ဒီးအီၤ, တဂၤဒီးတဂၤန့ၣ်လီၤ.

³³ပှၤတၢ်မၢဖိတဖၣ်အုၣ်အသးအိၣ်ဒီးတၢ်စိကမီၤဖးဒိၣ်လၢ ကစၢ်ယ့ၣ်ၡူးဂဲၤဆၢထၢၣ်သမူထီၣ်က့ၤလၢတၢ်သံအဂ့ၢ်, ဒီးကစၢ်ယွှၤလူလီၤဂၢ်လီၤတၢ်ဘျုးတၢ်ဖှိၣ်ဒိၣ်ဒိၣ်အါအါအိၣ် လၢအဝဲသ့ၣ်ခဲလၢာ်အလိၤလီၤ.

³⁴လၢပှၤစူၢ်က့ၤနာ်က့ၤတၢ်တဖၣ်အကျါပှၤအဖှီၣ်အယာ်တအိၣ်နီတဂၤဘၣ်. အဂ့ၢ်ဒ်အံၤ, ပှၤလၢအအိၣ်ဒီးစံာ်လီၢ်ပှဲၤလီၢ်ဒီးဟံၣ်ဃီန့ၣ်ဆါလီၤကွံာ်ဝဲ, ဒီးကျိၣ်စ့လၢအဒိးန့ၢ်ဘၣ်ဝဲန့ၣ်ဟဲစိာ်ဝဲ,

³⁵ဒီးဟ့ၣ်လီၤဝဲလၢပှၤတၢ်မၢဖိတဖၣ်အစုပူၤ, ဒီးပှၤတၢ်မၢဖိတဖၣ်ဟ့ၣ်နီၤလီၤကျိၣ်စ့န့ၣ်လၢပှၤတဂၤဒီး တဂၤဒ်အလိၣ်ဘၣ်ဝဲအသိးန့ၣ်လီၤ.

³⁶စီၤယိၤစ့ၣ်ပှၤလ့ၤဝံဖိလၢအအိၣ်ဖျဲၣ်ထီၣ်လၢကီးကူပြူးအပူၤ, လၢပှၤတၢ်မၢဖိတဖၣ်ယုၢ်န့ၢ်အမံၤလၢစီၤဘၢ်နါဘၤ (အခီပညီ, ပှၤလၢအဟ့ၣ်ဆူၣ်ထီၣ်ပှၤဂံၢ်ပှၤဘါ) တဂၤ

³⁷အိၣ်ဒီးအစံာ်တလီၢ်လၢအဆါလီၤကွံာ်ဝဲဝံၤ, ဟဲစိာ်အစ့န့ၣ်ဒီးဟ့ၣ်လီၤဝဲလၢပှၤတၢ်မၢဖိတဖၣ်အစုပူၤလီၤ.