Read S'gaw Karen မၤတၢ် 9 Bible Online

မၤတၢ် 9 - S'gaw Karen bible

မၤတၢ် 9

¹အကတီၢ်ဖဲန့ၣ်, စီၤစီလူးကတိၤပျံၤကတိၤဖုးဒံးကစၢ်အပျဲၢ်အဘီၣ် တဖၣ်လၢအကမၤသံအဝဲသ့ၣ်န့ၣ်လီၤ. အဝဲဒၣ်လဲၤဝဲဆူပှၤလုၢ်တၢ်အခိၣ်အဒိၣ်ကတၢၢ်အအိၣ်,

²ဒီးဃ့န့ၢ်ဝဲလံာ်အုၣ်အသးတဖၣ်လၢကလဲၤစိာ်ဝဲဆူဘူၣ် ဘျီၣ်လၢအမ့ၢ်တၢ်ဘါလီၢ်လၢအအိၣ်လၢဝ့ၢ်ဒၤမ့ၤစ့းအပူၤန့ၣ်လီၤ. လံာ်အုၣ်အသးတဖၣ်အံၤမ့ၢ်လၢအကဟ့ၣ်စိဟ့ၣ်ကမီၤအီၤဒ် သိးဒီးဖဲအထံၣ်န့ၢ်ပှၤတဂၤလၢ်လၢ်မုၣ်ဂ့ၤခွါဂ့ၤလၢအပိာ် ကျဲလၢကစၢ်ဒုးနဲၣ်ဝဲန့ၣ်, ကဖီၣ်ဝဲဒီးဟဲက့ၤဆှၢအီၤဆူဝ့ၢ်ယရူၤၡလ့ၣ်ကသ့အဂီၢ်န့ၣ်လီၤ.

³စီၤစီလူးလဲၤဝဲဆူဝ့ၢ်ဒၤမ့ၤစ့း, ဒီးဖဲအဘူးထီၣ်ဒီးဝ့ၢ်န့ၣ်, သတူၢ်ကလာ်တၢ်ကပီၤဟဲလီၤလၢမူခိၣ်, ဒီးကပီၤထီၣ်ဝဲကပြုၢ်ကပြီၤဝးတရံးအီၤလီၤ.

⁴အဝဲဒၣ်လီၤတဲာ်ဝဲလၢဟီၣ်ခိၣ်လိၤဒီးနၢ်ဟူတၢ်အကလုၢ် သီၣ်ထီၣ်လၢအစံးဘၣ်အီၤ, “စီၤစီလူးဧၢ, စီၤစီလူးဧၢ, ဘၣ်မနုၤနမၤအၢမၤနးယၤလဲၣ်.”

⁵အဝဲဒၣ်သံကွၢ်ဝဲ, “ကစၢ်ဧၢ, နမ့ၢ်မတၤတဂၤလဲၣ်.” ဒီးတၢ်ကလုၢ်န့ၣ်စံးဆၢက့ၤအီၤ, “ယမ့ၢ်ယ့ၣ်ၡူးလၢနမၤအၢမၤနးအီၤတဂၤန့ၣ်လီၤ.

⁶ဘၣ်ဆၣ်ဒီးဂဲၤဆၢထၢၣ်ဒီးလဲၤနုာ်ဆူဝ့ၢ်ပူၤတက့ၢ်. ဖဲန့ၣ်နကဘၣ်မၤတၢ်မနုၤတမံၤလဲၣ်န့ၣ်, တၢ်ကစံးဘၣ်တဲဘၣ်နၤလီၤ.”

⁷ပှၤလၢအလဲၤသကိးတၢ်ဒီးစီၤစီလူးတဖၣ်န့ၣ်, မ့ၢ်လၢအနၢ်ဟူတၢ်ကလုၢ်သီၣ်ဘၣ်ဆၣ်ဒီးတထံၣ်ပှၤနီ တဂၤဘၣ်အဃိ, ဆၢထၢၣ်အိၣ်ဘှီၣ်ကလာ်လၢတၢ်သးကတုၤ အပူၤန့ၣ်လီၤ.

⁸စီၤစီလူးဂဲၤဆၢထၢၣ်က့ၤလၢဟီၣ်ခိၣ်လိၤဒီးစီၣ်ထီၣ်အမဲာ်ချံ, ဘၣ်ဆၣ်တထံၣ်တၢ်နီတမံၤဘၣ်. သတးဒီးအဝဲသ့ၣ်မိၤထီၣ်အစုဒီးလဲၤဆှၢအီၤဆူဝ့ၢ်ဒၤမ့ၤစ့း အပူၤလီၤ.

⁹လၢသၢသီအတီၢ်ပူၤအဝဲအမဲာ်တထံၣ်တၢ်ဘၣ်. ဒီးတအီၣ်တအီတၢ်နီတမံၤဘၣ်.

¹⁰အပျဲၢ်အဘီၣ်အိၣ်ဝဲတဂၤလၢဝ့ၢ်ဒၤမ့ၤစ့းအပူၤ, တၢ်ကိးအမံၤလၢစီၤအနၤနံန့ၣ်လီၤ. အဝဲထံၣ်တၢ်ထံၣ်လၢညါခီ, ဒီးလၢတၢ်ထံၣ်အပူၤန့ၣ်ကစၢ်စံးဘၣ်အီၤ, “စီၤအနၤနံဧၢ,” ဒီးအဝဲဒၣ်စံးဆၢက့ၤဝဲ, “ကစၢ်ဧၢ, ယအိၣ်ဖဲအံၤလီၤ.”

¹¹ဒီးကစၢ်န့ၣ်စံးဘၣ်အီၤ, “ကတဲာ်ကတီၤထီၣ်နသးဒီးလဲၤဆူကျဲလၢတၢ်ကိးအမံၤလၢ ကျဲဘျၢတဘိန့ၣ်တက့ၢ်. ဖဲစီၤယူဒၤအဟံၣ်န့ၣ်သံကွၢ်ဘၣ်ဃးပှၤဝ့ၢ်တၢ်စူးဖိလၢပှၤ ကိးအမံၤလၢစီၤစီလူးန့ၣ်တက့ၢ်.

¹²အခဲအံၤဘၣ်ဖဲအဝဲဒၣ်ဃ့ဘါထုကဖၣ်တၢ်အခါ, ဒီးထံၣ်ဘၣ်တၢ်ထံၣ်လၢညါခီ, ဖဲပှၤတဂၤလၢအမံၤမ့ၢ်စီၤအနၤနံန့ၣ်, ဟဲနုာ်ဆူအဝဲအအိၣ်ဒီးပာ်ထီၣ်အစုလၢအလိၤလၢအကထံၣ် ထီၣ်က့ၤတၢ်အဂီၢ်လီၤ.”

¹³စီၤအနၤနံစံးဆၢက့ၤဝဲ, “ကစၢ်ဧၢ, ယနၢ်ဟူဘၣ်တ့ၢ်လံပှၤအါဂၤတဲဘၣ်ယၤဘၣ်ဃးပှၤတဂၤအံၤအဂ့ၢ်, ဒီးလၢအမၤအၢမၤနးတ့ၢ်နပှၤစီဆှံလၢဝ့ၢ်ယရူၤၡလ့ၣ် အပူၤတဖၣ်အဂ့ၢ်ခဲလၢာ်န့ၣ်လီၤ.

¹⁴အဝဲဒၣ်ဟဲဝဲဆူဝ့ၢ်ဒၤမ့ၤစ့းအံၤန့ၣ်, ပှၤလုၢ်တၢ်အခိၣ်အဒိၣ်တဖၣ်ဟ့ၣ်စိဟ့ၣ်ကမီၤအီၤလၢအကဖီၣ် ကယဲၢ်ပှၤလၢအကိးထီၣ်နမံၤခဲလၢာ်န့ၣ်လီၤ.”

¹⁵ကစၢ်စံးဘၣ်အီၤ, “လဲၤဘၣ်တက့ၢ်. အဂ့ၢ်ဒ်အံၤယဃုထၢတ့ၢ်အီၤလၢယကမၢလီၤအီၤလၢအကစံး ဘၣ်တဲဘၣ်ပှၤကလုာ်ဂၤတဖၣ်ဒီးစီၤပၤတဖၣ်, ဒီးပှၤအံၣ်စရ့လးဖိတဖၣ်လၢယဂ့ၢ်အဂီၢ်လီၤ.

¹⁶ယကစၢ်ဒၣ်ယဲယကဒုးနဲၣ်အီၤကယဲၢ်တၢ်နးတၢ်ဖှီၣ်လၢ အဝဲဒၣ်ကဘၣ်တူၢ်ဝဲလၢယဃိန့ၣ်လီၤ.”

¹⁷အန့ၣ်သတးဒီး, စီၤအနၤနံလဲၤဝဲဒီးလဲၤနုာ်ဝဲဆူဟံၣ်လၢ စီၤစီလူးအိၣ်ဝဲလၢအပူၤန့ၣ်လီၤ. အဝဲဒၣ်ပာ်ထီၣ်အစုလၢစီၤစီလူးအလိၤဒီးစံးဘၣ်အီၤ, “ယဒီပုၢ်ဝဲၢ်စီၤစီလူးဧၢ, ကစၢ်ယ့ၣ်ၡူးလၢနထံၣ်ဘၣ်အီၤလၢ ကျဲလၢနဟဲန့ၣ်, မၢလီၤယၤလၢနကထံၣ်ထီၣ်က့ၤတၢ်ဒီး နကလၢထီၣ်ပှဲၤထီၣ်ဒီးသးစီဆှံအဂီၢ်လီၤ.”

¹⁸တကီၢ်ခါဖဲန့ၣ်, တၢ်လၢအလီၤဂာ်ဒီးညၣ်သဒံၣ်တဖၣ်ဟဲလီၤတဲာ်ကွံာ်လၢစီၤ စီလူးအမဲာ်ချံဒီးအဝဲဒၣ်ထံၣ်ထီၣ်က့ၤတၢ်လီၤ. အဝဲဒၣ်ဂဲၤဆၢထၢၣ်ဒီးဘၣ်တၢ်ဘျၢအီၤလၢထံလီၤ.

¹⁹ဒီးတုၤအအီၣ်တၢ်အီတၢ်ဝံၤဒီး, အဂံၢ်အဘါအိၣ်ထီၣ်က့ၤဝဲလီၤ. စီၤစီလူးအိၣ်ဝဲစှၤနံၤစှၤသီလၢအပျဲၢ်အဘီၣ်တဖၣ်အသိးလၢ ဝ့ၢ်ဒၤမ့ၤစ့းအပူၤလီၤ.

²⁰အဝဲဒၣ်လဲၤဝဲတဘျီဃီဆူဘူၣ်ဘျီၣ်လၢအမ့ၢ်တၢ်ဘါလီၢ် တဖၣ်, ဒီးစံၣ်တဲၤတဲလီၤဝဲလၢယ့ၣ်ၡူးမ့ၢ်ကစၢ်ယွၤအဖိခွါန့ၣ် လီၤ.

²¹ပှၤလၢအနၢ်ဟူအတၢ်စံးတၢ်ကတိၤတဖၣ်ခဲလၢာ်န့ၣ်, တၢ်လီၤကမၢကမၣ်ဘၣ်အသးဒီးသံကွၢ်တၢ်ဒီးစံး, “အဝဲဒၣ်တဂၤအံၤတမ့ၢ်ပှၤလၢအလူၤမၤသံပှၤလၢဝ့ၢ်ယရူၤ ၡလ့ၣ်အပူၤလၢအဘူၣ်ထီၣ်ဘါထီၣ်ယ့ၣ်ၡူးတဂၤန့ၣ်ဘၣ်ဧါ. ဒီးအဝဲဒၣ်ဟဲဝဲဖဲအံၤအတၢ်ပညိၣ်ကွၢ်စိတမ့ၢ်တခါဃီလၢ အကဖီၣ်န့ၢ်ပှၤဒ်သိးန့ၣ်တဖၣ်, ဒီးက့ၤဆှၢအဝဲသ့ၣ်ဆူပှၤလုၢ်တၢ်အခိၣ်အဒိၣ်တဖၣ်အအိၣ် န့ၣ်ဘၣ်ဧါ.”

²²စီၤစီလူးအတၢ်စံၣ်တဲၤတဲလီၤအသဟီၣ်ဆူၣ်ထီၣ်ကွ့ၢ်ကွ့ၢ်, ဒီးလၢယ့ၣ်ၡူးမ့ၢ်သပှၢ်ကတၢၢ်ခရံာ်န့ၣ်ကတိၤဖျါထီၣ်ဝဲလီၤ ဂၢၢ်ကျၢၤဂ့ၤမး, တုၤဒၣ်လဲာ်ပှၤယူဒၤဖိအိၣ်လၢဝ့ၢ်ဒၤမ့ၤစ့းအပူၤ တဖၣ်ကတိၤဆၢအီၤတသ့တဘၣ်လၢၤဘၣ်န့ၣ်လီၤ.

²³တဘျုးနံၤတဘျုးသီဝံၤအလီၢ်ခံ, ပှၤယူဒၤဖိတဖၣ်ကူၣ်ထီၣ်ခူသူၣ်သကိးဝဲလၢအကမၤသံကွံာ်စီၤ စီလူး,

²⁴ဘၣ်ဆၣ်အဝဲဒၣ်ဘၣ်တၢ်ဒုးသ့ၣ်ညါအီၤလၢအဝဲသ့ၣ် အတၢ်ကူၣ်အၢအီၤအဂ့ၢ်န့ၣ်လီၤ. အဝဲသ့ၣ်အိၣ်ခိးကွၢ်ဟုၣ်တၢ်ဖဲဝ့ၢ်အတြဲၤန့ၣ်လၢမုၢ်ဆါဒီး မုၢ်နၤ, လၢကမၤသံကွံာ်အီၤအဂီၢ်လီၤ.

²⁵ဘၣ်ဆၣ်ဒီး, ဘၣ်တနၤစီၤစီလူးအပျဲၢ်အဘီၣ်တဖၣ်ကိးထီၣ် အီၤဆူဝ့ၢ်ခိၣ်ဒူအဒီခိၣ်ဒီးစဲၤလီၤအီၤလၢဃၤတဖျၢၣ်အပူၤ, ဆူဝ့ၢ်အချၢန့ၣ်လီၤ.

²⁶စီၤစီလူးက့ၤဝဲဆူဝ့ၢ်ယရူၤရှလ့ၣ်ဒီးဂုာ်ကျဲးစၢးဘျုး အသးဒီးအပျဲၢ်အဘီၣ်တဖၣ်န့ၣ်လီၤ. သနာ်က့, အဝဲသ့ၣ်တနာ်လၢအဝဲဒၣ်မ့ၢ်အပျဲၢ်အဘီၣ်တဂၤဘၣ်ဒီးပျံၤဘၣ်အီၤ ခဲလၢာ်လီၤ.

²⁷အန့ၣ်ဒီးစီၤဘၢ်နါဘၤနုာ်လီၤမၤစၢၤအီၤဒီးလဲၤကိးအီၤ ဆူပှၤတၢ်မၢဖိတဖၣ်အအိၣ်န့ၣ်လီၤ. အဝဲဒၣ်ကတိၤဒုးနၢ်ပၢၢ်အဝဲသ့ၣ်လၢစီၤစီလူးထံၣ်ဘၣ်တ့ၢ်လံ ကစၢ်ဖဲအလဲၤတၢ်ဆူဝ့ၢ်ဒၤမ့ၤစ့းအကတီၢ်, ဒီးလၢကစၢ်န့ၣ်ကတိၤတ့ၢ်လံတၢ်ဒီးအီၤအဂ့ၢ်တဖၣ်န့ၣ်လီၤ. အဝဲဒၣ်စံးဘၣ်စ့ၢ်ကီးအဝဲသ့ၣ်လၢစီၤစီလူးစံၣ်တဲၤတဲလီၤ တၢ်လၢယ့ၣ်ၡူးအမံၤအပူၤအိၣ်ဒီးတၢ်သူၣ်ဒူသးဒူလၢ ဝ့ၢ်ဒၤမ့ၤစ့းအပူၤအဂ့ၢ်န့ၣ်လီၤ.

²⁸အန့ၣ်ဒီး, စီၤစီလူးအိၣ်သကိးတပူၤဃီဒီးအဝဲသ့ၣ်ဒီးဟးဝဲသကုၤဝ့ၢ် ယရူၤၡလ့ၣ်, စံၣ်တဲၤတဲလီၤတၢ်လၢကစၢ်အမံၤအိၣ်ဒီးတၢ်သူၣ် ဒူသးဒူန့ၣ်လီၤ.

²⁹အဝဲဒၣ်စံးကတိၤတၢ်ဒီးဂ့ၢ်လိာ်ဘှီလိာ်စ့ၢ်ကီးအသးဒီးပှၤ ယူဒၤဖိလၢအကတိၤထဲကြံးခ်ကျိာ်ဧိၤတဖၣ်, ဘၣ်ဆၣ်ဒီးအဝဲသ့ၣ်ဃုဒၣ်ကျဲလၢကမၤသံအီၤအဂီၢ်လီၤ.

³⁰တုၤပှၤစူၢ်က့ၤနာ်က့ၤတၢ်တဖၣ်နၢ်ဟူသ့ၣ်ညါဘၣ်တၢ်ဂ့ၢ် တမံၤအံၤဒီး, အဝဲသ့ၣ်လဲၤကိးစီၤစီလူးဆူဝ့ၢ်ကဲၤစါရံၤဒီးဆှၢက့ၤအီၤ ဆူဝ့ၢ်တၢ်စူးန့ၣ်လီၤ.

³¹သတးဒီး, တၢ်မၤအသးလၢတၢ်အိၣ်ဖှိၣ်အိၣ်လၢကီၢ်ယူဒၤ, ကီၢ်ကၤလံၤလါ, ဒီးကီၢ်ၡၤမရံတဖၣ်အပူၤန့ၣ်, အိၣ်ဘၣ်ဝဲလၢတၢ်ဃူတၢ်မုာ်အပူၤဒီးဘၣ်တၢ်ဒုးဒိၣ်ထီၣ်အီၤန့ၣ် လီၤ. ခီဖျိလၢသးစီဆှံဟ့ၣ်ဂံၢ်ဟ့ၣ်ဘါတၢ်အိၣ်ဖှိၣ်န့ၣ်, အဂံၢ်အဘါဆူၣ်ထီၣ်ဒီးတၢ်အိၣ်ဖှိၣ်ဖိအနီၣ်ဂံၢ်အါထီၣ်ဂီၢ်ထီၣ်, ဒီးအိၣ်မူဝဲလၢတၢ်ယူးယီၣ်ကစၢ်အပူၤန့ၣ်လီၤ.

³²စီၤပ့းတရူးလဲၤဝဲတၢ်လီၢ်တပူၤဘၣ်တပူၤဒီးဘၣ်တဘျီ န့ၣ်, အဝဲလဲၤတုၤဝဲလၢပှၤစီဆှံလၢအအိၣ်ဝဲလၢဝ့ၢ်လူးဒၤအပူၤ တဖၣ်အအိၣ်န့ၣ်လီၤ.

³³ဖဲန့ၣ်အဝဲထံၣ်လိာ်သးဒီးစီၤအဲၤန့း, ပှၤသံတခီပၤလၢအအိၣ်မံလီၤဝဲလၢလီၢ်မံပူၤယံာ်ဃိးနံၣ်လံ တဂၤန့ၣ်လီၤ.

³⁴စီၤပ့းတရူးစံးဘၣ်အီၤ, “စီၤအဲၤန့းဧၢ, ယ့ၣ်ၡူးခရံာ်မၤဘျါက့ၤနၤလီၤ. ဂဲၤဆၢထၢၣ်ဒီးထူထီၣ်က့ၤနလီၢ်မံတက့ၢ်.” ဒီးတဘျီဃီအဝဲဒၣ် ဂဲၤဆၢထၢၣ်ဝဲဒၣ်လီၤ.

³⁵ကယဲၢ်ပှၤအိၣ်လၢဝ့ၢ်လူးဒၤဒီးတၢ်ပၢၤခိၣ်ၡၤရိၣ်ခဲလၢာ်ထံၣ်ဘၣ်အီၤ သတးဒီးကဲထီၣ်ပှၤစူၢ်က့ၤနာ်က့ၤကစၢ်န့ၣ်လီၤ.

³⁶ဖဲဝ့ၢ်ယၤဖိၤန့ၣ်အပျဲၢ်အဘီၣ်မုၣ်အိၣ်ဝဲတဂၤ, တၢ်ကိးအမံၤလၢနီၢ်တဘံၤသါန့ၣ်လီၤ. (အမံၤလၢကြံးခ်ကျိာ်တခီမ့ၢ်နီၢ်ဒီၢ်ကါ, အခီပညီ, တၤဟိတဒု) အဝဲဒၣ်ဟ့ၣ်လီၤအသးလၢာ်ဆၢလၢာ်ကတီၢ်လၢတၢ်မၤဂ့ၤ ပှၤဂၤဒီးတၢ်မၤစၢၤပှၤဖှီၣ်ဖိယာ်ဖိတဖၣ်အဂီၢ်န့ၣ်လီၤ.

³⁷အကတီၢ်ဖဲန့ၣ်အဝဲဒၣ်ဘၣ်တၢ်ဆါဒီးသံဝဲဒၣ်လီၤ. အစိၣ်ဘၣ်တၢ်သ့ကဆှီထီၣ်ဒီးပာ်လီၤအီၤလၢဒၢးတဖျၢၣ်အပူၤ လၢဟံၣ်ထးခီတဆီန့ၣ်လီၤ.

³⁸ဝ့ၢ်လူးဒၤအိၣ်ဘူးဝဲဒီးဝ့ၢ်ယၤဖိၤအဃိ, တုၤအပျဲၢ်အဘီၣ်တဖၣ်နၢ်ဟူဘၣ်လၢစီၤပ့းတရူးအိၣ်ဝဲလၢဝ့ၢ် လူးဒၤန့ၣ်ဒီး, အဝဲသ့ၣ်မၢလီၤပှၤခံဂၤဆူအဝဲဒၣ်အအိၣ်, ဒီးဃ့သကွံၢ်ကညးအီၤဒီးစံး, “ဝံသးစူၤမၤချ့ချ့ဒီးဟဲဘၣ်ဆူပအိၣ်တက့ၢ်.”

³⁹အန့ၣ်သတးဒီး, စီၤပ့းတရူးကတဲာ်ကတီၤထီၣ်အသးဒီးလဲၤ သကိးဝဲဒီးအဝဲသ့ၣ်လီၤ. တုၤအလဲၤတုၤဝဲဒီး, အဝဲသ့ၣ်ကိးထီၣ်အီၤဆူဒၢးအိၣ်လၢဟံၣ်ထးခီတဆီန့ၣ်လီၤ. ကယဲၢ်ပှၤမုၣ်ကမဲအိၣ်ဖဲန့ၣ်တဖၣ်ဆၢထၢၣ်ဝးတရံးစီၤပ့းတရူး, အိၣ်ဒီးမဲာ်ထံမဲာ်နိ, ဒီးဒုးနဲၣ်အီၤလၢဆ့ကၤဖီလာ်ဒီးဆ့ကၤဖီခိၣ် တဖၣ်လၢနီၢ်ဒီၢ်ကါဆးန့ၢ်အဝဲသ့ၣ်ဖဲအအိၣ်မူဒံးလၢ အဝဲသ့ၣ်အသိးအကျါအကတီၢ်န့ၣ်လီၤ.

⁴⁰စီၤပ့းတရူးမၢပှၤကိးဂၤဒဲးဟးထီၣ်ကွံာ်ဆူတၢ်ချၢဝံၤ, ချံးလီၤအခီၣ်ဒီးဃ့ထုကဖၣ်ယွၤလီၤ. အန့ၣ်ဝံၤအဝဲဒၣ်ဃၣ်ဃီၤအသးဆူပှၤစိၣ်အအိၣ်ဒီးစံး, “နီၢ်တဘံၤသါဧၢ, ဂဲၤဆၢထၢၣ်တက့ၢ်.” ပိာ်မုၣ်န့ၣ်အိးထီၣ်အမဲာ်ဒီးတုၤအထံၣ်ဘၣ်စီၤပ့းတရူးန့ၣ်ဒီး, ဂဲၤထၢၣ်ဒီးဆ့ၣ်နီၤဝဲဒၣ်လီၤ.

⁴¹စီၤပ့းတရူးယူာ်ဃီၤအစုဒီးဝံၢ်ဆၢထၢၣ်စၢၤအီၤလီၤ. အန့ၣ်ဝံၤကိးနုာ်က့ၤပှၤစီဆှံဒီးမုၣ်ကမဲတဖၣ်, ဒီးဒုးနဲၣ်အဝဲသ့ၣ်လၢပိာ်မုၣ်န့ၣ်မူဝဲန့ၣ်လီၤ.

⁴²တၢ်ကစီၣ်ဘၣ်ဃးတၢ်မၤအသးတမံၤအံၤဟူထီၣ်သါလီၤဝဲသကုၤ လၢဝ့ၢ်ယၤဖိၤအပူၤ, ဒီးပှၤစူၢ်က့ၤနာ်က့ၤကစၢ်တဘျုးဒံတဘျုးဂၤလီၤ.

⁴³စီၤပ့းတရူးအိၣ်ဝဲဖဲဝ့ၢ်ယၤဖိၤအပူၤန့ၣ်တဘျုးနံၤတဘျုးသီ, လၢစီၤၡံမိၣ်, ပှၤလၢအဟံးန့ၢ်ဆၣ်ဖိကီၢ်ဖိအဖံးအဘ့ၣ်ဒီးမၤကဲထီၣ်ဝဲလၢ တၢ်ဖံးတဂၤန့ၣ်, အဟံၣ်လီၤ.