S'gaw Karen bible online

မၤတၢ် 7

¹ပှၤလုၢ်တၢ်အခိၣ်အဒိၣ်ကတၢၢ်သံကွၢ်စီၤစတ့းဖၣ်န့ၣ်, “မ့ၢ်နစံးကတိၤတ့ၢ်နဲဒ်ပှၤတဖၣ်အံၤတဲဝဲအသိးန့ၣ်ဧါ.

²စီၤစတ့းဖၣ်စံးဆၢက့ၤတၢ်ဒီးစံးဝဲ, “ယဒီပုၢ်ဝဲၢ်ခွါတဖၣ်ဒီးယပၢ်သ့ၣ်ဧၢ, ကနၣ်တက့ၢ်. ကစၢ်ယွၤလၢအလၢပှဲၤဒီးတၢ်လၤတၢ်ကပီၤတဂၤန့ၣ်, အိၣ်ဖျါထီၣ်လၢပပၢ်စီၤအၤဘြၤဟၣ်အမဲာ်ညါ, ဖဲအအိၣ်ဝဲလၢကီၢ်မ့းစပတၤမံအပူၤတချုးအလဲၤအိၣ်လဲၤဆိးဝဲ လၢဝ့ၢ်ဃၤရၣ်အပူၤဒံးဘၣ်န့ၣ်လီၤ.

³ယွၤစံးဘၣ်အီၤ, ‘ဟးဖးဒီးနဘူးနတံၢ်တဖၣ်ဒီးဟးထီၣ်ကွံာ်လၢကီၢ်လၢနအိၣ်လၢ အပူၤအံၤ, ဒီးလဲၤဆူကီၢ်တဘ့ၣ်လၢယကဒုးနဲၣ်နၤန့ၣ်တက့ၢ်.’

⁴အန့ၣ်သတးဒီး, အဝဲဒၣ်ဟးထီၣ်ကွံာ်လၢကီၢ်က့ၤစ့းဒီးလဲၤအိၣ်လဲၤ ဆိးဝဲလၢဝ့ၢ်ဃၤရၣ်လီၤ. အဝဲဒၣ်အပၢ်သံဝံၤအလီၢ်ခံန့ၣ်, ကစၢ်ယွၤမၢအသုးအလီၢ်ဆူကီၢ်လၢသုအိၣ်လၢအပူၤခဲ ကနံၣ်အံၤတဘ့ၣ်န့ၣ်လီၤ.

⁵ဖဲန့ၣ်အကတီၢ်, ကစၢ်ယွၤတဟ့ၣ်အီၤဟီၣ်ခိၣ်နီတက့လၢကကဲအတၢ် ဒၣ်ဝဲန့ၣ်ဘၣ်. ထဲတပျၢ်ဧိၤဒၣ်လဲာ်တဟ့ၣ်ဝဲဘၣ်. ဘၣ်ဆၣ်, ကစၢ်ယွၤအၢၣ်လီၤအီလီၤဝဲလၢအကဟ့ၣ်အီၤဟီၣ်ခိၣ်အံၤ လၢအကကဲထီၣ်အတၢ်ဒၣ်ဝဲဒီးအစၢၤအသွဲၣ်တဖၣ်အတၢ် န့ၣ်လီၤ. ဖဲကစၢ်ယွၤမၤတၢ်အၢၣ်လီၤအီလီၤတမံၤအံၤ အကတီၢ်န့ၣ်, စီၤအၤဘြၤဟၣ်အဖိအလံၤတအိၣ်နီတဂၤဘၣ်.

⁶တၢ်လၢကစၢ်ယွၤစံးဘၣ်အီၤမ့ၢ်ဒ်အံၤ, ‘နစၢၤနသွဲၣ်တဖၣ်ကအိၣ်သမှံၤလၢတခီထံတခီကီၢ်, ဒီးဖဲန့ၣ်အဝဲသ့ၣ်ကဘၣ်တၢ်မၢကဲကုၢ်ဒီးမၤနးမၤဖှီၣ်အီၤ အနံၣ်လွံၢ်ကယၤလီၤ.

⁷ဘၣ်ဆၣ်ဒီး, ယကစံၣ်ညီၣ်ပှၤလၢအမၢကဲကုၢ်အဝဲသ့ၣ်, ဒီးအဝဲန့ၣ်ဝံၤအလီၢ်ခံ, အဝဲသ့ၣ်ကဟးထီၣ်ကွံာ်လၢကီၢ်န့ၣ်အပူၤဒီးကဘူၣ်ထီၣ်ဘါ ထီၣ်ယၤဖဲတၢ်လီၢ်အံၤန့ၣ်လီၤ.’

⁸အန့ၣ်ဝံၤကစၢ်ယွၤမၤတၢ်အၢၣ်လီၤအီလီၤဒီးစီၤအၤဘြၤဟၣ်, ဒီးအပနီၣ်မ့ၢ်ဝဲ, တၢ်ကူးတရံးအလုၢ်အလၢ်န့ၣ်လီၤ. သတးဒီး, စီၤအၤဘြၤဟၣ်ကူးတရံးဝဲအဖိခွါစီၤအံၤစဲး, ဖဲအအိၣ်ဖျဲၣ်ထီၣ်ဝံၤဃိးသီတသီန့ၣ်လီၤ. စီၤအံၤစဲးမၤဝဲတၢ်တမံၤဃီန့ၣ်လၢအဖိခွါစီၤယၤကိာ် အဂီၢ်, ဒီးစီၤယၤကိာ်မၤစ့ၢ်ကီးဝဲတၢ်တမံၤဃီန့ၣ်လၢအဖိခွါ တဆံခံဂၤ, လၢအမ့ၢ်ပပှၤကလုာ်အပၢ်ဖးဒိၣ်, မံၤဟူသၣ်ဖျါလၢပျၢၤတဖၣ်အဂီၢ်န့ၣ်လီၤ.

⁹ပၢ်ဖးဒိၣ်တဖၣ်န့ၣ်အသးက့ၣ်အဒီပုၢ်ဝဲၢ်စီၤယိၤသး, ဒီးဆါလီၤကွံာ်အီၤလၢအကကဲထီၣ်ကုၢ်လၢကီၢ်အဲၤကူပတူး အပူၤအဂီၢ်န့ၣ်လီၤ. ဘၣ်ဆၣ်ဒီးကစၢ်ယွၤအိၣ်ဒီးအီၤ,

¹⁰ဒီးမၤပူၤမၤဖျဲးအီၤတဘျီလၢ်လၢ်ဖဲအဘၣ်တၢ်ကီတၢ်ခဲ အကတီၢ်န့ၣ်လီၤ. တုၤအလဲၤထီၣ်ဘၣ်လၢကီၢ်အဲၤကူပတူးအစီၤပၤဖၤရိၤအမဲာ် ညါဒီး, ကစၢ်ယွၤဟ့ၣ်အီၤတၢ်ပာ်သူၣ်ပာ်သးဒီးတၢ်ကူၣ်သ့ကူၣ် ဘၣ်လၢအထုးန့ၢ်စီၤပၤဖၤရိၤအသးသတးဒီး, စီၤပၤန့ၣ်ဒုးကဲထီၣ်အီၤလၢပဒိၣ်ပၢတၢ်လၢကီၢ်အဲၤကူပတူး အဖီခိၣ်, ဒီးလၢအနူၢ်အစီၤအဖီခိၣ်န့ၣ်လီၤ.

¹¹အကတီၢ်ဖဲန့ၣ်, တၢ်သၣ်ဝံၤလီၤဒိအိၣ်ထီၣ်ဝဲသကုၤကီၢ် အဲၤကူပတူးဒီးကီၢ်ကနၤဧၣ်, ဒီးတၢ်န့ၣ်ဒုးအိၣ်ထီၣ်တၢ်ဖှီၣ်တၢ်နး အဒိၣ်အမုၢ်လီၤ. ပပၢ်ဖးဒိၣ်တဖၣ်ဃုမၤန့ၢ်တၢ်အီၣ်လၢကအီၣ်ဝဲအဂီၢ်တဘၣ်နီ တမံၤဘၣ်.

¹²ဒီးတုၤစီၤယၤကိာ်နၢ်ဟူဝဲလၢဘုဟုအိၣ်ဝဲလၢကီၢ်အဲၤကူပတူး အပူၤန့ၣ်, အဝဲဒၣ်မၢလီၤအဖိခွါတဖၣ်လၢအမ့ၢ်ပပၢ်ဖးဒိၣ်တဖၣ်, လၢအကလဲၤဝဲဆူကီၢ်န့ၣ်, အခီၣ်ထံးကတၢၢ်တဘျီလီၤ.

¹³ဖဲအဝဲသ့ၣ်လဲၤဝဲခံဘျီတဘျီအကတီၢ်န့ၣ်, စီၤယိၤသးဒုးသ့ၣ်ညါအဝဲသ့ၣ်လၢအဝဲဒၣ်မ့ၢ်အဝဲသ့ၣ်အဒီပုၢ် ဝဲၢ်ဒၣ်ဝဲ, ဒီးစီၤပၤဖၤရိၤသ့ၣ်ညါဘၣ်စီၤယိၤသးအဒူၣ်ဖိထၢဖိ အဂ့ၢ်န့ၣ်လီၤ.

¹⁴သတးဒီး, စီၤယိၤသးဆှၢလီၤတၢ်ကစီၣ်ဆူအပၢ်စီၤယၤကိာ် အအိၣ်ဒီးမၤလိာ်ဝဲလၢအဝဲဒၣ်ဒီးအဒူၣ်ဖိထၢဖိခဲလၢာ်ကဟဲ ဆူကီၢ်အဲၤကူပတူးလီၤ. ပှၤခဲလၢာ်အိၣ်ဝဲနွံဆံယဲၢ်ဂၤလီၤ.

¹⁵အန့ၣ်တစု, စီၤယၤကိာ်ဒီးအဒူၣ်ဖိထၢဖိခဲလၢာ်လဲၤလီၤဝဲဆူကီၢ် အဲၤကူပတူး, ဒီးအဝဲဒၣ်ဒီးပပၢ်ဖးဒိၣ်တဖၣ်သံဝဲဒၣ်ဖဲကီၢ်န့ၣ်အပူၤလီၤ.

¹⁶အဝဲသ့ၣ်အစိၣ်တဖၣ်န့ၣ်ဘၣ်တၢ်က့ၤစိာ်အီၤဆူဝ့ၢ်ၡက့ၣ်, ဒီးဘၣ်တၢ်ခူၣ်လီၤအီၤလၢတၢ်သွၣ်ခိၣ်အပူၤ, လၢစီၤအၤဘြၤဟၣ်ပှ့ၤန့ၢ်တ့ၢ်လၢစ့နီၢ်လၢစီၤဃမိၢ်အဒူၣ်ဖိ ထၢဖိတဖၣ်အအိၣ်န့ၣ်လီၤ.

¹⁷တုၤအကတီၢ်ဘူးထီၣ်လၢကစၢ်ယွၤကမၤလၢထီၣ်ပှဲၤထီၣ်တၢ် အၢၣ်လီၤအီလီၤလၢအမၤတ့ၢ်ဝဲဒီးစီၤအၤဘြၤဟၣ်န့ၣ်, ပပှၤကလုာ်အိၣ်လၢကီၢ်အဲၤကူပတူးပူၤတဖၣ်အနီၣ်ဂံၢ်အါ ထီၣ်ဝဲဂီၢ်မုၢ်လီၤ.

¹⁸လၢခံကတၢၢ်စီၤပၤလၢအတသ့ၣ်ညါဘၣ်စီၤယိၤသး တဂၤစးထီၣ်ပၢတၢ်လၢကီၢ်အဲၤကူပတူးအပူၤန့ၣ်လီၤ.

¹⁹အဝဲဒၣ်အသးတဘျၢလၢပပှၤကလုာ်အဖီခိၣ်ဘၣ်ဒီး, မၤအၢမၤနးဝဲဒီးမၢဆူၣ်ပမိၢ်ပၢ်ဖံဖုလၢပျၢၤတဖၣ်လၢ အကပာ်အဖိအိၣ်ဖျဲၣ်ထီၣ်သီတဖၣ်လၢဟံၣ်အချၢဒ်သိး အကသံကွံာ်ဝဲအဂီၢ်န့ၣ်လီၤ.

²⁰ဖဲအကတီၢ်န့ၣ်စီၤမိၤၡ့အိၣ်ဖျဲၣ်ထီၣ်ဝဲ, ဒီးမ့ၢ်ဖိသၣ်လၢအဒိၣ် တၢ်ဂ့ၤမးဒီးယွၤဘၣ်သူၣ်ဘၣ်သးလၢအီၤတဂၤလီၤ. အဝဲဒၣ်ဘၣ်တၢ်အံးထွဲကွၢ်ထွဲအီၤလၢအပၢ်အဟံၣ်ပူၤသၢလါလီၤ.

²¹တုၤတၢ်ထုးထီၣ်ပာ်အီၤလၢဟံၣ်အချၢဒီး, စီၤပၤဖိမုၣ်ဟံးန့ၢ်ဒီးလုၢ်ဖိအီၤဒ်အဖိခွါဒၣ်ဝဲအသိးန့ၣ်လီၤ.

²²အဝဲဒၣ်ဘၣ်တၢ်သိၣ်လိမၤယုၤအီၤလၢကယဲၢ်ပှၤ အဲၤကူပတူးဖိတဖၣ်အတၢ်ကူၣ်သ့ကူၣ်ဘၣ်ခဲလၢာ်, ဒီးကဲထီၣ်ဝဲပှၤဖးဒိၣ်တဂၤလၢအတၢ်စံးတၢ်ကတိၤဒီး အတၢ်ဖံးတၢ်မၤအပူၤန့ၣ်လီၤ.

²³တုၤစီၤမိၤၡ့အသးပှဲၤထီၣ်အနံၣ်လွံၢ်ဆံဒီး, အဝဲပာ်လီၤအသးလၢအကဃုသ့ၣ်ညါဝဲအဒီပုၢ်ဝဲၢ်ပှၤအံၣ်စရ့လး ဖိတဖၣ်အိၣ်ဘၣ်ဆိးဘၣ်ဒ်လဲၣ်အဂ့ၢ်န့ၣ်လီၤ.

²⁴အဝဲဒၣ်ထံၣ်ဘၣ်ပှၤအံၣ်စရ့လးဖိတဂၤဘၣ်တၢ်မၤနၢၤမၤ ဃၣ်အီၤလၢပှၤအဲၤကူပတူးဖိတဂၤသတးဒီး, လဲၤမၤစၢၤဝဲပှၤအံၣ်စရ့လးဖိဒီးမၤကၣ်ဝဲပှၤအဲၤကူပတူးဖိ, ခီဖျိအမၤသံကွံာ်အီၤလီၤ.

²⁵(အဝဲဒၣ်ဆိကမိၣ်ဝဲလၢအပှၤကလုာ်ဒၣ်ဝဲတဖၣ်ကနၢ်ပၢၢ်အီၤဒ် အမ့ၢ်ပှၤတဂၤလၢကစၢ်ယွၤကသူဝဲလၢအကမၤထူၣ်ဖျဲးထီၣ် အဝဲသ့ၣ်လၢတၢ်ကဲကုၢ်အလီၢ်အဂီၢ်, ဘၣ်ဆၣ်ဒီးအဝဲသ့ၣ်တနၢ်ပၢၢ်ဝဲဒ်န့ၣ်အသိးဘၣ်.)

²⁶လၢခံတနံၤအဝဲဒၣ်ထံၣ်ဘၣ်ပှၤအံၣ်စရ့လးဖိခံဂၤအ့ၣ်လိာ် အသး, ဒီးဂုာ်မၤဃူမၤဖိးက့ၤအဝဲသ့ၣ်န့ၣ်လီၤ. အဝဲဒၣ်စံးဝဲ, ‘တံၤသကိးသ့ၣ်ဧၢ, ကနၣ်တက့ၢ်. သုမ့ၢ်ဒီပုၢ်ဝဲၢ်တဖၣ်လီၤ. ဘၣ်မနုၤသုဘၣ်မၤဆူးမၤဆါလိာ်သုသးန့ၣ်လဲၣ်.’

²⁷ဘၣ်ဆၣ်ဒီး, ပှၤတဂၤလၢအမၤနၢၤမၤဃၣ်ပှၤအံၣ်စရ့လးဖိ ကဒဲကဒဲဒီးအီၤန့ၣ်, ဆီၣ်ကွံာ်စီၤမိၤၡ့ဆူတၢ်ကပၤဒီးစံးဝဲ, ‘မ့ၢ်မတၤတဂၤဟ့ၣ်စိဟ့ၣ်ကမီၤနၤလၢနကပၢဘၣ်ဒီးစံၣ်ညီၣ် ပဝဲဒၣ်အံၤန့ၣ်လဲၣ်.

²⁸မ့ၢ်နအဲၣ်ဒိးမၤသံယၤဒ်နမၤသံပှၤအဲၤကူပတူးဖိတဂၤလၢ မဟါတနံၤအသိးန့ၣ်ဧါ.

²⁹တုၤစီၤမိၤၡ့နၢ်ဟူတၢ်ကတိၤအံၤဒီး, အဝဲဒၣ်ဃ့ၢ်ထီၣ်ကွံာ်ဝဲချ့သဒံးလၢကီၢ်အဲၤကူပတူးအပူၤဒီး လဲၤအိၣ်လဲၤဆိးဝဲလၢကီၢ်မံးဒယၣ်အပူၤလီၤ. ဖဲန့ၣ်အဝဲဒၣ်ထီၣ်ဖိအဖိခွါခံဂၤလီၤ.

³⁰စီၤမိၤၡ့အိၣ်ဝဲဖဲတၢ်လီၢ်န့ၣ်ပှဲၤထီၣ်အနံၣ်လွံၢ်ဆံဝံၤအလီၢ်ခံ, ဘၣ်တနံၤလၢပှၢ်မုၢ်ကနၢဘူးဒီးကစၢၢ်စံၤနါန့ၣ်, ကလူးတဂၤအိၣ်ဖျါထီၣ်လၢအမဲာ်ညါလၢမ့ၣ်အူလၣ် အပူၤ, ဖဲမ့ၣ်အူအီၣ်ထီၣ်တပှီာ်တလိၣ်အကတီၢ်န့ၣ်လီၤ.

³¹တၢ်လၢအထံၣ်ဘၣ်ဝဲန့ၣ်ဒုးလီၤကတုၤစီၤမိၤၡ့အသး, ဒီးတုၤအလဲၤဃီၤဘူးထီၣ်ဒီးတပှီာ်တလိၣ်လၢအကကွၢ်ထံကွၢ် ဆးတၢ်အဂီၢ်န့ၣ်ဒီး, နၢ်ဟူကစၢ်ယွၤအကလုၢ်လၢအစံးဝဲ,

³²‘ယမ့ၢ်ယဲသုမိၢ်ပၢ်ဖံဖုလၢပျၢၤတဖၣ်အကစၢ်ယွၤ, စီၤအၤဘြၤဟၣ်, စီၤအံၤစဲးဒီးစီၤယၤကိာ်တဖၣ်အကစၢ်ယွၤလီၤ.’ စီၤမိၤၡ့ပျံၤတၢ်ဒီးကနိးကစုာ်ဝဲ, ဒီးကွၢ်ဝဲတဘူၣ်လၢၤဘၣ်.

³³ကစၢ်ယွၤစံးဘၣ်အီၤ, ‘ဘ့ၣ်လီၤကွံာ်နခီၣ်ဖံးန့ၣ်တက့ၢ်. တၢ်လီၢ်လၢနအိၣ်ဆၢထၢၣ်လၢအဖီခိၣ်ခဲအံၤန့ၣ်မ့ၢ်ဝဲတၢ်လီၢ် စီဆှံအဃိလီၤ.

³⁴ယထံၣ်ဘၣ်လံယပှၤဂီၢ်မုၢ်တဖၣ်တူၢ်ဘၣ်တၢ်နးတၢ်ဖှီၣ်လၢ ကီၢ်အဲၤကူပတူးပူၤနးဆံးဒိၣ်လဲၣ်န့ၣ်လီၤ. ယနၢ်ဟူတ့ၢ်အတၢ် ကအုကစွါဒီး ယဟဲလီၤလၢယကမၤထူၣ်ဖျဲးထီၣ်အဝဲသ့ၣ် အဂီၢ်လီၤ. ခဲကနံၣ်အံၤဟဲဃီၤဒီးယကမၢလီၤနၤဆူကီၢ် အဲၤကူပတူးအပူၤလီၤ.’

³⁵စီၤမိၤၡ့မ့ၢ်ပှၤတဂၤဃီလၢအဘၣ်တၢ်ညိကွံာ်အီၤလၢပှၤ အံၣ်စရ့လးဖိခီဖျိတၢ်ကတိၤလၢအစံးဝဲ, ‘မ့ၢ်မတၤတဂၤဟ့ၣ်စိဟ့ၣ်ကမီၤနၤလၢနကပၢဘၣ်ဒီးစံၣ်ညီၣ်ပဝဲ ဒၣ်အံၤန့ၣ်လဲၣ်’ လီၤ. အဝဲမ့ၢ်ပှၤတဂၤဃီလၢကစၢ်ယွၤမၢလီၤအီၤလၢအကပၢဘၣ်ပှၤဂီၢ် မုၢ်ဒီးမၤထူၣ်ဖျဲးထီၣ်အီၤခီဖျိကလူးလၢအလီၣ်ဖျါထီၣ်အသး လၢတပှီာ်လၢမ့ၣ်အူအီၣ်အီၤတလိၣ်အပူၤတဂၤအတၢ်မၤစၢၤအီၤန့ၣ် လီၤ.

³⁶အဝဲဒၣ်ထုးထီၣ်ကွံာ်ပှၤအံၣ်စရ့လးဖိတဖၣ်လၢကီၢ်အဲၤကူပတူး အပူၤဒီးမၤဝဲတၢ်လီၤလးဒီးတၢ်ပနီၣ်လီၤလးတဖၣ်လၢကီၢ် အဲၤကူပတူးအပူၤ, ဖဲပီၣ်လဲၣ်ဂီၤ, ဒီးလၢအနံၣ်လွံၢ်ဆံအတီၢ်ပူၤလၢပှၢ်မုၢ်ကနၢန့ၣ်လီၤ.

³⁷စီၤမိၤၡ့မ့ၢ်ပှၤလၢအစံးဘၣ်ပှၤအံၣ်စရ့လးဖိတဖၣ်, ‘ကစၢ်ယွၤကမၢလီၤဝံတဂၤလၢအကဟဲဆူသုအိၣ်, ဒ်အမၢလီၤယၤအသိး, ဒီးအဝဲဒၣ်ကမ့ၢ်ပှၤလၢ သုပှၤကလုာ်ဒၣ်ဝဲအကျါတဂၤလီၤ.’

³⁸အဝဲဒၣ်အံၤမ့ၢ်ပှၤလၢအအိၣ်လၢပှၤအံၣ်စရ့လးဖိတဖၣ် အကျါ, ဖဲအဝဲသ့ၣ်တဖၣ်ပာ်ဖှိၣ်ထီၣ်အသးလၢပှၢ်မုၢ်ကနၢန့ၣ်လီၤ. အိၣ်ဝဲဖဲန့ၣ်ဒီးပမိၢ်ပၢ်ဖံဖုလၢပျၢၤတဖၣ်, ဒီးအိၣ်ဝဲဒီးကလူးလၢအကတိၤတၢ်ဒီးအီၤလၢကစၢၢ်စံၤနါအဒီ ခိၣ်, ဒီးဒိးန့ၢ်ဘၣ်ဝဲကစၢ်ယွၤအကလုၢ်ကထါလၢအမူဝဲတဖၣ်လၢ အကဟ့ၣ်ယုၢ်လီၤပဝဲဒၣ်တဖၣ်အဂီၢ်လီၤ.

³⁹ဘၣ်ဆၣ်ဒီးပမိၢ်ပၢ်ဖံဖုလၢပျၢၤတဖၣ်တဒိကနၣ်စီၤမိၤၡ့အကလုၢ် ဘၣ်. အဝဲသ့ၣ်ညိကွံာ်အီၤ, ဒီးလၢအသးကံၢ်ပူၤန့ၣ်က့ၤကဒါက့ၤဆူကီၢ်အဲၤကူပတူးန့ၣ်လီၤ.

⁴⁰အန့ၣ်ဒီးအဝဲသ့ၣ်စံးဘၣ်စီၤအၤဟရိၣ်, ‘မၤန့ၢ်ပှၤကစၢ်တဖၣ်လၢကပၢကဆှၢပှၤအဂီၢ်န့ၣ်တက့ၢ်. စီၤမိၤၡ့လၢအဆှၢထီၣ်ပှၤလၢကီၢ်အဲၤကူပတူးအပူၤတဂၤအံၤ, မ့ၢ်တၢ်မၤအသးဒီးအီၤဒ်လဲၣ်န့ၣ်ပတသ့ၣ်ညါလၢၤဘၣ်.’

⁴¹တုၤနုၤတစုအဝဲသ့ၣ်မၤကဲထီၣ်ဂီၤဖံးဖါဖိတဒုအဂီၤ ဒီးလုၢ်ထီၣ်ပာ်ထီၣ်တၢ်လၢတၢ်ဂီၤတဒုန့ၣ်အမဲာ်ညါ, ဒီးမၤတၢ်အီၣ်မူးသးဖှံတကတီၢ်လၢတၢ်မၤလၤကပီၤတၢ်လၢ အဝဲသ့ၣ်မၤကဲထီၣ်ဝဲလၢအစုဒၣ်ဝဲအဂီၢ်လီၤ.

⁴²အန့ၣ်ဒီးကစၢ်ယွၤဃၣ်ကွံာ်အသးလၢအဝဲသ့ၣ်ဒီးဟ့ၣ်လီၤ ကွံာ်အီၤဆူတၢ်ဘူၣ်ထီၣ်ဘါထီၣ်ဆၣ်တဖၣ်လၢမူကပိာ်လိၤန့ၣ် အပူၤ, ဒ်တၢ်အိၣ်ကွဲးအသးလၢဝံတဖၣ်အလံာ်အပူၤအသိး, ‘ပှၤအံၣ်စရ့လးဖိသ့ၣ်ဧၢ, လၢအနံၣ်လွံၢ်ဆံအတီၢ်ပူၤ, ဖဲသုအိၣ်လၢပှၢ်မုၢ်ကနၢအကတီၢ်န့ၣ်, မ့ၢ်သုမၤသံဆၣ်ဖိကီၢ်ဖိ, ဒီးလုၢ်ထီၣ်ပာ်ထီၣ်အီၤဆူယအိၣ်စ့ၢ်ကီးဧါ.

⁴³တၢ်လၢသုယိးန့ၣ်မ့ၢ်ကစၢ်မိၤလးအဒဲ ဒီး ရၣ်ဖၣ်ကစၢ်အဆၣ်လီၤ. တၢ်တဖၣ်န့ၣ်မ့ၢ်တၢ်ဂီၤတၢ်ဖီၣ်လၢသုမၤကဲထီၣ် လၢသုကဘါထီၣ်အီၤအဂီၢ်လီၤ. အန့ၣ်သတးဒီး, ယကမၢပှၤစိာ်ဖျိးကွံာ်သုဆူ တခီထံတခီကီၢ်, ယံၤန့ၢ်ကီၢ်ဘၤဘူၤလိၣ်တက့ၢ်လီၤ.’

⁴⁴ဖဲပမိၢ်ပၢ်ဖံဖုလၢပျၢၤတဖၣ်အိၣ်ဝဲလၢပှၢ်မုၢ်ကနၢအကတီၢ်န့ၣ်, အဝဲသ့ၣ်အိၣ်ဒီးတၢ်အုၣ်အသးအဒဲတဖျၢၣ်လီၤ. ဒဲအံၤဘၣ်တၢ်တ့တ့ၢ်အီၤဒ်ကစၢ်ယွၤစံးဘၣ်စီၤမိၤၡ့အသိး ဒီးဒ်အဒိလၢယွၤဒုးနဲၣ်တ့ၢ်စီၤမိၤၡ့အသိးန့ၣ်လီၤ.

⁴⁵ဒဲန့ၣ်ဘၣ်တၢ်ဟ့ၣ်လီၤအီၤဆူပမိၢ်ပၢ်ဖံဖုလၢပျၢၤတဖၣ် အစုပူၤတဆီဘၣ်တဆီ, ဒီးအဝဲသ့ၣ်စိာ်ဃုာ်ဝဲဖဲအလဲၤတၢ်ဒီး စီၤယိၤၡူဒီးမၤန့ၢ်ဝဲပှၤကလုာ်လၢကစၢ်ယွၤဟီထီၣ်ကွံာ်အီၤတဖၣ် အထံအကီၢ်န့ၣ်လီၤ. ဒီးဒဲန့ၣ်အိၣ်ဝဲဖဲကီၢ်န့ၣ်အပူၤတုၤလီၤလၢ စီၤဒၤဝံးအစိၤတစုလီၤ.

⁴⁶အဝဲဒၣ်ဒိးန့ၢ်ကစၢ်ယွၤအတၢ်ဘၣ်သူၣ်ဘၣ်သးသတးဒီး, ဃ့ဝဲလၢကစၢ်ယွၤကပျဲအဝဲဒၣ်ဘှီထီၣ်န့ၢ်တၢ်အိၣ်တၢ်ဆိး အလီၢ်တဖျၢၣ်လၢကစၢ်ယွၤလၢစီၤယၤကိာ်ဘါဝဲတဂၤန့ၣ် အဂီၢ်လီၤ.

⁴⁷ဘၣ်ဆၣ်ဒီးပှၤလၢအဘှီထီၣ်ဟံၣ်တဖျၢၣ်လၢအဝဲဒၣ်အဂီၢ်န့ၣ်, မ့ၢ်စီၤၡလိၤမိၤလီၤ.

⁴⁸သနာ်က့, ကစၢ်ယွၤလၢအအိၣ်ထီၣ်ထီကတၢၢ်တဂၤန့ၣ်, တအိၣ်တဆိးဝဲလၢဟံၣ်လၢပှၤကညီမၤဝဲလၢအစုန့ၣ်ဘၣ်. ဒ်ဝံတဂၤန့ၣ်စံးဝဲအသိး,

⁴⁹‘ကစၢ်ကစၢ်ယွၤစံးဝဲ, မူခိၣ်မ့ၢ်ယလီၢ်ပစိာ်, ဒီးဟီၣ်ခိၣ်မ့ၢ်ယခီၣ်ယီၢ်လီၤတၢ်အလီၢ်လီၤ. သုကဘှီထီၣ်န့ၢ်ယၤလၢဟံၣ်ဒ်လဲၣ်တကလုာ်လဲၣ်. တၢ်လီၢ်လၢယကအိၣ်ကဆိးအဂီၢ်အိၣ်ဖဲလဲၣ်.

⁵⁰တၢ်တဖၣ်အံၤခဲလၢာ်တမ့ၢ်ဘၣ်တၢ်လၢ ယမၤကဲထီၣ်အီၤလၢယနီၢ်ကစၢ်ဒၣ်ယဲန့ၣ်ဘၣ်ဧါ.’

⁵¹စီၤစတ့းဖၣ်စံးကဒီးဝဲ, “သုဝဲသ့ၣ်သုခိၣ်ကိၤနးမးလဲၣ်. သုသးလီၤဂာ်ဒီးပှၤတသ့ၣ်ညါထူတသ့ၣ်ညါကစၢ်ယွၤ အသး, သုနၢ်တအၢဝဲလၢကစၢ်ယွၤအကလုၢ်ကထါအဂီၢ်နးမးလဲၣ်. သုမၤဒၣ်ဒ်သုမိၢ်ပၢ်ဖံဖုလၢပျၢၤမၤဝဲအသိး, ဒီးသးစီဆှံန့ၣ် သုတြီဆၢဒၣ်အီၤထီဘိလီၤ.

⁵²ဝံလၢသုမိၢ်ပၢ်ဖံဖုလၢပျၢၤတဖၣ်တမၤအၢမၤနးအီၤဘၣ်န့ၣ်, မ့ၢ်အအိၣ်တဂၤဂၤဧါ. အဝဲသ့ၣ်မၤသံတ့ၢ်ကစၢ်ယွၤအပှၤစိာ်တၢ်ကစီၣ်တဖၣ်လၢအကတိၤ ဆိပာ်စၢၤဘၣ်ဃးကစၢ်ယွၤအခ့အပှၤလၢအတီအလိၤတဂၤ အတၢ်ဟဲအဂ့ၢ်, ဒီးခဲကနံၣ်အံၤသုဝဲသ့ၣ်သုဆါလီၤကွံာ်ဒီးမၤသံကွံာ် အဝဲဒၣ်န့ၣ်လီၤ.

⁵³တၢ်သိၣ်တၢ်သီလၢအဟဲလၢကစၢ်ယွၤအအိၣ်ဒီးသုဒိးန့ၢ်ဘၣ် အီၤခီဖျိကလူးတဖၣ်န့ၣ်, သုတဒိကနၣ်ဘၣ်အီၤဘၣ်.”

⁵⁴ပှၤလၢအမ့ၢ်ကီၣ်ကးဖိတဖၣ်န့ၣ်, တုၤအနၢ်ဟူဘၣ်စီၤစတ့းဖၣ်အတၢ်စံးတၢ်ကတိၤတဖၣ်န့ၣ်ဒီး, အဝဲသ့ၣ်အသးဒိၣ်ထီၣ်ဒိၣ်ဒိၣ်ကလဲာ်, ဒီးအ့ၣ်စဃံးအမဲထီဒါ အီၤန့ၣ်လီၤ.

⁵⁵မ့မ့ၢ်စီၤစတ့းဖၣ်လၢထီၣ်ပှဲၤထီၣ်ဒီးသးစီဆှံ, ကွၢ်ထီၣ်တၢ်ဆူမူခိၣ်ဒီးထံၣ်ဘၣ်ကစၢ်ယွၤအလၤကပီၤ, ဒီးထံၣ်ဝဲယ့ၣ်ၡူးအိၣ်ဆၢထၢၣ်လၢကစၢ်ယွၤအစုထွဲတခီ လီၤ.

⁵⁶အဝဲဒၣ်စံးဝဲ, “ကွၢ်တက့ၢ်. ယထံၣ်ဘၣ်ယဲမူခိၣ်အိးထီၣ်အသး ဒီးပှၤကညီဖိခွါအိၣ်ဆၢထၢၣ်လၢယွၤအစုထွဲတခီလီၤ.”

⁵⁷အန့ၣ်ဒီးပှၤလၢအမ့ၢ်ကီၣ်ကးဖိတဖၣ်န့ၣ်ကိးပသူထီၣ်လၢ အကလုၢ်ဖးဒိၣ်ဒီးကးတံာ်ဃာ်အနၢ်လၢအစုဝံၤ, ဃ့ၢ်သဖှိဃီၤဝဲတဘျီဃီဆူအဝဲဒၣ်အအိၣ်,

⁵⁸ဟီထီၣ်ကွံာ်အီၤဆူဝ့ၢ်အချၢ, ဒီးကွံာ်အီၤလၢလၢၢ်လီၤ. ပှၤအုၣ်အသးတဖၣ်ပာ်လီၤအဆ့ကၤဖီခိၣ်ဖဲပိာ်ခွါသးစၢ်လၢ အမံၤမ့ၢ်စီၤစီလူးတဂၤအခီၣ်ထံးလၢအကကွၢ်ထွဲပာ်ဝဲအဂီၢ် လီၤ.

⁵⁹ဖဲအဝဲသ့ၣ်ကွံာ်အီၤလၢလၢၢ်အဖၢမုၢ်န့ၣ်, စီၤစတ့းဖၣ်ဃ့ဘါထု ကဖၣ်ကစၢ်ဒီးစံး, “ကစၢ်ယ့ၣ်ၡူးဧၢ, တူၢ်လိာ်ဘၣ်ယသးတက့ၢ်.”

⁶⁰အန့ၣ်ဝံၤအဝဲဒၣ်ချံးလီၤအခီၣ်ဒီးကိးပသူထီၣ်လၢအကလုၢ်ဖးဒိၣ်, “ကစၢ်ဧၢ, ပျၢ်လၢ်အဝဲသ့ၣ်အတၢ်ကမၣ်အံၤတက့ၢ်.” အဝဲဒၣ်စံးတၢ်အံၤဝံၤအသးဟးထီၣ်ဝဲဒၣ်လီၤ.

Read S'gaw Karen မၤတၢ် 7 Bible Online

မၤတၢ် 7 - S'gaw Karen bible

မၤတၢ် 7