Read S'gaw Karen မၤတၢ် 6 Bible Online

မၤတၢ် 6 - S'gaw Karen bible

မၤတၢ် 6

¹လၢခံက့ၤဖဲအပျဲၢ်အဘီၣ်တဖၣ်အနီၣ်ဂံၢ်အါထီၣ်ဝဲကွ့ၢ်ကွ့ၢ်န့ၣ်, ပှၤယူဒၤဖိလၢအကတိၤထဲကြံးခ်အကျိာ်တဖၣ်ကဒူးကဒ့ၣ်ထီဒါ ပှၤယူဒၤဖိလၢအကတိၤအကျိာ်ဒၣ်ဝဲတဖၣ်န့ၣ်လီၤ. အဝဲသ့ၣ်စံးဝဲလၢဖဲအဘၣ်ဃးဒီးတၢ်ဟ့ၣ်နီၤလီၤလၢတနံၤဂီၢ် တနံၤဂီၢ်န့ၣ်, ပှၤတကနၣ်ဃုာ်အဝဲသ့ၣ်အပှၤမုၣ်ကမဲတဖၣ်ဘၣ် န့ၣ်လီၤ.

²အန့ၣ်ဒီးပှၤတၢ်မၢဖိတဆံခံဂၤန့ၣ်ကိးဖှိၣ်အပျဲၢ်အဘီၣ်အတၢ်အိၣ် ဖှိၣ်ဒီဖုညါဒီးစံးဘၣ်အဝဲသ့ၣ်, “လၢပကကွၢ်ကျဲၤတၢ်အီၣ်တၢ်အီအဂီၢ်န့ၣ်, ပမ့ၢ်ဘၣ်ဆိကတီၢ်ကွံာ်တၢ်စံၣ်တဲၤတဲလီၤယွၤကလုၢ်ကထါဒီး တမ့ၢ်တၢ်လၢအကြၢးအဘၣ်ဘၣ်.

³သတးဒီးဒီပုၢ်ဝဲၢ်သ့ၣ်ဧၢ, ဃုထၢထီၣ်ပှၤနွံဂၤလၢသုကျါ, လၢအဘၣ်တၢ်သ့ၣ်ညါအီၤဒ်အမ့ၢ်ပှၤတဖၣ်လၢအလၢပှဲၤဒီးသးစီ ဆှံဒီးတၢ်ကူၣ်သ့ဒီးပကပာ်လီၤမူဒါတခါအံၤလၢအဝဲသ့ၣ် အစုပူၤလီၤ.

⁴ပဝဲဒၣ်ပကစၢ်ဒၣ်ပဝဲတခီ, ပကဟ့ၣ်လီၤပဆၢကတီၢ်လၢာ်လၢာ်ဆ့ဆ့လၢတၢ်ထု ကဖၣ်ဒီးတၢ်စံၣ်တဲၤတဲလီၤယွၤကလုၢ်ကထါအဂီၢ်လီၤ.”

⁵ပှၤတၢ်မၢဖိတဖၣ်အတၢ်ဟ့ၣ်ကူၣ်ဟ့ၣ်ဖးန့ၣ်ပှၤဒီဖုညါဘၣ် သူၣ်ဘၣ်သးဝဲဒိၣ်မးသတးဒီး, အဝဲသ့ၣ်ဃုထၢထီၣ်ဝဲစီၤစတ့းဖၣ်, ပှၤတဂၤလၢအလၢပှဲၤဒီးတၢ်စူၢ်တၢ်နာ်ဒီးသးစီဆှံ, ဒီးဃုထၢထီၣ်စ့ၢ်ကီးဝဲ စီၤဖံလံးပူး, စီၤပြဃီၢ်, စီၤနံၤကါနီၢ်, စီၤတံမိၣ်, စီၤပၢ်မ့းနး, ပှၤအၣ်တံၤအီာ်ဖိစီၤနံၤကလါလၢအနုာ်လီၤဆူ ပှၤယူဒၤဖိအတၢ်ဘူၣ်တၢ်ဘါအပူၤတဖၣ်န့ၣ်လီၤ.

⁶အဝဲသ့ၣ်ဆှၢထီၣ်ပှၤတဖၣ်အံၤဆူပှၤတၢ်မၢဖိတဖၣ်အမဲာ်ညါ, ဒီးပှၤတၢ်မၢဖိတဖၣ်ဃ့ထုကဖၣ်ယွၤဒီးပာ်အစုလၢပှၤတဖၣ် အံၤအခိၣ်လိၤလီၤ.

⁷အန့ၣ်သတးဒီးကစၢ်ယွၤအကလုၢ်ကထါရၤလီၤအသးအါထီၣ်ဝဲကွ့ၢ် ကွ့ၢ်လီၤ. အပျဲၢ်အဘီၣ်အနီၣ်ဂံၢ်လၢဝ့ၢ်ယရူၤၡလ့ၣ်အပူၤအါထီၣ်ဂီၢ် ထီၣ်ဒိၣ်ဒိၣ်ကလဲာ်, ဒီးပှၤလုၢ်တၢ်အခိၣ်တဘျုးဒံတဘျုးဂၤစူၢ် က့ၤနာ်က့ၤတၢ်လီၤ.

⁸စီၤစတ့းဖၣ်, ပှၤလၢအလၢပှဲၤဒီးကစၢ်ယွၤအဘျုးအဖှိၣ်ဒီးတၢ်စိတၢ် ကမီၤတဂၤန့ၣ်, မၤဝဲတၢ်လီၤလးဒီးတၢ်ပနီၣ်လီၤလးအဒိၣ်အမုၢ် တဖၣ်လၢပှၤသ့ၣ်တဖၣ်အကျါလီၤ.

⁹ဘၣ်ဆၣ်ဒီးပှၤအိၣ်ဝဲတနီၤလၢအဂဲၤဆၢထၢၣ်ထီဒါအီၤလီၤ. အဝဲသ့ၣ်မ့ၢ်ပှၤကရၢဖိဘၣ်ဃးဒီးပှၤသဘျ့ဖိအဘူၣ်ဘျီၣ် (ဒ်အဘၣ်တၢ်ကိးအီၤအသိး) ဒီးမ့ၢ်ပှၤယူဒၤဖိအိၣ်လၢဝ့ၢ်ကူၤ ရ့ၤန့ဒီးဝ့ၢ်အလ့းစၣ်ဒြ့းတဖၣ်အပူၤလီၤ. အဝဲသ့ၣ်အံၤဒီးပှၤယူဒၤဖိအဂၤတဖၣ်လၢအအိၣ်လၢကီၢ်ကံၤလံၤ ကံဒီးကီၢ်အၤစံန့ၣ်, ကတိၤဂ့ၢ်လိာ်တၢ်ဒီးစီၤစတ့းဖၣ်လီၤ.

¹⁰ဘၣ်ဆၣ်ဒီးယွၤအသးဒုးကတိၤအီၤတၢ်ကတိၤပှဲၤဒီးတၢ်ကူၣ် သ့သတးဒီး, တုၤအဝဲဒၣ်ကတိၤထီၣ်တၢ်တစုန့ၣ်, အဝဲသ့ၣ်ကတိၤဂ့ၢ်လိာ်ဆၢအီၤတသ့ဘၣ်န့ၣ်လီၤ.

¹¹အန့ၣ်ဒီး, အဝဲသ့ၣ်သဆၣ်ထီၣ်ပှၤတနီၤအခံလၢတၢ်ခူသူၣ်ခူလံာ် အပူၤလၢအကအုၣ်အသးကဘျံးကဘျၣ်ဒီးစံး, “ပနၢ်ဟူဘၣ်တ့ၢ်လံအဝဲဒၣ်အတၢ်ကတိၤတရီတပါထီဒါစီၤမိၤၡ့ ဒီးကစၢ်ယွၤန့ၣ်လီၤ.”

¹²အဝဲသ့ၣ်မၤဝဲဒ်သိးအံၤန့ၣ်, မ့ၢ်အမၤဂဲၤထီၣ်ပှၤဂီၢ်မုၢ်ဒီးပှၤယူဒၤဖိကရၢ အခိၣ်အနၢ်တဖၣ်ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ် အသူၣ်အသးလီၤ. အဝဲသ့ၣ်ဖီၣ်စီၤစတ့းဖၣ်ဒီးမိၤထီၣ်အီၤဆူကီၣ်ကး အမဲာ်ညါလီၤ.

¹³အန့ၣ်ဝံၤအဝဲသ့ၣ်ကိးနုာ်ဝဲပှၤတနီၤလၢကအုၣ်အသးကဘျံး ကဘျၣ်ထီဒါစီၤစတ့းဖၣ်ဒီးပှၤတဖၣ်န့ၣ်စံးဝဲ, “ပှၤတဂၤအံၤထီဘိန့ၣ်စံးကတိၤတၢ်ထီဒါပတၢ်လုၢ်ဟံၣ်စီ ဆှံဒီးတၢ်သိၣ်တၢ်သီလၢပန့ၢ်ဘၣ်ခီဖျိစီၤမိၤၡ့န့ၣ်လီၤ.

¹⁴ပနၢ်ဟူဘၣ်တ့ၢ်လံအဝဲဒၣ်အတၢ်ကတိၤလၢအစံးဝဲလၢပှၤ နစၤရ့းဖိယ့ၣ်ၡူးတဂၤအံၤကမၤလီၤပှီၢ်ကွံာ်တၢ်လုၢ်ဟံၣ်စီဆှံ တဖျၢၣ်အံၤ, ဒီးလဲလိာ်ကွံာ်ပလုၢ်ပလၢ်တဖၣ်လၢစီၤမိၤၡ့ ဟ့ၣ်လီၤတ့ၢ်လံပှၤန့ၣ်လီၤ.”

¹⁵ကယဲၢ်ပှၤဆ့ၣ်နီၤအိၣ်လၢကီၣ်ကးအလီၢ်န့ၣ်, ကွၢ်စူၣ်စီၤစတ့းဖၣ်ဒီးထံၣ်ဝဲလၢအဝဲဒၣ်အမဲာ်ဖျါလီၤဂာ်ဒ် မူခိၣ်ကလူးတဂၤအမဲာ်အသိးန့ၣ်လီၤ.